1. Ni mɔgɔw nana an ka lajɛn na u siɲɛ fɔlɔ la, u be mun lo kɔrɔsi? (Jaa lajɛ fana.)

 MIIRI cɛɛ dɔ n’a muso koo la, minw nana Jehova Seerew ka Masaya Boon dɔ la u siɲɛ fɔlɔ la. Balimaw ye u bisimila ni dusudiya ye cogo min na ani kanuya min be kafodenw ni ɲɔgɔn cɛ, o y’u kabakoya yɛrɛ le! U kɔsegitɔ soo, musoman y’a fɔ a cɛɛ ye ko: “Jehova Seerew be dan na tɔɔw la. A diyara n’ ye ka kɛ n’u ye.”

2. Mun lo ye dɔw kunnatiɲɛ?

² Kanuya min be Jehova sagokɛlaw ni ɲɔgɔn cɛ, o ɲɔgɔn tɛ yen. Nka Jehova Seerew tɛ mɔgɔ dafaninw ye (1 Zan 1:8). O la, n’an tora k’an balimaw lɔn koɲuman, an ka teli k’u ka fiɲɛ dɔw kɔrɔsi (Ɔrɔm. 3:23). A fɔ man di nka, dɔw ye Jehova sago kɛli dabila tɔɔw ka dafabaliyakow kosɔn.

3. Yezu ka kalanden sɔbɛw be lɔn mun lo fɛ? (Zan 13:34, 35).

³ Barokun ka vɛrise jɔnjɔn lajɛ tugun (Zan 13:34, 35 kalan). Yezu ka kalanden sɔbɛw be lɔn mun lo fɛ? A fɔra ko kanuya lo, dafalenya tɛ. A kɔrɔsi fana ko Yezu m’a fɔ ko: ‘Ele ben’a lɔn o seen fɛ ko aw kɛra ne ka kalandenw ye.’ Nka a ko: “Mɔgɔ bɛɛ ben’a lɔn o seen fɛ ko aw kɛra ne ka kalandenw ye.” O la, Yezu y’a yira ko kanuya min be an ni ɲɔgɔn cɛ, an dɔrɔn lo tun tɛna a ye o fɛ ko an ye a  ka kalanden sɔbɛw ye. Nka, hali minw tɛ kafomɔgɔw ye, olu fana tun bena o ye.

4. N’a sɔrɔ dɔw b’a fɛ ka mun ni mun lo lɔn kerecɛn sɔbɛw koo la?

⁴ Mɔgɔ minw tɛ Jehova Seerew ye, olu be se k’u yɛrɛ ɲininga ko: “An be se ka Yezu ka kalanden sɔbɛw lɔn kanuya fɛ cogo di? Yezu y’a yira cogo di ko a b’a ka cidenw kanu? Ani an be se ka Yezu ladegi cogo di bi?” Hali an minw batizera, a ka ɲi an ka miiri o ɲiningaliw jaabili la. N’an y’o kɛ, o be se k’a to an b’an ka kanuya yira an balimaw na bɛrɛbɛrɛ, sanko n’u dɔ donna an gasi la.—Efɛz. 5:2.

5. Yezu ka kuma minw be sɔrɔ Zan 15:12, 13 kɔnɔ, u ɲɛfɔ.

⁵ Yezu y’a ɲɛfɔ ko a ka kalandenw tun bena ɲɔgɔn kanu cogo kɛrɛnkɛrɛnnin na (Zan 15:12, 13 kalan). A to i hakili la ko Yezu ye cii di a ka kalandenw ma ko: “Aw ka ɲɔgɔn kanu i n’a fɔ ne y’aw kanu cogo min na.” O kɔrɔ ko di? Yezu y’a ɲɛfɔ ko o kɔrɔ ko an ka ɲi ka tɔɔw kanu ka tɛmɛ an yɛrɛ kan. O kanuya b’an lasun ka sɔn k’an niin di an kerecɛnɲɔgɔnw kosɔn n’o ka kan. b

