1. Adamadenw kelen kelen bɛɛ ka ɲi ka desizɔnba juman lo ta?

 BI, MƆGƆW ka ɲi ka desizɔnba dɔ ta. Yala u bena Jehova ka kuntigiya lo lafasa, joo be ale min fɛ ka duniɲa kuru bɛɛ mara? Wala u bena Sutana ka kuntigiya lo lafasa, ale min ye Jehova juguba ye? Mɔgɔ tɛ se k’a fɔ ko ale niin t’o sugandili koo la. Mɔgɔw bena desizɔn min ta, o lo bena a yira n’u bena ɲɛnamaya kɛ fɔɔ abada wala n’u tɛna a kɛ (Mat. 25:31-33, 46). “Tɔɔrɔba” wagati la, tagamasiɲɛ bena la u kan k’a yira n’u ka ɲi ka kisi wala n’u ka ɲi ka halaki.—Yir. 7:14; 14:9-11; Ezek. 9:4, 6.

2. a) Eburuw 10:35-39 b’an jija an ka mun lo kɛ? b) Yirali ka kitabu be se k’an dɛmɛ cogo di?

² Eburuw 10:35-39 kalan. N’i y’a latigɛ ka Jehova ka kuntigiya lafasa, o ye desizɔn ɲuman lo ye. Sisan, i b’a fɛ ka tɔɔw dɛmɛ olu fana ka desizɔn ɲuman ta. Kunnafoni minw be Yirali ka kitabu kɔnɔ, u be se k’i dɛmɛ k’o kɛ. O kitabu kabakoman b’a yira min bena Jehova juguw sɔrɔ. Minw b’a ka kuntigiya lafasa kantigiya la, o kitabu b’a yira fana olu bena duga minw sɔrɔ. O tiɲɛnkalanw kɔrɔtanin lo kosɔbɛ. A ka ɲi an k’u sɛgɛsɛgɛ. N’an y’o kɛ, o bena an dɛmɛ an b’an cɛsiri ka to ka Jehova sago kɛ. An ye min faamu fana, an be se ka tɔɔw dɛmɛ n’o ye walisa u ka desizɔn ɲuman ta ani ka to ka Jehova sago kɛ.

3. An bena mun lo lajɛ barokun nin na?

³ An bena ɲiningali nunu jaabi barokun nin na: Minw be Jehova ka kuntigiya lafasa, olu bena duga jumanw lo sɔrɔ? Yirali ka kitabu be sogojugu wulenman piyanpiyan min kofɔ, minw b’a latigɛ ka tugu ale kɔ, mun lo bena olu sɔrɔ?

4. Ciden Zan ye jɛnkulu juman lo ye ni Yezu ye sankolo la?

⁴ Yelifɛn dɔ la, ciden Zan ye jɛnkulu fila ye minw be Jehova ka kuntigiya lafasa ani u ye ɲɛnamaya banbali sɔrɔ. Jɛnkulu fɔlɔ ye mɔgɔ 144 000 lo ye (Yir. 7:4). U sugandira dugukolo kan walisa ka taga baara kɛ gofɛrɛnɛman wala Masaya dɔ la ni Yezu ye sankolo la. Olu ni Yezu bena dugukolo kuru bɛɛ mara (Yir. 5:9, 10; 14:3, 4). O yelifɛn na, Zan y’a ye ko olu ni Yezu lɔnin be Siyɔn kulu kan sankolo la.—Yir. 14:1.

