1-2. Kira Aze tun ko yuguyuguri juman lo bena kɛ an ka wagati la?

SAAN 2015, dugukoloyɛrɛyɛrɛ dɔ kɛra Nepali jamana na. Mɔgɔ minw kisira o ma, olu dɔ y’a fɔ ko: “Miniti damanin kɔnɔ, bitigiw ani bonbaba kɔrɔw wurubatara.” Dɔ wɛrɛ y’a fɔ ko: “Bɛɛ tun sirannin lo kosɔbɛ . . . Mɔgɔ caaman ko o mɛɛnna miniti fila ɲɔgɔn kɔnɔ. Nka ne fɛ, a tun be komi o mɛɛnna wagatijan kɔnɔ.” N’o siranyako ɲɔgɔn tun kɛra ele lo la, n’a sɔrɔ i tun tɛna ɲinɛ o kɔ abada!

² Nka sisan yɛrɛ, yuguyuguri sifa wɛrɛ be kɛra dugu wala jamana caaman kɔnɔ. Kabi saan caaman, Jehova be siyaw bɛɛ yuguyugura. Kira Aze tun kɔnna k’o yuguyuguri kofɔ. A y’a sɛbɛ ko: “Masaba, Setigi ko: ‘Waati dɔɔni tugu, ne bena sankolo ni dugukolo ɲagami [yuguyugu], ka kɔgɔji ni dugukolo ɲagami [yuguyugu].’”—Aze 2:6.

3. Aze kumana yuguyuguri min koo la, mun na o be daan na ni dugukoloyɛrɛyɛrɛ ye?

³ Aze kumana yuguyuguri min koo la, o be daan na ni dugukoloyɛrɛyɛrɛ ye, o min be tiɲɛni dama lo kɛ. Nka, Aze ye yuguyuguri min kofɔ, o nafa ka ca. Jehova yɛrɛ b’a fɔ an ye ko: “Ne bena siyaw bɛɛ [yuguyugu], u ka nafolow bena yɛlɛma ka na yan. Ne bena nɔɔrɔ la soo nin kan.” (Aze 2:7). O kiraya kuma dafara cogo di Aze ka wagati la? A be dafara cogo di an ka wagati la fana? An bena o ɲiningaliw jaabiliw lajɛ. An bena a ye fana cogo min na an be se k’an seen don o yuguyuguri baara la min be kɛra an ka wagati la.

4. Mun na Jehova ye kira Aze ci a sagokɛlaw fɛ?

⁴ Jehova ye cii kɔrɔtaninba dɔ kalifa kira Aze ma. A kɔrɔsi koo minw kɛra ka kɔn o ɲɛ. Saan 537 ka kɔn Krista tile ɲɛ, Jehova sagokɛla kantigi dɔw bɔra jɔnya la Babilɔni ani ka kɔsegi Zeruzalɛmu. A be komi Aze tun be olu cɛma. Dɔɔni u senin kɔ, u y’a daminɛ ka Alabatosoba lɔ (Ɛsid. 3:8, 10). Nka a ma mɛɛn, gwɛlɛya dɔ y’u sɔrɔ. U fari fagara ani u ye lɔli baara lalɔ sabu mɔgɔw tun be u kɛlɛla (Ɛsid. 4:4; Aze 1:1, 2). O lo kama, saan 520 ka kɔn Krista tile ɲɛ, Jehova ye Aze ci Yahutuw fɛ. A ko Aze k’u dɛmɛ walisa u ka kisɛya kokura ani a k’u jija u ka Alabatoso lɔli baara laban. *—Ɛsid. 6:14, 15.

5. Mun na Aze ka kumaw ye Ala sagokɛlaw hakili sigi?

⁵ Aze ka kumaw kuun tun ye ka Yahutuw ka limaniya barika bonya Jehova koo la. Minw fari tun fagara, a y’a jaa gwɛlɛya ka Jehova ka kuma nunu fɔ u ye ko: “Jamanadenw, aw bɛɛ k’aw jaa gwɛlɛya. Ne Masaba le ko ten. Aw ka baara kɛ. Bari ne be n’aw ye. Ne Masaba, Setigi le ko ten.” (Aze 2:4). Jehova kɛtɔ k’a fo ko “Masaba, Setigi,” siga t’a la, o ye Yahutuw hakili sigi. Jehova be mɛlɛkɛw kɛlɛboloba kun na. O kama, Yahutuw tun ka ɲi k’u jigi la Jehova kan, n’u tun b’a fɛ u ka baara ka ɲɛ u bolo.

