1. Mun lo be na i hakili la n’i miirila Jehova koo la?

 YALA i delila ka miiri k’a filɛ Jehova be cogo min na wa? N’i be kumana a fɛ delili la, mun lo be na i hakili la? Hali n’an tɛ se k’a ye, Bibulu b’a cogo lakali an ye cogo caaman na. A b’a fɔ ko Jehova “ye yeelen ani nigɛkunbɛnnan ye” ani ko “an ka Ala ye tasuma ye min be cɛnikɛ.” (Zab. 84:12; Eburuw 12:29). Kira Ezekiyɛli ye Jehova nɔɔrɔ ye yelifɛn dɔ la. A ko a be i n’a fɔ kabakuru bulaman, a be manamana i ko sanmuru ani zira min jɔsira ka nugu (Ezek. 1:26-28). A cogo lakalila cogo min na, o be se k’an kabakoya wala ka siranya bila an na yɛrɛ.

2. Mun lo be se k’a to a be gwɛlɛya dɔw ma k’u magwɛrɛ Jehova la?

² Komi an tɛ se ka Jehova ye, a be se ka gwɛlɛya an ma ka la a la ko a b’an kanu. Koo minw ye dɔw sɔrɔ u ka ɲɛnamaya kɔnɔ, o be se k’a to u b’a miiri ko Jehova tɛ se k’u kanu abada. N’a sɔrɔ u facɛ ma deli k’a yira u la ko a b’u kanu. Jehova be an dusukunnakow faamu ani u be nɔɔ min to an kan. Walisa k’an dɛmɛ, a b’a fɔ an ye Bibulu kɔnɔ ko ale ye kanutigi Ala ye.

3. Mun na an ka ɲi ka Jehova ka kanuya lajɛ koɲuman?

³ Kumaden min be Jehova cogo lakali ka ɲɛ, o ye kanuya lo ye. Bibulu b’a fɔ ko: “N’i ko Ala, i ko kanuya le.” (1 Zan 4:8). Jehova b’a ka koow bɛɛ kɛ ni kanuya ye. A ka kanuya barika ka bon ani a be bɛɛ kanu, hali minw t’a kanu (Mat. 5:44, 45). Barokun nin na, an bena koo dɔw lajɛ Jehova n’a ka kanuya koo la. N’an tora ka an ka Ala lɔn ka ɲɛ, dɔ bena to ka fara an ka kanuya kan a koo la.

 JEHOVA B’AN KANU KOSƆBƐ

4. Jehova b’an kanu kosɔbɛ minkɛ, o be mun lo kɛ ele la? (jaa lajɛ fana).

⁴ Jehova b’an “kanu” kosɔbɛ (Zan 16:27). Bibulu kɔnɔ, a b’a yɛrɛ suma ni denba ye min b’a deenw kanu (Ezayi 66:12, 13). Miiri denba dɔ koo la min b’a janto a ka denɲɛnin na ni kanuya ye. A b’a ta k’a la a seen kan ani ka to k’a nigɛnigɛ ni kaan diiman ye. N’a be kasira wala n’a be tɔɔrɔla, a mako be min na, bamusoman b’o di a ma. N’an fana be tɔɔrɔla, an ka la a la ko Jehova b’an kanu. Zaburu sɛbɛbaga dɔ y’a fɔ ko: “Ne ka haminako tun ka ca kosɔbɛ tuma min na, i ye ne jigi tugu, ne nisɔndiyara.”—Zab. 94:19.

5. Jehova ka kanuya kantigiman ɲɛsinna ele ma cogo di?

⁵ Jehova ye kantigi ye (Zab. 100:5). Hali n’an ye koo jugu dɔ kɛ, a tɛ ban an na. Israɛldenw y’a dusu kasi siɲɛ caaman na. Nka tuma min na u nimisara, a y’u hakili sigi ko a bele b’u kanu. A y’a fɔ u ye ko: “Aw koo ka gwɛlɛ ne ma, aw ye fɛnba ye ne fɛ, aw koo ka di n ye fana.” (Ezayi 43:4, 5). Jehova b’an kanu o cogo kelen na bi. An be se k’an jigi la a kan tuma bɛɛ. Hali n’an ye jurumubaw kɛ, a tɛ ban an na. N’an nimisara ani ka kɔsegi a ma, an bena a ye ko a bele b’an kanu. A ye layidu ta ko a bena ‘yafa an ma tiɲɛ na.’ (Ezayi 55:7). Bibulu b’a fɔ ko n’a yafara an ma, a be komi a y’an ka “jurumuw . . . jɔsi ka bɔ yen.”—Kɛw. 3:19, Bible senuma.

