1. Ciden Pol tun be mun lo miiri kɔrɔsigi cidenw koo la?

 KƆRƆSIGI cidenw be baara kɔrɔtaninbaw kɛ kafow kɔnɔ. Siga t’a la, o balimacɛ kantigiw koo tun ka gwɛlɛ ciden Pol ma. Misali la, tuma min na a tun be Filipikaw ka bataki sɛbɛra, a ye foli kɛrɛnkɛrɛnnin lase kɔrɔsigi cidenw ni diinan mɔgɔkɔrɔw ma.—Filip. 1:1.

 2. Balimacɛ Luis ye kɔrɔsigi ciden ye. A be mun lo miiri a ka kunkanbaara koo la?

² Kanbelew fara mɔgɔkɔrɔbaw kan, balimacɛ batizenin caaman be ninsɔndiyaba sɔrɔla kɔrɔsigi cidenya baara la. Misali la, Devan kɛra kɔrɔsigi ciden ye a saan 18. Nka balimacɛ Luis kɛra kɔrɔsigi ciden ye a saan 50 ni kɔ. Ale ni kɔrɔsigi ciden caaman ka miiriya ye kelen ye. A ko: “Nɛɛma lo n’ fɛ ka kɛ kɔrɔsigi ciden ye walisa ka balimaw dɛmɛ. U y’a yira n’ na ko u be n’ kanu kosɔbɛ ani sisan, ne fana be se k’a yira u la ko n’ b’u kanu.”

 3. An bena ɲiningali jumanw lo jaabi?

³ N’i ye balimacɛ batizenin ye ani i tɛ kɔrɔsigi ciden ye fɔlɔ, yala i be se k’a ɲini ka kɛ a ye wa? Mun lo ka ɲi k’i lasun k’o kɛ? Ani i ka ɲi ka Bibulu ka sarati jumanw lo dafa? An bena o ɲiningaliw jaabi barokun nin na. Nka an k’a filɛ fɔlɔ kɔrɔsigi ciden ka baara ye min ye.

 KƆRƆSIGI CIDEN KA BAARA YE MUN LO YE?

 4. Kɔrɔsigi ciden ka baara ye mun lo ye? (jaa lajɛ fana).

⁴ Kɔrɔsigi ciden ye balimacɛ batizenin ye, hakili senu ye min sigi o baara la walisa ka diinan mɔgɔkɔrɔw dɛmɛ ka baara kɔrɔtanin caaman kɛ kafo kɔnɔ. Kɔrɔsigi ciden dɔw b’u janto walisa balimaw ka gafew sɔrɔ waajuli kama ani u k’a lɔn u be se ka waajuli kɛ kiin minw na. Dɔw be dɛmɛ don ka Masaya Boon saniya ani k’a ladon. Dɔw be mɔgɔw bisimila kafo ka lajɛnw na ani dɔ wɛrɛw be sono ni videwo koo ɲɛnabɔ. Kɔrɔsigi cidenw be baara nafaman caaman lo kɛ. Min yɛrɛ kɔrɔtanin lo kosɔbɛ, o ye ko u be Jehova kanu ani u b’a ka sariyaw labato. U b’u balimaw fana kanu kosɔbɛ (Mat. 22:37-39). Balimacɛ batizenin be se k’a ɲini cogo di ka kɛ kɔrɔsigi ciden ye?

 5. Balimacɛ be se k’a ɲini cogo di ka kɛ kɔrɔsigi ciden ye?

⁵ Minw b’a fɛ ka kɛ kɔrɔsigi cidenw ye, Bibulu b’a yira u ka ɲi ka sarati minw dafa (1 Tim. 3:8-10, 12, 13). N’i b’a fɛ k’o nɛɛma baara sɔrɔ, o saratiw sɛgɛsɛgɛ koɲuman ani i jija kosɔbɛ k’u dafa. Nka, i ka ɲi k’i ka ŋaniyaw sɛgɛsɛgɛ koɲuman fɔlɔ.

MUN NA I B’A FƐ KA KƐ KƆRƆSIGI CIDEN YE?

