BAROKUN KALANTA KAFO KƆNƆ 40
Mɔgɔ caaman bena “kalan tilenninya la”
“Minw be mɔgɔw kalan tilenninya la, olu ka koo bena ɲa kosɔbɛ, u bena manamana tuma bɛɛ i n’a fɔ lolow.”—DAN. 12:3.
DƆNKILI 151 Jéhovah appellera (Jehova bena weeleli kɛ)
BAROKUN KƆNƆNAKOW *
1. Ninsɔndiyakoba jumanw lo bena kɛ Krista ka saan waa kelen mara tuma na?
LOON min na sukununi bena daminɛ dugukolo kan Krista ka saan waa kelen mara tuma na, o bena kɛ ninsɔndiya loon ye yɛrɛ le! Minw bɛɛ ka mɔgɔ kanulen dɔw sara, u kɔrɔtɔnin lo k’u ye. Jehova fana kɔrɔtɔnin k’u ye (Zɔbu 14:15). Miiri k’a filɛ bɛɛ ninsɔn bena diya cogo min na tuma min na u ka mɔgɔ kanulenw suu bena kunu! I ko an y’a ye barokun tɛmɛnin na, “mɔgɔ tilennenw,” o kɔrɔ minw tɔgɔ sɛbɛnin be ɲɛnamaya kitabu kɔnɔ, olu suu bena “kunun ka balo [wala ɲɛnamaya] banbali sɔrɔ.” (Kɛw. 24:15; Zan 5:29). N’a sɔrɔ an ka mɔgɔ kanulen caaman suu bena kunu sukununi daminɛ na dugukolo kan. * Ka fara o kan “mɔgɔ tilenbaliw,” o kɔrɔ minw ma sababu bɛrɛ sɔrɔ ka Jehova lɔn wala k’a sago kɛ ka sɔrɔ ka sa, olu suu bena “kunun kiti kama.”
2-3. a) Ka kɛɲɛ ni Ezayi 11:9, 10 ye, baaraba juman lo bena kɛ min ɲɔgɔn ma deli ka kɛ ka ye walisa ka mɔgɔw kalan? b) An bena mun lo lajɛ barokun nin na?
2 Minw bɛɛ suu bena kunu, u mako bena kɛ a la ka lɔnniya sɔrɔ Jehova koo la (Ezayi 26:9; 61:11). O kama, baaraba min ɲɔgɔn ma deli ka kɛ walisa ka mɔgɔw kalan, o ka ɲi ka bila sen kan (Ezayi 11:9, 10 kalan). Mun na do? Sabu mɔgɔ tilenbali minw suu bena kunu, olu ka ɲi ka lɔnniya sɔrɔ Yezu Krista, Ala ka Masaya ani kunmabɔsara koo la. U ka ɲi k’a faamu fana ko Jehova tɔgɔ kɔrɔtanin lo ani fɛɛn min kama joo be ale kelenpe lo fɛ ka duniɲa kuru bɛɛ mara. Jehova sagonata ye min ye dugukolo koo la, hali mɔgɔ tilenninw mako bena kɛ a la k’a faamu Jehova y’o yira dɔɔni dɔɔni cogo min na a sagokɛlaw la. O mɔgɔ kantigi dɔw sara wagatijan sanni Bibulu kuturu bɛɛ ka sɛbɛ. Tiɲɛn na, mɔgɔ tilenninw ni mɔgɔ tilenbaliw ka ɲi ka kalan koo caaman na.
3 Barokun nin na, an bena ɲiningali nunu jaabi: Baaraba min bena kɛ walisa ka mɔgɔw kalan, o bena kɛ cogo di? Minw bena sɔn o kalan ma, mun lo bena olu sɔrɔ? Nka minw tɛna sɔn do? Sisan yɛrɛ lo a kɔrɔtanin lo an k’o ɲiningaliw jaabili lɔn. Kiraya kuma kabakoman minw be Daniyɛli ani Yirali ka kitabuw kɔnɔ, an bena u dɔw lajɛ barokun nin na. Koo minw bena kɛ sukununi tuma na, o kiraya kumaw bena an ka faamuyali gwɛya o koo la. An k’a filɛ fɔlɔ kira Daniyɛli kɔnna ka koo kabakoman minw kofɔ Daniyɛli 12:1, 2 kɔnɔ.
“MƆGƆ CAAMAN MINW BE SINƆGƆRA BƆGƆ JUKƆRƆ, OLU BENA KUNUN”
4-5. Daniyɛli 12:1 be mun lo yira an na laban wagati koo la?
