1-2. a) Mɔgɔ minw furula kura ye, mun na u ka ɲi k’u jigi la Jehova kan? (Zaburuw 37:3, 4). b) An bena mun lo lajɛ barokun nin na?

YALA i be nana furu wala i furula a ma mɛɛn wa? N’o lo, i be mɔgɔ min kanu kosɔbɛ, siga t’a la i b’a fɛ ele n’ale ka ninsɔndiya sɔrɔ aw ka furu kɔnɔ. Nka, gwɛlɛya dɔw be furu kɔnɔ ani, furuɲɔgɔn kuraw ka ɲi ka desizɔnba dɔw ta. Aw be gwɛlɛyaw ɲɛnabɔ cogo min na ani aw be desizɔn minw ta, o bena nɔɔ to aw ka ninsɔndiya kan saan caaman kɔnɔ. N’aw b’aw jigi la Jehova kan, aw bena desizɔn ɲumanw ta, aw ka furu bena barika sɔrɔ ani aw bena ninsɔndiya kosɔbɛ. Nka n’aw tɛ Ala la ladiliw sira tagama, aw ka teli ka gwɛlɛyaw sɔrɔ aw ka furu kɔnɔ ani aw tɛna ninsɔndiya.—Zaburuw 37:3, 4 kalan.

² Minw furula kura ye, barokun nin ɲɛsinna tigitigi olu lo ma. Nka an bena kuma gwɛlɛya minw koo la, o be se ka furuɲɔgɔnw bɛɛ sɔrɔ. An bena a ye an be se ka kalan minw sɔrɔ cɛɛw ni muso kantigi dɔw fɛ minw kofɔra Bibulu kɔnɔ. An be kalan minw sɔrɔ o mɔgɔw ka koo la, an be se k’o sira tagama furu kɔnɔ ani an ka ɲɛnamaya faan caaman na. An bena a ye fana an be se ka kalan minw sɔrɔ furuɲɔgɔn dɔw fɛ an ka wagati la.

3-4. Furuɲɔgɔn kuraw be se ka gwɛlɛya jumanw lo sɔrɔ?

³ Mɔgɔ dɔw be se ka furuɲɔgɔn kuraw jija u ka ɲɛnamaya kɛ i ko mɔgɔw fanba b’a kɛ cogo min na.  Ɲɛyirali fɛ, u bangebagaw n’u somɔgɔ tɔɔw be se k’u lasun u k’a daminɛ ka deenw sɔrɔ joona. U teriw n’u somɔgɔw be se k’u jija fana u ka boon san ani k’a fa ni fɛɛn ɲumanw ye.

⁴ Ni furuɲɔgɔnw m’u janto, u be se ka desizɔn dɔw ta minw bena a to juruba be kari u kaan na. O kɔ, n’a sɔrɔ furucɛ n’a muso bena baara kɛ lɛri caaman kɔnɔ walisa k’o juru sara. U bena u ka wagati fanba ta ka baara kɛ fɔɔ u tɛ wagati caaman sɔrɔ ka kelenna kalan, gwa kɔnɔ batoli ani waajuli kɛ. Walisa ka wari caaman sɔrɔ wala u ka baara kana tiɲɛ, n’a sɔrɔ u yɛrɛ bena baara kɛ baara jiginin kɔ. O be se k’a to yɛrɛ u be fɔn lajɛnw na. N’o kɛra, u tun bena sababu ɲuman minw sɔrɔ ka baara kɛ Jehova ye, u tɛna o sɔrɔ tugun.

