1-2. Mun na kerecɛn be i ko sangaso jamanjanba dɔ? (1 Korɛntikaw 15:58).

 SAAN 1978, u ye sangaso jamanjanba dɔ lɔ Tokiyo, Zapɔn jamana na. Dugukoloyɛrɛyɛrɛ ka teli ka kɛ o dugu la minkɛ, mɔgɔw tun b’u yɛrɛ ɲiningara n’o sangaso bena se ka to seen kan. A lɔbagaw ye mun lo kɛ do? U y’a lɔ cogo dɔ la walisa a ka barika sɔrɔ ani dugukoloyɛrɛyɛrɛ tuma na, a ka jɛngɛ dɔɔni nka a kana ben. Kerecɛnw be i ko o sangaso jamanjanba. Cogo di do?

² Kerecɛn sabatinin ka ɲi ka to, nka a ka ɲi ka koow kɛ ka dama kɛɲɛ fana. A ka ɲi ka lɔ kelen kan ani k’a cɛsiri tuma bɛɛ ka Jehova ka sariyaw labato (1 Korɛntikaw 15:58 kalan). b “A be sɔn ka kanminɛli kɛ” ani a tɛ Ala ka sariyaw tiɲɛ. “A be koow kɛ ka dama kɛɲɛ,” o kɔrɔ a tɛ ja kelen kan n’a bɛnnin lo (Zaki 3:17, NW). Kerecɛn min be koow jati o cogo la, ale tɛ ja kelen kan wala a tɛ sɔn koo bɛɛ ma. Barokun nin na, an bena a ye an sabatinin be se ka to cogo min na. An bena fɛɛrɛ duuru lajɛ fana Sutana be tɛmɛ minw fɛ k’a ɲini k’an kunnatiɲɛ ani an bena a ye cogo min na an be se k’a bali k’o kɛ.

3. Sariya dibagaw bɛɛ Kuntigi ka sariya jumanw lo be sɔrɔ Kɛwaliw 15:28, 29 kɔnɔ?

³ Sanga ni wagati bɛɛ, sariya dibagaw bɛɛ Kuntigi Jehova ye sariyaw di a ka jama ma minw faamuyali man  gwɛlɛ (Ezayi 33:22). Misali la, saan kɛmɛkulu fɔlɔ la, koow ɲɛnabɔla jɛnkulu ye koo saba fɔ o minw na kerecɛnw ka ɲi ka lɔ kelen kan. 1) U ka ɲi ka ban boli batoli ma ani ka Jehova kelenpe lo bato. 2) U ka ɲi ka sɔn a ma ko joli ye fɛɛn senuman ye. Ani 3) u ka ɲi ka Bibulu ka sariyaw labato tagamacogo ta fan fɛ (Kɛwaliw 15:28, 29 kalan). Bi, kerecɛnw be se ka mɛnni kɛ Jehova fɛ cogo di o koo saba la?

4. An b’a yira cogo di ko an be Jehova kelenpe lo bato? (Yirali 4:11).

⁴ An be ban boli batoli ma ani an be Jehova kelenpe lo bato. A tun ko Israɛldenw k’ale kelenpe lo bato (Deter. 5:6-10). Tuma min na Sutana tun be Yezu kɔrɔbɔra, Yezu y’a yira ka gwɛ ko an ka ɲi ka Jehova kelenpe lo bato (Mat. 4:8-10). O la, an tɛ boliw bato. An tɛ adamadenw bato fana. Misali la, an tɛ mɔgɔ nunu jati i ko alaw: diinan kuntigi wala politiki ɲɛmɔgɔ, farikoloɲanagwɛla ŋana wala mɔgɔ min tɔgɔ bɔra kosɔbɛ dɔnkilila wala filimuw na. Nka, an b’a yira ko an ye Jehova ta ye ani an be ale kelenpe lo bato, ale min ye “fɛɛn bɛɛ dan.”—Yirali 4:11 kalan.

