1-2. Sɛbɛrikɛla dɔ ye mun lo fɔ? An bena mun lo lajɛ barokun nin na?

BI, MƆGƆ miliyɔn caaman b’a fɔ ko u lanin be Yezu la, nka u tɛ sɔn a ka kalanw ma (2 Tim. 4:3, 4). Sɛbɛrikɛla dɔ yɛrɛ y’a fɔ ko: “Ni Yezu dɔ tun b’an cɛma bi, min be Yezu yɛrɛyɛrɛ ka kumaw fɔ . . . , yala an tun bena ban a la i ko an banna Yezu la, a saan waa fila ye nin ye wa? . . . Tuma caaman na, o jaabili kɛra: Ɔnhɔn, an tun bena ban a la.”

² Saan kɛmɛkulu fɔlɔ la, mɔgɔ caaman ye Yezu ka kalanw mɛn ani k’a ka kabakow ye. Nka, u banna ka limaniya a la. Mun na do? Barokun tɛmɛnin na, an ye koo naani lajɛ minw y’a to mɔgɔw banna Yezu la a ka kumaw n’a ka kɛtaw kosɔn. An ka koo naani wɛrɛw lajɛ. U lajɛtɔ, an bena a ye fɛɛn min kama mɔgɔw be ban Yezu ka kalandenw na bi ani an be se ka min kɛ walisa koo si kana an kunnatiɲɛ.

3. Yezu tun be mun lo kɛ min y’a to mɔgɔ dɔw banna a la?

³ Tuma min na Yezu tun be dugukolo kan, a tun be jɛn ni mɔgɔ sifa bɛɛ ye. A ye dumuni kɛ ni nafolotigiw ani kuntigiw ye. Nka, a y’a ka wagati caaman kɛ ni fantanw ani barikantanw fana ye. Ka fara o kan, mɔgɔw tun be minw jati “hakɛkɛlaw ye,” a tun be makari olu la. Mɔgɔ minw tun b’u yɛrɛ jati mɔgɔ tilenninw ye, olu dɔw banna Yezu la a ka kɛtaw kosɔn. U ye a ka kalandenw ɲininga ko: “Mun na aw be dumuni kɛ ka minni kɛ ni lɛnpominɛlaw ani hakɛkɛlaw ye?” Yezu ye u jaabi ko: “Mɔgɔ minw ka kɛnɛ, olu mako te furakɛla la, banabagatɔw le mako b’a la. Ne ma na  mɔgɔtilenninw wele, nga ne nana hakɛkɛlaw le wele waasa u ka nimisa ka faran u ka kojuguw la.”—Luka 5:29-32.

4. Ka kɛɲɛ ni Ezayi ka kiraya kuma ye, Yahutuw tun ka ɲi ka mun lo lɔn Masiya koo la?

⁴ Ala ka Kuma be mun lo fɔ? Wagatijan ka kɔn Masiya nali ɲɛ, kira Ezayi tun y’a fɔ ko mɔgɔw bena ban a la. A y’a sɛbɛ ko: “A koo tun ka go mɔgɔw ye, u bann’a la. . . . A yetɔ, a te se ka filɛ! A koo goyara mɔgɔw ye fɔɔ an tun t’a jati.” (Ezayi 53:3). A tun fɔra o kiraya kuma kɔnɔ ko “mɔgɔw” tun bena ban Masiya la. O la, saan kɛmɛkulu fɔlɔ la, Yahutuw tun ka ɲi k’a lɔn ko mɔgɔw tun bena ban Yezu la.

5. Bi, mɔgɔ caaman be Yezu ka kalandenw jati cogo di?

⁵ Yala o ɲɔgɔn be kɛ bi wa? Ɔnhɔn. Minw tɔgɔ bɔra, nafolotigiw ani duniɲa mɔgɔw be minw jati hakilitigiw ye, diinan kuntigiw ka teli ka sɔn olu lo ma u ka legiliziw kɔnɔ. Legilizi kuntigiw be sɔn u ma, hali n’u tagamacogo bɛnnin tɛ ni Ala ka sariyaw ye tuma caaman na. O diinan kuntigiw tɛ Jehova Seerew jati sabu duniɲa mɔgɔw fana t’u jati. Jehova Seerew do kisɛyanin lo ani u tagamacogo ka ɲi. I ko Pol y’a fɔ cogo min na, duniɲa mɔgɔw tɛ “minw jati,” Ala ye olu lo sugandi (1 Kor. 1:26-29). Tiɲɛn na, Jehova sagokɛla kantigiw bɛɛ koo ka gwɛlɛ a ma.