6. Bibulu b’a yira cogo di ko kanuya kɔrɔtanin lo kosɔbɛ?

⁶ Bibulu be kuma kanuya koo la siɲɛ caaman. Vɛrise minw ka di mɔgɔ caaman ye, u dɔw ye nunu ye: “N’i ko Ala, i ko kanuya le.” (1 Zan 4:8). “I k’i mɔgɔɲɔgɔn kanu i n’a fɔ i yɛrɛ.” (Mat. 22:39). “Kanuya sababu la, hakɛ caaman be yafa.” (1 Piyɛri 4:8). “Daan te kanuya la.” (1 Kor. 13:8). O vɛrisew ni vɛrise wɛrɛw b’a yira ka gwɛ ko a kɔrɔtanin lo kosɔbɛ an k’a yira ko an be n’o jogo ɲumanba ye.

7. Mun na Sutana tɛ se abada ka mɔgɔw kaan bɛn kanuya sɔbɛ barika la?

 ⁷ Mɔgɔ caaman b’u yɛrɛ ɲininga ko: “Mɔgɔ be se ka tiɲɛn diinan lɔn cogo di? Diinanw bɛɛ b’a fɔ ko u be mɔgɔw kalan tiɲɛn lo la. Nka, u kelen kelen bɛɛ be mɔgɔw kalan min na Ala koo la, o tɛ kelen ye.” Sutana y’a kɛ ngalon diinanw cayara. O kama, a ka gwɛlɛ mɔgɔw ma ka tiɲɛn diinan lɔn. Nka, Sutana tɛ se abada ka mɔgɔw kafo ɲɔgɔn kan duniɲa kuru bɛɛ la ani k’a kɛ u be ɲɔgɔn kanu. Jehova dɔrɔn lo be se k’o kɛ. O be faamu sabu kanuya sɔbɛ be bɔ Jehova lo yɔrɔ. Mɔgɔ minw be ni Jehova ka hakili senu ye ani a be u duga, olu dɔrɔn lo be se ka ɲɔgɔn kanu sɔbɛ la (1 Zan 4:7). A tɛ bari an na k’a ye ko Yezu y’a fɔ ko ale ka kalandenw dɔrɔn lo tun bena kɛ ni kanuya sɔbɛ ye u ni ɲɔgɔn cɛ.

8-9. Kanuya min be Jehova Seerew ni ɲɔgɔn cɛ, o ye nɔɔ juman lo to mɔgɔ caaman kan?

⁸ I ko Yezu tun kɔnna k’a fɔ cogo min na, kanuya min be a ka kalanden sɔbɛw ni ɲɔgɔn cɛ, o lo y’a to mɔgɔ caaman sera k’u lɔn. Misali la, balimacɛ Yan hakili b’a la siɲɛ fɔlɔ min na a tagara tile saba lajɛnba dɔ la. O lajɛnba tun kɛra stadi dɔ la a ka soo gɛrɛfɛ. Kalo damanin ka kɔn o lajɛnba ɲɛ, Yan tun tagara farikolo ɲɛnagwɛ dɔ filɛ o stadi la. A ko: “Faranfasiba tun be o koo fila cɛ. Jehova Seerew tun be mɔgɔw bonya, u tun ye fani ɲumanw don ani u deenw ɲɛmalɔnin tun lo.” A y’a fɔ fana ko: “Min yɛrɛ kɔrɔtanin lo kosɔbɛ, n’ y’a ye k’o mɔgɔw tun wasanin lo ani u tun be hɛɛrɛ la. N’ tun b’o lo fɛ n’ ka ɲɛnamaya la. Kalan minw kɛra o loon na, n’ hakili tɛ u si la. Nka, Jehova Seerew tun be koow kɛ cogo min na, n’ tɛna ɲinɛ o kɔ abada!” c Siga t’a la, kanuya sɔbɛ min b’an ni ɲɔgɔn cɛ, o lo b’an lasun ka koow kɛ. An b’an balimaw kanu minkɛ, an b’u minɛ ni ɲumanya ye ani an be bonya la u kan.

