1. K’an yɛrɛ minɛ, o kɔrɔ ko di? (2 Timote 4:5).

 NI GWƐLƐYAW b’an kan, o be se k’an ka kantigiya kɔrɔbɔ Jehova n’a ka ɔriganisasiyɔn koo la. An be se ka see sɔrɔ o gwɛlɛyaw kan cogo di? An ka ɲi k’an yɛrɛ minɛ, ka to ɲɛɛ na ani k’an jija an ka limaniya sabatinin ka to (2 Timote 4:5 kalan). An b’an yɛrɛ minɛ n’an be an hakili sigi, ka miiri koɲuman ani k’an jija ka koow filɛ i ko Jehova b’u filɛ cogo min na. N’an b’o kɛ, an tɛna basigi an dusukunnakow kan ka koow kɛ.

2. An bena mun lo ye barokun nin na?

² Barokun tɛmɛnin na, an kumana kɔrɔbɔli saba koo la an be minw sɔrɔ ka bɔ duniɲamɔgɔw yɔrɔ. Barokun nin na, an bena kuma kɔrɔbɔli saba koo la an be minw sɔrɔ kafo kɔnɔ. U be se k’an ka kantigiya kɔrɔbɔ Jehova koo la. O kɔrɔbɔliw ye nunu ye: 1) n’an b’a miiri ko an kerecɛnɲɔgɔn dɔ ye tilenbaliyako kɛ an na, 2) n’u y’an kolo, ani 3) n’an be bondori kɛra walisa ka koow kɛ ka kɛɲɛ ni ɔriganisasiyɔn ka yɛlɛmaniw ye. O kɔrɔbɔliw ɲɔgɔn na, an be se k’an yɛrɛ minɛ ani ka to ka kantigiya kɛ Jehova n’a ka ɔriganisasiyɔn ye cogo di?

3. N’an b’a miiri ko an kerecɛnɲɔgɔn dɔ ye tilenbaliyako kɛ an na, an ka teli ka koow ta cogo di?

³ Yala i ma deli k’a miiri ko i kerecɛnɲɔgɔn dɔ ye tilenbaliyako kɛ i la wa? N’a sɔrɔ diinan mɔgɔkɔrɔ lo ani i be taga a sɔrɔ a m’a dabɔ a kama (Ɔrɔm. 3:23; Zaki 3:2). Nka, a ka kɛwalew ye i dusu kasi. N’a sɔrɔ o koo yɛrɛ tun b’i bali ka sinɔgɔ sufɛ. N’a sɔrɔ i y’i yɛrɛ ɲininga ko: “Ni balima dɔ sɔnna ka nin kɛ, yala nin ye Ala ka ɔriganisasiyɔn lo ye tiɲɛn na wa?” Sutana b’a fɛ an k’o lo  miiri jaatika! (2 Kor. 2:11). O miiriya jugu be se k’a to an b’an mabɔ Jehova n’a ka ɔriganisasiyɔn na. O la, n’an b’a miiri ko an balima dɔ ye tilenbaliyako kɛ an na, an be se k’an yɛrɛ minɛ ani k’an yɛrɛ tanga miiriya juguw ma cogo di?

4. Tuma min na u ye tilenbaliyako kɛ Yusufu la, a y’a yɛrɛ minɛ cogo di? An be kalan juman lo sɔrɔ a ka koo la? (Zɛnɛzi 50:19-21).

