1-2. a) N’an be miiri Yezu ka ɲɛnamaya ani a ka cidenya baara la, o be mun lo kɛ an na? b) An bena mun lo ye barokun nin na?

 N’AN ka mɔgɔ kanulen dɔ sara, a tigi ɲɛnafin b’an minɛ kosɔbɛ! A daminɛ na, n’a sɔrɔ n’i miirila koo minw kɛra ka kɔn a saya ɲɛ, i dusu be kasi kosɔbɛ sanko n’a tigi tɔɔrɔla ka sɔrɔ ka sa. Nka wagatiw tɛmɛtɔ, n’i miirila koo nunu na, o b’i ninsɔndiya kokura: a tigi y’an kalan min na, a ye min fɔ wala a ye min kɛ k’an jija wala k’an bila yɛlɛmisɛn na.

² O cogo kelen na, Yezu tɔɔrɔla cogo min na ka sɔrɔ ka sa, n’an y’o kalan, o b’an dusu kasi yɛrɛ le. Yezu saya Hakilijigi tuma na yɛrɛ le an be wagati ta ka miiri a ka kunmabɔ saraka nafa koo la (1 Kor. 11:24, 25). Ka fara o kan, Yezu ye koo minw bɛɛ kɛ ani a ye min bɛɛ fɔ k’a to dugukolo kan, n’an miirila o la, o b’an ninsɔndiya kosɔbɛ. A be min kɛra an ye bi bi nin na ani a bena min kɛ an ye sini ma, n’an miirila o la fana o b’an jija yɛrɛ le. N’an be miiri o koow la ani a b’an kanu cogo min na, o b’an lasun k’a yira a la cogo caaman na ko an b’a waleɲuman lɔn. An yɛrɛ bena o lo ye barokun nin na.

3. Kuun jumanw lo kama an ka ɲi ka Jehova ni Yezu waleɲuman lɔn kunmabɔsara kosɔn?

³ N’an miirila Yezu ka ɲɛnamaya n’a ka saya koo la, an tɛ se n’an m’a waleɲuman lɔn. Ala ka Masaya bena duga minw lase adamadenw ma, Yezu ye mɔgɔw kalan o koo la tuma min na a tun be dugukolo kan. O tiɲɛnkalanw ka di an ye kosɔbɛ. An be Jehova ni Yezu waleɲuman  lɔn kunmabɔsara kosɔn sabu o be sababu di an ma ka jɛnɲɔgɔnya ɲuman kɛ n’u ye. Minw b’a yira k’u limaniyanin be Yezu la, olu be ni ɲɛnamaya banbali jigiya ye fana. U ka mɔgɔ kanulen minw sara, u jigi b’a la k’u bena segi k’u ye tugun (Zan 5:28, 29; Ɔrɔm. 6:23). An man kan n’o dugaw ye. Ani fana, Ala ani Krista ye min kɛ an ye, an tɛna se abada k’u sara o kosɔn (Ɔrɔm. 5:8, 20, 21). Nka an be se k’a yira u la ko an b’u waleɲuman lɔn yɛrɛ le! Cogo di do?

