1-2. Mun lo ka teli ka kɛ ni mɔgɔ be batizera ani i ka ɲi ka miiri mun lo la?

 YALA i delila ka batɛmu ɲinilaw kɔrɔsi wa? U be ɲiningali fila minw jaabi ka kɔn u ka batɛmu ɲɛ, n’u b’o jaabira, i b’a ye ko u lanin b’u ka fɔta la. U somɔgɔw n’u teriw ninsɔn ka di u kɔrɔ kosɔbɛ. U bɔtɔ jii la, i be tɛgɛrɛfɔkanw mɛn ani i b’a ye ko u ɲɛdaw be manamanana ninsɔndiya bolo. Lɔgɔkun o lɔgɔkun, mɔgɔ waa caaman ɲɔgɔn lo b’u yɛrɛkun di Jehova ma ani ka batize ka kɛ a Seerew ye.

² Nka ele do, a b’i kɔnɔ ka batize wa? N’o lo, a lɔn ko i ye mɔgɔ kɛrɛnkɛrɛnnin ye duniɲa juguman nin kɔnɔ sabu i be Jehova ‘Ala yɔrɔ ɲinina.’ (Zab. 14:1, 2). I ye kanbele, sunguru wala mɔgɔkɔrɔba ye wo, barokun nin labɛnna ele lo kama. An minw batizera ka ban, an fana b’a fɛ k’an jija kosɔbɛ ka Jehova sago kɛ fɔɔ abada. O la, kuun minw kama an b’a fɛ ka Jehova sago kɛ, an k’u la saba lajɛ.

3. Mun na tiɲɛn ni tilenninya ka di Jehova sagokɛlaw ye? (Zaburuw 119:128, 163).

³ Jehova y’a fɔ a ka jama ye ko: “Tiɲɛ . . . ka diya aw ye.” (Zak. 8:19). Yezu y’a ka kalandenw jija ko u ka tugu tilenninya nɔfɛ (Mat. 5:6). O kɔrɔ ko koo minw tilennin lo, koo minw ka ɲi ani u saniyanin lo Ala ɲɛɛ kɔrɔ, an ka ɲi k’a ɲini n’an dusu bɛɛ ye k’olu lo kɛ. Tiɲɛn ni tilenninya ka di i ye wa? An lanin b’a la ko u ka di i ye. Ngalon ni koo jugu sifa bɛɛ ka gwo i ye (Zaburuw 119:128, 163 kalan). Ngalontigɛla be duniɲa nin kuntigi Sutana lo ladegi (Zan 8:44; 12:31). Sutana ka laɲinita dɔ ye ka Jehova Ala tɔgɔ senuman tiɲɛ. Kabi murutiliko min kɛra Edɛn nankɔ kɔnɔ, Sutana b’a la ka ngalon jɛnsɛn an ka Ala koo la. A b’a fɛ mɔgɔw k’a miiri ko Jehova be miiri a yɛrɛ nafa dɔrɔn lo la, ko  Kuntigi ngalontigɛla lo ani ko a be adamadenw jɛn fɛɛn ɲuman na (Zɛnɛzi 3:1, 4, 5). Sutana ka ngalonw kosɔn, mɔgɔw bele be koo jugu miiri Jehova koo la. Mɔgɔ minw t’u jija walisa “tiɲɛ . . . ka diya” u ye, Sutana be se k’u lasun ka tilenbaliyakow ni koo jugu sifa bɛɛ kɛ.—Ɔrɔm. 1:25-31.