 6. Kuun juman lo kosɔn i ka ɲi k’a ɲini k’i balimaw dɛmɛ? (Matiyo 20:28; jaa lajɛ fana).

⁶ Yezu ka ɲɛyirali ɲɔgɔn tɛ yen sabu a tun b’a Faa ani mɔgɔw kanu cogo min na, o lo tun b’a lasun ka koow kɛ. O kanuya tun b’a lasun ka baaraba kɛ ani k’a yɛrɛ kɛ i n’a fɔ tɔɔw ka baaraden (Matiyo 20:28 kalan; Zan 13:5, 14, 15). Ni kanuya lo b’i lasun i b’a ɲini ka tɔɔw dɛmɛ, Jehova bena i duga ani k’i dɛmɛ i ka saratiw dafa ka kɛ kɔrɔsigi ciden ye.—1 Kor. 16:14; 1 Piyɛri 5:5.

 7. Mun na balimacɛ man ɲi k’a ɲini ka kɛ kɔrɔsigi ciden ye sabu a b’a fɛ tɔɔw ka nɔɔrɔ la a kan?

⁷ Duniɲa kɔnɔ, mɔgɔ minw b’a kɛ i n’a fɔ u be ni lɔyɔrɔba ye, mɔgɔw ka teli ka ɲɛbɔ u fɛ. Nka koow tɛ ten Jehova ka ɔriganisasiyɔn kɔnɔ. I ko Yezu, balimacɛ min be tɔɔw kanu, ale t’a ɲini ka kuntigiya kɛ u kan wala k’a to u  b’a miiri ko ale lɔyɔrɔ ka bon. Minw b’a fɛ ka lɔyɔrɔba sɔrɔ, ni kuntigiya kalifara o ɲɔgɔnna mɔgɔ ma kafo kɔnɔ, a tɛna sɔn k’a yɛrɛ majigi ka baara dɔw kɛ walisa ka Jehova sagokɛla kanulenw dɛmɛ. A bena a jati ko ale ka fisa o baara ɲɔgɔn ma (Zan 10:12). Mɔgɔ o mɔgɔ b’a fɛ ka kunkanbaaraw sɔrɔ kafo kɔnɔ sabu a b’a fɛ ka kɛ ni lɔyɔrɔba ye, Jehova t’o tigilamɔgɔ duga.—1 Kor. 10:24, 33; 13:4, 5.

 8. Yezu ye ladili juman lo di a ka cidenw ma?

⁸ Tuma dɔw la, ŋaniya jugu ye Yezu teri sɔbɛw yɛrɛ lasun u y’a ɲini ka nɛɛma baaraw sɔrɔ. Misali la, ciden Zaki ni Zan ye min kɛ, miiri o la. U y’a ɲini Yezu fɛ a ka lɔyɔrɔba di u ma a ka Masaya la. Yezu m’u tando o kosɔn. Nka, a y’a fɔ a ka ciden 12 nunu bɛɛ ye ko: “Ni mɔgɔ min b’a fɛ ka kɛ mɔgɔbaba ye aw cɛma, o tigi ka kan ka kɛ aw ka baaraden ye. Ni mɔgɔ min b’a fɛ ka kɛ ɲamɔgɔ ye aw cɛma, o ka kan ka kɛ aw bɛɛ ka jɔɔn ye.” (Mariki 10:35-37, 43, 44). Balimacɛ minw be ni ŋaniya ɲuman ye, o kɔrɔ u b’a fɛ k’u balimaw mako ɲɛ, olu be kafodenw dɛmɛ cogo caaman na.—1 Tes. 2:8.

MUN LO BE SE K’A TO A BE DIYA I YE KOSƆBƐ K’I BALIMAW DƐMƐ?

 9. Mun lo be se k’a to a be diya i ye kosɔbɛ k’i balimaw dɛmɛ?

⁹ Siga t’a la, i be Jehova kanu ani i b’a fɛ ka tɔɔw dɛmɛ. O bɛɛ n’a ta, baara min be kalifa kɔrɔsigi cidenw ma, n’a sɔrɔ a nege t’i la k’o kɛ. Mun lo be se k’o baara nege don i la? Miiri k’a filɛ i bena ninsɔndiya cogo min na n’i b’i balimaw dɛmɛna! Yezu ko: “Nisɔndiya be mɔgɔ sɔnni na ka tɛmɛ sɔrɔli kan.” (Kɛw. 20:35). Yezu yɛrɛ ye koow kɛ ka kɛɲɛ n’o kumaw ye. A ye ninsɔndiya sɔbɛ sɔrɔ tɔɔw dɛmɛni na ani ele fana be se k’o ninsɔndiya ɲɔgɔn sɔrɔ.

