1-2. Mun na Ala sagokɛlaw ninsɔn ka di? (Zaki 1:22-25).

 JEHOVA n’a Dencɛ kanulen b’a fɛ an ninsɔn ka diya. Zaburuw 119:2 sɛbɛbaga ko: “Mɔgɔ minw be Masaba ka kolatigɛninw kɛ, ani k’a ɲini n’u dusu bɛɛ ye, olu dagamunin lo.” Yezu fana y’a fɔ ko: “Mɔgɔ min be Ala ka kuma lamɛn, k’a bato, o le dagamunin lo.”—Luka 11:28.

² An ye Jehova sagokɛlaw ye minkɛ, an ninsɔn ka di. Mun na do? An ninsɔn ka di kuun caaman kosɔn. Nka u la kɔrɔtaninba dɔ ye ko an be Ala ka Kuma kalan loon o loon ani an b’an jija k’a sira tagama.—Zaki 1:22-25 kalan.

3. An be min kalan Ala ka Kuma kɔnɔ, n’an b’o sira tagama, an be nafa juman lo sɔrɔ o la?

³ N’an be Ala ka Kuma “bato,” an be nafa caaman sɔrɔ o la. Misali la, an koo be diya Ala ye ani an ninsɔn be diya (Waaj. 12:13). An be jɛnɲɔgɔnya min kɛ n’an ka denbayamɔgɔw ni kafodenw ye, o barika be bonya fana. N’a sɔrɔ an y’a kɔrɔsi k’o ye tiɲɛn ye. Ka fara o kan, mɔgɔw be gwɛlɛya minw sɔrɔ n’u t’u janto Jehova ka cikanw na, an b’an yɛrɛ tanga olu caaman ma. Masacɛ Dawuda y’o lo yira ka gwɛ. A ka dɔnkili dɔ la, a kumana Jehova ka sariyaw, a ka kitikow n’a ka cikanw koo la ani o kɔ a ko: “Nafaba b’o batoli la.”—Zab. 19:8-12.

4. Mun na a man nɔgɔ tuma bɛɛ ka Ala ka Kuma labato?

 ⁴ Tiɲɛn fɔ ka di, a man nɔgɔ tuma bɛɛ ka Ala ka Kuma labato. An bolo degunnin lo kosɔbɛ. O bɛɛ n’a ta, an ka ɲi ka wagati kunmabɔ ka Bibulu kalan ani k’a sɛgɛsɛgɛ walisa k’a lɔn Jehova b’a fɛ an ka min kɛ. O la, an ka ladili dɔw lajɛ minw be se k’an dɛmɛ ka Bibulu kalan loon o loon. An be min kalan, an bena a ye an be se ka miiri o kan ani k’o sira tagama cogo min na.

WAGATI KUNMABƆ ALA KA KUMA KALAN KAMA

5. Koo jumanw lo b’an ka wagati caaman ta?

⁵ Jehova sagokɛlaw fanba bolo degunnin lo kosɔbɛ. Bibulu b’a fɔ ko koo minw kɔrɔtanin lo kosɔbɛ, an b’an ka wagati caaman kɛ o la. Misali la, an fanba be baloɲini baara dɔ kɛ walisa k’an yɛrɛ n’an ka denbayamɔgɔw mako wasa (1 Tim. 5:8). An caaman b’an janto an somɔgɔ dɔw la minw kɔrɔnin lo wala u man kɛnɛ. Ani an bɛɛ ka ɲi k’an janto an yɛrɛ ka kɛnɛyako la, o min be wagati ta. Ka fara o bɛɛ kan, an be ni kunkanbaaraw ye kafo kɔnɔ. An ka kunkanbaara jɔnjɔn dɔ ye ka to ka waajuli kɛ ni kisɛya ye. O kunkanbaaraw bɛɛ n’a ta, i be se ka wagati sɔrɔ cogo di ka to ka Bibulu kalan loon o loon, ka miiri a kan ani k’a sira tagama?