⁴ Kana dimi mara. Yusufu kanbele tuma, a kɔrɔcɛw tun b’a tɔɔrɔ. U tun b’a kɔniya ani u dɔw yɛrɛ tun b’a fɛ k’a faga (Zɛnɛzi 37:4, 18-22). A laban, u y’a feere jɔnya la. O ye gwɛlɛyabaw lase Yusufu ma saan 13 ɲɔgɔn kɔnɔ. Yusufu tun be se k’a miiri ko Jehova t’ale kanu ani ko a y’ale to yen tuma min na ale mako be dɛmɛ na. Nka, Yusufu ma dimi mara a kɔnɔ. A y’a yɛrɛ minɛ ani a hakili siginin tora. Tuma min na a ye sababu sɔrɔ k’a yɛrɛ mɔnɛbɔ, a ma o kɛ. Nka a y’a yira ko a b’u kanu ani ko a yafara u ma (Zɛnɛzi 45:4, 5). Yusufu ye koow kɛ o cogo la sabu a ye wagati ta ka miiri ka ɲɛ. Sanni a ka to ka miiri a ka gwɛlɛyaw koo la, a tora ka miiri Jehova sagonata koo lo la (Zɛnɛzi 50:19-21 kalan). An be kalan juman lo sɔrɔ o la? N’u b’i tɔɔrɔla, kana dimi Jehova kɔrɔ wala k’a miiri ko a y’i to yen. Nka miiri k’a filɛ a b’i dɛmɛna cogo min na ka gwɛlɛyaw muɲu. Ani, ni tɔɔw be tilenbaliyako kɛra i la, a ɲini k’u ka dafabaliyakow yafa ni kanuya ye.—1 Piyɛri 4:8.

5. Mun lo ye Miqueas dɛmɛ a sera k’a yɛrɛ minɛ tuma min na a tun b’a jati ko u ye tilenbaliyakow kɛ a la?

⁵ An ka an balimacɛ Miqueas ka koo lajɛ. b Diinan mɔgɔkɔrɔ lo ani a be Ameriki worodugu fan fɛ. A hakili b’a la ko wagati dɔ la, a tun b’a jati ko kuntigiya kalifara balima minw ma, u dɔw m’a minɛ ni ɲumanya ye. A ko: “Koo si tun ma deli ka n’ hakili ɲagami ka se o ma. N’ dusu tun tiɲɛna yɛrɛ le! N’ tun tɛ sera ka sinɔgɔ sufɛ ani n’ tun be to ka kasi sabu n’ tun b’a miiri ko fɛɛrɛ foyi tɛ n’ bolo.” O bɛɛ n’a ta, Miqueas y’a yɛrɛ minɛ ani a y’a jija kosɔbɛ ka se a dusu kɔrɔ. A tun be Jehova deli tuma o tuma a ka hakili senu ni fanga di ale ma walisa a k’o koo muɲu. A ye kunnafoniw ɲini an ka gafew kɔnɔ minw be se k’a dɛmɛ. An be kalan juman lo sɔrɔ o la? N’i b’a miiri ko balima dɔ ye tilenbaliyako kɛ i la, i hakili sigi ani i jija ka see sɔrɔ i ka miiriya juguw kan. N’a sɔrɔ i t’a lɔn fɛɛn min y’a to o tigi kumana i fɛ o cogo la wala ka koow kɛ ten. O la, Jehova deli a k’i dɛmɛ i ka koow filɛ i k’o tigi. N’i y’o kɛ, i bena a ye ko i balima tun t’a fɛ ka koo jugu lo kɛ i la ani i bena se ka yafa a ma (Talenw 19:11). A to i hakili la ko min ye i sɔrɔ, Jehova b’o kala ma. I mako be fanga min na, a bena o d’i ma walisa i ka se k’o koo muɲu.—2 Til. Kib. 16:9; Waaj. 5:8.

6. Mun na a kɔrɔtanin lo an k’a faamu ko Jehova b’an kolo sabu a b’an kanu? (Eburuw 12:5, 6, 11).

⁶ Kololi be se ka digi an na. Nka n’an tora ka sinsin a dimi kan, an tɛna kololi filɛ ni ɲɛɛ ɲuman. An be se k’a miiri ko a bɛnnin tɛ wala ko a dama tɛmɛna. O be se k’an bali ka koo kɔrɔtanin dɔ faamu, o min ye ko Jehova b’an kolo sabu a b’an kanu (Eburuw 12:5, 6, 11 kalan). N’an ye koow ta ni dusu ye, Sutana bena tɛmɛ o fɛ k’an lasun ka koo bɛnbali kɛ. A b’a fɛ an ka ban kololi ma. Min yɛrɛ ka jugu o ye ko a b’a fɛ an k’an mabɔ Jehova ni  kafo la. N’u ye i kolo, i be se k’i yɛrɛ minɛ cogo di?