10. Yezu y’a yira cogo di ko a ninsɔn ka di ka tɔɔw dɛmɛ? (Mariki 6:31-34).

¹⁰ An ka misali dɔ lajɛ min b’a yira ko Yezu ninsɔn tun ka di ka tɔɔw dɛmɛ (Mariki 6:31-34 kalan). Loon dɔ, Yezu n’a ka cidenw tun sɛgɛnnin lo. U tun be tagara yɔrɔ dɔ la mankan tɛ yɔrɔ min na walisa ka lafiɲɛ. Nka jama dɔ kɔnna u ɲɛ yen sabu u tun b’a fɛ Yezu k’u kalan. Yezu tun be se ka ban sabu ale n’a ka cidenw tun ma “waati yɛrɛ sɔrɔ ka dumuni kɛ.” Wala a tun be se ka tiɲɛnkalan kelen wala fila dama kofɔ u ye ani ka sira di u ma. Nka komi a tun b’u kanu, “a y’a daminɛ k’u kalan fɛɛn caaman na.” A tora k’u kalan fɔɔ “suu [tun] be ɲini ka ko.” (Mariki 6:35). A m’o kɛ sabu a tun waajibiyanin lo, nka “u hinɛ donna a la” le. A tun b’a fɛ k’u kalan sabu a b’u kanu. A tun ka di Yezu ye kosɔbɛ ka tɔɔw mako ɲɛ.

11. Yezu ye tɔɔw dɛmɛ cogo tigitigi jumanw lo la? (jaa lajɛ fana).

¹¹ Yezu ye mɔgɔw dɛmɛ a kɛtɔ k’u kalan Ala koo la. Nka, a y’u dɛmɛ cogo tigitigi dɔw la fana. A ye kabako kɛ ka dumuni di u ma ani o kɔ, a y’a ɲini a ka kalandenw fɛ u k’o tilan tilan u ye (Mariki 6:41). O la, a y’a yira a ka kalandenw na u be se ka tɔɔw mako ɲɛ cogo minw na. A y’a yira u la fana ko ka baara dɔw kɛ k’u balimaw dɛmɛ cogo tigitigi dɔw la, o kɔrɔtanin lo. Kɔrɔsigi cidenw b’o baaraw ɲɔgɔn lo kɛ. Yezu ye kabako kɛ ka dumuni min di mɔgɔw ma, miiri k’a filɛ cidenw ninsɔn diyara cogo min na ka dɛmɛ don k’o tilan tilan, fɔɔ “bɛɛ ye dumuni kɛ . . . ka fa”! (Mariki 6:42). Yezu siɲɛ fɔlɔ tun tɛ k’a  janto tɔɔw makoyaw la ka tɛmɛ a yɛrɛ taw kan. A y’o lo kɛ a ka ɲɛnamaya kuru bɛɛ la dugukolo kan (Mat. 4:23; 8:16). A ninsɔn tun ka di kosɔbɛ ka tɔɔw kalan ani k’u dɛmɛ u k’u makoɲɛfɛnw sɔrɔ. Ele fana bena ninsɔndiyaba sɔrɔ n’i b’a ɲini ka tɔɔw dɛmɛ i kɛtɔ ka kɛ kɔrɔsigi ciden ye.

12. Mun na an si man ɲi k’a miiri ko an tɛ se ka bɛrɛ kɛ ka kafodenw dɛmɛ?

¹² N’i b’a miiri ko setigiya kabakoman si t’i fɛ, kana i fari faga. Siga t’a la, jogo dɔw b’i fɛ minw sababu fɛ i be se ka kafodenw mako ɲɛ. Pol ye min fɔ 1 Korɛntikaw 12:12-30 kɔnɔ, miiri o la. O kɔ, Jehova deli a k’i dɛmɛ k’a lɔn o ɲɛsinna ele ma cogo min na. Pol ka kumaw b’a yira ka gwɛ ko i ko Jehova sagokɛla tɔɔw, nafa be ele fana na kafo kɔnɔ ani i koo ka gwɛlɛ kafodenw ma. N’i tɛ saratiw dafa sisan walisa ka kɛ kɔrɔsigi ciden ye, kana i fari faga. Nka, i seko bɛɛ kɛ walisa ka baara kɛ Jehova ye ani k’i balimaw dɛmɛ. La a la ko diinan mɔgɔkɔrɔw bena to ka miiri i koo la ani i be se ka baara minw kɛ, u bena u kalifa i ma.—Ɔrɔm. 12:4-8.

