1. Ka kɛɲɛ ni 1 Piyɛri 5:2 ye, nɛɛma juman lo be diinan mɔgɔkɔrɔw fɛ?

 JEHOVA y’a ka sagaden kanulenw kalifa diinan mɔgɔkɔrɔw ma. Nɛɛmaba lo o cɛɛ kantigiw fɛ ka baara kɛ u balimaw ye. U b’u jija kosɔbɛ ka kɛ ɲɛminɛbagaw ye minw be u balimaw “mara” koɲuman (Zer. 23:4; 1 Piyɛri 5:2 kalan). An ninsɔn ka di kosɔbɛ ka kɛ n’o balimacɛw ɲɔgɔn ye an ka kafow kɔnɔ!

2. Gwɛlɛya jumanw lo be diinan mɔgɔkɔrɔ dɔw kan?

² Diinan mɔgɔkɔrɔw be gwɛlɛya caaman sɔrɔ u ka baara la. Misali la, u ka ɲi ka baara caaman kɛ walisa k’u janto kafodenw na. Tony ye diinan mɔgɔkɔrɔ ye Etazini. A tun ka ɲi k’a seko daan lɔn walisa baara kana caya a kun kojugu. A ko: “COVID-19 fɔɲɔbana daminɛ na, n’ sɔnna baara caaman na walisa ka lajɛnw ni waajuli labɛn. Nka n’ tun mana baara kɛ cogo o cogo, caaman bele tun be yen ka kɛ. A laban, n’ tun tɛ sera tugun ka Bibulu kalan, ka kelenna kalan kɛ ani ka delili kɛ tuma o tuma.” Ilir ye diinan mɔgɔkɔrɔ ye Kosovo jamana na ani gwɛlɛya wɛrɛ lo tun b’ale kan. Tuma min na kɛlɛ tun be u ka mara la, a tun ka gwɛlɛ a ma ka ɔriganisasiyɔn ka cikanw labato. A ko: “Tuma min na Betɛli y’a ɲini n’ fɛ n’ ka taga dɛmɛ lase balimaw ma farati yɔrɔ dɔ la, a gwɛlɛyara n’ ma ka koow kɛ ni jagwɛlɛya ye. N’ tun sirannin lo ani a tun be n’ ɲɛɛ na ko o cikan bɛnnin tɛ.” Tim ye misɔnden ye Azi mara la. A tun ka gwɛlɛ ale ma k’a ka baaraw bɛɛ kɛ loon o loon. A ko: “Tuma dɔw la, n’ tun be sɛgɛn kojugu, fɔɔ a ka gwɛlɛ n’ ma ka n’ janto balimaw na.” O gwɛlɛyaw ɲɔgɔn be diinan mɔgɔkɔrɔ minw kan, mun lo be se k’u dɛmɛ?

3. An bɛɛ be se ka kalan juman lo sɔrɔ kititigɛla Zedeyɔn fɛ?

³ Diinan mɔgɔkɔrɔw be se ka kalan sɔrɔ kititigɛla Zedeyɔn fɛ (Eburuw 6:12; 11:32). A tun be Ala ka jama ɲɛminɛ ani k’a latanga (Kirit. 2:16; 1 Til. Kib. 17:6).  Jehova tun y’a ka jama kalifa Zedeyɔn ma. Bi fana, a y’a ɲini diinan mɔgɔkɔrɔw fɛ u k’u janto a sagokɛlaw la wagati gwɛlɛ nunu na (Kɛw. 20:28; 2 Tim. 3:1). Zedeyɔn tun b’a seko daan lɔn, a tun majiginin lo ani a tun be mɛnni kɛ Jehova fɛ. An be kalan sɔrɔ a fɛ. A ka muɲuli kɔrɔbɔra tuma min na a tun b’a ka kunkanbaaraw dafara. An ye diinan mɔgɔkɔrɔ ye wo, an t’a ye wo, an be se ka an ka diinan mɔgɔkɔrɔw waleɲuman lɔn kosɔbɛ. U be baaraba kɛ walisa k’u janto an na Alako ta fan fɛ. An be se k’u dɛmɛ u ka baara la.—Eburuw 13:17.

