BAROKUN KALANTA KAFO KƆNƆ 4
An be jijali minw kɛ ka taga Hakilijigi lajɛn na, Jehova b’an duga o kosɔn
“Aw ye to ka nin kɛ k’aw hakili to ne la.”—LUKA 22:19.
DƆNKILI 19 Le Repas du Seigneur (Matigi ka Surafana)
BAROKUN KƆNƆNAKOW a
1-2. Mun na an be taga Hakilijigi lajɛn na saan o saan?
Yezu ye a niin di an kosɔn. O be sababu di an ma ka ɲɛnamaya banbali sɔrɔ. A ka suu laban na dugukolo kan, Yezu ye cii di a ka kalandenw ma ko u k’u hakili jigi ale ka kanuya wale la cogo nɔgɔman na ni buru ni diwɛn ye.—1 Kor. 11:23-26.
2 An b’o cikan labato sabu an be Yezu kanu kosɔbɛ (Zan 14:15). Yezu ka saya b’an nafa cogo min na, saan o saan Yezu saya Hakilijigi wagati la, an b’an ka waleɲumanlɔn yira, an kɛtɔ ka wagati ta ka miiri ani ka delili kɛ o koo la. A ka di an ye fana k’an seen don bɛrɛbɛrɛ waajuli la walisa ka mɔgɔ caamanba weele u ka na fara an kan o koo kɛrɛnkɛrɛnnin na. Tiɲɛn na, an b’a fɛ k’an jija walisa koo si kana an bali ka taga Hakilijigi lajɛn na.
3. An bena mun lo lajɛ barokun nin na?
3 Barokun nin na, an bena koo saba lajɛ o minw na Jehova sagokɛlaw be to ka jijalibaw kɛ walisa k’u hakili jigi Yezu ka saya la: 1) Ka Hakilijigi lajɛn kɛ i ko Yezu y’a kɛ cogo min na, 2) Ka mɔgɔ wɛrɛw weele ka na Hakilijigi lajɛn na ani 3) Ka Hakilijigi lajɛn kɛ gwɛlɛyaw bɛɛ n’a ta.
AN BE HAKILIJIGI LAJƐN KƐ I KO YEZU Y’A KƐ COGO MIN NA
4. Saan o saan Hakilijigi lajɛn na, u b’an hakili jigi tiɲɛnkalan jumanw lo la? Mun na an ka ɲi k’o tiɲɛnkalanw jati fɛɛn nafamanbaw ye? (Luka 22:19, 20).
4 Saan o saan Hakilijigi lajɛn na, an be kalan dɔ lamɛn min basiginin lo Bibulu kan. O kalan be ɲiningali dɔw jaabi i n’a fɔ: Mun na adamadenw mako be kunmabɔsara la? Mɔgɔ kelen ka saya be se ka kɛ sababu ye cogo di mɔgɔ caaman ka jurumuw be yafa? U b’an hakili jigi buru ni diwɛn ye fɛɛn minw tagamasiɲɛ ye ani mɔgɔ minw ka ɲi k’o buru dumu ani k’o diwɛn min (Luka 22:19, 20 kalan). Minw ka jigiya ye ka ɲɛnamaya kɛ dugukolo kan fɔɔ abada, olu bena duga minw sɔrɔ, an be miiri o la (Ezayi 35:5, 6; 65:17, 21-23). An ka ɲi k’o tiɲɛn kalanw jati fɛɛn nafamanbaw ye. Mɔgɔ miliyari caaman t’o tiɲɛn kalanw lɔn ani u t’a faamu nafaba min be Yezu ka saraka la. U fana tɛ Hakilijigi lajɛn kɛ i ko Yezu y’a kɛ cogo min na. Mun na do?