6. I be se ka Bibulu kalangwɛ kɛ i ɲɛnako fɔlɔ ye cogo di? (jaa lajɛ fana).

⁶ “Fɛɛn minw kɔrɔtanin lo kosɔbɛ” an kerecɛnw fɛ, Bibulu kalangwɛ ye u la dɔ ye. O la, an ka ɲi k’o kɛ an ɲɛnako fɔlɔ ye (Filip. 1:10, NW). Mɔgɔ min be ninsɔndiya sɔrɔ, Zaburuw fɔlɔ b’a fɔ o tigi koo la ko: “Masaba ka sariya koo ka d’a ye, a be miiri o la suu fara tile kan.” (Zab. 1:1, 2). O b’a yira ka gwɛ ko an ka ɲi ka wagati kunmabɔ ka Bibulu kalan. Wagati juman lo ye wagati ɲuman ye Bibulu kalan kama? An kelen kelen bɛɛ lo ka ɲi k’o latigɛ. Nka min kɔrɔtanin  lo, o ye ka wagati dɔ sugandi, o min na an bena se ka to ka Bibulu kalan tuma o tuma. Balimacɛ dɔ tɔgɔ ko Victor ani a ko: “A ka di n’ ye ka n’ ka Bibulu kalan kɛ sɔgɔma. Tiɲɛn lo ko soli ka wuli man di n’ ye, nka mankan caaman tɛ yen sɔgɔma. N’ hakili siginin lo o wagati la ani a ka nɔgɔ n’ ma ka faamuyali kɛ.” Yala o kelen lo ele fana fɛ wa? I yɛrɛ ɲininga ko: “Wagati juman lo ye wagati ɲuman ye ne fɛ walisa ka Bibulu kalan?”

I YE MIN KALAN, MIIRI O LA

7-8. An ye min kalan, mun lo be se k’an bali ka nafa sɔrɔ bɛrɛbɛrɛ o la? Misali dɔ fɔ.

⁷ N’i ye wagati kunmabɔ walisa ka Bibulu kalan, i ka ɲi k’i janto kosɔbɛ koo wɛrɛ la. Yala i ma deli ka fɛɛn dɔ kalan ani dɔɔni o kɔ, i hakili t’o la tugun wa? O y’an bɛɛ sɔrɔ ka ye. A fɔ man di, nka o be se k’an sɔrɔ Bibulu kalannin kɔ. N’a sɔrɔ an y’a latigɛ ka sapitiri daa dɔ kalan loon o loon Bibulu kɔnɔ. O ye koo ɲuman yɛrɛ lo ye! An ka ɲi ka laɲinita dɔw latigɛ ani k’an jija k’u dafa (1 Kor. 9:26). K’a daminɛ ka Bibulu kalan, o ye koo ɲuman lo ye. Nka o dama tɛ bɔri kɛ. Walisa ka nafa sɔrɔ bɛrɛbɛrɛ Bibulu kalangwɛ la, an ka ɲi ka koo wɛrɛ kɛ.

⁸ Miiri misali nin na: Yiriw mako be sanji la. Nka ni sanjiba benna wagati kunkurunin kɔnɔ, dugukolo be fa jii la kojugu. O la, a tɛ se ka jii min tugun ani o tɛ yiriw nafa. Nka ni sanji be ben dɔɔni dɔɔni, o lo ka fisa sabu jii be don dugukolo jukɔrɔ ani o b’a to yiriw be bonya. O cogo kelen na, an man ɲi ka to ka Bibulu kalan joona joona fɔɔ an tɛ wagati sɔrɔ ka miiri a kan, k’a mara an hakili la ani k’a sira tagama.—Zaki 1:24.

9. N’an be deli ka Bibulu kalan joona joona, an ka ɲi ka mun lo kɛ do?

⁹ Yala i y’a kɔrɔsi ko wagati dɔ la, i be Bibulu kalan joona joona kojugu wa? N’o lo, i ka ɲi ka mun lo kɛ do? Kalan sumaya. I ye min kalan wala i be min kalanna, i jija ka miiri o kan. O man gwɛlɛ kojugu. I be se k’a latigɛ ka dɔ fara  i ka Bibulu kalangwɛ wagati kan walisa i be min kalanna, i ka se ka miiri o kan. Wala i be se k’a latigɛ ka vɛrise damanin kalan ani ka wagati tɔɔ kɛ ka miiri o kan. An kumana Victor min koo la, ale ko: “N’ tɛ yɔrɔ caaman kalan Bibulu kɔnɔ. A be se ka kɛ sapitiri kelen ɲɔgɔn ye. Komi n’ b’a kalan sɔgɔmada joona, n’ be se ka miiri a kan tile kuru bɛɛ la.” Ele lo b’a latigɛ i bena vɛrise daa min kalan. Nka min kɔrɔtanin lo, o ye ko i k’o kalan kɛ dɔɔni dɔɔni, walisa i ka se ka miiri a kan.—Zab. 119:97; koorilen nin lajɛ: “ I be se k’i yɛrɛ ɲininga koo minw na.”