4. Zedeyɔn y’a yira cogo di ko a b’a seko daan lɔn ani ko a majiginin lo?

⁴ Zedeyɔn tun b’a seko daan lɔn ani a tun majiginin lo. b Jehova ka mɛlɛkɛ y’a fɔ a ye ko a sugandira walisa ka Israɛldenw kisi ka bɔ Madiyankaw bolo, u minw barika tun ka bon kosɔbɛ. O cɛɛ majiginin ko: “Ne ka fadenyabolo mɔgɔw le ka dɔgɔ Manase kɔmɔgɔw la, ne fana le ye dɔgɔ ye n faa ka somɔgɔw cɛma.” (Kirit. 6:15). A tun b’a ɲɛɛ na ko ale tɛ se k’o kunkanbaara dafa. Nka Jehova tun b’a lɔn ko a be se. Jehova ka dɛmɛ barika la, Zedeyɔn sera k’a ka cii dafa koɲuman.

5. Tuma juman lo la a be se ka gwɛlɛya diinan mɔgɔkɔrɔ ma k’a seko daan lɔn ani k’a yɛrɛ majigi?

⁵ Diinan mɔgɔkɔrɔw b’u seko bɛɛ kɛ walisa k’u seko daan lɔn ani k’u yɛrɛ majigi koo bɛɛ la (Mise 6:8; Kɛw. 20:18, 19). U tɛ u yɛrɛ yira u ka kɛtaw wala u ka setigiya kosɔn. U t’a miiri fana ko nafa foyi t’u la u ka filiw kosɔn. Nka tuma dɔw la, a be se ka gwɛlɛya diinan mɔgɔkɔrɔ dɔ ma k’a seko daan lɔn ani k’a yɛrɛ majigi. Misali la, a be se ka sɔn kunkanbaara caaman na ani kɔfɛ, a be gwɛlɛya a ma k’u bɛɛ dafa. Dɔw be se k’a kɔrɔfɔ a ka koo kɛcogo kosɔn wala k’a tando baara dɔ la. O koow ɲɔgɔn na, diinan mɔgɔkɔrɔw be se ka Zedeyɔn ladegi cogo di?

6. Diinan mɔgɔkɔrɔw be se ka Zedeyɔn ladegi cogo di u kɛtɔ k’u seko daan lɔn? (Jaa lajɛ fana.)

⁶ Dɛmɛ ɲini. Mɔgɔ min b’a seko daan lɔn, ale be sɔn a ma ko a tɛ se koo dɔw la. Zedeyɔn tun b’a yira ko a b’a seko  daan lɔn sabu a tun be dɛmɛ ɲini tɔɔw fɛ (Kirit. 6:27, 35; 7:24). Diinan mɔgɔkɔrɔ hakilitigiw b’o lo kɛ. An kumana Tony min koo la, ale ko: “N’ lamɔcogo kosɔn, n’ tun ka teli ka sɔn baara caaman na k’a sɔrɔ n’ tun tɛ se k’u bɛɛ kɛ. O kama, n’ y’a latigɛ ko an ka gwa kɔnɔ batoli la, an bena a ye mɔgɔ be se k’a yira cogo min na ko a b’a seko daan lɔn. N’ ko n’ bena to ka n’ muso ɲininga ni n’ be jijaliw kɛra o koo la. N’ segira ka videwo nin fana filɛ jw.org kan: Comme Jésus, formons les autres, faisons-leur confiance et rendons-les capables.” Tony y’a daminɛ k’a ɲini mɔgɔ wɛrɛw fɛ u k’a dɛmɛ k’a ka baara dɔw kɛ. Nafa juman lo sɔrɔla o la? A ko: “Kafo ka baaraw be kɛra ani n’ be wagati sɔrɔla ka n’ ka jɛnɲɔgɔnya sabati ni Jehova ye.”

