1-2. N’i labɛnnin tɛ fɔlɔ batɛmu kama, mun na i man ɲi k’i fari faga? (Jaa lajɛ ɲɛɛ fɔlɔ kan.)

 N’I B’A fɛ ka batize, o ye laɲinita ɲuman yɛrɛ lo ye! Yala i labɛnnin lo ka batize kabi sisan wa? N’i b’a miiri ko i labɛnnin lo ani diinan mɔgɔkɔrɔw sɔnna o ma, kana sigasiga k’o kɛ lajɛnba nata la. N’i y’o kɛ, i bena ninsɔndiya kosɔbɛ Jehova ka baara la.

² Yala u y’a fɔ i ye ko i ka ɲi ka ɲɛtaga wɛrɛw kɛ ka sɔrɔ ka batize wa? Wala ele yɛrɛ lo bɔra o kala ma wa? N’o lo, kana i fari faga. I ye kanbele, sunguru wala mɔgɔkɔrɔba ye wo, i be se k’o laɲinita jɔnjɔn dafa.

3. Etiyopi jamana ka masaso kuntigi dɔ ye mun lo ɲini Filipu fɛ ani o b’a to an b’an yɛrɛ ɲininga mun lo la? (Kɛwaliw 8:36, 38).

³ Kɛwaliw 8:36, 38 kalan. Etiyopi ka masaso kuntigi dɔ ye waajulikɛla Filipu ɲininga ko: “Mun be se k’i bali ka ne batize?” O cɛɛ tun b’a fɛ ka batize, nka yala a tun labɛnnin lo tiɲɛn na o koo kɔrɔtanin kama wa?

4. Etiyopika y’a yira cogo di ko a tun cɛsirinin lo ka dɔ fara a ka lɔnniya kan?

⁴ O Etiyopikacɛ “tun bɔra Ala batoyɔrɔ la Zeruzalɛmu.” (Kɛw. 8:27). O la, n’a sɔrɔ a tun tuubira ka don Yahutu diinan na. N’a sɔrɔ a ye lɔnniya sɔrɔ Jehova koo la Eburukan sɛbɛninw lo sababu la. Nka, a bele tun b’a fɛ ka dɔ lɔn tugun. Tuma min na Filipu ye Etiyopika ye sira kan, o cɛɛ tun be mun lo kɛra do? A tun be kira Ezayi ka kitabu melekenin lo kalanna (Kɛw. 8:28). Tiɲɛnkalan dɔw be sɔrɔ o kitabu kɔnɔ minw faamu man nɔgɔ. O Etiyopika tun tɛ dan Bibulu ka kalan jɔnjɔn damanin dɔrɔn ma, a tun b’a fɛ ka to ka dɔ fara a ka lɔnniya kan.

5. Etiyopika ye kalan min sɔrɔ, a ye mun lo kɛ n’o ye?

⁵ O Etiyopika tun ye masamuso Kandasi ka baarakɛlaw ɲɛmɔgɔ dɔ ye. Ale lo “tun be masamuso ka nafolo bɛɛ kunna.” (Kɛw. 8:27). O la, i be taga a sɔrɔ a bolo tun degunnin lo kosɔbɛ sabu a ka kunkanbaaraw tun ka ca. O bɛɛ n’a ta, a tun be wagati ta ka Jehova bato. A tun tɛ dan ka tiɲɛnkalanw lɔn, nka a tun be u sira tagama fana. O lo kama, a bɔra Etiyopi ka taga fɔɔ Zeruzalɛmu ka Alabatosoba la walisa ka Jehova bato. N’a sɔrɔ a ye wagati caaman kɛ o voyazi la ani ka wari caaman don o la. Nka, o tun tɛ foyi ye o cɛɛ ɲɛɛ na sabu a tun b’a fɛ ka Jehova lo bato.

6-7. Etiyopika ka kanuya barika tora ka bonya cogo di Jehova koo la?

