Ka kɛɲɛ ni 1 Korɛntikaw 15:8 ye, Pol y’a fɔ ko: “O bɛɛ kɔfɛ, a y’a yɛrɛ yira ne la, ne min kɛra u bɛɛ kɔmɔgɔ ye, i n’a fɔ deen min wolo waati ma se, a wolo la.” Fɔlɔ la, an tun b’a ɲɛfɔ ko a be komi Pol tun kaan be a yɛrɛ ka koo lo ma tuma min na a ye Yezu nɔɔrɔman ye yelifɛn dɔ la sankolo la. A be komi a tun ye nɛɛma sɔrɔ ka wolo wala ka sukununi sɔrɔ ka kɛ i ko mɛlɛkɛ, saan kɛmɛkulu caaman sanni o sukununi ɲɔgɔn ka kɛ. Nka, an ye sɛgɛsɛgɛri kɛ ka dunya o vɛrise koo la ani o y’an dɛmɛ k’a faamu ko an ka ɲi ka yɛlɛmani don an ka faamuyali la.

Tiɲɛn lo ko min kɛra tuma min na Pol tuubira ka kɛ kerecɛn ye, a tun be kumana o lo koo la. Nka, a tun b’a fɛ ka mun lo fɔ tuma min na a ko ale be i n’a fɔ “deen min wolo waati ma se, a wolo la”? O kuma be se ka faamu cogo caaman na.

Pol tuubiko barila la a la ani k’a hakili ɲagami. Deen mana wolo ka kɔn a wolo tuma ɲɛ, o ka teli ka bari mɔgɔw la. Sɔli (min nana weele kɔfɛ ko Pol) tun be tagara Damasi walisa ka kerecɛnw tɔɔrɔ yen. A tun t’a kɔnɔ ko a bena Yezu suu kununin ye yelifɛn dɔ la. Pol tuubiko barila a yɛrɛ la. A tun be tagara kerecɛn minw kama Damasi, a barila olu fana na. Ka fara o kan, o koo ye Pol hakili ɲagami kosɔbɛ ani a ɲɛɛw fiyenna wagati dɔ la.—Kɛw. 9:1-9, 17-19.

A tuubira “wagati bɛnbali la.” Gɛrɛkikan kumaden min bayɛlɛmana ko “deen min wolo waati ma se, a wolo la,” o be se ka bayɛlɛma fana ko “deen min wolola wagati bɛnbali la.” La Bible de Jérusalem kɔnɔ, a fɔra ko: “A be komi n’ wolola wagati min na mɔgɔ si tun t’a miirila ko n’ bena wolo.” Pol tuubi tuma na, Yezu tun kɔsegira sankolo la. Pol ye minw kofɔ vɛrise tɛmɛninw na, olu tun ye Yezu ye a suu kununin kɔ sanni a ka taga sankolo la. Nka, Pol tun ma Yezu ye o wagati la (1 Kor. 15:4-8). O kɔ le, Yezu barila k’a yɛrɛ yira a la. Hali n’a tun be komi o kɛra “wagati bɛnbali la,” o ye sababu di Pol ma a ye Yezu ye a suu kununin kɔ.

A tun be kumana a yɛrɛ lo koo la ni majigilenya ye. Lɔnnikɛla dɔw fɛ, Pol ye min fɔ, o be se ka jati kɔrɔfɔli ye. N’o lo, o b’a yira ko a tun b’a jati ko a ye nɛɛma min sɔrɔ ka kɛ ciden ye, a man kan n’o ye. A yɛrɛ ko: “Ne ye cidenw bɛɛ la fitini ye, ne man kan ka wele ko ciden yɛrɛ, bari minw lara Ala la ne ye olu tɔɔrɔ. Nga ne be yɔrɔ min na sisan, o ye Ala ka nɛɛma nɔɔ ye.”—1 Kor. 15:9, 10.

O la, a be komi Pol tun b’a fɔra le ko Yezu y’a yɛrɛ yira ale la cogo min na, o barila ale la. N’a sɔrɔ Pol tun b’a fɔra le ko a tuubiko barila ale yɛrɛ la wala ko a ye nɛɛma min sɔrɔ Alako ta fan fɛ k’o yelifɛn kabakoman ye, a tun man kan n’o ye. A mana kɛ min o min ye, min ye Pol sɔrɔ, a tun b’o jati koo ɲumanba ye. O y’a yira a la ka gwɛ ko Yezu suu kununa. A tɛ bari an na k’a ye ko min ye Pol sɔrɔ, a tun ka teli ka kuma o koo la n’a tun be mɔgɔw waajura Yezu suu kununin koo la.—Kɛw. 22:6-11; 26:13-18.