BAROKUN KALANTA KAFO KƆNƆ 23
DƆNKILI 28 O Jehova, jɔn lo bena kɛ i teri ye?
Jehova b’an weele a ka soo
“Ne sigiyɔrɔ bena kɛ u cɛma. Ne bena kɛ u ka Ala ye.”—EZEK. 37:27.
BAROKUN KƆNƆNAKOW
Barokun nin bena an dɛmɛ k’a faamu a kɔrɔ ye min ye ka kɛ Jehova ka soo kɔnɔ. An bena a ye fana Jehova b’an ladon cogo min na.
1-2. Jehova ye nɛɛmaba juman lo kɛ a sagokɛla kantigiw ye?
JEHOVA ye jɔn lo ye ele fɛ? N’a sɔrɔ i bena a fɔ ko: “N’ Faa, n’ ka Ala ani n’ Teri lo.” N’a sɔrɔ i bena miiri bonyatɔgɔ wɛrɛw koo la. Nka, yala i bena a fɔ ko Jehova ye i Jatigi ye wa?
2 Masacɛ Dawuda ko Jehova be i ko Jatigi ani a sagokɛla kantigiw be i ko a ye jatigiya di mɔgɔ minw ma. A ko: “Masaba, jɔn le bena to i ka soo kɔnɔ? Jɔn le bena sigi e ka kulu senuman kan?” (Zab. 15:1). O vɛrise b’an dɛmɛ k’a faamu ko an be se ka sigi Jehova ka soo, o kɔrɔ, ka kɛ a teriw ye. O ye nɛɛmaba yɛrɛ lo ye!
JEHOVA B’AN BISIMILA A KA SOO KƆNƆ
3. Jehova kɔnna ka jatigiya di jɔn lo ma ani ale n’o tigi be mun lo miiri ɲɔgɔn koo la?
3 Sanni Jehova k’a daminɛ ka fɛɛnw dan, a tun b’a kelen. Nka o kɔ, a y’a Dencɛ fɔlɔ dan. A kɛra komi Jehova y’a Dencɛ Yezu bisimila a ka soo ani a diyara a ye k’o kɛ. Bibulu b’a fɔ k’o Dencɛ koo tun ka di Jehova ye kosɔbɛ. Ani Yezu tun be “ɲagali a ɲɛ kɔrɔ tuma bɛɛ.”—Talenw 8:30, Bible senuma.
4. Kɔfɛ, Jehova ye jɔnw lo weele a ka soo kɔnɔ?
4 Kɔfɛ, Jehova ye mɛlɛkɛ tɔɔw dan ani a y’olu fana bisimila a ka soo. Bibulu b’a fɔ ko mɛlɛkɛw ye “Ala denkɛw” ye ani ko u ninsɔn ka di ka kɛ ni Jehova ye (Zɔbu 38:7, Bible senuma; Dan. 7:10). Saan caaman kɔnɔ, o mɛlɛkɛ minw tun be ni Jehova ye sankolo la, olu lo tun y’a teriw ye. Kɔfɛ, a ye adamadenw dan ani a y’u dɔw bisimila a ka soo. U dɔw ye Enɔki, Nuhun, Ibrayima ani Zɔbu ye. Bibulu b’a fɔ ko u kɛra Ala teriw ye sabu u tun be mɛnni kɛ a fɛ.—Zɛnɛzi 5:24; 6:9; Zɔbu 29:4; Ezayi 41:8.
5. Ezekiyɛli 37:26, 27 ka kiraya kuma b’an dɛmɛ ka mun lo faamu?
5 Kabi saan kɛmɛkulu caaman, Jehova tora k’a ɲini adamadenw fɛ u ka na ale ka soo kɔnɔ, o kɔrɔ ka kɛ a teriw ye (Ezekiyɛli 37:26, 27 kalan). Misali la, Ezekiyɛli ka kiraya kuma b’an dɛmɛ k’a faamu ko Ala b’a fɛ sɔbɛ la a sagokɛla kantigiw ka jɛnɲɔgɔnya teriman kɛ n’ale ye. A y’a daa di ko a bena “hɛrɛ” layidu ta n’u ye. O kiraya kuma ɲɛsinna wagati dɔ lo ma, o min na minw ka jigiya ye ka taga ɲɛnamaya kɛ sankolo la ani minw ka jigiya ye ka ɲɛnamaya kɛ dugukolo kan, olu bena jɛn ka kɛ “kulu kelen” ye ani ka to a ka soo kɔnɔ (Zan 10:16). O lo be kɛra sisan!