⁶ Filipu ye Etiyopika dɛmɛ ka tiɲɛnkalan nafaman kura dɔw faamu Jehova koo la. O tiɲɛnkalan dɔ ye ko Yezu lo Masiya ye (Kɛw. 8:34, 35). Siga t’a la, o masaso baara ɲɛmɔgɔ dusu diyara k’a lɔn Yezu ye min kɛ ale ye. O kɔ, a ye mun lo kɛ do? A tun tuubira ka don Yahutu diinan na ani mɔgɔw tun b’a bonya kosɔbɛ. A tun be se k’a latigɛ ka to o cogo la. Nka, dɔ farala a ka kanuya kan Jehova n’a Dencɛ koo la minkɛ, o y’a lasun ka desizɔnba dɔ ta. A y’a latigɛ ka batize ka kɛ Yezu Krista ka kalanden dɔ ye. Filipu y’a ye ko o cɛɛ tun labɛnnin lo minkɛ, a y’a batize.

⁷ N’i y’o Etiyopika ladegi, i bena i yɛrɛ labɛn batɛmu kama. O la, ele fana bena se k’a fɔ ni hakilisigi ye ko: “Mun lo be ne bali ka batize?” An k’a filɛ i be se k’o cɛɛ ladegi cogo min na koo nunu na: A tora ka dɔ fara a ka lɔnniya kan, a ye min kalan a tora k’o sira tagama ani dɔ tora ka fara a ka kanuya barika kan Ala koo la.

8. Zan 17:3 b’a fɔ ko i ka ɲi ka mun lo kɛ?

⁸ Zan 17:3 kalan. Yezu ye min fɔ o vɛrise kɔnɔ, yala o lo y’i lasun i y’a daminɛ ka bibulukalan kɛ wa? O kumaw lo y’an caaman lasun k’o kɛ. Nka, yala o kumaw b’an jija an ka to ka dɔ fara an ka lɔnniya kan wa? Ɔnhɔn. An tɛna a dabila abada k’a ɲini ka tiɲɛn “Ala kelenpe . . . lɔn.” (Waaj. 3:11). An bena to ka dɔ fara an ka lɔnniya kan a koo la fɔɔ abada. N’an tora k’o kɛ, an bena an magwɛrɛ Jehova la kosɔbɛ.—Zab. 73:28.

9. N’an ye Bibulu ka kalan jɔnjɔnw faamu, an ka ɲi ka mun lo kɛ o kɔ?

⁹ N’an b’a ɲinina ka Jehova lɔn, an b’o daminɛ ni Bibulu ka kalan jɔnjɔnw lo ye. Ciden Pol ye lɛtɛrɛ min ci Eburuw ma, a y’a fɔ o kɔnɔ ko o kalanw “faamu man gwɛlɛ.” (Eburuw 5:12). A tun t’a fɔra le ko o “daminɛ kow” kɔrɔtanin tɛ. Nka a ko u be komi nɔnɔ min be denɲɛnin balo (Eburuw 6:1, Bible senuma). A ye kerecɛnw bɛɛ jija u kana dan Bibulu ka kalan jɔnjɔnw dɔrɔn ma. Nka, Bibulu ka kalan minw faamu man nɔgɔ, u k’a ɲini k’o fana faamu. Yala a nege b’i la k’o kalanw faamu wa? Yala i b’a fɛ ka to ka ɲɛtaga kɛ ani ka to ka dɔ fara i ka lɔnniya kan Jehova n’a sagonata koo la wa?

10. Mun na kalan ka gwɛlɛ dɔw ma?

¹⁰ Kalan ka gwɛlɛ an caaman ma. Ele do? Yala i ye kalangwɛ ni sɛgɛsɛgɛri kɛcogo ɲuman degi lakɔli la wa? Yala kalan tun ka di i ye ani o y’a to i ye koo caaman faamu wa? Wala i b’a miiri ko ka gafew kalan, o ka gwɛlɛ i ma kojugu? N’o lo, i kelen tɛ. Nka, Jehova be se k’i dɛmɛ. A dafanin lo ani Kalanfa ɲuman lo min ɲɔgɔn tɛ yen.