6. Yezu ye mun lo fɔ Matiyo 11:25, 26 kɔnɔ ani an be se k’a ladegi cogo di?

⁶ An be se ka mun lo kɛ walisa koo dɔ kana an kunnatiɲɛ? (Matiyo 11:25, 26 kalan). Mɔgɔw be Ala sagokɛlaw jati cogo min na, kana a to o ka nɔɔ to i kan. A lɔn ko Jehova be tɛmɛ mɔgɔ majigininw dɔrɔn lo fɛ k’a sago dafa (Zab. 138:6). Duniɲa mɔgɔw tɛ minw jati hakilitigiw wala lɔnnikɛlaw ye, miiri k’a filɛ Jehova tɛmɛna olu fɛ ka koo minw bɛɛ kɛ.

7. Mun na Yezu ko Fariziɲɛw ye filankafow ye? U y’o koo ta cogo di?

⁷ Yezu ka wagati ka, a ye diinanw ka filankafoya bɔ kɛnɛ kan ni jagwɛlɛya ye. Misali la, a y’a fɔ ko Fariziɲɛw ye filankafow ye sabu olu fɛ, u tɛgɛkocogo tun kɔrɔtanin lo ka tɛmɛ u bangebagaw minɛcogo kan (Mat. 15:1-11). N’a sɔrɔ Yezu ka kumaw y’a ka kalandenw kabakoya. U yɛrɛ y’a ɲininga ko: “I m’a lɔn ko i ka kuma nin digira Fariziɲɛw na k’u hakili ɲagami wa?” Yezu y’u jaabi ko: “Ne Faa min be sankolo la ma yiri o yiri tutu, olu bena bɔn ka bɔ yen. Aw y’u ye k’u to yen, fiɲɛntɔw lo. Ni fiɲɛntɔ ye a tɔɲɔgɔn ka bere minɛ, u fila bɛɛ bena kori ka ben dingɛ kɔnɔ.” (Mat. 15:12-14). Diinan kuntigiw tun be Yezu ka kumaw ta cogo min na, a m’a to o k’a bali ka tiɲɛn fɔ.

8. Yezu y’a yira cogo di ko Ala tɛ sɔn diinanw bɛɛ ka kalanw ma?

⁸ Yezu ye diinanw ka ngalon kalanw fana bɔ kɛnɛ kan. A m’a fɔ ko Ala be sɔn diinanw bɛɛ ka kalanw ma. Nka, a ko mɔgɔ caaman tun bena siraba ta min be taga n’u ye halakiyɔrɔ la. A y’a fɔ fana ko mɔgɔ damanin dɔrɔn lo tun bena sira fitinin ta min be taga n’u ye ɲɛnamaya la (Mat. 7:13, 14). A y’a yira ka gwɛ ko dɔw tun bena a kɛ i n’a fɔ u be Ala sago kɛra, k’a sɔrɔ u t’a kɛra. Yezu y’a ka kalandenw lasɔmi ko: “Mɔgɔ minw be galon tigɛ k’olu ye kiraw ye, aw k’aw yɛrɛ kɔlɔsi olu la. N’u be na aw fɛ, u b’u yɛrɛ  kɛ sagaw ye k’a sɔrɔ waraw lo. Aw bena u lɔn u ka kɛwaliw fɛ.”—Mat. 7:15-20.

9. Yezu ye diinanw ka ngalon kalan jumanw lo bɔ kɛnɛ kan?

⁹ Ala ka Kuma be mun lo fɔ? A tun fɔra kiraya kuma dɔ kɔnɔ ko Masiya tun bena kisɛya kosɔbɛ Jehova batoso koo la (Zab. 69:10; Zan 2:14-17). Yezu y’o kiraya kuma dafa. A tun kisɛyanin lo minkɛ, o lo y’a lasun ka diinanw ka ngalon kalanw ani u ka kɛwale juguw bɔ kɛnɛ kan. Misali la, Fariziɲɛw tun b’a jati ko niin tɛ sa. Yezu ko mɔgɔ saninw be sinɔgɔra le (Zan 11:11). Saduseɲɛw tun b’a fɔ ko suuw tɛna kunu. Yezu kɔni y’a tericɛ Lazari suu kunu (Zan 11:43, 44; Kɛw. 23:8). Fariziɲɛw tun b’a fɔ ko koo o koo be adamaden sɔrɔ, o y’a dankan ani Ala nɔɔ lo ye. Yezu ye mɔgɔw kalan ko adamadenw be se k’a latigɛ ka Ala sago kɛ wala ka ban k’a kɛ.—Mat. 11:28.