10. I be min kalanna, misali dɔ fɔ min b’a yira i be se k’o sira tagama cogo min na (1 Tesalonikaw 5:17, 18).

¹⁰ N’i ye bibulusen dɔw kalan, miiri k’a filɛ i be se k’u sira tagama cogo min na. N’i be Ala ka Kuma yɔrɔ dɔ kalanna, i yɛrɛ ɲininga ko: “N’ be se k’o sira tagama cogo di sisan wala loon nataw la?” Miiri k’a filɛ ko i be 1 Tesalonikaw 5:17, 18 kalanna (a kalan). O vɛrise fila kalannin kɔ, i be se ka lɔ ani ka miiri k’a filɛ i be delili kɛ siɲɛ daa min na ani cogo min na. I be se ka miiri k’a filɛ fana i be Jehova waleɲuman lɔn koo minw kosɔn. N’a sɔrɔ i be se k’a latigɛ ko i bena Jehova fo koo tigitigi saba dɔw kosɔn. I be min kalanna, hali n’i ye miniti damanin dɔrɔn lo ta ka miiri o kan, o bena i dɛmɛ ka Ala ka Kuma faamu ani k’a sira tagama. Miiri k’a filɛ o bena i nafa cogo min na n’i b’o ɲɔgɔn kɛ loon o loon Bibulu yɔrɔ wɛrɛw kalantɔ! Siga t’a la, o bena i dɛmɛ ka Ala ka Kuma sira tagama bɛrɛbɛrɛ. Nka n’a b’i ɲɛɛ na ko yɛlɛmanin caaman be yen i ka ɲi ka minw kɛ do?

LAƝINITAW LATIGƐ I BE SE KA MINW DAFA

11. Mun na i fari be se ka faga tuma dɔw la? Misali dɔ fɔ.

¹¹ N’i be Bibulu kalanna ani k’a filɛ cogo min na i be se k’o sira tagama, tuma dɔw la i fari be se ka faga sabu i b’a ye ko i ka ɲi ka yɛlɛmani caaman kɛ. Misali la, loon dɔ Bibulu kalantɔ, i y’a ye ko i man ɲi ka mɔgɔw fisaya ɲɔgɔn ye (Zaki 2:1-8). I y’a faamu ko i be tɔɔw minɛ cogo min na, i be se k’o fisaya. O la, i y’a latigɛ ka yɛlɛmani dɔw kɛ ani o ye koo ɲuman yɛrɛ lo ye! O loon dugusagwɛ, i ye Bibulu yɔrɔ dɔ kalan, o min b’a yira ko a kɔrɔtanin lo i k’i kumacogo kɔrɔsi (Zaki 3:1-12). Jatiminɛ kɛtɔ, i b’a faamu ko tuma dɔw la, i ma kuma tɔɔw fɛ ni ɲumanya ye wala i ye koo dɔw fɔ minw  y’u fari faga. O la, i b’a latigɛ ko i bena to ka kuma ɲumanw fɔ minw be mɔgɔw jija. Loon sabanan na, i ye Bibulu yɔrɔ dɔ kalan min b’i lasɔmi ko i kana duniɲa koo diya i yɛrɛ ye (Zaki 4:4-12). I b’a faamu ko i ka ɲi k’i ka ɲɛnagwɛkow sugandi koɲuman. Loon naaninan na, i mana a ye i ka ɲi ka yɛlɛmani minw bɛɛ kɛ, i fari be se ka faga.

12. Bibulu kalantɔ, n’i y’a kɔrɔsi ko i ka ɲi ka yɛlɛmani dɔw kɛ, mun na i man ɲi k’i fari faga? (jukɔrɔla kunnafoni fana lajɛ).

¹² N’i y’a kɔrɔsi ko i ka ɲi ka yɛlɛmani caaman kɛ, kana i fari faga. I y’o kɔrɔsi minkɛ, o b’a yira ko i majiginin lo ani ko i be ni ŋaniya ɲuman ye. Mɔgɔ min majiginin lo, n’a be Bibulu kalanna, a b’a filɛ a be se ka yɛlɛmani minw kɛ. a A to i hakili la fana ko an ka ɲi k’an jija tuma o tuma le walisa “ka jogokura ta.” (Kɔlɔs. 3:10). I ye min kalan Bibulu kɔnɔ, mun lo bena i dɛmɛ i k’o sira tagama?

