N’ facɛ tun ye diinan ɲɛmɔgɔ ye legilizi dɔ la Kanada. Lɔgɔkun bɛɛ, a tun be ne ni n’ dɔgɔmuso bila ka taga katesis la dimansilon. O kɔ, 11H tuma na, an tun be fara a kan ka mɛsi kɛ. Wulafɛ, an tun be taga n’an bamuso ye Masaya Boon na. O y’an dɛmɛ k’a lɔn faranfasi min be o diinan fila cɛ.

N’ bamuso y’a ka lannako kuraw kofɔ a teri Bob ni Marion Hutcheson ye, a tun be minw lɔn kabi wagatijan. Olu fana sɔnna tiɲɛn diinan ma. Saan 1958, balimacɛ ni balimamuso Hutcheson tagara ni ne ni u dencɛ saba ye tile seegi lajɛnba dɔ la Niyɔriki dugu kɔnɔ. O lajɛnba tun labɛnna jamana caaman kama ani a barokun tun ko: “La volonté divine.” Sisan, n’ b’a faamu ko u tun ye jijaliba lo kɛ walisa ka taga ni n’ ye o lajɛnba la. Nka, o kɛra wagati diiman ye yɛrɛ le n’ fɛ.

N’ kanbele tuma na, an tun be misiw, lɛɛw, sagaw ani sisɛw balo. A tun ka di n’ ye ka n’ janto u la. N’ tun b’a fɛ sɔbɛ la ka kɛ bɛgɛndɔgɔtɔrɔ ye. N’ bamuso y’o fɔ kafo diinan mɔgɔkɔrɔ dɔ ye. O balimacɛ ye n’ hakili jigi ni ɲumanya ye ko an be “laban tuma na” le ani a ye n’ dɛmɛ k’a faamu ko ni n’ ye inivɛrisite kɛ saan caaman, o bena nɔɔ to ne ni Jehova ka jɛnɲɔgɔnya kan (2 Tim. 3:1). O la, n’ y’a latigɛ ko n’ tɛna inivɛrisite kɛ.

 Nka, n’ bele tun be n’ yɛrɛ ɲiningara n’ bena min kɛ n’ tilanin kɔ lise la. N’ tun be waajuli kɛ wikɛniw bɛɛ la. Nka, waajuli tun man di n’ ye ani a tun tɛ n’ kɔnɔ ka kɛ piyɔniye ye. N’ facɛ ni n’ facɛfitinin tun tɛ Jehova Seerew ye. O wagati la, olu tun be n’ jijara n’ ka baara kɛ kudayi asiransi boon dɔ kɔnɔ Torɔnto dugu la. N’ sɔnna o baara la sabu n’ facɛfitinin tun be ni lɔyɔrɔba ye o yɔrɔ la.

Torɔnto, n’ tun be n’ ka wagati fanba kɛ baara la ani n’ tun be jɛn ni mɔgɔw ye minw tɛ Jehova Seerew ye. O y’a to n’ tun tɛ taga lajɛnw na ani ka waajuli kɛ tuma o tuma. A daminɛ na, n’ tun siginin be ni n’ mamacɛ ye min tun tɛ Jehova Seere ye. Nka a sanin kɔ, n’ tun ka ɲi ka yɛlɛma yɔrɔ wɛrɛ la.

Balimacɛ ni balimamuso Hutcheson, minw tun tagara ni n’ ye lajɛnba la saan 1958, olu tun be i n’a fɔ n’ wolobagaw. U ko n’ ka na to n’u ye u ka soo ani u ye n’ dɛmɛ ka ɲɛtaga kɛ Alako ta fan fɛ. Saan 1960, ne ni u dencɛ John batizera. John ye piyɔniye baara daminɛ ani o ye n’ jija ka dɔ fara n’ ka waajuli baara kan. Kafo balimacɛw y’a ye ko n’ be ɲɛtaga kɛra Alako ta fan fɛ. Kɔfɛ, u ye n’ kɛ Ala ka Mara cidenyabaara lakɔli kɔrɔsibaga ye. a

Saan 1966, n’ ye Randi Berge furu. A tun kisɛyanin lo piyɔniye baara la ani a tun b’a fɛ ka taga dɛmɛ don yɔrɔ min na weleweledalaw man ca. Kɔrɔsibaga tagamakɛla ye a mako don an na kosɔbɛ ani a y’an jija an ka taga dɛmɛ don Oriliya kafo kɔnɔ, Ɔntariyo mara la. O la, an sinna k’an ka minanw cɛ ka yɛlɛma yen.