5. Cidenw fanba sanin kɔ, mɔgɔ caaman y’a daminɛ ka Yezu saya Hakilijigi lajɛn kɛ cogo di?
5 Dɔɔni Yezu ka cidenw fanba sanin kɔ, kerecɛn tɔgɔtigiw y’a daminɛ ka don kafo kɔnɔ (Mat. 13:24-27, 37-39). U tun be “to ka galon tigɛ, waasa ka kalandenw caaman sama ka tugu u yɛrɛ kɔ.” (Kɛw. 20:29, 30). O “galon” dɔ ye ko Yezu m’a “yɛrɛ saraka siɲɛ kelen, ka mɔgɔ bɛɛ ka hakɛw yafa” i ko Bibulu b’a fɔ cogo min na (Eburuw 9:27, 28). Olu fɛ, o saraka ka ɲi ka to ka kɛ tuma o tuma. Bi, mɔgɔ kɔnɔgwɛ caaman lanin b’o ngalon kalan na. U be taga legilizi la lɔgɔkun o lɔgɔkun wala loon o loon walisa k’u hakili jigi Yezu ka saya koo la. Katolikiw b’o lo weele ko “kominiyɔn.” b Diinan jɛnkulu wɛrɛw tɛ Yezu ka saya hakilijigiko kɛ siɲɛ caaman na ten. Nka, u ka diinandenw fanba t’a faamu Yezu ka saraka kɔrɔ ye min ye. N’a sɔrɔ dɔw b’u yɛrɛ ɲininga ko: “Yala Yezu saya be se k’a to tiɲɛn na n’ ka jurumuw be yafa wa?” Mun na u b’u yɛrɛ ɲininga o la? Sabu mɔgɔ minw b’a fɔ ko Yezu ka saya tɛ se k’a to an ka jurumuw be yafa, olu ka miiriyaw ye nɔɔ to u kan. Yezu ka kalanden sɔbɛw ye tiɲɛn faamu o koo la cogo di ani ka o kofɔ mɔgɔw ye?
6. Saan 1872, Bibulu kalandenw jɛnkulu dɔ ye mun lo faamu?
6 Saan kɛmɛkulu 19nan laban fan fɛ, Charles Taze Russell ye Bibulu kalandenw jɛnkulu dɔ ɲɛminɛ u y’a daminɛ ka Bibulu sɛgɛsɛgɛ koɲuman. U tun b’a fɛ ka tiɲɛn lɔn Yezu ka saraka nafa koo la ani cogo min na an ka ɲi k’an hakili jigi a ka saya koo la. Saan 1872, u y’a faamu ko Yezu y’a yɛrɛ di tiɲɛn na ka kɛ adamadenw bɛɛ kunmabɔsara ye. U ye min faamu u y’o kofɔ mɔgɔ wɛrɛw ye gafew, kunnafoni sɛbɛw ani zurunaliw sababu fɛ. Ani dɔɔni o kɔ, u y’a daminɛ ka Yezu saya Hakilijigi lajɛn kɛ siɲɛ kelenpe saan kɔnɔ i ko saan kɛmɛkulu fɔlɔ kerecɛnw.
7. O Bibuu kalandenw ka sɛgɛsɛgɛriw b’an nafa cogo di bi?
7 O kerecɛn sɔbɛw ye sɛgɛsɛgɛri minw kɛ a saan caaman ye nin ye, an be nafa sɔrɔla o la bi. Cogo di do? Jehova y’an dɛmɛ k’a faamu Yezu ka saraka kɔrɔ ye min ye ani a b’an nafa cogo min na (1 Zan 2:1, 2). An y’a faamu fana ko minw be Ala sago kɛ, Bibulu b’a fɔ ko jigiya fila lo be olu ye. Dɔw bena ɲɛnamaya banbali kɛ sankolo la ani mɔgɔ miliyɔn caaman bena ɲɛnamaya banbali kɛ dugukolo kan. Jehova b’an kanu cogo min na ani an be nafa caaman minw sɔrɔ Yezu ka saraka la, n’an miirila o la, o b’a to an b’an magwɛrɛ kosɔbɛ Jehova la (1 Piyɛri 3:18; 1 Zan 4:9). O la, i ko balima kantigi minw kɔnna an ɲɛ, an be mɔgɔ wɛrɛw weele u ka na Hakilijigi lajɛn kɛ n’an ye i ko Yezu y’a kɛ cogo min na.
