1. Kanbelew ni sunguru caaman sera ka koo ɲuman jumanw lo kɛ?

 SAAN o saan, kanbelew ni sunguru waa caaman lo be batize. Yala i batizera wa? N’o lo, Jehova n’i kerecɛnɲɔgɔnw dusu ka di i kɔrɔ! (Talenw 27:11). Miiri k’a filɛ i sera ka koo ɲuman minw bɛɛ kɛ! Misali la, i ye i sɔbɛ don ka Bibulu sɛgɛsɛgɛ. N’a sɔrɔ i yɛrɛ y’o kɛ saan caaman kɔnɔ. O y’a to i lara a la ko Bibulu ye Ala ka Kuma lo ye. Nka min yɛrɛ kɔrɔtanin lo kosɔbɛ, o ye ko i sera ka Bibulu tigi lɔn ani k’a kanu. I ka kanuya barika bonyana Jehova koo la, fɔɔ o ye i lasun k’i yɛrɛkun di a ma ani ka batize. O kɛra desizɔn ɲuman yɛrɛ lo ye!

2. An bena mun lo lajɛ barokun nin na?

 ² Siga t’a la sanni i ka batize, i ye gwɛlɛya dɔw sɔrɔ minw ye i ka limaniya kɔrɔbɔ. Nka n’i be kɔrɔbayara, i bena gwɛlɛya wɛrɛw sɔrɔ. Sutana bena a ɲini k’i bali ka Jehova kanu ani ka baara kɛ a ye (Efɛz. 4:14). I man ɲi k’a to a ka se k’o kɛ. I ye i daa di Jehova ma ko i bena a sago kɛ. Mun lo bena i dɛmɛ k’o layidu dafa ani ka to kantigiya la? I ka ɲi k’i “jija ka taga ɲa” walisa ka kɛ kerecɛn kolɔnbaga ye (Eburuw 6:1). Nka, i be se k’o kɛ cogo di? An bena o lo ye barokun nin na.

3. Kerecɛn kelen kelen bɛɛ ka ɲi ka to ka mun lo kɛ a batizenin kɔ?

³ An batizenin kɔ, an bɛɛ ka ɲi ka ciden Pol ka ladili sira tagama, a ye min di a balimaw ma Efɛzi dugu la. A y’u jija ko u ka kɛ “mɔgɔkɔrɔbaw ye, ka kɔgɔ” Alako ta fan  fɛ (Efɛz. 4:13). O kɔrɔ ko u ka ɲi ka ‘to ka ɲɛtaga kɛ.’ Kerecɛn be ɲɛtaga min kɛ Alako ta fan fɛ, Pol ko o be komi denɲɛnin be kɔrɔbaya cogo min na. Denɲɛnin koo ka di a bangebagaw ye. Nka, a tɛ se ka to denɲɛninya la furututu. Wagati dɔ bena se, a ka ɲi ka “denmisɛnya dabila.” (1 Kor. 13:11). O kelen lo an kerecɛnw fɛ. An batizenin kɔ, an ka ɲi ka to ka ɲɛtaga kɛ. An ka ladili damanin lajɛ minw bena an dɛmɛ k’o kɛ.

4. Jogo juman lo bena i dɛmɛ ka ɲɛtaga kɛ? A ɲɛfɔ (Filipikaw 1:9).

⁴ To ka dɔ fara i ka kanuya kan Jehova koo la. I be Jehova kanu kosɔbɛ ka ban. Nka, i bele be se ka to ka dɔ fara o kanuya kan. Cogo di do? I be se k’o kɛ cogo minw na, ciden Pol kumana u dɔ koo la Filipikaw 1:9 kɔnɔ (a kalan). Pol ye Ala deli ko a ka dɔ fara Filipikaw ka kanuya kan “tuma bɛɛ.” O b’a yira ko an be se ka dɔ fara an ka kanuya kan Jehova koo la. An be se k’o kɛ, an kɛtɔ k’a ɲini ka “lɔnniya ni hakilitigiya” sɔrɔ. N’an tora k’a ɲini ka Jehova lɔn, a koo bena diya an ye kosɔbɛ ani a jogow n’a ka kokɛcogow bena diya an ye. A nege bena kɛ an na kosɔbɛ k’an koo diya a ye ani an tɛna a ɲini ka koo si kɛ min b’a dusu tiɲɛ. An bena an jija sɔbɛ la k’a ɲini k’a sago lɔn ani ka koow kɛ ka kɛɲɛ n’o ye.