4. Magadala Mariyamu y’a yira cogo di ko a be Yezu waleɲuman lɔn? (Jaa lajɛ.)

⁴ An ka Yahutumuso dɔ ka koo lajɛ. A tɔgɔ ko Magadala Mariyamu. Jina wolonfila tun b’o muso la ani u tun b’a tɔɔrɔla yɛrɛ le. N’a sɔrɔ a tun b’a miiri ko mɔgɔ tɛ yen min be se k’ale dɛmɛ. O la, miiri k’a filɛ a ye Yezu waleɲuman lɔn cogo min na tuma min na a ye o jinaw gwɛn ka bɔ a la! O waleɲumanlɔn lo y’a lasun ka kɛ Yezu ka kalanden dɔ ye ani k’a ka wagati, a fanga n’a bololafɛnw kɛ ka Yezu dɛmɛ a ka cidenya baara la (Luka 8:1-3). Yezu ye min kɛ Mariyamu ye, a y’a waleɲuman lɔn kosɔbɛ o kosɔn hali k’a sɔrɔ a yɛrɛ tun t’a kala ma Yezu tun bena na koo caaman minw kɛ a ye sini ma. Yezu tun ben’a niin saraka adamadenw kosɔn “waasa ni mɔgɔ min y’a jigi la a kan,” o tigi ka ɲɛnamaya banbali sɔrɔ (Zan 3:16). Hali k’a sɔrɔ Mariyamu tun t’o lɔn, a y’a yira ko a be Yezu waleɲuman lɔn a kɛtɔ ka kantigiya kɛ a ye. Tuma min na Yezu tun tɔɔrɔnin lo gwengwenyiri kan, Mariyamu tun lɔnin b’a gɛrɛfɛ sabu a tun b’a janto Yezu la ani a tun b’a fɛ ka mɔgɔ wɛrɛw dusu saalo (Zan 19:25). Yezu sanin kɔ, Mariyamu ani muso fila wɛrɛw tagara ni tulu kasa diiman ye a ka kaburu la walisa k’a mɔ a suu la (Mariki 16:1, 2). Jehova ye Mariyamu duga a ka kantigiya  kosɔn. Yezu suu kununin kɔ, Mariyamu ye nɛɛma sɔrɔ k’a ye ani ka kuma a fɛ k’a sɔrɔ kalandenw fanba yɛrɛ ma o nɛɛma sɔrɔ.—Zan 20:11-18.

5. Jehova ni Yezu ye min bɛɛ kɛ an ye, an be se k’a yira cogo di ko an b’u waleɲuman lɔn o kosɔn?

⁵ Jehova ni Yezu ye min bɛɛ kɛ an ye, an fana be se k’a yira ko an b’u waleɲuman lɔn an kɛtɔ ka an ka wagati, an fanga ani an bololafɛnw kɛ ka dɛmɛ don Masaya baaraw la. Misali la, an be se k’an yɛrɛ di walisa ka dɛmɛ don Masaya Boonw n’a ɲɔgɔnnaw lɔli n’u ladonko la.

6. Mun na an be se k’a fɔ ko kunmabɔsara ye nilifɛn ye Jehova ye min di an kelen kelen bɛɛ kosɔn?

⁶ N’an miirila k’a filɛ Jehova ni Yezu ye kanuyaba min yira an na, o b’an lasun k’u kanu fana (1 Zan 4:10, 19). Ani o kanuya be barika sɔrɔ n’i miirila k’a ye ko Yezu sara ele kosɔn. Ciden Pol yɛrɛ tun sɔnnin b’o ma. Tuma min na a ye bataki sɛbɛ k’a ci Galatikaw ma, a y’a ka waleɲumanlɔn yira kunmabɔsara koo la. A ko: “Ala Dencɛ . . . ye ne kanu fɔɔ k’a yɛrɛ di ne kosɔn.” (Gal. 2:20). Kunmabɔsara barika la, i be se k’i magwɛrɛ Jehova la ani ka kɛ a teri ye (Zan 6:44). Jehova ye fɛɛn ɲuman dɔ lo ye i la ani a sɔnna k’a Dencɛ saraka walisa i ka kɛ a teri ye. O sarakaba ɲɔgɔn tɛ yen! N’i miirila o la, o t’i dusukun sɔrɔ wa? O t’i ka kanuya barika bonya Jehova ni Yezu koo la wa? Sisan, a ka ɲi an k’an yɛrɛ ɲininga ko: “O kanuya ka ɲi ka ne lasun ka mun lo kɛ?”

7. I ko a yirala jaa kan cogo min na, an kelen kelen bɛɛ be se k’a yira cogo di ko an be Jehova ni Yezu kanu? (2 Korɛntikaw 5:14, 15; 6:1, 2).

⁷ An be ni kanuya min ye Jehova ni Yezu koo la, o b’an lasun ka yira tɔɔw la ko an b’u kanu (2 Korɛntikaw 5:14, 15; 6:1, 2 kalan). An b’o kanuya yira cogo  minw na, u dɔ ye ka waajuli kɛ ni kisɛya ye. An be bɛɛ waaju, u siya wala u bɔyɔrɔ mana kɛ min o min ye ani u mana kɛ fantanw wala waritigiw ye. O cogo la, an be koow kɛ ka kɛɲɛ ni Jehova sago ye, o min ye ko “mɔgɔ bɛɛ ka kisi ani ka se ka tiɲɛ lɔn.”—1 Tim. 2:4.