6. Zakari 2:12 be mun lo yira an na Jehova koo la?

⁶ Zakari 2:12 kalan. O vɛrise kɔnɔ, Jehova y’an suma ni a ɲɛden ye. Mɔgɔ ɲɛden koo ka gwɛlɛ a ma ani a b’a janto a la kosɔbɛ. O la, a be komi Jehova b’a fɔra le ko: “Mɔgɔ o mɔgɔ mana koo jugu kɛ ne sagokɛla kanulenw na, fɛɛn min koo ka gwɛlɛ n’ ma, a magara o le la.” Jehova b’an kanu minkɛ, a b’an dusukunnakow faamu ani a labɛnnin lo k’an latanga. N’an be tɔɔrɔla, o b’a tɔɔrɔ fana. O la, an be se ka la a la ko a bena an jaabi n’an y’a deli ko: “Ne mara i ko mɔgɔ b’a ɲaden kɔlɔsi cogo min na.”—Zab. 17:8.

7. Mun na an ka ɲi ka la a la kosɔbɛ ko Jehova b’an kanu?

⁷ Jehova b’a fɛ an ka la a la ko a b’an kelen kelen bɛɛ kanu. Nka a b’a lɔn ko koo  minw y’an sɔrɔ an ka ɲɛnamaya kɔnɔ, o be se k’a to an b’an yɛrɛ ɲininga n’an koo be se ka diya a ye. Wala koo dɔw b’an kan minw b’a to an b’an yɛrɛ ɲininga n’a be an kanu tiɲɛn na. Mun lo bena a to an be la a la kosɔbɛ ko Jehova b’an kanu? Jehova b’a ka kanuya yira Yezu, kerecɛn mɔlenw ani an bɛɛ la cogo min na, an k’a ɲini k’o lɔn.

JEHOVA KA KANUYA YIRACOGO

8. Mun na Yezu tun lanin b’a la ko a Faa b’ale kanu?

⁸ Kabi saan waa caaman, Jehova n’a Dencɛ kanulen be ɲɔgɔn kanu kosɔbɛ. Jehova n’a Dencɛ be ɲɔgɔn fɛ kabi saan miliyari caaman. O saanw bɛɛ la, u y’u magwɛrɛ ɲɔgɔn na kosɔbɛ ani dɔ tora ka fara u ka kanuya barika kan. Matiyo 17:5 kɔnɔ, Jehova y’a yira Yezu la ka gwɛ ko a b’a kanu. Jehova tun be se k’a fɔ dɔrɔn ko: “Ne sagoladen lo.” Nka, a tun b’a fɛ an k’a lɔn ko a be Yezu kanu kosɔbɛ. O kama, a y’a weele ko “ne Denkɛ kanulen.” Jehova dusu diyara Yezu kɔrɔ sabu a sɔnna k’a niin di an kosɔn (Efɛz. 1:7). Yezu tun tɛ sigasiga fewu ko Jehova b’ale kanu. A tun b’a ye ko a Faa b’a kanu tiɲɛn na. A y’a fɔ siɲɛ caaman ko ale Faa b’ale kanu, hali a yɛrɛ ma sigasiga.—Zan 3:35; 10:17; 17:24.

9. Jehova be kerecɛn mɔlenw kanu cogo min na, o lakalila cogo di? A ɲɛfɔ (Ɔrɔmukaw 5:5).

⁹ Jehova y’a yira kerecɛn mɔlenw na fana ko a b’u kanu (Ɔrɔmukaw 5:5 kalan). A fɔra ko ‘Ala y’u kanu cogo min na, o b’u dusu la.’ Gɛrɛkikan na, o vɛrise b’a yira ko Jehova be kerecɛn mɔlenw kanu kosɔbɛ, fɔɔ an be se k’o suma ni baji ye. Jehova be kerecɛn mɔlenw kanu kosɔbɛ yɛrɛ le! Kerecɛn mɔlenw b’a lɔn ko u “koo ka di Faa Ala ye.” (Zude 1). Ciden Zan y’a yira ale ni kerecɛn mɔlen tɔɔw dusukunnako ye min ye tuma min na a y’a sɛbɛ ko: “Aw m’a ye an koo diyara Faa Ala ye cogo min na wa, fɔɔ an be wele yɛrɛ ko Ala deenw.” (1 Zan 3:1). Yala Jehova be kerecɛn mɔlenw dɔrɔn lo kanu wa? Ayi, a y’a yira ko a be an bɛɛ kanu.

