An be se k’an yɛrɛ ɲininga o la, n’a y’a sɔrɔ ko an y’o vɛrise kalan teliya teliya la. Nka, Mefibosɛti fila lo kofɔra o maana kɔnɔ. Walisa k’o faamu, an k’a filɛ min kɛra.

Israɛl masacɛ Sayuli tun be ni cɛden 7 ani musoden 2 ye. A dencɛ fɔlɔ tɔgɔ tun ko Zonatan. Kɔfɛ, masacɛ ye deen sɔrɔ ni a gɛrɛfɛmuso Irisipa ye. O deen tɔgɔ ko Mefibosɛti. An k’a to an hakili la ko dencɛ dɔ tun be Zonatan fɛ min fana tɔgɔ ko Mefibosɛti. O la, masacɛ Sayuli dencɛ n’a mamaden tun be ni tɔgɔ kelen ye.

Wagati dɔ la, masacɛ Sayuli wulila Gabawɔnkaw kama minw tun be Israɛldenw cɛma, ani a y’a ɲini k’u bɛɛ faga. A be komi a sera k’u dɔw faga. A tun man kan k’o kɛ. Mun na do? Sabu Zozuwe ka wagati la, Israɛl jama ɲɛmɔgɔw tun ye u daa di Gabawɔnkaw ma k’u bena sigi n’u ye hɛɛrɛ la.—Zozuwe 9:3-27.

O layidu bele tun be sen kan masacɛ Sayuli ka wagati la. Nka masacɛ ma o layidu labato. A y’a ɲini ka Gabawɔnkaw bɛɛ sii tunu pewu. O cogo la, “Sayuli n’a ka somɔgɔw” kɛra mɔgɔfagalaw ye (2 Sam. 21:1). A laban, Dawuda kɛra masacɛ ye. Gabawɔnka minw kisira, olu y’a ɲɛfɔ Dawuda ye koow kɛra cogo min na. Dawuda y’u ɲininga a be se ka min kɛ walisa ka Sayuli ka tilenbaliyakow lalaga ani ka sababu di Jehova ma a ka jamana mɔgɔw duga kokura. Sanni Gabawɔnkaw ka wari minɛ, u y’a ɲini Dawuda fɛ ko cɛɛ min tun b’a fɛ k’u “sii tunu pewu,” a k’ale dencɛ 7 di u ma walisa u ka u faga (Nɔnb. 35:30, 31). U ye min ɲini Dawuda fɛ, a sɔnna o ma.—2 Sam. 21:2-6.

O wagati la, Sayuli ni Zonatan tun sara kɛlɛ la. Nka, Zonatan dencɛ Mefibosɛti bele tun be niin na. Mefibosɛti tun kɛra namara ye a denmisɛn tuma na sabu a bɔra ka ben. A tun ma fara a mamacɛ Sayuli kan ka Gabawɔnkaw kɛlɛ. Dawuda ni Zonatan tun kalila ɲɔgɔn ye teriya koo la ani o teriya tun bena Zonatan dencɛ Mefibosɛti n’a dencɛ tɔɔw latanga (1 Sam. 18:1; 20:42). Bibulu b’a fɔ ko: “Masacɛ [Dawuda] ye Sayuli deen Zonatan dencɛ Mefibosɛti kisi, bari Dawuda ni Sayuli dencɛ Zonatan tun kalila ɲɔgɔn ye Masaba ɲakɔrɔ.”—2 Sam. 21:7.

Nka, Gabawɔnkaw tun ye min ɲini Dawuda fɛ, Dawuda y’o kɛ. A ye Sayuli mamaden duuru ani a dencɛ fila di u ma walisa u ka u faga. O dencɛw dɔ tɔgɔ tun ko Mefibosɛti (2 Sam. 21:8, 9). Dawuda ye min kɛ, o kɛra sababu ye joli hakɛ bɔra Israɛldenw kan.

Min kɛra, o tɛ maana dama lo ye. Ala ka sariya tun b’a fɔ ka gwɛ ko: “Deenw fana tena faga u faaw nɔɔ na.” (Deter. 24:16). Jehova tun tɛna sɔn u ka Sayuli dencɛ fila n’a mamaden duuru faga n’u jalakibali tun lo. Sariya tun b’a fɔ fana ko: “Mɔgɔ kelen kelen bɛɛ bena faga a yɛrɛ ka hakɛ le kosɔn.” Sayuli tun ye labɛn min kɛ walisa ka Gabawɔnkaw bɛɛ faga, a be komi a bɔnsɔn 7 minw sara, olu fana niin tun be o labɛn na. O la, o mɔgɔ 7 bɛɛ sara u ka koo jugu lo kosɔn.

O maana b’a yira ko mɔgɔ tɛ se ka koo jugu kɛ ani k’a miiri ko ale jalakibali lo sabu a be tugura cikanw lo kɔ dɔrɔn. Talen dɔ b’a fɔ ko: “I bena sira min ta, a kɔlɔsi ka ɲa. I ka sira ka kɛ siraɲuman ye.”—Talenw 4:24-27; Efɛz. 5:15.