1. An be se ka mun lo kɛ walisa ka Jehova dusu diya?

 MIIRI k’a filɛ: I ye bonyafɛn dɔ di i ka mɔgɔ kanulen dɔ ma. O bonyafɛn cɛ ka ɲi, ani nafa b’a la. N’o tigi y’i ka bonyafɛn ta k’a bila ani ka ɲinɛ a kɔ, o bena i dusu tiɲɛ, tiɲɛn tɛ? Nka, n’i y’a ye k’o tigi be baara kɛra n’o bonyafɛn ye ani n’a y’a ka waleɲumanlɔn yira i la, o bena diya i ye. O misali b’an kalan mun lo la? Jehova y’a Dencɛ di k’a kɛ kunmabɔsara ye an nafa kosɔn. Kanuya lo y’a to Jehova y’o nilifɛn nafamanba d’an ma. N’an b’a waleɲuman lɔn o kosɔn, o ka d’a ye yɛrɛ le!—Zan 3:16; Ɔrɔm. 5:7, 8.

 2. An bena mun lo lajɛ barokun nin na?

² N’an m’an janto, saanw tɛmɛtɔ, an be se k’a daminɛ ka miiri ko kunmabɔsara ye fɛɛn gwansan lo ye. N’an tɛ Jehova waleɲuman lɔn tugun kunmabɔsara koo la, a bena kɛ komi an y’a ka nilifɛn nafaman ta k’a bila ani ka ɲinɛ a kɔ. N’an t’a fɛ o ka kɛ, Jehova ni Yezu ye min kɛ an ye, an ka ɲi ka to ka miiri o la. Barokun nin bena an dɛmɛ k’o kɛ. An bena a ye kunmabɔsara b’an nafa cogo min na bi bi nin na ani a bena an nafa cogo min na sini ma. An bena ye fana an be se k’an ka waleɲumanlɔn yira cogo min na Jehova ka kanuya koo la, sanko Krista saya Hakilijigi wagati nin na.

KUNMABƆSARA B’AN NAFA COGO MIN NA BI

 3. Kunmabɔsara b’an nafa cogo minw na bi, u dɔ kofɔ.

³ Kabi sisan, Yezu ka kunmabɔsara b’an nafa. Misali la, Jehova be basigi o lo kan k’an ka jurumuw yafa. Waajibi tɛ a  ka yafa an ma. Nka ale yɛrɛ lo b’a fɛ k’o kɛ. Zaburu sɛbɛbaga Dawuda ye Jehova waleɲuman lɔn a ka yafali kosɔn. A ko: “Matigi, e ka ɲi, e be yafa.”—Zab. 86:5; 103:3, 10-13.

 4. Jehova ye kunmabɔsara di jɔnw lo kosɔn? (Luka 5:32; 1 Timote 1:15).

⁴ Jehova b’an ka jurumuw yafa, nka dɔw b’a miiri k’olu man kan n’o ye. Tiɲɛn fɔ ka di, an si yɛrɛ man kan n’o ye. Ciden Pol tun y’a faamu ko ale “man kan ka wele ko ciden yɛrɛ.” Nka, a y’a fɔ fana ko: “Ne be yɔrɔ min na sisan, o ye Ala ka nɛɛma nɔɔ ye.” (1 Kor. 15:9, 10). N’an nimisara an ka jurumuw na, Jehova be yafa an ma. Mun na do? A ma kɛ komi an ka kan n’o ye le, nka a be yafa an ma sabu a b’an kanu. N’i dusu tiɲɛni lo sabu i b’a miiri ko i man kan ni Jehova ka yafali ye, a to i hakili la ko a ma kunmabɔsara di mɔgɔ dafaninw kosɔn. Nka, jurumukɛla minw nimisanin lo, a y’a di olu lo kosɔn.—Luka 5:32; 1 Timote 1:15 kalan.

 5. Yala waajibi lo Jehova ka yafa an ma wa? A ɲɛfɔ.

⁵ An si man kan k’a miiri ko Jehova ka kan ka yafa an ma sabu an b’a batora a saan caaman ye nin ye. Tiɲɛn lo ko an be kantigiya min kɛra Jehova ye kabi saan caaman, a tɛ ɲinɛ o kɔ (Eburuw 6:10). Nka, kunmabɔsara tɛ an ka baara sara ye. Jehova y’a di an ma gwansan le. O la, an man kan k’a miiri ko a ka kan ka yafa an ma sabu an ye baara caaman kɛ a ye. N’an b’o miiri, a bena kɛ komi an b’a fɔra le ko kuun tɛ Krista saya la.—Galatikaw 2:21 lajɛ.

