1. Mun lo be se k’an sɔrɔ? Nka an lanin be mun lo la?

 N’AN be waajuli kɛra, mɔgɔ dɔw be se ka wuli an kama. N’a sɔrɔ dɔ yɛrɛ bena fara o kɔrɔbɔli kan loon nataw la (Dan. 11:44; 2 Tim. 3:12; Yir. 16:21). Nka an mako be dɛmɛ min na, an be se ka la a la ko Jehova bena o di an ma. Mun na do? Sabu Jehova tun be cii minw kalifa a sagokɛlaw ma, o tun mana gwɛlɛya cogo o cogo, a tun b’u dɛmɛ tuma bɛɛ u k’o dafa. An ka misali dɔ lajɛ o koo la. An k’a filɛ koo minw ye kira Ezekiyɛli sɔrɔ tuma min na a tun be Yahutuw waajura k’u to jɔnya la Babilɔni.

2. Jehova ye mun lo fɔ Ezekiyɛli ka kiinmɔgɔw koo la? An bena mun lo lajɛ barokun nin na? (Ezekiyɛli 2:3-6).

² Ezekiyɛli ka kiinmɔgɔw tun be cogo di? Jehova y’a fɔ u koo la ko “mɔgɔ ɲanagwɛlɛnw lo, u dusu ka gwɛlɛ” ani “mɔgɔ murutininw lo.” U tun be mɔgɔ tɔɔrɔ i n’a fɔ ŋɔniw ani u tun ka fari i ko bunteni. A tɛ bari an na k’a ye ko Jehova y’a fɔ Ezekiyɛli ye siɲɛ caaman ko: “I kana siran”! (Ezekiyɛli 2:3-6 kalan). Waajuli baara min tun kalifara Ezekiyɛli ma, a sera k’o kɛ sabu 1) Jehova lo tun y’a ci, 2) Ala ka hakili senu ye barika don a la ani 3) Ala ka kumaw y’a ka limaniya barika bonya. O koo saba ye Ezekiyɛli dɛmɛ cogo di? U be se ka an dɛmɛ cogo di?

3. N’a sɔrɔ kuma jumanw lo ye barika don Ezekiyɛli la? Jehova y’a hakili sigi cogo di ko ale be n’a ye?

³ Jehova y’a fɔ Ezekiyɛli ye ko: “Ne b’i ci.” (Ezek. 2:3, 4). N’a sɔrɔ o kumaw ye barika don Ezekiyɛli la. Mun na do? Siga t’a la a hakili jigira ko tuma min na Jehova ye Musa ani Ezayi kɛ a ka kiraw ye, a y’o kumaw ɲɔgɔn fɔ u ye (Ɛkiz. 3:10; Ezayi 6:8). Ezekiyɛli tun b’a lɔn fana ko Jehova y’o kira fila dɛmɛ u sera ka cii gwɛlɛw dafa. O la,  tuma min na Jehova y’a fɔ Ezekiyɛli ye siɲɛ fila ko: “Ne b’i ci,” a tun be se ka la a la ko Jehova bena ale dɛmɛ. Ezekiyɛli y’a sɛbɛ siɲɛ caaman fana ko: “Masaba kumana ne fɛ.” (Ezek. 3:16). Siga t’a la, Ezekiyɛli tun lanin b’a la ko Jehova lo y’ale ci. Ezekiyɛli facɛ tun ye sarakalasebaga ye. O la, n’a sɔrɔ a y’a fɔ Ezekiyɛli ye ko Jehova y’a ka kiraw hakili sigi tuma bɛɛ ko ale be n’u ye. Jehova y’a fɔ Isiyaka, Yakuba ani Zeremi ye ko: “Ne be n’i ye” wala “Ne bena to i fɛ.”—Zɛnɛzi 26:24; 28:15; Zer. 1:8.

4. N’a sɔrɔ kuma wɛrɛ jumanw lo ye barika don Ezekiyɛli la?

⁴ Ezekiyɛli tun be waajuli min kɛra, Israɛldenw fanba tun bena o ta cogo di? Jehova ko: “Isirayɛlidenw tena sɔn ka mɛnni kɛ i fɛ, bari u t’a fɛ ka mɛnni kɛ ne fɛ.” (Ezek. 3:7). U kɛtɔ ka ban ka mɛnni kɛ Ezekiyɛli fɛ, u tun be banna ka mɛnni kɛ Jehova lo fɛ. O kumaw ye Ezekiyɛli hakili sigi ko Israɛldenw banna ka mɛnni kɛ a fɛ minkɛ, o kɔrɔ tɛ ko a tɛ kira ɲuman ye. Jehova ye Ezekiyɛli hakili sigi fana ko a ye kitiko minw lase Israɛldenw ma, n’u dafara tuma min na, “u ben’a lɔn ko kira b’u cɛma.” (Ezek. 2:5; 33:33). Siga t’a la, o dususalo kumaw ye Ezekiyɛli barika bonya ani a sera k’a ka cidenya baara dafa.

