BAROKUN KALANTA KAFO KƆNƆ 1
DƆNKILI 2 I tɔgɔ ko Jehova
Nɔɔrɔ la Jehova kan
SAAN 2025 KA KALANKUN: “Aw ka Masaba [Jehova] tɔgɔ boɲa.”—ZAB. 96:8.
BAROKUN KƆNƆNAKOW
Jehova ka kan ni nɔɔrɔ min ye, an bena a ye an be se k’o la a kan cogo minw na.
1. Bi, mɔgɔ caaman be miiri mun lo la?
I M’A kɔrɔsi ko bi, mɔgɔ caaman be miiri u yɛrɛ dɔrɔn lo la wa? Misali la, dɔw b’u yɛrɛ yira rezo sosiyow kan. Nka mɔgɔ minw be nɔɔrɔ la Jehova Ala kan bi, u daa ka dɔgɔ. Barokun nin na, an bena a faamu a kɔrɔ ye min ye ka nɔɔrɔ la Jehova kan ani fɛɛn min kama an ka ɲi k’o kɛ. Jehova ka kan ni nɔɔrɔ min ye, an bena a ye an be se k’o la a kan cogo min na. An bena a ye fana ale yɛrɛ bena nɔɔrɔ la a tɔgɔ kan cogo min na yanni dɔɔni.
KA NƆƆRƆ LA JEHOVA KAN, O KƆRƆ KO DI?
2. Jehova y’a nɔɔrɔ yira cogo di Sinayi kulu kan? ( jaa lajɛ fana).
2 Nɔɔrɔ kɔrɔ ko di? Bibulu kɔnɔ n’a fɔra ko “nɔɔrɔ,” o ɲɛsinna fɛɛn o fɛɛn ma min b’a to mɔgɔ ka kan ni bonya ye. Dɔɔni Israɛldenw hɔɔrɔnyanin kɔ ka bɔ jɔnya la Ezipiti, Jehova y’a ka nɔɔrɔ yira u la cogo kabakoman na. Miiri k’a filɛ, Israɛlden miliyɔn caaman lajɛnna Sinayi kulu gɛrɛfɛ walisa ka Ala lamɛn. Sankabafin dɔ ye kulu kuun datugu. Yɔrɔnin kelen, yɔrɔ bɛɛ kɛra sisi ye, dugukolo yɛrɛyɛrɛla kosɔbɛ, saan pɛrɛnna ka manamana ani buru fiyɛkanba dɔ bɔra (Ɛkiz. 19:16-18; 24:17; Zab. 68:9). Miiri k’a filɛ Israɛldenw siranna kosɔbɛ cogo min na tuma min na Jehova y’a ka nɔɔrɔ yira cogo kabakoman na ten!
Sinayi kulu kan, Jehova y’a ka nɔɔrɔ yira Israɛldenw na cogo kabakoman na (dakun 2nan lajɛ).
3. Ka nɔɔrɔ la Jehova kan, o kɔrɔ ko di?
3 Nka, yala an adamadenw be se ka nɔɔrɔ la Jehova kan tiɲɛn na wa? Ɔnhɔn, an be se. An be se k’o kɛ cogo minw na, u dɔ ye k’a ka sebagaya kabakoman n’a ka jogo ɲumanbaw kofɔ tɔɔw ye. N’an b’a yira ko Ala barika lo la an be sera ka koow kɛ, an be nɔɔrɔ la a kan o cogo la fana (Ezayi 26:12). Masacɛ Dawuda ye ɲɛyirali ɲuman ye an fɛ sabu a ye nɔɔrɔ la Jehova kan. A ye delili dɔ kɛ Israɛldenw jamaba ɲɛɛ fɛ ko: “Boɲa y’i ta ye, Masaba, see b’i ye, kunkɔrɔta ni nɔɔrɔ b’i kan. Bari sankolofɛnw ni dugukolo taw bɛɛ ye i ta ye.” Dawuda tilanin kɔ o delili la, “jama ye Masaba, u faaw ka Ala tanu.”—1 Til. Kib. 29:11, 20.
