1. N’a sɔrɔ an b’an yɛrɛ ɲininga mun lo la?

YANNI dɔɔni, koo nunu bena kɛ: Ngalon diinan bena halaki, Gɔgi min be Magɔgi bena wuli an kama ani Arimagedɔn kɛlɛ bena kɛ. Tuma dɔw la, n’i miirila o koow la, yala o be siranya bila i la wa? Yala i delila k’i yɛrɛ ɲininga ko: “Tuma min na o siranyakow bena kɛ, yala n’ limaniyanin bena to wa?” N’i delila k’i yɛrɛ ɲininga o la, an bena baro min kɛ Yezu ka kumaw kan, o bena i nafa kosɔbɛ. O kumaw be sɔrɔ barokun ka vɛrise jɔnjɔn na. Yezu y’a fɔ a ka kalandenw ye ko: “Aw hakili kana ɲagami. Aw lara Ala la, aw ye la ne fana na.” (Zan 14:1). N’an lanin lo Ala ani Yezu la kosɔbɛ, o bena an dɛmɛ ka sinikow muɲu ni hakilisigi ye.

2. An be se k’an ka limaniya barika bonya cogo di? An bena mun lo ye barokun nin na?

² An be kɔrɔbɔliw muɲu cogo min na sisan, n’an miirila o la, an bena a lɔn an ka ɲi ka min kɛ walisa k’an ka limaniya barika bonya. N’an ye jatiminɛ kɛ o koo la, an bena a ye an ka ɲi k’an ka limaniya faan minw fisaya. Tuma o tuma n’an ye kɔrɔbɔli muɲu, an ka limaniya barika be bonya. Limaniya barikaman bena an dɛmɛ ka kɔrɔbɔli nataw muɲu. Barokun nin na, an bena koo naani lajɛ minw ye Yezu ka kalandenw sɔrɔ ani o y’a yira ko u mako tun be limaniya barikaman na. O kɔ, an bena a ye an be se k’o gwɛlɛyaw ɲɔgɔn muɲu cogo min na bi ani o be se k’an labɛn cogo min na sinikow kama.

3. Yezu ye min fɔ Matiyo 6:30, 33 kɔnɔ, o b’an dɛmɛ ka mun lo faamu limaniya koo la?

³ Sotigi b’a fɛ ka dumuni, faniw ni siyɔrɔ di a muso n’a  deenw ma ani o bɛnnin lo. Nka wagati gwɛlɛ nunu na, o man nɔgɔ tuma bɛɛ. Tuma dɔw la, an kerecɛnɲɔgɔn dɔw ka baara be tiɲɛ ani u ka jijaliw bɛɛ n’a ta, u tɛ baara wɛrɛ sɔrɔ. Dɔw banna baara dɔw la minw bɛnnin tɛ kerecɛnw ma. O koow bɛɛ la, an ka ɲi ka la a la kosɔbɛ ko an mako be min na walisa k’an ka denbaya balo, Jehova bena o di an ma. Yezu y’o lo fɔ a ka kalandenw ye ka gwɛ a kalan na, a ye min kɛ kulu kan (Matiyo 6:30, 33 kalan). N’an lanin b’a la kosɔbɛ ko Jehova tɛna an to yen fewu, an bena a sago kɛli lo kɛ an ɲɛnako fɔlɔ ye. Ani, n’an y’a ye cogo min na Jehova b’an dɛmɛna bololafɛnw ta fan fɛ, an bena an magwɛrɛ a la kosɔbɛ ani an ka limaniya barika bena bonya.

4-5. Denbaya mɔgɔ dɔw tun be hamina, sabu u tun tɛ sera k’u makoɲɛfɛnw sɔrɔ. Mun lo y’u dɛmɛ?