5. Ka kɛɲɛ ni Ezayi 44:8 ye, mun lo be an barika bonya?

⁵ K’a lɔn ko Jehova lo ye an ci ka taga waajuli kɛ, o be an fana barika bonya. A ye bonya la an kan a kɛtɔ k’an weele ko a ‘seerew’ (Ezayi 43:10). O ye nɛɛmaba yɛrɛ lo ye an fɛ! Jehova tun y’a  fɔ Ezekiyɛli ye ko: “I kana siran.” A b’a fɔ an fana ye ko: “Aw kana siran.” Mun na an man ɲi ka siran an kɛlɛbagaw ɲɛ? Sabu i ko Ezekiyɛli, Jehova lo ye an fana ci ani a be n’an ye.—Ezayi 44:8 kalan.

6. a) Jehova b’an hakili sigi cogo di ko a bena an dɛmɛ? b) Mun lo be an jija?

⁶ Jehova ye layidu ta ko a bena an dɛmɛ. Misali la, a kɔnna k’a fɔ ko: “N’aw be tɛmɛna jii kɔnɔ, ne bena kɛ n’aw ye. Hali n’aw be baji tigɛ, a tena aw kunu. Hali n’aw be tagamana tasuma cɛma, a tena aw jɛni. K’aw to tasuma cɛma, a tena foyi kɛ aw la.” (Ezayi 43:2). Dɔɔni o kɔ le Jehova ko: “Ne seere ye aw le ye.” N’an be waajuli kɛra, tuma dɔw la an be gwɛlɛya caaman sɔrɔ an be se ka minw suma ni baji ye. An be kɔrɔbɔlibaw fana sɔrɔ minw be i ko tasuma. O bɛɛ n’a ta, an bele be to ka waajuli kɛ Jehova ka dɛmɛ barika la (Ezayi 41:13). Bi fana mɔgɔw fanba be ban ka kibaro diiman lamɛn i ko Ezekiyɛli ka wagati la. Nka o kɔrɔ tɛ ko an tɛ waajuli kɛra ka ɲɛ. N’an be to ka waajuli kɛ ni kantigiya ye, o ka di Jehova ye. N’an b’o to an hakili la, o b’an jija. Ciden Pol ko: “[Mɔgɔ] kelen kelen bɛɛ bena u ka sara sɔrɔ ka kɛɲɛ n’u ka baara ye.” (1 Kor. 3:8; 4:1, 2). Balimamuso dɔ ye piyɔniye ye kabi wagatijan ani a ko: “A ka di ne ye k’a lɔn ko Jehova b’an duga an ka jijaliw kosɔn.”

7. Ezekiyɛli tun mana miiri a ka yelifɛn na, o tun be mun lo kɛ a la? (Jaa lajɛ ɲɛɛ fɔlɔ kan.)

⁷ Ezekiyɛli y’a ye ko Ala ka hakili senu barika ka bon kosɔbɛ. A ye min ye yelifɛn dɔ la, o y’a dɛmɛ k’a faamu ko hakili senu lo be mɛlɛkɛ barikamanw dɛmɛna. A y’a faamu fana ko Ala ka wotoro be boli hakili senu lo barika la (Ezek. 1:20, 21). O ye nɔɔ juman lo to Ezekiyɛli kan? A y’a sɛbɛ ko: “Ne y’o nɔɔrɔ ye dɔrɔn, ne benna ka biri duguma.” Ezekiyɛli kabakoyara fɔɔ a benna duguma (Ezek. 1:28). Kɔfɛ, a tora ka miiri o yelifɛn na. N’a sɔrɔ o y’a to a lara a la kosɔbɛ ko Ala ka hakili senu barika la, a bena se k’a ka cidenya baara dafa.

8-9. a) Tuma min na Jehova ko Ezekiyɛli ka “wili ka lɔ,” o ye mun lo kɛ a la do? b) Komi Ezekiyɛli ka kiinmɔgɔw ka koo tun ka gwɛlɛ, Jehova ye a barika bonya cogo wɛrɛ juman na?