5. Mɔlen tɔɔ minw be dugukolo kan, mun lo bena olu sɔrɔ yanni dɔɔni?

⁵ K’a ta cidenw ka wagati la fɔɔ ka na se bi ma, mɔgɔ waa caaman sugandira walisa ka kɛ mɔgɔ 144 000 nunu dɔw ye (Luka 12:32; Ɔrɔm. 8:17). Nka, a fɔra Zan ye ko u tɔɔ wala u damanin lo bena to niin na dugukolo kan laban loonw na. “Taamasiɲɛ” laban bena la o kerecɛn mɔlen tɔɔw kan k’a yira ko Jehova sɔnna u ma. O bena kɛ ka kɔn tɔɔrɔba daminɛ ɲɛ (Yir. 7:2, 3; 12:17). O kɔ, wagati dɔ la tɔɔrɔba tuma na, Jehova bena u ta ka taga n’u ye sankolo la k’u fara mɔgɔ 144 000 tɔɔ nunu kan, minw tun sara kantigiya la. U bena mara kɛ ni Yezu ye Ala ka Masaya kɔnɔ o yɔrɔ la.—Mat. 24:31; Yir. 5:9, 10.

6-7. a) Zan ye jɛnkulu wɛrɛ juman lo ye, ani mun lo fɔra a koo la b) Mun na kerecɛn mɔlen tɔɔw ani “jamaba” mɔgɔw ka ɲi k’u mako don Yirali sapitiri 7nan kɔnɔnakumaw na?

⁶ Jɛnkulu dɔ yenin kɔ sankolo la, Zan ye “jamaba” dɔ ye. An y’a ye ko jɛnkulu fɔlɔ tun ye mɔgɔ 144 000 ye. Nka jɛnkulu filanan mɔgɔw daa lɔnin tɛ (Yir. 7:9, 10). Mun lo fɔra olu koo la? Zan ko: “Minw bɔra tɔɔrɔba nin na, n’u y’u ka faniw ko ka gwɛ Sagaden joli la, olu lo.” (Yir. 7:14). “Jamaba” mɔgɔw bena kisi tɔɔrɔba wagati la ka ɲɛnamaya kɛ yan dugukolo kan ani ka dugabaw sɔrɔ.—Zab. 37:9-11, 27-29; Talenw 2:21, 22; Yir. 7:16, 17.

⁷ An dɔw sugandira ka taga ɲɛnamaya kɛ sankolo la ani an dɔw sugandira ka ɲɛnamaya kɛ yan dugukolo kan. A mana kɛ min o min ye, min fɔra Yirali sapitiri 7nan kɔnɔ, yala an b’a faamu k’o ɲɛsinna an ma wa? An ka ɲi k’a ye k’o ɲɛsinna an ma. Min fɔra o sapitiri kɔnɔ, n’o dafara tuma min na, o bena kɛ wagati diiman ye kerecɛn mɔlenw ani jamaba mɔgɔw fɛ! An ninsɔn bena diya kosɔbɛ sabu an y’a latigɛ ka Jehova ka kuntigiya lafasa. Yirali ka kitabu be koo wɛrɛ juman fɔ an ye tɔɔrɔba koo la?—Mat. 24:21.

8. Tɔɔrɔba bena daminɛ cogo di? Mɔgɔw fanba bena mun lo kɛ?

⁸ An y’a ye barokun tɛmɛnin na ko duniɲa ka politiki mɔgɔw bena wuli Babilonɛba kama, o min ye duniɲa kuru bɛɛ ka ngalon diinanw jɛnkulu ye (Yir. 17:16, 17). O lo bena kɛ tɔɔrɔba daminɛ ye. Yala o bena a to mɔgɔ caaman b’a daminɛ ka Jehova bato wa? Ayi. Yirali sapitiri 6nan b’a yira ko o wagati la, mɔgɔ minw tɛ Jehova bato, olu bena dɛmɛ ɲini duniɲa ka politiki mɔgɔw n’a ka jagokɛlaw fɛ, o minw be komi kuluw. O mɔgɔw tɛna Jehova ka Masaya lafasa. O kama, a bena u jati a juguw ye.—Luka 11:23; Yir. 6:15-17.

9. Tɔɔrɔba wagati la, Jehova sagokɛlaw bena a yira ka gwɛ cogo di k’u be dan na tɔɔw la? Mun lo bena Jehova sagokɛlaw sɔrɔ?

