1. Yezu ye kabako min kɛ, o ye nɔɔ juman lo to Piyɛri kan?

 PIYƐRI ye suu kuru bɛɛ kɛ jɛgɛminɛ na, nka a ma foyi sɔrɔ. A barila a la k’a mɛn Yezu daa la ko: “Jii ka dun yɔrɔ min na, taga ni kurun ye o yɔrɔ la k’aw ka jɔɔ fili.” (Luka 5:4). Piyɛri tun lanin t’a la ko ale bena jɛgɛ sɔrɔ yen, nka Yezu ye min fɔ a ye a y’o kɛ. Piyɛri n’a baarakɛɲɔgɔnw ye jɛgɛ caamanba sɔrɔ fɔɔ jɔɔ y’a daminɛ ka faran. U bɛɛ “siranna” sabu u y’a faamu ko Yezu ye kabakoba dɔ lo kɛ. Piyɛri ko: “Matigi, kana gwɛrɛ n na, bari ne ye hakɛkɛla ye.” (Luka 5:6-9). A be komi Piyɛri y’a jati ko ale man kan ka kɛ Yezu gɛrɛfɛ yɛrɛ.

2. Mun na nafa b’a la ka Piyɛri ka koo sɛgɛsɛgɛ?

² Tiɲɛn tun be Piyɛri fɛ sabu a tun ye “hakɛkɛla” ye. Bibulu b’a yira ko tuma dɔw la, Piyɛri ye koo dɔw fɔ ka koo dɔw kɛ ani o kɔ, a nimisara. Yala o ɲɔgɔn delila ka ele fana sɔrɔ wa? Yala i be fiɲɛ dɔ wala delinanko jugu dɔ kɛlɛla wa? N’o lo, Piyɛri ka koo be se k’i jija. Cogo di do? Miiri nin na: Jehova tun be se k’a kɛ u tɛ Piyɛri ka filiw sɛbɛ Bibulu kɔnɔ. Nka, a y’a kɛ u ye u sɛbɛ walisa an ka kalan sɔrɔ u la (2 Tim. 3:16, 17). Piyɛri tun be ni fiɲɛw ni dusukunnataw ye i ko anw. Koo minw y’a sɔrɔ, o b’a yira ko Jehova t’a ɲini an fɛ an ka koow kɛ cogo dafanin na. A b’a fɛ an k’an timinandiya ale sago kɛli la an ka barikantanya bɛɛ n’a ta.

3. Mun na an ka ɲi k’an timinandiya?

³ Mun na a kɔrɔtanin lo an k’an timinandiya Jehova sago kɛli la? Sabu n’an be to ka koo dɔ kɛ, a laban an be se a la koɲuman. Misali la, mɔgɔ dɔ be se ka balanfɔ degi  saan caaman kɔnɔ, ka sɔrɔ ka se a la koɲuman. O wagatiw la, a be se ka fili caaman kɛ. Nka ni a m’a fari faga, a bena a ka balan fɔcogo fisaya. Hali ni a nana kɛ balanfɔla ŋana ye, a be se ka fili tuma kelen kelen. O bɛɛ n’a ta, a tɛna a dabila. A bele bena to ka balan fɔ walisa k’a ka balan fɔcogo fisaya halibi. O cogo kelen na, hali n’a be an ɲɛɛ na ko an ye see sɔrɔ an ka fiɲɛ dɔ kan, a bele be se ka segi ka na. Nka yala an bena an fari faga o kosɔn wa? Ayi. An bɛɛ be koo dɔ fɔ wala ka koo dɔ kɛ, an be nimisa min na kɔfɛ. Nka n’an tora k’an jija ka yɛlɛmaniw kɛ, Jehova bena an dɛmɛ an ka to ka ɲɛtaga kɛ (1 Piyɛri 5:10). An ka Piyɛri ka koo lajɛ, ale min tun b’a timinandiya Jehova sago kɛli la. Piyɛri ka fiɲɛw bɛɛ n’a ta, Yezu makarila a la. N’an miirila o la, o bena an lasun an ka to ka Jehova sago kɛ.