4. Yezu ye nɔɔrɔ la Jehova kan cogo di?
4 Tuma min na Yezu tun be dugukolo kan, a tun be nɔɔrɔ la a Faa kan, a kɛtɔ k’a yira ko a be kabakow kɛ a Faa ka setigiya lo barika la (Mariki 5:18-20). Yezu tun be kuma a Faa koo la cogo min na ani a tun be tɔɔw minɛ cogo min na, a y’a yira o fɛ fana ko a be nɔɔrɔ la a Faa Jehova kan. Loon dɔ, Yezu tun be mɔgɔw kalanna kalanso dɔ kɔnɔ. A lamɛnbagaw cɛma, muso dɔ tun be yen, jinabana tun be min na kabi saan 18. O bana tun y’a kɔɔ kuru fɔɔ a tun tɛ se ka tilen ka lɔ. O be mɔgɔ dusu kasi yɛrɛ le! O muso makari ye Yezu minɛ minkɛ, a gwɛrɛla a la ani a y’a fɔ a ye ni ɲumanya ye ko: “Muso, i kɛnɛyatɔ filɛ nin ye.” O kɔ, a y’a bolo la o muso kan. O yɔrɔnin bɛɛ, muso kɔɔ tilenna ani “a y’a daminɛ ka Ala tanu.” O muso ye Ala waleɲuman lɔn kosɔbɛ sabu a kɛnɛyara! (Luka 13:10-13). Joo tun be o muso fɛ ka nɔɔrɔ la Jehova kan ani joo be an fana fɛ k’o kɛ.
MUN NA AN BE NƆƆRƆ LA JEHOVA KAN?
5. Mun na an be bonya la Jehova kan?
5 An be nɔɔrɔ la Jehova kan sabu an be bonya la kan kosɔbɛ. An be bonya la a kan kuun caaman kosɔn. Jehova lo ye Sebagayabɛɛtigi ye ani daan t’a ka sebagaya la (Zab. 96:4-7). A ka danfɛnw b’a yira ka gwɛ ko a ka hakilitigiya ka bon. Ale lo ye niin di an ma ani an mako be fɛɛn o fɛɛn na walisa ka to niin na, a b’o di an ma fana (Yir. 4:11). Kantigi lo (Yir. 15:4). A ka kokɛtaw bɛɛ be ɲɛ a bolo ani a b’a ka layiduw dafa tuma bɛɛ (Zozuwe 23:14). A tɛ bari an na k’a ye ko kira Zeremi y’a fɔ Jehova koo la ko: “Siyaw ka lɔnnikɛlaw bɛɛ cɛma, ni jamanaw bɛɛ kɔnɔ, ele ɲɔgɔn te yen”! (Zer. 10:6, 7). Siga t’a la, an be bonya la an sankolola Faa kan kuun caaman kosɔn. Nka, Jehova man kan ni bonya dɔrɔn ye. An ka ɲi k’a kanu fana.
6. Mun na an be Jehova kanu?
6 An be nɔɔrɔ la Jehova kan sabu an b’a kanu kosɔbɛ. An be Jehova kanu sabu a be ni jogo ɲuman caaman ye. A be hinɛ ani a be makari an na (Zab. 103:13; Ezayi 49:15). N’an be tɔɔrɔla, o be ale fana dusu kasi (Zak. 2:12). A b’a to an be se ka teriya kɛ n’a ye cogo nɔgɔman na (Zab. 25:14; Kɛw. 17:27). A majiginin lo sabu “a b’a yɛrɛ majigi ka dugukolo ni sankolo filɛ. A be makaritɔ wili ka bɔ duguma.” (Zab. 113:6, 7). Yala o koow bɛɛ t’a to an b’a ɲini ka nɔɔrɔ la an ka Ala kɔrɔtaninba kan wa?—Zab. 86:12.
7. Sababu kɛrɛnkɛrɛnnin juman lo b’an fɛ?
7 An be nɔɔrɔ la Jehova kan sabu an b’a fɛ tɔɔw k’a lɔn. Mɔgɔ caaman tɛ tiɲɛn lɔn Jehova koo la. Mun na do? Sabu Sutana ye ngalon caaman jɛnsɛn Jehova koo la ka mɔgɔw hakili dibi (2 Kor. 4:4). Sutana y’a to mɔgɔ caaman b’a miiri ko Jehova ka fari, a t’a janto an na ani ko tɔɔrɔ minw b’an kan bi, u fanba ye Ala nɔɔ lo ye. Nka an kɔni be tiɲɛn lɔn an ka Ala koo la! O la, sababu lo an fɛ k’a fɔ tɔɔw ye Jehova ye Ala sugu min ye tiɲɛn na ani k’u dɛmɛ olu fana ka nɔɔrɔ la a kan (Ezayi 43:10). Zaburuw 96nan b’a yira ka gwɛ ko an ka ɲi ka nɔɔrɔ la Jehova kan. O Zaburu yɔrɔ dɔw lajɛtɔ, Jehova ka kan ni nɔɔrɔ min ye, miiri k’a filɛ i be se k’o la a kan cogo min na.
