1. Dɔɔni ka kɔn ciden Piyɛri saya ɲɛ, hakili senu y’a lasun ka mun lo kɛ?

 CIDEN PIYƐRI ye baara kɛ Jehova ye kantigiya la saan caaman kɔnɔ. A ye Yezu bila sira a ka waajuli baara la. Minw tɛ Yahutuw ye, ale lo y’a daminɛ k’u waaju ani kɔfɛ, a kɛra koow ɲɛnabɔla jɛnkulu mɔgɔ dɔ ye. Tuma min na a y’a lɔn ko a saya wagati surunyana, Jehova ye baara wɛrɛw kalifa a ma. Saan 62-64 fan fɛ Krista tile la, a ye bataki fila sɛbɛ hakili senu barika la: Piyɛri ka bataki fɔlɔ ani Piyɛri ka bataki filanan. A jigi tun b’a la ko a sanin kɔ, o batakiw bena kerecɛnw dɛmɛ.—2 Piyɛri 1:12-15.

2. Mun na an be se k’a fɔ ko Piyɛri y’a ka batakiw sɛbɛ wagati bɛnnin na?

² Piyɛri y’a ka batakiw sɛbɛ hakili senu barika la, wagati min na “tɔɔrɔ sifa caaman” tun be a balimaw kan (1 Piyɛri 1:6). Mɔgɔ jugu dɔw tun b’a ɲinina ka kerecɛnw lafili n’u ka ngalon kalanw ye ani k’u lasun ka kakalayakow kɛ (2 Piyɛri 2:1, 2, 14). Kerecɛn minw tun be Zeruzalɛmu, yanni dɔɔni, olu tun bena gwɛlɛyaw sɔrɔ ni “fɛɛnw bɛɛ banwaati” tun sera. O kɔrɔ, tuma min na Ɔrɔmu sɔrɔdasiw tun bena Zeruzalɛmu n’a ka Alabatoso halaki (1 Piyɛri 4:7). Siga t’a la, Piyɛri ka batakiw ye kerecɛnw dɛmɛ k’a lɔn u tun be se ka min kɛ ka gwɛlɛyaw muɲu ani k’u yɛrɛ labɛn gwɛlɛya nataw kama. b

3. Mun na an ka ɲi ka Piyɛri ka batakiw lajɛ?

³ Hali ni Piyɛri ye o batakiw sɛbɛ kerecɛn fɔlɔw lo ma, o batakiw be jati Jehova ka Kuma yɔrɔ dɔ ye. O kama, u be se k’an nafa bi (Ɔrɔm. 15:4). I ko o kerecɛnw, an fana be duniɲa min kɔnɔ, malobaliyakow ka ca ani o be se k’a to a  be gwɛlɛya an ma ka Jehova sago kɛ. Ani yanni dɔɔni, tɔɔrɔba dɔ bena cun an kan. O tɔɔrɔba bena juguya ka tɛmɛ min ye kerecɛnw sɔrɔ tuma min na Zeruzalɛmu n’a ka Alabatosoba halakira. Piyɛri ka batakiw b’an hakili jigi koo kɔrɔtaninba dɔw la. O koow bena an dɛmɛ ka to ka Jehova ka loon makɔnɔ, ka see sɔrɔ adamaden ɲɛsiran kan ani ka ɲɔgɔn kanu kosɔbɛ. U bena diinan mɔgɔkɔrɔw dɛmɛ fana k’a faamu cogo min na u be se k’u janto Ala ka sagakulu la koɲuman.

4. Ka kɛɲɛ ni 2 Piyɛri 3:3, 4 ye, mun lo be se k’an ka limaniya barika dɔgɔya?

⁴ Bi, mɔgɔ caaman lanin tɛ Bibulu ka kiraya kumaw na. An juguw be se k’an lɔgɔbɔ ko a saan caaman ye nin ye, an b’a fɔra ko laban wagati surunyana. Dɔw b’a fɔ ko laban tɛna se ka ye fewu (2 Piyɛri 3:3, 4 kalan). N’an y’o mɛn an ka kiinmɔgɔ dɔ, an baarakɛɲɔgɔn wala an somɔgɔ dɔ daa, o be se k’an ka limaniya barika dɔgɔya. Piyɛri y’a ɲɛfɔ fɛɛn min be se k’an dɛmɛ.

