BAROKUN KALANTA KAFO KƆNƆ 3
DƆNKILI 35 ‘An k’a filɛ fɛɛn minw kɔrɔtanin lo kosɔbɛ’
Desizɔnw ta minw ka di Jehova ye
“Matigi ɲɛsiran ye hakilitigiya daminɛ ye. Ala Senuma dɔnniya ye faamuli ye.”—TALENW 9:10, Bible senuma.
BAROKUN KƆNƆNAKOW
An be se ka baara kɛ cogo min na ni lɔnniya, faamuyali ani hakilitigiya ye walisa ka desizɔn ɲumanw ta.
1. An bɛɛ be koo gwɛlɛ juman lo kɛ?
AN BE desizɔnw ta loon o loon. U dɔw man gwɛlɛ i n’a fɔ an bena min dumu daraka ye wala an bena taga la tuma min na. Nka, u dɔw ka gwɛlɛ i n’a fɔ minw ɲɛsinna an ka kɛnɛyako, an ka ninsɔndiya, an ka mɔgɔ kanulenw wala an ka batoli koo ma. An b’a fɛ an ka desizɔnw ka an yɛrɛ n’an somɔgɔw nafa. Min yɛrɛ kɔrɔtanin lo kosɔbɛ, o ye ko an b’a fɛ an ka desizɔnw ka diya Jehova ye.—Ɔrɔm. 12:1, 2.
2. I ka ɲi ka mun ni mun lo kɛ walisa ka desizɔn ɲumanw ta?
2 I ka teli ka desizɔn ɲuman ta koo dɔ la 1) n’i b’a ɲini ka kunnafoniw sɔrɔ, 2) n’i b’a ɲini ka Jehova ka miiriya lɔn o koo la ani 3) n’i be jatiminɛ kɛ. An bena o koo saba lajɛ barokun nin na ani o bena an dɛmɛ k’a faamu an be se ka dɔ fara an ka hakilitigiya kan cogo min na.—Talenw 2:11.
A ƝINI KA KUNNAFONIW SƆRƆ
3. Misali dɔ fɔ min b’a yira ko a kɔrɔtanin lo i k’a ɲini ka kunnafoniw sɔrɔ fɔlɔ ka sɔrɔ ka desizɔn dɔ ta.
3 I ka ɲi ka koo fɔlɔ min kɛ walisa ka desizɔn ɲuman dɔ ta, o ye k’a ɲini ka kunnafoniw sɔrɔ. Mun na o kɔrɔtanin lo? Miiri mɔgɔ dɔ koo la bana jugu be min na ani a tagara dɔgɔtɔrɔ dɔ fɛ. Yala dɔgɔtɔrɔ bena a lɔn a be se k’a furakɛ cogo min na n’a ma kɔn k’a filɛ ka ɲɛ fɔlɔ ani k’a ɲininga koo dɔw la wa? Ayi. Kunnafoni minw ɲɛsinna i ka koo ma, n’i kɔnna k’o bɛɛ sɛgɛsɛgɛ fɔlɔ, ele fana bena se ka desizɔn ɲumanw ta. I be se k’o kɛ cogo di?
4. Ka kɛɲɛ ni Talenw 18:13 ye, i be se ka kunnafoniw sɔrɔ cogo di? (jaa lajɛ fana).
4 N’i be ɲiningaliw kɛ, i ka teli ka kunnafoniw sɔrɔ. Miiri k’a filɛ ko u y’i weele ɲɛnagwɛ dɔ la. Yala i bena taga wa? Mɔgɔ min y’i weele, n’i t’o tigi lɔn ka ɲɛ wala n’i t’a lɔn min bena kɛ o ɲɛnagwɛ la, i ka ɲi k’a ɲininga koo dɔw la i n’a fɔ: “O ɲɛnagwɛ bena kɛ yɔrɔ juman ani tuma juman? Mɔgɔ hakɛ juman lo bena kɛ yen? Jɔn lo be koow kun na? Jɔn ni jɔn lo bena kɛ yen? Koo jumanw lo bena kɛ o ɲɛnagwɛ la? Yala dɔrɔ bena kɛ yen wa?” O ɲiningaliw jaabili bena i dɛmɛ ka desizɔn ɲuman ta.—Talenw 18:13 kalan.