4 Daniyɛli 12:1 kalan. Kabako koo minw bena kɛ laban wagati la, Daniyɛli ka kitabu b’a yira an na u bena kɛ ka tugu tugu ɲɔgɔn kɔ cogo min na. Misali la, Daniyɛli 12:1 b’a yira ko Misɛli, o min ye Yezu Krista ye, ale lo ye Ala ka “siya marabaga ye.” O kiraya kuma y’a daminɛ ka dafa saan 1914, tuma min na Yezu Krista sigira Ala ka Masaya kun na sankolo la.
5 Nka, Daniyɛli y’a fɔ fana ko Yezu tun “bena bɔ” wagati dɔ la. “O bena kɛ waatigwɛlɛn ye dɛ! Kabini siyako daminɛ, fɔɔ ka n’a bila a bɔwaati la, o bɔɲɔgɔnko ma [kɛ] ka ye.” “Tɔɔrɔba” min kofɔra Matiyo 24:21 kɔnɔ, o wagati gwɛlɛ ɲɛsinna o lo ma. Yezu bena bɔ, o kɔrɔ, a bena Ala ka mɔgɔw latanga o wagati gwɛlɛw laban na, o min ye Arimagedɔn ye. Ala ka mɔgɔ minw kofɔra, Yirali ka kitabu b’a fɔ ko jamaba mɔgɔw lo “minw bɔra tɔɔrɔba nin na.”—Yir. 7:9, 14.
6. Mun lo bena kɛ jamaba mɔgɔw kisinin kɔ ka bɔ tɔɔrɔba la? A ɲɛfɔ. (Sukununi min bena kɛ dugukolo kan, barokun nin fana lajɛ o koo la Kɔrɔsili Sangaso nin kɔnɔ: “Kalanbagaw ka ɲiningaliw.”)
6 Daniyɛli 12:2 kalan. Mun lo bena kɛ jamaba mɔgɔw kisinin kɔ ka bɔ o wagati gwɛlɛ na? Sukununi min kofɔra o kiraya kuma kɔnɔ, o kɔrɔ tɛ ko laban loonw na, Ala sagokɛlaw bena lakunu Alako ta fan fɛ ka tiɲɛn batoli sigi sen kan kokura i ko an tun b’a miiri cogo min na fɔlɔ la. * Nka sisan, an y’a faamu k’o kiraya kuma ɲɛsinna sukununi ma min bena kɛ duniɲa kura nata kɔnɔ. Mun na an b’o fɔ? Kumaden min bayɛlɛmana Daniyɛli 12:2 kɔnɔ ko “bɔgɔ,” o bayɛlɛmana Zɔbu 17:16 kɔnɔ ko “buguri.” O kumaden fila bɛɛ ɲɛsinna “kaburu” lo ma. O kɔrɔ ko Daniyɛli 12:2 ɲɛsinna sukununi yɛrɛ yɛrɛ lo ma min bena kɛ laban loonw ni Arimagedɔn kɛlɛ kɔ.
7. a) Minw suu bena kunu, kɔrɔ juman na u dɔw “niyɔrɔ bena kɛ nii [wala ɲɛnamaya] banbali” ye? b) Mun na o ye “su kununni fisama” ye?
7 Daniyɛli 12:2 b’a fɔ ko minw suu bena kunu, u dɔw “niyɔrɔ bena kɛ nii [wala ɲɛnamaya] banbali” ye. O kɔrɔ ko minw suu bena kunu, a laban, u dɔw bena ɲɛnamaya banbali sɔrɔ. Sabu Yezu ka saan 1000 mara tuma na, olu bena a ɲini ka Jehova ni Yezu lɔn wala ka to ka dɔ fara u ka lɔnniya kan u koo la ani ka kolo u ye (Zan 17:3). O bena kɛ “su kununni fisama” ye ka tɛmɛ sukununi tɛmɛninw kan (Eburuw 11:35, Bible senuma). Mun na do? Sabu fɔlɔ la minw suu tun kununa, u sara tugun.