5. I be kalan juman lo sɔrɔ Klaus ni Marisa ka koo la?

⁵ Mɔgɔ caaman ka koo b’a yira ko n’an ɲɛnako fɔlɔ ye ka bololafɛnw lo sɔrɔ, an tɛna ninsɔndiya. An k’a filɛ Klaus n’a muso Marisa ye min faamu o koo la. * U ka furu daminɛ na, u fila bɛɛ y’a daminɛ ka baloɲini baara kɛ kudayi walisa ka wari ni bololafɛn caaman sɔrɔ. Nka, u ninsɔn tun man di. Klaus y’a fɔ ko: “An mako tun be min na bololafɛnw ta fan fɛ, an tun be ni fɛɛn caaman ye ka tɛmɛ o kan yɛrɛ. Nka, an tun tɛ ni laɲinita si ye Alako ta fan fɛ. Tiɲɛn fɔ ka di, an tun tɛ ɲɛnamaya kɛra cogo nɔgɔman na ani an hakili tun siginin tɛ.” N’a sɔrɔ ele fana y’a kɔrɔsi ko i kɛtɔ ka boliboli bololafɛn nɔfɛ, o m’a to i ye ninsɔndiya sɔrɔ. N’o lo, kana i fari faga. Mɔgɔ minw ye ɲɛyirali ɲumanw ye, n’i b’u ka koo lajɛ, o be se k’i dɛmɛ ka yɛlɛmani bɛnninw kɛ. A fɔlɔ, an k’a filɛ furucɛw be se ka kalan min sɔrɔ masacɛ Zozafati fɛ.

6. Zozafati ye Talenw 3:5, 6 sira tagama cogo di tuma min kɛlɛbolo barikaman dɔ nana ale n’a ka mɔgɔw kama?

⁶ Furucɛw, yala tuma dɔw la, aw ka kunkanbaaraw b’aw niin degun wa? N’o lo, aw be se ka kalan sɔrɔ masacɛ Zozafati ka koo la. Zozafati tun ye masacɛ ye minkɛ, a tun ka kan k’a jija walisa jamanadenw bɛɛ latanganin ka to. A y’o kunkanbaaraba dafa cogo di? A tun be se ka min kɛ walisa ka jamanadenw latanga, a y’o lo kɛ. A ye Zuda duguw barika bonya ani ka kɛlɛbolo barikaman dɔ lajɛn. O kɛlɛbolo sɔrɔdasiw tun tɛmɛna mɔgɔ 1 160 000 kan (2 Til. Kib. 17:12-19). Kɔfɛ, Zozafati ye gwɛlɛyaba dɔ sɔrɔ. Amoniw, Mowabuw ani cɛɛ dɔw minw bɔra Seyiri kuluyɔrɔw la, olu nana k’u be Zozafati, a somɔgɔw ani  a ka jamanadenw kɛlɛ (2 Til. Kib. 20:1, 2). Zozafati ye mun lo kɛ do? A ye Jehova deli ko a k’ale dɛmɛ ani k’a barika bonya. Ladili ɲuman min be sɔrɔ Talenw 3:5, 6 kɔnɔ, a ye koow kɛ ka kɛɲɛ n’o ye. (A kalan.) A ye delili min kɛ ni majigilenya ye, o be sɔrɔ 2 Tilew Kibaru 20:5-12 kɔnɔ. O b’a yira ko a tun lanin b’a sankolola Faa la kosɔbɛ. Jehova ye Zozafati ka delili jaabi cogo di?

7. Jehova ye Zozafati ka delili jaabi cogo di?

⁷ Jehova tɛmɛna Levitecɛ Yaaziyɛli fɛ k’a fɔ Zozafati ye ko: “Aw ka taga aw yɛrɛ yira dama, Masaba bena min kɛ k’aw kunmabɔ, aw ka lɔ k’o filɛ.” (2 Til. Kib. 20:13-17). Siga t’a la, kɛlɛ man teli ka kɛ o cogo la. Nka, adamadenw lo tun m’o cikanw di, Jehova lo. Zozafati y’a jigi bɛɛ la a ka Ala kan ani a y’o cikanw labato. Ale n’a ka jama tagara u juguw kama. Sanni a ka sɔrɔdasi ŋanaw bila ɲɛɛ fɛ, a ye dɔnkililabagaw lo bila ɲɛɛ fɛ ani kɛlɛkɛminanw tun tɛ u bolo. Jehova tun ye layidu min ta Zozafati ye, a y’o dafa. A y’a kɛ Zozafati juguw ma see sɔrɔ kɛlɛ la.—2 Til. Kib. 20:18-23.

