1. Ni dɔ ka mɔgɔ kanulen dɔ gwɛnna ka bɔ kafo kɔnɔ, o be se ka mun lo kɛ a la?

YALA i ka mɔgɔ kanulen dɔ gwɛnna ka bɔ kafo kɔnɔ wa? O koo be mɔgɔ dusu kasi yɛrɛ le! Balimamuso Hilda * ko: “N’ cɛɛ tora kantigiya la fɔɔ ka se a saya ma ani an tun ye saan 41 kɛ ɲɔgɔn fɛ furu la. A saya ye n’ dusu kasi kosɔbɛ. N’ tun b’a miiri k’o dusukasiba ɲɔgɔn tun tɛna n’ sɔrɔ ka ye. Nka, tuma min na n’ dencɛ ye tiɲɛn sira bila ani a tagara k’a muso n’a deenw to yen, o dusukasi bonyana ka tɛmɛ fɔlɔ ta kan.”

2-3. Ka kɛɲɛ ni Zaburuw 78:40, 41 ye, ni Jehova sagokɛla dɔ y’a kɔɔ di a ma, o be mun lo kɛ a la?

² Miiri k’a filɛ Jehova dusu kasira cogo min na, tuma min na mɛlɛkɛ dɔw y’u kɔɔ di a ma, k’a sɔrɔ u tun ye a ka denbaya mɔgɔ dɔw ye! (Zude 6). Israɛldenw tun ye Jehova ka mɔgɔ kanulenw ye. Miiri k’a filɛ fana a digira a la cogo min na k’a ye ko u murutira a ma siɲɛ caaman (Zaburuw 78:40, 41 kalan). N’i ka mɔgɔ kanulen dɔ ye tiɲɛn sira bila, la a la ko o be digi an sankolola Faa kanutigi la fana. Dusukasi min b’i kan, Jehova b’o lɔn ani a b’i faamu. I mako be dɛmɛ ani jijali min na, a bena o di i ma sabu a be hinɛ i la.

³ Barokun nin na, an bena a ye an be se ka min kɛ walisa ka Jehova ka dɛmɛ sɔrɔ n’an ka mɔgɔ kanulen dɔ ye tiɲɛn sira bila. O gwɛlɛya be balima minw kan kafo kɔnɔ, an bena a ye fana an be se ka min kɛ walisa k’olu dɛmɛ. Nka an k’a filɛ fɔlɔ, an ka ɲi ka miiriya minw kɛlɛ.

4. Ni deen dɔ bɔra Jehova kɔ, o be mun lo kɛ a bangebagaw la?

⁴ Ni bangebagaw ka deen kanulen dɔ bɔra Jehova kɔ, u ka teli k’u yɛrɛ jalaki. U ka teli k’a miiri ko u tun ka ɲi ka  koo wɛrɛw kɛ walisa k’u deen dɛmɛ a ka to tiɲɛn sira kan. Balimacɛ dɔ tɔgɔ ko Luke. Tuma min na a dencɛ gwɛnna ka bɔ kafo kɔnɔ, a ko: “N’ tun be n’ yɛrɛ jalaki. N’ tun be siko juguw kɛ o koo la. Tuma dɔw la, n’ tun be kasi ani n’ hakili tun be ɲagami pewu.” Balimamuso Elizabeth dencɛ fana gwɛnna ka bɔ kafo kɔnɔ. A tun be to k’a miiri ko: “N’a sɔrɔ n’ ma kɛ bamuso ɲuman ye. N’ tun b’a jati ko n’ ma n’ seko bɛɛ kɛ walisa ka n’ dencɛ dɛmɛ a ka Jehova kanu.”

5. Ni mɔgɔ dɔ bɔra Jehova kɔ, o ye jɔn nɔɔ lo ye?

⁵ An k’a to an hakili la ko Jehova ye see di an kelen kelen bɛɛ ma an ka koow latigɛ an yɛrɛ ma. O kɔrɔ ko anw lo b’a latigɛ n’an bena mɛnni kɛ a fɛ wala n’an tɛna o kɛ. Deen dɔw bangebagaw ma kɛ ɲɛyirali ɲumanw ye u fɛ. Nka, o deenw y’a latigɛ ka Jehova sago kɛ ani ka to kantigiya la. Dɔ wɛrɛw bangebagaw y’u jija kosɔbɛ k’u dɛmɛ u ka Jehova kanu. Nka tuma min na u kɔrɔbayara, u bɔra Jehova kɔ. O b’a yira ko an kelen kelen bɛɛ lo b’a latigɛ n’an bena Jehova sago kɛ wala n’an tɛna o kɛ (Zozuwe 24:15). O la, aw bangebaga minw dusu kasinin lo sabu aw deen dɔ bɔra Jehova kɔ, aw kana aw yɛrɛ jalaki ani k’a miiri ko aw nɔɔ lo!

