Cɛɛ min weelela ko “karimasina,” mun na a ko ale ka nafolo bena “cɛn” n’a ye Ruti furu? (Ruti 4:1, 6).

Bibulu sɛbɛwagati la, ni furucɛ dɔ tun sara k’a sɔrɔ a ma deen sɔrɔ, a ka dugukolo wala a ka foro koo tun be kɛ cogo di? Yala a ka denbaya tɔgɔ tun be tunu pewu wa? Musa ka sariya tun be o ɲiningaliw jaabi.

Ni cɛɛ dɔ tun sara wala ni fantanya kosɔn a tun y’a ka dugukolo feere, o koo tun be kɛ cogo di? A balima dɔ wala a somɔgɔ min ka surun a la, ale tun be se ka banbagatɔ ka dugukolo cɛɛn ta wala dugukolo min feerela, k’o sɔngɔ kɔsegi a sanbaga ma. O cogo la, o dugukolo bele tun be kɛ banbagatɔ ka denbaya ta ye.—Lev. 25:23-28; Nɔnb. 27:8-11.

Mun lo tun b’a to banbagatɔ ka denbaya tɔgɔ tɛ tunu? Labɛn dɔ tun kɛra ko banbagatɔ balimacɛ k’a muso ta i ko a kɛra Ruti koo la cogo min na. Ni cɛɛ dɔ tun y’a balimacɛ ka firiyamuso furu ani ka deen sɔrɔ n’a ye, o deen tun be kɛ banbagatɔ ta ye ani a tun b’a cɛɛn ta. O labɛn ɲuman tun be firiyamuso fana nafa.—Deter. 25:5-7; Mat. 22:23-28.

An ka Nawomi ka koo lajɛ. A tun furula cɛɛ dɔ ma min tɔgɔ ko Elimelɛki. Kɔfɛ, a cɛɛ ani u dencɛ fila sara. O kama, cɛɛ si tun tɛ yen min tun bena a janto a la (Ruti 1:1-5). Nawomi kɔseginin Zuda, a ko a buranmuso Ruti k’a ɲini Bowazi fɛ a ka u ka dugukolo san. Bowazi tun ye Elimelɛki somɔgɔ dɔ ye min ka surun a la (Ruti 2:1, 19, 20; 3:1-4). Nka Bowazi tun b’a lɔn ko u somɔgɔ wɛrɛ ka surun Elimelɛki la ka tɛmɛ ale kan. Bibulu b’o tigi weele ko “karimasina.” O la, o cɛɛ lo tun ka kan k’a latigɛ fɔlɔ n’a b’a fɛ ka kɛ kunmabɔbaga ye.—Ruti 3:9, 12, 13.

A daminɛ na, “karimasina” tun sɔnna ka Nawomi dɛmɛ (Ruti 4:1-4). Tiɲɛn lo ko a tun ka ɲi ka wari bɔ walisa k’o dugukolo san. Nka, a tun b’a lɔn ko Nawomi kɔrɔla kojugu, a tɛ se ka deen sɔrɔ min bena Elimelɛki ka dugukolo cɛɛn ta. O la, o dugukolo tun bena kɛ karimasina ta ye ani a tun be komi a ka bɔ b’o la.

Nka tuma min na karimasina y’a faamu ko a tun ka ɲi ka Ruti furu fana, a y’a latigɛ ko a tɛna o dugukolo san tugun. A ko: “Ne tena se k’a minɛ, bari ne be siran o kana kɛ sababu ye ka ne ka nafolo fana cɛn.” (Ruti 4:5, 6). Mun na a y’a ka miiriya yɛlɛma?

Ni karimasina wala mɔgɔ wɛrɛ tun ye Ruti furu ani ka dencɛ sɔrɔ n’a ye, o deen tun bena Elimelɛki ka dugukolo cɛɛn ta. Cogo juman na o tun bena karimasina “ka nafolo . . . cɛn”? Bibulu t’o fɔ. Nka, n’a sɔrɔ karimasina y’o fɔ kuun nunu lo kosɔn:

• A fɔlɔ, a tun bena kɛ komi a y’a ka wari fili le, sabu Elimelɛki ka dugukolo tun tɛna kɛ ale ta ye. Ruti dencɛ lo tun bena a sɔrɔ cɛɛn ye.

• filanan, ale lo tun bena Nawomi ni Ruti balo ani k’a janto u la.

• A sabanan, ni Karimasina tun ye deen wɛrɛw sɔrɔ ni Ruti ye, o deenw tun bena a ka cɛɛn tilan n’a ka deen tɔɔw ye, a tun kɔnna ka minw sɔrɔ.

• A naaninan, ni karimasina tun tɛ ni deen wɛrɛw ye, a tun bena deen min sɔrɔ ni Ruti ye, o deen tun bena Elimelɛki n’ale ka dugukolo sɔrɔ cɛɛn ye. O la n’a tun sara, a ka dugukolo tun bena kɛ deen min ta ye, Elimelɛki tɔgɔ lo tun bena la a kan, ale tɔgɔ tɛ. Karimasina tun t’a fɛ ka bɔnɛ a ka cɛɛn na walisa ka Nawomi dɛmɛ. O kama, a ye sira di Bowazi ma a ka Nawomi kunmabɔ sabu k’ale niin bɔ a la, Bowazi lo tun be tugu. Bowazi sɔnna sabu a tun b’a fɛ “taabaga ka cɛɛn [ka] to ani a tɔgɔ kana tunu.”—Ruti 4:10.

A be komi min tun kɔrɔtanin lo kosɔbɛ karimasina fɛ, o ye ko a yɛrɛ tɔgɔ n’a ka cɛɛn kana tunu. A tun be miiri a yɛrɛ nafa dɔrɔn lo la. Karimasina y’a jija kosɔbɛ walisa a tɔgɔ kana tunu. Nka bi bi nin na, an t’a tɔgɔ yɛrɛ lɔn. Ani Bowazi ye nɛɛmaba min sɔrɔ ka kɛ Masiya, o kɔrɔ Yezu Krista bɛma dɔ ye, karimasina bɔnɛna o la. Karimasina tun be miiri a yɛrɛ nafa dɔrɔn lo la minkɛ, a banna ka dɛsɛbagatɔ dɛmɛ. O kɛra bɔnɛba ye a ma!—Mat. 1:5; Luka 3:23, 32.