1. Dawuda ye Jehova suma ni mun lo ye Zaburuw 18:47 kɔnɔ?

 TUMA dɔw la, gwɛlɛyaw be se ka cun an kan minw be koow gwɛlɛya an ma ani k’an ka ɲɛnamaya kɛcogo yɛlɛma pewu! O wagatiw la an be se ka dɛmɛ sɔrɔ Jehova Ala fɛ ani an b’a waleɲuman lɔn kosɔbɛ o kosɔn. Barokun tɛmɛnin na, an y’a ye ko Jehova ye Ala ɲɛnaman ye ani ko a labɛnnin lo tuma bɛɛ k’an dɛmɛ. N’a y’an dɛmɛ, o b’a to an be la a la ko Ala ɲɛnaman lo (Zaburuw 18:47 kalan). Dawuda ko “Matigi ɲɛnama don.” Nka dɔɔni o kɔ, a y’a suma ni fɛɛn dɔ ye min tɛ ninmanfɛn ye. A ko Jehova ye ‘ale ka farakurun’ ye. O kɔrɔ ko di do?

2. Dawuda ko Jehova ye ‘ale ka farakurun’ ye. An be kalan juman lo sɔrɔ o kumaw na?

² Barokun nin na, an bena a ye fɛɛn min kama a be fɔ ko Jehova ye farakurun ye ani o b’an kalan min na a koo la. An bena a ye fana an be se k’an jigi la Jehova kan cogo min na ani k’a jati an ka farakurun ye. A laban, an bena a lajɛ an be se ka Jehova ka jogow ladegi cogo minw na.

MUN NA JEHOVA BE WEELE KO FARAKURUN?

3. Mun na tuma caaman Bibulu be kuma “farakurun” koo la? (jaa lajɛ ).

³ Bibulu b’a fɔ ko Jehova be i ko “farakurun” walisa k’an dɛmɛ k’a ka jogo dɔw faamu. Tuma caaman na Bibulu kɔnɔ, ni Jehova sagokɛlaw b’a tandora a ka jogo kabakomanw kosɔn, u b’a suma ni farakurun ye. Deteronɔmu 32:4 kɔnɔ le a fɔra siɲɛ fɔlɔ la ko Jehova ye “tangakabakuru ye.” Anɛ y’a fɔ delili dɔ la ko: “Farakurun si tɛ i kɔ, an ka Ala.” (1 Sam. 2:2, Bible senuma). Abakuki ye Jehova weele ko: “Ne ka farakurun.” (Abak. 1:12, Bible  senuma). Jehova y’a fɔ a yɛrɛ koo la ko a ye “farakunrun” ye (Ezayi 44:8, Bible senuma). An ka jogo saba lajɛ minw b’a to Jehova be i ko farakurun ani an be se k’a kɛ “an kisikabakuru” ye cogo min na.—Zab. 95:1.

4. Mun na a fɔra ko Jehova ye dogoyɔrɔ ye? (Zaburuw 94:22).

⁴ Jehova ye dogoyɔrɔ ye. Fɔɲɔba tuma na, an be se ka dogoyɔrɔ sɔrɔ farawo dɔ kɔnɔ. O cogo kelen na, Jehova b’an latanga gwɛlɛyabaw tuma na (Zaburuw 94:22 kalan). A b’an latanga ani k’an dɛmɛ walisa koo si kana an mako sa pewu! Ani a ye layidu ta fana ko koo o koo b’a kɛ an be hami wala ka tɔɔrɔ, a bena o bɛɛ ban pewu!—Ezek. 34:25, 26.

5. An be Jehova kɛ an tangakabakuru ye cogo di?

⁵ An be Jehova kɛ an tangakabakuru ye cogo minw na, u la dɔ ye ka to k’a deli tuma o tuma. N’an y’a deli, a be “Ala ka hɛrɛ” di an ma, o min b’an dusukun n’an hakili latanga (Filip. 4:6, 7). An ka balimacɛ Artem ka koo lajɛ. U y’a don kaso la a ka limaniya kosɔn. K’a to o yɔrɔ la, cɛɛ dɔ tun be to k’a daa wɔgɔbi, k’a tɔɔrɔ ani k’a lamaloya. Artem ko: “O cɛɛ tun mana a daminɛ ka n’ daa wɔgɔbi, siranya tun be n’ minɛ. . . . N’ tun be to ka Jehova deli tuma bɛɛ. N’ tun b’a deli ko a ka n’ dɛmɛ n’ hakili siginin ka to ani a ka n’ sɔn hakilitigiya la. O cɛɛ ka fariyakow bɛɛ n’a ta, n’ hakili siginin tora. . . . Jehova ka dɛmɛ barika la, a tun be i n’a fɔ n’ lɔnin lo farakurun dɔ lo kɔfɛ.”