5. Mun lo bena an dɛmɛ an ka muɲu ka duniɲa nin laban wagati kɔnɔ? (2 Piyɛri 3:8, 9).

⁵ A be se ka kɛ dɔw ɲɛɛ na ko Jehova tɛ teliyara ka daan sigi duniɲa juguman nin na. Piyɛri ka kumaw b’an dɛmɛ ka koow jati cogo ɲuman na. U b’an hakili jigi ko Jehova ka wagati jaticogo ni an ta tɛ kelen ye fewu (2 Piyɛri 3:8, 9 kalan). Saan waa kelen be i ko loon kelen Jehova ɲɛɛ kɔrɔ. A muɲunin lo sabu a t’a fɛ mɔgɔ si ka halaki. Nka, n’a ka loon sera tuma min na, a bena daan sigi duniɲa nin na. Yanni o cɛ, nɛɛmaba lo an fɛ ka mɔgɔw waaju duniɲa faan bɛɛ la.

6. An be se ka to ka Jehova “ka loon makɔnɔ” cogo di? (2 Piyɛri 3:11, 12).

⁶ Piyɛri b’an jija an ka to ka Jehova “ka loon makɔnɔ.” (2 Piyɛri 3:11, 12 kalan). An be se k’o kɛ cogo di? An bena duga minw sɔrɔ duniɲa kura kɔnɔ, an ka to ka miiri u la loon o loon. Miiri k’a filɛ: I be fɔɲɔ saniyanin nɛnɛkirila, ka dumuni ɲuman kɛ, i ka mɔgɔ kanulen minw sara, i b’u bisimilara u suu kununin kɔ ani mɔgɔ minw ye ɲɛnamaya kɛ galen, i be olu kalanna Bibulu ka kiraya kumaw dafali koo la. N’i tora ka miiri o la, o bena i dɛmɛ ka muɲu ka Jehova ka loon makɔnɔ ani ka la a la ko laban loon surunyana. An “lasɔmina ka ban” sinikow la minkɛ, minw be ngalon kalanw jɛnsɛn, an tɛna a to u k’an “kuun ɲagami.”—2 Piyɛri 3:17.

7. Adamaden ɲɛsiran be se ka nɔɔ juman lo to an kan?

⁷ N’an be Jehova ka loon makɔnɔna, an b’an jija ka kibaro diiman fɔ tɔɔw ye. Nka tuma dɔw la, n’a sɔrɔ an be sigasiga k’o kɛ adamaden ɲɛsiran kosɔn. O ɲɔgɔn ye Piyɛri sɔrɔ ka ye. Suu min na u ye kiti tigɛ Yezu kan, siranya kosɔn Piyɛri ko ale tɛ Yezu ka kalanden dɔ ye ani siɲɛ caaman na, a yɛrɛ ko ale t’a lɔn (Mat. 26:69-75). Nka Piyɛri ye see sɔrɔ adamaden ɲɛsiran kan ani kɔfɛ, a y’a sɛbɛ ko: “Aw kana siran mɔgɔ si ɲa, aw hakili kana ɲagami.” (1 Piyɛri 3:14). A ka kumaw b’an hakili sigi ko an fana be se ka see sɔrɔ adamaden ɲɛsiran kan.

8. Mun lo be se k’an dɛmɛ ka see sɔrɔ adamaden ɲɛsiran kan? (1 Piyɛri 3:15).

⁸ Mun lo be se k’an dɛmɛ ka see sɔrɔ  adamaden ɲɛsiran kan? Piyɛri ko: “Aw k’a lɔn aw dusu la ko aw Matigi Krista ye senu ye.” (1 Piyɛri 3:15 kalan). O kɔrɔ ko an Matigi ani an ka Masacɛ Yezu Krista be ni lɔyɔrɔ ani setigiya min ye, an ka to ka miiri o la. N’i ye sababu sɔrɔ ka kibaro diiman fɔ dɔ ye nka i be siranna k’o kɛ, miiri an ka Masacɛ la. Miiri k’a filɛ ko i ɲɛɛ b’a la a be kuntigiya kɛra sankolo la ani mɛlɛkɛ caamanba be yen k’a lamini. A to i hakili la ko “sebagaya bɛɛ” dira a ma “sankolo la ani dugukolo kan” ani ko a bena to n’i ye “loon o loon fɔɔ ka taga diɲɛ wili.” (Mat. 28:18-20). Piyɛri b’an jija ko an “labɛnnin ka sɔrɔ tuma bɛɛ” k’an ka limaniya lafasa. A bena diya i ye ka seereya kɛ baarakɛyɔrɔ, lakɔliso wala sababu wɛrɛw sen fɛ wa? Kɔn ka miiri k’a filɛ i be se k’o kɛ tuma min na ani o kɔ, i bena min fɔ o labɛn. Jagwɛlɛya deli Jehova fɛ ani la a la ko a bena i dɛmɛ ka see sɔrɔ adamaden ɲɛsiran kan.—Kɛw. 4:29.

