1-2. Gwɛlɛya jumanw lo be se ka Jehova sagokɛla kantigiw sɔrɔ?

 GWƐRƐGWƐRƐKO dɔw be se k’an ka ɲɛnamaya kɛcogo yɛlɛma pewu! Misali la, balimacɛ kantigi dɔ tɔgɔ ko Luis. a Dɔgɔtɔrɔw y’a fɔ ko kansɛribana jugu dɔ b’a la. U ko yanni kalo damanin dɔrɔn, a bena sa. Monika cɛɛ tun ye diinan mɔgɔkɔrɔ ye ani u fila bɛɛ bolo tun degunnin lo kosɔbɛ Jehova ka baara la. Loon dɔ, Monika bɔra a kala ma ko a cɛɛ tun be jurumukow kɛ dogo la kabi saan caaman. Olivia ye musogwana ye. A bolila k’a ka soo to yen sanfɔɲɔba dɔ kosɔn. Tuma min na a kɔsegira, a y’a ye ko a ka boon halakira. O balimaw ka ɲɛnamaya barila ka yɛlɛma pewu! Yala o ɲɔgɔn delila k’i sɔrɔ gwɛrɛgwɛrɛko dɔ kosɔn wa?

² Hali n’an ye Jehova sagokɛla kantigiw ye, gwɛlɛyaw b’an kan ani an be bana i ko mɔgɔ tɔɔw. N’a sɔrɔ an kɔniyabagaw b’an kɛlɛ wala k’an tɔɔrɔ fana. Tiɲɛn lo ko Jehova t’an tanga o gwɛlɛyaw ma, nka a ye layidu ta ko a bena an dɛmɛ (Ezayi 41:10). A ka dɛmɛ barika la, an ninsɔndiyanin be se ka to, an be se ka desizɔn ɲumanw ta ani ka to kantigiya la gwɛlɛyabaw bɛɛ n’a ta. Jehova b’an dɛmɛ cogo minw na gwɛlɛyabaw tuma na, an bena u la naani lajɛ. An bena a ye fana an be se ka min kɛ walisa ka nafa sɔrɔ a ka dɛmɛ na.

JEHOVA BENA I LATANGA

3. Ni gwɛlɛyaba dɔ b’an kan, a be se ka gwɛlɛya an ma ka mun lo kɛ?

³ Min ka gwɛlɛ an ma. Ni gwɛlɛyaba dɔ b’an kan, a be se  ka gwɛlɛya an ma ka miiri koɲuman ani ka desizɔnw ta. Mun na do? Sabu n’a sɔrɔ an dusu kasinin lo kojugu ani hamiba b’an kan. N’a sɔrɔ an hakili ɲagaminin lo ani an t’a lɔn an bena min kɛ. Balimamuso fila minw kofɔra ka tɛmɛ, a filɛ olu dusukunnakow tun ye min ye u ka gwɛlɛyaw tuma na. Olivia ko: “Tuma min na sanfɔɲɔba ye n’ ka boon halaki, n’ hakili tun ɲagaminin lo pewu ani n’ tun t’a lɔn n’ bena min kɛ.” Monika min cɛɛ y’a janfa, ale ko: “N’ jigi tun tigɛra cogo min na, o tɛ se ka fɔ. A tun be komi u ye n’ sɔgɔ ni muru ye le. A tun ka gwɛlɛ n’ ma yɛrɛ ka n’ ka loon o loon baaraw dama kɛ. N’ tun ma deli ka miiri k’o koo ɲɔgɔn be se ka n’ sɔrɔ.” Jehova y’a daa di ko a bena an dɛmɛ cogo di n’an hakili ɲagaminin lo?

4. Ka kɛɲɛ ni Filipikaw 4:6, 7 ye, Jehova y’a daa di ko a bena mun lo kɛ an ye?

⁴ Jehova be min kɛ. A y’a daa di ko a bena a “ka hɛrɛ” di an ma (Filipikaw 4:6, 7 kalan). An be hakilisigi min sɔrɔ sabu an be jɛnɲɔgɔnya teriman kɛra ni Jehova ye, Ala ka hɛɛrɛ ɲɛsinna o lo ma. O hɛɛrɛ “tɛmɛna mɔgɔw ka faamuyali ma.” O kɔrɔ ko Ala ka hɛɛrɛ b’an lafiya cogo min na, o tɛ se ka fɔ. Yala i hakili delila ka sigi cogo kabakoman na delili kɛnin kɔ n’i dusu bɛɛ ye wa? O lo ye “Ala ka hɛrɛ” ye.