An senin dɔrɔn Oriliya dugu la, n’ farala Randi kan kudayi piyɔniye baara la. N’ fana dusu tun ka di kosɔbɛ! Tuma min na n’ ye n’ sɔbɛ don piyɔniye baara la, n’ ye ninsɔndiya sɔrɔ ka baara kɛ ni Bibulu ye ani k’a ye mɔgɔw b’a faamuna. An ninsɔn diyara kosɔbɛ ka cɛɛ dɔ n’a muso dɛmɛ Oriliya dugu la, u ye yɛlɛmaniw kɛ u ka ɲɛnamaya kɔnɔ ani ka kɛ Jehova sagokɛlaw ye.

Loon dɔ an tagara Torɔnto ani n’ ye balimacɛ Arnold MacNamara kunbɛn yen. Betɛli kɔrɔsibaga dɔ tun lo. A ye n’ ɲininga n’a bena diya an ye ka kɛ dan na piyɔniyew ye. N’ sinna k’a jaabi ko: “Ɔnhɔn! A bena diya an ye ka taga yɔrɔ bɛɛ fɔɔ Kebɛki!” Kanada angilikan fɔbagaw tun be ni miiriya jugu min ye Kebɛki faransɛkan fɔbagaw koo la, o tun ye nɔɔ to n’ kan. O wagati la, Kebɛkikaw tun murutinin lo gofɛrɛnɛman kama ani u tun b’a fɛ ka faran ka bɔ Kanada la walisa k’u yɛrɛ ta.

Arnold ye n’ jaabi ko: “Sisan, tɔnbolo be dan na piyɔniyew cira ka taga Kebɛki dɔrɔn le.” N’ sinna k’a fɔ ko an bena taga. N’ tun b’a lɔn ko a bena diya Randi ye ka taga piyɔniye baara kɛ yen. Kɔfɛ, n’ y’a faamu ko o kɛra an ka desizɔnw bɛɛ la fisaman lo ye!

An ye faransɛkan degi lɔgɔkun duuru kɔnɔ. O kɔ, ne ni Randi ani balimacɛ wɛrɛ n’a muso tagara Rimuski dugu la. Kilomɛtɛrɛ 540 ɲɔgɔn lo be o dugu ni Mɔntereyal cɛ ani a be Mɔntereyal kɔrɔn ni saheli cɛ. An bele tun tɛ faransɛkan mɛn ka ɲɛ. N’ y’o faamu loon dɔ, tuma min na n’ ye kunnafoni dɔw kalan lajɛn na. Sanni n’ k’a fɔ ko an ka lajɛnba nata la, “mɔgɔ caaman bena bɔ Otirisi jamana” na ka na, n’ filila ka kumaden dɔ fɔ min bɔnin be o jamana tɔgɔ ma ani n’ ko kɔnɔsogolonw bena na.

Rimuski dugu la, balimamuso kisɛyanin naani, balimacɛ Huberdeau n’a muso ani u denmuso fila nana fara an mɔgɔ naani kan. Balimacɛ Huberdeau n’a muso ye bonba dɔ luwe sibon 7 tun be min kɔnɔ. An tun be o boon weele ko boon gwɛman sabu a samasenw n’a ɲɛfɛyɔrɔ tun gwɛnin lo. Piyɔniye minw bɛɛ tun be o boon kɔnɔ, u tun be dɛmɛ don ka luwanse sara. Tuma caaman na, an minw tun be si o boon kɔnɔ, an hakɛ tun be se mɔgɔ 12 wala 14 ma. Komi ne ni Randi tun ye dan na piyɔniyew ye, an tun be bɔ waajuli la sɔgɔma, tilefɛ ani wulafɛ. O la, a tun ka di an ye ka dɔ sɔrɔ tuma bɛɛ min b’an bila sira waajuli la, hali tuma min na nɛnɛ b’a tan ni fila la wulafɛ.

An tun bɛnnin lo kosɔbɛ n’o piyɔniye kantigiw ye, fɔɔ u kɛra i ko an somɔgɔw. Tuma dɔw la, an tun be tasuma mana kɛnɛma ani ka sigi k’a lamini wala an tun be jɛn ka tobili kɛ. Balimacɛ dɔ tun ye dɔnkililabaga ye fɔlɔ la, o kama samedilon sufɛ an tun ka teli ka dɔnkili la ani ka dɔɔn kɛ.

Mɔgɔ caaman tun b’u mako don Bibulu ka tiɲɛnkalanw na Rimuski dugu la! Saan duuru kɔnɔ, an ninsɔn diyara k’a ye ko Bibulu kalanden caaman ye ɲɛtaga kɛ ka batize. Weleweledalaw hakɛ cayara ka se 35 ɲɔgɔn ma an ka kafo kɔnɔ.