7. Diinan mɔgɔkɔrɔw be se ka Zedeyɔn ladegi cogo di ni dɔw y’u kɔrɔfɔ? (Zaki 3:13).

⁷ Ni dɔ y’i kɔrɔfɔ, a jaabi ni dususuman ye. Koo wɛrɛ min be se ka gwɛlɛya diinan mɔgɔkɔrɔw ma, o ye ni dɔ y’u kɔrɔfɔ. Zedeyɔn ka ɲɛyirali be se k’u dɛmɛ. Siga t’a la, a tun b’a lɔn ko ale dafanin tɛ. O kama tuma min na Efarayimu kɔmɔgɔw y’a kɔrɔfɔ, a y’u jaabi ni dususuman ye (Kirit. 8:1-3). A ma dimi u kɔrɔ. A y’a yira ko a majiginin lo a kɛtɔ k’u ka kɔrɔfɔliw lamɛn ani k’u jaabi ni ɲumanya ye. O y’a to u dusu sumana. Diinan mɔgɔkɔrɔ hakilitigiw b’a yira k’u be Zedeyɔn ladegi, u kɛtɔ k’u kɔrɔfɔbagaw lamɛn koɲuman ani k’u jaabi ni dususuman ye (Zaki 3:13 kalan). O be kɛ sababu ye ka kafo ka hɛɛrɛ sabati.

8. Diinan mɔgɔkɔrɔw ka ɲi ka mun lo kɛ ni mɔgɔw b’u tandora? Misali dɔ fɔ.

⁸ Nɔɔrɔ la Jehova kan. Tuma min na Israɛldenw tun be Zedeyɔn tandora sabu a ye see sɔrɔ Madiyankaw kan, a ye nɔɔrɔ la Jehova lo kan (Kirit. 8:22, 23). Kunkanbaara kalifara balimacɛ minw ma, olu be se ka Zedeyɔn ladegi cogo di? U ka ɲi ka Jehova lo tando u ka kɛtaw kosɔn (1 Kor. 4:6, 7). Misali la, n’u ye diinan mɔgɔkɔrɔ dɔ tando sabu a ka kalan ɲɛna, a be se ka nɔɔrɔ la an Kalanbaga Jehova kan. A be se k’a fɔ fana ko an b’o kalan sɔrɔ ka bɔ Ala ka Kuma lo la wala ko Jehova ka ɔriganisasiyɔn lo b’o fɔrɔmasɔn di an bɛɛ ma. Tuma kelen kelen, diinan mɔgɔkɔrɔw ka ɲi k’u yɛrɛ ɲininga n’u ka kalan kɛcogo be nɔɔrɔ la Jehova kan wala n’u b’u yɛrɛ lo yira o fɛ. An ka diinan mɔgɔkɔrɔ dɔ ka koo lajɛ min tɔgɔ ko Timothy. Tuma min na a kɛra diinan mɔgɔkɔrɔ ye kura ye, a tun ka di a ye ka forobakalanw kɛ. A ko: “N’ ka kalan dadonkumaw ni n’ ka ɲɛyiraliw tun ka jan ani u faamu tun man nɔgɔ. Tɔɔw tun ka teli ka n’ tando o kosɔn. O y’a to mɔgɔw tun be sinsin ne lo kan sanni ka sinsin Bibulu wala Jehova kan.” Kɔfɛ, Timothy y’a ye ko a ka ɲi ka yɛlɛmani don a ka kalan kɛcogo la walisa mɔgɔw kana sinsin kojugu ale kan (Talenw 27:21). Mun lo sɔrɔla o la? A ko: “Sisan, mɔgɔ caaman b’a fɔ n’ ye cogo min na n’ ka kalan y’u dɛmɛ ka see sɔrɔ gwɛlɛya dɔ kan, ka kɔrɔbɔli dɔ muɲu wala k’a to u y’u magwɛrɛ kosɔbɛ Jehova la. O lakalitaw be n’ ninsɔndiya kosɔbɛ ka tɛmɛ u ka tandoli kumaw kan, u tun be minw fɔ n’ ye a saan damanin ye nin ye.”

