1-2. Ka kɛɲɛ ni Zaburuw 25:14 ye, an ka ɲi ka mun lo kɛ walisa ka jɛnɲɔgɔnya teriman kɛ ni Jehova ye?

 E KA miiri la, ni ele n’i teri b’a fɛ k’aw ka teriya sabati, aw ka ɲi ka kɛ ni jogo jumanw lo ye? N’a sɔrɔ i bena a fɔ ko aw ka ɲi ka ɲɔgɔn kanu ani ka ɲɔgɔn dɛmɛ. An ma la a la n’i bena a fɔ ko aw ka ɲi ka siran ɲɔgɔn ɲɛ. Nka, i ko barokun nin ka vɛrise jɔnjɔn b’a yira cogo min na, minw b’a fɛ ka jɛnɲɔgɔnya teriman kɛ ni Jehova ye, u ka ɲi ka ‘siran’ a ɲɛ.—Zaburuw 25:14 kalan.

² An bɛɛ ka ɲi ka siran Jehova ɲɛ cogo ɲuman na, hali n’an b’a sago kɛra a mɛɛnna cogo o cogo. Nka ka siran Ala ɲɛ, o kɔrɔ ko di? An be se ka kɛ ni Ala ɲɛsiran ye cogo di? Ani an be kalan juman lo sɔrɔ Ala ɲɛsiran koo la masaso kuntigi Obadiyawu, sarakalasebagaw kuntigi Yoyada, ani masacɛ Zowasi fɛ?

3. Mun lo be se ka siranya bila an na ani o siranya be se ka nɔɔ juman lo to an kan?

³ N’an b’a miiri ko koo jugu dɔ bena an sɔrɔ, o be se ka siranya bila an na. O siranya ɲɔgɔn ka ɲi sabu a be se k’an lasun ka koow kɛ ni hakilitigiya ye. Misali la, n’an be siran ko an bena ben, an tɛna sɔn ka gwɛrɛ kojugu kulu gɛrɛn na. N’an be siran ka bɔnɛ lase an yɛrɛ ma, an bena an yɛrɛ tanga faratikow ma. N’an be siran an n’an teri sɔbɛ dɔ ka teriya kana nagasi, an tɛna sɔn ka kuma bɛnbali dɔ fɔ wala ka koo bɛnbali dɔ kɛ.

4. Sutana b’a fɛ an ka siran Jehova ɲɛ cogo di?

⁴ Sutana b’a fɛ an ka siran Jehova ɲɛ kojugu ani an ka kɛ  ni Elifazi ka miiriya ɲɔgɔn ye. Ale y’a fɔ ko Jehova b’a yɛrɛ mɔnɛbɔ a sagokɛlaw la, a dusu ka bon ani ko mɔgɔ ka baara t’a ɲɛɛ fa (Zɔbu 4:18, 19). Sutana b’a fɛ an ka siran Jehova ɲɛ kojugu fɔɔ an b’a sago kɛli dabila. Walisa k’an yɛrɛ tanga o ma, an ka ɲi ka siran Ala ɲɛ cogo bɛnnin na.

5. Ka siran Ala ɲɛ, o kɔrɔ ko di?

⁵ Mɔgɔ min be siran Ala ɲɛ cogo bɛnnin na, Ala koo ka di a ye ani a t’a fɛ ka koo si kɛ min bena a ka jɛnɲɔgɔnya nagasi ni Ala ye. Yezu tun be n’o “Alaɲasiran” ɲɔgɔn lo ye (Eburuw 5:7, Biblu Ala ta Kuma). A tun tɛ siran Jehova ɲɛ ka dama tɛmɛ (Ezayi 11:2, 3). Nka Jehova koo tun ka di a ye kosɔbɛ ani a tun ka di a ye ka mɛnni kɛ a fɛ (Zan 14:21, 31). I ko Yezu, an be bonya la Jehova kan kosɔbɛ ani an be siran a ɲɛ sabu kanutigi ni hakilitigi lo, a tilennin lo ani setigiya b’a fɛ. An b’a lɔn fana ko Jehova b’an kanu kosɔbɛ ani ko an b’a ka cikanw ta cogo min na, o be nɔɔ to a kan. O be se k’a dusu kasi wala k’a dusu diya.—Zab. 78:41; Talenw 27:11.

