1. Koo jɔnjɔn juman lo be nɔɔ to an sɔɔn kan?

 N’A SƆRƆ an batizera a tile damanin wala a saan caaman ye nin ye. A mana kɛ min o min ye, jogo minw ka di Jehova ye, an kelen kelen bɛɛ b’a fɛ ka kɛ n’u ye. Walisa ka kɛ n’o jogow ye, an ka ɲi k’an miiricogo kɔrɔsi. Mun na do? Sabu an miiricogo lo ka teli ka nɔɔ to an sɔɔn kan. N’an be to ka miiri farisogo negelakow la, an bena kuma juguw fɔ ani ka koo juguw kɛ (Efɛz. 4:17-19). Nka n’an be to ka miiri koo ɲumanw na, an ka kumaw n’an ka kɛwalew ka teli k’an Faa Jehova dusu diya.—Gal. 5:16.

2. An bena ɲiningali jumanw lo jaabi barokun nin na?

² I ko an y’a ye barokun tɛmɛnin na cogo min na, an tɛ se ka miiriya juguw bɛɛ bali u ka don an hakili la. Nka, an be se k’a latigɛ ka ban ka koow kɛ ka kɛɲɛ n’o miiriya juguw ye. Kumaw ani kɛwale minw ka gwo Jehova ye, an ka ɲi k’olu dabila ka sɔrɔ ka batize. O ye koo fɔlɔ ani koo kɔrɔtaninba ye an ka ɲi ka min kɛ walisa k’an jogo kɔrɔ dabila. Walisa k’an koo diya Jehova ye bɛrɛbɛrɛ, an ka ɲi fana ka cikan nin labato: “Jogokura ta.” (Kɔlɔs. 3:10). Barokun nin na, an bena ɲiningali nunu jaabi: “Jogokura” ye mun lo ye? An be se ka jogo kura ta cogo di ani k’a mara?

3. Ka kɛɲɛ ni Galatikaw 5:22, 23 ye, “jogokura” ye mun lo ye ani mɔgɔ be se k’a ta cogo di?

³ “Jogokura” ye ka Jehova miiricogo n’a ka kokɛcogow ladegi. Mɔgɔ be jogo kura ta a kɛtɔ ka kɛ ni hakili senu deen ye ani k’a to o hakili senu ka nɔɔ to a ka miiriyaw, a  dusukunnakow n’a ka kokɛcogow kan (Galatikaw 5:22, 23 kalan). Misali la, o tigi be Jehova n’a sagokɛlaw kanu (Mat. 22:36-39). A ninsɔndiyanin be to hali ni gwɛlɛyaw b’a kan (Zaki 1:2-4). A b’a ɲini ka to hɛɛrɛ la ni mɔgɔw bɛɛ ye (Mat. 5:9). A be muɲu tɔɔw kɔrɔ ani ka ɲumanya kɛ u ye (Kɔlɔs. 3:13). Koo ɲuman ka di a ye ani a b’o lo kɛ (Luka 6:35). A b’a yira a ka kɛwalew fɛ ko a limaniyanin lo kosɔbɛ a sankolola Faa la (Zaki 2:18). A be koow kɛ ni dususuman ye n’u b’a darabɔra ani a b’a yɛrɛ minɛ ni kɔrɔbɔli b’a kan.—1 Kor. 9:25, 27; Titi 3:2.

4. Walisa ka jogo kura ta, jogo minw kofɔra Galatikaw 5:22, 23 kɔnɔ, yala an ka ɲi ka kɛ n’u bɛɛ ye wa? A ɲɛfɔ.

⁴ Walisa ka jogo kura ta, jogo minw kofɔra Galatikaw 5:22, 23 ani vɛrise wɛrɛw kɔnɔ, an ka ɲi ka kɛ n’o jogow bɛɛ ye. * O jogow be i ko fani kɔnplɛ. U tɛ don dan na dan na, nka an b’u don ɲɔgɔn fɛ le. Tiɲɛn na, o jogow fanba tɛ taga ka ɲɔgɔn dan. Misali la, n’i b’i mɔgɔɲɔgɔn kanu sɔbɛ la, i bena muɲu a kɔrɔ ani k’a minɛ ni ɲumanya ye. Mɔgɔ tɛ se ka kɛ mɔgɔ ɲuman ye sɔbɛ la fana, n’a dusu sumanin tɛ ani n’a tɛ se k’a yɛrɛ minɛ.