6. Ni bangebaga dɔ bɔra Jehova kɔ, o be se ka mun lo kɛ a deenw na?

⁶ Tuma dɔw la, bangebaga dɔ lo be tiɲɛn sira bila ani a yɛrɛ be taga k’a ka denbaya mɔgɔw to yen (Zab. 27:10). O be se k’a deenw dusu kasi kosɔbɛ sabu u b’a bonya ani u tun b’a jati ɲɛyirali ɲuman ye. U ye Esther facɛ gwɛn ka bɔ kafo kɔnɔ. A ko: “N’ tun be kasi tuma caaman sabu n’ y’a faamu ko a tun t’a yɔrɔ janyana tiɲɛn siran ma le dɔrɔn. Nka a yɛrɛ lo y’a latigɛ ka ban Jehova la pewu. N’ facɛ koo ka di n’ ye. O kama, tuma min na u y’a gwɛn ka bɔ kafo kɔnɔ, n’ tun be jɔrɔ a koo la tuma bɛɛ. Tuma dɔw la yɛrɛ, n’ jaa tun be bari ka tigɛ.”

7. Ni deen dɔ bangebaga gwɛnna ka bɔ kafo kɔnɔ, Jehova be mun lo miiri o deen koo la?

⁷ Kanbele wala sunguru, n’i bangebaga dɔ gwɛnna ka bɔ kafo kɔnɔ, i k’a lɔn ko o koo b’an dusu kasi kosɔbɛ! La a la fana ko Jehova b’a lɔn bɛrɛbɛrɛ dusukasi min b’i kan. I koo ka di a ye ani a dusu ka di i kɔrɔ sabu i be kantigiya kɛra a ye. An fana dusu ka di i kɔrɔ. A to i hakili la ko n’i bangebaga y’a latigɛ ka bɔ Jehova kɔ, o tɛ ele nɔɔ ye. I ko a fɔra ka tɛmɛ cogo min na, Jehova ye see di an kelen kelen bɛɛ ma ka koow latigɛ an yɛrɛ ma. Minw y’u yɛrɛkun di Jehova ma ani ka batize, u “kelen kelen bɛɛ bena lɔ n’a yɛrɛ kunko ye.”—Gal. 6:5.

8. Mɔgɔ min ye tiɲɛn sira bila, a somɔgɔ kantigiw be se ka mun lo kɛ n’u be kɔnɔnin kɛra ko a ka kɔsegi Jehova ma? (Koorilen nin fana lajɛ: “ Kɔsegi Jehova ma.”)

⁸ N’i ka mɔgɔ kanulen dɔ bɔra Jehova kɔ, a bɛnnin lo i k’a miiri ko o tigi bena kɔsegi a ma loon dɔ. I be se ka mun lo kɛ yanni o cɛ? I seko bɛɛ kɛ walisa i ka limaniya sabatinin ka to. O la, i bena ɲɛyirali ɲuman to i somɔgɔ tɔɔw ye. Mɔgɔ min gwɛnna ka bɔ kafo kɔnɔ, n’a sɔrɔcccc i yɛrɛ bena nɔɔ ɲuman to ale fana kan. Ka fara o kan, i mako be fanga min na walisa k’i ka dusukasi muɲu, i bena o sɔrɔ. An k’a filɛ i be se ka min kɛ walisa i ka limaniya sabatinin ka to.

9. I be se ka mun ni mun lo kɛ walisa i ka limaniya sabatinin ka to? (Koorilen nin fana lajɛ: “ Bibulusen nunu be se k’i dusu saalo n’i ka mɔgɔ kanulen dɔ bɔra Jehova kɔ.”)

⁹ I seko bɛɛ kɛ walisa i ka limaniya sabatinin ka to. A kɔrɔtanin lo kosɔbɛ i ka to ka ele n’i ka denbaya mɔgɔ tɔɔw ka limaniya sabati. I be se k’o kɛ cogo di? Fanga ɲini Jehova fɛ, i kɛtɔ k’a ka Kuma kalan loon o loon ani ka miiri a kan. To ka taga kafo ka lajɛnw na fana. Joanna facɛ n’a kɔrɔmuso ye tiɲɛn sira bila. A ko: “Ni n’ ye mɔgɔ dɔw ka maana kalan Bibulu kɔnɔ i n’a fɔ Abigayɛli, Ɛsitɛri, Zɔbu, Yusufu ani Yezu, n’ hakili be sigi. U ka ɲɛyiraliw be n’ jija ani ka n’ dɛmɛ ka koow filɛ ni ɲɛɛ ɲuman ye. An ka dɔnkili diimanw be n’ jija kosɔbɛ fana.”