9. Mun na a tun man nɔgɔ Zedeyɔn ma ka mɛnni kɛ Jehova fɛ ani k’a jaa gwɛlɛya? (Jaa lajɛ ɲɛɛ fɔlɔ kan.)

⁹ Tuma min na Zedeyɔn kɛra kititigɛla ye, a ka kanminɛli n’a ka jagwɛlɛya  kɔrɔbɔra. A tun ɲinina a fɛ a k’a facɛ ka joo sɔnyɔrɔ halaki. Farati tun b’o la (Kirit. 6:25, 26). Kɔfɛ, tuma min na Zedeyɔn tun b’a ka kɛlɛdenw lajɛnna, Jehova y’a fɔ a ye siɲɛ fila bɛɛ ko a ka dɔ bɔ u hakɛ la (Kirit. 7:2-7). A laban, a fɔra a ye ko a ka taga a juguw kɛlɛ dugutilama.—Kirit. 7:9-11.

10. Diinan mɔgɔkɔrɔw ka kanminɛli be se ka kɔrɔbɔ cogo di?

¹⁰ Diinan mɔgɔkɔrɔw ka ɲi ka “sɔn ka kanminɛli kɛ.” (Zaki 3:17, NW). Diinan mɔgɔkɔrɔ min be kanminɛli kɛ, ale be Bibulu ka fɔta ani ɔriganisasiyɔn ka cikanw labato. O cogo la, ɲɛyirali ɲuman lo tɔɔw fɛ. Nka, a ka kanminɛli be se ka kɔrɔbɔ. Misali la, komi a be cikan caaman sɔrɔ ani u be yɛlɛma joona joona, n’a sɔrɔ a ka gwɛlɛ a ma k’u labato. Tuma dɔw la, a be se k’a yɛrɛ ɲininga ni cikan dɔ bɛnnin lo tiɲɛn tiɲɛn na wala ni hakilitigiyako lo. Wala u be se ka kunkanbaara dɔ kalifa a ma min be se k’a to u b’a minɛ k’a don kaso la. O koow ɲɔgɔn na, diinan mɔgɔkɔrɔw be se ka Zedeyɔn ladegi cogo di?

11. Mun lo be se ka diinan mɔgɔkɔrɔw dɛmɛ ka kanminɛli kɛ?

¹¹ Cikanw lamɛn koɲuman ani u sira tagama. Jehova y’a fɔ Zedeyɔn ye a tun ka ɲi ka a facɛ ka sarakabɔyɔrɔ halaki cogo min na. A y’a fɔ a ye fana a tun ka ɲi ka sarakabɔyɔrɔ kura lɔ ale ye yɔrɔ min na ani ka bɛgɛn min saraka. Zedeyɔn ma o cikanw sɔsɔ. Nka Jehova ye min ɲini a fɛ, a y’o lo kɛ jaatika! Bi, diinan mɔgɔkɔrɔw be cikanw sɔrɔ ka bɔ Jehova ka ɔriganisasiyɔn fɛ lɛtɛrɛw ni kunnafoniw sababu fɛ. U be cikan wɛrɛw sɔrɔ fana minw b’an dɛmɛ an latanganin ka to ani an magwɛrɛnin ka to Jehova la. An ka diinan mɔgɔkɔrɔw koo ka di an ye sabu u be ɔriganisasiyɔn ka cikanw labato kantigiya la. Kafo bɛɛ be nafa sɔrɔ o la.—Zab. 119:112.