4. Jehova y’a yira cogo di ko a ye “Ala tiɲɛtigi ye”? (Jaa lajɛ fana.)

⁴ Jehova ye “Ala tiɲɛtigi ye” ani minw b’a kanu, a b’u minɛ ni ɲumanya ye, a kɛtɔ k’u kalan tiɲɛn koo la (Zab. 31:6). O cogo la, a b’u dɛmɛ walisa Sutana kana se k’u lafili tugun n’a ka ngalon kumaw ye. Jehova b’a sagokɛlaw kalan fana walisa u ka kɛ mɔgɔ tilenninw ni hɔɔrɔnw ye. O b’a to u be danbe la u yɛrɛ kan ani u hakili siginin lo (Talenw 13:5, 6). Yala a m’o ɲɔgɔn lo kɛ i ye i ka bibulukalan tuma na wa? I y’a faamu ko Jehova ka kokɛcogow ɲɔgɔn tɛ yen ani ko u be ele yɛrɛ ani adamaden tɔɔw bɛɛ nafa (Zab. 77:14). O kama, koo minw tilennin lo Ala ɲɛɛ kɔrɔ, i b’a fɛ k’o kɛ (Mat. 6:33). I b’a fɛ ka tiɲɛn lafasa ani k’a yira ko Sutana ye min fɔ an ka Ala Jehova koo la, o tɛ tiɲɛn ye. I be se k’o kɛ cogo di do?

5. I be se k’a yira cogo di ko i be tiɲɛn ni tilenninya lafasa?

⁵ I be se ka ɲɛnamaya kɛ cogo dɔ la min b’a yira tɔɔw la ka gwɛ ko i be ban Sutana ka ngalonw ma ani ko i be tiɲɛn lafasa. I be se k’a yira ko i b’a fɛ Jehova lo ka kɛ i Kuntigi ye ani ko a be min jati koo tilennin ye, i b’a fɛ k’o kɛ. I be se k’o kɛ cogo di? I magwɛrɛ Jehova la delili la, i yɛrɛkun di a ma ani o yira jama na i ka batɛmu fɛ. Ni tiɲɛn ni tilenninya ka di i ye kosɔbɛ, o bena i lasun i b’a latigɛ ka batize.

6. Ka kɛɲɛ ni Zaburuw 45:5 ye, mun na i be Yezu Krista kanu?

⁶ Kuun jumanw lo kama i be Yezu Krista kanu? An k’u dɔw lajɛ Zaburuw 45:5 kɔnɔ (a kalan). Tiɲɛn, majigilenya ani tilenninya ka di Yezu ye. Ni tiɲɛn ni tilenninya ka di i ye, siga t’a la Yezu Krista fana koo ka di i ye. Miiri k’a filɛ a ye tiɲɛn ni tilenninya lafasa cogo min na ni jagwɛlɛya ye! (Zan 18:37). Nka a y’a yira cogo di ko majigilenya ka di a ye?

7. Mun lo ka di ele ye Yezu ka majigilenya koo la?

⁷ Yezu y’a yira a ka ɲɛnamaya kɛcogo  fɛ ko majigilenya ka di a ye. Misali la, a be nɔɔrɔ bɛɛ la a Faa lo kan, sanni k’a la a yɛrɛ kan (Mariki 10:17, 18; Zan 5:19). O be mun lo kɛ i la do? Yala o t’i lasun ka Ala Dencɛ kanu ani ka tugu a kɔ wa? Siga t’o la! Mun na Yezu majiginin lo do? Sabu a b’a Faa kanu ani a b’a ladegi, ale min majiginin lo (Zab. 18:36; Eburuw 1:3). Yezu be Jehova jogow ladegi cogo dafanin na minkɛ, yala o t’i lasun k’a kanu wa?

8. Mun na an ninsɔn ka di sabu Yezu lo y’an ka Masacɛ ye?

⁸ An ninsɔn ka di ko Yezu lo y’an ka Masacɛ ye sabu ale ɲɔgɔn Kuntigi ɲuman tɛ yen. Jehova yɛrɛ lo ye fɔrɔmasɔn di a Dencɛ ma ani k’a sigi masaya la (Ezayi 50:4, 5). Miiri k’a filɛ Yezu y’a yira ko a b’an kanu cogo min na fɔɔ k’a yɛrɛ saraka an kosɔn (Zan 13:1). An ka ɲi k’a kanu sabu an ka Masacɛ lo. A y’a ɲɛfɔ ko minw be ale kanu sɔbɛ la, o kɔrɔ a be minw jati a teriw ye, olu b’u ka kanuya yira u kɛtɔ k’a ka ciiw labato (Zan 14:15; 15:14, 15). Tiɲɛn na, nɛɛmaba lo an fɛ ka kɛ Jehova Dencɛ teriw ye!

