O koo ye siranya bila n’ na ani ka n’ ka ɲɛnamaya yɛlɛma sabu n’ y’a daminɛ ka Ala yɔrɔ ɲini. Koo minw ye n’ sɔrɔ n’ denmisɛn tuma na ani u y’a to n’ y’a ɲini ka Ala lɔn, a y’a to n’ k’o lakali aw ye fɔlɔ. O kɔ, n’ bena a fɔ aw ye koo min kɛra Alzeri o loon sufɛ.

N’ wolola saan 1937 Genɛn dugu la, Faransi saheli fan fɛ. U be sarabɔn bɔ dugukolo jukɔrɔ o dugu la. N’ facɛ tun ye sarabɔnbɔla ye ani a ye n’ dɛmɛ k’a faamu ko a kɔrɔtanin lo ka kɛ baarakɛla ŋana ye. Tilenbaliyakow tun man di a ye ani n’ y’a ladegi o la. Sarabɔnbɔlaw ka baara tun man nɔgɔ hali dɔɔni ani farati tun b’a la. O kama, n’ facɛ ye dɔ kɛ dɔ ye walisa k’u ka koow cogoya fisaya. A donna jɛnkulu dɔw kɔnɔ minw be u ka joow lafasa. Mɔnpɛricɛw ka filankafoya tun b’a kɔnɔ gwan fana. U caaman tun be ɲɛnamaya kɛ faamanya la. Nka, u tun be dumuni ni wari deli sarabɔnbɔlaw fɛ, olu minw tun be bondori kɛ walisa k’u daradumuni sɔrɔ. O mɔnpɛricɛw ka kɛwalew tun b’a kɔnɔ gwan fɔɔ a ma n’ kalan diinankow la. An yɛrɛ ma deli ka kuma Ala koo la.

 N’ kɔrɔbayatɔ, ne fana y’a daminɛ ka tilenbaliyakow kɔniya. Ɲɛyirali fɛ, mɔgɔ dɔw tun be ni miiriya tilenbaliw ye lonanw koo la Faransi. N’ tun be to ka balɔn tan ni lonanw ka deenw ye ani ka wagati diiman kɛ n’u ye. Ka fara o kan, n’ bamuso tun tɛ bɔ Faransi, a tun be bɔ Polɔɲi jamana lo la. N’ tun b’a fɛ hɛɛrɛ ka kɛ siyaw ni ɲɔgɔn cɛ ani siyawoloma ka ban.

Saan 1957, u ye n’ weele sɔrɔdasiya la. O lo y’a to n’ ye n’ yɛrɛ sɔrɔ Alzeri kuluw kan o loon sufɛ i ko n’ y’a lakali barokun daminɛ na cogo min na. Tuma min na n’ ye Ala deli ko a ka n’ dɛmɛ, n’ ye kongofali dɔ lo ye n’ ɲɛfɛ. N’ hakili sigira k’a ye ko sɔrɔdasi tun tɛ. Nka, o koo ani marifakɛlɛ y’a to n’ miirila sɔbɛ la ɲɛnamaya kuun koo la. Mun na an be dugukolo kan? Yala Ala b’a janto an na wa? Yala hɛɛrɛ banbali bena kɛ yen loon dɔ wa?

Kɔfɛ, n’ ka kɔnze tuma na, n’ tagara bɔ n’ bangebagaw ye. N’ ye Jehova Seere dɔ kunbɛn yen. A ye Bibulu dɔ di n’ ma min tɔgɔ ko: La Sainte Bible. Katolikiw ka Bibulu bayɛlɛmani dɔ lo faransɛkan na. N’ kɔseginin Alzeri, n’ y’a daminɛ k’a kalan. Yirali 21:3, 4 diyara n’ ye kosɔbɛ. A fɔra yen ko: “Ala sigiyɔrɔ filɛ nin ye adamadenw cɛma . . . A bena u ɲaji bɛɛ cɛ. Saya kɔni, o te yen tugu. Mɔgɔ tena sa, mɔgɔ tena kasi, mɔgɔ tena tɔɔrɔ tugu.” * O kumaw ye n’ kabakoya. N’ ye n’ yɛrɛ ɲininga ko: “O be se ka kɛ tiɲɛn na wa?” O wagati la, n’ tun tɛ bɛrɛ lɔn Ala ani Bibulu koo la.