12. Diinan mɔgɔkɔrɔw be se ka Eburuw 13:17 sira tagama cogo di ni cikan dɔ yɛlɛmana?

¹² Sɔn ka yɛlɛmaniw kɛ. A to i hakili la ko Jehova y’a fɔ Zedeyɔn ye ko a k’a fɔ a ka sɔrɔdasiw fanba ye ko u ka kɔsegi soo (Kirit. 7:8). N’a sɔrɔ Zedeyɔn miirila ko: “Yala o bɛnnin lo tiɲɛn na wa? Yala koow bena ɲɛ an bolo wa?” O bɛɛ n’a ta, a ye kanminɛli kɛ. Bi, diinan mɔgɔkɔrɔw be Zedeyɔn ladegi u kɛtɔ ka ɔriganisasiyɔn ka cikanw labato, hali ni yɛlɛmani donna u la (Eburuw 13:17 kalan). Misali la, lajɛnw ni lajɛnba kɛyɔrɔw lɔli baara musakaw be sara cogo min na, saan 2014, Koow Ɲɛnabɔla Jɛnkulu ye yɛlɛmani don o la (2 Kor. 8:12-14). Sisan, kafow tɛ juru ta ɔriganisasiyɔn fɛ tugun walisa k’u ka Masaya Boonw ni lajɛnba kɛyɔrɔw lɔ. Nka duniɲa kuru bɛɛ kɔnɔ, kafow be nili minw kɛ, o lo be ta k’o boonw lɔ yɔrɔ min na u  mako b’a la, hali n’o kafodenw ka niliw tɛ bɛrɛ ye. Tuma min na José ye o mɛn, a tun lanin t’a la k’o ye koo ɲuman ye. A y’a miiri ko: “Masaya Boon si tɛna lɔ tugun. Koow tɛ kɛ o cogo la an fɛ yan.” Mun lo ye a dɛmɛ a sɔnna o yɛlɛmani ma? A ko: “Talenw 3:5, 6 ye n’ hakili jigi ko n’ ka ɲi ka n’ jigi la Jehova kan. Min sɔrɔla o la, o kɛra koo ɲuman ye yɛrɛ le! An be sera ka Masaya Boon caaman lɔ. O y’an dɛmɛ k’a faamu fana ko an be se ka niliw kɛ cogo caaman na walisa an bɛɛ ka kɛ kelen ye.”

13. a) Zedeyɔn tun lanin be mun lo la? b) Diinan mɔgɔkɔrɔw be se ka Zedeyɔn ladegi cogo di? (Jaa lajɛ fana.)

¹³ Jehova sago kɛ ni jagwɛlɛya ye. Min tun ɲinina Zedeyɔn fɛ farati tun b’o la ani a tun siranin lo. O bɛɛ n’a ta, a ye mɛnni kɛ Jehova fɛ (Kirit. 9:17). Jehova ye Zedeyɔn hakili sigi. O kɔ, Zedeyɔn lara a la ko n’ale be Jehova ka jama latanga, a bena ale dɛmɛ siga t’o la. Bali sigira an ka baara kan jamana minw na, o yɔrɔ diinan mɔgɔkɔrɔw be Zedeyɔn ladegi. U be lajɛnw ni waajuli baara ɲɛminɛ ni jagwɛlɛya ye hali k’a sɔrɔ farati nunu be u seen kɔrɔ: polisiw be se k’u minɛ, k’u ɲininga, u be se ka bɔnɛ u ka baara la wala u be se ka fariyakow kɛ u la. c Tɔɔrɔba wagati la, diinan mɔgɔkɔrɔw bena cikan minw sɔrɔ, u mako bena kɛ jagwɛlɛya la walisa k’u labato, hali ni faratiw b’u seen kɔrɔ. Misali la, an bena kitiko kibaro min lase mɔgɔw ma, n’a sɔrɔ u bena cikanw sɔrɔ o koo la. Ani tuma min na Gɔgi min be Magɔgi bena wuli an kama, diinan mɔgɔkɔrɔw bena cikanw sɔrɔ minw bena a yira an ka ɲi ka min kɛ walisa ka kisi.—Ezek. 38:18; Yir. 16:21.

14. Zedeyɔn ka muɲuli kɔrɔbɔra cogo di?

¹⁴ Zedeyɔn tun ye kititigɛla ye minkɛ, baara gwɛlɛ tun b’a fɛ ka kɛ. Kɛlɛ loon sufɛ, Madiyankaw bolitɔ, Zedeyɔn tugura u nɔfɛ ka bɔ Zizireyɛli kɔkɛnɛ na fɔɔ Zurudɛn baji yɔrɔ la. N’a sɔrɔ yiriw  tun ka ca o yɔrɔ la (Kirit. 7:22). Yala Zedeyɔn lɔra yen wa? Ayi! Hali ni ale n’a ka kɛlɛden 300 tun sɛgɛnnin lo, u ye Zurudɛn baji tigɛ ani u tora k’u juguw nɔgwɛn. A laban, u y’u sɔrɔ ani ka see sɔrɔ u kan.—Kirit. 8:4-12.

