1. Jehova be mun lo fɛ adamadenw bɛɛ ye?

 JEHOVA y’an dan ka see di an ma walisa an ka koow latigɛ an yɛrɛ ma. I be baara kɛ n’o setigiya ye tuma o tuma ka desizɔnw ta. K’a latigɛ k’an yɛrɛkun di Jehova ma ani ka kɛ a ka denbayamɔgɔ dɔ ye, o ye an ka desizɔnw bɛɛ la kɔrɔtaninba lo ye. Jehova b’a fɛ an kelen kelen bɛɛ k’o lo kɛ. Mun na do? Sabu a be adamadenw kanu ani min ka fisa u ma, a b’o lo fɛ. A b’a fɛ u ka teriya kɛ n’ale ye ani ka ɲɛnamaya kɛ fɔɔ abada.—Deter. 30:19, 20; Gal. 6:7, 8.

2. Jurumukɛla minw nimisanin tɛ, Jehova be mun lo miiri olu koo la? (1 Zan 2:1).

² Nka, Jehova tɛ mɔgɔ si waajibiya a k’ale bato. A b’a to mɔgɔ kelen kelen bɛɛ k’a latigɛ a bena min kɛ. Nka ni kerecɛn batizenin dɔ ye jurumuba dɔ kɛ, diinan mɔgɔkɔrɔw ka ɲi ka mun lo kɛ do? N’a ma nimisa, u ka ɲi k’a bɔ kafo kɔnɔ (1 Kor. 5:13). O bɛɛ n’a ta, Jehova b’a fɛ sɔbɛ la o jurumukɛla ka kɔsegi ale ma. Kuun jɔnjɔn minw kama Jehova ye kunmabɔsara di, u la dɔ ye ko jurumukɛla min nimisanin lo, a ka jurumuw ka se ka yafa (1 Zan 2:1 kalan). Jehova ye Ala kanutigi ye minkɛ, a be jurumukɛlaw jija u ka nimisa.—Zak. 1:3; Ɔrɔm. 2:4; Zaki 4:8.

3. An bena mun lo lajɛ barokun nin na?

³ Jehova be jurumu ani jurumukɛlaw jati cogo min na, a b’a fɛ an fana k’u jati o cogo kelen na. An bena a ye an  be se k’o kɛ cogo min na. Barokun nin na, an bena a ye Pol ko Korɛnti kafomɔgɔw ka min kɛ, tuma min na u dɔ ye jurumuba kɛ. O kɔ, an bena a filɛ a ko u ka min kɛ fana tuma min na o cɛɛ nimisara. A laban, mɔgɔ minw be jurumuba kɛ, an bena a ye Jehova b’u jati cogo min na.

KORƐNTI KAFOMƆGƆW YE MIN KƐ TUMA MIN NA U DƆ YE JURUMUBA KƐ

4. Saan kɛmɛkulu fɔlɔ la, mun lo kɛra Korɛnti kafo kɔnɔ? (1 Korɛntikaw 5:1, 2).

⁴ Vɛrise nunu kalan: 1 Korɛntikaw 5:1, 2. Pol ka voyazi sabanan na a ka misɔndenya baara sen fɛ, a y’a mɛn ko kojuguba dɔ be kɛra Korɛnti kafo kura kɔnɔ. Balimacɛ dɔ tun be kakalaya kɛ n’a facɛ ka muso ye. O tun ye kojuguba yɛrɛ lo ye “min ɲɔgɔn te sɔrɔ Alalɔnbaliw yɛrɛ fɛ”! Kafodenw tun be u ɲɛɛ tugu o koo kan ani a be komi u tun be u yɛrɛ bonya o kosɔn. N’a sɔrɔ u dɔw tun b’a miiri ko Jehova be mɔgɔ dafabaliw faamu ani a be makari u la cogo min na, u be o lo ladegira ten. Nka, ni Jehova sagokɛla ye koo jugu kɛ, a t’a ɲɛɛ tugu o kan. O cɛɛ tun be kafodenw tɔgɔ tiɲɛna a ka kɛwale juguw fɛ. Kafoden minw tun be jɛn n’a ye, a tun be se ka nɔɔ jugu to olu kan fana. O la, Pol ye o kafodenw jija u ka mun lo kɛ?