5. Ka kɛ ni “Krista ka miiriya” ye o kɔrɔ ko di? Mun na an ka ɲi k’a ɲini ka Yezu ka ɲɛnamaya kɛcogo lɔn? (1 Korɛntikaw 2:16).

⁵ Vɛrise nin kalan: 1 Korɛntikaw 2:16. Walisa ka jogo kura ta, fɔɔ an ka kɛ ni “Krista ka miiriya” ye. O kɔrɔ ko an ka ɲi k’a ɲini k’a lɔn Yezu tun be miiri cogo min na ani k’a ladegi. Yezu y’a yira cogo dafanin na ko a be ni hakili senu deen ye. Yezu be Jehova ka jogow yira tigitigi i ko dugalen ɲuman be mɔgɔ jaa yira ka ɲɛ cogo min na (Eburuw 1:3). N’an be to k’a ɲini ka miiri i ko Yezu, an bena se ka koow kɛ bɛrɛbɛrɛ i ko ale.—Filip. 2:5.

6. N’an b’a ɲinina ka jogo kura ta, an ka ɲi ka mun lo to an hakili la?

⁶ Yala an be se ka Yezu ladegi tiɲɛn na wa? N’a sɔrɔ an b’a miiri ko: “Yezu dafanin lo. Ne tɛna se abada ka kɛ i ko ale!” N’i b’o lo miiri, i hakili to koo nunu na: A fɔlɔ, an danna Jehova ni Yezu jaa la. O la, i be se k’a latigɛ k’u ladegi. Hali  n’i tɛ se ka koow kɛ tigitigi i ko olu, i kɔni be se k’u ladegi koɲuman (Zɛnɛzi 1:26). A filanan, Ala ka hakili senu fanga ɲɔgɔn tɛ yen duniɲa kuru bɛɛ kɔnɔ. Ale ka dɛmɛ barika la, i be se ka koo dɔw kɛ i tun tɛna se ka minw kɛ i yɛrɛ ma fewu! A sabanan, Jehova t’a ɲini i fɛ sisan i k’a yira cogo dafanin na ko i be ni hakili senu deen ye. Minw ka jigiya ye ka ɲɛnamaya kɛ dugukolo kan, an Faa kanutigi ye saan 1 000 latigɛ olu ye walisa u ka kɛ mɔgɔ dafaninw ye (Yir. 20:1-3). Jehova be min ɲini an fɛ sisan, o ye ko an k’an seko bɛɛ kɛ k’ale ladegi ani k’an jigi la a kan walisa a k’an dɛmɛ.

7. An bena mun lo lajɛ sisan?

⁷ An be se ka Yezu ladegi cogo tigitigi jumanw na? Hakili senu b’an dɛmɛ ka kɛ ni jogo minw ye, an bena kuma dɔɔni u la naani koo la. Yezu y’o jogow kelen kelen bɛɛ yira cogo min na, an bena a ye an be se ka kalan min sɔrɔ a fɛ o koo la. An bena tɛmɛ ɲiningali dɔw fɛ fana walisa k’an yɛrɛ sɛgɛsɛgɛ k’a filɛ n’an ye jogo kura ta bɛrɛbɛrɛ.

8. Yezu ye kanuya yira cogo di?

⁸ Yezu tun be Jehova kanu kosɔbɛ minkɛ, o y’a lasun ka koo dɔw saraka a Faa ani an kosɔn (Zan 14:31; 15:13). Tuma min na Yezu tun be dugukolo kan, a y’a yira a ka ɲɛnamaya kɛcogo fɛ ko a be mɔgɔw kanu kosɔbɛ. A tun b’a yira loon o loon ko a be mɔgɔw kanu ani ko a be makari u la, hali n’u dɔw tun be a kɛlɛ. A tun be a ka kanuya yira mɔgɔw la cogo jɔnjɔn min na, o ye ko a tun be u kalan Ala ka Masaya koo la (Luka 4:43, 44). Yezu y’a yira ko a be Ala ani mɔgɔw kanu a kɛtɔ ka sɔn jurumukɛlaw k’a tɔɔrɔ ani k’a faga. O cogo la, a ye sababu di an bɛɛ ma walisa an ka se ka ɲɛnamaya banbali sɔrɔ.