4. Ka kɛɲɛ ni Luka 5:5-10 ka fɔta ye, Piyɛri ye mun lo fɔ a yɛrɛ koo la? Yezu y’a hakili sigi cogo di?

⁴ Bibulu t’a fɔ an ye fɛɛn min kama Piyɛri ko ale ye “hakɛkɛla ye” wala a tun be miirila a ka hakɛ min koo la (Luka 5:5-10 kalan). Nka, n’a sɔrɔ a tun ye filiba dɔw kɛ. Yezu y’a lɔn ko Piyɛri sirannin lo sabu a b’a miiri ko ale tɛ mɔgɔ ɲuman ye. A y’a lɔn fana ko Piyɛri be se ka to kantigiya la. O lo kama, a y’a fɔ Piyɛri ye ko: “Kana siran.” Yezu y’a yira ko a lanin lo Piyɛri la minkɛ, o ye nɔɔ to Piyɛri kan a ka ɲɛnamaya kuru bɛɛ la. Kɔfɛ, Piyɛri n’a balimacɛ Andere ye u ka jɛgɛminɛ baara to yen ani ka kɛ Yezu ka kalandenw ye kudayi. O la, Jehova ye u duga cogo caaman na.—Mariki 1:16-18.

5. Piyɛri ye see sɔrɔ a ka siranya kan ani a sɔnna Yezu ka welekan na minkɛ, a ye duga jumanw lo sɔrɔ?

⁵ Piyɛri kɛra Yezu ka kalanden ye minkɛ, a ye kabako caaman ye. A ye Yezu ye a be banabagatɔw kɛnɛyara, ka jinaw gwɛn ka bɔ mɔgɔw la ani hali ka suuw yɛrɛ kunu b (Mat. 8:14-17; Mariki 5:37, 41, 42). Tuma min na Yezu cogoya yɛlɛmana k’a yira nɔɔrɔ min bena kɛ a kan a ka Masaya tuma na, Piyɛri y’o ye fana ani o ye nɔɔba to a kan (Mariki 9:1-8; 2 Piyɛri 1:16-18). Ni Piyɛri tun ma kɛ Yezu ka kalanden ye, a tun tɛna o koow ye abada! Siga t’a la, a ninsɔn diyara kosɔbɛ sabu a ye see sɔrɔ a ka miiriya juguw kan ani a ye duga caaman sɔrɔ!

6. Yala Piyɛri ye see sɔrɔ a ka barikantanyaw kan joona joona wa? A ɲɛfɔ.

 ⁶ Hali ni Piyɛri ye koo caaman ye ani ka koo caaman mɛn, o bɛɛ n’a ta, a tora ka bondori kɛ n’a ka barikantanyaw ye. An ka misali damanin lajɛ. Tuma min na Yezu y’a ɲɛfɔ ko ale ka kan ka tɔɔrɔ ani ka sa ka kɛɲɛ ni Bibulu ka kiraya kumaw ye, Piyɛri y’a jalaki (Mariki 8:31-33). Siɲɛ caaman na, Piyɛri ni ciden tɔɔw tun be to ka sɔsɔli kɛ walisa k’a lɔn jɔn lo ye kuntigi ye u cɛma (Mariki 9:33, 34). Yezu ka suu laban na dugukolo kan, Piyɛri girinna ka cɛɛ dɔ tulo tigɛ (Zan 18:10). O suu kelen na, siranya kosɔn Piyɛri y’a fɔ siɲɛ saba bɛɛ ko ale t’a tericɛ Yezu lɔn (Mariki 14:66-72). O kɔ, a kasira kosɔbɛ o kosɔn.—Mat. 26:75.

7. Sababu juman lo dira Piyɛri ma Yezu suu kununin kɔ?

⁷ Piyɛri dusu tun kasinin lo kosɔbɛ, nka Yezu ma ban a la. A suu kununin kɔ, a ye sababu di Piyɛri ma a k’a yira n’a bele b’ale kanu. A y’a ɲini Piyɛri fɛ a k’a janto ale ka sagadenw na ni majigilenya ye (Zan 21:15-17). Piyɛri sɔnna. Pantekɔte loon na, a tun be Zeruzalɛmu ani mɔgɔ minw kɛra fɔlɔ ye ka mɔ hakili senu na, a kɛra u dɔ ye.

