Dɔw lamɔna yɔrɔ min na, cɛɛw fanba b’a jati k’u ka fisa ni musow ye. Hans ye kafokulu kɔrɔsibaga ye Bolivi jamana na ani a ko dɔw lamɔna yɔrɔ min na, cɛɛw fanba ye kuncɛbaw ye. O kama, u b’a jati k’u ka fisa musow ye ani u tɛ bonya la u kan. Shengxian ye diinan mɔgɔkɔrɔ ye Tayiwani ani a ko: “N’ be yɔrɔ min na, cɛɛw fanba b’a jati ko musow man ɲi k’u daa don olu ka koo la. Ni cɛɛ dɔ ye muso dɔ ka miiriya kofɔ, cɛɛ tɔɔw man teli ka bonya la a kan.” Dɔ wɛrɛw b’a yira ko u be ni miiriya bɛnbaliw ye musow koo la cogo wɛrɛw la. Misali la, u be yɛlɛkoko dɔw kɛ musow koo la minw be u lamaloya.

Nka kibaro diiman ye min ye, o ye ko cɛɛ mana lamɔ yɔrɔ o yɔrɔ, a be se k’a miiricogo yɛlɛma. N’a tun b’a miiri ko cɛɛw ka fisa ni musow ye, a be se k’o miiriya bɔ a kuun na (Efɛz. 4:22-24). A be se k’o kɛ, n’a b’a ɲini ka Jehova ladegi. Jehova be musow minɛ cogo di? Balimacɛw be se k’a ladegi cogo di? Ani diinan mɔgɔkɔrɔw be se k’a yira tɔɔw la cogo di k’u be musow bonya? An bena o lo lajɛ barokun nin na.

JEHOVA BE MUSOW MINƐ COGO DI?

Jehova ka ɲɛyirali ɲɔgɔn tɛ yen musow minɛcogo koo la. Faa kanutigi lo min be hinɛ a deenw na (Zan 3:16). A be balimamuso kantigiw jati a denmusow ye minw koo ka gwɛlɛ a ma kosɔbɛ. An ka koo damanin lajɛ minw b’a yira ko Jehova be danbe la musow kan.

A tɛ cɛɛw fisaya musow ye. Cɛɛw wo, musow wo, a y’u bɛɛ dan a yɛrɛ jaa la (Zɛnɛzi 1:27). A ma hakilitigiya ni lɔnniya di cɛɛw ma ka tɛmɛ musow kan ani a b’u bɛɛ kanu cogo kelen  na (2 Til. Kib. 19:7). A ye setigiya di u fila bɛɛ ma walisa u ka se ka Bibulu ka tiɲɛnkalanw faamu ani k’ale ka jogow ladegi. Ani cɛɛw ni muso limaniyaninw bɛɛ koo ka di Jehova ye. U fila bɛɛ be ni jigiya ye ka ɲɛnamaya kɛ fɔɔ abada dugukolo kan, wala ka kɛ masaw ni sarakalasebagaw ye sankolo la (2 Piyɛri 1:1). A gwɛnin lo ko Jehova tɛ ni miiriya juguw ye musow koo la.

A b’u lamɛn. Jehova b’a janto musow dusukunnakow n’u ka haminankow la. Misali la, a ye Arasɛli ni Anɛ ka deliliw lamɛn ani k’u jaabi (Zɛnɛzi 30:22; 1 Sam. 1:10, 11, 19, 20). Jehova y’a kɛ u ye cɛɛ dɔw ka maana lakali Bibulu kɔnɔ minw ye musow lamɛn. Misali la, a y’a ɲini Ibrayima fɛ ko a ka mɛnni kɛ a muso Sara fɛ ani a y’o lo kɛ (Zɛnɛzi 21:12-14). Masacɛ Dawuda ye mɛnni kɛ Abigayɛli fɛ. A yɛrɛ y’a jati ko Jehova lo y’a ci ale fɛ (1 Sam. 25:32-35). Yezu y’a Faa jogow ladegi cogo dafanin na ani a ye mɛnni kɛ a bamuso Mariyamu fɛ (Zan 2:3-10). O misaliw b’a yira ko Jehova be bonya la musow kan cogo minw na, u la dɔ ye k’u lamɛn.