9. Loon dɔ, mun lo y’a to Piyɛri m’a yira ko a b’a balimaw kanu? (jaa lajɛ fana).

⁹ Piyɛri tun b’a lɔn a be se ka kanuya yira cogo min na. A tun be yen tuma min na Yezu ko: “Ne be cikura di aw ma ko: aw ka ɲɔgɔn kanu, ne y’aw kanu cogo  min na, aw fana ka ɲɔgɔn kanu ten.” (Zan 13:34). Nka, a balima Yahutuw ɲɛsiran kosɔn, a banna ka dumuni kɛ n’a balimaw ye minw tun tɛ Yahutuw ye. Ciden Pol ko Piyɛri ye min kɛ, o ye “namaratɔya” lo ye, o kɔrɔ, filankafoya (Gal. 2:11-14). Piyɛri sɔnna Pol ka ladili ma ani a ye kalan sɔrɔ o la. A ka lɛtɛrɛ fila bɛɛ kɔnɔ, a sinsinna a kan ko an man ɲi k’an balimaw kanu an dusu la dɔrɔn nka, an ka ɲi k’o kanuya yira.

10. Mun lo bena a to an be “ɲɔgɔn kanu badenya la ni kɔnɔgwɛ ye”? A ɲɛfɔ (1 Piyɛri 1:22).

¹⁰ Ciden Piyɛri ko an ka ɲi k’an kerecɛnɲɔgɔnw “kanu badenya la ni kɔnɔgwɛ ye.” (1 Piyɛri 1:22 kalan). An sɔnna “Ala ka tiɲɛkuma ma minkɛ,” o lo b’a to an be an balimaw kanu o cogo la. O tiɲɛnkuma dɔ ye ko “Ala te mɔgɔ bɔ mɔgɔ la.” (Kɛw. 10:34, 35). An tɛ se k’a fɔ ko an be Yezu ka cikan labato kanuya koo la, n’an b’a yira ko an be kafoden dɔw kanu ka dɔw to yen. Tiɲɛn lo ko u bɛɛ tɛ se ka kɛ an teri sɔbɛw ye i ko Yezu ka koo b’a yira cogo min na (Zan 13:23; 20:2). Nka, Piyɛri b’an hakili jigi ko an ka ɲi k’an jija k’an balimaw bɛɛ “kanu badenya la” sabu an bɛɛ ye denbaya kelen mɔgɔw lo ye.—1 Piyɛri 2:17.

11. K’an balimaw ‘kanu kosɔbɛ n’an dusu bɛɛ ye,’ o kɔrɔ ko di?

¹¹ Piyɛri y’an jija ko an ka ‘ɲɔgɔn kanu kosɔbɛ n’an dusu bɛɛ ye.’ Kumaden min bayɛlɛmana yan ko kanu “kosɔbɛ,” o kɔrɔ ko ka mɔgɔ dɔ kanu hali n’a man nɔgɔ k’o kɛ. Misali la, ni balima dɔ y’an hakɛ ta, an ka ɲi ka mun lo kɛ? A daminɛ na, sanni k’a yira ko an b’a kanu, an ka teli k’a ɲini k’a ka kɛwale juru sara a la. Nka Yezu ye Piyɛri dɛmɛ k’a faamu ko ka koow kɛ o cogo la, o man di Ala ye (Zan 18:10, 11). Piyɛri y’a sɛbɛ ko: “Aw kana juguya sara ni juguya ye, walima ka dɔ ka nɛnili segi a ma. Nga e ka duba le kɛ.” (1 Piyɛri 3:9). A to kanuya sɔbɛ k’i lasun ka tɔɔw minɛ ni ɲumanya ye ani k’i janto u la, hali minw donna i gasi la.

12. a) N’an be tɔɔw kanu kosɔbɛ, o bena an lasun ka koo wɛrɛ juman lo kɛ? b) I b’a fɛ k’i jija ka mun lo kɛ ka kɛɲɛ ni videwo nin ye: Préservons l’unité, un cadeau précieux?