Ɲiningaliw kɛ walisa ka kunnafoniw sɔrɔ (dakun 4nan lajɛ). a
5. N’i ye kunnafoniw sɔrɔ ka ban, i ka ɲi ka mun lo kɛ do?
5 N’i ye kunnafoniw bɛɛ sɔrɔ ka ban, miiri koɲuman koow bɛɛ la. Misali la, n’a sɔrɔ i y’a mɛn ko minw bena kɛ o ɲɛnagwɛ la, u dɔw tɛ bonya la Bibulu ka sariyaw kan. Wala i y’a mɛn ko dɔrɔ bena kɛ yen ani mɔgɔ be se k’a min a sago la. N’o lo, i bena mun lo kɛ do? Ele fɛ, yala o fɛti tɛna laban ka kɛ koo ferekenin ye wa? (1 Piyɛri 4:3). Faan wɛrɛ fɛ, i bena mun lo kɛ n’i y’a mɛn k’o ɲɛnagwɛ wagati be bɛn aw ka kafo ka lajɛn wala i ka waajuli kɛwagati ma? N’i miirila o koow bɛɛ la koɲuman, i bena se ka desizɔn ɲuman ta. Nka i ka ɲi ka koo wɛrɛ kɛ. Sisan, i b’a lɔn ele be min miiri o koo la. Nka yala i b’a lɔn Jehova be min miiri wa?—Talenw 2:6.
A ƝINI KA JEHOVA KA MIIRIYA LƆN
6. Ka kɛɲɛ ni Zaki 1:5 ye, mun na an ka ɲi ka dɛmɛ ɲini Jehova fɛ delili la?
6 Jehova deli a k’i dɛmɛ k’a faamu ale yɛrɛ be min miiri o koo la. A ye layidu ta ko a bena hakilitigiya di an ma walisa an k’a lɔn ni desizɔn dɔ bena diya a ye wala n’a tɛna diya a ye. A b’o hakilitigiya di an ma bɛrɛbɛrɛ sabu “a tigɛ man gwɛlɛ, a be mɔgɔ bɛɛ sɔn ka ɲa. A t’an sɔngɔ ka sɔrɔ k’an sɔn.”—Zaki 1:5 kalan.
7. I be se ka Jehova ka miiriya lɔn cogo di? Misali dɔ fɔ.
7 N’i ye dɛmɛ ɲini Jehova fɛ, kɔrɔsili kɛ koɲuman k’a filɛ a bena i ka delili jaabi cogo min na. Miiri k’a filɛ ko i tagara tagama dɔ la ani i tununa. O la, i ye mɔgɔ dɔ ɲininga ko a ka sira yira i la. Sanni a yɛrɛ ka se k’i jaabi, yala i bena tɛmɛ n’i ka sira ye wa? Ayi, i tɛna o kɛ abada! N’a be sira yirala i la, i bena a lamɛn koɲuman. O cogo kelen na, n’i ye hakilitigiya deli Jehova fɛ, a ɲini k’a ka jaabili lɔn i kɛtɔ k’a filɛ Bibulu ka sariyaw ni sariyakolo minw ɲɛsinna i ka koo ma. Misali la, an kumana ɲɛnagwɛko min koo la, n’i b’a latigɛra n’i bena taga wala n’i tɛna taga, miiri k’a filɛ Bibulu be min fɔ koo nunu na: ɲɛnagwɛko ferekeninw, jɛnɲɔgɔn juguw ani ka Ala ka Masaya kɛ i ɲɛnako fɔlɔ ye.—Mat. 6:33; Ɔrɔm. 13:13; 1 Kor. 15:33.
8. N’i mako be dɛmɛ na walisa ka kunnafoni dɔw sɔrɔ, i ka ɲi ka mun lo kɛ do? (jaa lajɛ fana).
8 Nka tuma dɔw la, i mako bena kɛ dɛmɛ na walisa ka kunnafoni dɔw sɔrɔ. I be se ka ladili ɲini balima kolɔnbaga dɔw fɛ. N’i be sɛgɛsɛgɛri kɛ i yɛrɛ ma, o fana be se k’i nafa. An ka sɛgɛsɛgɛrikɛ minan nunu be se k’i dɛmɛ ka kunnafoni nafaman caaman sɔrɔ: Guide de recherche pour les Témoins de Jéhovah ani gafe Versets pour la vie chrétienne. Kana ɲinɛ ko i ka laɲinita ye ka desizɔn dɔ ta min bena diya Jehova ye.