8. An be se k’a yira an balimaw na cogo di ko an b’u kanu?

⁸ An b’a yira fana ko an be Ala ni Krista kanu an kɛtɔ k’an balimaw kanu (1 Zan 4:21). An b’an mako don u la sɔbɛ la ani an b’u dɛmɛ u ka gwɛlɛyaw wagati la. An b’u dusu saalo n’u ka mɔgɔ kanulen dɔ sara, an be taga bɔ u ye n’u man kɛnɛ ani an b’an seko fisaman kɛ k’u jija n’u fari fagara (2 Kor. 1:3-7; 1 Tes. 5:11, 14). An be to ka delili kɛ u ye sabu an b’a to an hakili la ko “barika be mɔgɔtilennin ka daalili la kosɔbɛ.”—Zaki 5:16.

9. An be se k’a yira ko an b’an balimaw kanu cogo wɛrɛ juman na?

⁹ An b’a yira fana ko an b’an balimaw kanu n’an b’an jija kosɔbɛ ka to hɛɛrɛ la n’u ye. An be banba ka Jehova ladegi, an kɛtɔ ka yafa u ma. Ni Jehova sɔnna k’a Dencɛ saraka an ka jurumuw kosɔn, yala an fana man ɲi ka sɔn ka yafa an balimaw ma n’u donna an gasi la wa? Yezu ye baaraden jugu min kofɔ a ka talen dɔ la, an t’a fɛ ka kɛ i ko ale. O baaraden ka matigi sɔnna k’a ka juruba bɛɛ yafa a ma. Nka, o baaraden banna k’a baaradenɲɔgɔn ka juru yafa a ma, o min tun ka dɔgɔ n’ale ta ye kosɔbɛ (Mat. 18:23-35). Ni bɛnbaliyako dɔ be ele ni balima dɔ cɛ kafo kɔnɔ, mun na i t’a latigɛ ka taga hɛɛrɛ kɛ n’a ye ka kɔn Hakilijigi lajɛn ɲɛ? (Mat. 5:23, 24). N’i y’o kɛ, i bena a yira ko i be Jehova ni Yezu kanu kosɔbɛ.

10-11. Diinan mɔgɔkɔrɔw be se k’a yira cogo di ko u be Jehova ni Yezu kanu? (1 Piyɛri 5:1, 2).

¹⁰ Diinan mɔgɔkɔrɔw be se k’a yira cogo di ko u be Jehova ni Yezu kanu? U be se k’o kɛ cogo jɔnjɔn minw na, u dɔ ye k’u janto Yezu ka sagakulu la (1 Piyɛri 5:1, 2 kalan). Yezu y’o lo fɔ ka gwɛ ciden Piyɛri ye. Piyɛri tun y’a dalacɛ Yezu la siɲɛ saba bɛɛ. Nka o kɔ, a tun b’a fɛ n’a dusu bɛɛ ye k’a yira ko ale be Yezu kanu. Yezu suu kununin kɔ, a ye Piyɛri ɲininga ko: “Zan dencɛ Simɔn, ne koo ka di i ye wa?” An be se ka la a la ko Piyɛri tun labɛnnin lo ka koo bɛɛ kɛ walisa k’a yira a Matigi la ko ale b’a kanu. O la, Yezu y’a fɔ a ye ko: “Ne ka sagaw kɔlɔsi.” (Zan 21:15-17). Piyɛri ka ɲɛnamaya tɔɔ bɛɛ la, a y’a janto Yezu ka sagadenw na ni kanuya ye. A y’a yira o cogo la ko a be Yezu kanu.