A lanin lo u la. Misali la, Jehova y’a yira ko a lanin lo Awa la a kɛtɔ k’a ɲini a fɛ a ka Adama dɛmɛ u ka dugukolo kuru bɛɛ ladon (Zɛnɛzi 1:28). O cogo la, a y’a yira ko a tun t’a jati ko Adama ka fisa ni Awa ye. Nka a tun b’a jati ko Awa ye Adama dɛmɛbaga lo ye. Jehova y’a yira fana ko a lanin lo kiramuso Debora ni Ulida la. A y’a ɲini o musow fɛ u ka ale ka jama ladi hali kititigɛla ni masacɛ dɔ yɛrɛ (Kirit. 4:4-9; 2 Mas. 22:14-20). Bi, Jehova b’a yira ko a lanin lo balimamusow la, a kɛtɔ k’a ka baara kalifa u ma. O balimamuso kantigiw ye weleweledalaw, piyɔniyew ani misɔndenw ye. U be dɛmɛ don ka Masaya Boonw ni Betɛli boonw pilan kɛ, k’u lɔ ani k’u ladon. U dɔw be baara kɛ Betɛliw wala bayɛlɛma birow la. Jehova ye muso caamanba lajɛn walisa u k’ale sago kɛ (Zab. 68:12). A gwɛnin lo ko Jehova tɛ musow jati barikantanw ye wala ko see t’u ye.

BALIMACƐW BE SE KA JEHOVA LADEGI COGO DI?

Ni balimacɛ b’a fɛ k’a lɔn n’a be balimamusow minɛ i ko Jehova b’u minɛ cogo min na, a ka ɲi k’a kɔnɔ gwɛ k’a ka miiriya n’a ka kɛwalew sɛgɛsɛgɛ. Walisa k’o kɛ, a mako be dɛmɛ na. Dɔgɔtɔrɔ be se ka tɛmɛ mansin dɔw fɛ k’a lɔn ni dusukundimi be mɔgɔ dɔ la wala n’a ta la. O cogo kelen na, teri ɲuman ani Ala ka Kuma be se k’an dɛmɛ k’a lɔn n’an be musow jati cogo bɛnnin na. An be se k’o dɛmɛ sɔrɔ cogo di?

Teri ɲuman dɔ ɲininga (Talenw 18:17). An lanin lo an teri min na ani a be koow kɛ k’a dama kɛɲɛ ni ɲumanya ye, an be se k’ale ɲininga ko: “N’ be balimamusow minɛ cogo min na, ele be mun lo miiri o koo la? Yala u b’a jati ko n’ be bonya la u kan wa? N’ be balimamusow minɛ cogo min na, n’ be se k’o fisaya cogo di?” N’i teri y’a fɔ i ye i be se k’o fisaya cogo minw na, kana a ɲini ka joo di i yɛrɛ ma. Nka, sɔn ka yɛlɛmani bɛnninw kɛ.

Ala ka Kuma sɛgɛsɛgɛ. Cogo fisaman min na an be se k’a lɔn n’an be musow minɛ cogo ɲuman na, o ye ka basigi Ala ka Kuma kan k’an ka miiriyaw n’an ka kɛwalew sɛgɛsɛgɛ (Eburuw 4:12). Bibulu sɛgɛsɛgɛtɔ, an be kalan sɔrɔ cɛɛw fɛ minw ye musow minɛ koɲuman ani minw m’u minɛ ka ɲɛ. O kɔ, i be se k’u ka kɛwalew suma n’i taw ye. Ka fara o kan, vɛrise caaman lajɛ. O la, i tɛna basigi vɛrise dɔ kan i ɲinɛ ma ka joo di i yɛrɛ ma, n’a y’a sɔrɔ ko i be ni miiriya bɛnbali ye musow koo la. Misali la, a fɔra 1 Piyɛri 3:7 (Bible senuma) kɔnɔ ko: “Musoya cogo bɛ i n’a fɔ minɛn min barika ka dɔgɔ aw ta ye. Aw ka u bonya.” b Yala o kɔrɔ ko cɛɛ lɔyɔrɔ ka bon ni muso ta ye ani ko muso ka hakilitigiya n’a ka setigiya ma se cɛɛ ta ma wa? Ayi. Piyɛri ye min fɔ, an k’o suma ni Galatikaw 3:26-29 kɔnɔkumaw ye. O yɔrɔ la, a yirala ko Jehova ye cɛɛw ni musow sugandi walisa u ka mara kɛ ni Yezu ye sankolo la. An be musow minɛ cogo min na, n’an be teri ɲuman dɔ ɲininga o koo la ani ka Ala ka Kuma sɛgɛsɛgɛ,  o bena an dɛmɛ ka bonya la an balimamusow kan koɲuman.