11. Jehova y’a yira cogo di ko a ye an ka Karamɔgɔba ye?

¹¹ Jehova y’a fɔ ko ale ye an Karamɔgɔba ye (Ezayi 30:20, 21). A be muɲu an kɔrɔ, a b’an minɛ ni ɲumanya ye ani a b’an faamu. A be sinsin a ka kalandenw ka jogo ɲumanw lo kan (Zab. 130:3). A tɛ koo ɲini an fɛ an tɛ se min na. A to i hakili la ko ale lo y’an kunsɛmɛ dan, o min ye nilifɛn kabakoman ye (Zab. 139:14). An danna cogo min na, o b’a to a ka di an ye kosɔbɛ ka lɔnniya sɔrɔ. An Danbaga b’a fɛ an ka to ka lɔnniya sɔrɔ fɔɔ abada ani ka ninsɔndiya sɔrɔ o la. O la, a ka ɲi an k’an jija walisa Bibulu ka tiɲɛnkalanw ‘ka diya’ an ye kabi sisan (1 Piyɛri 2:2). Laɲinitaw latigɛ i be se ka minw dafa ani to ka Bibulu kalan ani k’a sɛgɛsɛgɛ tuma o tuma (Zozuwe 1:8). Jehova ka dɛmɛ barika la, a bena diya i ye kosɔbɛ ka Bibulu kalan ani ka to k’a ɲini ka dɔ lɔn tugun Jehova koo la.

12. An ka kelenna kalan tuma na, mun na an ka ɲi ka miiri koɲuman Yezu koo la?

¹² Wagati ta tuma o tuma ka miiri Yezu ka ɲɛnamaya n’a ka cidenya baara koo la. N’an b’a fɛ ka Jehova sago kɛ, a kɔrɔtanin lo kosɔbɛ an ka Yezu ladegi koɲuman sanko wagati gwɛlɛ nunu na (1 Piyɛri 2:21). Yezu y’a fɔ a ka kalandenw ye ka gwɛ ko u bena gwɛlɛyaw sɔrɔ (Luka 14:27, 28). O bɛɛ n’a ta, a tun lanin b’a la ko a ka kalanden sɔbɛw bena to kantigiya la i ko ale (Zan 16:33). Yezu ye koo minw kɛ, o sɛgɛsɛgɛ ani a latigɛ k’a ladegi i ka loon o loon ɲɛnamaya la.

13. I ka ɲi ka to ka Jehova deli mun lo koo la ani mun na?

¹³ Lɔnniya dama tɛ bɔri kɛ. Lɔnniya kuun jɔnjɔn ye k’a ɲini ka dɔ lɔn tugun Jehova koo la, k’a kanu, ka limaniya a la ani ka kɛ ni jogo wɛrɛw ye (1 Kor. 8:1-3). N’i tora ka Jehova lɔn, to k’a deli a ka dɔ fara i ka limaniya kan (Luka 17:5). A ka di a ye k’o deliliw ɲɔgɔn jaabi. Limaniya sɔbɛ min basiginin be an ka Ala lɔnniya sɔbɛ kan, o bena i dɛmɛ ka ɲɛtaga kɛ.—Zaki 2:26.

14. Ciden Piyɛri y’a yira cogo di ko an ye min kalan, a kɔrɔtanin lo an k’o sira tagama? ( Jaa lajɛ fana.)

¹⁴ Ciden Piyɛri y’a yira ko a kɔrɔtanin lo kosɔbɛ Krista ka kalandenw ye min kalan, u ka to k’o sira tagama. Bibulu be min fɔ Nuhun koo la, a y’o kofɔ.  Jehova tun y’a fɔ Nuhun ye ko ale bena mɔgɔ juguw bɛɛ halaki sanjiba dɔ sababu fɛ. O lɔnniya dama tun tɛ se ka Nuhun n’a ka denbaya kisi. Wagati min kɔnna sanjiba ɲɛ ani tuma min na Nuhun ye “kurunba lalaga,” a kɔrɔsi ko Piyɛri tun be kumana o lo koo la (1 Piyɛri 3:20). Ala ye min fɔ, Nuhun n’a ka denbaya ye koow kɛ ka kɛɲɛ n’o ye, u kɛtɔ ka kurun wala bato belebeleba dɔ dilan (Eburuw 11:7). Nuhun ye min kɛ, Piyɛri y’o suma ni batɛmu ye. A ko: “O koo ye batɛmu tagamasiɲɛ ye, o min b’aw kisi sisan.” (1 Piyɛri 3:21, NW). O la, i be min kɛra sisan k’i yɛrɛ labɛn batɛmu kama, an be se k’o suma ni kurunlɔ baara ye, Nuhun n’a ka denbaya ye min kɛ saan caaman kɔnɔ. Ayiwa, i ka ɲi ka mun lo kɛ walisa k’i yɛrɛ labɛn batɛmu kama?