A ɲini ka Jehova ka miiriya lɔn (dakun 8nan lajɛ). b
9. Mun lo bena a to an be la a la ko an ka desizɔn bena diya Jehova ye? (Efɛzikaw 5:17).
9 An be se ka la a la cogo di ko an ka desizɔn bena diya Jehova ye? A fɔlɔ, an ka ɲi k’a ɲini ka Jehova lɔn koɲuman. Bibulu b’a fɔ ko “Ala Senuma dɔnniya ye faamuli ye.” (Talenw 9:10, Bible senuma). Tiɲɛn na, Jehova jogow, a sago, min ka di a ye ani min man di a ye, n’an b’o lɔn, an be faamuyali sɔbɛ sɔrɔ. I yɛrɛ ɲininga ko: “N’ be min lɔn Jehova koo la, o be se ka n’ dɛmɛ cogo di ka desizɔn dɔ ta min ka di a ye?”—Efɛzikaw 5:17 kalan.
10. An somɔgɔw ani an sigiɲɔgɔnw be koow kɛ cogo min na, mun na Bibulu ka sariyakolow kɔrɔtanin lo ka tɛmɛ o kan?
10 Walisa k’an koo diya Jehova ye, tuma dɔw la an bena an ka mɔgɔ kanulen dɔw jigi tigɛ. Misali la, bangebaga dɔw be se k’a gwan u denmuso kun ko a ka furu cɛɛ dɔ ma min ye waritigi ye wala min be se ka furunafoloba di. K’a sɔrɔ a tɛ jɛnɲɔgɔnya ɲuman kɛra ni Jehova ye. N’a sɔrɔ o bangebagaw be ni ŋaniya ɲuman ye sabu u b’a fɛ u denmuso ka fɛɛrɛ a ka ɲɛnamaya kɔnɔ. Nka, jɔn lo bena a dɛmɛ a ka ɲɛtaga kɛ Alako ta fan fɛ? Jehova be mun lo miiri o koo la? An b’o jaabili sɔrɔ Matiyo 6:33 kɔnɔ. O yɔrɔ la, Yezu ye kerecɛnw jija ko u ka “Ala ka masaya . . . ɲini fɔlɔ.” Tiɲɛn lo ko an be bonya la an bangebagaw ani an sigiɲɔgɔnw kan. Nka min kɔrɔtanin lo kosɔbɛ an fɛ, o ye ko an b’a fɛ ka Jehova dusu diya.
JATIMINƐ KƐ
11. Jogo juman lo kofɔra Filipikaw 1:9, 10 kɔnɔ min bena an dɛmɛ ka jatiminɛ kɛ desizɔnw koo la?
11 N’i y’a lɔn Bibulu ka sariyakolo minw be se k’i dɛmɛ ka desizɔn ɲuman ta, a tora i ka jatiminɛ kɛ (Filipikaw 1:9, 10 kalan). Hakilitigiya bena i dɛmɛ ka desizɔnw kelen kelen bɛɛ nɔfɛkow lɔn. Tuma dɔw la, a ka nɔgɔ ka desizɔn ta. Nka desizɔn bɛɛ lo ta man nɔgɔ. Hakilitigiya bena i dɛmɛ ka desizɔn ɲuman ta, hali koo gwɛlɛw na.
12-13. Hakilitigiya be se k’i dɛmɛ cogo di ka desizɔn ɲuman ta baloɲini baara koo la?
12 Miiri k’a filɛ ko i be baara ɲinina walisa k’i ka denbayamɔgɔw mako wasa. U ye baara fila kofɔ i ye. I y’a ɲini ka koow bɛɛ lɔn o baaraw koo la i n’a fɔ baara sugu minw lo, u be kɛ wagati min na, i ka ɲi ka wagati min ta ka sɔrɔ ka se yen ani a ɲɔgɔnnaw. O baara fila bɛɛ bɛnnin lo kerecɛn ma. N’a sɔrɔ i ɲɛɛ bɔnin be kelen fɛ ka tɛmɛ sabu o baara sugu ka di i ye wala a sara ka ca. Nka koo wɛrɛw be yen i ka ɲi k’i janto minw na ka sɔrɔ ka desizɔn dɔ ta.
13 Misali la, yala o baaraw dɔ wagati be bɛn i ka kafo ka lajɛn wagati ma wa? Yala o baaraw dɔ bena a to i tɛ wagati bɛrɛ sɔrɔ tugun k’i janto i somɔgɔw dusukunnakow n’u ka Alakow la wa? O ɲiningaliw bena i dɛmɛ ka sinsin ‘koo ɲuman,’ o kɔrɔ koo kɔrɔtaninbaw lo kan sanni k’a ɲini ka wari caaman sɔrɔ. O koo kɔrɔtaninw ye i ka batoli ani i ka denbaya makoyaw ye. N’i sinsinna o koo kɔrɔtaninw kan, i bena se ka desizɔn dɔ ta, Jehova bena i duga min kosɔn.