DIINAN MƆGƆKƆRƆW B’A YIRA COGO DI K’U BE BONYA LA BALIMAMUSOW KAN?

Walisa k’a lɔn u be se ka bonya la balimamusow kan cogo min na, kafo balimacɛw be se ka diinan mɔgɔkɔrɔ kanutigiw ladegi. Olu be bonya la balimamusow kan cogo minw na, an k’u dɔw lajɛ.

U be balimamusow tando. Ciden Pol ye ɲɛyirali ɲuman to diinan mɔgɔkɔrɔw ye o koo la. A ye bataki min ci Ɔrɔmu kafo ma, a ye balimamuso caaman tando o kɔnɔ (Ɔrɔm. 16:12). Miiri k’a filɛ o balimamusow ninsɔn diyara cogo min na tuma min na Pol ka bataki tun be kalanna kafodenw ye! O cogo kelen na, diinan mɔgɔkɔrɔw be u kɔnɔ gwɛ ka balimamusow tando u ka jogo ɲumanw ani u ka baara kosɔn u be min kɛra Jehova ye. O b’a to balimamusow b’a lɔn ko kafodenw be bonya la u kan kosɔbɛ ani ko u koo ka di u ye. Diinan mɔgɔkɔrɔ dɔ be jijali kuma minw fɔ o balimamusow ye, n’a sɔrɔ u mako b’o lo la jaatika walisa ka to ka Jehova sago kɛ kantigiya la.—Talenw 15:23.

Ni diinan mɔgɔkɔrɔw be balimamusow tandora, u b’o kɛ ni kɔnɔgwɛ ye ani u b’a fɔ u ye koo tigitigi min kama u b’u tandora. Mun na do? Balimamuso Jessica ko: “Ni balimacɛw y’a fɔ balimamuso dɔ ye ko ‘i ni baara,’ o ka ɲi. Nka, min b’an jija kosɔbɛ, o ye ni balimacɛw b’an tando koo tigitigi dɔ kosɔn. Misali la, u be se k’an tando sabu an b’an deenw dɛmɛ u ka to yɔrɔ kelen lajɛnw na. Wala n’an be to ka taga Bibulu kalanden dɔ ta ka na lajɛn na.” Ni diinan mɔgɔkɔrɔw be balimamusow tando koo tigitigi dɔw kosɔn, u b’a ye ko nafa b’olu la ani ko u koo ka gwɛlɛ kafodenw ma.

U be balimamusow lamɛn. Diinan mɔgɔkɔrɔ minw majiginin lo, olu be sɔn a ma ko olu  dɔrɔn lo tɛ ni hakilinata ɲumanw ye. U b’a ɲini balimamusow fɛ u k’u ka miiriya fɔ ani u b’u lamɛn koɲuman. O cogo la, u be balimamusow jija ani olu yɛrɛ be nafa sɔrɔ o la. Cogo di do? Diinan mɔgɔkɔrɔ dɔ tɔgɔ ko Gerardo, a be Betɛli la ani a ko: “N’ y’a kɔrɔsi ko ni n’ be balimamusow ɲininga u ka miiriya la ka sɔrɔ ka baara dɔ kɛ, o b’a to n’ b’o baara kɛ ka ɲɛ. Tuma caaman na, u y’o baara kɛ wagatijan kɔnɔ ka tɛmɛ balimacɛw fanba kan.” An ka kafow kɔnɔ, balimamuso caaman ye piyɔniyew ye. O la, u be kafo ka kiinmɔgɔw lɔn koɲuman. Diinan mɔgɔkɔrɔ dɔ tɔgɔ ko Bryan ani a ko: “An balimamusow be ni jogo ɲuman caaman ni setigiyaw ye, an ka ɔriganisasiyɔn mako be minw na. O la, a ɲini ka nafa sɔrɔ o la!”

Diinan mɔgɔkɔrɔ hakilitigiw tɛ sin ka ban balimamusow ka ladiliw la. Mun na do? Edward ye diinan mɔgɔkɔrɔ ye ani a ko: “Balimamuso dɔ be se ka balimacɛ dɛmɛ ka koo dɔ faamu bɛrɛbɛrɛ ani a ka miiriya be se k’a to o balimacɛ be tɔɔw dusukunnakow faamu koɲuman.” (Talenw 1:5). Hali ni diinan mɔgɔkɔrɔ tɛ se ka balimamuso dɔ ka ladili sira tagama, a be se k’a fo a ka miiriya, a ka lɔnniya ani a ka hakilitigiya kosɔn.