⁸ Jehova y’a fɔ Ezekiyɛli ye ko: “Adamaden, wili ka lɔ, bari ne bena kuma i fɛ.” O kumaw ani hakili senu y’a to Ezekiyɛli ye fanga sɔrɔ ka wuli ka lɔ a seen kan. A y’a sɛbɛ ko: “Ala nii donna ne la ka ne wili ka lɔ.” (Ezek. 2:1, 2). Kɔfɛ Ala ka “sebagaya,” o kɔrɔ a ka hakili senu ye Ezekiyɛli ɲɛminɛ a ka cidenya baara kuru bɛɛ la (Ezek. 3:22; 8:1; 33:22; 37:1; 40:1). Ala ka hakili senu ye barika don Ezekiyɛli la walisa a ka se k’a ka cii dafa. O tun ye ka mɔgɔw waaju, minw “ɲaa ka gwɛlɛ” ani “u dusu ka gwɛlɛ.” (Ezek. 3:7). Jehova y’a fɔ Ezekiyɛli ye ko: “Ne bena i kɛ mɔgɔ ɲanagwɛlɛn ye, mɔgɔ tulogwɛlɛn, i n’a fɔ olu. Ne bena i jaa gwɛlɛya i ko luluu janin lo cogo min na. A bena gwɛlɛya ka tɛmɛ kabakurugwɛlɛn kan. Kana siran u ɲa, i jaa kana tigɛ u ɲakɔrɔ.” (Ezek. 3:8, 9). A be komi Jehova tun b’a fɔra Ezekiyɛli ye le ko: ‘Kana a to mɔgɔw ka ɲɛnagwɛlɛya k’i fari faga. N’ bena i barika bonya.’

⁹ O kɔ, Ala ka hakili senu ye Ezekiyɛli ta ka taga n’a ye a ka waajuli kɛyɔrɔ la. Ezekiyɛli y’a sɛbɛ ko: “Masaba ka  sebagaya barikaman tun sera ne ma.” Ezekiyɛli tun ka ɲi ka kibaro min lase mɔgɔw ma, a ye lɔgɔkun kelen bɛɛ ta walisa k’o faamu ka ɲɛ. O la, a tun bena se k’o lase u ma ani k’a yira ko ale yɛrɛ lanin b’o la kosɔbɛ (Ezek. 3:14, 15). O kɔ, Jehova ko Ezekiyɛli ka taga kɔkɛnɛ dɔ la. O yɔrɔ la, “Ala nii donna [a] la.” (Ezek. 3:23, 24). Sisan, Ezekiyɛli tun labɛnnin lo k’a ka cidenya baara daminɛ.

10. An mako be dɛmɛ juman lo la walisa ka waajuli baara kɛ ani mun na?

¹⁰ An mako be dɛmɛ juman lo la walisa ka waajuli baara kɛ? Walisa k’o ɲiningali jaabi, min ye Ezekiyɛli sɔrɔ, an ka miiri o la. A mako tun be dɛmɛ min na, Ala ka hakili senu y’o di a ma a sɔrɔla k’a ka waajuli baara daminɛ. I ko Ezekiyɛli, an fana be sera ka waajuli kɛ bi hakili senu ka dɛmɛ dɔrɔn lo sababu la. Mun na? Sabu Sutana b’an kɛlɛla walisa an ka waajuli baara dabila (Yir. 12:17). Mɔgɔ caaman b’a miiri ko Sutana barika ka bon kosɔbɛ ani o kama, an tɛ se ka see sɔrɔ a kan. Nka an ka waajuli baara sababu la, an be see sɔrɔla a kan! (Yir. 12:9-11). Cogo di do? N’an be waajuli kɛ, an b’a yira ko Sutana ka bagabagari tɛ foyi kɛ an na. Tuma o tuma n’an be waajuli kɛ, an be see sɔrɔ Sutana kan. Hali k’a sɔrɔ an juguw b’an kɛlɛ, an be sera ka waajuli kɛ. O b’a yira ka gwɛ ko an koo ka di Jehova ye ani ko ale lo be barika don an na a ka hakili senu sababu la.—Mat. 5:10-12; 1 Piyɛri 4:14.