7. a) I ko a yirala jaa kan cogo min na, Piyɛri sɔnna kololi ma minkɛ, Jehova ye baara kɛ n’a ye cogo di? b) I be kalan juman lo sɔrɔ Piyɛri ka koo la?

⁷ Sɔn Jehova ka kololi ma ani yɛlɛmani bɛnninw kɛ. Siɲɛ damanin, Yezu ye Piyɛri kolo ciden tɔɔw ɲɛɛ na (Mariki 8:33; Luka 22:31-34). N’a sɔrɔ o ye maloya bila Piyɛri la. Nka a tora ka kantigiya kɛ Yezu ye. A sɔnna kololi ma ani a ye kalan sɔrɔ a ka filiw la. O kama, Jehova ye Piyɛri duga a ka kantigiya kosɔn ani a ye kunkanbaarabaw kalifa a ma kafo kɔnɔ (Zan 21:15-17; Kɛw. 10:24-33; 1 Piyɛri 1:1). An be kalan juman lo sɔrɔ Piyɛri ka koo la? Kololi be maloya min bila an na, an kana sinsin o kan. Nka, an ka sɔn kololi ma ani ka yɛlɛmani bɛnninw kɛ. N’an y’o kɛ, o bena an yɛrɛ ni tɔɔw nafa. O bena a to fana Jehova be baara kɛ n’an ye bɛrɛbɛrɛ ani an bena an balimaw mako ɲɛ kosɔbɛ.

8-9. Tuma min na u ye Bernardo kolo, a daminɛ na a ye o koo ta cogo di? Nka, mun lo y’a dɛmɛ a y’a ka koow filɛcogo yɛlɛma?

⁸ An ka Bernardo ka koo lajɛ. A be bɔ Mozanbiki. Diinan mɔgɔkɔrɔ tun lo, nka a bɔnɛna o nɛɛma baara la. A daminɛ na, a ye o koo ta cogo di? A ko: “N’ diminin tora sabu u tun ye n’ kolo cogo min na, o ma diya n’ ye.” Kafoden tɔɔw tun bena min miiri Bernardo koo la, a tun be jɔrɔla o lo la. A ko: “Kalo damanin tɛmɛnin kɔ le n’ sɔrɔla ka koow filɛ ni ɲɛɛ ɲuman ye. Ani n’ lara Jehova n’a ka ɔriganisasiyɔn na kokura.” Mun lo y’a dɛmɛ, a y’a ka koow filɛcogo yɛlɛma?

⁹ Bernardo y’a miiricogo yɛlɛma. A ko: “Tuma min na n’ tun ye diinan mɔgɔkɔrɔ ye, n’ tun be basigi Eburuw 12:7 kan ka tɔɔw dɛmɛ u ka Jehova ka kololi filɛ ni ɲɛɛ ɲuman ye. Sisan, n’ ye n’ yɛrɛ ɲininga ko: ‘Jɔn lo ka ɲi k’o vɛrise sira tagama?’ Ne ani Jehova sagokɛla tɔɔw bɛɛ.” Bernardo ye yɛlɛmani wɛrɛw kɛ walisa ka la Jehova n’a ka ɔriganisasiyɔn na kokura. A tora ka Bibulu kalan wagati caaman kɔnɔ ani ka wagati ta ka miiri a kan koɲuman. Balimaw tun be min miiri a koo la hali n’a bele tun be jɔrɔla o la, a tora ka waajuli ni lajɛnw kɛ n’u ye. Kɔfɛ, Bernardo segira ka kɛ diinan mɔgɔkɔrɔ ye. N’u ye i kolo i ko Bernardo,  o koo be maloya min bila i la, kana to ka miiri o la kojugu. Nka sɔn ladili ma ani yɛlɛmani bɛnninw kɛ c (Talenw 8:33; 22:4). N’i y’o kɛ, la a la ko Jehova bena i duga sabu i be kantigiya kɛra ale n’a ka ɔriganisasiyɔn ye.

