BAROKUN KALANTA KAFO KƆNƆ 4
DƆNKILI 18 Débordants de gratitude pour la rançon (Waleɲumanlɔn, kunmabɔsara koo la)
Kunmabɔsara b’an kalan mun lo la?
“Ala y’a ka kanuya yira an na ten le.”—1 ZAN 4:9.
BAROKUN KƆNƆNAKOW
Kunmabɔsara b’an dɛmɛ ka min faamu Jehova Ala ani Yezu Krista ka jogo ɲumanbaw koo la.
1. Saan o saan n’an be taga Krista ka saya Hakilijigi lajɛn na, an be nafa juman lo sɔrɔ o la?
SIGA t’a la, i lanin b’a la ko kunmabɔsara ye nilifɛn dɔ ye min nafa ka bon kosɔbɛ yɛrɛ le! (2 Kor. 9:15). I be se ka teriya sɔbɛ kɛ ni Jehova Ala ye sabu Yezu sɔnna k’a niin saraka. Jigiya b’i fɛ fana ka ɲɛnamaya kɛ fɔɔ abada. Jehova ye kunmabɔsara di sabu a b’an kanu kosɔbɛ. O la, a bɛnnin lo an k’a waleɲuman lɔn o kosɔn (Ɔrɔm. 5:8). Walisa k’an dɛmɛ an ka to k’an ka waleɲumanlɔn yira ani an kana kunmabɔsara jati fɛɛn gwansan ye abada, Yezu y’a ɲini an fɛ ko saan o saan, an ka to k’an hakili jigi ale ka saya koo la.—Luka 22:19, 20.
2. An bena kuma mun lo koo la barokun nin na?
2 Ɲinan saan 2025, Hakilijigi lajɛn bena kɛ samedilon, awirilikalo tile 12. Siga t’a la, an bɛɛ be labɛnw kɛra walisa ka se ka taga. Jehova n’a Dencɛ ye min kɛ an ye, n’an be wagati ta ka miiri a o la Krista saya Hakilijigi wagati la, o bena an nafa kosɔbɛ. Barokun nin na, an bena a ye kunmabɔsara b’an kalan fɛɛn minw na Jehova n’a Dencɛ koo la. Barokun nata la, an bena a faamu an be se ka nafa sɔrɔ kunmabɔsara la ani k’an ka waleɲumanlɔn yira a koo la cogo min na.
KUNMABƆSARA B’AN KALAN MIN NA JEHOVA KOO LA
3. Mɔgɔ kelen ka saya be se ka mɔgɔ miliyɔn caaman kunmabɔ cogo di? (jaa lajɛ fana).
3 Kunmabɔsara b’a yira an na ko tilenninya ka di Jehova ye (Deter. 32:4). Mun na an ko ten? Miiri nin na: Adama ye Ala kaan bila minkɛ, an ye jurumu sɔrɔ cɛɛn ye, o min b’a to an be sa (Ɔrɔm. 5:12). Walisa k’an kisi ka bɔ jurumu ni saya la, Jehova ye labɛnw kɛ janko Yezu ka kɛ kunmabɔsara ye. Nka, mɔgɔ dafanin kelen be se ka mɔgɔ miliyɔn caaman kunmabɔ cogo di? Ciden Pol y’a ɲɛfɔ ko: “Mɔgɔ caaman kɛra hakɛkɛlaw ye, [Adama] kelen ka murutili kosɔn, o cogo la fana [Yezu] kelen ye Ala sago kɛ minkɛ, mɔgɔ caaman bena jati mɔgɔtilenninw ye.” (Ɔrɔm. 5:19; 1 Tim. 2:6). Pol tun b’a fɔra le ko adamadenw bɛɛ kɛra jurumutɔw ye ani u be sa sabu mɔgɔ dafanin kelen murutira Ala ma. O la, an kisira ka bɔ jurumu ni saya la mɔgɔ dafanin kelen ka kanminɛli sababu la.
An kɛra jurumu ni saya ka jɔɔnw ye cɛɛ kelen sababu la. O cogo kelen na, cɛɛ kelen sababu la, an hɔɔrɔnyara (dakun 3nan lajɛ).