⁴ Balimacɛ Miguel Castro n’a ka denbaya mɔgɔw be Venezuwela jamana na. U tun be hamina, sabu u tun tɛ sera k’u makoɲɛfɛnw sɔrɔ. A kɔrɔsi u y’a ye Jehova y’u dɛmɛ cogo min na. Fɔlɔ la, foro tun b’u fɛ ani u tun be wari min sɔrɔ o la, u tun be balo n’o lo ye. O kɔ, cɛɛ dɔw nana ni marifaw ye, k’u ka foro bɔsi u la ani k’u gwɛn. Miguel ko: “Sisan, an be sɛnɛ kɛ foro dennin dɔ lo kɔnɔ an ye min luwe. N’ be koo fɔlɔ min kɛ loon o loon, o ye ka Jehova deli ko an mako be min na o loon na, a k’o di an ma.” Koow man nɔgɔ o denbaya mɔgɔw fɛ. Nka, u lanin b’a la kosɔbɛ ko an Faa kanutigi Jehova be se k’u ka loon o loon makoɲɛfɛnw di u ma. O la, Miguel n’a ka denbaya mɔgɔw tɛ fɔn lajɛnw na ani u be waajuli kɛ tuma o tuma. Jehova sago lo ye u ɲɛnako fɔlɔ ye ani Jehova b’u makoɲɛfɛnw di u ma.

⁵ O wagati gwɛlɛw na, Miguel n’a muso Yurai tora ka miiri cogo min na Jehova y’a janto u ka denbaya mɔgɔw la. Tuma dɔw la, Jehova tɛmɛna balimaw fɛ k’u makoɲɛfɛn dɔw di u ma wala ka Miguel dɛmɛ a ye baara dɔ sɔrɔ. Wagati wɛrɛw la, Jehova tɛmɛna tɔnbolo balimaw fɛ ka Miguel n’a ka denbaya mɔgɔw dɛmɛ. Jehova m’u to yen abada! O koow ye o denbaya mɔgɔw ka limaniya barika bonya. U denmuso kɔrɔba Yoselin ye koo tigitigi dɔ lakali k’a yira Jehova ye u dɛmɛ cogo min na. O kɔ, a ko: “Jehova y’an dɛmɛ cogo min na, n’an miirila o la, o b’an jija yɛrɛ le! N’ teri lo ani n’ lanin b’a la ko a bena to ka n’ dɛmɛ tuma bɛɛ.” A y’a fɔ fana ko: “An ka denbaya mɔgɔw ye gwɛlɛya minw sɔrɔ, o y’an labɛn gwɛlɛyaba nataw kama.”

6. Ni wariko gwɛlɛya b’i kan, i be se k’i ka limaniya barika bonya cogo di?

⁶ Yala wariko gwɛlɛya b’i kan wa? N’o lo, koow man nɔgɔ i fɛ. Nka, i ka koow mana gwɛlɛya cogo o cogo, i be se ka tɛmɛ o fɛ k’i limaniya barika bonya. Jehova deli ani Yezu ka kuma minw be sɔrɔ Matiyo  6:25-34 kɔnɔ, u kalan ani miiri u kan. Bi, kerecɛn dɔw ka koow b’a yira ko minw be to ka Jehova sago kɛ kantigiya la, a b’olu mako wasa. Olu ka koo lajɛ (1 Kor. 15:58). N’i y’o kɛ, i bena la a la kosɔbɛ ko i sankolola Faa bena i dɛmɛ, i ko a ye o balimaw dɛmɛ cogo min na. A b’a lɔn i mako be min na ani a b’a lɔn a be se k’o di i ma cogo min na. N’i y’a ye ko Jehova be i dɛmɛna, i ka limaniya barika bena bonya. O la, i bena se ka gwɛlɛyabaw muɲu loon nataw la.—Abak. 3:17, 18.

