1. Tuma dɔw la, mun na Jehova sagokɛla dɔw b’a jati ko u b’u kelen na?

TUMA dɔw la, an fanba b’a jati ko an b’an kelen na. Dɔw fɛ, o miiriya tɛ mɛɛn ka sɔrɔ ka tɛmɛ, nka dɔ wɛrɛw b’o miiri wagatijan kɔnɔ. Hali n’an be ni mɔgɔ caaman ye, an bele be se k’a jati ko an b’an kelen na. Ni dɔw yɛlɛmana kafo wɛrɛ la, a man nɔgɔ u fɛ ka teriya don ni balimaw ye. Dɔ wɛrɛw be koo caaman kɛ n’u somɔgɔw ye. Nka, n’u tagara yɔrɔ dɔ la ani u yɔrɔ ka jan u somɔgɔw la, u b’a jati ko u b’u kelen na. Dɔw fana ka mɔgɔ kanulen dɔ sara ani a ɲɛnafin b’u la kojugu. Kerecɛn dɔw fana b’a jati ko u b’u kelen na sanko minw ye tiɲɛn lɔn a ma mɛɛn. U b’o miiri sabu u somɔgɔw n’u teri minw tɛ Jehova Seerew ye, olu banna u la wala u b’u kɛlɛ.

2. An bena ɲiningali jumanw lo jaabi?

² Jehova b’an ka koow bɛɛ kala ma ani a b’an faamu. N’an b’a jati ko an b’an kelen na, a b’o kala ma ani a b’a fɛ k’an dɛmɛ an ka see sɔrɔ o miiriya kan. Jehova b’an dɛmɛ cogo di? An fana be se ka mun lo kɛ? An ka kafomɔgɔ minw b’a miiri ko u b’u kelen na, an be se k’olu dɛmɛ cogo di? An k’o ɲiningaliw jaabiliw lajɛ.

3. Jehova y’a yira kira Eli la cogo di ko a b’a janto a la?

³ Jehova b’a fɛ a sagokɛlaw bɛɛ ka ninsɔndiya sɔrɔ. A b’an kelen kelen bɛɛ gɛrɛfɛ ani n’an dusu kasinin lo wala an fari faganin lo, a b’o kala ma (Zab. 145:18, 19). A kɔrɔsi Jehova y’a janto kira Eli la cogo min na. O cɛɛ kantigi tun be Israɛl jamana na ani koow tun man nɔgɔ  hali dɔɔni o wagati la. Mɔgɔ minw lɔyɔrɔ tun ka bon ani Jehova tun koo man di u ye, olu tun b’a sagokɛlaw kɛlɛ kosɔbɛ. U yɛrɛ tun b’a fɛ ka Eli faga (1 Mas. 19:1, 2). Eli tun b’a miiri ko ale kelen dɔrɔn lo tora Jehova ka kiraw cɛma. N’a sɔrɔ o fana y’a hakili ɲagami (1 Mas. 19:10). Ala sinna ka dɔ kɛ dɔ ye ka Eli dɛmɛ. A ye mɛlɛkɛ dɔ ci walisa k’a ka kira hakili sigi ko a t’a kelen. A y’a fɔ a ye ko Ala ɲɛsiranbaga caaman bele be yen Israɛl jamana na!—1 Mas. 19:5, 18.

4. Minw somɔgɔw wala u teriw banna u la, Mariki 10:29, 30 b’a yira cogo di ko Jehova b’a janto u la kosɔbɛ?

⁴ Jehova b’a lɔn ko an dɔw ka ɲi ka fɛɛn caaman saraka n’an b’a fɛ ka ale sago kɛ. Misali la, an somɔgɔw n’an teri minw tɛ Jehova Seerew ye, n’a sɔrɔ an tɛna olu ka dɛmɛ sɔrɔ tugun. A be komi ciden Piyɛri tun be hamina o lo la tuma min na a ye Yezu ɲininga ko: “An ye fɛɛn bɛɛ to yen ka tugu e kɔ. An ta bena kɛ cogo di?” (Mat. 19:27). Yezu y’a ka kalandenw hakili sigi ni kanuya ye ko u bena denbaya mɔgɔ caaman sɔrɔ Alako ta fan fɛ (Mariki 10:29, 30 kalan). Jehova lo y’o denbaya Kuntigi ye ani a ye layidu ta ko minw b’a fɛ k’ale sago kɛ, a bena olu dɛmɛ (Zab. 9:11). N’i b’a jati ko i b’i kelen na, i be se ka koo tigitigi jumanw lo kɛ walisa Jehova k’i dɛmɛ i ka see sɔrɔ o miiriya kan? An k’u dɔw lajɛ.