5. Jehova ka sariya min b’a yira ko niin ni joli ye fɛɛn senuman ye, mun na an b’o labato?

⁵ Jehova ka sariya min b’a yira ko niin ani joli ye fɛɛn senumanw ye, an b’o labato. Mun na do? Sabu Jehova ko joli ye niin lo ye, o min ye a ka nilifɛn nafamanba dɔ ye (Lev. 17:14). Siɲɛ fɔlɔ min na Jehova sɔnna ko adamadenw ka kongosogow ni bɛgɛnw sogo dumu, a ko u kana joli dumu (Zɛnɛzi 9:4). A segira o cikan kan Musa ka sariya ditɔ Israɛldenw ma (Lev. 17:10). Ani saan kɛmɛkulu fɔlɔ la, a ye koow ɲɛnabɔla jɛnkulu mɔgɔw ɲɛminɛ walisa u ka cii di kerecɛnw bɛɛ ma ko u “kana sogo joli dumu.” (Kɛw. 15:28, 29). An b’o sariya labato ni kantigiya ye, n’an b’a latigɛra an bena sɔn furakɛcogo minw ma. c

6. An b’an jija cogo di ka Jehova ka sariya tilenninw labato tagamacogo ta fan fɛ?

⁶ Tagamacogo ta fan fɛ, an be Jehova ka sariya tilenninw labato koo bɛɛ la (Eburuw 13:4). Ciden Pol b’an jija ko ‘koo minw ye dugukolo kan koow ye, an ka olu bɛɛ dabila.’ O kɔrɔ ko an k’an seko bɛɛ kɛ k’an mabɔ farisogo nege juguw la. Koo o koo be se k’an lasun ka kakalayakow kɛ, an t’o filɛ wala k’o kɛ (Kɔlɔs. 3:5; Zɔbu 31:1). Ni koo jugu nege y’an minɛ, miiriyaw wala kɛwale minw be se ka an ni Ala ka jɛnɲɔgɔnya nagasi, an be sin ka ban o la.

7. An ka ɲi k’an cɛsiri ka mun lo kɛ ani mun na?

⁷ Jehova b’a fɛ an ka sɔn a ka sariyaw la n’an “dusu bɛɛ” ye (Ɔrɔm. 6:17). A ka cikanw b’an nafa tuma bɛɛ ani an tɛ se k’a ka sariyaw yɛlɛma (Ezayi 48:17, 18; 1 Kor. 6:9, 10). An b’an seko bɛɛ kɛ k’an koo diya Jehova ye ani k’a yira ko an be ni Zaburu sɛbɛbaga ka miiriya ɲɔgɔn ye. Ale ko: “Ne bena i ka kolatigɛninw bato. Ne bena u bato fɔɔ a laban.” (Zab. 119:112). Nka, Sutana bena a ɲini k’an kunnatiɲɛ. A be tɛmɛ fɛɛrɛ jumanw lo fɛ?

8. Sutana be tɛmɛ kɔrɔbɔli fɛ cogo di k’a ɲini k’an kunnatiɲɛ?

⁸ Kɔrɔbɔli. Sutana b’an lasun walisa an ka Jehova ka sariya dɔ tiɲɛ wala  a be tɛmɛ kɔrɔbɔliw fɛ k’a ɲini k’an kunnatiɲɛ. A ka laɲinita ye k’an “minɛ k’a ɲimi,” o kɔrɔ k’an ni Jehova ka jɛnɲɔgɔnya nagasi (1 Piyɛri 5:8). U ye saan kɛmɛkulu fɔlɔ kerecɛnw bagabaga, k’u bugɔ ani k’u dɔw faga yɛrɛ sabu u tun cɛsirinin lo ka kantigiya kɛ Jehova ye (Kɛw. 5:27, 28, 40; 7:54-60). Bi, Sutana bele be tɛmɛ kɔrɔbɔliw fɛ. An b’o lo ye Irisi jamana ani jamana wɛrɛw la. O yɔrɔw la, u be fariyakow kɛ an balimaw na ani u be wuli u kama.

9. Misali dɔ fɔ min b’a yira ko an ka ɲi k’an yɛrɛ kɔrɔsi n’u b’an lasunna nɛmɛnɛmɛ walisa an ka Jehova ka sariya dɔ tiɲɛ.

⁹ N’u b’an lasunna nɛmɛnɛmɛ. Ka fara fariyakow kan, Sutana be tɛmɛ ‘namara’ koow fɛ walisa k’an kunnatiɲɛ (Efɛz. 6:11). An ka balimacɛ Bob ka koo lajɛ. U y’a la dɔgɔtɔrɔso sabu a tun ka ɲi ka operasɔn gwɛlɛ dɔ kɛ. A y’a fɔ a ka dɔgɔtɔrɔw ye ko a tɛna sɔn u ka joli don a la koo si la. Dɔgɔtɔrɔ min tun ka ɲi k’a ka operasɔn kɛ, ale sɔnna o ma. Nka suu min kɔnna operasɔn ɲɛ, dɔgɔtɔrɔ wɛrɛ tagara bɔ Bob ye a somɔgɔw taganin kɔ soo. A y’a fɔ Bob ye ko u tɛna joli don a la, nka u bena a bila u bolo kɔrɔ sabu mɔgɔ tɛ koo lɔn. N’a sɔrɔ o dɔgɔtɔrɔ tun b’a miiri ko ni Bob somɔgɔw t’a gɛrɛfɛ, a bena a ka miiriya yɛlɛma. Nka Bob lɔra kelen kan ani a y’a fɔ ko a t’a fɛ u ka joli don a la koo si la.