13. I be min kalan Bibulu kɔnɔ, i be se k’o sira tagama cogo ɲuman juman na? (jaa lajɛ fana).

¹³ I be min kan Bibulu kɔnɔ, sanni i k’a ɲini k’u bɛɛ sira tagama yɔrɔnin kelen, a latigɛ k’u la kelen wala fila sira tagama fɔlɔ (Talenw 11:2). Nin kɛ k’a filɛ: I ka laɲinitaw sɛbɛ lisi dɔ kan. O kɔ, u la kelen wala fila sugandi i bena minw dafa fɔlɔ ani u tɔɔw to yen kɔfɛ. I bena a daminɛ ni juman lo ye?

14. I be se k’a daminɛ ka laɲinita jumanw lo dafa?

¹⁴ A bena nɔgɔya i ma ka laɲinita min dafa, i be se k’a daminɛ n’o ye. A kɔrɔtanin lo kosɔbɛ ka yɛlɛmani min kɛ, i be se k’a daminɛ n’o ye fana. N’i ye laɲinita dɔ latigɛ ka ban, sɛgɛsɛgɛri kɛ  an ka gafew kɔnɔ. N’a sɔrɔ i be se ka basigi gafe nunu kan k’o kɛ: Index des publications des Témoins de Jéhovah wala Guide de recherche pour les Témoins de Jéhovah. Delili kɛ i ka laɲinita koo la. A ɲini Jehova fɛ a ‘k’o kɛli nigɛ don i la k’a kɛ see di i ma.’ (Filip. 2:13). O kɔ, i ye min kalan, o sira tagama. N’i be sera k’i ka laɲinita fɔlɔ dafa, o bena i lasun i b’a ɲini ka laɲinita wɛrɛ dafa. N’i y’a ye ko i sera ka yɛlɛmani dɔ kɛ wala k’i jogo dɔ fisaya, n’a sɔrɔ o bena i jija i ka to ka yɛlɛmani wɛrɛw kɛ ani a bena nɔgɔya i ma k’o kɛ.

A TO ALA KA KUMA KA ‘BAARA KƐ I KƆNƆ’

15. Mɔgɔ caaman minw be Bibulu kalan, mun na Jehova sagokɛlaw be dan na olu la? (1 Tesalonikaw 2:13).

¹⁵ Mɔgɔ dɔw b’a fɔ ko olu ye Bibulu kuturu bɛɛ kalan siɲɛ caaman. Nka, yala u lanin be Bibulu la tiɲɛn na wa? Yala u b’a sira tagama ani k’a to a k’u sɔɔn yɛlɛma wa? A fɔ man di nka, mɔgɔw fanba tɛ tugu Bibulu ka ladiliw kɔ. Nka Jehova sagokɛlaw be Bibulu jati cogo min na, o be dan na pewu! I ko saan kɛmɛkulu fɔlɔ kerecɛnw, an be Bibulu jati “i ko Ala ka kuma yɛrɛ yɛrɛ, a do ye o le ye tiɲɛ na.” An b’an seko bɛɛ kɛ fana ka Bibulu ka ladiliw sira tagama.—1 Tesalonikaw 2:13 kalan.

16. Mun lo be se k’an dɛmɛ an ka kɛ Ala ka Kuma sira tagamabagaw ye?

¹⁶ A man nɔgɔ tuma bɛɛ ka Ala ka Kuma kalan ani k’a sira tagama. N’a sɔrɔ an ka ɲi ka bondori lo kɛ walisa ka wagati sɔrɔ k’a kalan. Wala an ka teli k’a kalan joona joona ani an yɛrɛ tɛ miiri a kan. Wala an mana a ye an ka ɲi ka yɛlɛmani minw bɛɛ kɛ, o be se k’an fari faga. I ka gwɛlɛya mana kɛ min o min ye, i be se ka see sɔrɔ a kan Jehova ka dɛmɛ barika la. O la, an k’an cɛsiri ka sɔn a ka dɛmɛ na ani ka to k’a ka kuma lamɛn. An kana ɲinɛ o kuma kɔ, nka an ka kɛ a sira tagamabagaw ye. Siga t’a la, n’an be to ka Ala ka Kuma kalan ani k’a sira tagama, dɔ bena fara an ka ninsɔndiya kan.—Zaki 1:25.