ALA B’A JANTO AN NA AN MANA KƐ YƆRƆ O YƆRƆ
6. Mɔgɔ ka ɲi ka mun lo kɛ walisa Jehova k’a bisimila a ka soo? Jehova ka soo be yɔrɔ juman le?
6 Bibulu sɛbɛwagati la, fanibugu wala soo tun ye lafiyayɔrɔ ye ani a tun be mɔgɔ latanga sanji n’a ɲɔgɔnnaw ma. U tun mana mɔgɔ dɔ bisimila yen, u tun b’u janto a la koɲuman. N’an y’an yɛrɛkun di Jehova ma, a b’an bisimila a ka soo (Zab. 61:5). An be dumuni caaman sɔrɔ yen Alako ta fan fɛ ani an be jɛnɲɔgɔnya kɛ ni Jehova teri wɛrɛw ye. Jehova ka soo tɛ yɔrɔ tigitigi dɔ lo la. N’a sɔrɔ i delila ka taga lajɛnba kɛrɛnkɛrɛnnin dɔ kɛ jamana wɛrɛ la ani i ye mɔgɔ wɛrɛw sɔrɔ yen minw be Jehova ka soo ani u ninsɔn diyanin lo. O la, Jehova sagokɛla kantigiw be yɔrɔ o yɔrɔ, a ka soo fana be sɔrɔ yen.—Yir. 21:3.
7. Jehova sagokɛla kantigi minw sara, mun na an be se k’a fɔ ko u bele b’a ka soo? (jaa lajɛ fana).
7 Nka Jehova sagokɛla kantigi minw sara do? Yala a bɛnnin lo an k’a miiri ko u bele be Jehova ka soo kɔnɔ wa? Ɔnhɔn! Mun na an be se k’o fɔ? Sabu Jehova bele hakili b’u la koɲuman. Yezu y’a ɲɛfɔ ko: “Suuw bena kunun. Musa yɛrɛ fana tun y’o fɔ ka gwɛ yiritunin yɔrɔ la. A ye Matigi wele ko Ibrayima ka Ala, ni Isiyaka ka Ala, ani Yakuba ka Ala. Ala te suuw ka Ala ye, nga ɲanamanw ta lo, bari Ala fɛ, u sanin tɛ, u ɲanaman lo.”—Luka 20:37, 38.
Jehova sagokɛla kantigi minw sara, an be se k’a fɔ ko u bele b’a ka soo (dakun 7nan lajɛ).
AN BE NAFA MINW SƆRƆ O LA ANI AN KA KUNKANBAARAW YE MINW YE
8. Jehova be minw bisimila a ka soo, olu be nafa jumanw lo sɔrɔ o la?
8 Fanibugu wala soo ye lafiyayɔrɔ ye ani a be mɔgɔ latanga sanji n’a ɲɔgɔnnaw ma. O cogo kelen na, Jehova be mɔgɔ minw bisimila a ka soo, a b’olu latanga Alako ta fan fɛ ani a be jigiya sɔbɛ di u ma siniɲasigi koo la. N’an magwɛrɛnin tora Jehova la, Sutana tɛna se k’an mako sa pewu (Zab. 31:24; 1 Zan 3:8). Duniɲa kura kɔnɔ, Jehova bena to k’a teri kantigiw latanga Alako ta fan fɛ. Nka o dɔrɔn tɛ, a bena u latanga saya ma fana.—Yir. 21:4.
9. Jehova be minw bisimila a ka soo, a b’a fɛ olu ka mun lo kɛ?
9 Nɛɛmaba lo tiɲɛn na ka kɛ Jehova ka soo kɔnɔ sabu an be jɛnɲɔgɔnya teriman kɛ n’a ye, o min be se ka mɛɛn fɔɔ abada! N’an b’a fɛ ka to Jehova ka soo kɔnɔ, an ka ɲi ka to ka mun lo kɛ? Ni dɔ ye i weele a ka soo, a bena diya i ye k’a lɔn i ka ɲi ka min kɛ. Misali la, n’a sɔrɔ a bena a fɔ i ye ko i ka sanbara bɔ ka sɔrɔ ka don soo kɔnɔ ani a bena diya i ye k’o kɛ. O cogo kelen na, minw b’a fɛ ka to Jehova ka soo, an b’a fɛ k’a lɔn a be min ɲini olu fɛ. An be Jehova kanu minkɛ, o b’an lasun k’an seko bɛɛ kɛ walisa an “koo ka diya a ye tuma bɛɛ.” (Kɔlɔs. 1:10). Hali n’an be Jehova jati an Teri ye, an b’a faamu fana ko an ka Ala ani an Faa lo min ka kan ni bonya ye (Zab. 25:14). An man ɲi ka ɲinɛ o kɔ abada ani an ka ɲi ka bonyaba la a kan tuma bɛɛ. O bonya lo bena a to an be ban ka koo dɔ kɛ min bena a dusu tiɲɛ. Siga t’a la, an b’a fɛ ka ‘tugu an ka Ala kɔ ni yɛrɛmajigi ye.’—Mise 6:8.