6. An be se k’a ɲini ka siran Ala ɲɛ cogo minw na, u la dɔ ye juman ye? (Zaburuw 34:12).

⁶ An tɛ wolo ni Ala ɲɛsiran ye. An ka ɲi k’a degi le (Zaburuw 34:12 kalan). An be se k’a ɲini ka siran Ala ɲɛ cogo minw na, u la dɔ ye ka danfɛnw lajɛ. N’an tora ka Ala ka hakilitigiya, setigiya ani a ka kanuyaba ye “a ka baara [wala danfɛnw, NW] fɛ,” dɔ bena fara an ka kanuya kan a koo la ani an bena bonya la a kan kosɔbɛ (Ɔrɔm. 1:20). Balimamuso Adrienne ko: “Jehova ka danfɛnw b’a ka hakilitigiya yira cogo min na, o be n’ kabakoya ani o be n’ dɛmɛ k’a faamu ko a b’a lɔn min ka fisa n’ ma.” O miiriya y’a lasun k’a fɔ ko: “Mun na n’ bena a ɲini ka koo dɔ kɛ min bena n’ yɔrɔ janya Jehova la, ale min ye niin di n’ ma?” Mun na i tɛ wagati dɔ ta lɔgɔkun nin na ka miiri Jehova ka danfɛn dɔw la? N’i y’o kɛ dɔ bena fara i ka kanuya kan Jehova koo la ani i bena bonya la a kan kosɔbɛ.—Zab. 111:2, 3.

7. Delili be se k’an dɛmɛ cogo di an be siran Ala ɲɛ cogo bɛnnin na?

⁷ N’an be delili kɛ tuma o tuma, o bena an dɛmɛ fana ka kɛ ni Ala ɲɛsiran ye. Tuma o tuma n’an ye Jehova deli, dɔ be fara an ka lɔnniya kan a koo la. An mana Jehova deli ko a ka fanga di an ma ka gwɛlɛya dɔ muɲu, an hakili be jigi a ka fanga kabakoman koo la. N’an ye barika la Jehova ye sabu a y’a Dencɛ di an kosɔn, an hakili be jigi ko a b’an kanu. N’an ye Jehova deli kosɔbɛ gwɛlɛya dɔ koo la, o b’an hakili jigi ko a ka hakilitigiya ka bon. O deliliw ɲɔgɔn b’a to an be bonya la Jehova kan kosɔbɛ. U b’a to fana an b’an jija kosɔbɛ walisa an kana koo si kɛ min be se k’an ni Jehova ka jɛnɲɔgɔnya nagasi.

8. An be se ka mun lo kɛ walisa ka to ni Ala ɲɛsiran ye?

⁸ Mɔgɔ dɔw kofɔra Bibulu kɔnɔ minw ye ɲɛyirali ɲumanw ye ani dɔ wɛrɛw minw tɛ ɲɛyirali ɲumanw ye. N’an b’a ɲini ka kalan sɔrɔ u ka maanaw na, o bena an dɛmɛ ka to n’an ka Ala ɲɛsiran ye. An ka Jehova sagokɛla kantigi fila ka koo lajɛ: masacɛ Akabu ka soo kuntigi Obadiyawu ani sarakalasebagaw kuntigi Yoyada. O kɔ, an bena a filɛ an be se ka kalan min sɔrɔ Zuda masacɛ Zowasi ka koo la. A daminɛ na, Jehova sagokɛla kantigi tun lo, nka a ma to kantigiya la.