8. Mɔgɔ minw suu bena kunu, cogo juman na u “dɔw ta bena kɛ maloyaba ye min te ban”?
8 Mɔgɔ minw suu bena kunu, u bɛɛ tɛna sɔn Jehova ka kalanw ma. Minw tɛna sɔn, Daniyɛli ka kiraya kuma b’a fɔ ko olu ka sukununi “bena kɛ maloyaba ye min te ban.” U ka murutili kosɔn, u tɔgɔw tɛna sɛbɛ ɲɛnamaya kitabu kɔnɔ ani u tɛna ɲɛnamaya banbali sɔrɔ. Nka, u “ta bena kɛ maloyaba ye min te ban” o kɔrɔ, u bena halaki. O la mɔgɔ minw suu bena kunu, Daniyɛli 12:2 b’a yira u laban bena kɛ min ye. O bena latigɛ ka kɛɲɛ n’u ka kɛwalew ye u suu kununin kɔ * (Yir. 20:12). U dɔw bena ɲɛnamaya banbali sɔrɔ ani dɔ wɛrɛw tɛna a sɔrɔ.
“MINW BE MƆGƆW KALAN TILENNINYA LA”
9-10. Koo wɛrɛ juman lo bena kɛ tɔɔrɔba tɛmɛnin kɔ? Jɔnw lo “bena manamana tuma bɛɛ i n’a fɔ lolow”?
9 Daniyɛli 12:3 kalan. Koo wɛrɛ juman lo bena kɛ “waatigwɛlɛn” tɛmɛnin kɔ? Ka fara Daniyɛli 12:2 kan, vɛrise 3nan be koo dɔ fɔ min bena kɛ tɔɔrɔba tɛmɛnin kɔ.
10 Jɔnw lo “bena manamana tuma bɛɛ i n’a fɔ lolow”? Matiyo 13:43 b’an dɛmɛ k’a lɔn mɔgɔ minw lo. A fɔra yen ko: “Mɔgɔ minw be Ala sago kɛ, olu bɛɛ bena boɲa sɔrɔ ka manamana i n’a fɔ tile, u Faa Ala ka masaya yɔrɔ la.” Vɛrise minw be kɔn o ɲɛ, o b’a yira ko Yezu tun be kumana “sankolo masaya denw” lo koo la, o kɔrɔ a balima mɔlenw. Olu bena masaya kɛ n’a ye sankolo la (Mat. 13:38, Bible senuma). O la, Daniyɛli 12:3 ɲɛsinna kerecɛn mɔlenw lo ma ani u bena baara min kɛ Krista ka saan waa kelen mara tuma na.
Baara min bena kɛ walisa ka mɔgɔw kalan saan 1 000 mara tuma na, Yezu Krista ni mɔgɔ 144 000 nunu lo bena o ɲɛminɛ (Dakun 11nan lajɛ)
11-12. Mɔgɔ 144 000 nunu bena baara juman lo kɛ saan 1 000 mara tuma na?
11 Kɔrɔ juman na kerecɛn mɔlenw bena mɔgɔ caaman “kalan tilenninya la”? Baara min bena kɛ yan dugukolo kan walisa ka mɔgɔw kalan saan 1000 mara tuma na, Yezu Krista ni kerecɛn mɔlenw lo bena o ɲɛminɛ. Mɔgɔ 144 000 nunu bena kɛ masacɛw ni sarakalasebagaw ye (Yir. 1:6; 5:10; 20:6). O la, u bena dɛmɛ don ka “adamadenw furakɛ” ani k’u dɛmɛ dɔɔni dɔɔni u ka kɛ mɔgɔ dafaninw ye tugun (Yir. 22:1, 2; Ezek. 47:12). O bena kɛ ninsɔndiyaba ye kerecɛn mɔlenw fɛ yɛrɛ le!
12 Mɔgɔ caaman minw bena kalan tilenninya la, olu ye jɔnw ye? O mɔgɔw ye nunu ye: minw suu bena kunu, minw bena kisi Arimagedɔn kɛlɛ la ani n’a sɔrɔ deen minw bɛɛ bena wolo duniɲa kura kɔnɔ. Saan 1000 laban na, adamadenw bɛɛ bena kɛ mɔgɔ dafaninw ye dugukolo kan. O la, a bena kɛ komi u tɔgɔ sɛbɛra kudayi ni biki ye ɲɛnamaya kitabu kɔnɔ tuma jumɛn?
KƆRƆBƆLI LABAN
13-14. Walisa ka ɲɛnamaya banbali sɔrɔ, mɔgɔ dafanin minw bɛɛ bena kɛ dugukolo kan, olu ka ɲi ka mun lo kɛ?
