1. An b’a lɔn cogo di ko Jehova b’a fɛ ka to an gɛrɛfɛ?

 JEHOVA b’a ɲini an fɛ an k’an magwɛrɛ ale la (Zaki 4:8). A b’a fɛ ka kɛ an ka Ala, an Faa ani an Teri ye. A b’an ka deliliw jaabi ani a b’an dɛmɛ gwɛlɛyaw wagati la. A be tɛmɛ a ka ɔriganisasiyɔn fɛ fana k’an kalan ani k’an latanga. Nka, an ka ɲi ka mun lo kɛ walisa k’an magwɛrɛ Jehova la?

2. An be se k’an magwɛrɛ Jehova la cogo di?

² An be se k’an magwɛrɛ Jehova la an kɛtɔ k’a deli, k’a ka Kuma kalan ani ka miiri a kan. N’an b’o kɛ, an dusu be fa kanuya ni waleɲumanlɔn na a koo la. O b’an lasun an ka mɛnni kɛ a fɛ ani k’a tando. Ale kelenpe lo ka kan n’o ye (Yir. 4: 11). N’an tora ka Jehova lɔn koɲuman, an bena an jigi bɛɛ la ale n’a ka ɔriganisasiyɔn kan. A y’o ɔriganisasiyɔn bila sen kan walisa k’an dɛmɛ.

3. Sutana b’a ɲini cogo di k’an mabɔ Jehova la? Nka, mun lo bena an dɛmɛ an kana an mabɔ abada an ka Ala n’a ka ɔriganisasiyɔn na? (Zaburuw 31:14, 15).

³ Nka, Sutana b’a ɲini k’an mabɔ Jehova la sanko ni gwɛlɛyaw b’an kan. A b’o kɛ cogo di do? A b’a ɲini k’an lasun dɔɔni dɔɔni an kana la Jehova n’a ka ɔriganisasiyɔn na tugun. Nka an be se k’a bali k’o kɛ. N’an ka limaniya barika ka bon ani n’an lanin lo Jehova la kosɔbɛ, an tɛna an mabɔ an ka Ala n’a ka ɔriganisasiyɔn na.—Zaburuw 31:14, 15 kalan.

4. An bena mun lo lajɛ barokun nin na?

⁴ Kɔrɔbɔli minw b’an sɔrɔ ka bɔ duniɲamɔgɔw yɔrɔ, u  be se k’a to an tɛ la Jehova n’a ka ɔriganisasiyɔn na tugun. An bena u la saba lajɛ barokun nin na. O kɔrɔbɔliw be se k’an mabɔ Jehova la cogo di? An be se ka mun lo kɛ walisa Sutana kana see sɔrɔ an kan?

5. Gwɛlɛyaw be se k’a to cogo di an tɛ la Jehova n’a ka ɔriganisasiyɔn na tugun?

⁵ An be gwɛlɛyaw sɔrɔ tuma dɔw la, i n’a fɔ n’an somɔgɔw b’an kɛlɛla wala n’an ka baara tiɲɛna. O gwɛlɛyaw be se k’a to cogo di an tɛ la tugun Jehova ka ɔriganisasiyɔn na? U be se k’an mabɔ cogo di an ka Ala la? Ni gwɛlɛyaw b’an kan wagatijan kɔnɔ, o be se k’an jigi tigɛ ani k’an hakili ɲagami. Sutana be tɛmɛ o fɛ k’an lasun an k’a miiri ko Jehova t’an kanu. A b’a fɛ an k’a miiri ko an ka gwɛlɛyaw ye Jehova wala a ka ɔriganisasiyɔn nɔɔ lo ye. O ɲɔgɔn ye Israɛlden dɔw sɔrɔ Ezipiti. A daminɛ na, u tun lara a la ko Jehova lo ye Musa ni Arɔn ci ka na olu hɔɔrɔnya ka bɔ jɔnya la (Ɛkiz. 4:29-31). Nka, tuma min na Farahuna y’a daminɛ k’u niin tɔɔrɔ, u ye Musa ni Arɔn jalaki k’olu nɔɔ lo. U y’a fɔ ko: “Aw y’an koo goya masacɛ n’a ka mɔgɔbabaw ye, a kɛra i n’a fɔ aw ye murujan le don u bolo waasa k’an faga.” (Ɛkiz. 5:19-21). U ye Ala sagokɛla kantigiw jalaki. Nin ye dusukasiko ye dɛ! Ni gwɛlɛyaw b’i kan kabi wagatijan, mun lo be se k’i dɛmɛ i kana i jigi tigɛ Jehova n’a ka ɔriganisasiyɔn na?