6. Mun na an be se k’an jigi la Jehova kan tuma bɛɛ? (Ezayi 26:3, 4).

⁶ Jehova ye kantigi ye ani a tɛna an to yen abada. I ko farakurun belebeleba tɛ bɔ a nɔɔ na cogo min na, o cogo kelen na, Jehova labɛnnin lo k’an dɛmɛ tuma bɛɛ. An be se k’an jigi la a kan sabu a ye “dogoyɔrɔ ye tuma bɛɛ i ko fara.” (Ezayi 26:3, 4 kalan). A be yen kudayi walisa k’a ka layiduw dafa, k’an ka deliliw lamɛn ani an mako be dɛmɛ min na a b’o di an ma. An be se k’an jigi la a kan fana sabu a be kantigiya kɛ a sagokɛlaw ye (2 Sam. 22:26). An be min kɛra a ye, a tɛna ɲinɛ o kɔ abada ani a bena an duga tuma bɛɛ.—Eburuw 6:10; 11:6.

7. N’an b’an jigi la Jehova kan, mun lo bena kɛ? (jaa lajɛ fana).

⁷ An be Jehova kɛ an ka farakurun ye, n’an b’an jigi bɛɛ la a kan. An lanin b’a la ko n’an be mɛnni kɛ a fɛ hali gwɛlɛyaw wagati la, o b’an nafa (Ezayi 48:17, 18). Tuma o tuma n’an y’a ye ko a y’an dɛmɛ, o b’a to an b’an jigi la a kan kosɔbɛ. O la kɔrɔbɔli wala gwɛlɛya o gwɛlɛya mana an sɔrɔ, an be la a la kosɔbɛ ko Jehova dɔrɔn lo be se k’an dɛmɛ k’o muɲu. Tuma caaman na ni gwɛlɛya dɔw y’an sɔrɔ ani mɔgɔ si tɛ se k’an dɛmɛ, o la le an b’a faamu ko an be se k’an jigi la a kan tuma bɛɛ. Balimacɛ Vladimir ko: “Tuma min na n’ tun be kaso la, n’ tun magwɛrɛnin lo kosɔbɛ Jehova la ka tɛmɛ sanga ni wagati  bɛɛ kan. N’ ye jigi bɛɛ la a kan sabu n’ tun be n’ kelen na ani ale kelen dɔrɔn lo tun be se ka n’ dɛmɛ ka muɲuli kɛ.”

8. a) Mun na an be se k’a fɔ ko Jehova tɛ yɛlɛma? b) Ni Ala y’an ka farakurun ye, o b’an nafa cogo di? (Zaburuw 62:7, 8).

⁸ Jehova tɛ yɛlɛma. Jehova be i ko farakurunba min tɛ bɔ a nɔɔ na. A jogow n’a sagonata tɛ yɛlɛma abada (Mal. 3:6). Tuma min na Adama ni Awa murutira a ma, a m’a sagonata yɛlɛma adamadenw koo la. Ciden Pol ko Jehova “te se ka ban a yɛrɛ la.” (2 Tim. 2:13). O kɔrɔ ko a mana kɛ min o min ye ani mɔgɔw mana koo o koo kɛ, Jehova t’a jogow, a sagonata ani a ka sariyaw yɛlɛma. Komi Jehova tɛ yɛlɛma, an lanin b’a la ko a bena an dɛmɛ gwɛlɛyaw wagati la ani a bena a ka layiduw dafa siniɲasigi koo la.— Zaburuw 62:7, 8 kalan.

9. An be kalan juman lo sɔrɔ Tatyana ka koo la?

⁹ N’an be miiri Jehova jogow ani a sagonata koo la ka ɲɛsin dugukolo ni adamadenw ma, o b’an dɛmɛ k’a kɛ an ka farakurun ye, o kɔrɔ k’an jigi la a kan. O la, an hakili siginin bena to ani an bena to kantigiya la gwɛlɛyaw wagati la (Zab. 16:8). Balimamuso Tatyana ka koo b’o lo yira. U tun y’a don kaso la a ka limaniya kosɔn. A ko: “N’ tun be n’ kelen ni n’ kelen. O tun man nɔgɔ n’ ma hali dɔɔni a daminɛ na ani tuma caaman na n’ fari tun be faga.” Nka tuma min na a y’a faamu ko a ka kɔrɔbɔli ɲɛsinna Jehova n’a sagonata koo ma, a sera k’o muɲu, a hakili siginin tora ani a ye barika sɔrɔ walisa ka to kantigiya la. A ko: “Komi n’ y’a faamu fɛɛn min kama o koo tun be kɛra, n’ hakili jigira ko Jehova lo kosɔn o koo tun be n’ sɔrɔla. O la, n’ ma to ka miiri n’ yɛrɛ dama koo la.”