KONGOKOLON KƆNƆ, JEHOVA Y’A YIRA KO A TƐ MƆGƆ BƆ MƆGƆ LA
10-11. Jehova ye Israɛldenw minɛ cogo min na kongokolon kɔnɔ, o b’a yira cogo di ko a tɛ mɔgɔ bɔ mɔgɔ la?
10 Jehova be minw bisimila a ka soo, a tɛ u dɔw fisaya ni dɔw ye (Ɔrɔm. 2:11). A ye Israɛldenw minɛ cogo min na Sinayi kongokolon kɔnɔ, o b’an dɛmɛ k’o lo faamu.
11 Jehova ye a ka jama hɔɔrɔnya ka bɔ jɔnya la Ezipiti. O kɔ, a ye sarakalasebagaw sigi u ka baara la fanibugu kɔnɔ. A ye baara wɛrɛw kalifa Levitew ma yen. Minw tun be baara kɛ fanibugu kɔnɔ wala minw ka finiso yɔrɔ tun man jan n’o yɔrɔ ye, yala Jehova tun b’a janto olu la ka tɛmɛ tɔɔw kan wa? Ayi! Jehova tɛ mɔgɔ bɔ mɔgɔ la.
12. Jehova tun ye labɛn minw kɛ Israɛldenw ye, o b’a yira cogo di ko a tɛ mɔgɔ bɔ mɔgɔ la? (Ɛkizɔdi 40:38; jaa lajɛ fana).
12 Israɛlden minw tun be baara kɛ fanibugu kɔnɔ wo, minw tun tɛ baara kɛ a kɔnɔ wo, minw tun siginin b’a gɛrɛfɛ wo, minw tun t’a gɛrɛfɛ wo, u kelen kelen bɛɛ tun be se ka jɛnɲɔgɔnya teriman kɛ ni Jehova ye. Misali la, sankaba min tun be fanibugu kun na tilefɛ ani tasuma min tun b’a sanfɛ sufɛ, Jehova y’a kɛ Israɛl siya bɛɛ ka se k’o ye (Ɛkizɔdi 40:38 kalan). Ni sankaba tun wulila ka yɔrɔ wɛrɛ sira minɛ, Israɛldenw bɛɛ tun b’a ye, hali minw yɔrɔ tun ka jan kosɔbɛ fanibugu la. U tun b’a daminɛ k’u ka minanw siri siri, k’u ka fanibuguw kuru ani ka fara jama kan ka sira minɛ (Nɔnb. 9:15-23). Bɛɛ tun be se ka buru fila fiyɛkan mɛn, o minw tun dilanna ni warigwɛ ye. O buru fiyɛkanw tun b’a yira ko bɛɛ ka ɲi ka sira minɛ (Nɔnb. 10:2). O la, ni Israɛlden dɔ tun be fanibugu kɔrɔ, o lo tun t’a yira ko a be jɛnɲɔgɔnya ɲuman kɛ ni Jehova ye ka tɛmɛ Israɛlden wɛrɛ kan min yɔrɔ tun ka jan fanibugu la. Israɛlden kelen kelen bɛɛ tun be se ka kɛ Jehova ka soo kɔnɔ ani ka la a la ko Jehova bena a ɲɛminɛ ani k’a latanga. O cogo kelen na bi, an mana kɛ yɔrɔ o yɔrɔ dugukolo kan, Jehova b’an kanu, a b’a janto an na ani a b’an latanga.
Ala ye labɛn min kɛ fanibugu koo la, o y’a yira ko a tɛ mɔgɔ bɔ mɔgɔ la (dakun 12nan lajɛ).