U be fɔrɔmasɔn di balimamusow ma. Diinan mɔgɔkɔrɔ hakilitigiw be sababuw ɲini ka fɔrɔmasɔn di balimamusow ma. Misali la, u be se k’a yira u la waajuli baara lajɛn be kɛ cogo min na. O la, u bena se k’o lajɛn ɲɛminɛ ni balimacɛ batizenin si tɛ yen. U be se fana ka balimamusow degi baara kɛcogo la ni mansinw wala minan wɛrɛw ye. O la, u bena se ka dɛmɛ don Masaya Boonw n’a ɲɔgɔnnaw lɔli n’u ladonko la. Betɛli la, ɲɛminɛbagaw ye fɔrɔmasɔn di balimamusow ma walisa u ka se ka baara sifa caaman kɛ i n’a fɔ ka Betɛli boonw ladonko, ka sanninw kɛ, ka wari jatiminɛ, ka ɔridinatɛri porogramuw labɛn ani a ɲɔgɔnnaw. Ni diinan mɔgɔkɔrɔw be fɔrɔmasɔn di balimamusow ma, u b’a yira ko u be u jati lannamɔgɔw ye ani ko u be ni setigiya ye.

Balimamusow ye fɔrɔmasɔn min sɔrɔ diinan mɔgɔkɔrɔw fɛ, u caaman ye mɔgɔ wɛrɛw dɛmɛ n’o ye. Misali la, u dɔw ye fɔrɔmasɔn min sɔrɔ boonlɔ baara la, u ye mɔgɔ wɛrɛw dɛmɛ k’u ka boonw lɔ kokura balawo dɔ tɛmɛnin kɔ. Waajuli baara min be kɛ jamayɔrɔ la, balimamuso dɔw ye fɔrɔmasɔn sɔrɔ o koo la ani u ye balimamuso caaman degi o la. Balimamusow be mun lo miiri diinan mɔgɔkɔrɔw koo la minw be fɔrɔmasɔn di u ma? Jennifer ko: “Baara kɛtɔ Masaya Boon dɔ lɔli yɔrɔ la, ɲɛminɛbaga dɔ ye wagati ta ka fɔrɔmasɔn di n’ ma. A ye n’ ka baara kɔrɔsi ani a ye n’ tando o kosɔn. A tun ka di n’ ye ka baara kɛ n’a ye sabu n’ tun b’a ye ko a lanin lo n’ na ani ko nafa be n’ na.”

NAFA MINW B’A LA KA BALIMAMUSOW MINƐ I KO AN SOMƆGƆW

I ko Jehova, an fana be an balimamuso kantigiw kanu! O la, an b’u minɛ i ko an somɔgɔw (1 Tim. 5:1, 2). U koo ka gwɛlɛ an ma ani a ka di an ye kosɔbɛ ka baara kɛ n’u ye. N’u b’a ye ko an b’u kanu ani k’u dɛmɛ, o ka di an ye fana. Balimamuso Vanessa ko: “N’ be Jehova waleɲuman lɔn kosɔbɛ sabu n’ b’a ka ɔriganisasiyɔn kɔnɔ. Balimacɛ caaman b’o ɔriganisasiyɔn kɔnɔ minw ye n’ jija yɛrɛ le.” Balimamuso dɔ be Tayiwani ani a ko: “N’ be Jehova n’a ka ɔriganisasiyɔn waleɲuman lɔn kosɔbɛ sabu musow koo ka gwɛlɛ u ma ani u b’u janto u dusukunnakow la. O be n’ ka limaniya barika bonya ani nɛɛma min be n’ fɛ ka kɛ Jehova ka ɔriganisasiyɔn kɔnɔ, n’ b’a waleɲuman lɔn kosɔbɛ o kosɔn.”

Jehova dusu ka di yɛrɛ le k’a ye ko balimacɛ kantigiw b’u jijara ka musow jati ani k’u minɛ i ko ale b’a kɛ cogo min na! (Talenw 27:11). Benjamin ye diinan mɔgɔkɔrɔ ye Ekɔsi jamana na ani a ko: “Duniɲamɔgɔw tɛ bonya la musow kan hali dɔɔni. O la, musow mana na Masaya Boon kɔnɔ, an b’a fɛ u k’a ye faranfasi min be anw ni duniɲamɔgɔw cɛ.” An bɛɛ k’an seko fisaman kɛ ka Jehova ladegi an kɛtɔ k’an balimamusow kanu ani k’u bonya sabu u ka kan n’o ye.—Ɔrɔm. 12:10.