⁹ Balimacɛ John y’o lo kɔrɔsi fana a siɲɛ fɔlɔ ka na kafo ka lajɛnw na. A ko: “Teriya . . . min tun be u ni ɲɔgɔn cɛ, o ye nɔɔ to n’ kan kosɔbɛ fɔɔ n’ tun b’a miiri ko u ye mɔgɔ dafaninw lo ye. U ka kanuya sɔbɛ lo y’a to n’ lara a la ko n’ ye tiɲɛn diinan sɔrɔ.” d O seereyaw ani seereya wɛrɛw b’a yira ko Jehova Seerew ye kerecɛn sɔbɛw lo ye.

10. Tuma juman yɛrɛ lo la an be se k’a yira an kerecɛnɲɔgɔnw na ko an be u kanu? (Jukɔrɔla kunnafoni fana lajɛ.)

¹⁰ I ko an y’a fɔ barokun daminɛ na cogo min na, an kerecɛnɲɔgɔnw si dafanin tɛ. Tuma dɔw la, u bena don an gasi la u ka kumaw n’u ka kɛwalew fɛ e (Zaki 3:2). O wagati yɛrɛ lo la, an be se k’a yira an ka kumaw n’an ka kɛwalew fɛ ko an b’an balimaw kanu sɔbɛ la. An be kalan juman lo sɔrɔ Yezu fɛ o koo la?—Zan 13:15.

11. Sɔɔn jugu juman lo tun be Zaki ni Zan na? (Jaa lajɛ fana.)

¹¹ Yezu tun t’a ɲini a ka kalandenw fɛ u ka kɛ mɔgɔ dafaninw ye. Nka, a tun b’u dɛmɛ ni kanuya ye u k’u ka sɔɔn jugu  dabila walisa k’u koo diya Jehova ye. Loon dɔ, ciden Zaki ni Zan ko u bamuso k’a ɲini Yezu fɛ a ka lɔyɔrɔba di u ma a ka Masaya kɔnɔ (Mat. 20:20, 21). U ye min kɛ, o b’a yira ko u tun ye kuncɛbaw ye ani ko u tun b’a fɛ ka lɔyɔrɔba sɔrɔ ka tɛmɛ tɔɔw kan.—Talenw 16:18.

12. Yala sɔɔn jugu tun be Zaki ni Zan dɔrɔn lo la wa? A ɲɛfɔ.

¹² O koo la, Zaki ni Zan dɔrɔn lo m’a yira ko sɔɔn jugu b’u la. A filɛ ciden tɔɔw ye koow ta cogo min na: “Kalanden tan nunu y’o mɛn minkɛ, u dimina mɔgɔ fila nunu kɔrɔ.” (Mat. 20:24). I be taga a sɔrɔ Zaki, Zan ani ciden tɔɔw sɔngɔra ɲɔgɔn kan. N’a sɔrɔ ciden tɔɔw y’a fɔ ko: “Mun na aw ko Yezu ka lɔyɔrɔba di aw ma a ka Masaya la? O tuma aw b’a miiri ko aw ka fisa n’an ye le wa? Aw b’a miiri ko aw dɔrɔn lo ye baaraba kɛ ni Yezu ye wa? An bɛɛ ka kan ni lɔyɔrɔba ye!” A mana kɛ min o min ye, cidenw y’a to o koo ye u ka balimaya kanuya sumaya wagati dɔ la.