4. Adamaden minw tun bena kanminɛli kɛ, mun na Jehova ma sin k’a to u be ɲɛnamaya banbali sɔrɔ?
4 Yala waajibi tun lo Yezu ka sa walisa k’an kisi wa? Adamaden minw tun bena kanminɛli kɛ, yala Jehova tun tɛ se ka sin k’a to u be ɲɛnamaya kɛ fɔɔ abada wa? An adamaden dafabaliw be se k’a miiri ko o ye koow ɲɛnabɔcogo ɲuman lo ye. Nka Jehova fɛ, o tilennin tɛ sabu a tun bena kɛ komi Adama ma jurumuba kɛ ani a deenw ma kɛ jurumutɔw ye. An do b’a lɔn k’o tɛ tiɲɛn ye.
5. Mun na an be se ka la a la ko Jehova bena koo tilennin kɛ tuma bɛɛ?
5 Nka, ni Jehova tun ma kunmabɔsara di ani a y’a ɲɛɛ tugu tilenninya kan, k’a to adamaden dafabaliw ka ɲɛnamaya kɛ fɔɔ abada do? N’a sɔrɔ mɔgɔw tun bena a miiri ko Jehova bena a ɲɛɛ tugu tilenninya kan koo wɛrɛw la. U tun bena u yɛrɛ ɲininga ni Jehova bena a ka layiduw bɛɛ dafa. Nka, an man ɲi ka sigasiga sabu Jehova b’a ka layiduw dafa tuma bɛɛ. Hali n’a tun bena a Dencɛ kanulen lo saraka, a tun labɛnnin lo o kama walisa ka koow kɛ tilenninya la. O b’an hakili sigi ko a bena to ka koow kɛ tilenninya la tuma bɛɛ.
6. Jogo wɛrɛ juman lo y’a to Jehova y’a Dencɛ ci ka na dugukolo kan? (1 Zan 4:9, 10).
6 Tiɲɛn lo ko kunmabɔsara b’an dɛmɛ k’a faamu ko Jehova tilennin lo. Nka o dɔrɔn tɛ. A b’an dɛmɛ fana k’a faamu ko a b’an kanu kosɔbɛ (Zan 3:16; 1 Zan 4:9, 10 kalan). Jehova y’a Dencɛ ci ka na sa an kosɔn sabu a b’a fɛ an ka ɲɛnamaya kɛ fɔɔ abada ani an ka kɛ a ka denbayamɔgɔ dɔw ye. An ka miiri nin na: Tuma min na Adama ye jurumu kɛ, Jehova y’a gwɛn ka bɔ a ka denbayamɔgɔw cɛma. O kama, an si tɛ Jehova ka denbayamɔgɔ dɔ ye an wolotuma na. Nka, adamaden minw bɛɛ limaniyanin lo Jehova la ani u be mɛnni kɛ a fɛ, Jehova be olu ka jurumuw yafa kunmabɔsara barika la ani a laban, a bena a to u be kɛ a ka denbayamɔgɔ dɔw ye. Kabi sisan, Jehova be se k’an ka jurumuw yafa ani an be se ka jɛnɲɔgɔnya teriman kɛ n’ale n’an balimaw ye. Tiɲɛn na, Jehova b’an kanu kosɔbɛ yɛrɛ le!—Ɔrɔm. 5:10, 11.
7. Yezu tɔɔrɔla kosɔbɛ walisa ka kunmabɔsara di. O b’a yira cogo di ko Jehova b’an kanu kosɔbɛ?
7 Jehova ye fɛɛnba min saraka walisa ka kunmabɔsara di, o b’an dɛmɛ k’a faamu ko a b’an kanu kosɔbɛ. Sutana y’a fɔ ko Ala sagokɛla si tɛna to kantigiya la ni tɔɔrɔ b’a kan. Jehova y’a to Yezu tɔɔrɔla ka sɔrɔ ka sa walisa k’a yira ko Sutana ye ngalontigɛla ye (Zɔbu 2:1-5; 1 Piyɛri 2:21). Tuma min na mɔgɔw tun be Yezu lɔgɔbɔra, sɔrɔdasiw tun b’a bugɔra ani k’a gwengwe lɔgɔ kan, Jehova ɲɛɛ tun b’o la. O kɔ, a y’a ye a Dencɛ kanulen ɲanina cogo min na ka sɔrɔ ka sa (Mat. 27:28-31, 39). See tun b’a ye ka daan sigi o tɔɔrɔw bɛɛ la wagati min k’a diya. Misali la, Yezu juguw y’a fɔ ko: “An k’a filɛ sisan ni Ala ben’a kisi.” Jehova tun be se ka sin k’a kisi (Mat. 27:42, 43). Nka n’a tun y’o kɛ, kunmabɔsara tun tɛna di ani an tun tɛna kɛ ni jigiya si ye. O la, Jehova y’a to a Dencɛ tɔɔrɔla fɔɔ ka taga se saya ma.