¹¹ N’i ye diinan mɔgɔkɔrɔ ye, i be se k’a yira cogo di Hakilijigi lajɛn wagati la ko Yezu ye min fɔ Piyɛri ye, o kɔrɔtanin lo i fɛ? I be se k’a yira ko i be Jehova ni Yezu kanu i kɛtɔ ka to ka balimaw jija Alako ta fan fɛ tuma o tuma. Ani minw sumana Alako ta fan fɛ, i jija kosɔbɛ k’u dɛmɛ u ka kɔsegi Jehova ma (Ezek. 34:11, 12). Bibulu kalandenw ni makodonmɔgɔ minw nana Hakilijigi lajɛn na, i be se fana k’i mako don u la. An b’a fɛ u k’a ye ko an ninsɔn ka di k’u ye sabu an b’a fɛ olu fana ka kɛ Krista ka kalandenw ye.

12. Yezu ye kuma minw fɔ a ka suu laban na dugukolo kan, n’an miirila o la, mun na o b’an jaa gwɛlɛya? (Zan 16:32, 33).

¹² Yezu ka suu laban na dugukolo kan, a y’a fɔ a ka kalandenw ye ko: “K’aw to  diɲɛ na, dusukasi le be aw kan, nga aw k’aw jaa gwɛlɛya, ne ye see sɔrɔ diɲɛ kan ka ban.” (Zan 16:32, 33 kalan). Tuma min na Yezu juguw wulila a kama, mun lo y’a to a y’a jaa gwɛlɛya ka lɔ kelen kan ani a tora kantigiya la fɔɔ ka taga se saya ma? A tun b’a jigi la Jehova lo kan. Komi a tun b’a lɔn ko a ka kalandenw tun bena o kɔrɔbɔliw ɲɔgɔn sɔrɔ, a y’u kalifa Jehova ma (Zan 17:11). O b’an jaa gwɛlɛya. Mun na do? Sabu Jehova fanga ka bon n’an juguw bɛɛ t’a ye (1 Zan 4:4). A ɲɛɛ be fɛɛn bɛɛ la. An lanin b’a la kosɔbɛ ko n’an y’an jigi la a kan, an bena se ka see sɔrɔ an ka siranya kan ani ka koow kɛ ni jagwɛlɛya ye.

13. Arimateka Yusufu y’a yira cogo di ko a jaa ka gwɛlɛ?

¹³ An ka Arimateka Yusufu ka ɲɛyirali lajɛ. Yahutuw tun b’a bonya kosɔbɛ. Kititigɛla tun lo Yahutuw ka kititigɛsoba la. Nka Yezu ka cidenya baara la dugukolo kan, Arimateka Yusufu ma koow kɛ ni jagwɛlɛya ye fewu! Zan y’a fɔ a koo la ko “ale fana tun ye Yezu ka kalanden ye dogo la, bari a tun be siran zuwifuw ɲa.” (Zan 19:38). A tun limaniyanin lo Yezu la, nka a y’o dogo tɔɔw la. Siga t’a la, a tun be siranna le ko ale bena bɔnɛ a ka lɔyɔrɔba la. A mana kɛ min o min ye, Bibulu b’a yira an na ko Yezu sanin kɔ, “Arimateka Yusufu y’a jaa gwɛlɛya ka taga Pilati sɛgɛrɛ ka Yezu suu daali a fɛ.” (Mariki 15:42, 43). Sisan kɔni, a m’a dogo mɔgɔ si la tugun ko ale ye Yezu ka kalanden ye.

14. Ni adamaden ɲɛsiran be i la, i ka ɲi ka mun lo kɛ do?

¹⁴ Yala tuma dɔw la, adamaden ɲɛsiran be i la i ko Arimateka Yusufu wa? Lakɔliso wala baarakɛyɔrɔ la, yala i be siran tuma dɔw la k’a fɔ ko i ye Jehova Seere ye wa? Yala i be sigasigara ka kɛ weleweledala ye wala ka batize sabu tɔɔw bena min miiri i ko la, i be siranna o ɲɛ wa? Kana a to o siranya k’i bali ka koo ɲuman kɛ. O la, Jehova deli n’i dusu bɛɛ ye a ka jagwɛlɛya di i ma walisa i ka se k’a sago kɛ. N’i tora k’a ye Jehova b’i ka deliliw jaabi cogo min na, o bena barika don i la ani k’i jaa gwɛlɛya kosɔbɛ.—Ezayi 41:10, 13.