10. Zaburuw 32:6-8 b’an dɛmɛ cogo di ka dusukasi muɲu?

¹⁰ I ka haminankow bɛɛ fɔ Jehova ye. N’i dusu kasinin lo, kana delili dabila. To ka Jehova deli a k’i dɛmɛ walisa i ka koow jati i ko ale b’u jati cogo min na. A deli fana a ka hakilitigiya di i ma ani a ka i “kalan, k’i ka tɛmɛyɔrɔ yira i la.” (Zaburuw 32:6-8 kalan). Tiɲɛn lo ko a be se ka gwɛlɛya i ma kosɔbɛ k’i dusukunnakow fɔ Jehova ye. Nka, a b’i ka dusukasi faamu koɲuman. A b’i kanu kosɔbɛ ani a b’i jija i k’i dusukunnakow bɛɛ fɔ ale ye.—Ɛkis. 34:6; Zab. 62:8, 9.

11. Ka kɛɲɛ ni Eburuw 12:11 ye, mun na an ka ɲi ka la a la ko Jehova ka kololi b’a ka kanuya yira? (Koorilen nin fana lajɛ: “ Ka jurumukɛla gwɛn ka bɔ kafo kɔnɔ, o be Jehova ka kanuya yira.”)

¹¹ Sɔn diinan mɔgɔkɔrɔw ka desizɔn ma. Ka mɔgɔ gwɛn ka bɔ kafo kɔnɔ, o ye Jehova ka labɛn dɔ lo ye. Jehova be jurumukɛla kolo ni kanuya ye ani a b’o kɛ bɛɛ nafa lo kosɔn, hali jurumukɛla yɛrɛ  (Eburuw 12:11 kalan). Kafoden dɔw be se k’a fɔ ko diinan mɔgɔkɔrɔw ma mɔgɔ dɔ ka kitiko ɲɛnabɔ cogo bɛnnin na. Nka, a to i hakili la ko o kafodenw t’a fɛ k’a fɔ o jurumukɛla ye koo jugu minw kɛ. An tɛ ni kunnafoniw bɛɛ ye o koo la. O kama, hakilitigiyako lo an ka la a la ko diinan mɔgɔkɔrɔ minw y’o kitiko ɲɛnabɔ, u y’u jija ka Bibulu ka sariyakolow sira tagama ani ka kiti tigɛ Jehova tɔgɔ la.—2 Tilew Kibaru 19:6.

12. Dɔw ye nafa jumanw lo sɔrɔ u kɛtɔ ka sɔn Jehova ka kololi ma ani ka koow kɛ ka kɛɲɛ n’o ye?

¹² A be se ka kɛ ko diinan mɔgɔkɔrɔw y’a latigɛ k’i ka mɔgɔ kanulen dɔ gwɛn ka bɔ kafo kɔnɔ. N’i sɔnna o ma ani ka koow kɛ ka kɛɲɛ n’o desizɔn ye, i bena se k’a tigi dɛmɛ a ka kɔsegi Jehova ma. An kumana Elizabeth min koo la, a dencɛ tun gwɛnna ka bɔ kafo kɔnɔ a baliku tuma na. Elizabeth ko: “A tun ka gwɛlɛ an ma kosɔbɛ an kana jɛnɲɔgɔnya si kɛ n’an dencɛ ye. Kɔfɛ, a kɔsegira Jehova ma ani ale yɛrɛ y’a fɔ ko diinan mɔgɔkɔrɔw kɛtɔ k’a gwɛn ka bɔ kafo kɔnɔ, o tun ye desizɔn ɲuman lo ye. A ko o ye ale dɛmɛ ka koo caaman faamu. O y’a to n’ y’a faamu ko Jehova ka kololi bɛnnin lo tuma bɛɛ.” Elizabeth cɛɛ Mark fana ko: “Wagatijan o kɔ, an dencɛ y’a fɔ n’ ye ko fɛɛn minw y’a to ale tun b’a fɛ ka kɔsegi Jehova ma, u la dɔ ye ko an ma sɔn ka jɛnɲɔgɔnya si kɛ n’ale ye. N’ ninsɔn ka di kosɔbɛ sabu Jehova y’an dɛmɛ an sera ka kanminɛli kɛ.”