Ka waajuli kɛ Kebɛki, o kɛra fɔrɔmasɔn ɲuman yɛrɛ lo ye an fɛ. An y’a ye Jehova y’an dɛmɛ cogo min na an ka cidenya baara la ani an makoyafɛnw koo la. Faransɛkan fɔbagaw, u ka kaan ani u ka kokɛcogow diyara an ye fana ani o y’a to an ye siya wɛrɛ mɔgɔw kanu.—2 Kor. 6:13.

Tɔnbolo ko an ka yɛlɛma Trakadi dugu la ani o barila an na yɛrɛ le. O dugu be Nuvo Brɔnswik mara kɔrɔn fan fɛ, kɔgɔjida la. O ma nɔgɔya an ma sabu dɔɔni ka kɔn o ɲɛ, an tun ye an bolonɔ bila sɛbɛ dɔ kan walisa ka boon dɔ luwe. Kɔntra tun be ne ni lakɔliso dɔ cɛ fana. N’ tun be lakɔlidenw kalan tuma kelen kelen yen. Ani an ka Bibulu kalanden dɔw tun kɛra weleweledalaw ye  a ma mɛɛn. An fana tun be Masaya Boon lɔra ani an tun b’o baara tilancɛ lo la.

An ye delili kɛ wikɛni bɛɛ la o yɛlɛmani koo la ani an tagara Trakadi dugu filɛ. A tun be dan na pewu ni Rimuski dugu ye. Nka komi Jehova ko an ka taga yen, an y’a latigɛ ka taga. An ye Jehova kɔrɔbɔ ani an y’a ye ko a ye an ka gwɛlɛyaw kelen kelen bɛɛ bɔ an seen kɔrɔ (Mal. 3:10). Randi be jɛnɲɔgɔnya ɲuman kɛ ni Jehova ye, a tɛ miiri a yɛrɛ nafa dɔrɔn na ani yɛlɛko koow ka di a ye. O y’a to a ma gwɛlɛya an ma ka yɛlɛma Trakadi dugu la.

Robert Ross dɔrɔn lo tun ye diinan mɔgɔkɔrɔ ye an ka kafo kura kɔnɔ. Ale n’a muso Linda tun ye piyɔniyew ye Trakadi. U dencɛ fɔlɔ wolonin kɔ, u y’a latigɛ ka to yen. Hali n’u tun b’u jantora o deen fitinin na, u ye ne ni Randi jija kosɔbɛ. U tun b’an ladon koɲuman u ka soo ani u tun kisɛyanin lo waajuli la.

An ye piyɔniye baara kɛ Trakadi saan fila kɔnɔ. O kɔ, u ko an ka kafokulu kɔrɔsili baara kɛ, o barila an na tugun. An tora ka taga bɔ angilikan kafow ye saan 7 kɔnɔ. O kɔ, u y’an ci ka taga Kebɛki faransɛkan kafokulu dɔ kɔnɔ. O yɔrɔ la, distriki kɔrɔsibaga Léonce Crépeault tun be to ka n’ tando n’ ka forobakalanw kosɔn. Nka o kɔ, a tun be n’ ɲininga ko: “I be se ka mun lo kɛ walisa u ka balimaw nafa bɛrɛbɛrɛ?” b A y’a mako don n’ na kosɔbɛ minkɛ, o ye n’ dɛmɛ n’ ka kalanw fisayara ani u faamu ka nɔgɔ.

Saan 1978, lajɛnba dɔ kɛra Mɔntereyal min tun labɛnna jamana caaman kama. A barokun tun ko: “La foi victorieuse.” O lajɛnba la, n’ ye baara kɛ dumuni labɛn yɔrɔ la ani n’ tɛna ɲinɛ o kɔ fewu! An jigi tun b’a la ko mɔgɔ 80 000 lo tun bena na ani labɛn kuraw tun bilara sen kan: tobilikɛminanw, dumuni minw tun ka ɲi ka tobi ani u tobicogo, o bɛɛ tun ye koo kura ye. Kamiyɔn frigolaman baba 20 ɲɔgɔn lo tun be an fɛ ani u tun tɛ baara kɛ ka ɲɛ tuma bɛɛ. Ka kɔn lajɛnba tile fɔlɔ ɲɛ, an ma se ka don stadi la ka labɛnw kɛ sabu farikoloɲanagwɛ dɔ tun be kɛra yen. Dugutilama le an sera ka don, k’a sɔrɔ dibiw tun ka ɲi ka mana ka kɔn tilebɔ ɲɛ walisa ka daraka labɛn! An tun sɛgɛnnin lo, nka n’ ye kalan caaman sɔrɔ n’ balimaw fɛ. U tun be baara gwɛlɛw kɛ, kerecɛn kolɔnbagaw tun lo ani yɛlɛko koow tun ka di u ye. Fɔɔ ka na se bi ma,  an ye teriw ye. Ninsɔndiyaba tun lo ka kɛ o lajɛnba kɔrɔtaninba la Kebɛki sabu u tun ye an balimaw tɔɔrɔ yen kosɔbɛ saan 1940 ani saan 1960 cɛ!