8. Piyɛri ye filiba juman lo kɛ Antiyɔsi?

⁸ Hali k’a sɔrɔ Piyɛri kɛra kerecɛn mɔlen ye, a bele tun ka ɲi ka bondori kɛ n’a ka fiɲɛw ye. Saan 36 Krista tile la, Ala ye Piyɛri ci Kɔrinɛyi ka soo. O wagati la, Ala ye Kɔrinɛyi mɔ hakili senu na. O y’a yira ka gwɛ ko “Ala te mɔgɔ bɔ mɔgɔ la” ani ko siya wɛrɛ mɔgɔw fana be se ka kɛ kerecɛnw ye (Kɛw. 10:34, 44, 45). O kɔ, Piyɛri y’a daminɛ ka to ka dumuni kɛ ni siya wɛrɛ mɔgɔw ye k’a sɔrɔ fɔlɔ la, a tun tɛna o kɛ abada (Gal. 2:12). Nka Yahutu minw tun ye kerecɛnw ye, u dɔw tun b’a miiri ko Yahutu man kan ka dumuni kɛ ni siya wɛrɛ mɔgɔw ye. Tuma min na o Yahutu dɔw nana Antiyɔsi, u ɲɛsiran kosɔn, Piyɛri y’a dabila ka dumuni kɛ ni siya wɛrɛ mɔgɔw ye. Ciden Pol ye o ye minkɛ, a ye a jalaki bɛɛ ɲɛɛ na (Gal. 2:13, 14). Piyɛri ka filiw bɛɛ n’a ta, a y’a timinandiya Jehova sago kɛli la. Mun lo y’a dɛmɛ do?

9. Zan 6:68, 69 b’a yira cogo di ko Piyɛri tun ye kantigi ye?

⁹ Piyɛri tun ye kantigi ye. A m’a to foyi k’a fari faga kudayi. Loon dɔ, a y’a ka kantigiya yira tuma min na Yezu ye koo dɔ fɔ, a ka kalandenw tun ma min faamu (Zan 6:68, 69 kalan). U caaman bɔra Yezu kɔ, u yɛrɛ m’a to a ka o koo ɲɛfɔ u ye. Nka Piyɛri m’o kɛ. A ko “mɔgɔ be nii banbali sɔrɔ [Yezu] ka kuma” dɔrɔn lo barika la.

10. Yezu y’a yira cogo di ko a lanin lo Piyɛri la? (jaa lajɛ fana).

¹⁰ Yezu ma ban Piyɛri la. A ka suu laban na dugukolo kan, a tun b’a lɔn ko Piyɛri ni ciden tɔɔw bena boli k’ale to yen. O bɛɛ n’a ta, Yezu y’a yira ko a tun lanin b’a la ko Piyɛri bena kɔsegi ale ma ani ka to kantigiya la (Luka 22:31, 32). Yezu tun b’a faamu ko “koɲuman miiriya bɛ mɔgɔ kɔnɔ, nka a farisogo baraka ka dɔgɔ.” (Mariki 14:38, Biblu Ala ta Kuma). O lo kama, tuma min na Piyɛri ko ale tɛ Yezu lɔn, Yezu ma ban a la. Yezu suu kununin kɔ, a y’a yɛrɛ yira Piyɛri la. N’a sɔrɔ a y’o kɛ tuma min na Piyɛri tun b’a kelen (Mariki 16:7; Luka 24:34; 1 Kor. 15:5). Miiri k’a filɛ o  ye Piyɛri jija cogo min na, ale min dusu tun kasinin lo!