5-6. An be se ka dɔ fara an ka kanuya kan cogo di Jehova koo la? A ɲɛfɔ.

⁵ Yezu ye a Faa Jehova ka jogow ladegi cogo dafanin na. O la n’an b’a ɲini ka Yezu lɔn koɲuman, dɔ bena fara an ka kanuya kan Jehova koo la (Eburuw 1:3). An be se ka Yezu lɔn cogo fisaman min na, o ye ka Evanziliw kalan. N’i tɛ Bibulu kalan loon o loon, i be se k’a daminɛ sisan, i kɛtɔ ka Yezu ka maanaw kalan. N’i b’o maanaw kalanna, to ka Yezu jogow kɔrɔsi. A tun ka di mɔgɔw ye ka kɛ ni Yezu ye ani ka kuma n’a ye. Denmisɛnw koo tun ka di a ye ani a tun b’u ta a bolo la (Mariki 10:13-16). Yezu tun b’a ka kalandenw minɛ ni ɲumanya ye ani teriya la. O kama, u tun tɛ siran k’u dusukunnakow fɔ a ye (Mat. 16:22). An b’a lɔn ko Yezu tun be a sankolola Faa ladegi. O b’an dɛmɛ k’a faamu ko a ka di Jehova ye fana an k’an magwɛrɛ a la ani ka kuma n’a ye. An be se k’o kɛ delili la. N’an b’a delila, an be se k’an dusukunnakow bɛɛ fɔ a ye. An b’a lɔn ko a tɛna an jalaki sabu a b’an kanu ani a b’a janto an na.—1 Piyɛri 5:7.

⁶ Yezu tun be hinɛ mɔgɔw la. Ciden Matiyo y’a fɔ ko: “N’a ye jama ye, u hinɛ be don a la, bari u sigɛnnin tun lo, u dusu kasinin tun lo fana. U tun be i ko sagaw, dɛndɛbaga te minw na.” (Mat. 9:36). Nka Jehova do? Yezu y’a fɔ a koo la ko: “Aw Faa min be sankolo la, a t’a fɛ denmisɛn nunu dɔ ka tunu.” (Mat. 18:14). O kumaw be an dusu diya yɛrɛ le! N’an tora ka Yezu lɔn koɲuman, dɔ bena fara an ka kanuya kan Jehova koo la.

7. N’i be wagati kɛ ni kerecɛn kolɔnbagaw ye, o bena i nafa cogo di?

⁷ Balima kolɔnbaga minw be i ka kafo kɔnɔ, a ɲini k’u lɔn ani ka wagati kɛ n’u ye. O la, i bena se ka kanuya yira mɔgɔw la bɛrɛbɛrɛ ani ka ɲɛtaga kɛ Alako ta fan fɛ. A kɔrɔsi o balimaw ninsɔn ka di cogo min na. U y’a latigɛ ka Jehova sago kɛ minkɛ, u tɛ nimisara o la. U ye wale minw sɔrɔ Jehova ka baara la, a ɲini u fɛ u ka u dɔw lakali i ye. N’i ka ɲi ka desizɔnba dɔ ta, ladili ɲini u fɛ. A to i hakili la ko ni  “ladilikɛbaga caaman” be yen, koow be ɲɛ i bolo.—Talenw 11:14.