9. Jehova ɲɛsiran ye Obadiyawu dɛmɛ cogo di? (1 Masacɛw 18:3, 12).

⁹ Siɲɛ fɔlɔ min na Bibulu kumana Obadiyawu (wala Abudiyasi) koo la, b a fɔra ko: “Obadiyawu tun be siran Masaba ɲa kosɔbɛ.” (1 Masacɛw 18:3, 12 kalan). O Ala ɲɛsiran ye nɔɔ juman lo to a kan? O y’a to a kɛra hɔɔrɔn ani lanamɔgɔ ye. O kama, masacɛ y’a kɛ masaso kuntigi ye (Neemi 7:2 lajɛ). Obadiyawu ka Ala ɲɛsiran y’a to a ye jagwɛlɛya sɔrɔ ani siga t’a la a mako tun b’o la. A ye ɲɛnamaya kɛ masacɛ jugu Akabu ka tile la, a fɔra ale min koo la ko: “Masacɛ minw tɛmɛna Omuri dencɛ Akabu ɲa, a ye kojugu kɛ Masaba ɲakɔrɔ ka tɛmɛ olu bɛɛ kan.” (1 Mas. 16:30). Ka fara o kan, Akabu muso Zezabɛli tun be Baali lo bato ani Jehova koo tun ka gwo a ye fɔɔ a y’a ɲini ka tiɲɛn batoli tunu ka bɔ Israɛl siya tan ka mara la. A yɛrɛ ye Ala ka kira caaman faga (1 Mas. 18:4). A gwɛnin lo ko Obadiyawu ye Jehova bato wagati gwɛlɛw na.

10. Obadiyawu y’a yira cogo di ko a jaa ka gwɛlɛ kosɔbɛ?

¹⁰ Obadiyawu y’a yira cogo di ko a jaa ka gwɛlɛ kosɔbɛ? Tuma dɔ la, Zezabɛli tun be Ala ka kiraw ɲinina walisa k’u faga. O wagati la, Obadiyawu y’a jaa gwɛlɛya k’u “kɛmɛ dogo kuluwow kɔnɔ bi duuru duuru, ka to ka dumuni, ani jii d’u ma yen.” (1 Mas. 18:13, 14). Ni Zezabɛli tun bɔra o kala ma, siga t’a la a tun bena Obadiyawu faga. N’a sɔrɔ Obadiyawu tun sirannin lo ani a tun t’a fɛ ka sa. Nka, a tun be Jehova n’a sagokɛlaw kanu ka tɛmɛ a yɛrɛ niin kan.

11. Bi, Jehova sagokɛlaw be Obadiyawu ladegi cogo di? (Jaa lajɛ fana.)

¹¹ Bi, Jehova sagokɛla caaman be jamana minw na, bali sigira an ka baara kan yen. O balima kanulenw be bonya la faamanw kan. Nka i ko Obadiyawu, u be ban ka Jehova sago kɛli dabila! (Mat. 22:21). U b’a yira ko u be ni Ala ɲɛsiran ye, u kɛtɔ ka mɛnni kɛ a fɛ sanni ka mɛnni kɛ adamadenw fɛ (Kɛw. 5:29). O la, u be  to ka waajuli ni lajɛnw kɛ dogo la (Mat. 10:16, 28). U balimaw mako be min na walisa ka to ka Jehova bato, u b’u janto u k’o sɔrɔ. An ka balimacɛ Henri ka koo lajɛ. Ale be Afiriki jamana dɔ la, yɔrɔ min na bali tun sigira an ka baara kan. Bali tuma na, a ye dɛmɛ don walisa ka an ka sɛbɛw lase balimaw ma. A y’a sɛbɛ ko: “Kuma ka gwɛlɛ n’ ma. O la, n’ lanin b’a la ko n’ be bonya la Jehova kan kosɔbɛ minkɛ, o lo y’a to n’ ye jagwɛlɛya sɔrɔ k’o baara kɛ.” Ele be se k’o jagwɛlɛya ɲɔgɔn sɔrɔ wa? I be se, n’i b’a ɲini ka siran Ala ɲɛ cogo bɛnnin na.

12. Sarakalasebagaw kuntigi Yoyada n’a muso y’a yira cogo di ko u be kantigiya kɛ Jehova ye kosɔbɛ?

¹² Sarakalasebagaw kuntigi Yoyada tun be siran Jehova ɲɛ. O y’a lasun ka kantigiya kɛ a ye ani ka tiɲɛn batoli lafasa. O yirala ka gwɛ tuma min na Zezabɛli denmuso Atali sigira masaya la fanga la Zuda mara kun na. Joo tun be jama fɛ ka siran Atali ɲɛ. A tun ka fari ani a tun b’a fɛ n’a dusu bɛɛ ye ka kɛ masamuso ye, fɔɔ a y’a ɲini k’a yɛrɛ mamadenw bɛɛ faga sabu u dɔ lo tun ka ɲi ka sigi masaya la (2 Til. Kib. 22:10, 11). O mamaden dɔ, min tɔgɔ ko Zowasi, ale kisira sabu Yoyada muso Yosabati y’a niin kisi. Yosabati n’a cɛɛ y’o deen dogo ani k’u janto a la. O cogo la, u y’u janto walisa Dawuda ka denbayamɔgɔ dɔ ka kisi, min tun be se ka kɛ masacɛ ye. Yoyada ye kantigiya kɛ Jehova ye ani a ma siran Atali ɲɛ.—Talenw 29:25.