5. Jehova b’i dɛmɛna cogo min na, mun na a ka ɲi i ka miiri o la?

⁵ Jehova b’i dɛmɛna cogo min na, miiri o la (Zab. 55:23). O bena i dɛmɛ i k’i ka koo jati k’a dama kɛɲɛ. Balimamuso dɔ tɔgɔ ko Carol, a furunin tɛ ani a somɔgɔ si tɛ Jehova Seere ye. * A ko: “Jehova ye n’ dɛmɛ cogo min na gwɛlɛyaw wagati la, ni n’ miirila o la, n’ b’a ye ko n’ tɛ n’ kelen na. O be n’ hakili sigi fana ko Jehova bena n’ dɛmɛ tuma bɛɛ.”

6. Minw b’a miiri ko u b’u kelen na, 1 Piyɛri 5:9, 10 kɔnɔkumaw be se k’olu jija cogo di?

 ⁶ An balima minw b’a jati ko u b’u kelen na, miiri k’a filɛ Jehova b’u dɛmɛna cogo min na (1 Piyɛri 5:9, 10 kalan). Saan caaman kɔnɔ, balimacɛ Hiroshi kelenpe lo tun ye Jehova Seere ye a somɔgɔw cɛma. A ko: “A gwɛnin lo ko gwɛlɛyaw be kafodenw bɛɛ kan. An minw somɔgɔ si tɛ tiɲɛn sira kan, k’a lɔn ko an bɛɛ b’an seko lo kɛra ka Jehova sago kɛ, o b’an jija.”

7. Delili b’i dɛmɛ cogo di?

⁷ Kɛ ni delinanko ɲumanw ye Alako ta fan fɛ. Misali la, i dusukunnakow bɛɛ fɔ Jehova ye (1 Piyɛri 5:7). Balima sunguru dɔ tɔgɔ ko Massiel. Tuma min na a y’a latigɛ ka Jehova sago kɛ, a tun b’a jati ko a b’a kelen na sabu a somɔgɔw tun tɛ Jehova sagokɛlaw ye. A ko: “N’ tun b’a jati ko n’ be n’ kelen na. Koo kɔrɔtanin minw ye n’ dɛmɛ ka see sɔrɔ o miiriya kan, u dɔ ye ko n’ tun be Jehova deli ni n’ dusu bɛɛ ye. N’ tun b’a jati n’ Faa yɛrɛyɛrɛ ye, n’ tun b’a deli siɲɛ caaman tile kɔnɔ loon o loon ka n’ dusukunnakow fɔ a ye.”

8. Ka Ala ka Kuma kalan ani ka miiri a kan, o b’i dɛmɛ cogo di?

⁸ Ala ka Kuma kalan tuma o tuma ani maana minw b’a yira ko Jehova b’i kanu, miiri olu kan. Balimamuso Bianca somɔgɔw tun be kuma dɔw fɔ a ma walisa k’a fari faga. A ko: “N’ tun be Bibulu ka maanaw kalan ani ka miiri u kan. N’ ka gwɛlɛyaw ɲɔgɔn tun be Jehova sagokɛla minw kan, n’ tun be olu fana ka maanaw kalan ani ka miiri u kan. O ye n’ dɛmɛ yɛrɛ le!” Vɛrise minw be mɔgɔ jija kosɔbɛ i n’a fɔ Zaburuw 27:10 ani Ezayi 41:10, balima dɔw be u to u hakili la. Sɛbɛ minw ka ɲi ka lajɛ lajɛnw na, dɔw be olu kalangwɛ lamɛn lajɛnw labɛntɔ. Wala n’u be Bibulu kalanna, u be Bibulu kalangwɛ lamɛn. U ko o b’a to u t’a jati ko u b’u kelen na.