7. Ka kɛɲɛ ni Matiyo 8:23-26 ka fɔta ye, “fɔɲɔba” dɔ ye Yezu ka kalandenw ka limaniya kɔrɔbɔ cogo di?

⁷ Loon dɔ, Yezu n’a ka kalandenw tun be kurun kɔnɔ ani fɔɲɔba dɔ daminɛna. Yezu tɛmɛna o fɛ k’a ka kalanden dɛmɛ u k’a faamu ko u ka ɲi k’u ka limaniya barika bonya (Matiyo 8:23-26 kalan). O fɔɲɔ barika tun ka bon fɔɔ jii tora ka don kurun kɔnɔ. Nka, Yezu tun lanin lo a be sinɔgɔra. Kalandenw siranna kosɔbɛ ani u y’a kunu ko a k’olu kisi. Matigi y’u ɲininga ni ɲumanya ye ko: “Mun na aw be siran ten? Jigitan nunu! [wala ‘Aw ta lanaya ka dɔgɔ dɛ!’, Biblu Ala ta Kuma].” Kalanden siranbagatɔw tun ka ɲi k’a faamu ko a ka nɔgɔ Jehova fɛ ka Yezu ni olu latanga. An be kalan juman lo sɔrɔ o la? Limaniya barikaman be se k’an dɛmɛ ka fɔɲɔba nɔfɛkow muɲu wala gwɛlɛya o gwɛlɛya min be i ko fɔɲɔba.

8-9. Anel ka limaniya kɔrɔbɔra cogo di ani mun lo y’a dɛmɛ?

⁸ Balimamuso dɔ tɔgɔ ko Anel, a be bɔ Pɔrto Riko mara la ani a furunin tɛ. A kɔrɔsi a ka limaniya barika bonyana cogo min na sabu a ye kɔrɔbɔliba dɔ muɲu. O kɔrɔbɔli tun ye fɔɲɔba dɔ lo ye. Saan 2017, fɔɲɔba Maria ye Anel ka boon halaki. A ka baara tiɲɛna o fɔɲɔba kosɔn. Anel ko: “Koow tun man nɔgɔ n’ fɛ o wagati la. N’ tun be hami. Nka, n’ ye n’ jija ka n’ jigi la Jehova kan delili sababu fɛ. N’ tun ka ɲi ka min kɛ, n’ m’a to haminankow ka n’ bali k’o kɛ.”

⁹ Anel ko koo wɛrɛ min y’ale dɛmɛ k’o kɔrɔbɔli muɲu, o ye kanminɛli lo ye. A ko: “N’ kɛtɔ ka tugu Jehova ka ɔriganisasiyɔn ka cikanw kɔ, o ye n’ dɛmɛ n’ hakili siginin tora. Jehova tɛmɛna balimaw fɛ ka n’ dɛmɛ. U ye n’ jija ani u ye n’ makoɲɛfɛnw di n’ ma.” Anel y’a fɔ fana ko: “N’ ye min deli Jehova fɛ, a y’o di n’ ma fɔɔ ka tɛmɛ o kan yɛrɛ. O ye n’ ka limaniya barika bonya kosɔbɛ.”

10. Ni gwɛlɛyaba dɔ b’i kan, i be se ka mun lo kɛ?

¹⁰ Yala gwɛlɛyaba dɔ b’i kan wa? A be se ka kɛ balawoko dɔ ye. Wala n’a sɔrɔ bana dɔ b’i sɛgɛnna kojugu ani i fari fagara kosɔbɛ fɔɔ i m’a lɔn i bena min kɛ. I be se ka hami wagati dɔw la. Nka, kana a to o k’i bali k’i jigi la Jehova kan. I magwɛrɛ a la i  kɛtɔ k’a deli n’i dusu bɛɛ ye. Jehova y’i dɛmɛ cogo minw na fɔlɔ la, to ka miiri o la. O bena i ka limaniya barika bonya (Zab. 77:12, 13). La a la ko a tɛna i to yen abada!

