1-2. N’an ka koow cogoya yɛlɛmana, mun na an b’a ye ko bibulusen dɔw ɲɛsinna an ma tigitigi?

 U FURULON na, furuɲɔgɔnw ka teli ka forobakalan dɔ lamɛn furu koo la min basiginin be Bibulu kan. Vɛrise minw be kalan o forobakalan tuma na, furuɲɔgɔnw b’u lɔn ka ban. Nka sisan, u b’a ye ko o vɛrisew ɲɛsinna u ma tigitigi. Mun na do? Sabu u ka ɲi ka to k’u sira tagama u ka furu kɔnɔ.

² O kelen lo ni kerecɛn dɔw ye deen sɔrɔ. Saanw tɛmɛtɔ, n’a sɔrɔ u ye forobakalan caaman lamɛn deenw lamɔcogo koo la. Nka sisan, u b’a ye ko o forobakalanw ka ladiliw ɲɛsinna u ma tigitigi sabu u ye deen sɔrɔ u ka ɲi ka min lamɔ. O ye kunkanbaaraba yɛrɛ lo ye! Siga t’a la, n’an ka koow cogoya yɛlɛmana, an b’a ye ko bibulusen dɔw ɲɛsinna an ma tigitigi. O lo kama fana Jehova sagokɛlaw be Bibulu kalan ani ka miiri a kan “loon bɛɛ” u sii bɛɛ la. O lo tun ɲinina Israɛl masacɛw fɛ.—Deter. 17:19.

3. An bena mun lo lajɛ barokun nin na?

³ Kerecɛnw be ni nɛɛma dɔw ye minw ɲɔgɔn tɛ yen. Bangebagaw, o nɛɛma dɔ kalifara aw ma, o min ye ka aw deenw kalan Jehova koo la. Aw man ɲi ka dan ka kunnafoniw di u ma an ka Ala koo la. Nka aw ka ɲi k’u dɛmɛ u k’a kanu kosɔbɛ. Aw be se ka mun lo kɛ k’aw deenw dɛmɛ u ka Jehova kanu? Barokun nin na, an bena Bibulu ka sariyakolo naani lajɛ minw be se ka aw  bangebagaw dɛmɛ (2 Tim. 3:16). An bena a ye fana cogo min na bangebaga dɔw ye nafa sɔrɔ, u kɛtɔ ka Bibulu ka ladiliw sira tagama.

4. Sariyakolo minw be se ka bangebagaw dɛmɛ u ka Jehova kanu don u deenw dusu la, u la dɔ ye juman ye? (Zaki 1:5).

⁴ Sariyakolo fɔlɔ: Ladiliw ɲini Jehova fɛ. I mako be hakilitigiya min na walisa k’i deenw dɛmɛ u ka Jehova kanu, o deli Jehova fɛ (Zaki 1:5 kalan). Ladili dibaga ɲuman tɛ yen i ko Jehova. An b’o fɔ kuun caaman kosɔn. An k’u la fila lajɛ. A fɔlɔ, bangebaga si ka lɔnniya ma se Jehova ta ma (Zab. 36:10). A filanan, a be ladili ɲuman minw di, u b’an nafa tuma bɛɛ.—Ezayi 48:17.

5. a) Jehova ka ɔriganisasiyɔn ye mun ni mun lo labɛn walisa ka bangebagaw dɛmɛ? b) I ko a yirala videwo kɔnɔ cogo min na, i be kalan juman lo sɔrɔ balimacɛ ni balimamuso Amorim fɛ u ka deenw lamɔcogo koo la?