 ⁹ O wagati gwɛlɛw na, Jehova sagokɛla kantigiw bena a yira ka gwɛ k’u be dan na tɔɔw la. Olu dɔrɔn lo bena to ka Jehova Ala sago kɛ ani ka ban ka dɛmɛ don “sogo” ka koow la (Yir. 13:14-17). O kama, Jehova juguw bena dimi u kɔrɔ kosɔbɛ. O bena a to jamanaw bɛɛ be lajɛn Ala sagokɛlaw kama dugukolo kuru bɛɛ kan. Bibulu b’o lo weele ko Gɔgi min be Magɔgi ka kɛlɛ.—Ezek. 38:14-16.

10. Ka kɛɲɛ ni Yirali 19:19-21 ka fɔta ye, tuma min na u bena wuli Jehova sagokɛlaw kama, a bena mun lo kɛ do?

¹⁰ N’u wulila Jehova sagokɛlaw kama, a bena mun lo kɛ do? Jehova b’a fɔ ko: “Ne dusu bena gwan kosɔbɛ.” (Ezek. 38:18, 21-23). Yirali sapitiri 19nan b’a yira min bena kɛ o kɔ. Jehova bena a Dencɛ ci ka na a sagokɛlaw dɛmɛ ani k’u juguw kɛlɛ. Sankolola “kɛlɛbolo” bena fara Yezu kan o kɛlɛ la. O kɛlɛbolo ye mɛlɛkɛ kantigiw ni mɔgɔ 144 000 nunu ye (Yir. 17:14; 19:11-15). O kɛlɛ bena laban cogo di? Mɔgɔw ni jɛnkulu minw ye Jehova juguw ye, olu bɛɛ bena halaki pewu pewu!—Yirali 19:19-21 kalan.

11. Koo juman lo kɔrɔtanin lo ka tɛmɛ koo tɔɔw bɛɛ kan Yirali ka kitabu kɔnɔ?

¹¹ Mɔgɔ kantigi minw bena kisi Ala juguw bɛɛ halaki tuma na, miiri k’a filɛ olu bena ninsɔn diya cogo min na! Tiɲɛn lo ko Babilonɛba halakinin kɔ, ninsɔndiya pɛrɛnkan bena bɔ sankolo la. Nka, koo wɛrɛ bena kɛ ninsɔndiyaba sababu ye fana (Yir. 19:1-3). O ye “Sagaden ka kɔɲɔya” lo ye. O koo kɔrɔtanin lo ka tɛmɛ Yirali ka kitabu kɔnɔko tɔɔw bɛɛ kan.—Yir. 19:6-9.

12. Ka kɛɲɛ ni Yirali 21:1, 2 ye, sagaden ka kɔɲɔya bena kɛ tuma juman?

¹² Sagaden ka kɔɲɔya bena kɛ tuma juman? Mɔgɔ 144 000 nunu bɛɛ bena kɛ sankolo la, dɔɔni ka kɔn Arimagedɔn kɛlɛ ɲɛ. Nka, o tɛ sagaden ka kɔɲɔya wagati ye (Yirali 21:1, 2 kalan). Ni Ala juguw bɛɛ halakira ka ban Arimagedɔn kɛlɛ la, o kɔ le, sagaden ka kɔɲɔya bena kɛ.—Zab. 45:4, 5, 14-18.

13. Mun lo bena kɛ sagaden ka kɔɲɔya la?

¹³ Mun lo bena kɛ sagaden ka kɔɲɔya la? Kɔɲɔya be cɛɛ ni muso jɛn furu kɔnɔ. O cogo kelen na, sagaden ka kɔɲɔya bena Masacɛ Yezu Krista n’a ka “kɔɲɔmuso” jɛn ɲɔgɔn fɛ. O kɔɲɔmuso ye mɔgɔ 144 000 nunu lo ye. Sagaden ka kɔɲɔya ye koo kɔrɔtaninba ye min bena a yira ko Ala ka Masaya labɛnnin lo ka dugukolo kuru bɛɛ mara saan 1 000 kɔnɔ.—Yir. 20:6.