9. Kerecɛnw ka batɛmu bɔnin be Krista ta ma koo jumanw lo la?

⁹ Yezu ka cii dɔ ye ko a ka kalandenw ka batize (Mat. 28:19, 20). A ye ɲɛyirali to an ye o koo la. Koo dɔw la, a ka batɛmu be dan na a ka kalandenw ta la (koorilen nin lajɛ: “ Yezu ka batɛmu n’a ka kalandenw ta: U be dan na koo minw na”). Nka koo wɛrɛw la, u bɔnin be ɲɔgɔn ma. Yezu ka batɛmu fɛ, a y’a yira ko a labɛnnin lo k’a Faa sago kɛ (Eburuw 10:7). O cogo kelen na, Krista ka kalandenw be batize k’a yira jama na ko u y’u yɛrɛkun di Jehova Ala ma. Sisan, u ɲɛnako fɔlɔ ye ka Ala sago lo kɛ, u yɛrɛ ta tɛ. O cogo la, u be tugura u Matigi ka ɲɛyirali lo kɔ.

10. I be Yezu kanu minkɛ, mun na o ka ɲi k’i lasun ka batize?

¹⁰ I sɔnna a ma ko Yezu lo ye Jehova Dencɛ kelenpe bangelen ye. I ninsɔn ka di fana sabu Jehova ye ale lo sugandi k’a kɛ Masacɛ ye an kun na. I b’a lɔn ko Yezu majiginin lo ani ko a b’a Faa ladegi cogo dafanin na. I y’a mɛn ko a ye kɔngɔtɔw balo, ka mɔgɔ fari faganinw dusu saalo ani ka banabagatɔw yɛrɛ kɛnɛya (Mat. 14:14-21). I ɲɛɛ b’a la a be kafo ɲɛminɛna cogo min na bi (Mat. 23:10). I b’a lɔn fana ko loon nataw la, k’a to Ala ka Masaya kun na, a bena koobaw kɛ ka tɛmɛ o kan. I be se k’a yira cogo di ko i b’a kanu? I be se k’o yira i kɛtɔ k’a ladegi (Zan 14:21). I be se k’a daminɛ ka koo minw kɛ, u dɔ ye k’i yɛrɛkun di Jehova ma ani ka batize.

11. Ele ka miiri la, kuun kɔrɔtaninba juman lo kama i ka ɲi ka batize ani mun na o kɔrɔtanin lo?

¹¹ Kuun kɔrɔtaninba juman lo kama i ka ɲi ka batize? Yezu y’o yira tuma min na a tun be cikanw bɛɛ la kɔrɔtaninba kofɔra. A ko: “I ka Matigi i ka Ala kanu n’i dusu bɛɛ ye, an’i kɔnɔ bɛɛ ye, n’i hakili bɛɛ ye, an’i barika bɛɛ ye.” (Mariki 12:30). Yala i be Ala kanu kosɔbɛ o cogo la wa?

12. Mun na i be Jehova kanu? (Jaa lajɛ fana.)

¹² An be Jehova kanu kuun caaman kosɔn. Misali la, i y’a faamu ko an ‘be nii na ale le sababu la’ ani ko an be “fɛnɲuman minw bɛɛ sɔrɔ n’o dafanin lo,” ale lo y’u di an ma (Zab. 36:10; Zaki 1:17). Fɛɛn ɲuman minw b’i fɛ, an ka Ala kanutigi lo y’u bɛɛ di i ma, ale min tɛgɛ labilanin lo.