9. An be se ka kanuya yira cogo di i ko Yezu?

⁹ An ye an yɛrɛkun di an sankolola Faa Jehova ma ani ka batize sabu an b’a kanu. I ko Yezu, an be tɔɔw minɛ cogo min na, an ka ɲi k’a yira o fɛ ko an be Jehova kanu. Ciden Zan y’a sɛbɛ ko ‘an ɲaa be an mɔgɔɲɔgɔn min na, n’an t’o kanu, an te se ka Ala kanu, an ɲaa te min na.’ (1 Zan 4:20). An be se k’an yɛrɛ ɲininga ko: “Yala n’ be mɔgɔw kanu kosɔbɛ wa? Yala n’ be makari tɔɔw la hali n’u tɛ n’ minɛ ni ɲumanya ye wa? Yala kanuya be n’ lasun ka n’ ka wagati ni n’ bololafɛnw kɛ ka tɔɔw dɛmɛ walisa u ka Jehova lɔn wa? Yala n’ labɛnnin lo k’o kɛ hali ni mɔgɔw fanba tɛ n’ waleɲuman lɔn n’ ka jijaliw kosɔn wala u be n’ kɛlɛ wa? Yala n’ be se ka fɛɛrɛ sɔrɔ walisa ka wagati caaman kɛ waajuli la ani ka mɔgɔw kalan wa?”—Efɛz. 5:15, 16.

10. Cogo juman na Yezu tun ye hɛɛrɛ ɲinila ye?

¹⁰ Yezu tun ye hɛɛrɛ ɲinila ye. Ni mɔgɔw tun ye koo jugu kɛ a la, a tun tɛ juguman sara ni juguman ye. Nka, a tun tɛ dan o ma. A tun b’a latigɛ ka hɛɛrɛ kɛ n’u ye ani a tun b’a lamɛnbagaw jija u k’u ka bɛnbaliyakow ɲɛnabɔ. Misali la, a tun b’a fɔ u ye ko u ka ɲi ka hɛɛrɛ kɛ n’u balimaw ye n’u b’a fɛ Jehova ka sɔn u ka batoli ma (Mat. 5:9, 23, 24). A ka cidenw tun ka teli ka sɔsɔli kɛ walisa k’a lɔn min ye mɔgɔba ye u cɛma. Nka Yezu tora k’u dɛmɛ u k’o sɔsɔli dabila.—Luka 9:46-48; 22:24-27.

11. An be se ka kɛ hɛɛrɛ ɲinila ye cogo di?

¹¹ Ka ban ka kɛlɛ tigɛ, o dama lo t’a yira ko an ye hɛɛrɛ ɲinila ye. An ka ɲi k’an jija ka hɛɛrɛ kɛ ni tɔɔw ye ani ka an balimaw  jija u k’u ka bɛnbaliyakow ɲɛnabɔ (Filip. 4:2, 3; Zaki 3:17, 18). An be se k’an yɛrɛ ɲininga ko: “N’ be sɔn ka mun lo saraka walisa ka hɛɛrɛ kɛ ni tɔɔw ye? Ni balima dɔ ye n’ dusu kasi, yala n’ diminin be to a kɔrɔ wa? Ni bɛnbaliya donna n’ ni mɔgɔ dɔ cɛ, yala n’ be kɔnɔni kɛ o tigi lo k’a ɲini ka hɛɛrɛ kɛ ni n’ ye wa? Wala ne lo be kɔn k’a ɲini ka bɛɛn sigi n’a ye, hali n’a be komi joo tɛ a fɛ wa? Bɛnbaliya be mɔgɔ minw cɛ, n’a bɛnnin lo yala n’ be u jija u ka hɛɛrɛ sigi u ni ɲɔgɔn cɛ wa?”