10. Jehova y’a yira cogo kabakoman juman lo la ko a be ele kanu?

¹⁰ Jehova y’a yira cogo kabakoman juman na ko a be an kanu? A y’o yira kunmabɔsara sababu fɛ. Mɔgɔ si ma deli k’a yira ko a b’an kanu o cogo la! (Zan 3:16; Ɔrɔm. 5:8). Jehova Dencɛ min koo ka gwɛlɛ a ma, a y’a to ale sara adamadenw bɛɛ kosɔn. O la, an ka jurumuw be se ka yafa ani an be se ka kɛ Ala teriw ye (1 Zan 4:10). Jehova ni Yezu ye sɔngɔ gwɛlɛ min sara an kosɔn, n’an tora ka miiri o la, an bena a faamu ka ɲɛ u b’an kelen kelen bɛɛ kanu kosɔbɛ cogo min na (Gal. 2:20). Jehova ma kunmabɔsara di dɔrɔn sabu a tun ka ɲi ka koow kɛ ka kɛɲɛ n’a ka sariya tilenninw ye. Nka nilifɛn lo a ye min di an ma kanuya kosɔn. Mɔgɔ min koo ka gwɛlɛ Jehova ma kosɔbɛ, o ye Yezu lo ye. Jehova sɔnna k’ale lo saraka walisa k’a yira ko a b’an kanu yɛrɛ le! A y’a to a Dencɛ tɔɔrɔla ani ka sa an kosɔn.

11. Zeremi 31:3 b’an dɛmɛ ka mun lo faamu?

¹¹ I ko an y’a ye cogo min na, Jehova ka kanuya tɛ dan dusukunnakow dama lo ma. Nka, a b’a fɔ an ye fana a b’an kanu cogo min na (Zeremi 31:3 kalan). Jehova y’an sama ka na ale ma sabu a b’an kanu (Deteronɔmu 7:7, 8 lajɛ). Koo si ani mɔgɔ si tɛ se k’an faran ka bɔ o kanuya la (Ɔrɔm. 8:38, 39). O kanuya be mun lo kɛ ele la do? Jehova tun be Dawuda kanu ani a tun b’a janto a la. Zaburuw 23nan kalan k’a filɛ o ye min kɛ Dawuda la ani o be se ka nɔɔ min to an kelen kelen bɛɛ kan.

 JEHOVA KA KANUYA BE MUN LO KƐ ELE LA?

12. Ele bena Zaburuw 23nan kɔnɔnakumaw fɔ ka surunya cogo di?

¹² Zaburuw 23:1-6 kalan. Zaburuw 23nan ye dɔnkili ye Dawuda ye min sɛbɛ. O dɔnkili la, a y’a yira ko a lanin b’a la ko Jehova b’ale kanu ani ko a b’a janto ale la koɲuman. A y’a yira fana jɛnɲɔgɔnya barikaman min be ale n’a Marabaga Jehova cɛ. Dawuda tun b’a ye ko a latanganin lo sabu a tun b’a to Jehova lo k’a ɲɛminɛ ani a jigi bɛɛ tun lanin be a kan. A tun b’a lɔn ko a sii bɛɛ la, Jehova bena ale kanu. Mun na Dawuda tun lanin b’o la kosɔbɛ ten?

13. Mun na Dawuda tun lanin b’a la ko Jehova b’a janto ale la?

¹³ “Ne tena dɛsɛ foyi la.” Dawuda y’a ye ko Jehova b’a jantora ale la koɲuman yɛrɛ le sabu Jehova ka dɛmɛ barika la, a tun b’a makoɲɛfɛnw bɛɛ sɔrɔ tuma bɛɛ. A tun b’a lɔn fana ko ale ye Jehova teri ye ani ko ale koo ka di a ye. O lo kama, a tun lanin b’a la ko koow mana kɛ cogo o cogo, Jehova tun bena to k’a dɛmɛ. Dawuda tun lanin b’a la ko Jehova b’ale kanu ani ko a b’a janto ale la. O lo kama, a tun tɛ jɔɔrɔ. Nka, a ninsɔn tun ka di ani a tun wasanin lo.—Zab. 16:11.