N’ tilanin kɔ n’ ka sɔrɔdasiya la saan 1959, n’ ye Jehova Seere dɔ kunbɛn min tɔgɔ ko François. A ye n’ kalan Bibulu ka tiɲɛnkalan caaman na. Misali la, a y’a yira n’ na Bibulu kɔnɔ ko Ala tɔgɔ ko Jehova (Zab. 83:19, Bible senuma 1961). François y’a ɲɛfɔ n’ ye fana ko Jehova bena tilenninya sigi dugukolo kan, k’a kɛ alijɛnɛ ye ani ka Yirali 21:3, 4 kɔnɔkumaw dafa.

O kalanw tun bɛnnin lo kosɔbɛ ani u ye n’ dusukun sɔrɔ. Nka, n’ dimina kosɔbɛ mɔnpɛricɛw kɔrɔ fana ani n’ tun b’a fɛ k’a yira bɛɛ la ko u ka kalanw tɛ bɔ Bibulu kɔnɔ! A be komi n’ facɛ ka miiriyaw bele tun be nɔɔ tora n’ kan. N’ tun kɔrɔtɔnin lo kojugu ka dɔ kɛ dɔ ye walisa koow ka yɛlɛma joona joona.

François ani n’ teri wɛrɛ minw ye Jehova Seerew ye, olu ye n’ dɛmɛ n’ sera n’ dusu kɔrɔ. U y’a ɲɛfɔ n’ ye ko an Jehova Seerew ka baara tɛ ka kiti tigɛ mɔgɔw kan. Nka, an be jigiya lo di u ma Ala ka Masaya kibaro diiman sababu fɛ. Yezu y’o baara lo kɛ ani a y’o kalifa a ka kalandenw ma (Mat. 24:14; Luka 4:43). Ne fana ka ɲi ka n’ jija ka kuma mɔgɔw fɛ nɛmɛnɛmɛ ni ɲumanya ye, u ka lannakow mana kɛ min o min ye. Bibulu b’a fɔ ko: “Matigi ka baarakɛla man kan ka kɛlɛ kɛ, a ka kan ka mɔgɔ bɛɛ koo diya a yɛrɛ ye.”—2 Tim. 2:24.

N’ tun ka kan ka yɛlɛmani minw kɛ, n’ y’o kɛ. Saan 1959, n’ batizera ka kɛ Jehova Seere dɔ ye kafokulu ka lajɛnba dɔ la. Ne ni balima sunguru dɔ ye ɲɔgɔn lɔn yen. A tɔgɔ ko  Angèle ani n’ jarabira a la. O kama, n’ y’a daminɛ ka taga bɔ a ye a ka kafo kɔnɔ ani saan 1960, n’ y’a furu. Muso ɲumanba, ani Jehova ka nilifɛnba lo.—Talenw. 19:14.

Saan tɛmɛninw na, n’ ye kalan nafaman caaman sɔrɔ balimacɛ hakilitigiw ni kolɔnbagaw fɛ. U bɛɛ la nafaman ye ko: Walisa ka se ka kunkanbaaraba dɔ dafa, an ka ɲi ka kɛ ni majigilenya ye ani ka Talenw 15:22 ka hakilitigiya kuma sira tagama. A fɔra yen ko: “Koo be ɲa ladilikɛbaga caaman sababu la.”

Saan 1964, n’ y’a daminɛ k’a ye k’o kumaw ye tiɲɛn ye yɛrɛ le! O saan na, n’ kɛra kafokulu kɔrɔsibaga ye. N’ tun be taga bɔ balimaw ye kafow kɔnɔ walisa k’u jija ani k’u ka limaniya sabati. Nka, n’ tun be ni saan 27 dɔrɔn lo ye ani n’ tun tɛ koo caaman lɔn. O kama, n’ tun be filiw kɛ. Nka, n’ tun b’a ɲini ka kalan sɔrɔ n’ ka filiw la. Min yɛrɛ kɔrɔtanin lo kosɔbɛ, o ye ko n’ ye kalan nafaman caaman sɔrɔ “ladilikɛbaga” ɲumanw ni kolɔnbagaw fɛ.

N’ hakili be koo dɔ la min kɛra tuma min na n’ kɛra kafokulu kɔrɔsibaga ye kura ye. N’ tun tagara bɔ balimaw ye kafo dɔ kɔnɔ Pari. Balimacɛ kolɔnbaga dɔ ko a b’a fɛ an ka ɲɔgɔn ye. N’ y’a fɔ ko: “Basi tɛ.”