14-15. Yirali sapitiri 21nan be mɔgɔ 144 000 nunu suma ni mun lo ye? (Jaa lajɛ ɲɛɛ fɔlɔ kan.)

¹⁴ Yirali sapitiri 21nan be mɔgɔ 144 000 nunu suma ni dugu cɛɲumanba dɔ ye, o min be weele ko ‘Zeruzalɛmu kura.’ (Yir. 21:2, 9). O dugu juu siginin be kabakuru tan ni fila le kan. “Sagaden ka ciden tan ni fila tɔgɔw” sɛbɛnin b’o kabakuru nunu kan. Mun na Zan y’a mako don o koo la? Sabu a tɔgɔ sɛbɛnin be o kabakuru dɔ kan. O ye nɛɛmaba yɛrɛ lo ye!—Yir. 21:10-14; Efɛz. 2:20.

¹⁵ Zeruzalɛmu kura ɲɔgɔn tɛ yen. A  sirabaw ye sanu yɛrɛ yɛrɛ lo ye. A donda 12 kɛra ni kɔnɔkisɛ sɔngɔ gwɛlɛw ye. O dugu n’a laminikogow lɔnin be ni kabakuru sɔngɔ gwɛlɛw ye ani a sumana ni sumanikɛlan ɲuman ye, fiɲɛ tɛ min na (Yir. 21:15-21). O bɛɛ n’a ta, a be komi fɛɛn dɔ ye dugu nin jɛn! A filɛ Zan ye min fɔ o kɔ. A ko: “N ma Alabatoso ye dugu nin na. Matigi Ala, Setigi Ala, ale ni Sagaden le ye dugu Alabatoso ye. Dugu nin mako te tile ni kalo yeelen na, bari Ala ka nɔɔrɔ y’a yeelen ye, Sagaden y’a fitinɛ ye.” (Yir. 21:22, 23). Zeruzalɛmu kura mɔgɔw ni Jehova bena kɛ ɲɔgɔn fɛ (Eburuw 7:27; Yir. 22:3, 4). O la, Jehova ni Yezu yɛrɛ lo ye o dugu Alabatosoba ye.

16. Adamadenw bena mun lo sɔrɔ Ala ka Masaya ka saan waa kelen mara tuma na?

¹⁶ Kerecɛn mɔlenw kɛtɔ ka miiri o dugu koo la, u be ninsɔn diya kosɔbɛ. Nka minw ka jigiya ye ka ɲɛnamaya kɛ dugukolo kan, olu fana ka ɲi k’u mako don o dugu koo la. Ala ka Masaya ka saan waa kelen mara tuma na, Zeruzalɛmu kura bena duga caaman lase mɔgɔw ma dugukolo kan. Zan y’o dugaw woyotɔ ye i ko “baji . . . min be nii don mɔgɔ la.” O baji faan fila la, yiri dɔw be yen ‘minw be nii di mɔgɔ ma’ ani u furaburuw be “adamadenw furakɛ.” (Yir. 22:1, 2). O cogo la, adamadenw bɛɛ bena nafa caaman sɔrɔ o la. Dɔɔni dɔɔni, adamaden kantigiw bɛɛ bena kɛ mɔgɔ dafaninw ye. Bana, tɔɔrɔ ani dusukasi bena ban.—Yir. 21:3-5.