9. Lajɛnw b’i nafa cogo di?

⁹ I seko bɛɛ kɛ ka taga lajɛnw na tuma o tuma. Kalanw bena i jija ani i bena se k’i balimaw lɔn (Eburuw 10:24, 25). Massiel min kofɔra ka tɛmɛ, ale ko: “Hali ni kuma tun man di n’ ye fewu, n’ y’a latigɛ ka taga lajɛnw bɛɛ la ani ka lakalita dɔ kɛ. O y’a to n’ b’a jati ko n’ ye kafoden dɔ ye.”

10. Mun na a kɔrɔtanin lo an ka teriya kɛ ni kerecɛn kantigiw ye?

¹⁰ Teriya kɛ ni kerecɛn kantigiw ye. Teriya kɛ ni kafodenw ye minw ye  ɲɛyirali ɲumanw ye. A be se ka kɛ ko aw sanda wala aw bɔyɔrɔ tɛ kelen ye. Bibulu b’a fɔ ko “hakilitigiya be sɔrɔ sitigi fɛ.” (Zɔbu 12:12). Mɔgɔkɔrɔbaw fana be se ka kalan sɔrɔ kerecɛn kantigiw fɛ minw sii hakɛ ma se u ta ma. Zonatan tun ka kɔrɔ ni Dawuda ye, nka o m’u bali ka kɛ teri sɔbɛw ye (1 Sam. 18:1). U ye ɲɔgɔn dɛmɛ ka Jehova sago kɛ gwɛlɛyabaw bɛɛ n’a ta (1 Sam. 23:16-18). Balimamuso Irina somɔgɔ si tɛ Jehova sagokɛla ye fɔlɔ. A ko: “Tiɲɛn na, an balimaw be se ka kɛ i ko an bangebagaw wala an kɔrɔw n’an dɔgɔw. An mako be min na, Jehova be se ka tɛmɛ u fɛ k’o di an ma.”

11. I ka ɲi ka mun lo kɛ walisa ka teri sɔbɛw sɔrɔ?

¹¹ A be se ka gwɛlɛya i ma ka teri kuraw sɔrɔ, sanko ni kuma man di i ye. Kuma man di balimamuso Ratna ye ani a sɔnna tiɲɛn ma kɔrɔbɔliw bɛɛ n’a ta. A ko: “N’ tun ka ɲi ka sɔn a ma ko n’ mako be balimaw ka dɛmɛ na.” N’a sɔrɔ a ka gwɛlɛ i ma k’i dusukunnakow fɔ mɔgɔ wɛrɛ ye. Nka n’i y’o kɛ, ele n’a tigi be se ka kɛ teri sɔbɛw ye. I teriw b’a fɛ k’i jija ani k’i dɛmɛ. Nka, u mako b’a la i k’a fɔ u ye u be se k’o kɛ cogo min na.

12. I be se ka teri sɔbɛw sɔrɔ cogo di waajuli baara sababu fɛ?

¹² An be se ka teriw sɔrɔ cogo fisaman minw na, u dɔ ye ka waajuli kɛ n’an balimaw ye. An kumana Carol min koo la, ale ko: “N’ ye teri sɔbɛ caaman sɔrɔ sabu n’ ye waajuli kɛ ni balimamusow ye ani ka koo wɛrɛw kɛ n’u ye Jehova ka baara la. Saan tɛmɛninw na, Jehova tɛmɛna o balimaw fɛ ka n’ dɛmɛ.” N’an be teriya kɛ ni kerecɛn kantigiw ye, o b’an nafa tuma bɛɛ. Jehova be se ka tɛmɛ o teriw fɛ k’i jija n’i b’a miiri ko i b’i kelen na wala ni koo wɛrɛ ye i fari faga.—Talenw 17:17.