A ye n’ ɲininga ko: “Louis, dɔgɔtɔrɔ be taga jɔn lo filɛ a ka soo?”

N’ y’a jaabi ko: “Banabagatɔw.”

A ko: “O ye tiɲɛn ye. Nka, n’ y’a kɔrɔsi ko i b’i ka wagati fanba kɛ ni kafo kɔrɔsibaga ani balima wɛrɛw ye minw be jɛnɲɔgɔnya ɲuman kɛra ni Jehova ye. Balima caaman do be an ka kafo kɔnɔ minw fari faganin lo, kuma man di u ye ani dɔw ye mɔgɔ kuraw ye. A tun bena diya u ye kosɔbɛ n’i be wagati kɛ n’u ye. I yɛrɛ be se ka taga dumuni kɛ n’u ye u ka soo.”

N’ y’o balima kanulen waleɲuman lɔn a ka ladili ɲuman kosɔn. A tun be Jehova ka sagadenw kanu cogo min na, o ye n’ dusu sɔrɔ kosɔbɛ. O kama, hali n’a tun ka gwɛlɛ ka sɔn a ma ko n’ filila, n’ sinna k’a ka ladili sira tagama. N’ be Jehova fo o balimaw ɲɔgɔn kosɔn.

Lajɛnba minw labɛnna jamana caaman kama, u dɔ kɛra Kolɔnb, Pari dugu la saan 1969 ani dɔ wɛrɛ kɛra saan 1973. Kɔmite min be dumuni koo ɲɛnabɔ, u ye n’ sigi o kun na.  Saan 1973 ka lajɛnba la, an tun ka ɲi ka dumuni di mɔgɔ 60 000 ɲɔgɔn ma tile duuru kɔnɔ! N’ tun t’a lɔn an bena se k’o kɛ cogo min na. Nka nin sen fɛ tugun, Talenw 15:22 ka fɔta ye n’ dɛmɛ, o min ye ka ladiliw ɲini hakilitigiw fɛ. N’ ye ladili ɲini balima kolɔnbaga minw fɛ, u dɔw tun ye sogo feerelaw, nankɔtigiw, tobilikɛlaw ani sannikɛlaw ye. U bɛɛ ka dɛmɛ sababu la, an sera k’o baara gwɛlɛ kɛ.

Saan 1973, u ko ne ni n’ muso ka na baara kɛ Betɛli la Faransi. Betɛli la, n’ ka baara fɔlɔ tun ka gwɛlɛ kosɔbɛ fana. N’ tun ka ɲi k’an ka sɛbɛw ci an balimaw ma Kameruni jamana na, Afiriki. N’ tun lanin t’a la ko n’ bena se k’o baara fana kɛ sabu saan 1970-1993, bali tun sigira an ka baara kan yen. An balima minw tun be waajuli baara ɲɛminɛna Faransi, n’a sɔrɔ olu y’a faamu ko n’ hakili tun siginin tɛ. U ye n’ jija ko: “An balima minw be Kameruni, u mako gwɛlɛ be an ka sɛbɛw la. An ka ɲi k’o sɛbɛw ci u ma.” An y’o lo kɛ fana.

N’ ye voyazi caaman kɛ ka taga jamana dɔw la minw man jan ni Kameruni ye. N’ y’o kɛ walisa ka Kameruni ka diinan mɔgɔkɔrɔw kunbɛn. O balimaw jaa tun ka gwɛlɛ ani hakilitigiw tun lo. U ye n’ dɛmɛ ka fɛɛrɛw sɔrɔ walisa Kameruni balimaw k’an ka gafew sɔrɔ tuma o tuma. Jehova y’an duga an ka jijaliw kosɔn. Saan 20 ɲɔgɔn kɔnɔ, Kameruni balimaw ma fɔn an ka sɛbɛ nunu si la: Kɔrɔsili Sangaso ani Le service du Royaume (o sɛbɛ tun be bɔ kalo o kalo).

Kabi ne ni Angèle y’a daminɛ ka teriya kɛ furu kama, n’ y’a kɔrɔsi ko a be jɛnɲɔgɔnya ɲuman kɛra ni Jehova ye. An furunin kɔ yɛrɛ le n’ y’o kɔrɔsi bɛrɛbɛrɛ. Misali la, an furulon sufɛ, a ko n’ k’a fɔ Jehova ye delili la ko an b’a fɛ k’an seko bɛɛ kɛ a ka baara la ɲɔgɔn fɛ. Jehova y’o delili jaabi.