8. N’i y’a daminɛ ka sigasiga Bibulu kɔnɔnakumaw na, i be se ka mun lo kɛ?

⁸ See sɔrɔ i ka sigasigali kan. I ko an y’a ye  dakun filanan na cogo min na, Sutana bena a ɲini k’i bali i ka ɲɛtaga kɛ Alako ta fan fɛ. A be se k’a kɛ i b’a daminɛ ka sigasiga Bibulu ka kalan dɔw koo la. Misali la, n’a sɔrɔ dɔw bena i lasun i k’a miiri ko Ala lo ma fɛɛnw dan, nka u yɛlɛma yɛlɛmana ka kɛ u yɛrɛ ma le. N’a sɔrɔ i ma deli ka miiri o la i denmisɛn tuma na. Nka komi i be kɔrɔbayara sisan, a be se ka kɛ ko u be aw kalanna o la lakɔliso la. I ka kalanfaw be min fɔ o koo la, n’a sɔrɔ i b’a miiri ko o bɛnnin lo. Nka, a be se ka kɛ ko u m’a ɲini k’a lɔn fewu ni Danbaga dɔ be yen. Sariyakolo min be sɔrɔ Talenw 18:17 kɔnɔ, i hakili to o la. A fɔra yen ko: “Kititigɛyɔrɔ la, mɔgɔ min be kɔn ka kuma, ale ta bɔnin be tiɲɛ ma, fɔɔ n’a kɛlɛkɛɲɔgɔn nana kuma tuma min na.” U b’i kalan koo minw na lakɔliso la, sanni i ka la u bɛɛ la, a ɲini ka sɛgɛsɛgɛri kɛ k’a filɛ Ala ka Kuma be min fɔ o koo la. Sɛgɛsɛgɛri kɛ an ka gafew kɔnɔ. Sanni u ka kɛ Jehova Seerew ye, an balima minw tun lanin b’a la ko fɛɛnw lo yɛlɛma yɛlɛmana, baro kɛ n’olu ye. U ɲininga fɛɛn min y’a to u lara a la ko Danbaga kanutigi dɔ be yen. O barow ɲɔgɔn be se k’i dɛmɛ ka daliluw sɔrɔ minw b’a yira ko Danbaga be yen.

9. I be kalan juman lo sɔrɔ Melissa ka koo la?

⁹ Balimamuso Melissa ye sɛgɛsɛgɛri kɛ danfɛnw koo la ani o y’a nafa kosɔbɛ. b A ko: “Lakɔliso la, kalanfaw b’a ɲɛfɔ ko fɛɛnw yɛlɛma yɛlɛmana ka kɛ u yɛrɛ ma. U b’o ɲɛfɔ cogo dɔ la min b’a to mɔgɔ b’a miiri ko tiɲɛn lo. A daminɛ na, n’ tun t’a fɛ ka sɛgɛsɛgɛri kɛ sabu n’ tun be siranna ko n’ bena a ye k’o kalan ye tiɲɛn lo ye. Nka, n’ miirila k’a ye ko Jehova b’a fɛ an ka limaniya ka basigi daliluw lo kan. O kama, n’ y’a daminɛ ka sɛgɛsɛgɛri kɛ. N’ ye gafe nin kalan: Y a-t-il un Créateur qui se soucie de vous ? N’ ye kitabunin nunu fana kalan: La vie a-t-elle été créée ? ani Cinq questions à se poser sur l’origine de la  vie. N’ mako tun b’o lo la jaatika. N’ tun be n’ yɛrɛ ɲiningara mun na n’ ma kɔn k’o kɛ?”

10-11. Mun lo be se k’i dɛmɛ i saniyanin ka to tagamacogo ta fan fɛ? (1 Tesalonikaw 4:3, 4).