6. Aze ye yuguyuguri min kofɔ, mun lo tun bena sɔrɔ o la?

⁶ Jehova ko Aze ka taga a fɔ Yahutuw ye ko ale bena siyaw bɛɛ yuguyugu. Yahutu minw fari tun fagara ani u ye Alabatosoba lɔli lalɔ, o kumaw ye olu jija. O kumaw tun b’a yira ko Jehova bena Pɛrɛsi jamana yuguyugu, o min ka fangatigiya ɲɔgɔn tun tɛ yen. Aze ye yuguyuguri min kofɔ, mun lo tun bena sɔrɔ o la? A fɔlɔ, Ala sagokɛlaw tun bena Alabatosoba lɔ k’a ban. O kɔ, hali minw tun tɛ Yahutuw ye, olu tun bena fara u kan ka Jehova bato o batosoba kura kɔnɔ. Siga t’a la, o kumaw ye Ala sagokɛlaw jija yɛrɛ le!—Zak. 8:9.

7. An be yuguyuguri baara juman lo kɛra bi? A ɲɛfɔ.

⁷ Aze ka kiraya kuma be dafara cogo di bi? Jehova be siyaw bɛɛ yuguyugura tugun ani nin sen nin na, an be dɛmɛ donna o baara la. Miiri nin na: saan 1914, Jehova ye Yezu Krista sigi a ka Masaya kun na sankolo la (Zab. 2:6). O Masaya sigiko kɛra kibaro goman ye duniɲa kuntigiw fɛ. O tun b’a yira ko “siyaw ka waati” dafara. N’u ko “siyaw ka waati,” o ye wagati dɔ lo ye min na masacɛ si tun tɛ yen dugukolo kan, Jehova ye min sugandi (Luka 21:24, Bible senuma). O lo kama, kabi saan 1919, Jehova sagokɛlaw b’a fɔra mɔgɔw ye ko Ala ka Masaya dɔrɔn lo bena adamadenw ka gwɛlɛyaw ɲɛnabɔ. O Masaya “kibaru diman” be duniɲa kuru bɛɛ yuguyugura.—Mat. 24:14.

8. Ka kɛɲɛ ni Zaburuw 2:1-3 ka fɔta ye, mɔgɔw fanba ye kibaro diiman ta cogo di?

⁸ Mɔgɔw ye o Masaya kibaro diiman ta cogo di? U fanba banna a la (Zaburuw 2:1-3 kalan). Siyaw murutira. Jehova ye Masacɛ min sigi, u banna ale la. U tɛ Masaya kibaro jati “kibaru diman” ye.  Gofɛrɛnɛman dɔw yɛrɛ ye bali sigi an ka waajuli baara kan. Kuntigi caaman b’a fɔ ko olu be Ala bato. Nka, u t’a fɛ k’u ka kuntigiya to yen. O lo kama bi, kuntigiw be wuli Jehova ka Mɔlen kama, u kɛtɔ k’a ka kalanden kantigiw kɛlɛ. Kuntigiw tun y’o lo kɛ Yezu ka wagati la fana.—Kɛw. 4:25-28.

9. Kuntigi minw sɔnnin tɛ Jehova ka Masaya ma, a be sababu juman lo di olu ma?

⁹ Kuntigi minw sɔnnin tɛ Jehova ka Masaya ma, a be sababu juman lo di olu ma? An b’o jaabili sɔrɔ Zaburuw 2:10-12 kɔnɔ. A fɔra yen ko: “O la masacɛw, sisan aw ka kɛ hakilitigiw ye. Jamana ɲamɔgɔw, aw ye sɔn ladili ma. Aw ye baara kɛ Masaba ye ni ɲasiran ye. Aw ka nisɔndiya, aw k’aw yɛrɛ majigi. Aw k’a Dencɛ boɲa janko a kana dimi, aw kana bari ka sa, bari a dimi man gwɛlɛ. Mɔgɔ minw bɛɛ b’u yɛrɛ kalifa a ma, olu dagamunin lo.” Jehova ka ɲumanya kosɔn, a be sababu di jamana kuntigiw ma u ka desizɔn ɲuman ta. U bele be se ka yɛlɛma ani ka sɔn Jehova ka Masaya ma. Nka wagati tɔɔ man ca tugun sabu an be duniɲa nin “laban tuma” lo la (2 Tim. 3:1; Ezayi 61:2). Bi ka tɛmɛ sanga ni wagati bɛɛ kan, kɔrɔtɔko lo k’a ɲini ka tiɲɛn lɔn ani k’a latigɛ ka Jehova sago kɛ.