11. Ala ka hakili senu bena an dɛmɛ an ka mun lo kɛ? An be se ka mun lo kɛ walisa Ala ka to k’o di an ma?

¹¹ Jehova ye fanga di Ezekiyɛli ma walisa a ka se ka waajuli kɛ. N’an miirila o la, o b’an dɛmɛ ka mun lo faamu? O b’an dɛmɛ k’a faamu ko Ala ka hakili senu be se k’an dɛmɛ ka see sɔrɔ gwɛlɛya sifa bɛɛ kan waajuli la (2 Kor. 4:7-9). Nka  an be se ka mun lo kɛ walisa Ala ka to k’a ka hakili senu di an ma? An ka ɲi k’o deli a fɛ n’an dusu bɛɛ ye ani ka la a la ko a bena an ka deliliw jaabi. Yezu y’a fɔ a ka kalandenw ye ko: “Aw [ka to] k’aw ka makoyafɛn daali Ala fɛ . . . Aw mako be fɛɛn min na, aw [ka to] k’o ɲini . . . Aw [ka to] ka daa kɔkɔ.” A ko Jehova bena “nii senuman di a daalibagaw ma.”—Luka 11:9, 13; Kɛw. 1:14; 2:4.

12. Sɛbɛ melekenin min kofɔra Ezekiyɛli 2:9–3:3 kɔnɔ, o bɔra min ani mun lo tun sɛbɛra a kɔnɔ?

¹² Ezekiyɛli mako tun be fanga min na walisa ka waajuli kɛ, Ala y’o di a ma a ka hakili senu barika la. Nka o dɔrɔn tɛ. Ala ka kumaw y’a ka limaniya barika bonya fana. Yelifɛn dɔ la, Ezekiyɛli ye bolo dɔ ye min tun ye sɛbɛ melekenin dɔ minɛ (Ezekiyɛli 2:9–3:3 kalan). O sɛbɛ melekenin bɔra min ani mun lo tun b’a kɔnɔ? O ye Ezekiyɛli ka limaniya barika bonya cogo di? An k’o ɲiningaliw jaabili lajɛ. O sɛbɛ melekenin bɔra Ala ka masasigilan yɔrɔ la. Ezekiyɛli tun kɔnna ka mɛlɛkɛ naani minw ye a ka yelifɛn na, n’a sɔrɔ Jehova tɛmɛna olu dɔ lo fɛ, k’o sɛbɛ di a ma (Ezek. 1:8; 10:7, 20). Ala ka kumaw lo tun be o sɛbɛ melekenin kɔnɔ. O tun ye Ala ka kitikumajan dɔw lo ye, Ezekiyɛli tun ka ɲi ka minw lase Yahutu murutininw ma minw tun be jɔnya la (Ezek. 2:7). O kitikumaw tun sɛbɛra sɛbɛ faan fila bɛɛ la.

13. Jehova ko Ezekiyɛli ka mun lo kɛ n’o sɛbɛ melekenin ye ani mun na a tun ka di?

¹³ Jehova ko a ka kira k’o sɛbɛ melekenin ‘ɲimi k’a kɔnɔ fa n’a ye.’ Ezekiyɛli fana y’o sɛbɛ bɛɛ ɲimi. O koo kɔrɔ ko di? O kɔrɔ ko Ezekiyɛli tun bena kuma minw lase Yahutuw ma, a tun ka ɲi k’u faamu bɛrɛbɛrɛ. A tun ka ɲi ka la o kumaw na walisa u k’a lasun ka waajuli kɛ. O kɔ, koo kabakoman dɔ kɛra. Ezekiyɛli y’a ye ko o sɛbɛ ‘tun ka di a daa la i n’a fɔ lii.’ (Ezek. 3:3). Mun na do? Ezekiyɛli tun b’a jati ko ka kɛ Jehova ka lasigiden ye, o ye koo ɲuman wala nɛɛmaba lo ye (Zab. 19:9-12). A tun be Jehova waleɲuman lɔn sabu a y’ale sugandi k’a kɛ a ka kira ye.

14. Mun lo ye Ezekiyɛli dɛmɛ a sɔnna a ka kunkanbaara ma?

¹⁴ Kɔfɛ, Jehova y’a fɔ Ezekiyɛli ye ko: “Ne bena kuma minw bɛɛ fɔ i ye, i tulo malɔ o la ka ɲa, k’a mara i dusu la.” (Ezek. 3:10). A tun b’a fɔra Ezekiyɛli ye le ko a ka sɛbɛ melekenin kɔnɔkow to a hakili la ani ka miiri o kan. O tun bena Ezekiyɛli ka limaniya sabati. O tun ye kuma barikaman ye fana Ezekiyɛli tun ka ɲi ka min lase Jehova batobagaw ma (Ezek. 3:11). Ni Ezekiyɛli tun ye Jehova ka kuma faamu ka ɲɛ ani ka la a la, a tun bena se k’a ka waajuli baara daminɛ ani k’a kɛ k’a dafa.—Zaburuw 19:15 lajɛ.