10. Yɛlɛmani juman lo kɛra Jehova ka ɔriganisasiyɔn kɔnɔ min ye Israɛlcɛ dɔw ka kantigiya kɔrɔbɔ?

¹⁰ Ni yɛlɛmaniw kɛra Jehova ka ɔriganisasiyɔn na, o be se k’an ka kantigiya kɔrɔbɔ. N’an m’an janto, o yɛrɛ be se k’an mabɔ Jehova la. Misali la, an ka kuma yɛlɛmani dɔ koo la min kɛra Musa ka sariya kɔrɔ ani n’a sɔrɔ a ye nɔɔ to Israɛlden dɔw kan. Ka kɔn Musa ka sariya ɲɛ, denbayaw kuntigiw lo tun ye sarakalasebagaw ye u ka denbaya kɔnɔ. U tun be sarakabɔlanw lɔ ani ka sarakaw lase Jehova ma u ka denbaya ye (Zɛnɛzi 8:20, 21; 12:7; 26:25; 35:1, 6, 7; Zɔbu 1:5). Nka tuma min na Jehova ye sariya di Israɛldenw ma, denbayaw kuntigiw tun tɛ se k’o kɛ tugun. Jehova ye Arɔn ka denbayamɔgɔw lo kɛ sarakalasebagaw ye. Kabi o wagati, ni denbaya kuntigi dɔ tun ye saraka bɔ k’a sɔrɔ Arɔn ka denbayamɔgɔ tun tɛ, u tun be se k’a faga d (Lev. 17:3-6, 8, 9). Yala o yɛlɛmani lo y’a to Kore, Datan, Abiramu ani kuntigi 250 murutira Musa ni Arɔn ka kuntigiya ma wa? (Nɔnb. 16:1-3). Bibulu t’o fɔ an ye. A mana kɛ min o min ye, Kore n’a jɛnɲɔgɔnw ma kantigiya kɛ Jehova ye. Ni yɛlɛmaniw kɛra Jehova ka ɔriganisasiyɔn kɔnɔ ani u b’i ka kantigiya kɔrɔbɔ, i be se ka mun lo kɛ do?

11. An be kalan juman lo sɔrɔ Keyati kɔmɔgɔw fɛ?

¹¹ Sɔn ɔriganisasiyɔn ka yɛlɛmaniw bɛɛ ma. Ka Israɛldenw to tagama na kongokolon kɔnɔ, kunkanbaara kɛrɛnkɛrɛnnin dɔ tun kalifara Keyati kɔmɔgɔw ma. Tuma o tuma ni Israɛldenw tun wulila ka bɔ yɔrɔ dɔ la, Keyati kɔmɔgɔ dɔw tun be Layidu tagamasiɲɛ kɛsu ta ka bila u ɲɛ (Nɔnb. 3:29, 31; 10:33; Zozuwe 3:2-4). O tun ye nɛɛmaba ye dɛ! Nka, koow yɛlɛmana tuma min na Israɛldenw donna Layidu jamana kɔnɔ. Keyati kɔmɔgɔw mako tun t’a la tugun ka Layidu tagamasiɲɛ kɛsu ta tuma o tuma. O kama, Solomani ka tile la, Keyati dɔw kɛra dɔnkililabagaw ye, dɔw kɛra daa kɔlɔsibagaw ye ani dɔ wɛrɛw kɛra minanw marayɔrɔ kɔlɔsibagaw ye (1 Til. Kib. 6:16-18; 26:1, 24). Nka Bibulu yɔrɔ si t’a fɔ ko Keyati kɔmɔgɔw ŋunuŋununa wala u y’a ɲini kunkanbaaraba wɛrɛ ka kalifa u ma sabu u tun be ni nɛɛma baaraba ye fɔlɔ la. An be kalan juman lo sɔrɔ o la? Jehova ka ɔriganisasiyɔn mana yɛlɛmani o yɛlɛmani kɛ, sɔn o ma n’i dusu bɛɛ ye hali n’o bena a to i ka baara be yɛlɛma. Baara o baara mana kalifa i ma, ninsɔndiya sɔrɔ o la. A to i hakili la ko i ka baara lo t’a to i koo be gwɛlɛya Jehova ma. I ka kanminɛli lo kɔrɔtanin lo a fɛ ka tɛmɛ i ka baara kan.—1 Sam. 15:22.