13. Mun na kunmabɔsara ye nilifɛn ɲumanba ye?

¹³ Kunmabɔsara ye nilifɛn ɲumanba ye, Jehova ye min di an ma. Mun na an b’o fɔ? Miiri k’a filɛ teriya sɔbɛ min be Jehova n’a Dencɛ cɛ. Yezu ko: “N Faa be n kanu” ani “ne be n Faa kanu.” (Zan 10:17; 14:31). U ye saan miliyari caaman minw kɛ ɲɔgɔn fɛ, o y’a to u ka jɛnɲɔgɔnya barika bonyana kosɔbɛ (Talenw 8:22, 23, 30). Sisan, miiri k’a filɛ Ala dusu kasira cogo min na k’a to a Dencɛ tɔɔrɔla ani ka sa. Jehova be ele ni adamaden tɔɔw kanu kosɔbɛ. O lo kama, a sɔnna k’a Dencɛ kanulen di ka kɛ kunmabɔsara ye walisa ele ni tɔɔw ka se ka ɲɛnamaya kɛ fɔɔ abada ­(Zan 3:16; Gal. 2:20). Kuun minw kama an be Ala kanu, o ye u bɛɛ la belebeleba ye.

14. I be se ka laɲinita juman lo latigɛ min ɲɔgɔn tɛ yen?

¹⁴ I ye koo caaman faamu Jehova koo la minkɛ, i y’a kanu kosɔbɛ fana. Siga t’a la, i b’a fɛ k’i magwɛrɛ kosɔbɛ a la sisan ani fɔɔ abada. Ani i be se k’o kɛ. A b’i jija ni ɲumanya ye ko i k’ale dusu diya (Talenw 23:15, 16). I be se k’o kɛ i ka kumaw ani i ka kɛwalew fɛ fana. I ka ɲɛnamaya kɛcogo bena a yira n’i be Jehova kanu sɔbɛ la (1 Zan 5:3). K’a ɲini  k’i magwɛrɛ Jehova la, o ye laɲinitaw bɛɛ la fisaman ye.

15. I be se k’a yira cogo di ko i be Jehova kanu?

¹⁵ I be se k’a yira cogo di ko i be Jehova kanu? A fɔlɔ, i be delili kɛrɛnkɛrɛnnin dɔ kɛ, o min na i b’i yɛrɛkun di tiɲɛn Ala kelenpe ma (Zab. 40:9). O kɔ, i be batize k’a yira jama na ko i y’i yɛrɛkun di Jehova ma. I ko an y’a ye barokun nin na cogo min na, i ka batɛmu ye ninsɔndiyako ye ani koo kɔrɔtaninba lo i ka ɲɛnamaya kɔnɔ. I ka batɛmu kɔ, i tɛ ɲɛnamaya kɛ i yɛrɛ ye tugun, nka Jehova sago kɛli lo y’i ɲɛnako fɔlɔ ye (Ɔrɔm. 14:8; 1 Piyɛri 4:1, 2). A be se ka kɛ i ɲɛɛ na ko o ye desizɔnba lo ye ani tiɲɛn b’i fɛ. Nka, o be sababu di i ma ka ɲɛnamaya kɛ cogo fisaman na. Cogo di do?

16. Ka kɛɲɛ ni Zaburuw 41:13 ye, minw b’a latigɛ ka baara kɛ Jehova ye u ka ɲɛnamaya kuru bɛɛ la, a bena mun lo kɛ olu ye?

¹⁶ Mɔgɔ si tɛgɛ labilanin tɛ i ko Jehova. I mana fɛɛn o fɛɛn di a ma, ale b’i sɔn ka tɛmɛ o kan fɔɔ ka taga ka na (Mariki 10:29, 30). A bena a kɛ i be kuun bɛrɛ sɔrɔ i ka ɲɛnamaya la, ka wasa ani ka ninsɔndiyaba sɔrɔ kabi sisan yɛrɛ duniɲa juguman nin kɔnɔ. Ani o ye koow daminɛ dɔrɔn lo ye. I ye ɲɛnamaya min daminɛ i ka batɛmu kɔ, daan tɛna kɛ o la. I bena to k’i Faa kanulen sago kɛ fɔɔ abada! Kanuya min be ele n’i Faa cɛ, dɔ bena to ka fara o barika kan. Ani i bena sijan sɔrɔ i ko ale, o kɔrɔ, ka ɲɛnamaya kɛ fɔɔ abada.—Zaburuw 41:13 kalan.