15. An b’a yira cogo di ko an nimisanin lo sɔbɛ la?

¹⁵ An ka ɲi ka koo fɔlɔ minw kɛ, u dɔ ye ka nimisa sɔbɛ la an ka jurumuw kosɔn (Kɛw. 2:37, 38). Nimisali sɔbɛ b’an lasun ka yɛlɛmaniw kɛ sɔbɛ la. Koo minw man di Jehova ye i n’a fɔ kakalaya, sigarɛtimin, malobaliya kumaw wala nɛnini n’a ɲɔgɔnnaw, yala i y’u dabila wa? (1 Kor. 6:9, 10; 2 Kor. 7:1; Efɛz. 4:29). N’i m’u dabila fɔlɔ, i jija ka to ka yɛlɛmaniw kɛ. Ladiliw ni dɛmɛ ɲini i ka Bibulu kalanfa wala kafo ka diinan mɔgɔkɔrɔw fɛ. N’i ye kanbele wala sunguru ye ani i be n’i bangebagaw ye, to k’a ɲini u fɛ u k’i dɛmɛ ka delinanko juguw dabila o minw be se k’i bali ka batize.

16. An ka ɲi ka mun ni mun lo kɛ walisa ka kɛ ni delinanko ɲumanw ye Alako ta fan fɛ?

¹⁶ A kɔrɔtanin lo fana an ka kɛ ni delinanko ɲumanw ye Alako ta fan fɛ. U dɔ ye ka to ka taga lajɛnw na ani ka lakalitaw kɛ (Eburuw 10:24, 25). N’i nana saratiw dafa ka kɛ weleweledala ye, i jija ka to ka waajuli kɛ tuma o tuma. N’i tora k’i seen don o kisili baara la, a bena diya i ye kosɔbɛ (2 Tim. 4:5). N’i ye kanbele wala sunguru ye ani i be n’i bangebagaw ye, i yɛrɛ ɲininga ko: “Yala n’ bangebagaw lo be to ka n’ hakili jigi lajɛnw ni waajuli koo la? Wala ne  yɛrɛ lo b’a latigɛ n’ yɛrɛ ma k’o koow kɛ wa?” N’ele yɛrɛ lo b’a latigɛ k’o kɛ, i b’a yira ko i limaniyanin lo Jehova Ala la, ko i b’a kanu ani k’a waleɲuman lɔn. O b’a yira ko i be “siran Ala ɲa,” ani ko i “taamacogo” ka ɲi. Nilifɛnw lo i be minw di Jehova ma (2 Piyɛri 3:11; Eburuw 13:15). An b’an bɔ an yɛrɛ la ka nilifɛn minw bɛɛ di an ka Ala ma, o ka di a ye (2 Korɛntikaw 9:7 lajɛ). An b’o koow kɛ sabu a ka di an ye k’an seko fisaman kɛ Jehova ka baara la.

17-18. Jogo jɔnjɔn juman lo bena i dɛmɛ ka ɲɛtaga kɛ batɛmu kama ani mun na? (Talenw 3:3-6).

¹⁷ N’i tora ka ɲɛtaga kɛ batɛmu kama, i bena gwɛlɛyaw sɔrɔ. Mɔgɔ dɔw be se k’i lɔgɔbɔ, k’i kɛlɛ wala k’i tɔɔrɔ yɛrɛ (2 Tim. 3:12). N’i b’i jijara ka delinanko jugu dɔ dabila, n’a sɔrɔ i bena segi k’o koo jugu kɛ tuma kelen kelen. Wala n’a sɔrɔ i bena dimi i yɛrɛ kɔrɔ sabu a b’i ɲɛɛ na ko i tɛ sera k’i ka laɲinita dafa. Mun lo bena i dɛmɛ i kana i fari faga? O ye jogo kɔrɔtaninba dɔ lo ye: Jehova kanuya.

¹⁸ I be ni kanuya min ye Jehova koo la, o ye jogo ɲumanba dɔ lo ye min ɲɔgɔn tɛ yen (Talenw 3:3-6 kalan). N’i be Ala kanu kosɔbɛ, o be se k’i dɛmɛ ka gwɛlɛyaw muɲu koɲuman. Jehova be ni kanuya kantigiman min ye a sagokɛlaw koo la, Bibulu ka teli k’o kofɔ. O kanuya kantigiman kosɔn, Jehova tɛna a sagokɛlaw to yen abada ani a bena to k’u kanu tuma bɛɛ (Zab. 100:5). Ala y’i dan a yɛrɛ jaa la (Zɛnɛzi 1:26). O la, i be se ka kɛ n’o kanuya ɲɔgɔn ye. Cogo di do?