10. Yuguyuguri min kofɔra Aze 2:7-9 kɔnɔ, o be nɔɔ ɲuman tora mɔgɔw kan cogo di?

¹⁰ Aze tun ye yuguyuguri min kofɔ, o be nɔɔ ɲuman tora mɔgɔ dɔw kan. A ko o yuguyuguri bena kɛ sababu ye siyaw bɛɛ “ka nafolow,” o kɔrɔ, mɔgɔ kɔnɔgwɛw be na walisa ka Jehova bato * (Aze 2:7-9 kalan). Ezayi ani Mise fana tun kɔnna k’a fɔ ko o koo ɲɔgɔn tun bena kɛ laban loonw na.—Ezayi 2:2-4; Mise 4:1, 2.

11. Balimacɛ dɔ siɲɛ fɔlɔ ka Masaya kibaro diiman mɛn, a ye mun lo kɛ do?

¹¹ Balimacɛ dɔ tɔgɔ ko Ken ani a be  baara kɛra an ka sigiyɔrɔsoba la. Kibaro min be dugukolo yuguyugura, an k’a filɛ o ye nɔɔ min to ale kan. A saan 40 ɲɔgɔn ye nin ye, a ye Masaya kibaro diiman mɛn a siɲɛ fɔlɔ la. Min kɛra, a hakili bele b’o la kosɔbɛ. Ken ko: “N’ siɲɛ fɔlɔ ka Bibulu ka tiɲɛn kalanw lɔn, n’ ninsɔn diyara k’a lɔn ko an be duniɲa nin laban wagati lo la. N’ y’a faamu ko n’ ka ɲi ka n’ masiri kosɔbɛ Jehova la ani ka n’ mabɔ duniɲa nin na, o min ye banta ye. O la, n’ koo bena diya Jehova ye ani n’ bena ɲɛnamaya banbali sɔrɔ. N’ ye Jehova deli ani n’ sinna k’o koow kɛ. N’ ye n’ seen bɔ duniɲa nin ka koow la ani n’ sɔnna Ala ka Masaya ka n’ latanga. O Masaya tɛna halaki abada.”

12. Laban loon nunu na, Jehova b’a ka batosoba lukɛnɛ fara ni nɔɔrɔ ye cogo di?

¹² A gwɛnin lo ko Jehova b’a sagokɛlaw dugara. Laban loon nunu na, mɔgɔ caaman y’a daminɛ k’a bato. Saan 1914, an tun ye mɔgɔ waa damanin dɔrɔn lo ye. Sisan, an ye mɔgɔ miliyɔn seegi ni kɔ lo ye minw kisɛyanin lo Jehova batoli la. Mɔgɔ miliyɔn caaman fana be fara an kan saan o saan ka Hakilijigi lajɛn kɛ. O cogo la, Jehova batosoba lukɛnɛ be fara ni siyaw bɛɛ “ka nafolow” ye. O batosoba lukɛnɛ ye Jehova ka labɛnw lo ye, a ye minw kɛ batoli senuman kama. Minw be sɔn o labɛnw ma, u be yɛlɛmaniw kɛ ka jogokura ta. O be nɔɔrɔ la Jehova tɔgɔ kan.—Efɛz. 4:22-24.

13. Jehova sagokɛlaw cayaliba ye kiraya kuma wɛrɛ jumanw lo dafa? (Jaa lajɛ ɲɛɛ fɔlɔ kan.)

¹³ Jehova sagokɛlaw cayaliba ye kiraya kuma wɛrɛw dafa i n’a fɔ min be sɔrɔ Ezayi sapitiri 60nan kɔnɔ. A fɔra vɛrise 22nan kɔnɔ ko: “Denbaya min mɔgɔw man ca, olu bena buguya ka se waa kelen ma. Siya min fanga ka dɔgɔ, olu bena kɛ setigiw ye. N’o kɛwaati sera, ne Masaba le bena teliya k’o kɛ.” Komi mɔgɔ caamanba b’a daminɛna ka Jehova sago kɛ, kabako dɔ be kɛra. O siyaw ka “nafolow” be na n’u ka lɔnniya ani u ka setigiya ye. A ka di u ye fana k’u seen don Masaya “kibaru diman” waajuli baara la. O la, Jehova sagokɛlaw be se  ka baara kɛ n’o setigiya ni o lɔnniya ye. Kira Ezayi y’o setigiya lo weele ko “siya tɔw ta nɔnɔ.” (Ezayi 60:5, 16, Biblu Ala ta Kuma). O cɛɛw n’o muso setigiw ka dɛmɛ sababu la, an be sera ka waajuli kɛ jamana 240 kɔnɔ. An ka sɛbɛw be bɔ kaan 1 000 ni kɔ la fana.