10. Mun na farati b’a la ka kɛ ni adamadenw miiricogo ye? (1 Korɛntikaw 3:19, 20).

¹⁰ Adamadenw miiricogo. O be se k’a to an be bɔ Jehova kɔ ani k’a ka sariyaw tiɲɛ (1 Korɛntikaw 3:19, 20 kalan). “Diɲɛ nin hakilitigiya” ka teli ka mɔgɔw lasun u b’a ɲini k’u farisogo negelakow wasa. Kakalayakow ani boli batoli tun ka ca Pɛrigamu ani Tiyatiri dugu la. O koow y’a daminɛ ka nɔɔ to o yɔrɔ kerecɛn dɔw kan. Yezu ye ladili barikamanw di o kafo fila ma sabu u tun be sɔn kakalayakow ma (Yir. 2:14, 20). Bi fana, mɔgɔw be se k’an lasun an ka sɔn miiriya juguw ma. An somɔgɔw ani an lɔnbagaw be se k’a fɔ ko an ka koo ka gwɛlɛ kojugu ani u be se k’an lasun an ka Jehova ka sariyaw tiɲɛ. Misali la, u be se k’a fɔ ko koo jugu tɛ an k’a ɲini k’an negelakow wasa ani ko Bibulu ka sariyaw sanga benna.

11. Hali n’an be lɔ kelen kan, an ka ɲi k’an yɛrɛ tanga mun lo ma?

¹¹ Tuma dɔw la an be se k’a miiri ko Jehova ka cikanw gwɛnin tɛ. O yɛrɛ be se k’a to min sɛbɛnin be Bibulu kɔnɔ, an b’a ɲini ka tɛmɛ o kan (1 Kor. 4:6). Yezu ka wagati la, diinan kuntigiw tun b’o koo jugu lo kɛ. U kɛtɔ ka adamadenw ka sariyaw fara Ala taw kan, u tun be doni gwiliman la mɔgɔw kuun (Mat. 23:4). Jehova be tɛmɛ a ka Kuma ani a ka ɔriganisasiyɔn fɛ ka cikan gwɛninw di an ma. Kuun t’a la an k’a ɲini ka dɔ fara o cikanw kan (Talenw 3:5-7). O kama, an tɛ tɛmɛ Bibulu kɔnɔkow kan wala an tɛ sariyaw sigi an balimaw ye koo dɔw la, u kelen kelen ka ɲi ka minw latigɛ u yɛrɛ ma.

12. Sutana be mɔgɔ “lafilili kuma” jɛnsɛn cogo di?

¹² Lafilikow. Sutana be tɛmɛ “lafilili kuma fu” ani “diɲɛ kow” fɛ ka mɔgɔw lafili ani ka bɛnbaliya don u ni ɲɔgɔn cɛ (Kɔlɔs. 2:8, Bible senuma). Saan kɛmɛkulu fɔlɔ la, o koo dɔw tun ye nunu ye: adamadenw ka hakilitigiya min basiginin lo u yɛrɛ ka miiriya kan, Yahutuw ka kalan minw basiginin tɛ Bibulu kan ani kalan min tun ye ko kerecɛnw ka ɲi ka Musa ka sariya labato.  O tun ye lafilikow lo ye sabu u be mɔgɔw mabɔ Jehova la, ale min ye hakilitigiya sɔbɛ Tigi ye. Bi, Sutana be tɛmɛ arajo, telewisɔn n’a ɲɔgɔnnaw fɛ, ka politiki ɲɛmɔgɔw ka ngalon kumaw jɛnsɛn. An y’o lo kɔrɔsi tuma caaman na COVID-19 fɔɲɔbana tuma na. d O lafilikow be hami bila u lamɛnbagaw la. Nka Jehova Seere minw be tugu an ka ɔriganisasiyɔn ka cikanw kɔ, olu be u yɛrɛ tanga o hami ma.—Mat. 24:45.