11. Mun na an ka ɲi k’an jija ka mɛnni kɛ an ɲɛminɛbagaw fɛ?

¹¹ Koo wɛrɛ juman lo be se k’i dɛmɛ ka kɔrɔbɔliw muɲu? I ko Anel y’a fɔ cogo min na, kanminɛli lo. Jehova ni Yezu lanin be minw na, i jija ka la olu la fana. An ɲɛminɛbagaw be cikan minw di an ma, tuma dɔw la, a be se ka kɛ an ɲɛɛ na ko u bɛnnin tɛ. Nka n’an be mɛnni kɛ u fɛ, Jehova b’an duga. Ala ka Kuma ani a sagokɛla kantigiw ka ɲɛyirali b’a yira ko kanminɛli be mɔgɔ niin kisi (Ɛkiz. 14:1-4; 2 Til. Kib. 20:17). Miiri o ɲɛyiraliw kan. N’i b’o kɛ, o bena a to i b’i cɛsiri ka Jehova ka ɔriganisasiyɔn ka cikanw labato sisan yɛrɛ ani sini ma (Eburuw 13:17). O la, tɔɔrɔba min be nana, an tɛna siran o ɲɛ fewu!—Talenw 3:25.

12. Ka kɛɲɛ ni Luka 18:1-8 ka fɔta ye, n’an limaniyanin lo, cogo juman na o b’an dɛmɛ ka tilenbaliyakow muɲu?

¹² Yezu tun b’a lɔn ko a ka kalandenw ka limaniya tun bena kɔrɔbɔ tilenbaliyakow kosɔn. Walisa k’u dɛmɛ k’o tilenbaliyakow muɲu, a ye talen dɔ la min be sɔrɔ Luka ka kitabu kɔnɔ. Yezu kumana muso dɔ koo la min tun be to ka taga kititigɛla tilenbali dɔ deli walisa a k’ale ka koo ɲɛnabɔ tilenninya la. A tun lanin b’a la ko n’a tora k’o kititigɛla deli, a laban, a bena a dɛmɛ. Kititigɛla labanna k’a dɛmɛ. An be kalan juman lo sɔrɔ o la? Jehova tɛ tilenbali ye. O kama, Yezu y’a fɔ ko: “Ayiwa, Ala ye minw woloma k’u kɛ a ta ye, ni olu be dɛmɛ ɲini a fɛ suu ni tile, yala a bena mɛn k’u dɛmɛ wa?” (Luka 18:1-8 kalan). O kɔ Yezu ko: “Mɔgɔ Dencɛ bena segi tuma min na, yala a bena na [o] lanaya sɔrɔ dugukolo kan wa?” Ni tilenbaliyakow be kɛra an na, an ka ɲi ka muɲu ani ka to ka delili kɛ. O bena a yira ko an ka limaniya barika ka bon i ko o firiyamuso ta. N’an be n’o limaniya ɲɔgɔn ye, an be se ka la a la ko a mɛɛn o mɛɛn, Jehova bena dɔ kɛ dɔ ye walisa k’an dɛmɛ. An ka ɲi ka la a la fana ko barika be delili la kosɔbɛ. Tuma dɔw la, Jehova be se k’an ka deliliw jaabi cogo dɔw la, an yɛrɛ tun tɛ miirila minw na.

13. U tun ye tilenbaliya kɛ denbaya dɔ la. Delili ye u dɛmɛ cogo di?

¹³ An ka balimamuso Vero ka koo lajɛ. A be Kɔngo Kinsasa jamana na. A cɛɛ tɛ Jehova Seere ye ani u denmuso be ni saan 15 ye. U tun be dugu dennin min na, sɔrɔdasiw ye o minɛ. O kama, u bolila ka bɔ yen. Sɔrɔdasiw tun ye sira datugu yɔrɔ dɔ la. U senin yen, sɔrɔdasiw y’u minɛ ani u y’a fɔ u ye ko u bena u faga. Vero y’a daminɛ ka kasi. A denmuso y’a ɲini k’a  hakili sigi, a kɛtɔ ka delili kɛ ni kaanba ye, n’a be Jehova tɔgɔ weelela. A tilanin kɔ delila la, sɔrɔdasiw kuntigi y’a ɲininga ko: “Sungurunin, jɔn lo ye delili kɛcogo yira i la?” A y’a jaabi ko: “N’ bamuso lo. Delili modɛli min be sɔrɔ Matiyo 6:9-13 kɔnɔ, a tɛmɛ o lo fɛ ka n’ degi.” Sɔrɔdasiw kuntigi y’a fɔ ko: “Sungurunin, ele n’i bangebagaw ka taga hɛɛrɛ la. Aw ka Ala Jehova k’aw latanga!”