12. Tuma min na u ye baara wɛrɛ kalifa Zaina ma, o ye mun lo kɛ a la?

 ¹² An ka balimamuso Zaina ka koo lajɛ. A bɔnɛna kunkanbaara dɔ la min tun ka di a ye kosɔbɛ ani baara wɛrɛ kalifara a ma. A ye saan 23 ni kɔ kɛ Betɛli la ani o kɔ u ko a ka kɛ piyɔniye ye. A ko: “O yɛlɛmani ye n’ dusu tiɲɛ yɛrɛ le! N’ tun b’a jati ko nafa foyi tɛ n’ na ani n’ tora ka n’ yɛrɛ ɲininga ko: ‘N’ ye koo jugu juman lo kɛ?’ ” A fɔ man di, nka kafoden dɔw ye dɔ fara a ka dusukasi kan u kɛtɔ k’a fɔ a ye ko: “N’i tun be se i ka baara la koɲuman, Betɛli tun tɛna a to i be taga.” Wagati dɔ la, Zaina tun be suu bɛɛ kɛ kasi la dusukasi kojugu bolo. Nka, a ko: “N’ ma deli ka sigasiga abada Jehova ka ɔriganisasiyɔn koo la wala k’a miiri ko Jehova tɛ n’ kanu.” Mun lo ye Zaina dɛmɛ a sera k’a yɛrɛ minɛ?

13. Zaina ye mun lo kɛ walisa ka see sɔrɔ a ka miiriya juguw kan?

¹³ Zaina ye see sɔrɔ a ka miiriya juguw kan cogo di? Barokun minw be kuma a ka gwɛlɛya koo la, a y’olu kalan an ka gafew kɔnɔ. Barokun nin y’a dɛmɛ kosɔbɛ: “Vous pouvez vaincre le découragement !” A be sɔrɔ saan 2001, feburu tile fɔlɔ ka Kɔrɔsili sangaso kɔnɔ. O barokun b’a ɲɛfɔ ko a be komi Bibulu sɛbɛbaga Mariki ye bondori kɛ n’o dusukunnakow ɲɔgɔn ye tuma min na kunkanbaara wɛrɛ kalifara a ma. Zaina ko: “Mariki ka ɲɛyirali ye n’ dɛmɛ ka see sɔrɔ n’ ka dusukasi kan.” Zaina magwɛrɛnin tora a teriw la. A m’a mabɔ tɔɔw la ani a ma to ka makaritɔya kɛ. A y’a faamu ko Jehova ye balima minw sigi a ka ɔriganisasiyɔn kun na, hakili senu lo b’u ɲɛminɛ ka desizɔnw ta ani ko o balimaw b’u janto kosɔbɛ ale la. A y’a faamu fana ko min kɔrɔtanin lo kosɔbɛ Jehova ka ɔriganisasiyɔn fɛ, o ye ko Jehova ka baara ka kɛ.