14. Jehova b’a janto an na ni kanuya ye cogo di?

¹⁴ Jehova b’a janto an na ni kanuya ye sanko ni koo jugu dɔw ye an sɔrɔ. Claire a ye baara kɛ Betɛli la saan 20 ni kɔ. Tuma min na a somɔgɔw ye gwɛlɛyaw sɔrɔ ka tugu tugu ɲɔgɔn kɔ, a tun b’a jati ko dɛmɛbaga tɛ ale la. Tansiyɔn y’a facɛ faan kelen faga, a dɔgɔmuso dɔ gwɛnna ka bɔ kafo kɔnɔ, wariko gwɛlɛya tun be  a somɔgɔw kan ani u bɔnɛna u ka boon na. Jehova y’a yira u la cogo di ko a b’a janto u la ni kanuya ye? Claire ko: “Tuma bɛɛ, Jehova y’a janto walisa n’ somɔgɔw k’u makoɲɛfɛnw sɔrɔ loon o loon. Siɲɛ caaman na, an mako tun be min na, a y’o di an ma fɔɔ ka tɛmɛ o kan yɛrɛ! Jehova y’a janto n’ na ni kanuya ye cogo minw na, tuma caaman n’ be to ka miiri o la ani n’ tɛna ɲinɛ u kɔ abada! O koow ye n’ dɛmɛ n’ tora ka gwɛlɛyaw muɲu.”

15. Mun na Dawuda tun b’a jati ko ale barika lakurayara? (jaa lajɛ fana).

¹⁵ “A be ne barika lakuraya.”  Gwɛlɛyaw ni tɔɔrɔ minw tun be Dawuda kan, tuma dɔw la u tun b’a hakili ɲagami (Zab. 18:5-7). Nka Jehova tun be a kanu ani k’a janto a la minkɛ, o tun b’a barika lakuraya. Jehova tun b’a kɛ a tericɛ sɛgɛnnin be “lafiɲɛ binkɛnɛ yɔrɔ la” ani a tun be taga n’a ye “jida la ɲasuma yɔrɔ la.” O tun b’a to Dawuda be fanga kura sɔrɔ ani ka to ka Jehova sago kɛ ninsɔndiya la.—Zab. 18:29-33.

16. Jehova ka kanuya ye ele barika lakuraya cogo di?

¹⁶ O cogo kelen na bi, “Matigi ka makariba kosɔn, an ma halaki ka ban” gwɛlɛyaw kosɔn (Dus. 3:22; Kɔlɔs. 1:11). An ka Rachel ka koo lajɛ. A hakili bɛɛ tun ɲagamina tuma min na a cɛɛ bɔra Jehova kɔ ani a tagara k’a to yen COVID-19 fɔɲɔbana tuma na. Jehova ye Rachel dɛmɛ cogo di? A ko: “Jehova y’a to n’ k’a lɔn ko ale ni tɔɔw be n’ kanu. A ye n’ teriw lasun u tora ka wagati kɛ ni n’ ye, ka dumuni di n’ ma, ka mesaziw ni vɛrisew ci n’ ma walisa ka n’ jija. O teriw tun be yɛlɛ ni n’ ye ani ka n’ hakili jigi ko Jehova b’a jantora n’ na. N’ be Jehova fo tuma o tuma sabu n’ be denbayaba dɔ kɔnɔ min mɔgɔw be ɲɔgɔn kanu.”

17. Mun na Dawuda tun tɛ “siran foyi ɲa”?

¹⁷ “Ne tena siran foyi ɲa. E be ni ne ye.” Tuma caaman na, Dawuda niin tun be farati la sabu a juguw tun ka ca ani u tun ka fari. Nka Jehova ka kanuya kosɔn, a tun b’a ye ko a latanganin lo. A tun b’a ye fana ko Jehova be n’ale ye tuma bɛɛ ani o tun b’a hakili sigi. O la, a y’a la dɔnkili la ko: “[Jehova] ye ne kisi n ka siranyakow bɛɛ ma.” (Zab. 34:5). Tiɲɛn lo ko Dawuda tun be siran kosɔbɛ tuma dɔw la. Nka a ye see sɔrɔ o kan sabu a tun b’a lɔn ko Jehova b’ale kanu.