5. Ala ka hɛɛrɛ b’an tanga hamikojugu ma cogo di?

⁵ Filipikaw 4:7 b’a fɔ fana ko Ala ka hɛɛrɛ b’an “tanga hamikojugu ma.” Gɛrɛkikan kumaden min bayɛlɛmana ko “tanga,” o ɲɛsinna sɔrɔdasiw lo ma minw be dugu kɔrɔsi walisa mɔgɔ juguw kana o dugu minɛ. O dugumɔgɔw be sinɔgɔ hɛɛrɛ la sabu u b’a lɔn ko sɔrɔdasiw b’u ka dugu dondaw kɔrɔsira. O cogo kelen na, ni Ala y’a ka hɛɛrɛ di an ma, an hakili be sigi sabu an b’a lɔn ko an latanganin lo (Zab. 4:9). I ko Anɛ, hali n’an ka gwɛlɛyaw ma sin ka ban, an hakili be sigi (1 Sam. 1:16-18). O la, tuma caaman na, a ka nɔgɔ ka miiri koɲuman ani ka desizɔn ɲumanw ta.

6. An be se ka mun lo kɛ walisa ka Ala ka hɛɛrɛ sɔrɔ? (jaa lajɛ fana).

⁶ An ka ɲi ka min kɛ. N’i hakili ɲagaminin lo, a kɛ komi i be sɔrɔdasiw lo weelela. O kɔrɔ, to ka delili kɛ fɔɔ tuma min na i bena a ye ko i ye Ala ka hɛɛrɛ sɔrɔ (Luka 11:9; 1 Tes. 5:17). An kumana Luis min koo la, dɔgɔtɔrɔw tun y’a fɔ ale ye ko a bena sa yanni kalo damanin. A y’a ɲɛfɔ fɛɛn min ye ale n’a muso Ana dɛmɛ ka muɲuli kɛ. A ko:  “O wagati ɲɔgɔn na, a ka gwɛlɛ kosɔbɛ ka desizɔnw ta ka ɲɛsin kɛnɛyako ani koo wɛrɛw ma. Nka delili lo sababu la an hakili sigira o wagati gwɛlɛ na.” Luis n’a muso ko u ye delili kɛ kosɔbɛ siɲɛ caaman na. U ye Jehova deli ko a ka hakilisigi, dusukunlafiya ani hakilitigiya di u ma janko u ka desizɔn ɲumanw ta. Ani u y’a ye ko Jehova y’u dɛmɛ. Ni gwɛlɛya b’i kan, to ka Jehova deli. O la, a ka hɛɛrɛ bena i tanga hamikojugu ma.—Ɔrɔm. 12:12.

JEHOVA BENA FANGA D’I MA ANI K’I LƆ KA ƝƐ

7. Ni gwɛlɛyaba dɔ b’an kan, an be se ka kɛ ni dusukunnako jumanw lo ye?

⁷ Min ka gwɛlɛ an ma. Ni gwɛlɛyaba dɔ b’an kan, n’a sɔrɔ an tɛna miiri wala ka koow kɛ i ko fɔlɔ la. I ko sanfɔɲɔba be kurun fifa fifa cogo min na, o cogo kelen na, an dusukunnakow be se ka bari ka yɛlɛma. An kumana Ana min koo la, ale ko a cɛɛ Luis sanin kɔ, ale tun be ni dusukunnako caaman ye. A ko: “Tuma dɔw la ni n’ cɛɛ ɲɛnafin tun be n’ na, n’ tun b’a daminɛ ka makaritɔya kɛ. N’ tun be dimi fana sabu a tɛ ni n’ ye tugun.” Wagati wɛrɛw la, Ana tun b’a jati ko a b’a kelen na ani a dusu tun be gwan sabu a cɛɛ tun be koo minw kɛ koɲuman, sisan ale lo ka ɲi k’u ɲɛnabɔ. Tuma dɔw la, a be kɛ komi a be kɔgɔji kan sanfɔɲɔba jukɔrɔ. N’an hakili y’a daminɛ ka ɲagami an dusukunnakow kosɔn, Jehova b’an dɛmɛ cogo di?