6. An be kalan juman lo sɔrɔ kira Abakuki fɛ gwɛlɛyaw muɲuko la? (Abakuki 3:17-19).

⁶ I dusukunnakow bɛɛ fɔ Jehova ye delili la ani dɛmɛ ɲini a fɛ. Kira Abakuki ye gwɛlɛya caaman sɔrɔ. Wagati dɔ la, a kɛra komi a tun b’a yɛrɛ ɲiningara ni Jehova b’a janto ale la. O kama, a y’a dusukunnakow bɛɛ fɔ Jehova ye delili la. A ko: “Masaba, ne ka kan ka dɛmɛ ɲini i fɛ fɔɔ tuma jumɛn e ka sɔrɔ ka ne jaabi? . . . Mun na i be sɔn kojugu ka kɛ i ɲana?” (Abak. 1:2, 3). Jehova ye a sagokɛla kantigi ka delili sɔbɛ jaabi (Abak. 2:2, 3). Jehova tun y’a sagokɛlaw kisi cogo minw na, Abakuki miirila kosɔbɛ o kan. O kɔ, a ninsɔn diyara kokura. A lara a la ko Jehova b’a janto ale la ani ko gwɛlɛya o gwɛlɛya mana ale sɔrɔ, a bena ale dɛmɛ k’o muɲu (Abakuki 3:17-19 kalan). An be kalan juman lo sɔrɔ o la? Ni gwɛlɛyaw b’i kan, Jehova deli ani i dusukunnakow fɔ a ye. O kɔ, dɛmɛ ɲini a fɛ. N’i y’o kɛ, la a la ko i mako be fanga min na walisa ka muɲuli kɛ, Jehova bena o d’i ma. Ani n’i y’a ye ko a b’i dɛmɛna, o bena i ka limaniya barika bonya a koo la.

7. Shirley somɔgɔw tun b’a fɛ a ka mun lo miiri? Mun lo y’a dɛmɛ a limaniyanin tora Jehova la?

⁷ To n’i ka delinanko ɲumanw ye Alako ta fan fɛ. An k’a filɛ o ye balimamuso Shirley dɛmɛ cogo min na gwɛlɛyaw tuma na. b A be bɔ Papuwazi Nuvɛli Gine, a ka denbayamɔgɔw tun ye fantanw ye ani tuma dɔw la, a tun ka gwɛlɛ u ma k’u daradumuni sɔrɔ. A somɔgɔ dɔ y’a ɲini k’a jigi tigɛ Jehova koo la. A ko: “I ko Ala ka hakili senu b’i dɛmɛna, nka o dɛmɛ be min? I ka denbayamɔgɔw bele ye fantanw ye. I b’i ka wagati tiɲɛna le waajuli la.” Shirley ko: “N’ ye n’ yɛrɛ ɲininga ko: ‘Yala Ala b’a janto an na wala a t’a janto an na?’  O la, n’ sinna ka Jehova deli ani ka n’ dusukunnakow bɛɛ fɔ a ye. N’ tora ka Bibulu n’an ka gafew kalan, ka waajuli kɛ ani ka taga lajɛnw na.” Dɔɔni o kɔ, Shirley y’a faamu ko Jehova b’a jantora a somɔgɔw la. U ma deli ka si kɔngɔ la ani u ninsɔn ka di. Shirley ko: “N’ y’a ye ko Jehova be n’ ka deliliw jaabira.” (1 Tim. 6:6-8). N’i tora n’i ka delinanko ɲumanw ye Alako ta fan fɛ, ele fana tɛna a to gwɛlɛyaw wala sigasigali miiriyaw k’i faran ka bɔ Jehova la.