13. Balimacɛw ka ɲi ka sarati minw dafa walisa kunkanbaaraw ka kalifa u ma, an be se ka mun lo fɔ o saratiw fanba koo la?

¹³ An k’a filɛ kuun wɛrɛ min kama i ka ɲi k’a ɲini ka saratiw dafa walisa ka kɛ kɔrɔsigi ciden ye: O saratiw fanba ɲɛsinna kerecɛnw bɛɛ lo ma. Tiɲɛn na, kerecɛnw bɛɛ ka ɲi k’u magwɛrɛ Jehova la, ka ninsɔndiya sɔrɔ sɔnni na ani ka kɛ ɲɛyirali ɲumanw ye. O la, mɔgɔ ka ɲi ka sarati minw dafa walisa ka kɛ kɔrɔsigi ciden ye, n’a sɔrɔ i b’u fanba dafa ka ban. Balimacɛ ka ɲi ka sarati jumanw lo dafa walisa ka kɛ kɔrɔsigi ciden ye?

I KA ƝI KA SARATI MINW DAFA WALISA KA KƐ KƆRƆSIGI CIDEN YE

14. Ka kɛ ‘mɔgɔsɔbɛ’ ye, o kɔrɔ ko di? (1 Timote 3:8-10, 12).

¹⁴ Sarati minw kofɔra 1 Timote 3:8-10, 12 kɔnɔ, an k’u dɔw lajɛ (a kalan). Kɔrɔsigi ciden ka kan ka kɛ ‘mɔgɔsɔbɛ’ ye. O kumaden be se ka bayɛlɛma fana ko “min ka kan ni bonya ye” wala “u be danbe la min kan.” O kɔrɔ tɛ ko i man ɲi ka yɛlɛko wala ka yɛlɛko koow kɛ (Waaj. 3:1, 4). Nka, i ka ɲi k’i ka kunkanbaaraw bɛɛ ta sɔbɛ la. U be baara minw kalifa i  ma, n’i be to k’u kɛ ka ɲɛ ani n’i ye lannamɔgɔ ye, kafodenw bena i bonya.

15. ‘Kumakelentigi’ kɔrɔ ko di ani ‘mɔgɔ min te tɔnɔ ɲini tilenbaliya la,’ o fana kɔrɔ ko di?

¹⁵ Mɔgɔ min ye ‘kumakelentigi’ ye, o tigi kɔnɔ gwɛnin lo, hɔɔrɔn ani lannamɔgɔ lo. A ye min fɔ, a b’o lo kɛ ani a tɛ tɔɔw lafili (Talenw 3:32). ‘Mɔgɔ min te tɔnɔ ɲini tilenbaliya la,’ o tigi ye hɔɔrɔn ye a ka baara ani wariko la. A be jɛnɲɔgɔnya ɲuman min kɛra n’a kerecɛnɲɔgɔnw ye, a t’o kɛ wariɲini sira ye.

16. a) N’a fɔra ko ‘i man kan ka kɛ dɔrɔtɔ ye,’ o kɔrɔ ko di? b) Ka kɛ ni dusukun ɲuman ye, o kɔrɔ ko di?

¹⁶ N’a fɔra ko ‘i man kan ka kɛ dɔrɔtɔ ye,’ o kɔrɔ ko i man ɲi ka to ka dɔrɔ min ka su wala k’a min kojugu. Ka kɛ ni “hakiliɲuman” wala dusukun ɲuman ye, o kɔrɔ ko i be koow kɛ ka kɛɲɛ ni Jehova ka sariyaw ye. Hali n’i tɛ mɔgɔ dafanin ye, i be hɛɛrɛ la sabu i be jɛnɲɔgɔnya ɲuman kɛra ni Ala ye.