8. Ka kɛɲɛ ni 1 Piyɛri 5:10 ye, Jehova b’an hakili sigi ko a bena mun lo kɛ?

⁸ Jehova be min kɛ. A b’an hakili sigi ko a bena fanga di an ma ani k’a kɛ an be lɔ ka ɲɛ (1 Piyɛri 5:10 kalan). Ni fɔɲɔba be yen, kurun be se k’a daminɛ ka fifa fifa i n’a fɔ a bena ben. Walisa ka lɔ ka ɲɛ fɔɲɔba tuma na, kurun caaman be ni gaman sifa dɔw ye u jukɔrɔyɔrɔ la. O gamanw be se k’a to kurun tɛ fifa fifa kojugu. O la, minw be kurun kɔnɔ, u latanganin lo ani u be se k’u ka voyazi diyabɔ. Nka tuma caaman na, o gaman sifaw be baara kɛ ka ɲɛ ni kurun be bolila le. O cogo kelen na, n’an be to ka Jehova sago kɛ kantigiya la gwɛlɛyaw wagati la, a bena a kɛ an be lɔ ka ɲɛ.

9. An ka sɛgɛsɛgɛrikɛ minanw be se k’an dɛmɛ cogo di an hakili siginin be to? (jaa lajɛ fana).

⁹ An ka ɲi ka min kɛ. N’i hakili ɲagaminin lo i dusukunnakow kosɔn, i seko bɛɛ kɛ ka to ni delinanko ɲumanw ye Alako ta fan fɛ. N’a sɔrɔ i tɛna se ka caaman kɛ i ko fɔlɔ la. Nka, a to i hakili la  ko an tɛ se ka min kɛ, Jehova t’o ɲini an fɛ (Luka 21:1-4 lajɛ). An be se ka koo minw kɛ, u dɔ ye ka wagati kunmabɔ kelenna kalan kama ani an ye min kalan, an ka miiri o kan. Mun na o kɔrɔtanin lo? Sabu Jehova be tɛmɛ a ka ɔriganisasiyɔn fɛ ka fɛɛn caaman labɛn an ye walisa an hakili siginin ka to gwɛlɛyaw wagati la. Walisa k’a lɔn i mako be min na, i be se ka baara kɛ ni sɛgɛsɛgɛrikɛ minan nunu ye: JW Library^®, Index des publications des Témoins de Jéhovah ani Guide de recherche pour les Témoins de Jéhovah. An kumana Monika min koo la, ale ko n’a dusukunnakow y’a daminɛ k’a hakili ɲagami, a tun be ladiliw ɲini o sɛgɛsɛgɛrikɛ minanw kɔnɔ. A tun be kumaden nin ɲini: “dimi.” Wagati wɛrɛw la, a tun be kumaden nunu ɲini: “janfa” wala “kantigiya.” O kɔ, a ye kunnafoni minw sɔrɔ, a tun b’u kalan fɔɔ tuma min na a b’a ye ko a hakili sigira. A ko: “Sɛgɛsɛgɛri daminɛ tuma na, n’ hakili ɲagaminin lo kosɔbɛ. Nka a laban, a be i n’a fɔ Jehova y’a bolo meleke n’ kaan na. N’ ye kunnafoni minw sɔrɔ, u kalantɔ, n’ b’a ye ko Jehova be n’ dusukunnakow bɛɛ faamu ani ko a be n’ dɛmɛna.” Jehova ka dɛmɛ barika la, ele fana dusu be se ka suma dɔɔni dɔɔni fɔɔ i hakili be taga sigi.—Zab. 119:143, 144.