⁵ Jehova be tɛmɛ a ka Kuma n’a ka ɔriganisasiyɔn fɛ ka kunnafoni caaman di bangebagaw ma walisa u k’u deenw dɛmɛ u k’ale kanu (Mat. 24:45). Misali la, i be se ka ladili nafaman caaman sɔrɔ barokun nunu na: “De l’aide pour les familles.” Saan tɛmɛninw na, u tun be to ka bɔ Réveillez-vous ! kɔnɔ. Nka sisan u be sɔrɔ an ka site web kan faransɛkan na. Videwo caaman fana be sɔrɔ jw.org kan minw be se ka bangebagaw dɛmɛ u ka Jehova ka ladiliw sira tagama, n’u be u deenw lamɔna. *—Talenw 2:4-6.

6. Denfa dɔ n’a muso be ladili minw sɔrɔ ka bɔ Jehova ka ɔriganisasiyɔn fɛ, u be mun lo miiri u koo la?

⁶ Jehova be tɛmɛ a ka ɔriganisasiyɔn fɛ ka dɛmɛ min lase bangebagaw ma, u caaman y’a fɔ ko u b’a waleɲuman lɔn kosɔbɛ o kosɔn. Denfa dɔ tɔgɔ ko Joe ani a ko: “Ka deen saba lamɔ tiɲɛn batoli la, o tɛ kɔlɔkɔlɔko ye. Ne ni n’ muso be to ka Jehova deli tuma o tuma a k’an dɛmɛ. Ani an y’a kɔrɔsi ko tuma caaman na, an be barokun wala videwo dɔ sɔrɔ wagati bɛnnin na min b’an dɛmɛ k’an ka  gwɛlɛya dɔ ɲɛnabɔ. Tuma bɛɛ, an b’an jigi la Jehova lo kan a k’an ɲɛminɛ.” Joe n’a muso y’a ye ko o barokunw n’o videwow be u deenw dɛmɛna u k’u magwɛrɛ Jehova la.

7. Mun na a kɔrɔtanin lo bangebagaw ka kɛ ɲɛyirali ɲumanw ye u deenw fɛ? (Ɔrɔmukaw 2:21).

⁷ Sariyakolo 2nan: Kɛ ɲɛyirali ɲuman ye i deenw fɛ. Denmisɛnw b’u bangebagaw kɔrɔsi koɲuman ani u ka teli k’u ladegi. Tiɲɛn lo ko bangebaga si dafanin tɛ (Ɔrɔm. 3:23). O bɛɛ n’a ta, bangebaga hakilitigiw b’u seko bɛɛ kɛ ka kɛ ɲɛyirali ɲumanw ye u deenw fɛ (Ɔrɔmukaw 2:21 kalan). Denfa dɔ y’a fɔ denmisɛnw koo la ko: “U be i ko sifɔn. I mana sifɔn don jifɛn o fɛɛn na, a b’o lo min.” A y’a fɔ fana ko: “An b’u kalanna min na, n’o bɛnnin tɛ n’an ka kɛtaw ye, u bena o fɔ an ye.” O la n’an b’a fɛ an deenw ka Jehova kanu, an yɛrɛ ka ɲi k’a yira ka gwɛ ko an be Jehova kanu kosɔbɛ.

8-9. I be kalan juman lo sɔrɔ Andrew ani Emma ka fɔtaw la?

⁸ Bangebagaw be se ka u deenw kalan cogo caaman na walisa u ka Jehova kanu. Balimacɛ Andrew be ni saan 17 ye ani a ko: “N’ bangebagaw tun b’a fɔ n’ ye tuma bɛɛ ko delili kɔrɔtanin lo. Loon o loon sufɛ, baba tun be delili kɛ ni n’ ye, hali ni n’ tun ye delili kɛ ka ban n’ yɛrɛ ma. An bangebagaw tun be to k’a fɔ an ye tuma bɛɛ ko: ‘Aw be se ka kuma Jehova fɛ siɲɛ daa min k’aw diya.’ O kama, delili kɔrɔtanin lo kosɔbɛ n’ fɛ. Sisan, a ka nɔgɔ n’ ma ka delili kɛ ani k’a ye ko Jehova ye Faa ye min be n’ kanu.” Bangebagaw, aw k’a to aw hakili la tuma bɛɛ ko aw yɛrɛ be Jehova kanu cogo min na, o be se k’aw deenw dɛmɛ olu fana k’a kanu.