14. Mun lo be se k’an ka limaniya kɔrɔbɔ? Mun lo bena an dɛmɛ k’o kɔrɔbɔli muɲu?

¹⁴ O koow b’a yira an na ko delili kɔrɔtanin lo kosɔbɛ. An man ɲi ka ɲinɛ o kɔ abada! Nka, n’i ka deliliw ma jaabi joona joona wala cogo kabakoman na do? I ko firiyamuso min kofɔra Yezu ka talen na, to ka delili kɛ. La a la ko an ka Ala tɛna i to yen ani ko a bena tɛmɛ fɛɛrɛ dɔ fɛ k’i ka delili jaabi wagati bɛnnin na. To ka hakili senu deli Jehova fɛ (Zab. 46:2). A to i hakili la ko yanni dɔɔni Jehova bena i duga kosɔbɛ fɔɔ i yɛrɛ bena ɲinɛ i ka tɔɔrɔw kɔ. N’i be kɔrɔbɔliw muɲu Jehova ka dɛmɛ sababu la, o b’i barika bonya ani i bena se ka kɔrɔbɔli nataw muɲu.—1 Piyɛri 1:6, 7.

15. Ka kɛɲɛ ni Matiyo 17:19, 20 ye, gwɛlɛya juman lo tun be Yezu ka kalandenw kan?

¹⁵ Yezu y’a ka kalandenw dɛmɛ k’a faamu ko limaniya tun bena u dɛmɛ ka see sɔrɔ gwɛlɛyaw kan (Matiyo 17:19, 20 kalan). Loon dɔ, u ma se ka jina dɔ gwɛn k’a sɔrɔ u tun sera k’o kɛ wagati dɔw la. Mun lo tun kɛra? Yezu y’a ɲɛfɔ u ye ko u mako be limaniya barikaman na. A y’a fɔ u ye ko n’u ka limaniya barika ka bon, u bena see sɔrɔ gwɛlɛyabaw kan minw be i ko kuluw! A b’an ɲɛɛ na ko an tɛ se ka gwɛlɛya minw muɲu, o ɲɔgɔn be se k’an sɔrɔ bi.

16. Tuma min na u ye Geydi cɛɛ faga, limaniya y’a dɛmɛ cogo di k’o koo muɲu?

¹⁶ An ka balimamuso dɔ ka koo lajɛ min tɔgɔ ko Geydi ani a be bɔ Gwatemala jamana na. Loon dɔ u tagatɔ soo lajɛn bannin kɔ, mɔgɔjugu dɔw y’a cɛɛ Edi faga. Geydi ka limaniya y’a dɛmɛ cogo di k’o dusukasiba muɲu? A ko: “Delili ye n’ dɛmɛ ka n’ ka koow to Jehova bolo ani o ye n’ dusukun lafiya. N’ y’a ye ko Jehova tɛmɛna n’ somɔgɔw ani n’ teriw fɛ kafo kɔnɔ k’a yira ko a b’a janto n’ na. N’ bolo degunnin lo Jehova ka baara la minkɛ, o be dɔ bɔ n’ ka dusukasi la. O be n’ dɛmɛ fana ka n’ ka gwɛlɛyaw muɲu loon o loon ani n’ tɛ jɔrɔ siniko la. Koo min ye n’ sɔrɔ, o ye n’ dɛmɛ k’a faamu ko gwɛlɛya o gwɛlɛya mana n’ sɔrɔ loon nataw la, n’ bena se k’o muɲu Jehova, Yezu ani u ka ɔriganisasiyɔn ka dɛmɛ barika la.”