8. Mun lo be se k’an ɲɛminɛbagaw sɔrɔ Jehova ka ɔriganisasiyɔn kɔnɔ?

⁸ An juguw be tɛmɛ telewisɔn, arajo n’a ɲɔgɔnnaw ani rezo sosiyow fɛ ka ngalonw jɛnsɛn balimaw koo la minw b’an ɲɛminɛ Jehova ka ɔriganisasiyɔn kɔnɔ. U be tɛmɛ o fɛɛrɛw fɛ fana k’a kɛ an be sigasiga o balimaw na (Zab. 31:14). U y’an balima dɔw minɛ ani k’u jalaki k’u ye kojugukɛlaw ye. O koo ɲɔgɔn ye saan kɛmɛkulu fɔlɔ kerecɛnw sɔrɔ tuma min na u juguw bagara ciden Pol ma ani k’a minɛ k’a don kaso la. O kerecɛnw y’o koo ta cogo di do?

9. Tuma min na u ye ciden Pol minɛ k’a don kaso la, kerecɛn dɔw y’o koo ta cogo di?

⁹ Tuma min na ciden Pol tun be kaso la Ɔrɔmu, saan kɛmɛkulu fɔlɔ kerecɛn dɔw bɔra a kɔ (2 Tim. 1:8, 15). Mun na do? Yala u tun be maloyara Pol kosɔn sabu jama tun b’a jati kojugukɛla ye wa? (2 Tim. 2:8, 9). Wala u tun be siranna le ko u juguw bena olu fana kɛlɛ? A mana kɛ min o min ye, miiri k’a filɛ o ye min kɛ Pol la. A tun ye gwɛlɛya caaman muɲu, hali k’a niin yɛrɛ bila farati la u kosɔn (Kɛw. 20:18-21; 2 Kor. 1:8). An t’a fɛ ka kɛ abada i ko mɔgɔ minw bɔra Pol kɔ wagati min na a mako tun be dɛmɛ na! An ka ɲi ka mun lo to an hakili la n’u b’an ɲɛminɛbagaw kɛlɛla?

10. N’u b’an ɲɛminɛbagaw kɛlɛla, an ka ɲi ka mun lo to an hakili la ani mun na?

¹⁰ A to i hakili la tigi min b’an kɛlɛ  ani fɛɛn min kama a b’o kɛ. A fɔra 2 Timote 3:12 kɔnɔ ko: “Mɔgɔ minw bɛɛ b’a fɛ ka jɛn ni Yezu Krista ye ka kɛ Alaɲasiranbagaw ye sɔbɛ la, olu bena tɔɔrɔ sɔrɔ.” O la, a man ɲi ka bari an na k’a ye ko Sutana be an ɲɛminɛbagaw yɛrɛ lo kɛlɛ kosɔbɛ. A b’a fɛ ka o balimaw ka kantigiya nagasi ani ka siranya bila an na.—1 Piyɛri 5:8.

11. An be kalan juman lo sɔrɔ Onezifɔri fɛ? (2 Timote 1:16-18).

¹¹ To k’i balimaw dɛmɛ ani ka kantigiya kɛ u ye (2 Timote 1:16-18 kalan). Saan kɛmɛkulu fɔlɔ kerecɛn dɔ tɔgɔ tun ko Onezifɔri. Ale ye koow kɛ cogo wɛrɛ la tuma min na Pol tun be kaso la. Pol y’a fɔ Onezifɔri koo la ko: “Ne kɛra kasoden ye, o bɛɛ n’a ta, a ma maloya ni ne ka koo ye.” Onezifɔri ye Pol yɔrɔ ɲini ani tuma min na a y’a ye, a y’a dɛmɛ k’a makoɲɛfɛnw sɔrɔ. Walisa k’o kɛ, Onezifɔri y’a yɛrɛ niin bila farati la. An be kalan juman lo sɔrɔ o la? U b’an balima minw kɛlɛla, an man ɲi k’a to adamaden ɲɛsiran k’an bali k’u dɛmɛ. Nka, an k’an seko bɛɛ kɛ k’u dɛmɛ (Talenw 17:17). U mako b’an ka kanuya n’an ka dɛmɛ na.

12. An be kalan juman lo sɔrɔ Irisi balimaw koo la?

¹² Irisi balima minw be kaso la, a kɔrɔsi u balima kanulenw y’u dɛmɛ cogo minw na. O balima dɔw kiti tuma na, u kerecɛnɲɔgɔn caaman be taga kititigɛso la walisa k’u dɛmɛ. An be kalan juman lo sɔrɔ u fɛ? N’u be ngalon la an ɲɛminɛbagaw kan, k’u minɛ ka don kaso la wala k’u tɔɔrɔ, kana siran. Delili kɛ u ye, i janto u ka denbayamɔgɔw la ani miiri k’a filɛ i be se k’u dɛmɛ cogo wɛrɛ minw na.—Kɛw. 12:5; 2 Kor. 1:10, 11.