10. Mun na mɔgɔ caaman be ban an na bi?

¹⁰ Yala o ɲɔgɔn be kɛ bi wa? Ɔnhɔn. Mɔgɔ caaman be ban an na sabu an be basigi Bibulu kan ka diinanw ka ngalon kalanw bɔ kɛnɛ kan. Legilizi kuntigiw b’a fɔ u ka diinandenw ye ko Ala be mɔgɔ juguw tɔɔrɔ jahanama tasuma kɔnɔ. U be tɛmɛ o ngalon kalan fɛ ka mɔgɔw lasun u ka kolo u ye. Komi an be kanutigi Ala Jehova lo bato, o kama an b’o ngalon kalan bɔ kɛnɛ kan. Legilizi kuntigiw be mɔgɔw kalan fana ko niin tɛ sa. An b’a yira ka gwɛ k’o kalan jujɔn bɔra kafiriyakow lo la. N’o kalan tun ye tiɲɛn ye, an mako tun tɛna kɛ sukununi na. Diinan caaman be mɔgɔw kalan ko koo min b’an sɔrɔ, o y’an dankan lo ye. An be mɔgɔw kalan ko see dira an ma ka koow latigɛ an yɛrɛ ma ani ko an be se k’a latigɛ ka Ala sago kɛ. Diinan kuntigiw b’o koo ta cogo di? Tuma caaman na, u be dimi kosɔbɛ an kɔrɔ!

11. Ka kɛɲɛ ni Yezu ka kumaw ye Zan 8:45-47 kɔnɔ, Ala be mun lo ɲini a sagokɛlaw fɛ?

¹¹ An be se ka mun lo kɛ walisa koo dɔ kana an kunnatiɲɛ? Ni tiɲɛn ka di an ye, an ka ɲi ka sɔn Ala ka fɔtaw  ma (Zan 8:45-47 kalan). An tɛ komi Sutana Naafigi. O kama, an sinsinnin lo tiɲɛn sira kan. An tɛ sɔn ka koo si kɛ min bɛnnin tɛ n’an ka lannakow ye (Zan 8:44). Ala b’a ɲini a sagokɛlaw fɛ u ka “kojugu haramuya” ani u ka “nɔrɔ koɲuman le ra” i ko Yezu y’a kɛ cogo min na.—Ɔrɔm. 12:9, Biblu Ala ta Kuma; Eburuw 1:9.

12. Yezu sara cogo min na, mun na o ye Yahutu caaman kunnatiɲɛ?

¹² Koo wɛrɛ juman lo ye Yahutuw kunnatiɲɛ Yezu ka wagati la? Pol y’a fɔ ko: “An be Krista gwengwenko fɔra. O kɛra kunnacɛnko ye zuwifuw fɛ.” (1 Kor. 1:23). Yezu sara cogo min na, mun na o ye Yahutu caaman kunnatiɲɛ? Olu fɛ, Yezu sara gwengwenyiri kan minkɛ, a tun be jati kojugukɛla ni jurumukɛla lo ye. O kama, u ma sɔn a ma ko ale lo ye Masiya ye.—Deter. 21:22, 23.

13. Minw banna Yezu la, olu ma sɔn mun lo ma?

¹³ Yahutu minw banna Yezu la, olu ma sɔn a ma ko a jalakibali tun lo, ko u ye ngalon lo tigɛ ka la a kan ani ko u ye tilenbaliyako lo kɛ a la. Minw ye kiti tigɛ Yezu kan, u ma sariya labato. Yahutuw ka kititigɛsoba mɔgɔw teliyara ka ɲɔgɔn lajɛn ani u ma koow kɛ ka kɛɲɛ ni sariya ye (Luka 22:54; Zan 18:24). U ma koow kɛ tilenninya la tuma min na u tun be Yezu jalakibagaw lamɛnna. U yɛrɛ tun be “galon dɔ ɲinina k’a la Yezu kan, waasa ka se k’a faga.” U ma se k’o kɛ minkɛ, sarakalasebagaw kuntigiba y’a ɲini ka Yezu minɛ a ka kumaw fɛ. O koo tun bɛnnin tɛ ni sariya ye fewu! (Mat. 26:59; Mariki 14:55-64). Yezu suu kununin kɔ, o kititigɛla tilenbaliw y’a ɲini ka ngalon jɛnsɛn o koo la. O kama, Ɔrɔmukaw ka sɔrɔdasi minw tun be Yezu ka kaburu kɔrɔsira, u ye “wari caaman di” olu ma k’u k’a fɔ ko Yezu ka kalandenw lo nana a suu ta.—Mat. 28:11-15.