⁹ An ka Emma ka koo lajɛ fana. Juruba tun b’a facɛ kan ani a tagara k’u to yen minkɛ, a bamuso lo tun ka kan k’o juru sara. Emma ko: “Tuma caaman na wari bɛrɛ tun tɛ kɛ n’ bamuso fɛ. Nka, a tun b’a fɔ an ye tuma bɛɛ Jehova b’a janto a sagokɛlaw la cogo min na. N’ tun b’a ye a ka ɲɛnamaya kɛcogo fɛ ko a lanin b’o la yɛrɛ le. N’ bamuso tun be n’ kalan min na, ale yɛrɛ tun b’o lo kɛ.” An be kalan juman lo sɔrɔ o koo la? Bangebagaw be se k’u deenw kalan u ka ɲɛyirali fɛ, hali gwɛlɛyaw wagati la.—Gal. 6:9.

10. Sababu jumanw lo tun be Israɛldenw fɛ ka baro kɛ n’u deenw ye? (Deteronɔmu 6:6, 7).

¹⁰ Sariyakolo 3nan: Baro kɛ n’i deenw ye tuma o tuma. Galen, Jehova tun ye cii di Israɛldenw ma ko u k’u deenw kalan ale koo la tuma o tuma (Deteronɔmu 6:6, 7 kalan). Tile kuru bɛɛ kɔnɔ, sababu caaman tun be Israɛldenw fɛ ka baro kɛ n’u deenw ye ani ka Jehova kanuya don u dusu la. Misali la, cɛden tun be se ka lɛri caaman kɛ n’a facɛ ye k’a dɛmɛ ka danni kɛ wala ka suman ladon. Tile kɔnɔ, musoden tun be wagati caaman kɛ n’a bamuso ye k’a dɛmɛ ka kalannin kɛ, ka fani dan ani ka sokɔnɔ baara wɛrɛw kɛ. Baara kɛtɔ n’u deenw ye, bangebagaw tun be se ka baro kɛ n’u ye koo kɔrɔtanin caaman kan. Misali la, u tun be se ka baro kɛ Jehova ka ɲumanya koo la ani a be u ka denbaya dɛmɛna cogo min na.

11. Sababu minw be kerecɛn bangebagaw fɛ ka baro kɛ n’u deenw ye, u la dɔ ye juman ye?

¹¹ Wagatiw yɛlɛmana. Yɔrɔ caaman na, bangebagaw tɛ se ka wagati kɛ n’u deenw ye tile kɔnɔ. N’a sɔrɔ bangebagaw be taga baarakɛyɔrɔ ani denmisɛnw be taga lakɔliso. O kama, bangebagaw ka  ɲi ka sababuw ɲini walisa ka baro kɛ n’u deenw ye (Efɛz. 5:15, 16; Filip. 1:10). Gwa kɔnɔ batoli be o sababu di bangebagaw ma. Balima kanbele dɔ tɔgɔ ko Alexander ani a ko: “N’ facɛ be labɛn kɛ tuma bɛɛ gwa kɔnɔ batoli kama ani a t’a to foyi k’an bali k’o wagati kɛ ɲɔgɔn fɛ. Kalan kɔ, an be to ɲɔgɔn fɛ ka baro kɛ.”