8. Furucɛw be kalan juman lo sɔrɔ Zozafati ka koo la?

⁸ Furucɛ, i be se ka kalan sɔrɔ Zozafati ka koo la. I ka kunkanbaara lo k’i janto i ka denbaya mɔgɔw la. O kama, i b’i jija kosɔbɛ k’u latanga ani k’u mako wasa. Ni gwɛlɛyaw b’i kan, i be se k’a miiri ko i bena se k’u ɲɛnabɔ i yɛrɛ ma. Nka, kana i jigi la i yɛrɛ ka setigiya kan. Jehova deli i kelenna walisa a k’i dɛmɛ. Ka fara o kan, i kɔnɔ gwɛ ka delili kɛ n’i muso ye. Dɛmɛ ɲini Jehova fɛ, i kɛtɔ ka Bibulu n’an ka gafew sɛgɛsɛgɛ. I ye ladili minw sɔrɔ, u sira tagama. I basigira Bibulu kan ka desizɔn minw ta, n’a sɔrɔ dɔw tɛna sɔn o ma. U yɛrɛ be se k’a fɔ ko i ye hakilintan ye. N’a sɔrɔ u bena a fɔ ko wari ni bololafɛnw lo bena i ka denbaya latanga sɔbɛ la. Nka, i hakili to Zozafati ka koo la. A y’a jigi la Jehova kan ani a y’o yira a ka kɛwalew fɛ. Jehova ma o cɛɛ kantigi to yen, a tɛna ele fana to yen (Zab. 37:28; Eburuw 13:5). Furuɲɔgɔnw be se ka koo wɛrɛ jumanw lo kɛ walisa ka ninsɔndiya sɔrɔ u ka furu kɔnɔ?

9. An be se ka mun lo fɔ kira Ezayi n’a muso koo la?

⁹ Jehova sago kɛli lo tun ye kira Ezayi n’a muso ɲɛnako fɔlɔ ye. Ezayi tun ye kira ye ani n’a sɔrɔ a muso fana tun ye kira ye sabu a weelela ko “kiramuso” (Ezayi 8:1-4). Siga t’a la, Jehova sago kɛli lo tun ye Ezayi n’a muso ɲɛnako fɔlɔ ye. U ye ɲɛyirali ɲumanw ye furuɲɔgɔnw fɛ bi!

10. Ni furuɲɔgɔnw be Bibulu ka kiraya kumaw sɛgɛsɛgɛ, o be se k’u dɛmɛ cogo di u k’u seko bɛɛ kɛ Jehova ka baara la?

¹⁰ Bi, furuɲɔgɔnw be se ka kira Ezayi n’a muso ladegi, u kɛtɔ k’u seko bɛɛ kɛ Jehova ka baara la. N’u be Bibulu ka kiraya kumaw sɛgɛsɛgɛ ɲɔgɔn fɛ ani k’a ye ko u be dafa tuma bɛɛ, o bena a to u be la Jehova la kosɔbɛ * (Titi 1:2). U be se ka miiri k’a filɛ cogo min na u be se ka dɛmɛ don Bibulu ka kiraya kuma dɔw dafali koo la. Ɲɛyirali fɛ, Yezu ye  kiraya kuma min fɔ ko kibaro diiman bena fɔ duniɲa kura bɛɛ la laban be sɔrɔ ka se, u be se ka dɛmɛ don o dafali koo la (Mat. 24:14). Ni balimacɛ dɔ n’a muso lara a la kosɔbɛ ko Bibulu ka kiraya kumaw be dafa tuma bɛɛ, u bena u jija sɔbɛ la k’u seko bɛɛ kɛ Jehova ka baara la.