 6. Mun na Pol ye baaraba kɛ Jehova ye?

⁶ Pol tun b’a lɔn ko a mana min o min kɛ Jehova ka baara la, a man kan ni Ala ka nɛɛma ye. N’o lo, mun na a ye baaraba kɛ Jehova ye? A m’o kɛ walisa k’a yira ko a ka kan ni Jehova ka nɛɛma ye. Nka Jehova ye ɲumanya ani nɛɛma min kɛ Pol ye, a ye baaraba kɛ walisa k’a ka waleɲumanlɔn yira o lo koo la (Efɛz. 3:7). I ko Pol, an be kisɛya Jehova ka baara la walisa k’a yira ko an b’a waleɲuman lɔn. Nka, an t’o kɛ walisa k’a yira ko an ka kan ni a ka nɛɛma ye.

 7. Kunmabɔsara b’an nafa cogo wɛrɛ juman na bi? (Ɔrɔmukaw 5:1; Zaki 2:23).

⁷ Kunmabɔsara b’an nafa cogo wɛrɛ min na bi, o ye ko a be sababu di an ma ka jɛnɲɔgɔnya teriman kɛ ni Jehova ye. a I ko an y’a ye barokun tɛmɛnin na cogo min na, an wolotuma na, jɛnɲɔgɔnya tun tɛ an ni Jehova cɛ. Nka kunmabɔsara barika la, “hɛrɛ donna an ni Ala cɛ” ani an be se k’an magwɛrɛ a la.—Ɔrɔmukaw 5:1; Zaki 2:23 kalan.

 8. Nɛɛmaba lo an fɛ ka delili kɛ. Mun na an ka ɲi ka Jehova waleɲuman lɔn o kosɔn?

⁸ An be jɛnɲɔgɔnya min kɛra ni Jehova ye, o be sababu di an ma ka kuma a fɛ delili la. Delili minw be kɛ an ka lajɛnw n’an ka lajɛnbaw la, Jehova b’u lamɛn, nka o dɔrɔn tɛ. A b’an kelen kelen bɛɛ ka deliliw lamɛn fana. Delili be se k’an hakili sigi. Nka o dɔrɔn lo tɛ delili nafa ye. An be teriya min kɛra ni Ala ye, delili be se k’o barika bonya (Zab. 65:3; Zaki 4:8; 1 Zan 5:14). Tuma min na Yezu tun be dugukolo kan, a tun ka teli ka delili kɛ sabu a tun b’a lɔn ko Jehova b’ale lamɛn. A tun b’a lɔn fana ko delili be se k’ale n’a Faa ka jɛnɲɔgɔnya barika bonya (Luka 5:16). Yezu ka saraka barika la, an be se ka kɛ Jehova teri ye ani ka kuma a fɛ delili la. An be Jehova waleɲuman lɔn yɛrɛ le o kosɔn!

 KUNMABƆSARA BENA AN NAFA COGO DI SINI MA?

 9. Kunmabɔsara bena Ala sagokɛla kantigiw nafa cogo di sini ma?

⁹ Kunmabɔsara bena Jehova sagokɛla kantigiw nafa cogo di sini ma? U bena ɲɛnamaya banbali sɔrɔ. Mɔgɔ caaman b’a miiri ko o tɛ se ka kɛ sabu a saan waa caaman ye nin ye, adamadenw be sa. Nka kabi a daminɛ, Jehova sagonata tun ye ko adamadenw ka ɲɛnamaya kɛ fɔɔ abada. Ni Adama tun ma jurumu kɛ, mɔgɔ si tun tɛna a miiri ko an tɛ se ka ɲɛnamaya kɛ fɔɔ abada. Hali n’a ka gwɛlɛ an ma sisan ka miiri k’a filɛ ko an be se ka ɲɛnamaya kɛ fɔɔ abada, an be se ka la a la ko o bena kɛ. Mun na do? Sabu Jehova ye sɔngɔ gwɛlɛ sara o kama, o min ye a yɛrɛ Dencɛ niin ye.—Ɔrɔm. 8:32.

10. Kerecɛn mɔlenw ani saga dɔ wɛrɛ mɔgɔw kɔrɔtɔnin lo mun lo ka kɛ?

¹⁰ Hali ni an bena ɲɛnamaya banbali sɔrɔ sini ma le, Jehova b’a fɛ an ka to ka miiri o la kabi sisan yɛrɛ. Kerecɛn mɔlenw kɔrɔtɔnin lo ka ɲɛnamaya diyabɔ sankolo la ani ka dugukolo mara ni Krista ye (Yir. 20:6). Saga dɔ wɛrɛ mɔgɔw jigi b’a la ka ɲɛnamaya kɛ alijɛnɛ kɔnɔ dugukolo kan. Dusukasi ni tɔɔrɔw tɛna kɛ yen (Yir. 21:3, 4). Yala i ye saga dɔ wɛrɛ mɔgɔ dɔ ye ani i jigi b’a la ka ɲɛnamaya kɛ fɔɔ abada dugukolo kan wa? Minw bena ɲɛnamaya kɛ sankolo la, kana a miiri ko olu ka duga ka fisa n’i ta ye. A daminɛ na, Ala ye adamadenw dan walisa u ka ɲɛnamaya kɛ fɔɔ abada dugukolo kan le. O la, ka ɲɛnamaya kɛ dugukolo kan, o bena an ninsɔn diya cogo min na, o tɛ se ka fɔ!

