1. Jehova ye mun lo kɛ an kelen kelen bɛɛ ye?

JEHOVA y’an kelen kelen bɛɛ dɛmɛ k’ale lɔn (Zan 6:44). Miiri k’a filɛ o kɔrɔ ye min ye. Mɔgɔ miliyari caaman minw be dugukolo kan, Jehova ye olu lajɛ koɲuman ani a ye fɛɛn dɔ ye i la min diyara a ye kosɔbɛ. A y’a ye ko i kɔnɔ gwɛnin lo ani ko i be se k’ale kanu (1 Til. Kib. 28:9). Jehova b’i lɔn, a b’i faamu ani a b’i kanu. O be mɔgɔ hakili sigi yɛrɛ le!

2. Jehova b’a janto an kelen kelen bɛɛ la cogo min na, Yezu y’an dɛmɛ cogo di k’o faamu?

² Jehova b’a janto i la kosɔbɛ. A b’a janto i balimaw bɛɛ la fana. Walisa k’an dɛmɛ k’o faamu, Yezu ye Jehova suma ni sagadɛndɛla ye. Ni sagadɛndɛla be ni saga kɛmɛ ye ani kelen tununa, a bena mun lo kɛ do? A bena “saga bi kɔnɔntɔn ni kɔnɔntɔn to kulu kan ka taga kelen nin yaala.” N’a y’a ye, a tɛna dimi a kɔrɔ. Nka, a bena ninsɔndiya. O b’a yira an na ko Jehova ka sagaden kelen kelen bɛɛ koo ka gwɛlɛ a ma. Yezu ko: “Aw Faa min be sankolo la, a t’a fɛ denmisɛn nunu dɔ ka tunu.”—Mat. 18:12-14.

3. An bena mun lo lajɛ barokun nin na?

³ An t’a fɛ abada ka kɛ sababu ye an balima dɔ fari ka faga. An be se ka mun lo kɛ walisa an kana tɔɔw kunnatiɲɛ? An be se ka mun lo kɛ fana ni dɔ y’an hakɛ ta? An bena o ɲiningaliw jaabi barokun nin na. Nka, an k’a filɛ fɔlɔ “denmisɛn” minw kofɔra Matiyo sapitiri 18 kɔnɔ, olu ye mɔgɔ minw ye.

4. “Denmisɛn” minw kofɔra, olu ye jɔnw lo ye?

⁴ “Denmisɛn” nunu ye Yezu ka kalandenw lo ye, u sanda mana kɛ min o min ye. U bɛɛ be i ko “denmisɛnw” sabu u be sɔn Yezu k’u kalan (Mat. 18:3). U bɔyɔrɔ, u ka siya, u ka koow jaticogo ani u sɔɔn tɛ kelen ye. Nka, u bɛɛ limaniyanin lo Krista la. Ale fana b’u kanu kosɔbɛ.—Mat. 18:6; Zan 1:12.

5. Ni dɔ ye a sagokɛla dɔ kunnatiɲɛ wala ka koo jugu kɛ a la, o be mun lo kɛ Jehova la?

⁵ “Denmisɛn” minw kofɔra, u bɛɛ koo ka gwɛlɛ Jehova ma kosɔbɛ. Walisa k’o faamu, an ka miiri k’a filɛ an be denmisɛnw jati cogo min na. U koo ka gwɛlɛ an ma kosɔbɛ. An b’a fɛ k’u latanga sabu u tɛ ni balikuw ka fanga, lɔnniya ani hakilitigiya ɲɔgɔn ye. A man di an ye ko mɔgɔ dɔ ka koo jugu kɛ a tɔɲɔgɔn na. O b’an dusu tiɲɛ wala k’a to an be dimi yɛrɛ sanko n’o koo jugu kɛra denmisɛn lo la! O cogo kelen na, Jehova b’a fɛ k’an latanga. O kama, ni mɔgɔ dɔ ye a sagokɛla dɔ kunnatiɲɛ wala ka koo jugu kɛ a la, o b’a dusu tiɲɛ ani k’a to a be dimi yɛrɛ!—Ezayi 63:9; Mariki 9:42.

6. Ka kɛɲɛ ni 1 Korɛntikaw 1:26-29 ka fɔta ye, duniɲa mɔgɔw be Yezu ka kalandenw jati cogo di?

⁶ Cogo wɛrɛ juman na Yezu ka kalandenw be i ko ‘denmisɛnw’? Miiri k’a filɛ: Duniɲa mɔgɔw be bonya la mɔgɔ jumanw lo kan? Nafolotigiw, mɔgɔ minw tɔgɔ bɔra ani setigiw. Yezu ka kalandenw do man teli ka kɛ o mɔgɔ suguw ye. O kama, duniɲa mɔgɔw b’u mafiɲɛya ani u be u jati mɔgɔ dɔgɔmanninw ye (1 Korɛntikaw 1:26-29 kalan). Nka, Jehova tɛ u jati o cogo la.