12. Denbaya kuntigi be se ka mun lo kɛ gwa kɔnɔ batoli tuma na?

¹² N’i ye denbaya kuntigi ye, i be se ka mun lo kɛ walisa gwa kɔnɔ batoli ka diya i deenw ye? An ka gafe ɲuman min bɔra kura ye, n’a sɔrɔ i be se ka o kalan n’i deenw ye: Ɲɛnamaya kɛ hɛɛrɛ la fɔɔ abada! O gafe kalan be sababuw di i ma ka baro diimanw kɛ n’i deenw ye. I b’a fɛ i deenw ka u dusukunnakow ani u haminankow fɔ i ye. O kama, kana to ka u sɔngɔ wala k’u ɲangi gwa kɔnɔ batoli tuma na. N’i deenw ye miiriya dɔ fɔ min bɛnnin tɛ ni Bibulu ka fɔta ye, kana dimi o kosɔn. Nka, a yira ko a ka di i ye u k’u kɔnɔ gwɛ ka kuma i fɛ ani u jija u ka to k’o kɛ. N’i b’i deenw ka miiriya lɔn, i bena se k’u dɛmɛ koɲuman.

13. Sababu wɛrɛ jumanw lo be bangebagaw fɛ k’u deenw dɛmɛ u k’u magwɛrɛ Jehova la?

¹³ Bangebagaw, tile kuru bɛɛ kɔnɔ, aw ka sababuw ɲini k’aw deenw dɛmɛ u k’u magwɛrɛ Jehova la. Aw kana aw deenw kalan an ka Ala kanutigi koo la bibulukalan wagati dɔrɔn na. Denba dɔ tɔgɔ ko Lisa. Ale ko: “An y’an deenw dɛmɛ u y’a lɔn jɛɛn min be danfɛnw ni Jehova cɛ. Misali la, tuma dɔw la, an ka wulu be koo dɔw kɛ minw be yɛlɛ bila an deenw na. An b’a fɔ u ye ko o b’a yira ko Jehova ye ninsɔndiyatigi Ala ye ani ko a b’a fɛ an fana ka ninsɔndiya sɔrɔ ani ka fɛɛn ɲumanw diyabɔ.”

14. Mun na a kɔrɔtanin lo bangebagaw k’u deenw dɛmɛ u ka teri ɲumanw sugandi? (Talenw 13:20).

¹⁴ Sariyakolo 4nan: I deenw dɛmɛ u ka teri ɲumanw sugandi. Bibulu b’a yira ka gwɛ ko an teriw be se ka nɔɔ ɲuman wala nɔɔ jugu to an kan (Talenw 13:20 kalan). Bangebagaw, aw be aw deenw teriw lɔn wa? Yala aw delila ka wagati kɛ  n’u ye wa? Jehova koo ka di mɔgɔ minw ye, aw be se k’aw deenw dɛmɛ cogo di u ka olu kɛ u teriw ye? (1 Kor. 15:33). Mɔgɔ minw be jɛnɲɔgɔnya ɲuman kɛra ni Jehova ye, aw be se ka olu dɔw weele u ka na koo dɔw kɛ n’aw ye aw ka denbaya kɔnɔ. O bena aw deenw dɛmɛ u ka teri ɲumanw sugandi.—Zab. 119:63.

15. Bangebagaw be se ka mun lo kɛ walisa k’u deenw dɛmɛ u ka teri ɲumanw sɔrɔ?

¹⁵ An ka denfa dɔ ka koo lajɛ min tɔgɔ ko Tony. A y’a ɲɛfɔ ale n’a muso ye min kɛ walisa k’u deenw dɛmɛ u ka teri ɲumanw sɔrɔ. A ko: “Saan caaman kɔnɔ, ne ni n’ muso ye balima caaman weele ka na an ka soo. U dɔw tun ye kanbelew, sunguruw ani mɔgɔkɔrɔbaw ye. An tun be dumuni kɛ ani ka gwa kɔnɔ batoli kɛ ɲɔgɔn fɛ. O kɛra sababu ye an ye balima caaman lɔn minw be Jehova kanu ani u be baara kɛra a ye ninsɔndiya la. An ninsɔn diyara ka kafokulu kɔrɔsibagaw, misɔndenw ani balima wɛrɛw ladon an ka soo. O balimaw be koo caaman lɔn, u kisɛyanin lo ani u b’u yɛrɛ di ka baara kɛ Jehova ye. U ye nɔɔba to an deenw kan ani k’u dɛmɛ u y’u magwɛrɛ kosɔbɛ Jehova la.” Bangebagaw, aw y’aw jija k’aw deenw dɛmɛ u ka teri ɲumanw sɔrɔ.