13. Tuma min na Zowasi tun be ni saan wolonfila ye, Yoyada y’a yira cogo di ko a ye kantigi ye?

¹³ Tuma min na Zowasi tun be ni saan wolonfila ye, Yoyada y’a yira kokura ko a be kantigiya kɛ Jehova ye. A ye labɛn dɔ kɛ. N’o tun ɲɛna a bolo, Zowasi tun bena kɛ masacɛ ye sabu ale lo tun ye Dawuda cɛntala yɛrɛ yɛrɛ ye. Nka n’o labɛn tun ma ɲɛ, Atali tun bena Yoyada faga, siga t’o la. Jehova ka dɛmɛ barika la, o labɛn ɲɛna a bolo. Kuntigiw ni Levitew ye Yoyada dɛmɛ ka Zowasi kɛ masacɛ ye ani u ye Atali faga (2 Til. Kib. 23:1-5, 11, 12, 15; 24:1). O kɔ, Yoyada “y’a kɛ masacɛ ni jama bɛnna ni Masaba ye ko u bena kɛ a ta ye.” (2 Mas. 11:17). Ani Yoyada ye “daa kɔlɔsibagaw sigi Masaba ka soo dondaw la janko mɔgɔ o mɔgɔ nɔgɔnin lo, o si kana don yen sababu si la.”—2 Til. Kib. 23:19.

14. Cogo juman na Yoyada ye bonya sɔrɔ sabu a ye bonya la Jehova kan?

¹⁴ Jehova tun ko “mɔgɔ min b’ale boɲa, ale fana b’o tigi le boɲa.” Ani tiɲɛn na, a ye bonya la Yoyada kan (1 Sam. 2:30). Misali la, a y’a kɛ u ye sarakalasebagaw kuntigi Yoyada ka kɛwale ɲumanw lakali Bibulu kɔnɔ an nafa kama (Ɔrɔm. 15:4). Ani tuma min na Yoyada sara, nɛɛmaba dɔ kɛra a ye. U y’a suu don “Dawuda ka ciin na, masacɛw sudonyɔrɔ la, bari a tun ye baaraɲuman kɛ Isirayɛlidenw cɛma, ka boɲa la Ala n’a batoso kan.”—2 Til. Kib. 24:15, 16.

15. An be kalan juman lo sɔrɔ Yoyada ka koo la? (Jaa lajɛ fana.)

¹⁵ Yoyada ka koo be se k’an kelen kelen bɛɛ dɛmɛ an ka kɛ ni Ala ɲɛsiran ye. Diinan mɔgɔkɔrɔw be se ka Yoyada ladegi, u kɛtɔ ka fɛɛrɛw ɲini tuma bɛɛ walisa ka kafodenw latanga (Kɛw. 20:28). Yoyada ka koo b’a yira mɔgɔkɔrɔbaw la ko n’u be siran Jehova ɲɛ ani ka to kantigiya la, a be se ka tɛmɛ u fɛ k’a sago dafa. A tɛna ban u la. Jehova ye  Yoyada minɛ cogo min na, kanbelew ni sunguruw be se ka kalan sɔrɔ o la. U be se ka Jehova ladegi, u kɛtɔ ka bonya ni danbe la balima mɔgɔkɔrɔbaw kan, sanko n’u be Jehova sago kɛra kabi wagatijan (Talenw 16:31). A laban, an bɛɛ be se ka kalan sɔrɔ kuntigiw ni Levitew fɛ, olu minw ye Yoyada dɛmɛ. An ka to k’an ɲɛminɛbagaw dɛmɛ an kɛtɔ ka mɛnni kɛ u fɛ.—Eburuw 13:17.