7. Jehova b’a fɛ an k’an balimaw jati cogo di?

⁷ An be Jehova sago kɛra a mɛɛnna wo, a ma mɛɛn wo, an bɛɛ koo ka di a ye. An balimaw bɛɛ koo ka gwɛlɛ Jehova ma. O kama, u koo ka ɲi ka gwɛlɛya an fana ma. An ka ɲi k’an “balimaw [bɛɛ] kanu.” An man ɲi k’u damanin dɔrɔn lo kanu (1 Piyɛri 2:17). An ka ɲi k’an seko bɛɛ kɛ k’an balimaw latanga ani k’an janto u la. N’an bɔra a kala ma ko an donna balima dɔ gasi la, an man ɲi k’an ɲɛɛ tugu o kan k’a miiri ko o tigi ka ɲi ka yafa an ma ani ka ɲinɛ o kɔ. Mun lo be se k’a to dɔw be dimi? Dɔw lamɔcogo b’a to u b’a miiri ko tɔɔw ka fisa n’u ye. Dɔ wɛrɛw be tiɲɛn sira kan a ma mɛɛn. O kama, u t’a lɔn ko u ka ɲi ka tɔɔw ka filiw yafa. A mana kɛ min o min ye, n’an donna an balima dɔ gasi la, an ka ɲi k’an seko bɛɛ kɛ walisa ka hɛɛrɛ sigi kokura n’a ye. Mɔgɔ min fana ka teli ka dimi tɔɔw ka filiw kosɔn, ale ka ɲi ka sɔn a ma ko o tɛ koɲuman ye ani k’a jija k’o dabila. N’a b’o kɛ, a bena ninsɔndiya sɔrɔ ani a bena jɛnɲɔgɔnya ɲuman kɛ n’a balimaw ye.

8. Yezu ka wagati la, mɔgɔw tun be ni miiriya juman lo ye min ye nɔɔ to a ka kalandenw kan?

⁸ Mun na Yezu kumana ‘denmisɛnw’ koo la? A kumana u koo la sabu a ka kalandenw tun y’a ɲininga ko: “Sankolo masaya la, jɔn le ye mɔgɔbaba ye?” (Mat. 18:1). O wagati la, lɔyɔrɔba tun kɔrɔtanin lo Yahutu caaman fɛ. Lɔnnikɛla dɔ y’a fɔ ko: “Ka bonya ni tɔgɔba sɔrɔ ani ka kɛ ni lɔyɔrɔba ye, o lo tun kɔrɔtanin lo kosɔbɛ mɔgɔw ka ɲɛnamaya kɔnɔ.”

9. Yezu ka kalandenw tun ka ɲi ka mun lo kɛ?

 ⁹ Yezu tun b’a lɔn ko ka kɛ ni lɔyɔrɔba ye, o tun kɔrɔtanin lo Yahutu caaman fɛ. O kama, a ka kalandenw tun ka ɲi ka jijalibaw kɛ walisa k’u miiricogo yɛlɛma. A y’a fɔ u ye ko: “Mɔgɔ min ye mɔgɔbaba ye aw cɛma, o tigi k’a yɛrɛ kɛ i n’a fɔ aw bɛɛ la dɔgɔ. Fanga be min bolo, o tigi k’a yɛrɛ kɛ aw ka baaraden ye.” (Luka 22:26). Walisa k’an yɛrɛ kɛ bɛɛ ka “dɔgɔ” ye, an k’a jati ko tɔɔw ‘ka fisa n’an ye.’ (Filip. 2:3). N’an be koow jati o cogo la, an man teli ka tɔɔw kunnatiɲɛ.

10. An ka ɲi ka Pol ka ladili juman lo sira tagama?

¹⁰ An balimaw bɛɛ ka fisa n’an ye koo dɔw la. A tɛna gwɛlɛya an ma k’o faamu n’an be sinsin u ka jogo ɲumanw lo kan. An k’an jija ka ciden Pol ka ladili sira tagama, a y’o min di Korɛntikaw ma. A ko: “Jɔn le y’a kɛ i fisayara ni tɔw ye? Mun le b’i fɛ ni Ala m’o d’i ma? N’i do y’o sɔrɔ Ala fɛ, mun na e b’i yɛrɛ boɲa i n’a fɔ i yɛrɛ seko lo?” (1 Kor. 4:7). O la, an man ɲi k’an yɛrɛ yira wala k’a miiri ko an ka fisa ni tɔɔw ye. Ni balimacɛ dɔ be to ka kalan diimanw kɛ wala ni balimamuso dɔ ka teli ka bibulukalanw daminɛ, u ka ɲi ka Jehova waleɲuman lɔn tuma bɛɛ o kosɔn.