JEHOVA KA KAN NI NƆƆRƆ MIN YE, AN BE SE K’O LA A KAN COGO DI?
8. An be se ka nɔɔrɔ la Jehova kan cogo minw na, u la dɔ ye juman ye? (Zaburuw 96:1-3).
8 Zaburuw 96:1-3 kalan. An be nɔɔrɔ la Jehova kan, n’an be kuma a koo la. Zaburuw 96 daminɛyɔrɔ la, a ɲinina Jehova sagokɛlaw fɛ ko u ka “dɔnkili la Masaba ye,” “k’a tɔgɔ boɲa,” “k’a ka kisili koo fɔ” ani “k’a ka bonya fɔ siyaw cɛma.” An be se ka nɔɔrɔ la an sankolola Faa kan o sababuw bɛɛ fɛ. Yahutu kantigiw ani saan kɛmɛkulu fɔlɔ kerecɛnw tun tɛ sigasiga k’a fɔ tɔɔw ye Jehova ye koo ɲuman minw bɛɛ kɛ olu ye ani u tun b’a tɔgɔ lafasa (Dan. 3:16-18; Kɛw. 4:29). An be se k’u ladegi cogo di?
9-10. I be kalan juman lo sɔrɔ Angelina ka koo la? (jaa lajɛ fana).
9 Balimamuso dɔ be Etazini ani a tɔgɔ ko Angelina. a An k’a ka koo lajɛ. A ka baarakɛyɔrɔ la, a y’a jaa gwɛlɛya ka Jehova tɔgɔ lafasa. Ale ni minw tun ye mɔgɔ kuraw ye o baara la, u y’a ɲini u fɛ u ka koo dɔw fɔ u yɛrɛ koo la u baarakɛɲɔgɔn tɔɔw ye. A ye foto dɔw labɛn walisa k’a yira ale ninsɔn ka di cogo min na ka kɛ Jehova Seere ye. Nka sanni kuma ka di a ma, a baarakɛɲɔgɔn dɔ ye kuma ta ani k’a fɔ ko ale bangebagaw ye Jehova Seerew ye. A y’a daminɛ ka Jehova Seerew lɔgɔbɔ u ka lannakow kosɔn. Angelina ko: “N’ dusukun y’a daminɛ ka panpan. Nka, n’ y’a fɔ n’ yɛrɛ ye ko: ‘Yala n’ bena a to mɔgɔ dɔ ka ngalon la Jehova kan wa? Wala n’ bena a tɔgɔ lafasa?’”
10 O baarakɛɲɔgɔn kumana ka ban tuma min na, Angelina ye delili surun dɔ kɛ a kɔnɔ. O kɔ, a y’a fɔ a ye ni ɲumanya ye ko: “Ne ka koo bɔnin be i ta ma. Ne fana bangebagaw ye Jehova Seerew ye ani ne fana bele y’u dɔ ye.” Hali ni siranya tun be Angelina na, a y’a hakili sigi. A ye foto dɔw yira a baarakɛɲɔgɔnw na. O fotow be ale n’a teriw yira u be Jehova batora ninsɔndiya la. O kɔ, a y’a ka lannakow ɲɛfɔ ni bonya ye (1 Piyɛri 3:15). Mun lo sɔrɔla o la? Angelina kumana ka ban tuma min na, a baarakɛɲɔgɔn magayara. A yɛrɛ ye koo diiman dɔw lakali minw kɛra a denmisɛn tuma na, wagati min na a tun be jɛn ni Jehova Seerew ye. Angelina ko: “Jehova tɔgɔ ka kan ka lafasa ani nɛɛma lo k’o kɛ.” An fana be se ka nɔɔrɔ la Jehova kan, hali ni tɔɔw tɛ bonya la a kan. O ye nɛɛmaba yɛrɛ lo ye an fɛ!