16. N’i deen dɔ ko ale t’a fɛ ka Jehova sago kɛ do?

¹⁶ Bangebaga, i ka jijaliw bɛɛ n’a ta, n’i deen dɔ ko ale t’a fɛ ka Jehova sago kɛ do? Kana a miiri ko i ma i ka kunkanbaara dafa ka ɲɛ. Jehova ye setigiya di an kelen kelen bɛɛ ma an ka koow latigɛ an yɛrɛ ma, o kɔrɔ, an lo b’a latigɛ n’an bena a sago kɛ wala n’an tɛna a kɛ. A y’o see di i deen ma fana. N’i deen y’a latigɛ ka bɔ Jehova kɔ, kana a miiri ko a tɛna kɔsegi a ma loon dɔ. Yezu ye ntalen min la deen tununin koo la, i hakili to o la (Luka 15:11-19, 22-24). O deen ye koo jugu caaman kɛ, nka a laban, a kɔsegira. Dɔw be se k’a fɔ ko: “O ye ntalen dɔrɔn lo ye. Yala o koo be se ka kɛ tiɲɛn tiɲɛn na wa?” Ɔnhɔn, a be se! O ɲɔgɔn lo kɛra kanbele dɔ la min tɔgɔ ko Elie.

17. Elie ka koo b’i jija cogo di?

 ¹⁷ Elie y’a fɔ a bangebagaw koo la ko: “U y’u seko bɛɛ kɛ ka n’ dɛmɛ walisa Jehova n’a ka Kuma koo ka diya n’ ye. Nka tuma min na n’ ye saan 15 ɲɔgɔn sɔrɔ, n’ y’a daminɛ ka muruti.” Elie y’a daminɛ ka koo bɛnbaliw kɛ dogo la. A bangebagaw y’u jija k’a dɛmɛ walisa a magwɛrɛnin ka to Jehova la. Nka, a ma mɛnni kɛ u fɛ. A laban, a bɔra soo ani a y’a daminɛ ka kɛwale juguw kɛ. O bɛɛ n’a ta, tuma dɔw la a tun be to ka kuma Bibulu koo la n’a teri dɔ ye. Elie ko: “Tuma o tuma ni n’ tun ye Jehova kofɔ n’ tericɛ ye, ne yɛrɛ tun be to ka miiri Jehova koo la. N’ bangebagaw tun y’u jija ka tiɲɛn kisɛ minw dan n’ dusukun na, dɔɔni dɔɔni u y’a daminɛ ka falen ani ka bonya.” A laban, Elie kɔsegira Jehova ma. * Miiri k’a filɛ a bangebagaw ninsɔn diyara cogo min na sabu u y’u jija k’a kalan walisa a ka Jehova kanu kabi a denmisɛn tuma!—2 Tim. 3:14, 15.

18. Bangebaga minw b’u jija kosɔbɛ k’u deenw kalan u ka Jehova kanu, i be mun lo miiri olu koo la?

¹⁸ Bangebagaw, Jehova ye nɛɛmaba kɛ aw ye. O ye k’aw deenw kalan walisa u ka kɛ a sagokɛlaw ye (Zab. 78:4-6). O tɛ kɔlɔkɔlɔko ye ani an b’aw tando sɔbɛ la aw ka jijalibaw kosɔn! Aw ka to k’aw seko bɛɛ kɛ k’aw deenw dɛmɛ walisa u ka Jehova kanu ani ka mɛnni kɛ a fɛ. N’aw b’o kɛ, aw be se ka la a la ko an sankolola Faa kanutigi dusu bena diya aw kɔrɔ.—Efɛz. 6:4.