11. Yezu ye Piyɛri hakili sigi cogo di ko Jehova bena a dɛmɛ?

¹¹ Yezu ye Piyɛri hakili sigi ko Jehova bena a dɛmɛ. A suu kununin kɔ, a ye kabako kɛ tugun walisa Piyɛri ni ciden tɔɔw ka jɛgɛ caaman minɛ (Zan 21:4-6). Siga t’a la, o kabako ye Piyɛri hakili sigi ko Jehova be se k’a makoɲɛfɛnw di a ma cogo nɔgɔman na. Yezu tun ko minw be “Ala ka masaya . . . ɲini fɔlɔ,” Jehova bena olu makoɲɛfɛnw di u ma. N’a sɔrɔ Piyɛri hakili jigira o kumaw na (Mat. 6:33). O kama, sanni a ka jɛgɛminɛ kɛ a ɲɛnako fɔlɔ, a ye waajuli baara lo kɛ a ɲɛnako fɔlɔ ye. Saan 33 Pantekɔte loon na, a ye waajuli kɛ ni jagwɛlɛya ye ani mɔgɔ waa caaman sɔnna kibaro diiman na (Kɛw. 2:14, 37-41). O kɔ, a ye Samarikaw ni siya wɛrɛ mɔgɔw dɛmɛ u sɔnna Krista la (Kɛw. 8:14-17; 10:44-48). Tiɲɛn na, Jehova tɛmɛna Piyɛri fɛ cogo kabakoman na ka mɔgɔ sifa bɛɛ dɛmɛ u kɛra kerecɛnw ye.

12. N’an be bondori kɛra ni barikantanya dɔ ye kabi wagatijan, Piyɛri ka koo be se k’an dɛmɛ cogo di?

¹² Jehova be se k’an dɛmɛ an ka timinandiya a ka baara la. N’a sɔrɔ o man nɔgɔ an ma, sanko n’an be bondori kɛra ni barikantanya dɔ ye kabi wagatijan. Tuma dɔw la a be se ka kɛ an ɲɛɛ na ko an ka barikantanyaw ka jugu ni Piyɛri taw ye. Nka, Jehova be se ka fanga di an ma walisa an kana an fari faga (Zab. 94:17-19). Misali la, balimacɛ dɔ tun ye cɛɲɔgɔnɲinila ye saan caaman kɔnɔ ka sɔrɔ ka tiɲɛn lɔn. A y’a ka ɲɛnamaya kɛcogo yɛlɛma pewu ani sisan a be a ka ɲɛnamaya kɛra ka kɛɲɛ ni Bibulu ka kalanw ye. Nka tuma dɔw la, a bele tun be to ka bondori kɛ n’a ka nege juguw ye. Mun lo y’a dɛmɛ a m’a fari faga? A ko: “Jehova be n’ barika bonya. A ka hakili senu barika la, . . . n’ y’a faamu ko n’ be se ka to ka ɲɛnamaya kɛ i ko a b’a fɛ cogo min na . . . Jehova tɛmɛna n’ fɛ ka koo dɔw kɛ ani n’ ka barikantanya bɛɛ n’a ta, a bele be to ka n’ barika bonya.”

13. Ka kɛɲɛ ni Kɛwaliw 4:13, 29, 31 ye, an be se ka Piyɛri ladegi cogo di? (jaa lajɛ fana).

¹³ I ko an y’a ye cogo min na, Piyɛri  ye filiba dɔw kɛ mɔgɔw ɲɛsiran kosɔn. Nka, komi a ye Jehova deli a k’ale jaa gwɛlɛya, a sera ka koow kɛ ni jagwɛlɛya ye (Kɛwaliw 4:13, 29, 31 kalan). An fana be se ka see sɔrɔ an ka siranya kan. An ka balimacɛ dɔ ka koo lajɛ min tɔgɔ ko Horst. A kanbele tuma na, a tun be Alemaɲi, Naziw ka kuntigiya wagati la. Tuma dɔw la, a ka lakɔli filankuruw n’a ka kalanfaw y’a lasun k’a fɔ ko: “Heil Hitler,” (o kɔrɔ, kisili be bɔ Hitler lo fɛ). Sanni a bangebagaw k’a jalaki, u ye delili kɛ n’a ye, k’a ɲini Jehova fɛ a k’a jaa gwɛlɛya. Horst y’a jigi la Jehova kan minkɛ ani a bangebagaw ka dɛmɛ barika la, a laban, a ye fanga sɔrɔ ani a sera ka lɔ kelen kan. Kɔfɛ a ko: “Jehova ma n’ to yen abada.” c