13. Kafoden kelen kelen bɛɛ be ni kunkanbaara juman lo ye?

¹³ Kafoden kelen kelen bɛɛ ka kunkanbaara ye k’a jija walisa kanuya ni hɛɛrɛ ka to kafo kɔnɔ. Kafoden si man ɲi k’a jati ko ale b’a kelen na (Zan 13:35). An be min kɛ ani ka min fɔ, o be se ka tɔɔw jija kosɔbɛ! Balimamuso dɔ ko: “Tuma min na n’ ye tiɲɛn lɔn, kafodenw kɛra n’ ka denbaya mɔgɔw ye. N’olu ka dɛmɛ tun tɛ, n’ tun tɛna se ka kɛ Jehova Seere ye.” Mɔgɔ minw somɔgɔ si tɛ tiɲɛn sira kan, i be se ka mun lo kɛ walisa u k’a ye ko kafodenw b’u kanu?

14. I be se ka mun lo kɛ walisa ka teriya kɛ ni mɔgɔ kuraw ye?

¹⁴ A ɲini ka teriya kɛ ni mɔgɔ kuraw ye. Kafo kɔnɔ, an be se k’a daminɛ ka mɔgɔ kuraw bisimila ni dusudiya ye (Ɔrɔm. 15:7). Nka, an man ɲi ka dan o dɔrɔn ma. An ka ɲi k’a ɲini ka teriya sɔbɛ kɛ n’u ye. O la, i mako don mɔgɔ kuraw la sɔbɛ la. A ɲini k’a lɔn gwɛlɛya min be u kan. Nka, kana ɲiningali dɔw kɛ minw bena maloya bila u la. N’a sɔrɔ a ka gwɛlɛ dɔw ma k’u dusukunnakow fɔ. O kama, kana u waajibiya u ka kuma. Nka, ɲiningaliw kɛ nɛmɛnɛmɛ ani muɲu k’u lamɛn. Misali la, i be se k’u ɲininga u ye tiɲɛn lɔn cogo min na.

15. Kerecɛn kolɔnbagaw be se ka tɔɔw dɛmɛ cogo di kafo kɔnɔ?

¹⁵ Kerecɛn kolɔnbagaw, sanko diinan mɔgɔkɔrɔw ka ɲi k’u mako don kafodenw na. O la, u bɛɛ bena ɲɛtaga kɛ Alako ta fan fɛ. Melissa bamuso lo y’a  lamɔ tiɲɛn sira kan. A ko: “Saan caaman kɔnɔ, balimacɛ dɔw tun be komi n’ faaw. U tun be wagati kɛ ni n’ ye ani u y’u mako don n’ na. N’ b’u waleɲuman lɔn kosɔbɛ o kosɔn. Tuma o tuma ni n’ tun b’a fɛ ka kuma, mɔgɔ tun be yen ka n’ lamɛn.” Mauricio ye balima kanbele ye ani a tun b’a jati ko a b’a kelen na sabu a ka Bibulu kalanfa ye tiɲɛn sira bila. A ko: “Diinan mɔgɔkɔrɔw y’u mako don n’ na cogo min na, o ye n’ dɛmɛ kosɔbɛ. U tun be kuma ni n’ ye tuma o tuma ani u tun be waajuli kɛ ni n’ ye. U tun ye nafolofɛn minw sɔrɔ u ka kelenna kalan tuma na, u tun b’o tilan ni n’ ye ani an yɛrɛ tun be spɔr kɛ ɲɔgɔn fɛ.” Melissa ni Mauricio fila bɛɛ kɛra kudayi cidenya baarakɛlaw ye.

16-17. An be se ka tɔɔw dɛmɛ cogo tigitigi jumanw lo la?

¹⁶ Tɔɔw dɛmɛ cogo tigitigi dɔw la (Gal. 6:10). Leo ye misɔnden ye ani a be jamana dɔ la min yɔrɔ ka jan a somɔgɔw la. A ko: “Tuma caaman na, an mako b’a la dɔrɔn dɔ ka koo dennin dɔ kɛ an ye wagati bɛnnin na. N’ hakili b’a la ko loon dɔ, n’ ye aksidan kɛ ni mobili ye. N’ senin soo, n’ hakili tun ɲagaminin lo yɛrɛ le! Nka o kɔ, balimacɛ dɔ n’a muso ye n’ weele ka na fɛɛn dennin dɔ dumu u ka soo. N’ hakili t’a la an ye min dumu. Nka, n’ hakili be min na, o ye ko u ye n’ lamɛn koɲuman. O y’a to n’ hakili sigira yɛrɛ le!”