5. Pol ko Korɛnti kafodenw ka mun lo kɛ ani o kɔrɔ ko di?(1 Korɛntikaw 5:13; jaa lajɛ fana).

⁵ Vɛrise nin kalan: 1 Korɛntikaw 5:13. Hakili senu ye ciden Pol lasun a ye cikan di a ka lɛtɛrɛ kɔnɔ ko jurumukɛla min ma nimisa, u k’a bɔ kafo kɔnɔ. Kerecɛn kantigiw tun ka ɲi k’o tigi minɛ cogo di? Pol ko u “kana jɛn n’o tigi ye fewu, hali ka dumuni yɛrɛ kɛ n’a ye.” (1 Kor. 5:11). Mun na do? Sabu n’i be dumuni kɛra ni mɔgɔ dɔ ye, i ka teli ka wagati ni baro diiman kɛ n’o tigilamɔgɔ ye. Pol ka kuma kɔrɔ ko kafodenw man ɲi ka ɲɛnagwɛkow n’a ɲɔgɔnnaw kɛ n’o tigi ye. O la, a tɛna nɔɔ jugu to u kan (1 Kor. 5:5-7). Ka fara o kan, n’u tɛ jɛnɲɔgɔnya kɛ n’o tigi ye, o bena a to a b’a faamu ko a ye kojuguba lo kɛ. O be se ka maloya bila a la ani k’a lasun ka nimisa.

6. Pol ka lɛtɛrɛ ye nɔɔ juman lo to Korɛnti kafodenw ani jurumukɛla kan?

⁶ O lɛtɛrɛ cinin kɔ Korɛnti kafodenw ma, Pol y’a daminɛ k’a yɛrɛ ɲininga u bena o ta cogo min na. Kɔfɛ, Titi nana kibaro diiman fɔ Pol ye Korɛnti balimaw koo la. O kafodenw  ye o lɛtɛrɛ ka cikanw sira tagama ani ka jurumukɛla bɔ kafo kɔnɔ (2 Kor. 7:6, 7). Dɔɔni o kɔ, o jurumukɛla nimisara. A y’a sɔɔn n’a ka kɛwalew yɛlɛma ani k’a daminɛ ka tugu Jehova ka sariya tilenninw kɔ (2 Kor. 7:8-11). O la, ciden Pol ko kafodenw ka mun lo kɛ?

KAFODENW YE MIN KƐ TUMA MIN NA O JURUMUKƐLA NIMISARA

7. U ye jurumukɛla bɔ kafo kɔnɔ minkɛ, nafa juman lo sɔrɔla o la? (2 Korɛntikaw 2:5-8).

⁷ Vɛrise nunu kalan: 2 Korɛntikaw 2:5-8. Pol ko “jama ye min kɛ a la ka ban, o b’a bɔ.” O kɔrɔ ko u ye jurumukɛla bɔ kafo kɔnɔ minkɛ, a y’a faamu ko a ka ɲi  ka nimisa. O la, kuun t’a la u ka to k’a kolo tugun.—Eburuw 12:11.

8. O cɛɛ nimisanin kɔ, Pol ko kafodenw ka mun lo kɛ?

⁸ O cɛɛ nimisara minkɛ, Pol ko diinan mɔgɔkɔrɔw k’a to a be segi ka kɛ kafoden dɔ ye. A y’a fɔ u ye fana ko u “ka yafa a ma k’a jigi tugu” ani ka banba k’a yira a la ko ‘a koo ka di u ye.’ Pol tun b’a fɛ kafodenw k’a yira u ka kumaw n’u ka kɛwalew fɛ ko u yafara o cɛɛ ma sɔbɛ la ani ko u b’a kanu. U tun bena a yira ka gwɛ o cogo la ko u ninsɔn ka di k’a ye ko a kɛra kafoden dɔ ye kokura.