An be se ka nɔɔrɔ la Jehova kan an ka kumaw, an bololafɛnw ani an ka kɛwalew fɛ (dakun 9-10 lajɛ). b
11. Sanga ni wagati bɛɛ, Jehova batobaga sɔbɛw ye Zaburuw 96:8 sira tagama cogo di?
11 Zaburuw 96:8 kalan. An be se ka nɔɔrɔ la Jehova kan n’an bololafɛnw ye. Kabi sanga ni wagati bɛɛ, Jehova batobaga sɔbɛw be nɔɔrɔ la a kan o cogo la (Talenw 3:9). Misali la, Israɛldenw ye niliw kɛ Alabatosoba lɔli n’a ladonko kama (2 Mas. 12:5, 6; 1 Til. Kib. 29:3-9). Krista ka kalanden dɔw tun b’u janto ale n’a ka cidenw na, u kɛtɔ k’u dɛmɛ “n’u bololafɛnw ye.” (Luka 8:1-3). Saan kɛmɛkulu fɔlɔ kerecɛnw tun be niliw kɛ fana walisa k’u balima dɛsɛbagatɔw dɛmɛ (Kɛw. 11:27-29). Bi fana, an be se ka nɔɔrɔ la Jehova kan an ka niliw sababu fɛ.
12. An be se ka nɔɔrɔ la Jehova kan an ka niliw sababu fɛ cogo di? (jaa lajɛ fana).
12 An be nɔɔrɔ la Jehova kan an ka niliw sababu fɛ. An ka misali kelen dɔrɔn lajɛ min b’o yira. Saan 2020, jaa dɔ kɛra Zimbabuwe min mɛɛnna kosɔbɛ. An balimamuso dɔ min tɔgɔ ko Prisca, ale ni mɔgɔ miliyɔn caaman tun be ɲini ka sa kɔngɔ bolo. O bɛɛ n’a ta, arabalon ni jumalon, Prisca tun be to ka taga waajuli kɛ. A tora k’o kɛ hali sɛnɛ wagati la. A sigiɲɔgɔnw tun b’a lɔgɔbɔ sabu a tun be taga waajuli kɛ o loonw na sanni ka sɛnɛ kɛ. U tun b’a fɔ a ye ko: “Kɔngɔ bena i faga yan.” Prisca tun lanin b’a la ko Jehova bena a janto ale la. O kama, a tun b’u jaabi ko: “Jehova t’a sagokɛlaw bila abada.” Dɔɔni o kɔ, an ka ɔriganisasiyɔn ye dumunifɛnw ni fɛɛn wɛrɛw di Prisca ma. A y’o dɛmɛ sɔrɔ an ka niliw lo sababu la. Prisca sigiɲɔgɔnw kabakoyara ani u y’a fɔ a ye ko: “Tiɲɛn na, Ala m’i bila abada! O la, an b’a fɛ ka dɔ lɔn a koo la.” O kɔ, a sigiɲɔgɔn mɔgɔ wolonfila y’a daminɛ ka taga lajɛnw na.
An be se ka nɔɔrɔ la Jehova kan n’an bololafɛnw ye (dakun 12nan lajɛ). c
13. An be se ka nɔɔrɔ la Jehova kan an ka kɛwalew fɛ cogo di? (Zaburuw 96:9).
13 Zaburuw 96:9 kalan. An be se ka nɔɔrɔ la Jehova kan an ka kɛwalew sababu fɛ. Sarakalasebaga minw tun be baara kɛ Jehova batoso kɔnɔ, u tun be ko walisa k’u yɛrɛ saniya (Ɛkiz. 40:30-32). An fana ka ɲi ka saniya farisogo ta fan fɛ. Nka, o dama tɛ bɔri kɛ. Koo o koo man di Jehova ye, an man ɲi k’o kɛ (Zab. 24:3, 4; 1 Piyɛri 1:15, 16). Bibulu b’a fɔ ko an ka ɲi k’an “jogokɔrɔ” dabila ani ka “jogokura ta.” (Kɔlɔs. 3:9, 10). O kɔrɔ ko an ka ɲi k’an seko bɛɛ kɛ ka miiriya juguw ni kɛwale juguw dabila. Nka, an b’an jija ka miiri ani ka koow kɛ i ko Jehova ani k’a ka jogow ladegi. Jehova ka dɛmɛ barika la, hali mɔgɔ min be kojugubaw kɛ, o tigi be se k’a sɔɔn yɛlɛma ani ka jogo kura ta.