14. Hakilitigiya ni kanuya bena an dɛmɛ cogo di an kana tɔɔw kunnatiɲɛ?
14 Hakilitigiya b’a to fana an ka miiri k’a filɛ an ka desizɔn be se ka nɔɔ min to mɔgɔ wɛrɛw kan. O la, an tɛna “kɛ sababu ye ka mɔgɔ si kunnacɛn.” (1 Kor. 10:32). O kɔrɔtanin lo n’an be desizɔn dɔw tara ka ɲɛsin an yɛrɛ ma i n’a fɔ an ka fani doncogo ani an kuun masiricogo koo la. Misali la, n’a sɔrɔ fani modɛli dɔ wala kuun dilancogo dɔ ka di an ye. Nka n’o be kafoden dɔw wala mɔgɔ wɛrɛw kɔnɔ gwan do? Hakilitigiya bena a to an b’an janto u dusukunnakow la. An bena koow kɛ ni majigilenya ye ani k’an “tɔɲɔgɔn” nafa lo ɲini sabu an b’a kanu (1 Kor. 10:23, 24; 1 Tim. 2:9, 10). O la, an bena desizɔn dɔ ta min b’a yira ko an be tɔɔw kanu ani an be bonya la u kan.
15. N’an b’a fɛ ka desizɔn dɔ ta min kɔrɔtanin lo, an ka ɲi ka miiri mun lo la fɔlɔ?
15 N’i ka ɲi ka desizɔnba dɔ ta, miiri k’a filɛ fɔlɔ i mako bena kɛ fɛɛn minw bɛɛ la. Yezu y’a fɔ an ye ko n’an b’a fɛ ka koo o koo kɛ, an ka jatiminɛ kɛ fɔlɔ (Luka 14:28). O la, n’i b’a fɛ i ka desizɔn dɔ ka ɲɛ i bolo, miiri k’a filɛ i mako be wagati ni wari hakɛ min na ani i ka ɲi ka jijali minw bɛɛ kɛ. Tuma dɔw la, n’a sɔrɔ i ka ɲi k’a filɛ n’i somɔgɔw ye, u kelen kelen bɛɛ be se ka min kɛ walisa o desizɔn ka ɲɛ. Mun na a ka ɲi i ka koow kɛ o cogo la? O bena i dɛmɛ k’a faamu n’i ka ɲi ka yɛlɛmani don i ka desizɔn koo la wala ni desizɔn wɛrɛ lo bena fisaya. N’i b’i somɔgɔw ɲininga u ka miiriya la ani n’i b’u lamɛn, u bena sɔn k’i dɛmɛ walisa i ka desizɔn ka ɲɛ i bolo.—Talenw 15:22.
DESIZƆN TA MIN BENA ƝƐ I BOLO
16. Mun ni mun lo bena i dɛmɛ ka desizɔn ɲuman ta? (koorilen nin fana lajɛ: “ Desizɔn ɲumanw tacogo”).
16 Ladili minw dira ka tɛmɛ, i y’u sira tagama wa? Yala i y’a ɲini ka kunnafoniw bɛɛ sɔrɔ wa? Bibulu ka sariyakolo minw be se k’i dɛmɛ ka desizɔn ɲuman ta, yala i y’u labato wa? N’o lo, i labɛnnin lo ka desizɔn ɲuman ta. Jehova deli a k’i dɛmɛ walisa i bena desizɔn min ta, o ka ɲɛ i bolo.
17. I ka ɲi ka koo jɔnjɔn juman lo kɛ walisa ka desizɔn ɲumanw ta?
17 N’a sɔrɔ i ye desizɔn ɲuman caaman ta fɔlɔ la. O bɛɛ n’a ta, i ka ɲi ka koo jɔnjɔn min to i hakili la, o ye ko walisa ka to ka desizɔn ɲumanw ta, i man ɲi k’i jigi la i yɛrɛ ka hakilitigiya n’i ka lɔnniya kan. Nka, i ka ɲi k’i jigi la Jehova ka hakilitigiya lo kan. Ale kelenpe lo be se ka lɔnniya sɔbɛ, faamuyali koɲuman ani hakilitigiya sɔbɛ di i ma. A kɔrɔtanin lo an ka kɛ n’o jogow ye walisa ka to ka desizɔn ɲumanw ta (Talenw 2:1-5). Tiɲɛn na, Jehova be se k’i dɛmɛ ka desizɔnw ta minw ka di a ye.—Zab. 23:2, 3.
DƆNKILI 28 O Jehova, jɔn lo bena kɛ i teri ye?