15. Walisa ka muɲuli kɛ, an ka ɲi ka mun lo ‘mara an dusu la’?

¹⁵ Walisa ka muɲu an ka waajuli baara la, an fana ka ɲi k’a to Ala ka Kuma k’an ka limaniya barika bonya tuma o tuma. An ka ɲi ka Jehova ka kumaw bɛɛ ‘mara an dusu la.’ Bi, an be Jehova lamɛn a ka Kuma barika la, o min ye Bibulu ye. An be se ka mun lo kɛ walisa Ala ka Kuma ka to ka nɔɔ to an ka miiriyaw, an dusukunnakow ani an ka ŋaniyaw kan?

16. An ka ɲi ka mun lo kɛ ni Ala ka Kuma ye ani an be se k’o kɛ cogo di?

 ¹⁶ N’an be wagati ta ka dumuni diyabɔ, o be fanga di an ma. O cogo kelen na, n’an be Ala ka Kuma kalan ani ka miiri a kan, o b’an ka limaniya barika bonya. An be kalan min sɔrɔ sɛbɛ melekenin koo la, an k’o to an hakili la. Jehova b’a fɛ an k’an “kɔnɔ fa” n’a ka Kuma ye, o kɔrɔ, an k’a ɲini k’a faamu bɛrɛbɛrɛ. An be se k’o kɛ koo nunu sababu fɛ: delili, kalangwɛ ani an ye min kalan, an be miiri o kan. A fɔlɔ, delili b’an dusukun labɛn an ka sɔn Ala ka Kuma ma. O kɔ, an be Bibulu yɔrɔ dɔ kalan. A laban an ye min kalan, an be wagati ta ka miiri o kan koɲuman. O b’an nafa cogo di? An be min kalan n’an be to ka miiri o kan kosɔbɛ, an bena Ala ka Kuma faamu bɛrɛbɛrɛ ani an ka limaniya barika bena bonya.

17. An be min kalan Bibulu kɔnɔ, mun na an ka ɲi ka miiri o kan?

¹⁷ Mun na a kɔrɔtanin lo an ka Bibulu kalan ani ka miiri a kan? N’an b’o kɛ, an bena fanga sɔrɔ ka Masaya kibaro lase mɔgɔw ma sisan ani ka Ala ka kitiko gwɛlɛw fɔ u ye yanni dɔɔni. N’an be miiri fana Jehova ka jogo kabakomanw koo la, an ni ale ka jɛnɲɔgɔnya barika bena bonya kosɔbɛ. O bena a to an be fɛɛn ɲuman nafaman nunu sɔrɔ: an dusukun bena lafiya ani an bena wasa.—Zab. 119:103.

18. An ka kiinmɔgɔw bena sɔn mun lo ma ani mun na?

¹⁸ An tɛ kira ye i ko Ezekiyɛli. Nka, an cɛsirinin lo ka to ka Jehova ka kuma fɔ mɔgɔw ye, o min be sɔrɔ Bibulu kɔnɔ. An b’a fɛ k’o kɛ fɔɔ tuma min na ale yɛrɛ bena a fɔ ko a ka ɲi ten. Ni Jehova ka kitilon sera, an ka kiinmɔgɔw tɛna sababu sɔrɔ k’a fɔ ko olu m’a ka lasɔmini kuma mɛn wala ko a m’a janto olu la (Ezek. 3:19; 18:23). Nka u bena sɔn a ma ko an tun be Ala ka Kuma lo fɔra u ye.

19. An be se ka fanga sɔrɔ cogo di walisa k’an ka waajuli baara kɛ?

¹⁹ An be se ka fanga sɔrɔ cogo di walisa k’an ka waajuli baara kɛ? Koo saba minw ye barika don Ezekiyɛli la, o lo bena fanga di an fana ma. An be to ka waajuli kɛ sabu an b’a lɔn ko Jehova lo y’an ci, a ka hakili senu be barika don an na ani a ka Kuma b’an ka limaniya barika bonya. Jehova ka dɛmɛ barika la, an cɛsirinin ka to ka waajuli kɛ ani ka muɲu fɔɔ ka taga se “laban ma.”—Mat. 24:13.