JEHOVA BENA I DƐMƐ

10. Ni dusukasikoba dɔ y’an sɔrɔ, o be se ka mun lo kɛ an na?

¹⁰ Min ka gwɛlɛ an ma. Ni dusukasikoba dɔ y’an sɔrɔ, loon dɔw la, an fari be se ka faga ani an hakili be ɲagami. An be kɛ i ko mɔgɔ dɔ min tun be se ɲɔgɔndanboli la koɲuman. Nka sisan a tɛ se ka tagama ka tilen sabu a mandimina. An tun be deli ka baara minw kɛ nɔgɔman na, o be se ka gwɛlɛya an ma. Wala a tun ka di an ye ka koo minw kɛ, u kɛlɔgɔ t’an na tugun. I ko kira Eli, a be se ka gwɛlɛya an ma kojugu ka wuli ka bɔ an ka dilan kan. An b’a fɛ ka to ka sinɔgɔ dɔrɔn le (1 Mas. 19:5-7). Jehova ye layidu ta ko a bena mun lo kɛ n’an fari faganin lo?

11. Jehova b’an dɛmɛ cogo wɛrɛ juman lo la? (Zaburuw 94:18).

¹¹ Jehova be min kɛ. A ye layidu ta ko a bena an dɛmɛ (Zaburuw 94:18 kalan). Mɔgɔ min be ɲɔgɔndanboli kɛ, ale mako be dɛmɛ na walisa ka taga ɲɛ. O cogo kelen na, an mako be dɛmɛ na walisa  ka to ka Jehova ka baara kɛ bɛrɛbɛrɛ. Wagati gwɛlɛw na, Jehova b’an hakili sigi ko: “Ne Masaba le ye aw ka Ala ye, aw bolo be ne bolo. Ne le ko aw ma: ‘Aw kana siran, ne le bena aw dɛmɛ.’” (Ezayi 41:13). Masacɛ Dawuda y’a ye ko Jehova y’ale dɛmɛ. Tuma min na gwɛlɛyaw tun b’a kan ani a juguw wulila a kama, a y’a fɔ Jehova ye ko: “I ka sebagaya be ne dɛmɛ.” (Zab. 18:36). Jehova y’a dɛmɛ cogo di do?

12. N’an barika dɔgɔyara, Jehova be se ka tɛmɛ mɔgɔ jumanw lo fɛ k’an dɛmɛ?

¹² Jehova ka teli ka mɔgɔ wɛrɛw lasun u k’an dɛmɛ. Misali la, tuma min na Dawuda barika tun ka dɔgɔ, a tericɛ Zonatan tagara bɔ a ye walisa k’a barika bonya ani k’a jija (1 Sam. 23:16, 17). O cogo kelen na, Jehova tɛmɛna Elize fɛ ka Eli dɛmɛ cogo tigitigi dɔw la (1 Mas. 19:16, 21; 2 Mas. 2:2). Bi, Jehova be se ka tɛmɛ an somɔgɔw, an teriw wala diinan mɔgɔkɔrɔw fɛ walisa k’an dɛmɛ. Nka n’an dusu kasinin lo, n’a sɔrɔ an ka teli k’an mabɔ tɔɔw la. An b’a fɛ ka to an kelen na ani o be faamu. An be se ka mun lo kɛ walisa ka Jehova ka dɛmɛ sɔrɔ?

13. An ka ɲi ka mun lo kɛ walisa ka Jehova ka dɛmɛ sɔrɔ? (jaa lajɛ fana).

¹³ An ka ɲi ka min kɛ. An ka banba, an kana an mabɔ tɔɔw la. N’o tɛ, an ka teli ka koow filɛ ni ɲɛɛ jugu ye ani an bena a daminɛ ka miiri an yɛrɛ n’an ka gwɛlɛyaw dɔrɔn lo la. O be se k’a to an tɛ desizɔn ɲumanw ta (Talenw 18:1). Tiɲɛn lo ko an bɛɛ mako b’a la ka to an kelen tuma dɔw la, sanko ni gwɛlɛyaba dɔ b’an kan. Nka, n’an y’an mabɔ tɔɔw la wagatijan kɔnɔ, Jehova be tɛmɛ fɛɛrɛ minw fɛ k’an dɛmɛ, a be komi an be banna o la le. O la, koow mana gwɛlɛya i ma cogo o cogo, sɔn i somɔgɔw, i teriw ani diinan mɔgɔkɔrɔw ka dɛmɛ na. A jati ko Jehova lo be tɛmɛ o mɔgɔw fɛ k’i dɛmɛ.—Talenw 17:17; Ezayi 32:1, 2.