11. Yezu ye ntalen min la masacɛ dɔ n’a ka baaraden koo la, an be kalan juman lo sɔrɔ o la?

¹¹ Yezu ye a ka kalandenw lasɔmi ko u kana tɔɔw kunnatiɲɛ. O kɔ, a ye ntalen dɔ la masacɛ dɔ n’a ka baaraden koo la. Masacɛ ka juruba dɔ tun b’o baaraden na ani a yafara o kɔ sabu a tun tɛna se k’o sara abada. O baaraden ka juru min tun b’a tɔɲɔgɔn na, a banna ka yafa o kɔ k’a sɔrɔ o tun ma se ale ta ma hali dɔɔni! A laban, masacɛ y’o baaraden jugu don kaso la. An be kalan juman lo sɔrɔ o la? Yezu ko: “Ne Faa min be sankolo la, o bena aw kɛ ten, n’aw te sɔn ka yafa aw tɔɲɔgɔn ma aw dusu bɛɛ la.”—Mat. 18:21-35.

12. Cogo juman na an be koo jugu kɛ tɔɔw la, n’an be ban ka yafa u ma?

¹² Baaraden ye koo jugu kɛ a yɛrɛ ani tɔɔw la. A fɔlɔ, a ye koo jugu kɛ a baaradenɲɔgɔn na ani a ma makari a la. A “y’a don kaso la, k’a fɔ ko ni ale ka juru ma sɔrɔ, ko a te bɔ.” A filanan, a ye koo jugu kɛ a baaradenɲɔgɔn tɔɔw la minw y’a ye a ye min kɛ a tɔɲɔgɔn na. O kosɔn, “olu nii tɔɔrɔla kosɔbɛ.” An fana ka kɛwalew be nɔɔ to tɔɔw kan. Ni dɔ y’an hakɛ ta ani an banna ka yafa a ma, mun lo be se ka kɛ do? A fɔlɔ, an be koo jugu kɛ a la sabu an be ban ka yafa a ma, k’an mako don a la ani k’a kanu. A filanan, an be maloya bila kafoden tɔɔw la, n’u y’a kɔrɔsi ko bɛɛn t’an ni o balima cɛ.

13. I be kalan juman lo sɔrɔ piyɔniye dɔ ka koo la?

¹³ N’an be yafa an balimaw ma, o be an yɛrɛ ni tɔɔw nafa. Balimamuso Crystal ka koo b’o lo yira. Piyɔniye lo ani a ka kafo kɔnɔ, balimamuso dɔ donna a gasi la. Crystal ko: “Tuma dɔw la, a ka kumaw tun be digi n’ na i n’a fɔ a ye muru lo don n’ na. N’ yɛrɛ tun t’a fɛ ka waajuli kɛ n’a ye. Dɔɔni dɔɔni, n’ tun kisɛyanin tɛ tugun waajuli la ani n’ ka ninsɔndiya y’a daminɛ ka nagasi.” Crystal tun b’a miiri ko joo b’ale fɛ ka dimi o balimamuso kɔrɔ. Nka, a diminin ma to ani a ma to ka  miiri a yɛrɛ ani a dusukunnakow dɔrɔn na. Komi a tun majiginin lo, a ye Bibulu ka ladili dɔ sira tagama. O ladili be sɔrɔ saan 1999, ɔkutɔburu tile 15nan ka Kɔrɔsili Sangaso kɔnɔ barokun nin na: “Pardonnez de tout votre cœur.” Crystal yafara a balimamuso ma. A ko: “Sisan, n’ b’a faamu ko an bɛɛ b’an jijara kosɔbɛ ka yɛlɛmaniw kɛ ani ko loon o loon Jehova labɛnnin lo ka yafa an ma. A be komi u ye doniba dɔ lo ta ka bɔ n’ kan ani n’ ye ninsɔndiya sɔrɔ kokura.”

14. Ka kɛɲɛ ni Matiyo 18:21, 22 ye, n’a sɔrɔ mun lo tun ka gwɛlɛ ciden Piyɛri ma? Yezu y’a jaabi cogo min na, i be kalan juman lo sɔrɔ o la?