13. Cogo juman na lɔgɔbɔri be se k’a to an tɛ la Jehova n’a ka ɔriganisasiyɔn na tugun?

¹³ An somɔgɔ dannabaliw, an ka lakɔli filankuruw wala an baarakɛɲɔgɔnw be se k’an lɔgɔbɔ, sabu an be waajuli kɛ ani an be Jehova ka sariyaw labato (1 Piyɛri 4:4). U be se k’a fɔ ko: “I koo ka di n’ ye, nka i ka diinan ka gwɛlɛ kojugu ani a sanga benna.” Mɔgɔ minw gwɛnna ka bɔ kafo kɔnɔ, an b’u minɛ cogo min na, dɔw be se k’an kɔrɔfɔ o kosɔn u kɛtɔ k’a fɔ ko: “Aw be se k’a fɔ cogo di ko aw b’aw mɔgɔɲɔgɔn kanu?” O kumaw be se ka sigasigali miiriya don an hakili la ani k’a to an b’a daminɛ k’an yɛrɛ ɲininga ko: “Jehova be min ɲini n’ fɛ, kɔni o man gwɛlɛ kojugu? Kɔni a ka ɔriganisasiyɔn ka koo man gwɛlɛ kojugu fana?” N’o koo ɲɔgɔn b’i kan, i magwɛrɛnin be se ka to Jehova n’a ka ɔriganisasiyɔn na cogo di?

14. Ni mɔgɔw b’an lɔgɔbɔ sabu an be tagama ka kɛɲɛ ni Jehova ka sariyaw ye, an ka ɲi k’o koo ta cogo di? (Zaburuw 119:50-52).

¹⁴ I jija ka to ka Jehova ka sariya tilenninw labato. Zɔbu tun be Jehova ka sariyaw labato hali k’a sɔrɔ mɔgɔw tun b’a lɔgɔbɔ o kosɔn. A teri jugu dɔ tun b’a fɛ a k’a miiri ko a be jijali minw kɛra ka koo ɲuman kɛ, Ala mako t’o la (Zɔbu 4:17, 18; 22:3). Nka, Zɔbu ma sɔn o ngalon kumaw ma. A tun b’a lɔn ko Jehova ye sariya minw sigi ɲuman ni juguman koo la, o ka ɲi ani a tun jijanin lo k’u labato. A m’a to tɔɔw k’a ka kantigiya nagasi (Zɔbu 27:5, 6). An be kalan juman lo  sɔrɔ o la? Kana a sɔn tɔɔw ka lɔgɔbɔri k’a to i be sigasiga Jehova ka sariyaw koo la. Miiri i yɛrɛ ka koo la. Yala i m’a kɔrɔsi siɲɛ caaman na ko Jehova ka sariyaw tilennin lo ani ko u b’i nafa wa? Ɔriganisasiyɔn min be o sariyaw lafasa, i jija ka to o kɔnɔ. O la, mɔgɔw mana i lɔgɔbɔ cogo o cogo, i tɛna Jehova sago kɛli dabila fewu!—Zaburuw 119:50-52 kalan.