11. Pirisili ni Akilasi sera ka mun lo kɛ ani mun na?

¹¹ Akilasi n’a muso Pirisili tun ye Yahutuw ye ani u tun siginin be Ɔrɔmu dugu la. Mɔgɔ minw furula a ma mɛɛn, olu be se ka kalan sɔrɔ u fɛ. Akilasi ni Pirisili tun ye kibaro diiman mɛn Yezu koo la ani u kɛra kerecɛnw ye. Siga t’a la, u tun wasanin lo u ka ɲɛnamaya kɔnɔ. Nka, u ka koow barila ka yɛlɛma tuma min na masacɛ Kulodi ye cii di ko Yahutuw bɛɛ ka Ɔrɔmu dugu bila. Miiri k’a filɛ o kɔrɔ tun ye min ye Akilasi ni Pirisili fɛ! U tun be yɔrɔw ani mɔgɔ minw lɔn, u tun ka ɲi ka taga k’olu to yen. U tun ka ɲi ka boon ɲini dugu wɛrɛ la ani k’u ka fanibugudilan baara daminɛ kokura. O yɛlɛmaniw nana ni gwɛlɛya minw ye, yala o tun bena u bali ka Ala ka Masaya kɛ u ɲɛnako fɔlɔ ye wa? Siga t’a la, i b’o ɲiningali jaabili lɔn. K’u to u ka soo kura la Korɛnti dugu la, u ye u seen don kafo ka koow la. U jɛnna ni ciden Pol ye fana k’o yɔrɔ balimaw jija. Kɔfɛ, u tagara dugu wɛrɛw la, yɔrɔ minw na waajulikɛlaw tun man ca (Kɛw. 18:18-21; Ɔrɔm. 16:3-5). Tiɲɛn na, u bolo tun degunnin lo kosɔbɛ ani u ninsɔn diyanin tun lo yɛrɛ le!

12. Mun na furuɲɔgɔnw ka ɲi ka laɲinitaw latigɛ u yɛrɛ ye Alako ta fan fɛ?

¹² Bi, furuɲɔgɔnw be se ka Pirisili ni Akilasi ladegi, u kɛtɔ ka Ala ka Masaya kɛ u ɲɛnako fɔlɔ ye. Wagati ɲuman min na u ka ɲi ka baro kɛ u ka laɲinitaw koo la, o ye tuma min na u be teriya kɛra furu kama. Furuɲɔgɔnw ka ɲi ka laɲinitaw latigɛ ɲɔgɔn fɛ ani k’u jija k’o laɲinitaw dafa. N’u b’o kɛ, u bena sababu caaman sɔrɔ k’a ye ko  Jehova b’u dɛmɛna (Waaj. 4:9, 12). An ka Russell n’a muso Elizabeth ka koo lajɛ. Russell ko: “Tuma min na an tun be teriya kɛra furu kama, an kumana tigitigi an ka laɲinitaw koo la Alako ta fan fɛ.” Elizabeth ko: “An kumana o laɲinitaw koo la walisa n’a nana kɛ ko an ka ɲi ka desizɔn dɔw ta, an tɛna a to foyi k’an bali k’o laɲinitaw dafa.” Russell ni Elizabeth ka koow cogoya y’a to u sera ka yɛlɛma Mikronezi mara la walisa ka dɛmɛ don yɔrɔ min na waajulikɛlaw man ca.