AN BE MƆGƆW WEELE KA NA HAKILIJIGI LAJƐN NA
I be se ka mun lo kɛ walisa k’i seen don bɛrɛbɛrɛ Hakilijigi lajɛn Kanpaɲi na? (dakun 8-10nan lajɛ). e
8. Jehova sagokɛlaw ye mun lo kɛ walisa ka mɔgɔ wɛrɛw weele ka na Hakilijigi lajɛn na? (Jaa lajɛ.)
8 Kabi saan caaman, Jehova sagokɛlaw be mɔgɔ wɛrɛw weele ka na Hakilijigi lajɛn na. Saan 1881, a ɲinina Etazi balimaw fɛ u ka ɲɔgɔn lajɛn balimacɛ dɔ ka soo Alegeni dugu la, Pɛnnsilvani mara la walisa ka Hakilijigi lajɛn kɛ. Kɔfɛ, kafo kelen kelen bɛɛ tora ka Hakilijigi lajɛn kɛ. Saan 1940 marisikalo la, a fɔra weleweledalaw ye ko u ka kiinmɔgɔ minw b’u mako don kibaro diiman na, u be se k’olu weele ka na o lajɛn na. Saan 1960, Betɛli ye welelisɛbɛw dilan k’u di kafow ma a siɲɛ fɔlɔ la. Kabi o wagati, Hakilijigi lajɛn welelisɛbɛ miliyari caaman lo tilan tilanna ka di mɔgɔw ma. Mun na an be jijaliba kɛ ten ka mɔgɔw weele ka na Hakilijigi lajɛn na?
9-10. An be jɔnw lo weele ka na Hakilijigi lajɛn na ani u be nafa juman lo sɔrɔ o la? (Zan 3:16).
9 An be mɔgɔw weele u ka na Hakilijigi lajɛn kɛ n’an ye. Kuun minw kama an b’o kɛ, u dɔ ye ko minw be na u siɲɛ fɔlɔ la, an b’a fɛ u k’a faamu Jehova ni Yezu ye min kɛ an bɛɛ ye (Zan 3:16 kalan). An jigi b’a la ko u bena min ye ani ka min mɛn, o bena u lasun k’a ɲini ka dɔ lɔn tugun ani ka kɛ Jehova batobagaw ye. Nka o lajɛn be mɔgɔ wɛrɛw nafa fana.
10 Minw tɛ Jehova sago kɛra tugun, an be olu fana weele ka na Hakilijigi lajɛn na walisa k’u hakili jigi ko Ala bele b’u kanu. U caaman be sɔn an ka weeleli la ani an dusu ka di kosɔbɛ k’u ye. U kɛtɔ ka na Hakilijigi lajɛn na, o be u hakili jigi u ninsɔn tun ka di cogo min na Jehova sago kɛli la. An ka Monica ka koo lajɛ. c A kɛra weleweledala ye kokura COVID-19 fɔɲɔbana tuma na. A nana saan 2021 Hakilijigi lajɛn na ani o kɔ a y’a fɔ ko: “Nin kɛra Hakilijigi lajɛn kɛrɛnkɛrɛnnin ye ne fɛ. Saan 20 kɔnɔ, n’ siɲɛ fɔlɔ tun lo ka mɔgɔw waaju ani k’u weele ka na Hakilijigi lajɛn na. N’ y’o kɛ ni n’ dusu bɛɛ ye sabu Jehova ni Yezu ye min kɛ ne ye n’ b’u waleɲuman lɔn kosɔbɛ o kosɔn.” (Zab. 103:1-4). Mɔgɔw sɔnna ka na wo, u ma sɔn ka na wo, an b’an jija ka mɔgɔ wɛrɛw weele ka na Hakilijigi lajɛn na sabu an b’a lɔn ko an be jijali minw kɛra, o ka di Jehova ye.
11. An ye jijali minw kɛ ka mɔgɔw weele ka na Hakilijigi lajɛn na, Jehova y’an duga o kosɔn cogo di? (Aze 2:7).
11 An ye jijali minw kɛ ka mɔgɔw weele ka na Hakilijigi lajɛn na, Jehova y’an duga kosɔbɛ o kosɔn. Saan 2021, an tun tɛ se ka waajuli kɛ i ko fɔlɔ la COVID-19 fɔɲɔbana kosɔn. O bɛɛ n’a ta, mɔgɔ 21 367 603 lo nana Hakilijigi lajɛn na. Bɛrɛ m’o jɛn Jehova Seerew bɛɛ hakɛ sigiyɔrɔma fila ni tilan na! Mɔgɔ hakɛ min nana Hakilijigi lajɛn na, Jehova t’o dɔrɔn lo filɛ. A b’a mako don u kelen kelen bɛɛ la fana (Luka 15:7; 1 Tim. 2:3, 4). An be mɔgɔw weele ka na Hakilijigi lajɛn na minkɛ, an lanin b’a la ko Jehova be tɛmɛ o fɛ k’an dɛmɛ ka mɔgɔ kɔnɔgwɛw sɔrɔ.—Aze 2:7 kalan.