¹² Piyɛri ka bataki fɔlɔ kɔnɔ, a ko an ka “ɲɔgɔn kanu kosɔbɛ.” O kanuya sababu la, “hakɛ caaman be yafa,” damanin dɔrɔn tɛ (1 Piyɛri 4:8). Yezu tun ye Piyɛri dɛmɛ ka min faamu yafali koo la a saan caaman ye nin ye, n’a sɔrɔ Piyɛri hakili jigira o la. O wagati la, a ko ale bena yafa a balima ma “fɔɔ ka taga se siɲɛ wolonwula.” N’a sɔrɔ a tun b’a miiri ko ale ye mɔgɔ ɲuman ye yɛrɛ le! Nka, Yezu y’a fɔ a ye ko a ka ɲi ka yafa “siɲɛ wolonwula sigiyɔrɔman bi wolonwula,” o kɔrɔ, a man ɲi ka daan sigi a ka yafali la. O kuma ɲɛsinna an fana ma bi (Mat. 18:21, 22). N’a gwɛlɛyara i ma k’o ladili sira tagama koo dɔ la, kana i fari faga! An bɛɛ ye Jehova sagokɛla dafabaliw ye minkɛ, tuma dɔw la a man nɔgɔ an ma ka yafa. Min kɔrɔtanin lo sisan, o ye k’i seko bɛɛ kɛ ka yafa i balimaw ma ani ka hɛɛrɛ kɛ n’u ye. c

13. Mun lo be se k’a to a be gwɛlɛya diinan mɔgɔkɔrɔw ma k’u janto u balimaw na?

¹³ Yezu suu kununin kɔ, a y’a fɔ Piyɛri ye ko: “Ne ka sagaw kɔlɔsi.” (Zan 21:16).  Siga t’a la, Piyɛri ma ɲinɛ o kumaw kɔ abada! N’i ye diinan mɔgɔkɔrɔ ye, i b’a lɔn ko o cikan ɲɛsinna ele fana ma. Nka, a be se ka gwɛlɛya diinan mɔgɔkɔrɔ dɔ ma ka wagati sɔrɔ k’o kunkanbaaraba dafa. Diinan mɔgɔkɔrɔw ka ɲi k’u janto u ka denbayamɔgɔw lo la fɔlɔ farisogo, dusukunnakow ni Alako ta fan fɛ. U ka ɲi ka kɛ ɲɛyirali ɲumanw ye waajuli baara la, k’u ka kalanw labɛn ani k’u kɛ lajɛnw ni lajɛnbaw la. Dɔw fana be dɛmɛ don CLH wala LDC ka baaraw la. Tiɲɛn na, diinan mɔgɔkɔrɔw bolo degunnin lo yɛrɛ le!

14. Mun lo be se ka diinan mɔgɔkɔrɔw lasun u k’u janto Ala ka sagakulu la? (1 Piyɛri 5:1-4).

¹⁴ Piyɛri y’a diinan mɔgɔkɔrɔɲɔgɔnw jija ko: “Ala y’a ka sagakulu min kalifa aw ma, aw k’o kɔlɔsi.” (1 Piyɛri 5:1-4 kalan). N’i ye diinan mɔgɔkɔrɔ ye, an b’a lɔn ko i b’i balimaw kanu ani i b’a fɛ k’i janto u la. Nka tuma dɔw la, n’a sɔrɔ i b’a miiri ko i bolo degunnin lo wala i sɛgɛnnin lo kojugu fɔɔ i tɛ se k’o kunkanbaara dafa. N’o lo, i dusukunnakow bɛɛ fɔ Jehova ye. Piyɛri y’a sɛbɛ ko: “Min be baara dɔ kɛ tɔw ye, o tigi k’o kɛ ni Ala ka barika ye.” (1 Piyɛri 4:11). N’a sɔrɔ gwɛlɛya minw b’i balimaw kan, u tɛ se ka ɲɛnabɔ bɛrɛbɛrɛ sisan. Nka, a to i hakili la ko mɔgɔ si tɛ se k’u dɛmɛ koɲuman ka se sagadɛndɛlaw “Kuntigiba” Krista ma. A be se k’o kɛ sisan yɛrɛ ani duniɲa kura kɔnɔ. Ala be min ɲini diinan mɔgɔkɔrɔw fɛ, o ye k’u balimaw kanu, k’u janto u la ani “ka siraɲuman yira u la.”