9. N’a sɔrɔ mun na a gwɛlɛyara dɔw ma ka yafa o jurumukɛla ma?

⁹ Yala a gwɛlɛyara dɔw ma ka o cɛɛ bisimila kafo kɔnɔ wa? Bibulu t’o fɔ an ye, nka a be se ka kɛ. N’a sɔrɔ dɔw bele tun diminin be o cɛɛ kɔrɔ sabu a tun ye min kɛ, o ye kafodenw tɔgɔ tiɲɛ. N’a sɔrɔ dɔ wɛrɛw fana tun diminin lo sabu o cɛɛ donna u gasi la. Kafoden tɔɔw tun b’u jijara kosɔbɛ ka Jehova ka sariyaw labato. O la, u dɔw tun be se k’a miiri ko a bɛnnin tɛ u ka segi k’o cɛɛ kɛ kafoden dɔ ye, k’a sɔrɔ a tun ye o kojuguba ɲɔgɔn kɛ (Luka 15:28-30 lajɛ). N’o lo, mun na a tun kɔrɔtanin lo kafodenw k’a yira o cɛɛ la ko u b’a kanu sɔbɛ la?

10-11. Mun lo tun be se ka kɛ ni diinan mɔgɔkɔrɔw tun banna ka yafa o cɛɛ ma?

¹⁰ O cɛɛ tun nimisanin lo sɔbɛ la. Miiri k’a filɛ ni diinan mɔgɔkɔrɔw tun banna o cɛɛ ka kɔsegi kafo kɔnɔ. Wala a kɔseginin kɔ kafo kɔnɔ ni kafodenw tun banna k’a yira a la ko u b’a kanu. A dusu tun be se ka kasi “fɔɔ a hakili be ɲagami ka dama tɛmɛ.” A jigi tun be se ka tigɛ pewu. A yɛrɛ tun be jijali minw kɛra walisa ka segi ka jɛnɲɔgɔnya ɲuman kɛ ni Ala ye, a tun be se k’o dabila.

¹¹ Min yɛrɛ ka jugu, o ye ko ni kafodenw tun banna ka yafa a ma, o tun be se ka olu yɛrɛ ni Jehova ka jɛnɲɔgɔnya nagasi. Mun na do? Sabu u tun tɛna Jehova ka yafali ladegi jurumukɛla ta fan fɛ. Nka, u tun bena Sutana lo ladegi, ale min ka jugu ani a tɛ makari. Sutana tun bena tɛmɛ u fɛ ka o cɛɛ ka Alako nagasi pewu!—2 Kor. 2:10, 11; Efɛz. 4:27.

12. Kafodenw tun be se ka Jehova ladegi cogo di?

¹² Sanni u ka Sutana ladegi, Korɛnti kafodenw tun be se ka Jehova ladegi cogo di? Jurumukɛla minw nimisanin lo, Jehova be olu minɛ cogo min na, u kɛtɔ k’a ladegi o la. A kɔrɔsi Bibulu sɛbɛbaga dɔw ye min fɔ Jehova koo la. Misali la, Dawuda ko: “Matigi, e ka ɲi, e be yafa.” (Zab. 86:5). Mise ko: “Ala, i ɲɔgɔn te batofɛnw cɛma, ele min be hakɛ yafa.” (Mise 7:18). Ani Ezayi y’a fɔ ko: “Mɔgɔjugu k’a ka juguya dabila. Mɔgɔ min kɔnɔ ka jugu, o tigi k’a ka miirijugu dabila. A ka kɔsegi Masaba ma, ale bena makari a la. A ka kɔsegi an ka Ala ma, ale bena yafa a ma tiɲɛ na.”—Ezayi 55:7.

13. Cɛɛ min nimisara, mun na a tun bɛnnin lo u k’a to a ka segi ka kɛ kafoden dɔ ye? (koorilen nin lajɛ: “ Korɛnti balima min tun ye jurumuba kɛ, tuma juman lo la u segira k’a kɛ kafoden dɔ ye?”).

¹³ Walisa ka Jehova ladegi, cɛɛ min nimisara, Korɛnti kafodenw tun ka ɲi ka yafa a ma ani k’a yira ko u b’a kanu. Kafodenw y’a yira ko u be Pol “ka kuma bɛɛ bato,” u kɛtɔ k’a ka cikan sira tagama ani k’a to o cɛɛ kɛra kafoden dɔ ye tugun (2 Kor. 2:9). O cɛɛ nimisara hali  k’a sɔrɔ a kalo damanin dɔrɔn ye nin ye diinan mɔgɔkɔrɔw tun y’a bɔ kafo kɔnɔ. O la, kuun tun t’a la u ka kɔnɔni kɛ tugun ka sɔrɔ k’a kɛ kafoden dɔ ye kokura.