17. Mun lo tɛ Jehova fɛ i be se ka min di a ma?

¹⁷ N’i y’i yɛrɛkun di Jehova ma ani ka batize, i be ni nɛɛma ye ka fɛɛn nafamanba dɔ di i sankolola Faa ma. Fɛɛn ɲumanba minw b’i fɛ ani i ye wagati ɲuman minw kɛ, ale lo y’o bɛɛ di i ma. Ele fana be se ka fɛɛn dɔ di sankolo ni dugukolo Tigi ma, a tɛ ni min ye. O ye i ka kantigiya lo ye (Zɔbu 1:8; 41:11; Talenw 27:11). Siga t’a la, o ye koow bɛɛ la fisaman lo ye, i be se ka min kɛ i ka  ɲɛnamaya kɔnɔ. Tiɲɛn na, kuun jɔnjɔn min ka ɲi k’i lasun ka batize, o ye ko i be Jehova kanu.

18. I be se k’i yɛrɛ ɲininga mun ni mun lo la?

¹⁸ Ayiwa, i bena ɲiningali nin jaabi cogo di: I bena batize wa? Ele dɔrɔn lo be se k’o jaabi. Nka, min be se k’i dɛmɛ, o ye k’i yɛrɛ ɲininga ko: “N’ be mun lo kɔnɔna ka sɔrɔ ka batize?” (Kɛw. 8:36). An ye koo saba minw lajɛ, i hakili to u la. A fɔlɔ, tiɲɛn ni tilenninya ka di i ye. I yɛrɛ ɲininga ko: “Wagati min na bɛɛ lajɛnnin bena to ka tiɲɛn fɔ ani ka koo tilennin kɛ, yala n’ b’a fɛ k’o ye wa?” A filanan, i be Yezu Krista kanu. I yɛrɛ ɲininga ko: “Yala n’ b’a fɛ Ala Dencɛ ka kɛ n’ ka Masacɛ ye wa? Yala n’ b’a fɛ ka tugu a ka ɲɛyirali kɔ wa?” A sabanan, min kɔrɔtanin lo ka tɛmɛ, o ye ko i be Jehova kanu. I yɛrɛ ɲininga ko: “Yala n’ b’a fɛ ka Jehova dusu diya n’ kɛtɔ k’a sago kɛ wa?” N’i y’o ɲiningaliw bɛɛ jaabi ko ɔnhɔn, mun lo b’i bali ka batize? Mun na i bele be kɔnɔni kɛra?—Kɛw. 16:33.

19. Mun na i man ɲi ka sigasiga ka batize? Ɲɛyirali dɔ fɔ (Zan 4:34).

¹⁹ N’i be sigasigara ka batize, miiri ɲɛyirali dɔ la Yezu ye min ta (Zan 4:34 kalan). A kɔrɔsi ko Yezu ye a Faa sago kɛli suma ni dumuni ye. Mun na do? Dumuni be an nafa. Yezu fana tun b’a lɔn ko Jehova mana fɛɛn o fɛɛn ɲini an fɛ, a b’o kɛ an nafa lo kosɔn. Jehova t’a fɛ an ka koo si kɛ min bena tɔɔrɔ lase an ma. Yala Jehova b’a ɲini i fɛ i ka batize wa? Ɔnhɔn (Kɛw. 2:38). O la, i be se ka la a la ko n’i be o cii labato, o bena i nafa. N’i tɛ sigasiga ka dumuni diimanba dɔ kɛ, n’o lo mun na i be sigasiga ka batize?

20. An bena mun lo lajɛ barokun nata la?

²⁰ Mun na dɔw be batɛmu koo bila ka suma? N’a sɔrɔ dɔw bena a fɔ ko: “N’ prɛnin tɛ fɔlɔ.” Tiɲɛn na, k’a latigɛ k’i yɛrɛkun di Jehova ma ani ka batize, o ye desizɔnw bɛɛ la belebeleba lo ye. O kama, i ka ɲi ka miiri koɲuman. Walisa ka batɛmu saratiw dafa, o be wagati ta ani o tɛ ɲɛ jijaliw kɔ fana. Nka n’i b’a fɛ sɔbɛ la ka batize, i be se k’i yɛrɛ labɛn cogo di kabi sisan? An bena o ɲiningali jaabi barokun nata la.