13. Ka kɛɲɛ ni Zaburuw 28:7 ye, n’an b’an jigi la Jehova kan, an be nafa juman lo sɔrɔ o la?

¹³ I ko Russell ni Elizabeth, furuɲɔgɔn caaman y’a latigɛ k’u ka ɲɛnamaya kɛ cogo nɔgɔman na. U y’o latigɛ walisa ka se ka waajuli kɛ ani ka mɔgɔw kalan u ka wagati fanba la. Ni furuɲɔgɔnw be laɲinita ɲumanw latigɛ u yɛrɛ ye Alako ta fan fɛ ani u be baara kɛ ɲɔgɔn fɛ k’u dafa, u bena nafa caaman sɔrɔ o la. U bena a ye Jehova b’a janto u la cogo min na. U bena la Jehova la kosɔbɛ fana ani u bena ninsɔndiya sɔbɛ sɔrɔ.—Zaburuw 28:7 kalan.

14. Layidu min be sɔrɔ Matiyo 6:25, 31-34 kɔnɔ, ciden Piyɛri n’a muso y’a yira cogo di ko u lanin b’o la?

¹⁴ Furuɲɔgɔnw be se ka kalan sɔrɔ fana ciden Piyɛri n’a muso ka koo la. Ciden Piyɛri siɲɛ fɔlɔ ka Yezu kunbɛn, kalo 6 wala saan kelen ɲɔgɔn o kɔ, a tun ka ɲi ka desizɔnba dɔ ta. Piyɛri tun be mɔni lo kɛ walisa k’a ka denbaya mako wasa. O kama, tuma min na Yezu y’a ɲini Piyɛri fɛ ko a ka tugu ale kɔ kudayi, n’a sɔrɔ Piyɛri miirila a muso koo la ka sɔrɔ ka desizɔn ta (Luka 5:1-11). Piyɛri y’a latigɛ ka tugu Yezu kɔ waajuli baara la. O tun ye desizɔn ɲuman lo ye! An be se ka la a la ko Piyɛri muso sɔnna o desizɔn ma. Bibulu b’a yira ko a ye Piyɛri bila sira a ka voyazi dɔw la Yezu suu kununin kɔ (1 Kor. 9:5). Siga t’a la, kerecɛn furumuso ɲuman tun lo. O kama, Piyɛri tun be se ka ladiliw di kerecɛn furucɛw ni furumusow ma ani a tɛ maloya (1 Piyɛri 3:1-7). Jehova ye layidu min ta ko n’an y’a ka Masaya ɲini fɔlɔ a bena an makoɲɛfɛnw di an ma, a gwɛnin lo ko Piyɛri n’a muso tun lanin be o layidu la.—Matiyo 6:25, 31-34 kalan.

15. Tiago ni Esther ka koo b’i dɛmɛ ka mun lo faamu?

¹⁵ N’i furula a saan damanin ye nin ye, i be se ka to k’a ɲini cogo di ka dɔ fara i ka cidenya baara kan? Fɛɛrɛ dɔ ye ka kalan sɔrɔ furuɲɔgɔn dɔw ka koo la. Ɲɛyirali fɛ, barokun minw be to ka bɔ tuma o tuma ani u kuun ko “U sɔnna k’u yɛrɛ di gwansan,” i be se k’olu kalan. Tiago n’a muso Esther be bɔ Berezil jamana na. O barokunw y’u dɛmɛ u y’a ɲini ka taga dɛmɛ don yɔrɔ minw na weleweledalaw man ca. Tiago ko: “Jehova y’a sagokɛlaw dɛmɛ cogo min na an ka wagati la, tuma min na an y’o kalan, an fana y’a ɲini ka tugu Jehova ka ladiliw kɔ ani k’a ka dɛmɛ sɔrɔ.” Kɔfɛ, u yɛlɛmana Paraguwe jamana na. O yɔrɔ la, u be Pɔrtigɛkan kafo dɔ kɔnɔ kabi saan 2014. Esther ko: “Vɛrise min ka di an fila bɛɛ ye kosɔbɛ, o ye Efɛzikaw 3:20 ye. Tuma caaman na, an y’a ye k’o vɛrise dafara an ka cidenya  baara la.” O vɛrise kɔnɔ, Pol ko an be min deli Jehova fɛ, a bena o di an ma fɔɔ ka tɛmɛ o kan yɛrɛ. Pol ye min fɔ, o ye tiɲɛn yɛrɛ lo ye!