10. Jehova be se ka kɛ an ka farakurun ye cogo di sisan?

¹⁰ Yanni dɔɔni an bena gwɛlɛyabaw sɔrɔ ani an mako bena kɛ a la k’an jigi la Jehova kan ka tɛmɛ sanga ni wagati bɛɛ kan. A kɔrɔtanin lo an k’an ka limaniya sabati Jehova koo la kabi sisan ani an ka la a la kosɔbɛ ko gwɛlɛya o gwɛlɛya mana an sɔrɔ, a bena an dɛmɛ ka to kantigiya la. An be se k’o kɛ cogo di do? An ka to ka Bibulu ka maanaw kalan ani Jehova sagokɛlaw ka maanaw an ka wagati la. U kalantɔ, a kɔrɔsi Jehova y’a sagokɛlaw dɛmɛ cogo min na. Miiri kosɔbɛ o maanaw kan. O la, i bena Jehova kɛ i ka farakurun ye.

JEHOVA KA JOGOW LADEGI

11. Mun na an b’a fɛ ka Jehova ka jogow ladegi? ( koorilen nin fana lajɛ: “Laɲinita, kanbelew ye”).

¹¹ An ye Jehova ka jogo dɔw lajɛ minw b’a to a be i ko farakurun. Sisan an k’a filɛ an be se k’o jogow ladegi cogo minw na. N’an tora k’an seko bɛɛ kɛ ka Jehova jogow ladegi, an bena se k’an balimaw barika bonya. Misali la, Yezu ye  Simɔn tɔgɔ la ko Sefasi wala Piyɛri, o kɔrɔ, “farakurun” (Zan 1:42, Bible senuma). Yezu tun b’a fɔra le ko Piyɛri bena balimaw jigi tugu ani k’u ka limaniya barika bonya. Bibulu b’a yira ko kafo ka diinan mɔgɔkɔrɔw be “i ko kabakuruba dɔ suma.” (Ezayi 32:2). O kɔrɔ ko u be kafodenw latanga. Nka, an kelen kelen bɛɛ be se ka ɲɔgɔn jija n’an be Jehova ka jogow ladegi.—Efɛz. 5:1.

12. A yira cogo minw na an be se ka kɛ dogoyɔrɔ ye an balimaw fɛ.

¹² Kɛ dogoyɔrɔ ye i balimaw fɛ. N’an balimaw ka soow halakira wala u bolila k’u ka soow to yen balawow wala kɛlɛw kosɔn, an be se ka kɛ dogoyɔrɔ ye u fɛ, an kɛtɔ ka siyɔrɔ di u ma. Koow be juguyara ka taga “laban tuma” nunu na minkɛ, siga t’a la an bena sababu caaman sɔrɔ ka ɲɔgɔn dɛmɛ (2 Tim. 3:1). An balimaw mako be jigitugu ni kanuya min na, an be se k’o lase u ma. An be se k’o kɛ cogo minw na, u la dɔ ye k’a to u k’a lɔn ko a ka di an ye k’u ye Masaya Boon na. N’an b’o kɛ, an b’a yira ko kanuya be yen kafo kɔnɔ ani ko mɔgɔ be se ka dususalo sɔrɔ yen. Bi, mɔgɔ caaman ka fari ɲɔgɔn ma. O b’an balimaw hakili ɲagami ani u b’a jati ko mɔgɔ t’u kanu. O la, n’u nana lajɛnw na, an b’a fɛ k’an seko bɛɛ kɛ k’u jija ani k’a yira u la ko an b’u kanu.

13. Diinan mɔgɔkɔrɔw be se ka kɛ dogoyɔrɔ ye tɔɔw fɛ cogo di? (jaa lajɛ fana).

¹³ Diinan mɔgɔkɔrɔw be se ka kɛ dogoyɔrɔ ye u balimaw fɛ gwɛlɛyaw wagati la. Ni bana cunna balima dɔ kan wala ni balawo dɔ kɛra u ka mara la, diinan mɔgɔkɔrɔw be sin ka labɛnw kɛ walisa k’u balimaw dɛmɛ. U b’u dɛmɛ Alako ta fan fɛ fana. Ni diinan mɔgɔkɔrɔ be kuma balimaw fɛ ni ɲumanya ye, a  b’a janto u la ani a b’u lamɛn, balimaw tɛna sigasiga ka dɛmɛ ɲini a fɛ. Ni diinan mɔgɔkɔrɔ be n’o jogow ye, o b’a to balimaw b’a ye ko a b’u kanu. Ani n’a basigira Bibulu kan k’u ladi, a bena nɔgɔya u ma ka sɔn o ma.—1 Tes. 2:7, 8, 11.