14. Ala ka Kuma tun kɔnna ka mun lo fɔ Masiya saya koo la?

 ¹⁴ Ala ka Kuma be mun lo fɔ? Yezu ka wagati la, Yahutu caaman tun t’a miiri ko Masiya tun ka ɲi ka sa. Nka, a kɔrɔsi Ala ka Kuma tun ye min fɔ: “Ale yɛrɛ le y’a yɛrɛ di saya ma, u y’a jati kojugukɛlaw dɔ ye. Jama ka kojugu le tun b’a kunna, a tun be yafa ɲinina kojugukɛlaw le ye.” (Ezayi 53:12). O la, tuma min na mɔgɔw ye Yezu faga i ko kojugukɛla, Yahutuw tun man ɲi k’a to o ka u kunnatiɲɛ.

15. U ye Jehova Seerew jalaki mun lo kosɔn min ye mɔgɔ dɔw kunnatiɲɛ?

¹⁵ Yala o ɲɔgɔn be kɛ bi wa? Ɔnhɔn, a be kɛ! U ye Yezu jalaki ani ka kiti tilenbali tigɛ a kan. O tilenbaliyako ɲɔgɔn lo be kɛ Jehova Seerew la bi. An ka ɲɛyirali dɔw lajɛ. Saan 1930 ni saan 1950 cɛ Etazini, kitiko caaman kɛra walisa an ka se ka Ala bato an sago la. A gwɛnin lo ko kititigɛla dɔw tun be ni miiriya tilenbaliw ye an koo la. Kebɛki, Kanada jamana na, Legilizi ni faamanw jɛnna ka wuli an ka baara kama. U ye weleweledala caaman minɛ k’u don kaso la sabu u tun be Ala ka Masaya kofɔra u sigiɲɔgɔnw ye dɔrɔn. Alemaɲi, Naziw ye balima kanbele caaman faga. O balima bɛɛ tun ye kantigiw ye. Saan tɛmɛninw na, Irisi jamana na, faamanw y’an balima caaman jalaki ani k’u minɛ ka don kaso la sabu u tun be kumana Bibulu koo la. U y’o kɛ sabu u b’a jati ko “an ka Alakow y’a dama tɛmɛ.” U ye bali sigi hali Traduction du monde nouveau yɛrɛ kan ani k’a jati ko a kɔnɔnakow “y’a dama tɛmɛ” sabu Jehova tɔgɔ be a kɔnɔ.

16. Ka kɛɲɛ ni 1 Zan 4:1 ye, mɔgɔw be ngalon koo minw fɔ Jehova Seerew koo la, mun na an man ɲi k’a to u k’an lafili?

¹⁶ An be se ka mun lo kɛ walisa koo dɔ kana an kunnatiɲɛ? A ɲini ka tiɲɛn lɔn. Yezu ye kalan min kɛ kulu kan, o kalan na, a y’a lamɛnbagaw lasɔmi ko mɔgɔw bena ‘galon la u kan ko u be kojugu sifa bɛɛ kɛ.’ (Mat. 5:11). O ngalonw bɔra Sutana lo yɔrɔ. Tiɲɛn ka di minw ye, Sutana be u kɛlɛbagaw lasun u ka ngalonfin la u kan (Yir. 12:9, 10). An ka ɲi ka ban k’an kɛlɛbagaw ka ngalon kumaw lamɛn. An man ɲi k’a to abada o ngalonw ka siranya bila an na wala k’an ka limaniya nagasi.—1 Zan 4:1 kalan.