16. Minw furula kura ye, olu be se ka ladiliw ɲini jɔnw lo fɛ n’u be miirila u ka laɲinitaw koo la?

¹⁶ Minw furula kura ye, olu be se ka kalan sɔrɔ furuɲɔgɔnw fɛ minw y’u jigi la Jehova kan saan caaman kɔnɔ. N’a sɔrɔ furuɲɔgɔn dɔw ye kudayi cidenya baara kɛ saan caaman kɔnɔ. N’aw be miirila aw ka laɲinitaw koo la, aw be se ka ladili ɲini olu fɛ. Aw be se k’a yira o cogo la fana ko aw jigi lanin be Jehova kan (Talenw 22:17, 19). Minw furula kura ye, diinan mɔgɔkɔrɔw fana be se k’olu dɛmɛ u ka laɲinitaw latigɛ u yɛrɛ ye Alako ta fan fɛ ani k’u dafa.

17. Mun lo ye Klaus ni Marisa sɔrɔ? An be kalan juman lo sɔrɔ u ka koo la?

¹⁷ Nka tuma dɔw la, n’an y’a latigɛ ka dɔ fara an ka cidenya baara kan, koow tɛ kɛ i ko an tun b’a fɛ cogo min na. An kumana Klaus ni Marisa minw koo la ka tɛmɛ, o ɲɔgɔn lo ye olu sɔrɔ. Saan saba u furunin kɔ, u bɔra u ka dugu la ka taga dɛmɛ don lɔli baara la Fɛnlandi tɔnbolo la. Nka, u y’a mɛn ko u be se ka to yen kalo wɔɔrɔ dɔrɔn le. A daminɛ na, u dusu tiɲɛna. Nka dɔɔni o kɔ, u y’u weele ka na arabukan degi. Sisan, u dusu ka di ka baara kɛ arabukan kafo dɔ kɔnɔ jamana wɛrɛ la. Min y’u sɔrɔ, Marisa miirila o koo la ani a ko: “K’i jigi bɛɛ la Jehova kan ani ka bɔ i sigiyɔrɔ la, siranya b’o la. Nka, n’ y’a ye ko Jehova y’an dɛmɛ cogo kabakoman na tuma bɛɛ. N’ y’o ye minkɛ, o y’a to n’ be n’ jigi bɛɛ la Jehova kan kosɔbɛ.” I ko Klaus ni Marisa ka koo b’a yira cogo min na, i be se ka la a la ko n’i b’i jigi bɛɛ la Jehova kan, a bena i duga tuma bɛɛ.

18. Furuɲɔgɔnw be se ka mun lo kɛ walisa k’u jigi la Jehova kan tuma bɛɛ?

¹⁸ Furu ye Jehova ka nilifɛn lo ye (Mat. 19:5, 6). A b’a fɛ furuɲɔgɔnw k’o nilifɛn diyabɔ (Talenw 5:18). Aw minw furula a ma mɛɛn, aw be min kɛra aw ka ɲɛnamaya kɔnɔ, aw k’o sɛgɛsɛgɛ k’a filɛ. Yala aw b’aw seko bɛɛ kɛra k’a yira Jehova la ko aw b’a waleɲuman lɔn kosɔbɛ a ka nilifɛn kosɔn wa? Aw ka Jehova deli. Aw k’a ka Kuma sɛgɛsɛgɛ walisa ka sariyakolo dɔw sɔrɔ minw ɲɛsinna aw ma. O kɔ, aw ye ladili minw sɔrɔ Jehova fɛ, aw k’o sira tagama. N’aw be Jehova sago kɛ aw ɲɛnako fɔlɔ ye aw ka furu kɔnɔ, aw ka la a la ko aw bena ninsɔndiya ni dugaw sɔrɔ!