12. Yezu y’a yira cogo di ko a be tɔɔw minɛ ni ɲumanya ye?

¹² Yezu tun be tɔɔw minɛ ni ɲumanya ye (Mat. 11:28-30). A tun b’o kɛ a kɛtɔ ka koow kɛ ni dususuman ye ani ka dama kɛɲɛ, hali wagati gwɛlɛw na. Misali la, tuma min na fenisimuso dɔ y’a deli ko a k’a deen kɛnɛya, a daminɛ na, a tun t’a fɛ k’o kɛ. Nka o muso y’a yira ko a limaniyanin lo kosɔbɛ minkɛ, Yezu y’a minɛ ni ɲumanya ye ani a y’a deen kɛnɛya (Mat. 15:22-28). Tiɲɛn lo ko Yezu tun be tɔɔw minɛ ni ɲumanya ye, nka a tun tɛ ban k’u ladi. A be minw kanu, tuma dɔw la a y’a yira ko a b’u minɛ ni ɲumanya ye a kɛtɔ ka kuma u fɛ ka gwɛlɛya. Misali la, tuma min na Piyɛri y’a ɲini ka Yezu fari faga Jehova sago kɛli la, Yezu y’a kolo kalanden tɔɔw ɲɛɛ na (Mariki 8:32, 33). A m’o kɛ walisa ka Piyɛri lamaloya. Nka, a ye fɔrɔmasɔn lo di a ma ani ka kalanden tɔɔw lasɔmi u k’u yɛrɛ tanga kuncɛbaya ma. Siga t’a la, o ye maloya bila Piyɛri la dɔɔni, nka a ye nafa sɔrɔ o kololi la.

13. An be se ka tɔɔw minɛ ni ɲumanya ye sɔbɛ la cogo di?

¹³ Walisa k’i ka mɔgɔ kanulenw minɛ ni ɲumanya ye sɔbɛ la, i ka ɲi k’u ladi tuma dɔw la. N’i b’u ladira, Yezu ladegi i kɛtɔ k’i ka ladili basigi Bibulu ka sariyakolow kan. Koow kɛ ni dususuman ye. Kɛ ni miiriya ɲuman ye u koo la ani la a la ko minw be Jehova ni ele kanu, u bena sɔn i ka ladili ɲuman na. I yɛrɛ ɲininga ko: “Ni n’ ye n’ ka mɔgɔ kanulen dɔ ye a be koo jugu kɛra, yala n’ be n’ jaa gwɛlɛya ka kuma a fɛ wa? Ni n’ ka ɲi ka ladili di, yala n’ be kuma ni ɲumanya ye wala n’ be kuma gwɛlɛw lo fɔ wa? Mun lo be n’ lasun ka ladili di? Yala n’ be ladili dira sabu n’ diminin lo a tigi kɔrɔ wala n’ b’o kɛra a nafa lo kosɔn?”

14. Yezu y’a yira cogo di ko koo ɲuman ka di a ye?

¹⁴ Yezu b’a lɔn koo ɲuman ye min ye ani a b’o lo kɛ. A b’a Faa kanu. O kama, a be koo tilennin lo kɛ tuma bɛɛ ni ŋaniya ɲuman ye. Mɔgɔ ɲuman be sababuw ɲini tuma bɛɛ ka tɔɔw dɛmɛ ani ka koo ɲuman kɛ u ye. K’a lɔn min ye koo ɲuman ye, o dama tɛ bɔri kɛ. An ka ɲi ka koo ɲuman kɛ fana ni ŋaniya ɲuman ye. Dɔ be se k’a yɛrɛ ɲininga ko: “Yala mɔgɔ be se ka koo ɲuman kɛ ni ŋaniya jugu ye wa?” Ɔnhɔn, o be se ka kɛ. Misali la, Yezu ko dɔw be fantanw sɔn ani u be koo bɛɛ kɛ walisa tɔɔw ka bɔ o kala ma. O ɲumanya ɲɔgɔn man di Jehova ye.—Mat. 6:1-4.