15. Mun na mɔgɔw tun be Brizit lɔgɔbɔ?

¹⁵ An ka balimamuso Brizit ka koo lajɛ. A be Ɛndi jamana na ani a somɔgɔ dɔw tun be to k’a lɔgɔbɔ a ka limaniya kosɔn. A cɛɛ tun tɛ Jehova Seere ye. Dɔɔni Brizit batizenin kɔ saan 1997, a cɛɛ ka baara tiɲɛna. O kama, cɛman y’a latigɛ ko ale, Brizit ani u denmusow ka taga sigi n’a bangebagaw ye. Olu tun be dugu wɛrɛ la. Brizit ye gwɛlɛya wɛrɛw sɔrɔ. Komi a cɛɛ tun tɛ baara la, Brizit tun ka ɲi ka baara kɛ wagati caaman na walisa k’a somɔgɔw mako wasa. Ka fara o kan, kafo min tun ka surun a la, o yɔrɔ janya tun be se kilomɛtɛrɛ 350 ɲɔgɔn ma. A fɔ man di, nka a cɛɛ somɔgɔw tun b’a kɛlɛ a ka limaniya kosɔn. Koow nana juguya fɔɔ Brizit n’a somɔgɔw yɛlɛmana yɔrɔ wɛrɛ la. O kɔ, a cɛɛ karabara ka sa. Kɔfɛ, kansɛri bana y’a denmuso dɔ faga k’a sɔrɔ a tun be ni saan 12 dɔrɔn ye. Koo tɔɔ bɛɛ serekera tuma min na Brizit somɔgɔw y’a jalaki ko o koow bɛɛ ye ale nɔɔ lo ye. U ko n’a tun ma kɛ Jehova Seere ye, o dusukasikow tun tɛna u sɔrɔ. O bɛɛ n’a ta, Brizit tora k’a jigi la Jehova kan ani a magwɛrɛnin tora a ka ɔriganisasiyɔn na.

16. Brizit magwɛrɛnin tora Jehova n’a ka ɔriganisasiyɔn na minkɛ, a ye duga jumanw lo sɔrɔ o la?

¹⁶ Komi Brizit yɔrɔ tun ka jan ni kafo ye, kafokulu kɔrɔsibaga dɔ y’a jija ko a siginin be yɔrɔ min na, a ka waajuli kɛ yen. A y’a fɔ a ye fana ko a ka lajɛnw kɛ a ka soo. A daminɛ na, Brizit y’a miiri k’o bena gwɛlɛya ale ma kojugu. Nka, a  y’o ladili sira tagama. A tora ka kibaro diiman fɔ mɔgɔw ye, ka lajɛnw kɛ a ka soo ani a tun be gwa kɔnɔ batoli kɛ tuma o tuma n’a denmusow ye. Mun lo sɔrɔla o la? Brizit y’a daminɛ ka bibulukalan kɛ ni mɔgɔ caaman ye ani u fanba batizera. A ye kudayi piyɔniye baara daminɛ saan 2005. A y’a jigi la Jehova kan ani ka kantigiya kɛ a ka ɔriganisasiyɔn ye minkɛ, Jehova y’a duga o kosɔn. A denmusow be Jehova batora kantigiya la ani u siginin be yɔrɔ min na, kafo fila lo be yen sisan! Brizit lanin b’a la ko Jehova lo ye fanga di ale ma walisa a ka se k’a ka gwɛlɛyaw n’a somɔgɔw ka lɔgɔbɔri muɲu.

17. An ka ɲi k’an cɛsiri ka mun lo kɛ?

¹⁷ Sutana b’a fɛ an k’a miiri ko gwɛlɛyaw tuma na, Jehova t’an dɛmɛ ani ko n’an tora a ka ɔriganisasiyɔn kɔnɔ, o be koow gwɛlɛya an ma dɔrɔn le. N’u be ngalon la an ɲɛminɛbagaw kan, k’u tɔɔrɔ wala k’u minɛ ka don ka kaso la, Sutana b’a fɛ ka siranya lo bila an na. Lɔgɔbɔriw fɛ, a b’a fɛ an k’a miiri ko Jehova ka sariyaw man ɲi ani an kana la a ka ɔriganisasiyɔn na. Nka, an b’a ka nanbarakow kala ma ani an be tiɲɛn lɔn a koo la (2 Kor. 2:11). I cɛsiri ka ban Sutana ka ngalonw ma ani to ka kantigiya kɛ Jehova n’a ka ɔriganisasiyɔn ye. A to i hakili la ko Jehova bena to n’i ye tuma bɛɛ (Zab. 28:7). O la, kana to fɛɛn si k’i faran ka bɔ Jehova la!—Ɔrɔm. 8:35-39.

18. An bena mun lo ye barokun nata la?

¹⁸ Barokun nin na, an kumana kɔrɔbɔliw koo la minw b’an sɔrɔ ka bɔ duniɲamɔgɔw yɔrɔ. Nka an be kɔrɔbɔli minw sɔrɔ kafo yɛrɛ kɔnɔ, olu fana be se k’a to an tɛ la Jehova n’a ka ɔriganisasiyɔn na tugun. An be se k’o kɔrɔbɔliw ɲɔgɔn muɲu cogo di? An bena o lo ye barokun nata la.