BI FANA, JEHOVA TƐ MƆGƆ BƆ MƆGƆ LA
13. Mun na an be se k’a fɔ ko Jehova tɛ mɔgɔ bɔ mɔgɔ la bi?
13 Bi fana, Ala sagokɛla dɔw yɔrɔ man jan an ka sigiyɔrɔsoba wala tɔnbolo dɔ la. Dɔw yɛrɛ be baara kɛ o yɔrɔw la ani u be jɛn n’an ɲɛminɛbagaw ye. Dɔw fana ye kɔrɔsibaga tagamakɛlaw ye wala u be dan na kudayi cidenya baara faan wɛrɛw la. Hali n’i tɛ kudayi cidenya baara la, la a la ko minw be Jehova ka soo kɔnɔ, a b’u bɛɛ kanu. A b’a janto fana u kelen kelen bɛɛ la (1 Piyɛri 5:7). Jehova be dumuni di a sagokɛla kelen kelen bɛɛ ma Alako ta fan fɛ, a b’u ɲɛminɛ ani k’u latanga.
14. Jehova b’a yira cogo wɛrɛ juman lo la ko a tɛ mɔgɔ bɔ mɔgɔ la?
14 Jehova b’a yira cogo wɛrɛ min na ko a tɛ mɔgɔ bɔ mɔgɔ la, o ye ko a y’a kɛ mɔgɔw ka se ka Bibulu sɔrɔ k’a kalan duniɲa kuru bɛɛ kɔnɔ. A daminɛ na, Ala ka Kuma tun sɛbɛra kaan saba nunu lo la: eburukan, aramekan ani gɛrɛkikan. Yala minw be se k’o kaanw kalan, olu be jɛnɲɔgɔnya ɲuman kɛra ni Jehova ye ka tɛmɛ minw tɛ se k’u kalan wa? Ayi!—Mat. 11:25.
15. Mun lo b’a yira ka gwɛ ko Jehova tɛ mɔgɔ bɔ mɔgɔ la? (jaa lajɛ fana).
15 Jehova t’an sugandi ka kɛ a teriw ye sabu an ye kalanbabaw kɛ wala Bibulu kɔnna ka sɛbɛ kaan minw na, an be se k’u kalan. Jehova b’a ka hakilitigiya labila bɛɛ ye duniɲa kuru bɛɛ kɔnɔ. Minw ye kalanbabaw kɛ wo, minw m’a kɛ wo, u bɛɛ be se k’a sɔrɔ. Bibulu, o min y’a ka Kuma ye, o be sɔrɔ kaan waa caaman na. O la, duniɲa kuru bɛɛ kɔnɔ, mɔgɔw be nafa sɔrɔ Bibulu ka kalanw na ani a b’u dɛmɛ k’a faamu u be se ka kɛ Jehova teriw ye cogo min na.—2 Tim. 3:16, 17.
Bibulu bayɛlɛmana kaan waa caaman na minkɛ, o b’a yira cogo di ko Jehova tɛ mɔgɔ bɔ mɔgɔ la? (dakun 15nan lajɛ).
TO JEHOVA KA SOO
16. Ka kɛɲɛ ni Kɛwaliw 10:34, 35 ye, an be se ka mun lo kɛ walisa ka to Jehova ka soo kɔnɔ?
16 Jehova y’an bisimila a ka soo minkɛ, o ye nɛɛmaba lo ye an fɛ! Jatigi si tɛ yen min be se k’an ladon ni ɲumanya ani kanuya ye i ko Jehova. Ka fara o kan, Jehova tɛ mɔgɔ bɔ mɔgɔ la. An bɔyɔrɔ, an siya ani an sanda mana kɛ min o min ye, an kalanna wo, an ma kalan wo, an ye cɛɛ wala muso ye wo, Jehova b’an bɛɛ bisimila a ka soo. Nka a be min ɲini an fɛ, o ye ko an ka mɛnni kɛ a fɛ.—Kɛwaliw 10:34, 35 kalan.
17. An be se ka kunnafoni wɛrɛw sɔrɔ min walisa ka to Jehova ka soo kɔnɔ?
17 Zaburuw 15:1 kɔnɔ, Dawuda ye ɲiningali kɛ ko: “Masaba, jɔn le bena to i ka soo kɔnɔ? Jɔn le bena sigi e ka kulu senuman kan?” O kɔ, Jehova tɛmɛna Dawuda yɛrɛ fɛ k’o ɲiningaliw jaabi Zaburuw 15nan kɔnɔ. An ka ɲi ka koo minw kɛ walisa k’an koo diya Jehova ye ani ka to a teriw ye, an bena u dɔw lajɛ barokun nata la.
DƆNKILI 32 Tugu Jehova kɔ!