14. Mɔgɔw ka ɲi ka sugandili juman lo kɛ kabi sisan?

¹⁴ Siyaw yuguyuguri be mɔgɔw waajibiyara u ka sugandili kɛ laban wagati nin na. Yala u bena dɛmɛ don Ala ka Masaya ka koow la? Wala u bena u jigi la duniɲa nin ka gofɛrɛnɛmanw lo kan? Mɔgɔ kelen kelen bɛɛ ka ɲi ka desizɔn ta ka ɲɛsin o koo ma. Jehova sagokɛlaw be jamana minw na, u be o jamanaw ka sariyaw labato. Nka, u tɛ u seen don duniɲa nin ka politikiko si la (Ɔrɔm. 13:1-7). U b’a lɔn ko Ala ka Masaya dɔrɔn lo bena adamadenw ka gwɛlɛyaw ɲɛnabɔ. O Masaya tɛ duniɲa nin ta ye.—Zan 18:36, 37.

15. Yirali ka kitabu b’a yira cogo di ko Ala sagokɛlaw ka kantigiya bena kɔrɔbɔ?

¹⁵ Yirali ka kitabu b’a yira ko Ala sagokɛlaw ka kantigiya bena kɔrɔbɔ laban loonw na. O kɔrɔbɔli bena to ka juguya ka taga. Duniɲa ka gofɛrɛnɛmanw bena a ɲini an fɛ an ka kantigiya kɛ olu dama lo ye. Minw bena ban k’o kɛ, u bena olu kɛlɛ (Yir. 13:12, 15). U bena “mɔgɔw bɛɛ wajibiya ka taamasiɲɛ dɔ bila u kinibolo kan walima u teen na: denmisɛn fara mɔgɔkɔrɔbaw kan, nafolotigiw ni fantanw, jɔɔnw ni hɔrɔnw bɛɛ.” (Yir. 13:16). Galen, u tun be tagamasiɲɛ la jɔɔnw kan ni nigɛ gwanniman ye walisa k’a yira u ye mɔgɔ min ta ye. O cogo kelen na, u bena a ɲini mɔgɔw bɛɛ fɛ an ka wagati la, u ka kɛ ni tagamasiɲɛ ye u bolo wala u teen na. O kɔrɔ, u bena u waajibiya u k’a yira u ka miiriyaw n’u ka kɛwalew fɛ ko u be u ka jamana ka politiki mɔgɔw lo dɛmɛna ani ko u be kantigiya kɛra olu lo ye.

16. An be kantigiya min kɛra Jehova ye, mun na kɔrɔtɔko lo an k’o barika bonya kabi sisan?

¹⁶ Yala an bena sɔn tagamasiɲɛ ka la a kan ani ka dɛmɛ don duniɲa ka gofɛrɛnɛman ka koow la wa? Minw bena ban k’o tagamasiɲɛ tɛ la u kan, olu bena gwɛlɛyaw sɔrɔ ani u niin bena kɛ farati la. Yirali ka kitabu b’a fɔ ko: “N’o [tagamasiɲɛ] te mɔgɔ min kan, o tigi te se ka foyi san, a te se ka foyi feere.” (Yir. 13:17). Nka minw be n’o tagamasiɲɛ ye, Ala sagokɛlaw b’a lɔn Ala bena min kɛ olu la (Yir. 14:9, 10). Ala sagokɛlaw tɛna o tagamasiɲɛ la u yɛrɛ kan. Nka, u bena a sɛbɛ u bolo kan ko: “Masaba ta.” (Ezayi 44:5). An be kantigiya min kɛra Jehova ye, sisan lo an ka ɲi k’an jija k’o barika bonya. N’an y’o kɛ, a bena diya Jehova ye k’a fɔ ko an y’ale ta ye!