AN KA JEHOVA KA TILENNINYA N’A KA MAKARI LADEGI

14-15. U tun ye jurumukɛla dɔ ka koo ɲɛnabɔ cogo min na Korɛnti kafo kɔnɔ galen, an be kalan juman sɔrɔ o la? (2 Piyɛri 3:9; jaa lajɛ fana).

¹⁴ U tun ye jurumukɛla dɔ ka koo ɲɛnabɔ cogo min na Korɛnti kafo kɔnɔ galen, Jehova y’a to u y’o sɛbɛ Bibulu kɔnɔ walisa “ka hakili d’an ma.” (Ɔrɔm. 15:4). O maana b’a yira ko minw be jurumuba kɛ ani u tɛ nimisa, Jehova tɛ sɔn u ka to kafo kɔnɔ. Dɔw be se k’a miiri ko komi Jehova ye makaritigi ye, jurumukɛla minw tɛ nimisa, a be sɔn olu ka to kafo kɔnɔ. Nka, Jehova t’a ka makari yira o cogo la. Hali ni Jehova ye makaritigi ye, a tɛ sɔn kɛwale sifa bɛɛ ma. A ye sariya minw sigi ɲuman ani juguman koo la, o tɛ yɛlɛma (Zude 4). Jurumukɛla minw tɛ nimisa, ni Jehova tun be sɔn u ka to kafo kɔnɔ, a tun tɛna a yira ko a ye makaritigi ye. Mun na do? Sabu o be se ka kɛ farati ye kafoden tɔɔw bɛɛ ma.—Talenw 13:20; 1 Kor. 15:33.

¹⁵ An b’a lɔn ko Jehova t’a fɛ mɔgɔ si ka halaki. A b’a fɛ mɔgɔ caamanba  ka kisi n’a be se ka kɛ. Mɔgɔ minw b’u ka miiriya n’u ka kɛwalew yɛlɛma ani u b’a fɛ ka kɛ a teriw ye kokura, a be makari olu la (Ezek. 33:11; 2 Piyɛri 3:9 kalan). Korɛnti kafoden min tun ye jurumuba kɛ, a nimisara ani k’a ka koo juguw dabila. O tuma na, Jehova tɛmɛna ciden Pol fɛ k’a ɲɛfɔ kafodenw ye ko u ka ɲi ka yafa a ma ani ka sɔn a ka kɔsegi kafo kɔnɔ.

16. Korɛnti kafoden min tun ye jurumuba kɛ, u ye ale ka koo ɲɛnabɔ cogo min na, i be mun lo miiri o koo la?

¹⁶ U ye jurumukɛla dɔ ka koo ɲɛnabɔ cogo min na Korɛnti kafo kɔnɔ, o b’a yira an na ko Jehova ye kanutigi ye ani a be koow kɛ tilenninya la (Zab. 33:5). Yala o t’i lasun ka Jehova tando bɛrɛbɛrɛ wa? Siga t’o la. An be Jehova waleɲuman lɔn kosɔbɛ a ka makari kosɔn sabu an bɛɛ ye jurumukɛlaw ye minkɛ, an mako be yafali la. An be Jehova waleɲuman lɔn fana sabu a ye kunmabɔsara di walisa an ka jurumuw ka se ka yafa. K’a lɔn ko Jehova b’a sagokɛlaw kanu sɔbɛ la ani ko min ka fisa u ma a b’o lo fɛ, o b’an dusu saalo yɛrɛ le!

17. An bena mun lo ye barokun nataw la?

¹⁷ Bi, an be jurumukɛlaw ka koo ɲɛnabɔ cogo di do? Jehova b’a fɛ ka jurumukɛla dɛmɛ a ka nimisa. Diinan mɔgɔkɔrɔw be se k’a yira cogo di ko u b’a ladegi? Ni diinan mɔgɔkɔrɔw y’a latigɛ ka mɔgɔ dɔ bɔ kafo kɔnɔ wala k’a kɛ kafoden dɔ ye tugun, kafoden tɔɔw ka ɲi k’o koo ta cogo di? An bena o ɲiningaliw jaabi barokun nataw la.