JEHOVA BENA I DUSU SAALO

14. Koo jumanw lo be se ka siranya bila an na?

¹⁴ Min ka gwɛlɛ an ma. Koo dɔw be se ka siranya bila an na tuma dɔw la. Bibulu kɔnɔ, Ala sagokɛla kantigi dɔw y’a lakali ko tuma dɔw la, u hakili tun ɲagaminin lo ani u tun be yɛrɛyɛrɛla u juguw wala gwɛlɛya wɛrɛw kosɔn (Zab. 18:5; 55:2, 6). O cogo kelen na, n’a sɔrɔ  an somɔgɔw wala faamanw b’an kɛlɛla. A be se ka kɛ fana ko u b’an kɛlɛla lakɔliso wala baarakɛyɔrɔ la. N’a sɔrɔ an sirannin lo ko an bena sa sabu an man kɛnɛ. A be se ka kɛ an ɲɛɛ na ko an be i ko denfitinin dɔ min tɛ se ka foyi kɛ. Jehova b’an dɛmɛ cogo di o wagatiw ɲɔgɔn na?

15. Ka kɛɲɛ ni Zaburuw 94:19 ye, Jehova bena mun lo kɛ an ye?

¹⁵ Jehova be min kɛ. A b’an dusu saalo ani k’an hakili sigi. Zaburuw 94 vɛrise 19 b’a to an be miiri sungurunin dɔ koo la min sirannin lo ani a tɛ sera ka sinɔgɔ sanpɛrɛn kosɔn (o vɛrise kalan). A facɛ be na a ta a bolo fɔɔ a be sinɔgɔ. Hali ni sanpɛrɛn bele be yen, a hakili siginin lo ani a b’a ye ko a latanganin lo a facɛ bolo. Ni kɔrɔbɔli dɔw b’an kan minw be siranya bila an na, n’a sɔrɔ an mako b’a la an sankolola Faa k’an dusu saalo fɔɔ an hakili be sigi. A bena kɛ komi a y’an ta a bolo le. An be se k’o dususalo sɔrɔ cogo di?

16. An ka ɲi ka mun lo kɛ walisa ka Jehova ka dususalo sɔrɔ? (jaa lajɛ fana).

¹⁶ An ka ɲi ka min kɛ. Wagati kɛ ni Jehova ye tuma o tuma i kɛtɔ k’a deli ani k’a ka Kuma kalan (Zab. 77:2, 13-15). O la n’i niin degunnin lo, i bena koo fɔlɔ min kɛ o ye k’i sankolola Faa deli. I ka siranyakow n’i ka haminankow fɔ Jehova ye. A to a ka kuma i fɛ ani k’i dusu saalo a ka Kuma sababu la (Zab. 119:28). N’i sirannin lo, Bibulu yɔrɔ dɔw be se k’i dusu saalo kosɔbɛ. Misali la, i be se ka dususalo sɔrɔ Bibulu ka kitabu nunu kɔnɔ: Zɔbu, Zaburuw, Talenw ani Yezu ka kuma minw be Matiyo sapitiri 6nan na. N’i tora ka Jehova deli ani k’a ka Kuma kalan, i bena a ye ko a b’i dusu saalora.

17. An be se ka la mun lo la?

¹⁷ An be se ka la a la ko wagati gwɛlɛw na, Jehova bena an dɛmɛ tuma bɛɛ. An tɛna kɛ an kelen abada (Zab. 23:4; 94:14). A ye layidu ta ko a bena an latanga, k’an lɔ ka ɲɛ, k’an dusu saalo ani k’an dɛmɛ. Ezayi 26:3 b’a fɔ Jehova koo la ko: “Mɔgɔ min tora kantigiya la, e Masaba be hɛrɛ kɛ o ye kosɔbɛ. Bari, a jigi b’i kan.” O la, i jigi la Jehova kan ani a be tɛmɛ fɛɛrɛ minw fɛ k’i dɛmɛ, a ɲini ka nafa sɔrɔ u la. N’i y’o kɛ, i bena fanga sɔrɔ kokura hali wagati gwɛlɛw na.