17. Koo minw kɛra ka kɔn Yezu saya ɲɛ, mun na u tun be se ka dɔw kunnatiɲɛ?

¹⁷ Dɔɔni ka kɔn Yezu saya ɲɛ, a ka ciden 12 dɔ y’a janfa. Yezu ka suu laban na, a ka ciden wɛrɛ y’a fɔ siɲɛ saba ko ale t’a lɔn ani u bɛɛ bolila k’a to yen (Mat. 26:14-16, 47, 56, 75). O ma bari Yezu la sabu ale yɛrɛ tun kɔnna k’a fɔ ko o bena kɛ (Zan 6:64; 13:21, 26, 38; 16:32). O koo tun be se ka dɔw kunnatiɲɛ ani k’a to u b’a fɔ u yɛrɛ ye ko: “Ni Yezu ka cidenw yɛrɛ lo be nin kɛra, ne t’a fɛ ka kɛ u dɔ ye!”

18. Koo minw kɛra ka kɔn Yezu saya ɲɛ, u ye kiraya kuma jumanw lo dafa?

¹⁸ Ala ka Kuma be mun lo fɔ? Saan kɛmɛkulu caaman ka kɔn Yezu nali ɲɛ dugukolo kan, Jehova tun kɔnna k’a fɔ ko u tun bena Masiya janfa warigwɛ 30 kosɔn (Zak. 11:12, 13). A tun fɔra ko o janfanci bena kɛ Yezu teri sɔbɛ dɔ lo ye (Zab. 41:10). Kira Zakari tun y’a fɔ fana ko: “Sagadɛndɛbaga bugɔ, sagaw be jɛnsɛn.” (Zak. 13:7). Mɔgɔ kɔnɔgwɛw tun man ɲi k’a to o koow ka u kunnatiɲɛ. U tun mana a ye o kiraya kumaw be dafara Yezu koo la, o tun bena u ka limaniya barika bonya le.

19. Mɔgɔ kɔnɔgwɛw be mun lo kala ma?

 ¹⁹ Yala o ɲɔgɔn be kɛ bi wa? Ɔnhɔn. An ka tile la, Jehova Seere minw lɔnnin lo kosɔbɛ, u damanin ye tiɲɛn sira bila, u be murutili kalanw kɛ ani u b’a ɲini ka tɔɔw lafili. U be kuma juguw, mɔgɔ lafili kumaw ani ngalonfinw jɛnsɛn Jehova Seerew koo la, zurunaliw, arajo, telewisɔn ani ɛntɛrɛnɛti kan. Nka, o koow tɛ mɔgɔ kɔnɔgwɛw kunnatiɲɛ. Olu b’a kala ma ko Bibulu tun kɔnna k’a fɔ ko o bena kɛ.—Mat. 24:24; 2 Piyɛri 2:18-22.

20. Minw ye tiɲɛn sira bila, an be se ka mun lo kɛ walisa u kana an kunnatiɲɛ? (2 Timote 4:4, 5).

²⁰ An be se ka mun lo kɛ walisa koo dɔ kana an kunnatiɲɛ? An ka ɲi ka to k’an ka limaniya barika bonya. Walisa k’o kɛ, an ka ɲi ka Bibulu ani an ka gafew sɛgɛsɛgɛ tuma o tuma. An ka to ka delili kɛ fana ani k’an seen don bɛrɛbɛrɛ waajuli baara la, Jehova y’o min kalifa an ma (2 Timote 4:4, 5 kalan). N’an limaniyanin lo, an hakili tɛna ɲagami n’an ye kuma juguw mɛn Jehova Seerew koo la (Ezayi 28:16). An be Jehova, a ka Kuma ani an balimaw kanu minkɛ, o bena an dɛmɛ walisa mɔgɔ minw ye tiɲɛn sira bila, olu kana an kunnatiɲɛ.

21. Bi, hali ni mɔgɔw fanba tɛ sɔn k’an lamɛn, an be se ka la mun lo la?

²¹ Saan kɛmɛkulu fɔlɔ la, mɔgɔ caaman y’a to koo dɔ ye u kunnatiɲɛ ani u banna Yezu la. Nka, mɔgɔ caaman wɛrɛw sɔnna a la. O mɔgɔw cɛma, Yahutuw ka kititigɛsoba mɔgɔ kelen ɲɔgɔn tun be yen ani hali “sarakalasebaga caaman” yɛrɛ (Kɛw. 6:7; Mat. 27:57-60; Mariki 15:43). Bi fana, mɔgɔ miliyɔn caaman m’a to koo si ka u kunnatiɲɛ. Mun na do? Sabu u be Bibulu ka tiɲɛn kalanw lɔn ani o ka di u ye. Bibulu b’a fɔ ko: “E ka sariya koo ka di mɔgɔ minw ye, olu ka hɛrɛ ka ca. Foyi fana t’a kɛ u be talon.”—Zab. 119:165.