14. Vlado ye bondori kɛ walisa ka koow kɛ ka kɛɲɛ ni ɔriganisasiyɔn ka yɛlɛmani juman lo ye? Mun lo y’a dɛmɛ do?

¹⁴ Vlado be Sloveni jamana na, a be ni saan 73 ye ani diinan mɔgɔkɔrɔ lo. Tuma min na u ye u ka Masaya Boon datugu ani u ka kafo farala kafo wɛrɛ kan, o ma nɔgɔya Vlado ma. A ko: “N’ m’a faamu fɛɛn min kama u ye o Masaya Boon cɛɲumanin datugu. A digira n’ na sabu an tun y’a lakuraya a ma mɛɛn. N’ ye  miniziye ye ani n’ tun y’o Masaya Boon kɔnɔnafɛn dɔw dilan. O nana ni yɛlɛmani caaman ye fana, o minw tun man nɔgɔ an mɔgɔkɔrɔbaw fɛ.” Mun lo ye Vlado dɛmɛ a ye koow kɛ ka kɛɲɛ n’o yɛlɛmani ye? A ko: “N’an be koow kɛ ka kɛɲɛ ni Jehova ka ɔriganisasiyɔn ka yɛlɛmaniw ye, an be duga sɔrɔ o la tuma bɛɛ. O yɛlɛmaniw b’an labɛn yɛlɛmaniba nataw kama.” Yala i ka kafo farala kafo wɛrɛ kan wala baara wɛrɛ kalifara i ma, ani i be bondori kɛra ka koow kɛ ka kɛɲɛ n’o yɛlɛmani ye wa? La a la ko Jehova b’i faamu. N’i be koow kɛ ka kɛɲɛ n’o yɛlɛmaniw ɲɔgɔn ye ani ka to ka kantigiya kɛ Jehova n’a ka ɔriganisasiyɔn ye, siga t’a la a bena i duga!—Zab. 18:26.

15. Mun lo bena an dɛmɛ an k’an yɛrɛ minɛ ni gwɛlɛyaw b’an kan kafo kɔnɔ?

¹⁵ Duniɲa laban be surunyana kosɔbɛ minkɛ, an bena gwɛlɛyaw sɔrɔ kafo kɔnɔ. O gwɛlɛyaw be se k’an ka kantigiya kɔrɔbɔ Jehova koo la. O kama, an ka ɲi k’an yɛrɛ minɛ. N’a b’i ɲɛɛ na ko i kerecɛnɲɔgɔn dɔ ye tilenbaliyako kɛ i la, kana dimi mara i kɔnɔ. N’u y’i kolo, o be maloya min bila i la, kana sinsin o kan. Sɔn ladiliw ma ani yɛlɛmani bɛnninw kɛ. Ni Jehova ka ɔriganisasiyɔn ye yɛlɛmaniw kɛ minw be nɔɔ to i kan, sɔn u ma n’i dusu bɛɛ ye ani cikanw labato.

16. I be se ka to k’i jigi la Jehova n’a ka ɔriganisasiyɔn kan cogo di?

¹⁶ N’i ka kantigiya kɔrɔbɔra, i be se ka to k’i jigi la Jehova n’a ka ɔriganisasiyɔn kan. Nka walisa k’o kɛ, an ka ɲi k’an yɛrɛ minɛ, o kɔrɔ, k’an hakili sigi, ka miiri koɲuman ani ka koow filɛ i ko Jehova b’u filɛ cogo min na. Bibulu kɔnɔ, mɔgɔ minw sera k’i ka koo ɲɔgɔn muɲu, i jija k’u ka maana sɛgɛsɛgɛ ani ka miiri o kan. Jehova deli a k’i dɛmɛ ani kana i yɔrɔ janya balimaw na. O la, a mana kɛ min o min ye, Sutana tɛna se k’i mabɔ Jehova n’a ka ɔriganisasiyɔn na.—Zaki 4:7.