11-12. An bena duga minw sɔrɔ alijɛnɛ kɔnɔ ani an be se ka miiri u la kabi sisan, u dɔw kofɔ (jaaw lajɛ fana).

¹¹ Miiri k’a filɛ i ka ɲɛnamaya bena kɛ cogo min na alijɛnɛ kɔnɔ dugukolo kan. I tɛna jɔrɔ ka ye ko i bena bana wala ka sa (Ezayi 25:8; 33:24). I negelako minw bɛnnin lo, Jehova bena u bɛɛ wasa. Yala a bena diya i ye ka dɔ lɔn bɛgɛnw koo la, ka fɔlifɛn dɔ degi wala ka desɛn kɛcogo degi wa?  Siga t’a la, an mako bena kɛ bonlɔbaga ŋanaw ani sɛnɛkɛlaw la. An mako bena kɛ fana tobilikɛlaw, baarakɛminan dilanbagaw, zaradɛn ladonbagaw n’a ɲɔgɔnnaw na (Ezayi 35:1; 65:21). Komi i bena ɲɛnamaya kɛ fɔɔ abada, i bena se k’o koow bɛɛ ni koo caaman wɛrɛw kɛ tugun.

¹² Mɔgɔ minw suu bena kunu, miiri k’a filɛ i bena ninsɔn diya cogo min na k’u bisimila! (Kɛw. 24:15). Miiri k’a filɛ fana i ninsɔn bena diya cogo min na ka koo caaman wɛrɛw lɔn Jehova koo la, i kɛtɔ k’a ka danfɛnw sɛgɛsɛgɛ (Zab. 104:24; Ezayi 11:9). Min yɛrɛ bena an ninsɔn diya ka tɛmɛ, o ye ko an tɛna jurumu si kɛ! O la, an mako tɛna kɛ a la ka yafa deli an ka jurumuw kosɔn. Yala i bena a to o dugaw ka taga k’i dan sabu i b’a fɛ “ka to lafiya la waati dɔɔni hakɛ la” wa? (Eburuw 11:25). Ayi dɛ! I be jijali minw bɛɛ kɛra sisan walisa k’o dugaw sɔrɔ, kuun b’o la. A to i hakili la ko i be ni jigiya min ye ka ɲɛnamaya kɛ alijɛnɛ kɔnɔ dugukolo kan, o bena dafa loon dɔ. An tun tɛna o dugaw si sɔrɔ ni Jehova tun ma an kanu kosɔbɛ fɔɔ k’a Dencɛ niin saraka an kosɔn!

JEHOVA WALEƝUMAN LƆN A KA KANUYA KOSƆN

13. An be se k’a yira cogo di ko an be Jehova waleɲuman lɔn a ka kanuya kosɔn? (2 Korɛntikaw 6:1).

¹³ Jehova ye kunmabɔsara di minkɛ, an be se k’a yira cogo di ko an b’a waleɲuman lɔn o kosɔn? An kɛtɔ k’a ka baara kɛ an ɲɛnako fɔlɔ ye (Mat. 6:33). An k’a to an hakili la ko Yezu sara “waasa mɔgɔ minw be nii na, olu kana taama u yɛrɛ sago la tugu, nga u k’o kɛ ale kosɔn, min sara ka kunun u ka nafa kosɔn.” (2 Kor. 5:15). Jehova ye nɛɛmaba min kɛ an ye, siga t’a la, an t’a fɛ o ka kɛ gwansan ye.—2 Korɛntikaw 6:1 kalan.

14. An be se k’a yira cogo di ko an lanin lo Jehova la?

¹⁴ An be se k’a yira fana ko an be Jehova waleɲuman lɔn a ka kanuya kosɔn, an kɛtɔ ka la a la ani k’a ka ladiliw sira tagama. An be se k’o kɛ cogo di do? Misali la, n’a sɔrɔ an ka ɲi k’a latigɛ an bena lakɔlikalan kɛ fɔɔ ka se hakɛ min na wala an bena sɔn baara sifa min ma. O koow ɲɔgɔn na, an ka ɲi ka miiri k’a filɛ Jehova b’a fɛ an ka min kɛ (1 Kor. 10:31; 2 Kor. 5:7). N’an be desizɔnw ta sabu an limaniyanin lo Jehova la, an ka limaniya barika be bonya a koo la, an ni ale ka teriya be sabati ani an ka jigiya be kɛ tiɲɛnko ye an ɲɛɛ na ka tɛmɛ fɔlɔ kan.—Ɔrɔm. 5:3-5; Zaki 2:21, 22.