¹⁴ An b’a lɔn ko an ka ɲi ka yafa tɔɔw ma ani o ye koo ɲuman ye. Nka, n’a sɔrɔ a ka gwɛlɛ an ma k’o kɛ. I be taga a sɔrɔ o tun ka gwɛlɛ ciden Piyɛri ma tuma dɔw la (Matiyo 18:21, 22 kalan). Mun lo be se k’an dɛmɛ? A fɔlɔ, miiri k’a filɛ Jehova yafara i ma siɲɛ daa min na (Mat. 18:32, 33). Hali ni an man kan n’a ka yafali ye, a be yafa an ma siɲɛ caaman (Zab. 103:8-10). “An fana ka kan ka ɲɔgɔn kanu.” (1 Zan 4:11). O la, waajibi lo an ka yafa an balimaw ma. A filanan, miiri k’a filɛ min be kɛ ni an yafara. Tigi min y’an hakɛ ta, an b’ale dɛmɛ, an be kafo ka kelenya sabati, ka an ni Jehova ka jɛnɲɔgɔnya barika bonya ani an yɛrɛ dusu be lafiya (2 Kor. 2:7; Kɔlɔs. 3:14). A laban, Jehova min b’a ɲini an fɛ ko an ka yafa, ale deli. Hɛɛrɛ min be ele n’i balimaw cɛ, kana a to Sutana k’o nagasi (Efɛz. 4:26, 27). Walisa k’an yɛrɛ tanga Sutana ka jaanw ma, an mako be Jehova ka dɛmɛ na.

15. Ka kɛɲɛ ni Kɔlɔsikaw 3:13 ye, i be se ka mun lo kɛ ni balima dɔ donna i gasi la?

¹⁵ Nka, ni balima dɔ ye koo dɔ kɛ min digira i la kosɔbɛ, i ka ɲi ka mun lo kɛ  do? I seko bɛɛ kɛ walisa hɛɛrɛ ka to aw ni ɲɔgɔn cɛ. I dusukunnakow fɔ Jehova ye. A deli a k’o tigi duga ani o tigi ka jogo ɲuman minw ka di ale ye, a k’i dɛmɛ k’o ye (Luka 6:28). I balima ye koo min kɛ i la, n’i tɛ sera ka ɲinɛ o kɔ, miiri k’a filɛ i be se ka kuma n’a ye cogo ɲuman min na. A ka ɲi tuma bɛɛ an k’a miiri ko an balima ma tugu le ka don an gasi la (Mat. 5:23, 24; 1 Kor. 13:7). N’i be kumana n’a ye, kana a miiri ko a ŋaniya man ɲi. Nka n’a t’a fɛ ka hɛɛrɛ kɛ n’i ye do? To k’a “dɛmɛdɛmɛ” ani ka muɲu a kɔrɔ (Kɔlɔsikaw 3:13 kalan). A yɛrɛ kɔrɔtanin lo kosɔbɛ i kana dimi mara i kɔnɔ. N’o tɛ, o be se ka ele ni Jehova ka teriya nagasi. Kana a to koo si k’i kunnatiɲɛ abada! O la, i bena a yira ko i be Jehova kanu ka tɛmɛ fɛɛn bɛɛ kan.—Zab. 119:165.

16. An kelen kelen bɛɛ be ni kunkanbaara juman lo ye?

¹⁶ An be Jehova waleɲuman lɔn sabu an be se k’a bato n’an balimaw ye i ko saga “kulu kelen,” “dɛndɛbaga kelen” be min ɲɛminɛna! (Zan 10:16). Gafe Organisés ɲɛɛ 165nan kɔnɔ, a fɔra ko: “Komi i b’o denbaya mɔgɔw cɛma o minw kaan bɛnnin lo, i ka ɲi k’i seko bɛɛ kɛ walisa o kelenya kana nagasi.” O kama, an ka ɲi “k’an jija k’an balimaw jati i ko Jehova b’u jati cogo min na.” Jehova ɲɛɛ kɔrɔ, an bɛɛ ye ‘denmisɛnw’ ye minw koo ka gwɛlɛ a ma. Yala i balimaw koo ka gwɛlɛ ele fana ma wa? I be koo minw bɛɛ kɛ k’u dɛmɛ ani k’i janto u la, Jehova b’o bɛɛ kɔrɔsi.—Mat. 10:42.

17. An jijanin lo ka mun lo kɛ?

¹⁷ An kerecɛnɲɔgɔnw koo ka di an ye. O kama, an jijanin lo walisa an ‘kana kɛ sababujugu ye an balima dɔ ma.’ (Ɔrɔm. 14:13). An b’a jati ko an balimaw ka fisa n’an ye ani an be yafa u ma n’an dusu bɛɛ ye. An kana a to tɔɔw k’an kunnatiɲɛ. Nka, “an ka banba ka to hɛrɛ la ɲɔgɔn fɛ ani ka ɲɔgɔn dɛmɛ ka barika sɔrɔ.”—Ɔrɔm. 14:19.