13. Mun lo be se k’i dɛmɛ ka see sɔrɔ dusukasi kan?

¹³ Kuma i teri dɔw fɛ minw bena i dusukunnakow faamu. Wagati kɛ ni kerecɛn kolɔnbagaw ye minw bena i dɛmɛ ka kɛ ni miiriya ɲuman ye (Talenw 12:25; 17:17). Joanna min kofɔra, ale ko: “A tun be n’ ɲɛɛ na ko n’ be n’ kelen na. Nka n’ kɛtɔ ka baro kɛ ni n’ teri sɔbɛw ye, o ye n’ dɛmɛ kosɔbɛ.” I be se ka mun lo kɛ ni kafomɔgɔ dɔw be kuma dɔ fɔ min be dɔ fara i ka dusukasi kan?

14. Mun na an mako b’a la ka “yafa ɲɔgɔn ma tuma bɛɛ ka ɲɔgɔn dɛmɛdɛmɛ”?

¹⁴ Muɲu i balimaw kɔrɔ. Tiɲɛn fɔ ka di, balimaw bɛɛ ka kumaw tɛna kɛ kuma bɛnninw ye tuma bɛɛ (Zaki 3:2). An bɛɛ ye mɔgɔ dafabaliw ye. O kama, ni balima dɔw t’a lɔn u bena min fɔ i ye wala ni dɔw ma tugu ka kuma dɔw fɔ minw y’i dusu kasi, o man ɲi ka bari i la. I hakili to ciden Pol ka ladili nin na: “N’a sɔrɔla ko dɔ ye koo dɔ kɛ min ma bɛn a tɔɲɔgɔn ma, aw ka yafa ɲɔgɔn ma tuma bɛɛ ka ɲɔgɔn dɛmɛdɛmɛ.” (Kɔlɔs. 3:13). Balimamuso dɔ somɔgɔ gwɛnna ka bɔ kafo kɔnɔ. A ko: “Balima dɔw tun b’a fɛ ka n’ jija, nka u ka kumaw ye n’ dusu kasi le. Jehova ye n’ dɛmɛ n’ yafara u ma.” Denbaya mɔgɔ tɔɔ minw be kantigiya kɛra Jehova ye, kafomɔgɔw be se k’olu dɛmɛ cogo di?

15. Denbaya mɔgɔ minw ka mɔgɔ kanulen dɔ gwɛnna ka bɔ kafo kɔnɔ a ma mɛn, an be se ka mun lo kɛ k’olu dɛmɛ?

¹⁵ Denbaya mɔgɔ minw be kantigiya  kɛra Jehova ye, koow kɛ teriya la n’u ye ani u minɛ ni ɲumanya ye. Balimamuso Miriam ko tuma min na u y’ale balimacɛ gwɛn ka bɔ kafo kɔnɔ, ale tun be siran ka taga lajɛnw na. A ko: “Mɔgɔw tun bena min fɔ, n’ tun be siranna o lo ɲɛ. Nka, balima caaman y’a yira ko olu fana dusu kasinin lo ani u ma koo jugu si fɔ n’ balimacɛ koo la. U ka dɛmɛ sababu la, n’ y’a ye ko n’ tɛ n’ kelen na.” Balimamuso wɛrɛ ko: “Tuma min na u y’an dencɛ gwɛn ka bɔ kafo kɔnɔ, an teri sɔbɛw nana an dusu saalo. Dɔw ko u yɛrɛ t’a lɔn u bena min fɔ an ye. U dɔw kasira ni n’ ye ani dɔ wɛrɛw ye jijali kuma dɔw sɛbɛ k’u ci n’ ma. U ye min kɛ, o ye n’ dɛmɛ cogo min na, a tɛ se ka fɔ!”