13. Mun lo be se k’an hakili ɲagami ani mun na an ka ɲi k’an yɛrɛ kɔrɔsi o ma?

¹³ Koo minw be se k’an hakili ɲagami. “Fɛɛn minw kɔrɔtanin” lo kosɔbɛ, an ka ɲi ka to k’o lo kɛ an ɲɛnako fɔlɔ ye (Filip. 1:9, 10, NW ). Koo minw b’an hakili ɲagami, u b’an ka wagati fanba tiɲɛ ani k’an mabɔ koo kɔrɔtaninbaw la. An be koo minw kɛ loon o loon i n’a fɔ ka dumuni kɛ, ka minni kɛ, ka ɲɛnagwɛ ani ka baara kɛ, o koow be se k’an hakili ɲagami n’an y’a to u kɛra an ɲɛnako fɔlɔ ye (Luka 21:34, 35). Ani kunnafoni minw ɲɛsinna murutilikow ani politikikow ma, u caaman lo be jɛnsɛn loon o loon. An t’a fɛ k’a to u k’an hakili ɲagami. N’o tɛ, an be se k’a daminɛ ka sɔn u dɔw ma an hakili n’an dusu la. An kumana fɛɛrɛ minw koo la, Sutana be se ka tɛmɛ u bɛɛ fɛ walisa k’an kunnatiɲɛ. An k’a filɛ sisan an be se ka min kɛ walisa ka lɔ kelen kan k’a kɛlɛ ani ka to kantigiya la.

14. Koo minw be se k’an dɛmɛ ka to kantigiya la Jehova ye, u la dɔ ye juman ye?

¹⁴ Miiri i ka yɛrɛkundili ani i ka batɛmu koo la. I y’o koow kɛ sabu i b’a fɛ ka kantigiya kɛ Jehova ye. Miiri k’a filɛ fɛɛn minw ye i dɛmɛ i lara a la ko i ye tiɲɛn diinan lo sɔrɔ. I ye lɔnniya sɔbɛ sɔrɔ i sankolola Faa Jehova koo la ani o y’a to i tora k’a kanu ani ka bonya la a kan. I limaniyara a la ani o y’i lasun ka nimisa i ka kɛwale juguw la. I dusukun y’i lasun k’o kɛwalew dabila ani i tora ka koow kɛ  ka kɛɲɛ ni Ala sago ye. I dusu lafiyara tuma min na i y’a faamu ko Ala yafara i ma (Zab. 32:1, 2). I tora ka taga lajɛnw na ani i ye koo ɲuman minw kalan, i y’a daminɛ k’u kofɔ mɔgɔ wɛrɛw ye. Sisan, i ye i yɛrɛkun di Jehova ma ani i batizera. I be ɲɛnamaya sira kan ani i cɛsirinin lo ka to a kan.—Mat. 7:13, 14.

15. Mun na nafa b’a la ka Ala ka Kuma sɛgɛsɛgɛ ani ka miiri a kan?

¹⁵ Ala ka Kuma sɛgɛsɛgɛ ani miiri a kan. Yiri be lɔ ka ɲɛ n’a liliw donnin lo koɲuman dugukolo kɔnɔ. O cogo kelen na, an be to kantigiya la n’an ka limaniya basiginin lo koɲuman Bibulu kan. Yiri bonyatɔ, a liliw be yɛrɛkɛ ani u be jigi fɔɔ dugukolo jukɔrɔ. N’an be Bibulu sɛgɛsɛgɛ ani ka miiri a kan, an b’an ka limaniya barika bonya ani an be la a la kosɔbɛ ko Ala ka sariyaw ɲɔgɔn tɛ yen (Kɔlɔs. 2:6, 7). Miiri k’a filɛ Jehova ka latangali, a ka cikanw n’a ka ladiliw y’a sagokɛlaw dɛmɛ cogo min na galen. Misali la, Ezekiyɛli ye Alabatosoba min ye yelifɛn na, tuma min na mɛlɛkɛ dɔ tun b’o sumana, Ezekiyɛli ye kɔrɔsili kɛ koɲuman. O yelifɛn ye Ezekiyɛli barika bonya ani bi, o yelifɛn b’a yira an na ko a kɔrɔtanin lo an ka Jehova ka sariyaw lafasa tiɲɛn batoli koo la e (Ezek. 40:1-4; 43:10-12). Bibulu yɔrɔ minw faamuyali man nɔgɔ, n’an fana be wagati ta k’o sɛgɛsɛgɛ ani ka miiri o kan, o bena an nafa.