17. An ka ɲi ka mun lo to an hakili la Jehova ka muɲuli koo la?

¹⁷ Jehova y’a yira laban loon nunu na ko a muɲunin lo kosɔbɛ. A t’a fɛ mɔgɔ si ka halaki (2 Piyɛri 3:9). A ye wagati to bɛɛ ye walisa u ka nimisa ani k’a latigɛ k’ale bato. Nka, daan b’a ka muɲuli la. Mɔgɔ minw be ban ka dɛmɛ don Ala ka Masaya ka koow la, min ye Farahuna sɔrɔ Musa ka wagati la, o lo bena u sɔrɔ. Jehova y’a fɔ Farahuna koo la ko: “Ni ne tun ye n bolo kɔrɔta k’ale n’a ka mɔgɔw  gosi ni fɔɲɔbana ye, u tun bena halaki ka tunu ka bɔ dugukolo kan pewu. Nga ne y’a to yen waasa ka n ka sebagaya yira a la, ani ne tɔgɔ ka fɔ diɲɛ faan bɛɛ la.” (Ɛkis. 9:15, 16). A laban, siyaw bɛɛ bena a lɔn ko Jehova kelenpe lo ye tiɲɛn Ala ye (Ezek. 38:23). O bena kɛ cogo di do?

18. a) Yuguyuguri wɛrɛ juman lo kofɔra Aze 2:6, 20-22 kɔnɔ? b) An b’a lɔn cogo di ko Aze ka kumaw bena dafa sini ma?

¹⁸ Hakili senu barika la, ciden Pol y’a sɛbɛ ko Aze 2:6, 20-22 kɔnɔna kumaw bena dafa sini ma (A kalan). A y’o sɛbɛ saan kɛmɛkulu caaman Aze sanin kɔ. Pol ko: “Sisan [Ala] ko: ‘Ne ben’a to dugukolo be yɛrɛyɛrɛ siɲɛ kelen tugu, nga a tena dan o ma, sankolo fana niin bena sɔrɔ a la.’ N’a fɔra ko ‘siɲɛ kelen tugu,’ o kɔrɔ ko fɛɛn minw bena yɛrɛyɛrɛ, olu bena tunu. Minw te yɛrɛyɛrɛ, olu be to yen.” (Eburuw 12:26, 27). O yuguyuguri be daan na ni Aze 2:7 ta ye. O yuguyuguri sen fɛ, minw be ban Jehova ka kuntigiya ma i ko Farahuna y’a kɛ cogo min na, olu bena halaki bugubugu.

19. Mun lo tɛna yuguyugu ani an b’o lɔn cogo di?

¹⁹ Mun lo tɛna yuguyugu wala ka halaki? Pol y’a fɔ tugun ko: “Ayiwa, Ala bena sigiyɔrɔ d’an ma min te se ka cɛn, o la, an k’a fo k’a bato, ka kɛɲɛ n’a yɛrɛ sago ye, ni yɛrɛmajigi ni siranya ye.” (Eburuw 12:28). O yuguyuguri laban kɔ, Ala ka Masaya dɔrɔn lo bena kɛ yen. A sabatinin bena to!—Zab. 110:5, 6; Dan. 2:44.

20. Mɔgɔw ka ɲi ka sugandili juman lo kɛ ani an be se k’u dɛmɛ cogo di?

²⁰ Wagati caaman tɛ mɔgɔw bolo tugun. U ka ɲi ka sugandili kɛ. N’u y’a latigɛ ka to ka dɛmɛ don duniɲa ka koow la, u bena halaki. Nka n’u y’a latigɛ ka yɛlɛmaniw kɛ ani ka Jehova sago kɛ, u bena ɲɛnamaya banbali sɔrɔ (Eburuw 12:25). An ka waajuli baara fɛ, an be se ka mɔgɔw dɛmɛ u ka desizɔn ta ka ɲɛsin o koo kɔrɔtaninba ma. An k’an jija ka mɔgɔ kɔnɔgwɛ caamanba dɛmɛ u k’a latigɛ ka Ala ka Masaya lafasa. An ka Yezu ka kuma nunu to an hakili la fana: “Ala ka kibaru diman bena fɔ diɲɛ yɔrɔ bɛɛ la, waasa Alalɔnbaliw bɛɛ k’a koo mɛn. O kɔ, diɲɛ laban be sɔrɔ ka se.”—Mat. 24:14.