15. Diinan mɔgɔkɔrɔ dɔ b’a janto Ala ka sagakulu la cogo di? (jaa lajɛ fana).

¹⁵ William ye diinan mɔgɔkɔrɔ ye kabi saan caaman ani a b’a faamu ko a kɔrɔtanin lo kosɔbɛ a k’a janto Ala ka sagakulu la. COVID-19 fɔɲɔbana daminɛ tuma na, ale n’a diinan mɔgɔkɔrɔɲɔgɔnw ka laɲinita fɔlɔ tun ye k’u kaan bɔ u ka waajuli jɛnkulu mɔgɔ kelen kelen bɛɛ ma lɔgɔkun o lɔgɔkun. A y’a ɲɛfɔ ko: “Balima caaman tun be u kelen n’u kelen u ka soo ani u tun be se k’a daminɛ ka kɛ ni miiriya juguw ye.” Ni gwɛlɛya b’a balima dɔ kan, William b’a lamɛn koɲuman walisa k’a lɔn a makoyaw ani a  jɔrɔnankow ye min ye. O kɔ, a b’an ka gafew wala videwo dɔw ɲini jw.org kan walisa k’o balima jija. A ko: “Balimaw mako be diinan mɔgɔkɔrɔw ka dɛmɛ na sisan ka tɛmɛ sanga ni wagati bɛɛ kan. An be jijalibaw kɛ ka mɔgɔw dɛmɛ u ka Jehova lɔn. An ka ɲi k’o jijalibaw ɲɔgɔn lo kɛ k’an janto an balimaw na ani k’u dɛmɛ u ka to tiɲɛn sira kan.”

16. An ye kalan minw sɔrɔ Piyɛri ka batakiw kɔnɔ, an be se k’u sira tagama cogo di?

¹⁶ An be kalan minw sɔrɔ Piyɛri ka bataki fila kɔnɔ, an y’u damanin dɔrɔn lo lajɛ barokun nin na. N’a sɔrɔ i ye koo dɔ kɔrɔsi i b’a fɛ ka min yɛlɛma. Misali la, an bena duga minw sɔrɔ duniɲa kura nata kɔnɔ, i b’a fɛ ka to ka miiri o la tuma o tuma wa? Yala i y’a latigɛ ka seereya kɛ baarakɛyɔrɔ, lakɔliso wala sababu wɛrɛ sen fɛ wa? I miirila k’a filɛ i be se k’a yira cogo minw na ko i b’i balimaw kanu kosɔbɛ wa? Diinan mɔgɔkɔrɔw, aw jijanin lo k’aw janto Jehova ka sagakulu la n’aw dusu bɛɛ ye wa? N’i y’i kɔnɔ gwɛ k’i yɛrɛ sɛgɛsɛgɛ, n’a sɔrɔ i bena a ye ko fiɲɛ dɔw b’i la. Nka kana i fari faga. “Matigi ka ɲi” minkɛ, a bena i dɛmɛ ka yɛlɛmaniw kɛ (1 Piyɛri 2:3). Piyɛri b’an hakili sigi ko: “Ala . . yɛrɛ na aw dafa, ka aw sabati, ka aw barika bonya, ka aw sinsin.”—1 Piyɛri 5:10, Bible senuma.

17. N’an b’an timinandiya Jehova ka baara la ani k’a to a ka fɔrɔmasɔn di an ma, an bena mun lo sɔrɔ o la?

¹⁷ Loon dɔ, Piyɛri y’a jati ko ka to Ala Dencɛ gɛrɛfɛ, ale man kan n’o ye (Luka 5:8). Nka Jehova ni Yezu ka dɛmɛ barika la, a sera ka tugu Yezu kɔ kantigiya la. O la, sira dira a ma a ka don “an Matigi n’an Kisibaga Yezu Krista ka masaya la min te cɛn ka ye.” (2 Piyɛri 1:11). O ye dugaba yɛrɛ lo ye! I ko Piyɛri, n’i tora k’i timinandiya Jehova ka baara la ani k’a to a ka fɔrɔmasɔn di i ma, ele fana bena ɲɛnamaya banbali sɔrɔ. ‘I bɛna i ta lanaya tɔnɔ sɔrɔ; o ye i nin kisiri ye.’—1 Piyɛri 1:9, Biblu Ala ta Kuma.