17. An be se ka mun lo kɛ ni gwɛlɛyaba dɔ b’an kan min be i ko kulu?

¹⁷ Yala i dusu kasinin lo i ka mɔgɔ  kanulen dɔ saya kosɔn wa? N’o lo, wagati ta k’i ka limaniya sabati sukununi jigiya koo la. Bibulu ka maana minw be sukununi koo lakali, olu kalan. Yala i dusu kasinin lo sabu i somɔgɔ dɔ gwɛnna ka bɔ kafo kɔnɔ wa? Bibulu sɛgɛsɛgɛ walisa ka la a la ko Ala be mɔgɔ kolo cogo min na, o bɛnnin lo tuma bɛɛ. Gwɛlɛya o gwɛlɛya mana i sɔrɔ, tɛmɛ o fɛ k’i ka limaniya barika bonya. I dusukunnakow fɔ Jehova ye. Sanni i ka to i kelen na, i magwɛrɛnin to i balimaw na (Talenw 18:1). Koo minw bena i dɛmɛ ka muɲuli kɛ, to k’u kɛ, hali n’i bena o kɛ ni ɲɛji ye (Zab. 126:5, 6). To ka taga lajɛnw na, ka waajuli kɛ ani ka Bibulu kalan i ko i be deli k’a kɛ cogo min na. Jehova ye layidu ta ko a bena koo ɲuman minw kɛ i ye sini ma, to ka miiri olu la. N’i y’a ye Jehova b’i dɛmɛna cogo min na kabi sisan, i ka limaniya barika bena to ka bonya a koo la.

18. N’i y’a ye ko i ka limaniya barika man bon, i be se ka mun lo kɛ?

¹⁸ Kɔrɔbɔli minw b’i kan sisan ani minw y’i sɔrɔ loon tɛmɛninw na, n’u y’a yira ko i ka limaniya barika man bon, kana i fari faga. A jati k’o ye sababu ye k’i ka limaniya barika bonya. I ko Yezu ka cidenw, delili kɛ ko: “Dɔ fara an ka lanaya kan.” (Luka 17:5). Ka fara o kan, an ye ɲɛyirali minw lajɛ barokun nin na, miiri u la. Jehova y’i dɛmɛ wagati minw bɛɛ la, miiri o la i ko Miguel ni Yurai y’a kɛ cogo min na. I ko Vero denmuso ani Anel, Jehova deli n’i dusu bɛɛ ye sanko ni gwɛlɛyaba dɔ b’i kan. I ko Geydi, sɔn a ma ko i mako be dɛmɛ min na, Jehova be se ka tɛmɛ i somɔgɔw ni teriw fɛ k’o lase i ma. Kɔrɔbɔli minw b’i kan sisan, a to Jehova k’i dɛmɛ k’o muɲu. O bena a to i be la a la kosɔbɛ ko kɔrɔbɔli o kɔrɔbɔli mana i sɔrɔ sini ma, a bena i dɛmɛ k’o fana muɲu.

19. Yezu tun lanin be mun lo la? E fana be se ka la mun lo la?

¹⁹ Yezu y’a ka kalandenw dɛmɛ u y’a faamu u tun ka ɲi k’u ka limaniya faan minw barika bonya. Nka, a tun lanin b’a la ko Jehova ka dɛmɛ sababu la, u tun bena se ka kɔrɔbɔli nataw muɲu (Zan 14:1; 16:33). A tun lanin b’a la ko jamaba dɔ bena kisi tɔɔrɔba nata la, u ka limaniya barikaman sababu la (Yir. 7:9, 14). Yala ele bena kɛ o mɔgɔw cɛma wa? N’i be tɛmɛ sababuw bɛɛ fɛ sisan k’i ka limaniya sabati, i bena kɛ u cɛma Jehova ka nɛɛma barika la.—Eburuw 10:39.