AN BE HAKILIJIGI LAJƐN KƐ GWƐLƐYAW BƐƐ N’A TA
An be jijali minw kɛ walisa ka Hakilijigi lajɛn kɛ, Jehova b’an duga o kosɔn (dakun 12nan lajɛ). f
12. Mun lo be se k’a to a be gwɛlɛya an ma ka Hakilijigi lajɛn kɛ? (Jaa lajɛ.)
12 Yezu tun kɔnna k’a fɔ ko laban loonw na, an bena gwɛlɛya sifaw bɛɛ sɔrɔ. U dɔw ye nunu ye: kɔrɔbɔliw, marifakɛlɛw, fɔɲɔbanaw, an somɔgɔw b’an kɛlɛ ani gwɛlɛya wɛrɛw (Mat. 10:36; Mariki 13:9; Luka 21:10, 11). Tuma dɔw la, o koow b’a to a be gwɛlɛya an ma ka Hakilijigi lajɛn kɛ. An balimaw ye mun lo kɛ walisa ka see sɔrɔ o gwɛlɛyaw kan ani Jehova y’u dɛmɛ cogo di?
13. Ka Artem to kaso la, a y’a jaa gwɛlɛya ani ka jijaliba kɛ walisa ka Hakilijigi lajɛn kɛ. Jehova y’a duga cogo di o kosɔn?
13 Kaso la. U ye an balima minw don kaso la u ka limaniya kosɔn, olu b’u seko bɛɛ kɛ ka Hakilijigi lajɛn kɛ. An ka Artem ka koo lajɛ. Saan 2020, Krista saya Hakilijigi wagati la, u tun y’a datugu kasobon dennin dɔ kɔnɔ. Kasoden 5 ɲɔgɔn lo tun be datugu o boon dennin kɔnɔ. Hali k’a to kaso la, a sera ka fɛɛn dɔw sɔrɔ k’u kɛ i n’a fɔ buru ni diwɛn. A y’a latigɛ ka Hakilijigi lajɛn kalan kɛ a yɛrɛ ye. Nka, a kasodenɲɔgɔnw tun be sigarɛti min kojugu ani u tun be kuma nɔgɔninw dama lo fɔ. A ye mun lo kɛ do? A y’u deli n’u be se ka sigarɛtimin ni kuma nɔgɔninw dabila lɛri kelen dɔrɔn kɔnɔ. A barila Artem na k’a ye ko u sɔnna o ma. Artem ko: “N’ y’a fɔ u ye ko n’u sɔnna, n’ bena Hakilijigi lajɛn koo ɲɛfɔ u ye.” U ma sɔn. Nka tuma min na u ye Artem ye a be Hakilijigi lajɛn kɛra ani u y’a ka kalan lamɛn, u ye ɲiningali caaman kɛ o koo la.
14. Jehova sagokɛlaw ye Hakilijigi lajɛn kɛ cogo di COVID-19 fɔɲɔbana bɛɛ n’a ta?
14 COVID-19 fɔɲɔbana. O fɔɲɔbana kosɔn, Jehova sagokɛlaw tun tɛ se ka lajɛn ɲɔgɔn fɛ ka Hakilijigi lajɛn kɛ. Nka, o ma u bali k’o lajɛn kɛ. d Yɔrɔ minw na ɛntɛrɛnɛti be yen, kafow ye Hakilijigi lajɛn kɛ vidéoconférence sababu fɛ. Nka mɔgɔ miliyɔn caaman minw tɛ ni ɛntɛrɛnɛti ye do? Jamana dɔw la, labɛnw kɛra walisa mɔgɔw ka Hakilijigi lajɛn forobakalan lamɛn arajo wala telewisɔn na. Ka fara o kan, tɔnbolow ye Hakilijigi lajɛn kalankɛlaw kaan ta kaan 500 ni kɔ la walisa mɔgɔ minw be yɔrɔjanw na, olu ka se ka Hakilijigi lajɛn kɛ. O kɔ, balima dɔw tagara o anrezistremanw di balimaw ma o yɔrɔw la.