¹⁷ A ka di an bɛɛ ye ka kɛ n’an balimaw ye lajɛnbaw n’a ɲɔgɔnnaw na. O ka di an ye sabu an be wagati kɛ ni ɲɔgɔn ye ani kalan minw kɛra, an be baro kɛ u kan. Nka Carol min kofɔra ka tɛmɛ, ale ko: “Lajɛnbaw la, n’ b’a ye ko n’ be n’ kelen na kojugu!” Mun na do? A ko: “Balima caaman wala waa caaman yɛrɛ lo be yen. Nka tuma caaman na, u be n’u somɔgɔw lo ye. O b’a to n’ b’a ye ko n’ be n’ kelen na.” Lajɛnba min be kɛ dɔw furuɲɔgɔn sanin kɔ, a ka gwɛlɛ u ma ka taga o la. Yala i be mɔgɔ dɔ lɔn o gwɛlɛyaw ɲɔgɔn be min kan wa? N’o lo, i be se k’a weele a ka na fara ele n’i ka denbaya kan lajɛnba nata wala a ɲɔgɔnnakow la.

18. N’an be wagati kɛra ni tɔɔw ye, an be se ka 2 Korɛntikaw 6:11-13 kɔnɔkumaw sira tagama cogo di?

 ¹⁸ Wagati kɛ ni tɔɔw ye. An k’a ɲini ka wagati kɛ ni balimaw ye ani k’an “kɔnɔ gwɛ” k’u kanu, sanko minw b’a miiri ko u be u kelen na (2 Korɛntikaw 6:11-13 kalan). An kumana Melissa min koo la, ale ko: “Tuma o tuma ni balimaw tun y’an weele u ka soo walisa an ka wagati kɛ n’olu n’u ka denbaya mɔgɔw ye, wala ka taga voyazi la, o tun b’an ninsɔn diya kosɔbɛ.” Yala i be dɔ lɔn i ka kafo kɔnɔ i be se ka wagati kɛ ni min ye wa?

19. Tuma jumanw lo la, n’an be wagati kɛ n’an balimaw ye, o be u nafa kosɔbɛ?

¹⁹ Tuma dɔw la, a bena diya an balimaw ye kosɔbɛ an ka wagati kɛ n’u ye. Fɛtiw tuma na, a be se ka gwɛlɛya dɔw ma ka to n’u somɔgɔw ye minw tɛ Jehova Seerew ye. Wagati dɔw la, i n’a fɔ u ka mɔgɔ kanulen dɔ saya sanyɛlɛmalon na, dɔw dusu be tiɲɛ kojugu. O gwɛlɛyaw be balima minw kan, n’an be wagati kɛ n’u ye, an b’a yira ko an be “hami” u koo la sɔbɛ la.—Filip. 2:20.

20. Yezu ye min fɔ Matiyo 12:48-50 kɔnɔ, o be se k’an dɛmɛ cogo di n’an b’a miiri ko an b’an kelen na?

²⁰ Koo caaman be se k’a to kerecɛn dɔ b’a miiri tuma dɔw la ko a b’a kelen na. Nka, an man ɲi ka ɲinɛ fewu ko Jehova b’o kala ma. An mako be dɛmɛ min na, tuma caaman, a be tɛmɛ an kerecɛnɲɔgɔnw fɛ k’o lase an ma (Matiyo 12:48-50 kalan). Tiɲɛn na, Jehova ye labɛn kɛ ni kanuya ye an kosɔn. An b’a yira ko an b’a waleɲuman lɔn o koo la, n’an b’an seko bɛɛ kɛ k’an balimaw dɛmɛ. An dusukunnakow mana kɛ min o min ye, an t’an kelen abada sabu Jehova be n’an ye tuma bɛɛ!