17. Ka kɛɲɛ ni Yirali 20:11-13 ka fɔta ye, saan waa kelen mara bena jɔnw lo nafa?

¹⁷ O labɛn ɲumanw bena jɔnw lo nafa? A fɔlɔ, jamaba min bena kisi Arimagedɔn kɛlɛ la ani n’a sɔrɔ denmisɛn minw bena wolo duniɲa kura kɔnɔ. O kɔ, mɔgɔ minw suu bena kunu i ko Yirali sapitiri 20nan b’a fɔ cogo min na (Yirali 20:11-13 kalan). Galen ‘mɔgɔ tilennen’ minw sara kantigiya la, olu bena kunu yan dugukolo kan. ‘Mɔgɔ tilenbali’ minw ma sababu sɔrɔ ka Jehova lɔn, olu fana bena  kunu (Kɛw. 24:15, Bible senuma; Zan 5:28, 29). Yala o kɔrɔ ko saan waa kelen mara wagati la, mɔgɔ saninw bɛɛ bena kunu ka ɲɛnamaya kɛ dugukolo kan wa? Ayi. Minw ye sababu sɔrɔ ka Jehova sago kɛ nka u banna o la kɔnɔnajuguya kosɔn, olu tɛna kunu. Sababu tun dira u ma ka ɲɛnamaya kɛ alijɛnɛ kɔnɔ dugukolo kan. Nka u y’a yira ko u man kan n’o ye.—Mat. 25:46; 2 Tes. 1:9; Yir. 17:8; 20:15.

18. Koow bena kɛ cogo di dugukolo kan saan 1 000 mara laban na?

¹⁸ Saan 1 000 mara laban na, minw bena ɲɛnamaya kɛ dugukolo kan, olu bɛɛ bena kɛ mɔgɔ dafaninw ye. An ye jurumu min sɔrɔ cɛɛn ye Adama fɛ, o tɛna nɔɔ to mɔgɔ si kan tugun (Ɔrɔm. 5:12). Adama ka jurumu danga bena bɔ an kan pewu pewu! O cogo la dugukolo kan mɔgɔw bena “kunun,” o kɔrɔ, u bena kɛ mɔgɔ dafaninw ye saan 1 000 mara laban na.—Yir. 20:5.

19. Mun na kɔrɔbɔli laban ka ɲi ka kɛ?

¹⁹ An b’a lɔn ko Sutana y’a ɲini ka Yezu kunnatiɲɛ. O bɛɛ n’a ta, Yezu tora kantigiya la. Nka, yala adamaden dafaninw bɛɛ bena to kantigiya la ni sababu dira Sutana ma k’u kɔrɔbɔ wa? Saan 1 000 tɛmɛnin kɔ, sababu bena di an kelen kelen bɛɛ ma k’o ɲiningali jaabi tuma min na Sutana bena bila ka bɔ dingɛ dunba kɔnɔ (Yir. 20:7). Minw bena to kantigiya la kɔrɔbɔli laban tuma na, olu bena ɲɛnamaya banbali sɔrɔ ani a laban, u bena hɔɔrɔnya sɔbɛ la (Ɔrɔm. 8:21). Mɔgɔ murutininw ani Sutana n’a ka jinaw bena halaki pewu pewu!—Yir. 20:8-10.

20. Kiraya kuma kabakoman minw be sɔrɔ Yirali ka kitabu kɔnɔ, u be mun lo kɛ i la?

²⁰ An ye Yirali ka kitabu kɔnɔna kumaw lajɛ dɔɔni. O ye mun lo kɛ i la do? K’a ye k’o kiraya kuma kabakomanw ɲɛsinna i ma, yala o tɛ i dusu diya kosɔbɛ wa? Yala o tɛ i lasun ka mɔgɔ wɛrɛw weele u ka na fara i kan tiɲɛn batoli la wa? (Yir. 22:17). An y’a ye koo minw bena kɛ sini ma ani o y’an ninsɔn diya yɛrɛ le! O b’an jija k’a fɔ i ko ciden Zan y’a fɔ cogo min na ko: “Amiina! Na Matigi Yezu.”—Yir. 22:20.