8. Tuma min na Jehova y’a ye a Dencɛ be tɔɔrɔla, yala o y’a dusu kasi wa? A ɲɛfɔ (jaa lajɛ fana).
8 An kana a miiri ko Jehova tɛ hinɛ sabu Sebagayabɛɛtigi lo. Anw be hinɛ. Komi an danna Jehova jaa la, o kɔrɔ ko ale fana be hinɛ. Bibulu b’a fɔ ko an be se ka “don a gasi la” ani k’a “dusu kasi.” (Zab. 78:40, 41). An ka kuma dɔɔni fana Ibrayima ni Isiyaka koo la. A to i hakili la ko Ala tun y’a ɲini Ibrayima fɛ, a k’a deen kelenpe saraka (Zɛnɛzi 22:9-12; Eburuw 11:17-19). Miiri k’a filɛ Ibrayima dusu kasira cogo min na tuma min na a tun b’a fɛ k’a dencɛ Isiyaka faga. Siga t’a la, Jehova dusu kasira kosɔbɛ ka tɛmɛ o kan tuma min na a tun b’a yera mɔgɔw b’a Dencɛ tɔɔrɔla ani k’a faga!—Videwo nin lajɛ jw.org kan: Imitez leur foi : Abraham (partie 2).
Jehova dusu kasira tuma min na a y’a Dencɛ ye a be tɔɔrɔla (dakun 8nan lajɛ).
9. Jehova be ele n’i kerecɛnɲɔgɔnw kanu kosɔbɛ cogo min na, Ɔrɔmukaw 8:32, 38, 39 b’an dɛmɛ k’o faamu cogo di?
9 Kunmabɔsara b’an dɛmɛ k’a faamu ko mɔgɔ si t’an kanu ka se Jehova ma, hali an somɔgɔw wala an teri sɔbɛ (Ɔrɔmukaw 8:32, 38, 39 kalan). Siga t’a la, Jehova b’an kanu kosɔbɛ ka tɛmɛ an yɛrɛ kan. Yala i b’a fɛ ka to niin na fɔɔ abada wa? A lɔn ko Jehova b’o fɛ ka tɛmɛ ele yɛrɛ kan. Yala i b’a fɛ i ka jurumuw ka yafa wa? Jehova b’o fɛ fana ka tɛmɛ ele yɛrɛ kan. A be min ɲini an fɛ dɔrɔn, o ye ka limaniya a la, ka mɛnni kɛ a fɛ ani k’an ka waleɲumanlɔn yira kunmabɔsara koo la. Tiɲɛn na, kunmabɔsara ye nilifɛn nafamanba dɔ ye min b’a yira Jehova b’an kanu kosɔbɛ cogo min na. Ani duniɲa kura kɔnɔ, an bena fɛɛn caaman wɛrɛw faamu Jehova ka kanuya koo la.—Waaj. 3:11.
KUNMABƆSARA B’AN KALAN MUN LO LA YEZU KOO LA?
10. a) Mun na Yezu dusu tun kasinin lo kosɔbɛ? b) Yezu ye Jehova tɔgɔ saniya cogo di? (koorilen nin fana lajɛ: “ Yezu ka kantigiya ye Jehova tɔgɔ saniya”).
10 Mɔgɔw be min miiri a Faa koo la, o kɔrɔtanin lo kosɔbɛ Yezu fɛ (Zan 14:31). U ye ngalon la Yezu kan ko a y’a Faa nɛni ani ko kojugukɛla lo. A tun dusu kasinin lo kosɔbɛ sabu a tun t’a fɛ o koo k’a Faa tɔgɔ tiɲɛ. O lo kama a ye delili kɛ ko: “N Faa, ne kisi tɔɔrɔ nin ma n’a be se ka kɛ.” (Mat. 26:39). Yezu y’a Faa Jehova tɔgɔ saniya pewu sabu a tora kantigiya la fɔɔ ka taga se saya ma.