16. Minw somɔgɔ dɔ gwɛnna ka bɔ kafo kɔnɔ, kafomɔgɔw be se ka to k’u dɛmɛ ani k’u dusu saalo cogo di?

¹⁶ Denbaya mɔgɔ minw be kantigiya kɛra Jehova ye, an ka to k’u dɛmɛ. Sisan yɛrɛ lo u mako b’an ka kanuya n’an ka jijali kumaw na (Eburuw 10:24, 25). Minw somɔgɔ dɔ gwɛnna ka bɔ kafo kɔnɔ, tuma dɔw la, a b’olu ɲɛɛ na ko u fana gwɛnna ka bɔ kafo kɔnɔ sabu balima dɔw b’u daa tigɛ u la. An kana a to o ɲɔgɔn ka kɛ abada! Minw bangebaga dɔ ye tiɲɛn sira bila, olu mako gwɛlɛ b’a la an k’u tando ani k’u jija. Maria cɛɛ gwɛnna ka bɔ kafo kɔnɔ ani a tagara k’ale n’a deenw to yen. Maria ko: “N’ teri dɔw nana n’ ka soo. U ye tobili kɛ an ye ani u y’an dɛmɛ ka gwa kɔnɔ batoli kɛ. U tun be n’ dusukunnakow faamu ani u kasira ni n’ ye. Ni mɔgɔw tun ye ngalon kumaw jɛnsɛn n’ koo la, o balimaw tun be n’ lafasa. U ye n’ jija yɛrɛ le!”—Ɔrɔm. 12:13, 15.

17. Diinan mɔgɔkɔrɔw be se ka mun lo kɛ ka dusukasibagatɔw dusu saalo?

¹⁷ Diinan mɔgɔkɔrɔw, mɔgɔ minw ye tiɲɛn sira bila, aw k’aw seko bɛɛ kɛ k’u somɔgɔ kantigiw jija. Kunkanbaaraba kalifara aw ma k’olu dusu saalo (1 Tes. 5:14). N’i ye diinan mɔgɔkɔrɔ ye, a latigɛ k’u jija ka kɔn lajɛnw ɲɛ ani lajɛnw bannin kɔ. Taga bɔ u ye u ka soo ani delili kɛ n’u ye. Waajuli kɛ n’u ye ani tuma dɔw la, u weele ka na i ka gwa kɔnɔ batoli  la. Diinan mɔgɔkɔrɔw ka ɲi k’u janto dusukasibagatɔw la. U mako be kanuya ni dɛmɛ min na, u ka ɲi k’o lase u ma.—1 Tes. 2:7, 8.

18. Ka kɛɲɛ ni 2 Piyɛri 3:9 ye, minw ye Ala sago kɛli dabila, a b’a fɛ u ka mun lo kɛ?

¹⁸ Jehova “t’a fɛ mɔgɔ si ka halaki, a b’a fɛ bɛɛ ka se ka nimisa ka faran a ka kojuguw la.” (2 Piyɛri 3:9 kalan). Hali ni mɔgɔ dɔ ye jurumuba kɛ, Ala bele b’a niin jati fɛɛn nafamanba ye. Miiri k’a filɛ Jehova ye sɔngɔ gwɛlɛ min sara jurumukɛlaw niin kosɔn! A y’a Dencɛ kanulen niin di k’a kɛ kunmabɔsara ye. Minw ye Jehova sago kɛli dabila, a b’olu dɛmɛ ni kanuya ye walisa u ka kɔsegi ale ma. A jigi b’a la ko u bena a latigɛ k’a sago kɛ kokura. Yezu ye talen min la deen tununin koo la, o talen b’o lo yira (Luka 15:11-32). Minw ye tiɲɛn sira bila, kɔfɛ, u caaman kɔsegira u sankolola Faa kanutigi ma. Kafodenw ye u bisimila ni dusudiya ye fana. An kumana Elizabeth min koo la, ale dusu diyara kosɔbɛ tuma min na a dencɛ kɛra balima dɔ ye kokura. A ko: “Minw ye an jija ko an kana an jigi tigɛ, n’ b’u waleɲuman lɔn kosɔbɛ.”

19. Mun na an be se k’an jigi la Jehova kan tuma bɛɛ?

¹⁹ An be se k’an jigi la Jehova kan tuma bɛɛ. A ka ladiliw b’an nafa tuma bɛɛ. Jehova y’an Faa ye, a b’a tɛgɛ labila k’an sɔn ani a be makari an na. Minw bɛɛ b’a kanu ani u b’a bato, a be olu kanu kosɔbɛ. La a la ko Jehova tɛna i to yen i ka dusukasi wagati la (Eburuw 13:5, 6). Mark min kofɔra, ale ko: “Jehova ma an to yen abada. A b’an dɛmɛ tuma bɛɛ gwɛlɛyaw wagati la.” Jehova bena to ka “sebagaya kabakoman” di i ma (2 Kor. 4:7). Tiɲɛn na, i be se ka to kantigiya la ani ka koow filɛ ni ɲɛɛ ɲuman ye hali n’i ka mɔgɔ kanulen dɔ ye Jehova sago kɛli dabila.