17. N’a fɔra ko i ka “sɛgɛsɛgɛ fɔlɔ,” o kɔrɔ ko di? (1 Timote 3:10; jaa lajɛ fana).

¹⁷ N’a fɔra ko i ka “sɛgɛsɛgɛ fɔlɔ,” o kɔrɔ ko diinan mɔgɔkɔrɔw y’a ye ko i b’i ka kunkanbaaraw dafa ka ɲɛ ani ko i ye lannamɔgɔ ye. O la, n’u ye baara dɔ kalifa i ma, i k’o kɛ ka kɛɲɛ n’u ka ladiliw ani ɔriganisasiyɔn ka cikanw ye. Baara min kalifara i ma, a ɲini k’a lɔn i ka ɲi k’o kɛ cogo min na ani i ka ɲi k’o laban wagati min na. N’i b’i sɔbɛ don k’o baara kɛ, kafoden tɔɔw bena o kɔrɔsi ani a bena diya u ye k’a ye ko i be ɲɛtaga kɛra. Diinan mɔgɔkɔrɔw, a’ y’aw janto ka fɔrɔmasɔn di balimacɛ batizeninw ma (1 Timote 3:10 kalan). Yala balimacɛ batizeninw b’aw ka kafo kɔnɔ minw sii ye saan 10 ka taga se 14 wala u sii ma se o ma wa? Yala u b’u ka kelenna kalan kɛ tuma o tuma ani u b’u yɛrɛ labɛn koɲuman lajɛnw kama wa? Yala u be to ka lakalitaw kɛ lajɛnw na ani ka bɔ waajuli la tuma o tuma wa? N’o lo, baara minw bɛnnin lo u sanda n’u ka koow cogoya ma, aw y’o kalifa u ma. O cogo lo la aw be se “k’u sɛgɛsɛgɛ” ka filɛ. O la, n’a sɔrɔ u bena saratiw dafa ka kɛ kɔrɔsigi cidenw ye k’u sii to saan 17 ni 19 cɛ.

18. N’a fɔra ko ‘jalakiyɔrɔ ma sɔrɔ i la,’ o kɔrɔ ko di?

¹⁸ N’a fɔra ko ‘jalakiyɔrɔ ma sɔrɔ i la,’ o  kɔrɔ ko i ma kojuguba si kɛ. Tiɲɛn lo ko u be se ka ngalon la kerecɛn kan. O ɲɔgɔn ye Yezu sɔrɔ ani a tun kɔnna k’a fɔ a ka kalandenw ye ko u bena ngalon la olu fana kan (Zan 15:20). Nka n’i tora ka koo ɲuman kɛ i ko Yezu, i bena tɔgɔ ɲuman sɔrɔ kafo kɔnɔ.—Mat. 11:19.

19. Ka kɛ “musokelentigi” ye, o kɔrɔ ko di?

¹⁹ Ka kɛ “musokelentigi” ye, o kɔrɔ ko n’i furunin lo, Jehova ye min latigɛ furu koo la kabi a daminɛ, i b’o labato. O kɔrɔ, cɛɛ kelen, muso kelen (Mat. 19:3-9). Kerecɛn man ɲi ka kakalayako kɛ abada (Eburuw 13:4). Nka o dɔrɔn tɛ, i ka ɲi ka kantigiya kɛ i muso ye. Kana ɲɛbɔ muso wɛrɛ fɛ abada!—Zɔbu 31:1.

20. Balimacɛ b’a yira cogo di ko a “be se k’a ka soo mara”?

²⁰ I ka ɲi ka ‘se k’i ka soo mara ani i ka denbaya.’ N’i ye sotigi ye, i ka ɲi k’i ka kunkanbaaraw ta sɔbɛ la. Misali la, to ka gwa kɔnɔ batoli ɲɛminɛ lɔgɔkun o lɔgɔkun. I jija fana ka waajuli kɛ n’i ka denbayamɔgɔ kelen kelen bɛɛ ye tuma o tuma. To k’i deenw dɛmɛ u ka jɛnɲɔgɔnya ɲuman kɛ ni Jehova ye (Efɛz. 6:4). Cɛɛ min b’a janto a ka denbaya la, ale b’a yira ko a be se k’a janto kafodenw na fana.—1 Timote 3:5 lajɛ.

21. N’i tɛ kɔrɔsigi ciden ye fɔlɔ, i be se ka mun lo kɛ?

²¹ N’i ye balimacɛ ye ani i tɛ kɔrɔsigi ciden ye fɔlɔ, barokun nin lajɛ koɲuman ani delili kɛ o koo la. I ka ɲi ka sarati minw dafa walisa ka kɛ kɔrɔsigi ciden ye, u sɛgɛsɛgɛ koɲuman ani i jija kosɔbɛ k’o saratiw dafa. I be Jehova n’i balimaw kanu kosɔbɛ cogo min na, miiri o la. A ɲini k’i balimaw dɛmɛ bɛrɛbɛrɛ (1 Piyɛri 4:8, 10). I bena ninsɔndiyaba sɔrɔ o la. I be jijali minw kɛra walisa ka kɛ kɔrɔsigi ciden ye, Jehova k’i duga kosɔbɛ o kosɔn!—Filip. 2:13.