11. Yezu y’a yira cogo di ko a be mɔgɔw kanu kosɔbɛ? (Zan 13:1).
11 Kunmabɔsara b’an dɛmɛ fana k’a faamu ko Yezu b’a janto kosɔbɛ mɔgɔw la, sanko a ka kalandenw (Talenw 8:31; Zan 13:1 kalan). Yezu tun bena koo minw kɛ a ka cidenya baara la dugukolo kan, a tun b’a lɔn ko u dɔw tun bena gwɛlɛya a ma kosɔbɛ. A tun bena tɔɔrɔ cogo min na ka sɔrɔ ka sa, o yɛrɛ lo tun bena gwɛlɛya a ma ka tɛmɛ. Yezu m’o koo gwɛlɛw kɛ dɔrɔn sabu Jehova lo y’a ɲini a fɛ. Nka, a y’o kɛ fana sabu a be adamadenw kanu. Yezu y’a yira ko a be adamadenw kanu kosɔbɛ, a kɛtɔ k’u waaju, k’u kalan ani k’u dɛmɛ. Hali a fagalon na, a y’a ka cidenw seen ko, k’u jija ani k’u dusu saalo (Zan 13:12-15). Hali k’a sɔrɔ Yezu tun be tɔɔrɔla kosɔbɛ gwengwelɔgɔ kan, a ye jigiya di kojugukɛla dɔ ma a gɛrɛfɛ. A y’a fɔ a ye ko a bena kɛ alijɛnɛ kɔnɔ. Yezu y’a yira fana ko a b’a janto a bamuso la, a kɛtɔ k’a kalifa Zan ma (Luka 23:42, 43; Zan 19:26, 27). Yezu m’a yira a ka saya dɔrɔn lo fɛ ko a be adamadenw kanu kosɔbɛ. Nka, a tora ka tɔɔw dɛmɛ a ka ɲɛnamaya kuru bɛɛ la.
12. Yezu b’an dɛmɛna cogo di sisan?
12 Tiɲɛn lo ko Yezu sara “siɲaga kelenpe,” nka a bele be koo caaman kɛra an ye (Ɔrɔm. 6:10, Biblu Ala ta Kuma). Cogo di do? Fɛɛn ɲuman caaman minw be sɔrɔ kunmabɔsara sababu fɛ, Yezu be baara kɛra walisa an ka se k’o sɔrɔ. Miiri k’a filɛ a bolo degunnin lo cogo min na: A ye an ka Masacɛ, sarakalasebagaw Kuntigiba ani kafo Kuntigi ye (1 Kor. 15:25; Efɛz. 5:23; Eburuw 2:17). A ɲinina a fɛ ko a ka kerecɛn mɔlenw ani jamakuluba mɔgɔw lajɛn ani a ka ɲi ka tila o baara la yanni tɔɔrɔba wagati ka ban b (Mat. 25:32; Mariki 13:27). Yezu b’a janto fana a ka kalanden kantigiw ka dumuni ɲuman sɔrɔ Alako ta fan fɛ laban tuma nin na (Mat. 24:45). A ka saan waa kelen mara kuru bɛɛ la, a bena to ka baara kɛ an nafa kama. Tiɲɛn na, Jehova y’a Dencɛ di an kosɔn yɛrɛ le!
TO K’A ƝINI KA KOO WƐRƐW FAAMU
13. Ala ni Krista b’an kanu cogo min na, i be se ka to k’a ɲini ka koo wɛrɛw lɔn o koo la cogo di?
13 Jehova Ala ni Yezu Krista ye min kɛ i ye, n’i tora ka miiri o la, i bena to ka koo wɛrɛw faamu u ka kanuya koo la. Ɲinan, Yezu saya Hakilijigi wagati la, i be se ka Evanzili kelen wala damanin kalan koɲuman. Kana a ɲini ka sapitiri caaman kalan wagati kelen na. Nka, i ka kalan sumaya ani dalilu wɛrɛw ɲini minw bena a to i be Jehova ni Yezu kanu. Ani i ye min faamu, banba k’o kofɔ tɔɔw ye.
14. Sɛgɛsɛgɛri be se k’an dɛmɛ cogo di ka koo wɛrɛw lɔn kunmabɔsara ani kalan wɛrɛw koo la? (Zaburuw 119:97; jaa lajɛ fana).
