Kalanbagaw ka ɲiningaliw
An ka ɲi ka Zaburuw 12:8 faamu cogo di?
Zaburuw 12:2-5 b’a fɔ ko: “Mɔgɔ kantigiw te yen tugu.” O kɔ, Zaburuw 12:6-8nan na, a fɔra ko:
“O la, Masaba ko ale bena wili ka dɔ kɛ,
bari u be dɛsɛbagatɔw sigɛnna,
ɲanibagatɔw be ŋunanna.
U be mɔgɔ minw tɔɔrɔla, ko ale bena olu dɛmɛ.
Masaba ka kuma gwɛnin lo
i ko warigwɛ min yelenna ka saniya siɲɛ caaman.
Ee, Masaba! An mara.
An tanga o mɔgɔ sugu ɲɔgɔn ma tuma bɛɛ.”
Vɛrise 6nan b’a yira Ala bena min kɛ “dɛsɛbagatɔw” ye. A bena u kisi.
Vɛrise 7nan b’a fɔ ko: “Masaba ka kuma gwɛnin lo i ko warigwɛ min yelenna ka saniya.” O vɛrise b’a yira an be min miiri Jehova ka kuma koo la.—Zab. 18:31; 119:140.
Bibulu dɔw kɔnɔ, Zaburuw 12:8 bayɛlɛmana ko: “I bena u mara.” Komi “Masaba ka kuma” kofɔra vɛrise 7nan na, dɔw b’a miiri ko o kɔrɔ ko Ala b’a ka kuma mara. An b’a lɔn ko Bibulu kɛlɛbagaw ye koo bɛɛ lajɛnnin kɛ walisa ka mɔgɔw bali u k’a kalan ani u y’a ɲini k’a halaki. Nka, Ala y’a ka kuma mara, o kɔrɔ, k’a latanga.—Ezayi 40:8; 1 Piyɛri 1:25.
Nka mɔgɔ minw kofɔra vɛrise 6nan na, Jehova ye olu latanga fana. A ye dɛsɛbagatɔw ni ɲanibagatɔw dɛmɛ ani k’u kisi ani a bena to k’o kɛ.—Zɔbu 36:15; Zab. 6:5; 31:2, 3; 54:9; 145:20.
O la, ka kɛɲɛ ni vɛrise 8nan ye, Jehova be mɔgɔw lo mara wala a ka kuma lo?
N’an y’o Zaburu lajɛ koɲuman, a gwɛnin lo ko mɔgɔw lo.
Zaburuw 12nan daminɛyɔrɔ la, Dawuda kumana Jehova sagokɛla kantigiw koo la, mɔgɔ juguw ye ngalon la minw kan. O kɔ, vɛrise 4nan b’a fɔ ko Jehova bena wuli dabayakuma fɔbagaw kama. Zaburu sɛbɛbaga b’an hakili sigi ko an be se ka la a la ko Ala bena a sagokɛlaw dɛmɛ sabu a ka kuma gwɛnin lo.
O la, ka kɛɲɛ ni vɛrise 8nan ye, Jehova bena mɔgɔw lo latanga, mɔgɔ juguw be minw tɔɔrɔla.
O la, o vɛrise be jigiya di “mɔgɔ kantigiw” ma ko Ala bena u kisi.
N’o lo, mun na Bibulu dɔw b’o vɛrise bayɛlɛma ko: “I bena u mara”? U y’o bayɛlɛma ka kɛɲɛ ni Eburukan sɛbɛnin lakika dɔw lo ye. Nka Septante kɔnɔ (o kɔrɔ Eburukan sɛbɛninw bayɛlɛmanin gɛrɛkikan na), a fɔra ko: “A bena an mara” ani “a bena an latanga.” O la, o ɲɛsinna mɔgɔ kantigiw lo ma minw be tɔɔrɔla ani ka ɲani mɔgɔ juguw bolo. Jehova bena u “tanga o mɔgɔ sugu ɲɔgɔn ma,” minw be koo juguw kɛ (Zab. 12:8, 9). Eburukan sɛbɛnin minw bayɛlɛmana aramekan na, olu kɔnɔ, o vɛrise bayɛlɛmana ko: “E MATIGI, ele bena mɔgɔ tilenninw latanga. I bena u latanga nin wagati mɔgɔ juguw ma tuma bɛɛ.” O b’a yira ka gwɛ fana ko Zaburuw 12:8 ma ɲɛsin Ala ka kuma ma.