¹⁰ Ban kakalayako sifa bɛɛ ma. N’i ye kanbele wala sunguru ye, cɛnimusoko nege be se ka gwan i la kosɔbɛ. Tuma dɔw la fana, mɔgɔw be se k’i lasun i ka kakalaya kɛ. Sutana b’a fɛ i k’o lo kɛ. Mun lo be se k’i dɛmɛ i saniyanin ka to tagamacogo ta fan fɛ? (1 Tesalonikaw 4:3, 4 kalan). I dusukunnakow fɔ Jehova ye delili la ani a ɲini a fɛ a k’i barika bonya (Mat. 6:13). A to i hakili la ko Jehova t’a fɛ k’i jalaki, nka a b’a fɛ k’i dɛmɛ le (Zab. 103:13, 14). Bibulu be se k’i dɛmɛ fana. Melissa min kofɔra ka tɛmɛ, ale ye bondori kɛ walisa ka kakalaya miiriyaw kɛlɛ. A ko: “N’ tun be Bibulu kalan loon o loon minkɛ, o ye n’ dɛmɛ ka see sɔrɔ n’ ka miiriya juguw kan. O ye n’ hakili jigi ko n’ ye Jehova ta ye ani ko n’ b’a fɛ k’a sago kɛ n’ ka ɲɛnamaya kuru bɛɛ la.”—Zab. 119:9.

¹¹ Kana a ɲini k’i ka gwɛlɛyaw ɲɛnabɔ i kelen. Kuma i bangebagaw fɛ. Tiɲɛn lo ko a man nɔgɔ ka kuma o koo la sabu o be maloya bila mɔgɔ la. Nka, a kɔrɔtanin lo i k’o kɛ. Melissa ko: “N’ ye Jehova deli a ka jagwɛlɛya di n’ ma ani o kɔ, n’ kumana n’ facɛ fɛ n’ ka gwɛlɛya koo la. N’ y’o kɛ minkɛ, n’ hakili sigira kosɔbɛ. N’ y’a lɔn ko Jehova dusu diyara n’ kɔrɔ.”

12. Mun lo be se k’i dɛmɛ ka desizɔn ɲumanw ta?

¹² A to Bibulu ka sariyakolow k’i ɲɛminɛ. I kɔrɔbayatɔ, i bangebagaw bena a to i ka desizɔnw ta i yɛrɛ ma. Nka, i bele tɛ koo caaman lɔn. Koo min be se ka ele ni Jehova ka jɛnɲɔgɔnya nagasi, i be se k’i yɛrɛ tanga o ma cogo di? (Talenw 22:3). Balimamuso Kari y’a ɲɛfɔ fɛɛn min y’a dɛmɛ ka desizɔn ɲumanw ta. A y’a faamu ko kerecɛn kolɔnbagaw mako tɛ sariya dɔ la koo bɛɛ la. A ko: “N’ tun ka ɲi k’a ɲini ka Bibulu ka sariyakolow lo faamu sanni ka tugu sariyaw kɔ ten dɔrɔn.” Bibulu kalantɔ, i yɛrɛ ɲininga ko: “Jehova be koow jati cogo min na, vɛrise nin be mun lo yira n’ na o koo la? Yala sariyakolow be sɔrɔ a kɔnɔ minw be se ka n’ dɛmɛ ka koo tilennin kɛ wa? N’o lo, ni n’ y’u sira tagama, o bena n’ nafa cogo di?” (Zab. 19:8; Ezayi 48:17, 18). N’i be Bibulu kalan ani ka miiri a ka sariyakolow kan, i bena a ye ko a man gwɛlɛ ka desizɔnw ta minw be Jehova dusu diya. N’i tora ka ɲɛtaga kɛ Alako ta fan fɛ, i bena a ye ko i mako tɛ sariya la koo bɛɛ la sabu i bena Jehova ka miiriya lɔn.