14 N’i be tiɲɛn diinan na kabi saan caaman, n’a sɔrɔ i b’i yɛrɛ ɲiningara n’i be se ka koo kura wɛrɛw lɔn koo nunu koo la: Ala ka tilenninya, a ka kanuya ani kunmabɔsara. Ka tiɲɛn fɔ, an bena to ka koo kuraw lɔn o koow ani koo wɛrɛw la tuma bɛɛ. O la, i be se ka mun lo kɛ do? Kunnafoni nafaman minw be sɔrɔ an ka gafew kɔnɔ, banba k’u kalan ani ka sɛgɛsɛgɛri kɛ u kan. N’i ma yɔrɔ dɔ faamu ka ɲɛ, sɛgɛsɛgɛri kɛ a kan. O kɔ, i ye min faamu Jehova, a Dencɛ ani u ka kanuya koo la, miiri o la tile kuru bɛɛ la.—Zaburuw 119:97 kalan.
Hali n’an be tiɲɛn batoli la a saan caaman ye nin ye, an bele be se ka to ka dɔ fara an ka waleɲumanlɔn kan kunmabɔsara koo la (dakun 14nan lajɛ).
15. Mun na a kɔrɔtanin lo an ka to k’a ɲini ka koo kuraw faamu Bibulu kɔnɔ?
15 Tuma o tuma n’i be kalan kɛra, n’i ma koo kura dɔ wala koo diiman dɔ sɔrɔ, kana i fari faga. I be komi mɔgɔ min be cɛncɛn tɛntɛnna walisa ka sanu sɔrɔ. Sanu ɲinilaw muɲunin lo. U be se ka baara kɛ lɛri wala loon caaman ka sɔrɔ ka sanukuru dennin dɔ sɔrɔ. Nka, u t’u fari faga sabu u b’a lɔn ko sanu mana dɔgɔya cogo o cogo, a nafa ka bon kosɔbɛ. O cogo kelen na, an be koo kura o koo kura faamu Bibulu kɔnɔ, o nafa ka bon ka tɛmɛ sanu ta kan fɔɔ ka taga ka na! (Zab. 119:127; Talenw 8:10). O la, muɲu ka to k’i ka Bibulu kalan porogramu labato.—Zab. 1:2.
16. An be se ka Jehova ni Yezu ladegi cogo di?
16 Bibulu sɛgɛsɛgɛtɔ, i be min faamuyara, to k’i yɛrɛ ɲininga i be se k’o sira tagama cogo min na. Misali la, i be se ka Jehova ka tilenninya ladegi, n’i be bɛɛ minɛ ni tilenninya ye. Yezu be a Faa ani mɔgɔw kanu cogo min na, i be se k’o ladegi n’i be sɔn ka tɔɔrɔ Jehova tɔgɔ kosɔn ani ka baara kɛ walisa k’i balimaw mako ɲɛ. I be se ka Yezu ladegi fana, i kɛtɔ ka seereya kɛ tɔɔw ye walisa olu fana ka sababu sɔrɔ ka sɔn Jehova ka nilifɛn nafamanba la.
17. An bena mun lo lajɛ barokun nata la?
17 N’an tora k’a ɲini ka koo wɛrɛw lɔn kunmabɔsara koo la, dɔ bena to ka fara an ka kanuya kan Jehova ni Yezu koo la. Olu fana bena to k’an kanu kosɔbɛ (Zan 14:21; Zaki 4:8). O la, Jehova ye fɛɛn minw di an ma, an ka baara kɛ n’u ye walisa ka dɔ lɔn tugun kunmabɔsara koo la. An be nafa minw sɔrɔ kunmabɔsara barika la, an bena u dɔw lajɛ barokun nata la. An bena a ye fana an be se ka Jehova waleɲuman lɔn cogo min na a ka kanuya kosɔn.
DƆNKILI 107 An ka Ala ka kanuya ladegi
a KUMA DƆ ƝƐFƆLI: Ka miiri, o kɔrɔ ko ka to ka jatiminɛ kɛ koo dɔ kan walisa k’a ɲini k’o faamu bɛrɛbɛrɛ.
b “Fɛɛn. . . minw be sankolo la,” Pol kumana olu lajɛnnin koo la Efɛzikaw 1:10 kɔnɔ. ‘Mɔgɔ minw wolomana,’ Yezu fana kumana olu lajɛnnin koo la Matiyo 24:31 ani Mariki 13:27 kɔnɔ. O lajɛnnin fila tɛ kelen ye. Minw bena masaya kɛ ni Yezu ye sankolo la, tuma min na Jehova be olu sugandira ani k’u mɔ ni hakili senu ye, Pol tun be kumana o wagati koo le la. Nka kerecɛn mɔlen tɔɔ minw be dugukolo kan, Yezu tun be kumana olu lajɛnnin koo le la sankolo la tɔɔrɔba tuma na.