18. Ka la a la ko Jehova b’i kanu, o be se k’i barika bonya cogo di n’i sirannin lo?

 ¹⁸ Ka la a la ko Jehova b’an kanu, o be se k’an barika bonya cogo di ni jatigɛko dɔw y’an sɔrɔ? Balimamuso Susi ye piyɔniye ye. Tuma min na u dencɛ y’a yɛrɛ faga, a y’a lakali o ye min kɛ ale n’a cɛɛ la. A ko: “Ni gwɛrɛgwɛrɛko dɔ cunna i kan, o be se ka nɔɔba to i kan ani i be siran ko koo jugu wɛrɛw bena i sɔrɔ. Nka, Jehova ka kanuya y’a to an y’a ye ko an latanganin lo.” An kumana Rachel min koo la, ale ko: “Loon dɔ sufɛ n’ dusu tiɲɛna kosɔbɛ, siranyaba tun be n’ na ani n’ tun be hamina yɛrɛ le! N’ kasira ni kaanba ye ka to ka Jehova deli. Yɔrɔ nin kelen, n’ y’a ye ko a ye n’ dusu lafiya ani ka n’ hakili sigi i ko denba b’a ka denɲɛnin hakili sigi cogo min na. O kɔ, n’ sinɔgɔra. N’ tɛna ɲinɛ o loon kɔ abada!” Tasos ye diinan mɔgɔkɔrɔ ye ani a ye saan naani kɛ kaso la sabu a banna ka sɔrɔdasiya kɛ. A y’a ye cogo di ko Jehova b’a kanu ani k’a janto ale la? A ko: “N’ mako tun be fɛɛn o fɛɛn na, Jehova y’o di n’ ma fɔɔ ka tɛmɛ o kan yɛrɛ. O y’a to n’ lara a la kosɔbɛ ko n’ be se ka n’ jigi bɛɛ la a kan. Jehova ye n’ ninsɔn diya a ka hakili senu sababu fɛ, hali k’a sɔrɔ n’ tun be dusukasiyɔrɔ la. O ye n’ hakili sigi ko ni n’ lara Jehova la kosɔbɛ, n’ bena a ye ko a be n’ kanu yɛrɛ le! O la, n’ ye piyɔniye baara daminɛ kaso la.”

I MAGWƐRƐ KANUTIGI ALA LA

19. a) N’an b’a lɔn ko Ala b’an kanu, an bena to ka delili kɛ cogo di? b) Jehova ka kanuya lakalila cogo minw na, u la juman lo ka di ele ye kosɔbɛ? (Koorilen nin lajɛ: “ Vɛrise minw b’a yira ko Jehova b’an kanu kosɔbɛ.”)

¹⁹ An kumana mɔgɔ minw koo la, u bɛɛ ka koo b’a yira ko “kanuyatigi Ala” Jehova be n’an ye! (2 Kor. 13:11). A b’a mako don an kelen kelen bɛɛ la. An lanin b’a la ko “a b’a ka ɲumanya kɛ” an ye (Zab. 32:10). A b’a ka kanuya yira an na cogo minw na, n’an tora ka miiri o la, an bena la a la ani k’an magwɛrɛ a la kosɔbɛ. An be se k’a deli wagati min ka an diya ani k’a fɔ a ye a ka kanuya b’an nafa cogo min na. An be se k’an jɔɔrɔnankow bɛɛ fɔ a ye sabu an lanin b’a la ko a b’an faamu ani a b’a fɛ k’an dɛmɛ.—Zab. 145:18, 19.

20. Jehova b’an kanu minkɛ, o b’an lasun cogo di an k’an magwɛrɛ a la kosɔbɛ?

²⁰ Nɛnɛtuma na, a ka di an ye ka tasuma ja. O cogo kelen na, a ka di an ye k’an magwɛrɛ Jehova la sabu a b’an kanu. A ka kanuya barika ka bon ani a be makari. O la, ninsɔndiya sabu Jehova b’i kanu. Ani sɔn a ka kanuya ma i kɛtɔ k’a fɔ ko: “Masaba koo ka di ne ye”!—Zab. 116:1.