 Angèle ye n’ dɛmɛ fana n’ ye n’ jigi bɛɛ la Jehova kan. Misali la, saan 1973 tuma min na u y’an weele Betɛli la, ne tun be sigasigara ka taga sabu kafokulu kɔrɔsili baara tun ka di n’ ye kosɔbɛ. Nka, Angèle ye n’ hakili jigi ko an y’an yɛrɛkun di Jehova lo ma. O kama, a ka ɔriganisasiyɔn mana min o min ɲini an fɛ, an ka ɲi ka sɔn k’o kɛ (Eburuw 13:17). A ye min fɔ, n’ sɔnna o ma! O kama, an tagara Betɛli la. N’ muso ye hakilitigi ye, a be koow kɛ k’a dama kɛɲɛ ani Jehova koo ka di a ye kosɔbɛ. O jogow y’an ka jɛnɲɔgɔnya sabati. An ye saan caaman minw kɛ ɲɔgɔn fɛ, o jogow y’a to fana an ye desizɔn ɲumanw ta.

Sisan, an kɔrɔla. Nka, Angèle bele ye muso ɲumanba ani dɛmɛbaga ɲuman ye. Misali la, ne ni Angèle y’a daminɛ ka jijalibaw kɛ walisa ka angilikan mɛn ka ɲɛ. An y’o kɛ sabu an tun b’a fɛ ka Bibuluko lakɔliw kɛ u minw fanba tun be kɛ angilikan na. O wagati la, an tun be ni saan 75 ni kɔ ye. O bɛɛ n’a ta, an tun be lajɛnw kɛ ni angilikan kafo dɔ ye. N’ ye Faransi ka Betɛli ka kɔmite mɔgɔ dɔ ye minkɛ, n’ ka kunkanbaaraw ka ca. O kama, a tun man nɔgɔ n’ ma ka kaan wɛrɛ degi. Nka, ne ni Angèle ye ɲɔgɔn dɛmɛ. Sisan, an be ni saan 80 ni kɔ ye ani an bele be to k’an ka lajɛnw labɛn faransɛkan ani angilikan na. An b’an seko bɛɛ kɛ fana ka lakalitaw kɛ lajɛnw na ani ka waajuli kɛ n’an ka kafo ye. An be jijali minw kɛra walisa ka angilikan degi, Jehova y’an duga o kosɔn.

Saan 2017, u y’an weele tɔnbolo ka kɔmite mɔgɔw n’u musow ka lakɔli la. O tun ye nɛɛmaba yɛrɛ lo ye! O lakɔli kɛra Watchtower ka Bibuluko lakɔliw kɛyɔrɔ la Patɛrsɔn, Niyɔriki.

Tiɲɛn na, Jehova ye Kalanfa ye min ɲɔgɔn tɛ yen! (Ezayi 30:20). O la, a tɛ bari an na k’a ye ko a sagokɛlaw bɛɛ, denmisɛnw wo, mɔgɔkɔrɔbaw wo, u be kalan min sɔrɔ, o ɲɔgɔn tɛ yen! (Deter. 4:5-8). N’ y’a kɔrɔsi ko kanbelew ni sunguru minw be mɛnni kɛ Jehova ni balima kolɔnbagaw fɛ, olu be desizɔn ɲumanw ta. U be kɛ Jehova sagokɛla kantigiw fana ye. A fɔra Talenw 9:9 kɔnɔ ko: “I ka lɔnnikɛla kalan, dɔ bena fara a ka lɔnniya kan. Mɔgɔtilennin ladi, o bena dɔ fara a ka sɔrɔ kan.”

A saan 60 ɲɔgɔn ye nin ye, n’ tun be Alzeri kuluw kan sufɛ ani n’ tun sirannin lo kosɔbɛ. Hali bi, n’ be to ka miiri o la tuma kelen kelen. O loon sufɛ, n’ tun t’a lɔn ko n’ bena ninsɔndiya sɔrɔ ten! N’ ye kalan caaman sɔrɔ tɔɔw fɛ. Jehova ka dɛmɛ barika la, ne ni Angèle ye ninsɔndiya sɔrɔ an ka ɲɛnamaya la ani an wasanin lo. O la, an jijanin lo ka to ka kalan sɔrɔ an sankolola Faa Jehova fɛ. An jijanin lo fana ka kalan sɔrɔ an balima hakilitigiw ni kolɔnbagaw fɛ olu minw be Jehova kanu.