Yala i b’a fɛ ka nafa sɔrɔ bɛrɛbɛrɛ i ka kelenna kalan na wa? N’o lo, ladili nunu bena i dɛmɛ i hakili ka sigi koɲuman kalan tuma na:

• Yɔrɔ ɲuman dɔ sugandi. Yɔrɔ dɔ ɲini min saniyanin lo ani yeelen be yen. I be se ka kalan kɛ tabali dɔ kan wala yɔrɔ bɛnnin dɔ la kɛnɛma.

• A ɲini ka to i kelen na. Yezu tun be bɔ “sɔgɔma joona” ka taga Ala deli “kongo kɔnɔ.” (Mariki 1:35). N’a sɔrɔ i tɛ se ka yɔrɔ dɔ sɔrɔ ka to i kelen na. N’o lo, a to i ka sokɔnɔmɔgɔw k’a lɔn wagati min na i b’i ka kelenna kalan kɛ ani u deli u kana mankan kɛ wala ka kuma i fɛ o wagati la.

• Sinsin i ka kalan kan. Kana a to foyi k’i hakili ɲagami. N’i be kalan kɛra i ka tablɛti wala telefɔni lo kan, a labɛn cogo dɔ la walisa a kana mankan kɛ wala a bila mode avion na. Kalan tuma na, n’i hakili jigira ko i ka ɲi ka koo dɔ kɛ, a sɛbɛ walisa i ka se k’o kɛ kɔfɛ. N’a ka gwɛlɛ i ma k’i hakili sigi, wuli ka tagama wala k’i yɛrɛ sama sama dɔɔni.