15. An be se k’a yira cogo di ko koo ɲuman ka di an ye sɔbɛ la?

¹⁵ N’an be koo ɲuman kɛ ni ŋaniya ɲuman ye, an b’a yira o lo fɛ ko koo ɲuman ka di an ye sɔbɛ la. O la, i yɛrɛ ɲininga ko: “Yala n’ b’a lɔn min ye koo ɲuman ye ani n’ be n’ jija k’o kɛ tiɲɛn na wa? Mun lo be n’ lasun ka koo ɲuman kɛ?”

16. An ka ɲi ka mun lo kɛ loon o loon ani mun na?

¹⁶ An man ɲi k’a miiri ko n’an batizera, an ye jogo kura ta ka ban ani ko an mako t’a la ka jijaliw kɛ tugun. Jogo kura be i ko fani kura an ka ɲi ka min mara ka ɲɛ walisa a kana tiɲɛ. Koo minw be se k’an dɛmɛ, u dɔ ye ka sababuw ɲini loon o loon k’a yira ko an be ni Ala ka hakili senu deen ye. Mun na do? Sabu Jehova be baara la tuma bɛɛ ani a ka hakili senu ye fanga barikaman ye a be tɛmɛ min fɛ ka baara kɛ (Zɛnɛzi 1:2). O kama, hakili senu deen faan kelen kelen bɛɛ ka ɲi k’an lasun ka dɔ kɛ dɔ ye. Misali la, Yezu ka kalanden Zaki y’a sɛbɛ ko: “N’i ko i lanin be Ala la k’a sɔrɔ o te ye i ka kɛwaliw la, o fana ye jigifu ye.” (Zaki 2:26). O kelen lo ni hakili senu deen faan tɔɔw ye. Tuma o tuma n’an b’a yira ko an be ni hakili senu deen ye, an b’a yira ko Ala ka hakili senu b’an dɛmɛna.

17. N’an ma se k’a yira ko an be ni hakili senu deen ye, an ka ɲi ka mun lo kɛ?

¹⁷ Hali kerecɛn minw batizera a mɛɛnna, tuma dɔw la a ka gwɛlɛ u ma k’a yira ko u be ni hakili senu deen ye. Nka a kɔrɔtanin lo an kana an fari faga. Misali la, n’i diyanye fani faranna, yala i bena sin k’a fili wa? Ayi dɛ! Siga t’a la n’o fani be se ka kalan, i bena a kalan koɲuman. O kɔ, i bena i janto kosɔbɛ walisa a kana faran tugun. O cogo kelen na, n’i ma mɔgɔ dɔ minɛ ni ɲumanya, muɲuli wala kanuya ye tuma dɔ la, kana i fari faga. I kɔnɔ gwɛ ka yafa deli a tigi fɛ walisa i ka se ka jɛnɲɔgɔnya ɲuman kɛ n’a ye kokura. I jija walisa ka koow kɛ ka ɲɛ siɲɛ wɛrɛ.

18. An be se ka la mun lo la?

¹⁸ An be Yezu waleɲuman lɔn kosɔbɛ a ka ɲɛyirali kosɔn. N’an tora k’an jija k’a miiricogo ladegi, a bena nɔgɔya an ma ka koow kɛ i ko ale. N’an tora ka Yezu ladegi koɲuman, an bena se ka jogo kura ta bɛrɛbɛrɛ. Ala ka Hakili senu b’an dɛmɛ ka kɛ ni jogo minw ye, an y’u la naani dɔrɔn lo lajɛ barokun nin na. Hakili senu b’an dɛmɛ ka kɛ ni jogo wɛrɛ minw ye, wagati ta k’u sɛgɛsɛgɛ ani miiri k’a filɛ i b’a yirala cogo min na ko i be n’o jogow ye. N’i y’o kɛ, o bena i nafa yɛrɛ le! Barokun minw be kuma o jogow koo la, i be se k’u sɔrɔ Guide de recherche pour les Témoins de Jéhovah kɔnɔ yɔrɔ nunu na: “Mode de vie chrétien,” o kɔ, “Fruit de l’esprit.” N’i y’o kɛ, i be se ka la a la ko Jehova bena i dɛmɛ ka jogo kura ta ani ka to n’a ye.