15. Tuma min na Yezu y’a yɛrɛ yira a ka kalandenw na, ninsɔndiya y’u lasun ka mun lo kɛ? (Luka 24:52, 53).

¹⁵ Tuma min na Yezu sara, a ka kalandenw dusu kasira kosɔbɛ. I yɛrɛ  bila u nɔɔ na k’a filɛ. U teri kanulen sara ani a tun b’u ɲɛɛ na ko jigiya t’u la tugun (Luka 24:17-21). Nka tuma min na Yezu y’a yɛrɛ yira u la, a ye wagati ta k’a ɲɛfɔ u ye ale ye Bibulu ka kiraya kuma dafa cogo min na. A ye baara kɔrɔtanin dɔ kalifa u ma fana (Luka 24:26, 27, 45-48). Tile 40 o kɔ, tuma min na Yezu kɔsegira sankolo la, a ka kalandenw ka dusukasi yɛlɛmana ka kɛ ninsɔndiyaba ye. U kɛtɔ k’a lɔn k’u Matigi be niin na ani ko a bena u dɛmɛ k’u ka cii dafa, o y’u ninsɔn diya. O ninsɔndiya y’u lasun ka Jehova tando tuma bɛɛ.—Luka 24:52, 53 kalan; Kɛw. 5:42.

16. An be se ka Yezu ka kalandenw ladegi cogo di?

¹⁶ An be se ka Yezu ka kalandenw ladegi cogo di? An be se ka ninsɔndiya sɔrɔ Jehova batoli la saan kuru bɛɛ la, Yezu saya Hakilijigi wagati dɔrɔn na tɛ. Walisa k’o ninsɔndiya sɔrɔ, an ka ɲi ka Ala ka Masaya kɛ an ɲɛnako fɔlɔ ye. Misali la, dɔw tun be wagati min ta ka baara kɛ, u ye yɛlɛmani don o la walisa ka se ka waajuli kɛ, ka taga lajɛnw na ani ka gwa kɔnɔ batoli kɛ tuma o tuma. Mɔgɔw b’a jati ko an mako be bololafɛn minw na, dɔw karila o kɔ. U y’o kɛ walisa ka se ka caaman kɛ kafo kɔnɔ wala ka se ka taga dɛmɛ don yɔrɔ min na weleweledalaw man ca. Walisa ka to ka Jehova sago kɛ, an mako be muɲuli la. Nka, Jehova y’a daa di ko n’an b’a sago kɛli kɛ an ɲɛnako fɔlɔ ye, a bena an duga kosɔbɛ.—Talenw 10:22; Mat. 6:32, 33.

17. I cɛsirinin lo ka mun lo kɛ Yezu saya Hakilijigi wagati la? (Jaa lajɛ.)

¹⁷ An kɔrɔtɔnin lo ka Hakilijigi lajɛn kɛ talatalon, awirilikalo tile 4nan na loon. Nka, kana kɔnɔni kɛ o wagati ka se i be sɔrɔ ka miiri Yezu ka ɲɛnamaya n’a ka saya koo la ani ale ni Jehova b’an kanu cogo min na. Wagati ta ka miiri o la ka kɔn Hakilijigi lajɛn loon ɲɛ ani o kɔ. Misali la, vɛrise minw be sɔrɔ saan 2019, awirilikalo ka Lajɛnsɛbɛ ɲɛɛ 4nan kan, wagati ta k’u kalan ani ka miiri u kan. O kɛtɔ, i janto vɛrisew la minw bena dɔ fara i ka waleɲumanlɔn, i ka kanuya, i ka jagwɛlɛya ani i ka ninsɔndiya kan. Ani miiri k’a filɛ cogo tigitigi minw na i be se k’i ka waleɲumanlɔn yira Jehova ni Yezu la. La a la ko i bena min o min kɛ k’i hakili jigi Yezu koo la a saya Hakilijigi wagati nin na, o bena diya a ye kosɔbɛ.—Yir. 2:19.