15. Tuma juman lo la diinan mɔgɔkɔrɔ ka muɲuli be se ka kɔrɔbɔ?

¹⁵ Diinan mɔgɔkɔrɔw b’u janto u ka denbaya ani kafodenw na. Tuma dɔw la, u be se k’a ye ko u sɛgɛnnin lo kojugu o kunkanbaaraw kosɔn. O koo ɲɔgɔn na, u be se ka Zedeyɔn ladegi cogo di?

16-17. Mun lo ye Zedeyɔn dɛmɛ ka muɲuli kɛ ani diinan mɔgɔkɔrɔw be se ka la mun lo la? (Ezayi 40:28-31). (Jaa lajɛ fana.)

¹⁶ La la la ko Jehova bena i barika bonya. Zedeyɔn tun lanin b’a la ko Jehova bena ale barika bonya ani Jehova y’o lo kɛ (Kirit. 6:14, 34). Loon dɔ, Madiyankaw ka masacɛ fila tun be bolila ɲɔgɔmɛw kan ani Zedeyɔn n’a ka kɛlɛdenw tugura u kɔ seen na (Kirit. 8:12, 21). Nka Ala ka dɛmɛ barika la, Zedeyɔn n’a ka kɛlɛdenw sera k’u minɛ ani k’u faga. Diinan mɔgɔkɔrɔw fana be se k’u jigi la Jehova kan, ale min “te dɛsɛ, a te sɛgɛn.” N’u mako be fanga la, a bena o di u ma.—Ezayi 40:28-31 kalan.

¹⁷ Matthew ye CLH balimacɛ dɔ ye. An k’a filɛ min b’a dɛmɛ ka muɲuli kɛ. A ko: “N’ y’a ye ko Filipikaw 4:13 kɔnɔkow ye tiɲɛn ye. Tuma caaman na, n’ sɛgɛnnin lo kojugu ani barika foyi tɛ n’ na. O kama, n’ be Jehova deli kosɔbɛ a ka sabari ka fanga di n’ ma walisa n’ ka se ka n’ balimaw dɛmɛ. Jehova be barika don n’ na a ka hakili senu sababu fɛ, o min be n’ dɛmɛ ka muɲuli kɛ.” I ko Zedeyɔn, diinan mɔgɔkɔrɔw be baaraba kɛ walisa k’u janto Jehova sagokɛlaw la, hali n’o man nɔgɔ u fɛ tuma bɛɛ. Nka, u ka ɲi k’u seko daan lɔn ani ka sɔn a ma ko u tɛ se ka koo bɛɛ kɛ. N’u ye dɛmɛ ɲini Jehova fɛ, u be se ka la a la ko a bena u barika bonya walisa u ka se ka muɲuli kɛ.—Zab. 116:1; Filip. 2:13.

18. K’a fɔ ka surunya, diinan mɔgɔkɔrɔw be se ka Zedeyɔn ladegi cogo di?

¹⁸ Diinan mɔgɔkɔrɔw be se ka kalan nafaman caaman sɔrɔ Zedeyɔn fɛ. U ka ɲi k’u yɛrɛ majigi ani k’u seko daan lɔn koo nunu na: n’u b’a latigɛra u bena sɔn baara hakɛ min ma, ni mɔgɔw b’u kɔrɔfɔra wala k’u tando. U ka ɲi ka kanminɛli kɛ ani ka koow kɛ ni jagwɛlɛya ye, sanko duniɲa laban wagati nunu na. U ka ɲi ka la a la fana ko Ala be se k’u barika bonya, u ka gwɛlɛyaw mana kɛ min o min ye. U be baaraba kɛ k’u janto an na minkɛ, u koo ka di an ye ani an b’u “minɛ ka ɲa.”—Filip. 2:29.