15. I be kalan juman lo sɔrɔ Bibulu kalanden dɔ koo la min tɔgɔ ko Sue?
15 N’an somɔgɔw b’an kɛlɛla. A man nɔgɔ fewu dɔw ma ka taga Hakilijigi lajɛn na sabu u somɔgɔw be u kɛlɛ. An ka Bibulu kalanden dɔ ka koo lajɛ min tɔgɔ ko Sue. Saan 2021, loon kelen ka kɔn Hakilijigi lajɛn ɲɛ, a y’a fɔ a ka Bibulu kalanfa ye ko ale sɔmɔgɔw b’a kɛlɛla minkɛ, a tɛna se ka taga o lajɛn na. A ka Bibulu kalanfa ye Luka 22:44 kalan. O kɔ, a y’a ɲɛfɔ Sue ye ko ni gwɛlɛyaw be an ka, an ka ɲi ka Yezu ladegi an kɛtɔ ka Jehova deli ani k’an jigi bɛɛ la a kan. O loon dugusagwɛ, Sue ye Hakilijigi lajɛn tagamasiɲɛw labɛn ani sɔgɔma batoli kɛrɛnkɛrɛnnin min be sɔrɔ jw.org kan, a y’o videwo filɛ. O loon sufɛ, k’a kelen n’a kelen to a ka boon kɔnɔ, a farala balimaw na telefɔni sababu fɛ ka Hakilijigi lajɛ kɛ. O kɔ, Sue y’a ka Bibulu kalanfa sɛbɛ ko: “I ye ne jija kosɔbɛ kunu. N’ ye n’ seko bɛɛ kɛ walisa ka Hakilijigi lajɛn kɛ ani Jehova ye n’ dɛmɛ. O ye n’ ninsɔn diya yɛrɛ le ani n’ be Jehova waleɲuman lɔn cogo min na o kosɔn, a tɛ se ka fɔ!” Ni Sue ka gwɛlɛya ɲɔgɔn b’i kan, yala i t’a miiri ko Jehova be se ka ele fana dɛmɛ wa?
16. An be jijali minw kɛ ka taga Hakilijigi lajɛn na, mun na an lanin b’a la ko Jehova bena an duga o kosɔn? (Ɔrɔmukaw 8:31, 32).
16 An be jijali minw kɛ walisa k’an hakili jigi Yezu saya koo la, o ka di Jehova ye kosɔbɛ. A ye min kɛ an ye, n’an b’a waleɲuman lɔn o kosɔn, siga t’a la a bena an duga (Ɔrɔmukaw 8:31, 32 kalan). O la do, an k’an jija ka taga ɲina ka Hakilijigi lajɛn na. An k’an cɛsiri fana ka caaman kɛ Jehova ka baara la o wagati la.
DƆNKILI 18 Débordants de gratitude pour la rançon (Waleɲumanlɔn, kunmabɔsara koo la)
a Saan 2023, talatalon awirilikalo tile 4nan na, mɔgɔ miliyɔn caaman bena ɲɔgɔn lajɛn duniɲa kuru bɛɛ kɔnɔ walisa k’u hakili jigi Yezu Krista ka saya la. A bena kɛ mɔgɔ caaman siɲɛ fɔlɔ ye ka na o lajɛn na. Minw ye Jehova sago kɛli dabila ani u ma Hakilijigi lajɛn kɛ n’an ye a saan caaman ye nin ye, olu dɔw fana bena kɛ yen. Dɔw bena na gwɛlɛyabaw bɛɛ n’a ta. I ka koow cogoya mana kɛ min o min ye, i bena jijali minw kɛ walisa ka kɛ yen, o bena diya Jehova ye.
b O mɔgɔw b’a miiri ko Yezu saya hakilijgiko sen fɛ, buru be yɛlɛma ka kɛ Yezu farisogo ye ani diwɛn be yɛlɛma ka kɛ a joli ye. Olu fɛ, tuma o tuma ni mɔgɔ dɔ y’o buru dumu ani k’o diwɛn min, a be komi Yezu ye a farisogo n’a joli saraka kokura.
c Tɔgɔ dɔw yɛlɛmana.
d Barokun dɔw lajɛ fana jw.org kan yɔrɔ nin na: “Le Mémorial de 2021.”