13. Tuma min na Yezu ka cidenw ye filiw kɛ, a y’o koo ta cogo di? (Matiyo 20:25-28).

¹³ Yezu ye mun lo kɛ do? A ma dimi. A m’a fɔ ko ale bena ciden wɛrɛw ɲini minw ka fisa ni nunu ye, minw majiginin lo kosɔbɛ ani u be ɲɔgɔn minɛ tuma bɛɛ ni kanuya ye. Nka, a tora k’a dusu suma ka kuma a ka cidenw fɛ sabu a tun b’a lɔn ko u b’a fɛ ka koo ɲuman kɛ (Matiyo  20:25-28 kalan). U siɲɛ fɔlɔ tun tɛ ka sɔsɔli kɛ walisa k’a lɔn min ye ɲɛmɔgɔ ye u cɛma ani a ma kɛ a laban ye. O bɛɛ n’a ta, Yezu tora k’u minɛ ni kanuya ye.—Mariki 9:34; Luka 22:24.

14. Yezu ka cidenw lamɔna yɔrɔ min na, mɔgɔw tun be koow kɛ cogo di?

¹⁴ Yezu ka cidenw lamɔna yɔrɔ min na, siga t’a la, a y’a hakili to o la (Zan 2:24, 25). O wagati la, diinan kuntigiw tun be mɔgɔw kalan ko n’i tɛ ni lɔyɔrɔba ye, i tɛ foyi ye. (Mat. 23:6; videwo nin lajɛ Matiyo 23:6 ka kunnafoniw yɔrɔ la Traduction du monde nouveau kɔnɔ: Les premiers sièges dans les synagogues.) Yahutuw ka diinan kuntigiw tun b’a miiri fana ko u ka fisa ni tɔɔw ye f (Luka 18:9-12). Yezu y’a faamu ko o tun be se ka nɔɔ to a ka cidenw ka miiriya kan u yɛrɛ ani tɔɔw koo la (Talenw 19:11). A tun t’a ɲini u fɛ u ka kɛ mɔgɔ dafaninw ye ani n’u tun ye fili kɛ, a tun be muɲu u kɔrɔ. A tun b’a lɔn ko u b’a fɛ ka koo ɲuman kɛ. O kama, a muɲuna u kɔrɔ k’u kalan walisa u k’u majigi kosɔbɛ ani u k’a yira ko u be ɲɔgɔn kanu sanni k’a ɲini tuma bɛɛ ka kɛ ɲɛmɔgɔ ye.

15. Koo min kɛra Zaki, Zan ani ciden tɔɔw cɛ, an be kalan juman lo sɔrɔ o la?

¹⁵ Koo min kɛra Zaki, Zan ani ciden tɔɔw cɛ, an be kalan caaman sɔrɔ o la. A tun bɛnnin tɛ Zaki ni Zan k’a ɲini Yezu fɛ a ka lɔyɔrɔba di u ma a ka Masaya kɔnɔ. Joo tun tɛ ciden tɔɔw fana fɛ sabu u y’a to o koo ye u ka kelenya nagasi. Nka Yezu ye ciden 12 nunu bɛɛ minɛ ni ɲumanya ani kanuya ye. An be kalan juman lo sɔrɔ o la? Tɔɔw ka filiw n’u ka dafabaliyakow dɔrɔn lo tɛ koo ye. Nka, an be o koow ta cogo min na, o fana kɔrɔtanin lo. Mun lo be se k’an dɛmɛ? N’an diminin lo an kerecɛnɲɔgɔn dɔ kɔrɔ, an be se k’an yɛrɛ ɲininga ko: “A ye min kɛ, mun na o digira n’ na ten? Yala o be n’ ka fiɲɛ dɔ yira n’ ka ɲi ka min bɔ n’ yɛrɛ la wa? Tigi min ye n’ hakɛ ta, kɔni gwɛlɛya dɔ t’a kan le? Hali ni n’ b’a miiri ko joo be n’ fɛ ka dimi, yala n’ be se k’a yira a la ko n’ b’a kanu n’ kɛtɔ ka yafa a ma wa?” N’an tora ka ɲɔgɔn minɛ ni kanuya ye, an bena a yira o fɛ ko an ye Yezu ka kalanden sɔbɛw ye.