16. Bob hakili tun siginin lo minkɛ, o y’a latanga cogo di? (Zaburuw 112:7).

¹⁶ I hakili sigi. Masacɛ Dawuda y’a fɔ dɔnkili dɔ la ko ale ka kanuya tɛna yɛlɛma Jehova koo la. A ko: “Ne hakiri sigira, Ala.” (Zab. 57:8, Biblu Ala ta Kuma). An fana be se k’an hakili sigi ani k’an jigi bɛɛ la Jehova kan (Zaburuw 112:7 kalan). An k’a filɛ o ye Bob dɛmɛ cogo min na. Tuma min na dɔgɔtɔrɔcɛ y’a fɔ a ye ko u bena joli bila u bolo kɔrɔ sabu mɔgɔ tɛ koo lɔn, Bob sinna k’a jaabi ko n’u lanin t’a la ko u be se k’ale ka operasɔn kɛ n’u ma joli don, ale bena bɔ dɔgɔtɔrɔso la o  yɔrɔnin bɛɛ. Kɔfɛ, Bob ko: “N’ tun tɛ sigasigara hali dɔɔni ani n’ tun tɛ jɔrɔla.”

17. An be kalan juman lo sɔrɔ Bob ka koo la? (Jaa lajɛ fana.)

¹⁷ Bob lɔra kelen kan sabu a tun kɔnna k’a latigɛ wagatijan sanni a ka na dɔgɔtɔrɔso la ko ale tɛna Ala ka sariya tiɲɛ. A fɔlɔ, a tun b’a fɛ ka Jehova dusu diya. A filanan, Bibulu ni an ka gafew be min fɔ niin ani joli senumanya koo la, a y’o sɛgɛsɛgɛ koɲuman. A sabanan, a tun lanin b’a la ko n’a ye Jehova ka cikanw labato, o bena a nafa fɔɔ abada! An fana hakili siginin be se ka to an ka gwɛlɛyaw mana kɛ min o min ye.

18. Baraki ka koo b’a yira an na cogo di ko an ka ɲi k’an jigi la Jehova kan? (Jaa lajɛ ɲɛɛ fɔlɔ kan.)

¹⁸ I jigi la Jehova kan. An k’a filɛ Baraki ye see sɔrɔ cogo min na sabu a tugura Jehova ka cikanw kɔ. Hali k’a sɔrɔ nigɛkunbɛnnan ni tama si tun tɛ sɔrɔ Israɛl jamana bɛɛ la, Jehova ko Baraki ka wuli Sizera n’a ka kɛlɛbolo kama. Kɛlɛkɛminan barikamanw tun b’o kɛlɛbolo fɛ (Kirit. 5:8). Kiramuso Debora ko Baraki ka jigi ka taga Sizera n’a ka kɛlɛkɛwotoro 900 kunbɛn kɔkɛnɛ na. Hali ni kɛlɛ tun ka nɔgɔ wotorotigiw fɛ kɔkɛnɛ na, Baraki ye mɛnni kɛ Debora fɛ. Baraki ka kɛlɛbolo jigitɔ ka bɔ Tabɔri kulu kan, Jehova y’a kɛ sanjiba benna. Sizera ka kɛlɛkɛwotorow tora pɔtɔpɔtɔ kɔnɔ ani Jehova y’a kɛ Baraki ye see sɔrɔ (Kirit. 4:1-7, 10, 13-16). N’an fana b’an jigi la Jehova kan ani n’an b’a ka lasigidenw ka cikanw labato, Jehova bena a kɛ an be see sɔrɔ.—Deter. 31:6.

19. Mun na i b’a fɛ ka to kantigiya la?

¹⁹ K’an to duniɲa juguman nin kɔnɔ, an ka ɲi ka to ka bondori kɛ walisa ka to kantigiya la (1 Tim. 6:11, 12; 2 Piyɛri 3:17). An k’an cɛsiri walisa koo nunu kana an kunnatiɲɛ: kɔrɔbɔli, n’u b’an lasunna nɛmɛnɛmɛ, adamadenw miiricogo, lafilikow ani koo minw be se k’an hakili ɲagami (Efɛz. 4:14). Nka an ka lɔ kelen kan, ka to kantigiya la Jehova ye ani an cɛsirinin ka to k’a ka sariyaw labato. An ka ɲi ka kɛ mɔgɔ sabalininw ye fana. Jehova ni Yezu ye ɲɛyirali ɲumanw ye o koo la. An bena o lo lajɛ barokun nata la.