13 An k’a to an hakili la ko ka kɛ mɔgɔ dafanin ye, o kɔrɔ tɛ ko i be sin ka ɲɛnamaya banbali sɔrɔ. An ka miiri Adama ni Awa koo la. U tun ye mɔgɔ dafaninw ye. Nka walisa ka ɲɛnamaya banbali sɔrɔ, u tun ka ɲi ka mɛnni kɛ Jehova Ala fɛ. Nka a fɔ man di, u ma mɛnni kɛ a fɛ.—Ɔrɔm. 5:12.
14 Minw bɛɛ bena kɛ dugukolo kan saan 1000 laban na, olu ka koo bena kɛ cogo di? U bɛɛ bena kɛ mɔgɔ dafaninw ye. Yala o mɔgɔ dafaninw bɛɛ bena sɔn bɛrɛbɛrɛ Jehova ka kuntigiya ma fɔɔ abada wa? Wala u dɔw bena kɛ i n’a fɔ Adama ni Awa, olu minw ma to kantigiya la u ka dafalenya bɛɛ n’a ta wa? A kɔrɔtanin lo an k’o ɲiningaliw jaabili sɔrɔ. Nka, an bena u jaabili sɔrɔ cogo di?
15-16. a) Wagati juman lo la adamadenw bɛɛ bena sababu sɔrɔ k’u ka kantigiya yira Jehova la? b) Mun lo bena kɛ kɔrɔbɔli laban kɔ?
15 U bena Sutana don kaso la saan 1000 kɔnɔ. A tɛna se ka mɔgɔ si lafili. Nka, o saan 1000 kɔ, a bena bɔ kaso la. O la, a bena a ɲini ka adamaden dafaninw lafili dugukolo kan. O kɔrɔbɔli tuma na, adamaden dafaninw bɛɛ bena sababu sɔrɔ k’a yira ka gwɛ n’u be bonya la Ala tɔgɔ kan ani n’u sɔnnin be a ka masabaya ma (Yir. 20:7-10). U kelen kelen bɛɛ bena min kɛ o tuma na, o lo bena a yira n’u tɔgɔ sɛbɛnin ka ɲi ka to kudayi ɲɛnamaya kitabu kɔnɔ wala n’a ka ɲi ka jɔsi ka bɔ yen.
16 Bibulu b’a fɔ an ye ko mɔgɔ dɔw bena ban Jehova ka kuntigiya ma i ko Adama ni Awa y’a kɛ cogo min na. An t’o mɔgɔw daa lɔn. Mun lo bena u sɔrɔ do? Yirali 20:15 (Biblu Ala ta Kuma) b’a fɔ ko: “Mɔgɔ o mɔgɔ tɔgɔ sɛbɛnin ma sɔrɔ ɲanamanya kitabu kɔnɔ, o ka o firi dingaba tasumaman kɔnɔ.” Tiɲɛn na, o mɔgɔ murutininw bena halaki bugubugu! Nka, adamaden dafaninw fanba bena to kantigiya la kɔrɔbɔli laban tuma na. O la, u tɔgɔw bena sɛbɛ kudayi ɲɛnamaya kitabu kɔnɔ.
“LABAN WAAATI” LA
17. Mɛlɛkɛ y’a fɔ Daniyɛli ye ko mun lo bena kɛ an ka wagati la? (Daniyɛli 12:4, 8-10).
17 Ninsɔndiyaba lo ka miiri o koo nataw la! Nka, mɛlɛkɛ ye kunnafoni jɔnjɔn dɔw fɔ Daniyɛli ye fana ka ɲɛsin an ka wagati, o kɔrɔ “laban waati” ma (Daniyɛli 12:4, 8-10 kalan; 2 Tim. 3:1-5). A y’a fɔ ko: “Mɔgɔ caaman ben’a kalan ka hakili sɔrɔ.” Tiɲɛn na, Ala sagokɛlaw tun bena Daniyɛli ka kiraya kumaw faamu ka ɲɛ. Mɛlɛkɛ y’a fɔ fana ko o wagati la, “mɔgɔjuguw bena taga n’u ka juguya ye ɲa, u si tena foyi faamu.”
18. Mun lo bena mɔgɔ juguw sɔrɔ yanni dɔɔni?
18 Bi, a be komi mɔgɔ juguw tɛ ɲangira u ka juguya kosɔn (Mal. 3:14, 15). Nka, mɔgɔ minw be i ko baaw, yanni dɔɔni Yezu bena u kiti ani k’u faran ka bɔ mɔgɔw la minw be i ko sagaw (Mat. 25:31-33). O mɔgɔ juguw tɛna kisi tɔɔrɔba la ani u suuw tɛna kunu duniɲa kura kɔnɔ. U tɔgɔw tɛna sɔrɔ Masaba ka “kitabu” kɔnɔ min kofɔra Malasi 3:16 kɔnɔ.