13. Teri ɲumanw be se ka nɔɔ juman lo to i kan? (Talenw 13:20).

¹³ Teriw sugandi minw be Jehova kanu. I ko an y’a ye ka tɛmɛ cogo min na, i be teri minw sugandi u be se k’i dɛmɛ wala k’i bali ka ɲɛtaga kɛ Alako ta fan fɛ (Talenw 13:20 kalan). Balimamuso dɔ tɔgɔ ko Sara ani a ka ninsɔndiya tun be nagasira. O kɔ, koo dɔ kɛra min y’a dɛmɛ ka koow filɛ ni ɲɛɛ ɲuman ye. A ko: “N’ ye teri ɲumanw sɔrɔ wagati bɛnnin na. Ne ni balima sunguru dɔ y’a daminɛ ka Kɔrɔsili Sangaso sɛgɛsɛgɛ ɲɔgɔn fɛ lɔgɔkun o lɔgɔkun. N’ teri wɛrɛ ye n’ dɛmɛ n’ y’a daminɛ ka lakalitaw kɛ lajɛnw na. N’ teriw ka dɛmɛ barika la, n’ y’a daminɛ ka kelenna kalan ani delili ta sɔbɛ la. N’ y’a daminɛ ka jɛnɲɔgɔnya  barikaman kɛ ni Jehova ye ani n’ ye ninsɔndiya sɔrɔ kokura.”

14. Julien ye teri ɲumanw sɔrɔ cogo di?

¹⁴ Teri minw bena nɔɔ ɲuman to i kan, i be se k’olu sɔrɔ cogo di? Julien ye diinan mɔgɔkɔrɔ ye sisan ani a ko: “N’ kanbele tuma, waajuli kɛtɔ ni balimaw ye, n’ ye teri ɲumanw sɔrɔ. U tun kisɛyanin lo ani u ye n’ dɛmɛ n’ y’a ye ko waajuli baara be se ka mɔgɔ ninsɔn diya kosɔbɛ! N’ y’a latigɛ ko n’ bena kudayi cidenya baara kɛ. N’ y’a faamu fana ko n’ kɛtɔ ka n’ filankuruw dɔrɔn kɛ n’ teriw ye, o tun y’a to n’ be fɔnna teri ɲumanw na. Kɔfɛ, n’ ye teri ɲumanw sɔrɔ fana Betɛli la. U ka ɲɛyirali ye n’ dɛmɛ n’ ye ɲɛnagwɛko ɲumanw sugandi ani n’ ye n’ magwɛrɛ kosɔbɛ Jehova la.”

15. Pol ye ladili juman lo di Timote ma? (2 Timote 2:20-22).

¹⁵ N’i y’a ye ko kafoden dɔ ka teriya be se k’i ka jɛnɲɔgɔnya nagasi ni Jehova ye do? Saan kɛmɛkulu fɔlɔ la, Pol tun b’a lɔn ko kafoden dɔw tun tɛ koow jati wala ka koow kɛ i ko kerecɛnw. O lo kama, a ye Timote ladi ko a k’a yɛrɛ kɔrɔsi u ma (2 Timote 2:20-22 kalan). An be jɛnɲɔgɔnya min kɛra ni Jehova ye, o nafa ka bon. An ye jijalibaw lo kɛ walisa k’o jɛnɲɔgɔnya sigi n’an sankolola Faa ye. O kama, an t’a fɛ mɔgɔ si k’o jɛnɲɔgɔnya nagasi.—Zab. 26:4.

16. I ka ɲi ka laɲinita sifa jumanw lo latigɛ i yɛrɛ ye?

¹⁶ Laɲinita ɲumanw latigɛ. Laɲinita minw bena i ka limaniya barika bonya ani k’i dɛmɛ ka ɲɛtaga kɛ, olu lo latigɛ (Efɛz. 3:16). Misali la, i be se k’a latigɛ k’i ka Bibulu kalangwɛ ani i ka kelenna kalan kɛcogo fisaya (Zab. 1:2, 3). Wala i be se k’i jija ka delili kɛ tuma o tuma ani k’i ka delili kɛcogo fisaya. I be ɲɛnagwɛkow sugandi ani i be baara kɛ n’i ka wagati ye cogo min na, n’a sɔrɔ i ka ɲi k’i janto o la (Efɛz. 5:15, 16). Ni Jehova y’a ye ko i b’i jijara kosɔbɛ ka ɲɛtaga kɛ, a dusu bena diya i kɔrɔ.