19. Jehova ye koo minw bɛɛ kɛ i ye, i be se k’a waleɲuman lɔn kosɔbɛ cogo di o kosɔn? (Galatikaw 2:20).

¹⁹ A daminɛ ka to ka Jehova waleɲuman lɔn (1 Tes. 5:18). I yɛrɛ ɲininga loon o loon ko: “Jehova y’a yira cogo di ko a be ne kanu?” O kɔ, a fo i ka deliliw la i kɛtɔ ka koo tigitigi dɔw fɔ a ye minw kɛ i ye. Jehova be kanuya wale minw kɛ, a jati ko a b’o kɛ ele yɛrɛ lo ye. Ciden Pol tun y’o lo faamu Jehova koo la (Galatikaw 2:20 kalan). I yɛrɛ ɲininga ko: “Yala ne fana b’a fɛ ka n’ ka kanuya yira a la wa?” I be ni kanuya min ye Jehova koo la, o bena i dɛmɛ ka to ka kɔrɔbɔliw ni gwɛlɛyaw muɲu koɲuman. O bena i lasun ka to n’i ka  delinanko ɲumanw ye Alako ta fan fɛ ani ka to k’i ka kanuya yira i Faa Ala la loon o loon.

20. I ka ɲi ka mun lo kɛ walisa k’i yɛrɛkun di Jehova ma ani mun na o desizɔn kɔrɔtanin lo?

²⁰ Wagati dɔ bena se, i be ni kanuya min ye Jehova koo la, o bena i lasun ka delili kɛrɛnkɛrɛnnin dɔ kɛ. O delili la, i bena i yɛrɛkun di Ala ma. A to i hakili la ko n’i ye i yɛrɛkun di Jehova ma, i be ni jigiya ɲuman nin ye: I be se ka kɛ a ta ye fɔɔ abada! N’i ye i yɛrɛkun di Jehova ma, i be layidu ta a ye ko i bena a sago kɛ wagati diimanw ani wagati gwɛlɛw na. N’i y’o layidu ta siɲɛ kelen, i mako t’a la k’o ta tugun. Tiɲɛn na, n’an y’an yɛrɛkun di Jehova ma, an ye desizɔnba dɔ lo ta. Miiri nin na: I bena desizɔn caaman ta i ka ɲɛnamaya kɔnɔ. U dɔw ka ɲi kosɔbɛ. Nka i ye desizɔn min ta k’i yɛrɛkun di Jehova ma, o ye desizɔnw bɛɛ la fisaman lo ye (Zab. 50:14). Sutana bena a ɲini k’i ka kanuya barika dɔgɔya i Faa koo la sabu a jigi b’a la ko i tɛna to kantigiya la. Kana a to Sutana ka see sɔrɔ abada! (Zɔbu 27:5). I ye layidu min ta ko i bena to ka Jehova sago kɛ fɔɔ abada, i bena se k’o dafa n’i be a kanu kosɔbɛ. O kanuya lo bena i dɛmɛ fana k’i magwɛrɛ i sankolola Faa la.

21. Mun na an be se k’a fɔ ko batɛmu tɛ koow laban ye, nka u daminɛ lo?

²¹ N’i ye i yɛrɛkun di Jehova ma ka ban, kuma i ka kafo diinan mɔgɔkɔrɔw fɛ batɛmu koo la, o min fana ye koo kɔrɔtaninba ye. A to i hakili la tuma bɛɛ ko batɛmu tɛ koow laban ye, nka u daminɛ lo. A be sababu di i ma ka Jehova sago kɛ fɔɔ abada. O la, i ka kanuya barika bonya i Faa koo la kabi sisan. Laɲinitaw latigɛ walisa i ka kanuya barika ka to ka bonya a koo la loon o loon. N’i b’o koow kɛ, o bena i lasun ka batize. I ka batɛmu loon bena kɛ ninsɔndiyaba loon ye! Nka o ye koow daminɛ dɔrɔn lo ye. An jigi b’a la ko i bena to ka i ka kanuya barika bonya Jehova n’a Dencɛ koo la fɔɔ abada!