19. An ka ɲi ka mun lo kɛ sisan ani mun na do? (Malasi 3:16-18).
19 Sisan lo an ka ɲi k’a yira ko an tɛ mɔgɔ juguw ye (Malasi 3:16-18 kalan). Minw ye Jehova “niyɔrɔ” ye ani u koo ka gwɛlɛ a ma, a be olu lajɛnna. Siga t’a la an b’a fɛ ka kɛ olu dɔw ye.
Daniyɛli, an ka mɔgɔ kanulenw ani mɔgɔ caaman wɛrɛw bena “wili” k’u ka sara sɔrɔ duniɲa kura kɔnɔ. O bena kɛ ninsɔndiyaba ye dɛ! (Dakun 20nan lajɛ)
20. Layidu laban juman lo tara Daniyɛli ye? Mun na i kɔrɔtɔnin lo o layidu ka dafa?
20 Tiɲɛn na, kabako koow be kɛra an ka wagati la. Nka kobabaw bena kɛ yanni dɔɔni. Mɔgɔ juguw bɛɛ bena halaki. O kɔ, Jehova ye layidu min ta Daniyɛli ye, o bena dafa an ɲɛɛ na. A tun y’a fɔ Daniyɛli ye ko: “I bena wili labanlon na k’i ka sara sɔrɔ.” (Dan. 12:13). Loon min na Daniyɛli n’i ka mɔgɔ kanulenw bena “wili” ka bɔ saya la, yala i kɔrɔtɔnin lo o loon ka se wa? N’o lo, i seko bɛɛ kɛ kabi sisan ka to kantigiya la. N’i y’o kɛ, i be se ka la a la ko i tɔgɔ sɛbɛnin bena to Jehova ka ɲɛnamaya kitabu kɔnɔ.
DƆNKILI 80 “Goûtez et voyez que Jéhovah est bon” (“Aw k’a filɛ k’a lɔn ko Masaba ka ɲi”)
^ Daniyɛli 12:2, 3 b’a ɲɛfɔ ko baaraba dɔ bena kɛ walisa ka mɔgɔw kalan. Yɛlɛmani min donna an ka faamuyali la o vɛrise koo la, barokun nin bena o yira. An bena a lajɛ o baaraba bena kɛ tuma min na ani mɔgɔ minw bena u niin don a la. O baaraba min bena kɛ ka mɔgɔw kalan, an bena a ye fana o bena mɔgɔw labɛn cogo min na dugukolo kan kɔrɔbɔli laban kama, Krista ka saan waa kelen mara laban na.
^ Mɔgɔ minw sara kantigiya la laban loonw na, n’a sɔrɔ sukununi bena daminɛ n’olu lo ye ani o kɔ, mɔgɔ minw sara olu ɲɛ. Minw ye ɲɛnamaya kɛ wagati kelen na, olu suu bena kunu tuma kelen na. A be komi a bena to ka kɛ ten le. N’o lo minw suu bena kunu, olu bena sababu sɔrɔ k’u lɔnbagaw bisimila u suu kununin kɔ. A mana kɛ min o min ye, Bibulu b’a fɔ ko sukununi min be kɛ sankolo la, o be kɛ “bɛɛ ni a ka waati.” O b’an dɛmɛ k’a faamu ko sukununi min bena kɛ dugukolo kan, o fana bena kɛ cogo bɛnnin na.—1 Kor. 14:33; 15:23, Bible senuma.
^ O ɲɛfɔli be yɛlɛmani don an ka faamuyali la min be sɔrɔ gafe Prêtons attention à la prophétie de Daniel ! sapitiri 17nan kɔnɔ ani saan 1987 Zuwekalo tile fɔlɔ ka Kɔrɔsili Sangaso ɲɛɛ 21-25 kan.
^ Ka kɛɲɛ ni Kɛwaliw 24:15 ye, minw suu bena kunu u be jati “mɔgɔ tilennenw” wala “mɔgɔ tilenbaliw” ye. A fɔra fana u koo la Zan 5:29 kɔnɔ ko u “tun be ɲuman kɛ,” wala ko u ye “kojugukɛlaw” ye. O fɔra u koo la ka kɛɲɛ n’o mɔgɔw ka kɛwalew ye ka kɔn u saya ɲɛ.