17. N’i be tɔɔw dɛmɛ, i bena nafa juman lo sɔrɔ?

¹⁷ N’i be tɔɔw dɛmɛ, i bena kɛ kerecɛn  kolɔnbaga ye. Yezu ko: “Nisɔndiya be mɔgɔ sɔnni na ka tɛmɛ sɔrɔli kan.” (Kɛw. 20:35). Kanbele wala sunguru, n’i be i ka wagati ani i ka fanga kɛ ka tɔɔw dɛmɛ, i bena ninsɔndiyaba sɔrɔ o la. Misali la, balima mɔgɔkɔrɔbaw wala farikolodɛsɛ be minw na i ka kafo kɔnɔ, i be se k’a latigɛ k’olu dɛmɛ. I be se ka taga sanni kɛ u ye wala k’u degi baara kɛcogo la n’u ka telefɔni, tablɛti wala a ɲɔgɔnnaw ye. N’i ye balimacɛ ye, a latigɛ ka kɛ kɔrɔsigi ciden ye walisa k’i balimaw dɛmɛ bɛrɛbɛrɛ (Filip. 2:4). I be se k’a yira ko i be kiinmɔgɔw fana kanu, i kɛtɔ ka Masaya kibaro diiman fɔ u ye (Mat. 9:36, 37). N’i be se, a latigɛ ka kudayi cidenya baara dɔ kɛ.

18. Kudayi cidenya baara be se k’i dɛmɛ cogo di ka ɲɛtaga kɛ Alako ta fan fɛ?

¹⁸ Kudayi cidenya baara be se ka sababu caaman d’i ma ka ɲɛtaga kɛ. N’i ye piyɔniye ye, o be se ka sababu di i ma ka Masaya waajulikɛlaw ka lakɔli kɛ, ka baara kɛ Betɛli la wala ka dɛmɛ don Masaya Boonw n’a ɲɔgɔnnaw lɔli baara la. Balima sunguru dɔ tɔgɔ Kaitlyn, piyɔniye lo ani a ko: “N’ batizenin kɔ, n’ kɛtɔ ka waajuli kɛ ni balima kolɔnbagaw ye, o ye n’ dɛmɛ kosɔbɛ ka ɲɛtaga kɛ Alako ta fan fɛ. U ka ɲɛyirali ye n’ lasun ka Bibulu sɛgɛsɛgɛ kosɔbɛ ani ka mɔgɔw kalancogo fisaya.”

19. N’i tora ka ɲɛtaga kɛ Alako ta fan kɛ, i bena duga jumanw lo sɔrɔ?

¹⁹ Kanbele wala sunguru, n’i tora ka ɲɛtaga kɛ Alako ta fan fɛ, i bena duga caaman sɔrɔ. I tɛna i fanga tiɲɛ ka tugu laɲinita dɔw kɔ nafa tɛ minw na (1 Zan 2:17). Desizɔn juguw be na ni dusukasi min ye, i bena i yɛrɛ tanga o ma. I ka koow bena ɲɛ i bolo ani i bena ninsɔndiya sɔbɛ sɔrɔ (Talenw 16:3). I ka ɲɛyirali ɲuman bena i kerecɛnɲɔgɔnw bɛɛ jija, denmisɛnw fara mɔgɔkɔrɔbaw kan (1 Tim. 4:12). Min yɛrɛ kɔrɔtanin lo kosɔbɛ, o ye ko i hakili bena sigi ani i bena ninsɔndiya sɔrɔ. Mun na do? Sabu Jehova dusu ka di i kɔrɔ ani i be jɛnɲɔgɔnya teriman kɛra n’a ye.—Talenw 23:15, 16.