14. Minw fari fagara, diinan mɔgɔkɔrɔ kanutigiw be se k’olu hakili sigi cogo di?

¹⁴ Jehova ni Yezu tɛna an to yen. Piyɛri ko ale tɛ Yezu lɔn ani o kɔ a tun ka ɲi ka desizɔnba dɔ ta. Yala a tun bena bɔ Yezu kɔ, wala a tun bena a jija ka tugu a kɔ? Yezu ye Jehova deli kosɔbɛ walisa Piyɛri ka limaniya kana nagasi. Yezu y’o delili kofɔ Piyɛri ye ani a y’a yira ko ale lanin b’a la ko kɔfɛ Piyɛri bena a balimaw barika bonya. Piyɛri hakili tun mana jigi o kumaw na, miiri k’a filɛ o tun b’a hakili sigi cogo min na! (Luka 22:31, 32). N’an ka ɲi ka desizɔnba dɔ ta, Jehova be se ka tɛmɛ diinan mɔgɔkɔrɔ kanutigiw fɛ k’an hakili sigi walisa an ka to kantigiya la (Efɛz. 4:8, 11). Paul ye diinan mɔgɔkɔrɔ ye kabi saan caaman ani a b’a jija k’a balimaw hakili sigi o cogo la. Minw fari be ɲini ka faga, a b’a  fɔ olu ye ko Jehova ye u dɛmɛ cogo min na a daminɛ na walisa u ka tiɲɛn lɔn, u ka miiri o la. O kɔ, a b’u hakili sigi ko Jehova ka kanuya kantigiman kosɔn, a tɛna u to yen abada. A b’a ka kuma kuncɛ ko: “Minw fari tun fagara, n’ y’a ye ko Jehova ka dɛmɛ barika la, u caaman ye u timinandiya a ka baara la.”

15. Piyɛri ani Horst ka koo be Matiyo 6:33 tiɲɛntigiya yira cogo di?

¹⁵ Jehova ye Piyɛri ni ciden tɔɔw dɛmɛ u y’u makoɲɛfɛnw sɔrɔ. O cogo kelen na, n’an be cidenya baara kɛ an ɲɛnako fɔlɔ ye, a bena an fana makoɲɛfɛnw di an ma (Mat. 6:33). An kumana Horst min koo la, ale tun b’a fɛ ka kɛ piyɔniye ye kɛlɛba 2nan bannin kɔ. Nka a ka fantanya tun ka jugu minkɛ, a tun m’a lɔn n’a bena se k’a yɛrɛ mako wasa ani ka to kudayi cidenya baara la. A ye mun lo kɛ do? A y’a latigɛ ka Jehova kɔrɔbɔ k’a filɛ, a kɛtɔ ka lɔgɔkun kuru bɛɛ kɛ waajuli la, tuma min na kafokulu kɔrɔsibaga nana bɔ u ka kafo ye. Lɔgɔkun laban na, kafokulu kɔrɔsibaga ye anwelɔpu dɔ di a ma, wari tun be min kɔnɔ ani a m’a fɔ a ye mɔgɔ min y’o di a ma. O koo ye Horst kabakoya yɛrɛ le! O wari tun be se k’a dɛmɛ a ka piyɔniye baara la kalo caaman kɔnɔ. O koo ye a hakili sigi ko Jehova bena a mako wasa. Horst ye Jehova ka Masaya kɛ a ɲɛnako fɔlɔ ye a ka ɲɛnamaya tɔɔ bɛɛ la.—Mal. 3:10.

16. Mun na nafa b’a la an ka Piyɛri ka koo n’a ka batakiw sɛgɛsɛgɛ?

¹⁶ Miiri k’a filɛ Piyɛri ninsɔn diyara cogo min na k’a ye ko Yezu ma sɔn k’a mabɔ a la i ko a tun y’a ɲini a fɛ cogo min na! Krista tora ka fɔrɔmasɔn di Piyɛri ma walisa a ka kɛ ciden kantigi ani ɲɛyirali ɲuman ye kerecɛnw fɛ. An be kalan nafaman caaman sɔrɔ o fɔrɔmasɔn na. Piyɛri y’o kalan dɔw ani koo wɛrɛw kofɔ a ka bataki fila kɔnɔ, a ye minw ci saan kɛmɛkulu fɔlɔ kerecɛnw ma. Barokun nɔfɛta bena an hakili jigi o batakiw kɔnɔko dɔw la ani k’a yira an be se k’u sira tagama cogo min na bi.