14. I be kalan juman lo sɔrɔ Zaki ka koo la? (jaa lajɛ fana).
14 An ka Zaki ka koo lajɛ. A tun ka fari fɔɔ mɔgɔw y’a tɔgɔ la ko Sutana. A ka fariyakow kosɔn, u ye kiti ben a kan ko a ka kan ka faga. Sanni a fagalon ka se, a sɔnna balimacɛ dɔ ka bibulukalan kɛ n’a ye. U tun y’a don kasobon min na, o balimacɛ tun be to ka na mɔgɔw waaju yen. Zaki tun ye kojuguba caaman kɛ. Nka, a y’a sɔɔn yɛlɛma ani kɔfɛ, a batizera ka kɛ Jehova Seere ye. Zaki ye yɛlɛmanibaw kɛ fɔɔ tuma min na u tun be tagara a fagayɔrɔ, kasobon kɔrɔsibaga dɔw tora k’a fo n’u be kasira. Garadiw kuntigi dɔ ko: “Fɔlɔ la, Zaki lo tun ka fari ni kasoden tɔɔw bɛɛ ye. Nka sisan, a ɲɔgɔn mɔgɔ ɲuman tɛ yen.” Lɔgɔkun kelen Zaki faganin kɔ, balimaw segira ka taga lajɛn kɛ o kasobon kɔnɔ ani kasoden dɔ nana a siɲɛ fɔlɔ la. Mun na a nana o lajɛn na do? Zaki tun y’a sɔɔn yɛlɛma cogo min na, o lo y’a kabakoya. A tun b’a fɛ k’a lɔn a ka ɲi ka min kɛ walisa ka Jehova bato. Tiɲɛn na, an ka kɛwalew be se ka nɔɔrɔ la an sankolola Faa kan!—1 Piyɛri 2:12.
An be se ka nɔɔrɔ la Jehova kan an ka kɛwalew fɛ (dakun 14nan lajɛ). d
JEHOVA BENA NƆƆRƆ LA A TƆGƆ KAN COGO DI YANNI DƆƆNI?
15. Yanni dɔɔni, Jehova bena a tɔgɔ saniya pewu pewu cogo di? (Zaburuw 96:10-13).
15 Zaburuw 96:10-13 kalan. Zaburuw 96 ka vɛrise labanw b’a yira ko Jehova ye Masacɛ ni Kititigɛla tilennin ye. Jehova bena nɔɔrɔ la a tɔgɔ kan cogo di yanni dɔɔni? A bena o kɛ a ka kitikow sababu fɛ. Yanni dɔɔni, a bena Babilonɛba halaki sabu ale lo be Jehova tɔgɔ senuman nɔgɔra (Yir. 17:5, 16; 19:1, 2). Babilonɛba bena halaki minw ɲɛɛ na, n’a sɔrɔ u dɔw bena fara an kan ka Jehova bato. A laban, minw bɛɛ be Jehova kɔniya ani ka ngalon la a kan, a bena olu ni Sutana ka duniɲa tɔɔ bɛɛ halaki Arimagedɔn kɛlɛ la. Nka minw b’a kanu, u be mɛnni kɛ a fɛ ani a ka di u ye ka nɔɔrɔ la a kan, a bena olu bɛɛ kisi (Mariki 8:38; 2 Tes. 1:6-10). Kɔrɔbɔli laban dɔ bena kɛ Krista ka saan waa kelen mara laban na. O kɔ, Jehova bena a tɔgɔ saniya pewu pewu (Yir. 20:7-10). O wagati la, “Masaba ka sebagaya bena lɔn diɲɛ yɔrɔ bɛɛ la i ko jii be baa la cogo min na.”—Abak. 2:14.
16. I cɛsirinin lo ka mun lo kɛ? (jaa lajɛ fana).
16 Jehova ka kan ni nɔɔrɔ min ye, wagati min na ninmanfɛnw bɛɛ bena o la a kan, o bena kɛ wagati diiman yɛrɛ lo ye! Nka yanni o cɛ, an ka to ka tɛmɛ sababuw bɛɛ fɛ ka nɔɔrɔ la an ka Ala tɔgɔ kan. Walisa k’a yira ko o kɔrɔtanin lo kosɔbɛ, Koow Ɲɛnabɔla Jɛnkulu ye Zaburuw 96:8 lo sugandi k’a kɛ saan 2025 ka kalankun ye. A fɔra yen ko: “Aw ka Masaba [Jehova] tɔgɔ boɲa.”
Jehova ka kan ni nɔɔrɔ min ye, a laban, ninmanfɛnw bɛɛ bena o la a kan! (dakun 16nan lajɛ).
DƆNKILI 12 Jéhovah, Dieu magnifique (Ala kɔrɔtaninba Jehova)
a Tɔgɔ dɔw yɛlɛmana.