16. An be kalan wɛrɛ juman lo sɔrɔ Yezu fɛ?

¹⁶ Yezu ka koo b’a yira an na fana ko an ka ɲi k’a ɲini k’an kerecɛnɲɔgɔnw faamu (Talenw 20:5). Yezu tun be se ka mɔgɔw kɔnɔko lɔn, an tɛ se k’o kɛ. Nka, an be se ka muɲu an balimaw kɔrɔ n’u donna an gasi la (Efɛz. 4:1, 2; 1 Piyɛri 3:8). A bena nɔgɔya an ma ka muɲu u kɔrɔ, n’an b’a ɲini k’u lɔn koɲuman. An ka misali dɔ lajɛ.

17. Kafokulu kɔrɔsibaga dɔ kɛtɔ k’a ɲini ka balimacɛ dɔ lɔn koɲuman, o y’a nafa cogo di?

¹⁷ Kafokulu kɔrɔsibaga dɔ be Afiriki kɔrɔn fan fɛ. A daminɛ na, a tun b’a ɲɛɛ na ko balimacɛ dɔ tɛ tɔɔw minɛ ni ɲumanya ye. O kafokulu kɔrɔsibaga ye mun lo kɛ do? A ko: “Sanni n’ ka n’ yɔrɔ janya o balimacɛ la, n’ y’a ɲini k’a lɔn koɲuman.” O cogo la, a y’a faamu o balimacɛ lamɔna cogo min na ani o ye  nɔɔ min to a kan. O kafokulu kɔrɔsibaga y’a fara a kan ko: “A gwɛlɛyara a ma ka yɛlɛmaniw kɛ walisa ka bɛn ni tɔɔw ye ani a yɛrɛ sera ka yɛlɛmaniba dɔw kɛ. Tuma min na n’ y’o faamu, a koo diyara n’ ye ani an kɛra teri sɔbɛw ye.” Tiɲɛn na, n’an b’an jija k’an balimaw faamu, a bena nɔgɔya an ma k’a yira ko an b’u kanu.

18. N’an kerecɛnɲɔgɔn dɔ donna an gasi la, an be se k’an yɛrɛ ɲininga mun ni mun lo la? (Talenw 26:20).

¹⁸ N’an kerecɛnɲɔgɔn dɔ donna an gasi la, tuma dɔw la an be se k’a miiri ko an ka ɲi ka taga kuma a fɛ walisa k’o koo ɲɛnabɔ. Nka, an ka ɲi k’an yɛrɛ ɲininga koo nunu na fɔlɔ: “Yala kunnafoniw bɛɛ be n’ fɛ wa?” (Talenw 18:13). “Yala a be se ka kɛ ko a ma tugu le wa?” (Waaj. 7:20). “Yala ne yɛrɛ ma deli k’o fili ɲɔgɔn kɛ ka ye wa?” (Waaj. 7:21, 22). “Ni n’ kumana a tigi fɛ o koo la, kɔni o tɛna koo tɔɔ juguya?” (Talenw 26:20 kalan). N’an ye wagati ta ka miiri o ɲiningaliw la, n’a sɔrɔ kanuya bena an lasun an kana to ka miiri o koo la tugun.

19. I cɛsirinin lo ka mun lo kɛ?

¹⁹ Jehova Seerew be ɲɔgɔn kanu minkɛ, u b’a yira ko olu lo ye Yezu ka kalanden sɔbɛw ye. Ani an kelen kelen bɛɛ b’a yira ko an ye Yezu ka kalanden sɔbɛ ye, n’an b’an balimaw kanu sɔbɛ la u ka dafabaliyakow bɛɛ n’a ta. N’an b’o kɛ, n’a sɔrɔ tɔɔw bena a ye ko an be tiɲɛn diinan lo la ani u bena fara an kan ka kanutigi Ala Jehova bato. An k’an cɛsiri ka to k’a yira ko an be ɲɔgɔn kanu. O lo bena a to mɔgɔw b’a lɔn ko an ye kerecɛn sɔbɛw ye.