14. An be se k’a yira cogo di ko an ye kantigi ye?

¹⁴ Kɛ kantigi ye. An b’a fɛ tɔɔw ka la a la ko an bena u dɛmɛ, sanko gwɛlɛyaw wagati la (Talenw 17:17). An be se ka mun lo kɛ walisa tɔɔw k’an jati mɔgɔ kantigi ye? An k’an seko bɛɛ kɛ walisa ka Jehova ladegi loon o loon. Misali la, ni an y’an daa di koo dɔ la, an ka ɲi k’o kɛ ani ka koow kɛ a wagati la (Mat. 5:37). N’an y’a ye ko an balima dɔ mako be dɛmɛ na, an k’a dɛmɛ ani ni baara dɔ kalifara an ma kafo kɔnɔ, an ka ɲi k’an jija k’o kɛ ka kɛɲɛ ni cikanw ye.

15. Ni diinan mɔgɔkɔrɔw ye mɔgɔ kantigiw ye, o be kafodenw nafa cogo di?

¹⁵ Ni diinan mɔgɔkɔrɔw ye mɔgɔ kantigiw ye, o be kafodenw nafa. cogo di do? Ni balimaw b’a lɔn ko u be se  ka kaan bɔ diinan mɔgɔkɔrɔw ma tuma o tuma n’u mako be dɛmɛ na, o b’a to u tɛ hami kojugu. Ni diinan mɔgɔkɔrɔw labilanin lo ka kafodenw dɛmɛ, kafodenw b’a faamu ko u b’u kanu. Ani ni u b’u ka ladiliw basigi Bibulu n’an ka gafew kan sanni k’u basigi u yɛrɛ ka miiriya kan, o b’a to balimaw be la u la. Ka fara o kan, n’u tɛ balimaw ka gundokow fɔ tɔɔw ye, ani u y’u daa di koo minw na n’u b’o kɛ, o b’a to balimaw be la u la.

16. N’an be koo tilennin kɛ Jehova ɲɛɛ kɔrɔ tuma bɛɛ, o be an yɛrɛ ni tɔɔw nafa cogo di?

¹⁶ Koo tilennin kɛ Jehova ɲɛɛ kɔrɔ tuma bɛɛ. N’an be mɛnni kɛ Jehova fɛ koo bɛɛ la ani n’an be desizɔnw ta minw basiginin lo Bibulu kan, an bena kɛ ɲɛyirali ɲuman ye tɔɔw fɛ. N’an be to ka Bibulu sɛgɛsɛgɛ ani k’an ka limaniya barika bonya Jehova koo la, an bena to k’a ka sariyaw labato ani ka kantigiya kɛ a ye. An bena se ka ngalon kalanw ni ngalon miiriyaw lɔn ani an tɛna a to u k’an lafili (Efɛz. 4:14; Zaki 1:6-8). N’an ye kibaro gomanw mɛn, an hakili bena sigi sabu an lanin lo Jehova n’a ka layiduw la (Zab. 112:7, 8). Gwɛlɛya be minw kan, an bena se ka olu dɛmɛ fana.—1 Tes. 3:2, 3.

17. Diinan mɔgɔkɔrɔw be u balimaw barika bonya ani k’u hakili sigi cogo di?

¹⁷ Diinan mɔgɔkɔrɔw ka ɲi ka se k’u yɛrɛ minɛ, ka kɛ hakilitigiw ye, ka koow kɛ cogo bɛnnin na ani ka kɛ mɔgɔ sabalininw ye. “Lanaya be sɔrɔ Ala ka kuma min barika la,” n’u nɔrɔnin tora o la, u bena kafodenw ka limaniya barika bonya ani k’u hakili sigi (Titi 1:9; 1 Tim. 3:1-3). N’u ye ɲɛyirali ɲuman ye tɔɔw fɛ, n’u be to ka taga bɔ balimaw ye walisa k’u jija, u bena u dɛmɛ u ka to ka na lajɛnw na, ka waajuli kɛ ani k’u ka kelenna kalan kɛ tuma o tuma. Ni gwɛlɛya be balimaw kan minw be hami bila u la, diinan mɔgɔkɔrɔw b’u hakili jigi ko u ka to k’u jigi la Jehova kan ani ka to ka miiri a ka layiduw la.

18. Mun na an b’a fɛ ka Jehova tando ani k’an magwɛrɛ a la kosɔbɛ? ( koorilen nin fana lajɛ: “I be se k’i magwɛrɛ kosɔbɛ Jehova la cogo min na”).

¹⁸ Jehova ka jogo kabakomanw lajɛnin kɔ, i ko masacɛ Dawuda an be se k’a fɔ ko: “Ne be barika la Masaba ye, ne tangakabakuru.” (Zab. 144:1). An be se k’an jigi la Jehova kan tuma bɛɛ. Hali n’an kɔrɔla, an be se ka la a la ko a bena to k’an dɛmɛ an magwɛrɛnin ka to a la ani an be se k’a fɔ ko: “N tangakabakuru lo.”—Zab. 92:15, 16.