16. Mun lo b’a yira ko masacɛ Zowasi tun ye fagobagatɔ ye?

¹⁶ Yoyada ye nɔɔ ɲuman to masacɛ Zowasi kan (2 Mas. 12:2). O kama masacɛ Zowasi kanbele tuma na, a tun b’a fɛ k’a koo diya Jehova ye. Nka Yoyada sanin kɔ, Zowasi ye mɛnni kɛ kuntigiw fɛ minw murutira Jehova ma. Mun lo sɔrɔla o la? Ale n’a ka jamanadenw y’a daminɛ ka “Asera jaaw ni joo wɛrɛw sɔn.” (2 Til. Kib. 24:4, 17, 18). O koo ye Jehova dusu kasi kosɔbɛ. O bɛɛ n’a ta, a tora ka “kiraw ci jama fɛ janko u ka kɔsegi ale ma, . . . nga u ma mɛnni kɛ.” U yɛrɛ ma mɛnni kɛ Yoyada dencɛ Zakari fɛ. c Zakari tun ye Jehova ka kira ani sarakalasebaga ye. Masacɛ Zowasi balimacɛ tun lo fana. Tiɲɛn na, masacɛ Zowasi tun ye ɲumanlɔnbali ye yɛrɛ le. A y’a to u ye Zakari faga, k’a sɔrɔ Zakari  somɔgɔw lo tun y’a niin kisi.—2 Til. Kib. 22:11; 24:19-22.

17. Zowasi labanna cogo di?

¹⁷ Zowasi ma siran Jehova ɲɛ ani a laban, o ye bɔnɛ lase a ma. Jehova tun y’a fɔ ko “mɔgɔ min b’ale dɔgɔya, ale fana b’o tigi dɔgɔya.” (1 Sam. 2:30). Kɔfɛ, Sirikaw ka kɛlɛbolo dennin dɔ ye see sɔrɔ Zowasi ka “kɛlɛden caaman” kan ani u ye Zowasi mandimi kosɔbɛ. Sirikaw taganin kɔ, Zowasi ka baaradenw y’a faga sabu a tun ye Zakari faga. Jama y’a jati k’o masacɛ jugu suu man kan ka don “masacɛw ka kaburu kɔnɔ.”—2 Til. Kib. 24:23-25.

18. Ka kɛɲɛ ni Zeremi 17:7, 8 ye, an be se ka mun lo kɛ walisa an kana kɛ i ko Zowasi?

¹⁸ An be kalan juman lo sɔrɔ Zowasi ka koo la? Zowasi tun be i ko yiri dɔ min liliw ma don ka ɲɛ dugukolo jukɔrɔ ani a mako be lɔgɔ dɔ la walisa ka lɔ ka ɲɛ. Yoyada lo tun be i ko o lɔgɔ. Ale sanin kɔ, Zowasi y’a daminɛ ka mɛnni kɛ mɔgɔ murutininw fɛ. O y’a to a murutira Jehova ma. O misali b’a yira ko an man ɲi ka siran Ala ɲɛ dɔrɔn sabu an somɔgɔw ni kafoden wɛrɛw be nɔɔ ɲuman to an kan. Walisa an magwɛrɛnin ka to Jehova la, an ka ɲi ka Bibulu n’an ka gafew sɛgɛsɛgɛ tuma o tuma, ka miiri u kan ani ka to ka delili kɛ. O la, dɔ bena fara an ka kanuya kan Jehova koo la ani an bena a bonya kosɔbɛ.—Zeremi 17:7, 8 kalan; Kɔlɔs. 2:6, 7.

19. Jehova be mun lo ɲini an fɛ?

¹⁹ Jehova tɛ koo caaman ɲini an fɛ. A be min ɲini an fɛ, o fɔra ka surunya Waajulikɛla 12:13 kɔnɔ ko: “Ka siran Ala ɲa, o dama le ye adamaden ka kɛta ye, bɛɛ ka Ala ka fɔta bato.” N’an be siran Ala ɲɛ, kɔrɔbɔli o kɔrɔbɔli mana an sɔrɔ sini ma, an bena se ka lɔ kelen kan i ko Obadiyawu ani Yoyada. Foyi tɛna se ka an ni Jehova ka teriya nagasi.