15. An be se k’an ka waleɲumanlɔn yira Jehova la cogo di Krista saya Hakilijigi wagati la?

¹⁵ An be se k’an ka waleɲumanlɔn yira Jehova la a ka kanuya kosɔn cogo wɛrɛ la tugun. O ye k’an seko bɛɛ kɛ Krista saya Hakilijigi wagati la k’a yira Jehova la ko an b’a waleɲuman lɔn kosɔbɛ kunmabɔsara kosɔn. An be se ka labɛnw kɛ walisa ka na  Hakilijigi lajɛn na ani ka mɔgɔ wɛrɛw weele u ka na fara an kan (1 Tim. 2:4). I bena mɔgɔ minw weele ka na, a ɲɛfɔ u ye koow bena kɛ cogo min na. I be se ka videwo nunu fana yira u la jw.org kan: Mun na Yezu sara? ani I hakili to Yezu saya koo la. Mɔgɔ minw sumana Alako ta fan fɛ, diinan mɔgɔkɔrɔw ka ɲi k’u janto fana k’u weele ka na. Miiri k’a filɛ ninsɔndiya min be kɛ sankolo la ani dugukolo kan ni Jehova ka saga tununin dɔ kɔsegira kafo kɔnɔ! (Luka 15:4-7). Hakilijigi lajɛn loon na, an ka ɲɔgɔn fo i ko an be deli k’a kɛ cogo min na. Minw nana kura ye Masaya Boon na wala minw mɛɛnna ka na, an ka ɲi ka banba ka olu yɛrɛ lo fo. An b’a fɛ u k’a lɔn ko an ninsɔn ka di k’u ye.—Ɔrɔm. 12:13.

16. An be baara min kɛra Jehova ye, mun na an ka ɲi k’a filɛ an be se ka dɔ fara o kan cogo min na Krista saya Hakilijigi wagati la?

¹⁶ I be baara min kɛra Jehova ye, yala i be se k’a latigɛ ka dɔ fara o kan Krista saya Hakilijigi wagati la wa? O ye fɛɛrɛ ɲuman yɛrɛ lo ye k’a yira ko Ala ni Krista ye koo minw bɛɛ kɛ an ye, i b’u waleɲuman lɔn o kosɔn. N’an b’an seen don bɛrɛbɛrɛ Jehova ka baara la, an bena la a la kosɔbɛ ani an bena to k’a ye ko a b’an dɛmɛna (1 Kor. 3:9). Bibulu kalangwɛ porogramu min labɛnna Hakilijigi lajɛn kama, i jija fana ka tugu o kɔ. A be sɔrɔ kitabunin Ala ka Kuma sɛgɛsɛgɛ loon o loon kɔnɔ ani tablo min be Lajɛnsɛbɛ kɔnɔ. I yɛrɛ be se k’a latigɛ k’o vɛrisew sɛgɛsɛgɛ ka dunya i ka kelenna kalan tuma na.

17. Mun lo ka di Jehova ye? (koorilen nin fana lajɛ: “ I be se k’i ka waleɲumanlɔn yira Jehova la cogo minw na a ka kanuya kosɔn”).

¹⁷ N’a sɔrɔ i ka koow cogoya kosɔn, i tɛna se ka barokun nin ka ladiliw bɛɛ sira tagama. Nka, a to i hakili la ko i be sera ka min kɛ, Jehova t’o suma ni tɔɔw ta ye sabu a b’i kɔnɔnako lɔn. Kunmabɔsara ye Jehova ka nilifɛn nafamanba yɛrɛ lo ye! A mana a ye ko i b’a waleɲuman lɔn kosɔbɛ o kosɔn, o ka di a ye.—1 Sam. 16:7; Mariki 12:41-44.

18. Mun na an be Jehova Ala ani Yezu Krista waleɲuman lɔn?

¹⁸ Kunmabɔsara dɔrɔn lo barika la an ka jurumuw be se ka yafa, an be se ka teriya kɛ ni Jehova ye ani an be ni jigiya ye ka ɲɛnamaya kɛ fɔɔ abada. Jehova y’o dugaw kɛ an ye sabu a b’an kanu. An ka to k’a yira a la tuma bɛɛ ko an b’a waleɲuman lɔn o kosɔn (1 Zan 4:19). An ka to k’an ka waleɲumanlɔn yira Yezu fana na, ale min y’an kanu kosɔbɛ fɔɔ a y’a niin di an kosɔn!—Zan 15:13.