N’ ye kalan caaman sɔrɔ diinan mɔgɔkɔrɔ wɛrɛw fɛ lajɛnbaw la minw kɛra Mɔntereyal. Saan dɔ la balimacɛ David Splane, min ye Koow Ɲɛnabɔla Jɛnkulu mɔgɔ dɔ ye sisan, ale lo tun ye lajɛnba kɔrɔsibaga ye. Kɔfɛ, tuma min na u y’o baara kalifa n’ ma lajɛnba dɔ la, David ye n’ dɛmɛ kosɔbɛ.

Saan 36 kɛnin kɔ kafokulu kɔrɔsili baara la, u y’a ɲini n’ fɛ saan 2011 ko n’ ka kɛ kalanfa ye diinan mɔgɔkɔrɔw ka lakɔli la. Saan fila kɔnɔ, ne ni Randi sira dilan 75 kan, nka o yɛrɛsaraka ma kɛ gwansan ye. Lɔgɔkun kelen kelen bɛɛ laban na, diinan mɔgɔkɔrɔw tun be Koow Ɲɛnabɔla Jɛnkulu waleɲuman lɔn kosɔbɛ sabu a b’a janto u la Alako ta fan fɛ.

Kɔfɛ, n’ ye mɔgɔw kalan Masaya waajulikɛlaw ka lakɔli la. Tuma caaman na, kalandenw tun sɛgɛnnin lo kosɔbɛ sabu baara ka ca u fɛ: loon o loon u be lɛri 7 ɲɔgɔn kɛ klasi kɔnɔ, ka lakɔli baaraw kɛ lɛri 3 sufɛ ani ka kalan 4 wala 5 labɛn lɔgɔkun o lɔgɔkun. Ne ni kalanfa tɔɔ kelen y’a fɔ u ye ko u tɛ se k’o kɛ ni Jehova ma u dɛmɛ. U tun mana u jigi la Jehova kan, u tun b’a miiri ko u be se ka baara min kɛ, u tun be caaman kɛ fɔɔ ka tɛmɛ o kan yɛrɛ. O koo tun be u kabakoya cogo min na, n’ tɛ se ka ɲinɛ o kɔ.

N’ bamuso tun b’a mako don tɔɔw la minkɛ, nafa caaman sɔrɔla o la: a ka Bibulu kalandenw ye ɲɛtaga kɛ ani n’ facɛ ka miiriya yɛlɛmana tiɲɛn koo la. Tile saba n’ bamuso sanin kɔ, n’ facɛ ye koo dɔ kɛ min ye an kabakoya. A nana forobakalan dɔ lamɛn Masaya Boon na ani a tora ka na lajɛnw na saan 26 kɔnɔ. Tiɲɛn lo ko n’ facɛ ma batize, nka diinan mɔgɔkɔrɔw y’a fɔ n’ ye ko tuma bɛɛ, ale lo tun ye fɔlɔ ye ka na lajɛnw na lɔgɔkun o lɔgɔkun.

N’ bamuso kɛra ɲɛyirali ɲuman ye fana ne ni n’ dɔgɔmusow fɛ. N’ dɔgɔmuso saba bɛɛ n’u cɛɛw be Jehova batora kantigiya la. Kelen be baara kɛra Betɛli la Pɔrtigal ani tɔɔ kelen be Betɛli la Ayiti jamana na.

Sisan, ne ni Randi ye dan na piyɔniyew ye Amiltɔn dugu la, Ɔntario. K’an to kafokulu kɔrɔsili baara la, a tun ka di an ye ka tɔɔw bila sira u ka viziti kuraw n’u ka bibulukalanw na. Nka sisan, an ninsɔn ka di k’a ye ko an yɛrɛ ka Bibulu kalandenw be ɲɛtaga kɛra Alako ta fan fɛ. An be teriya kɛra fana n’an ka kafo kura balimaw ye. An mana a ye Jehova be u dɛmɛna cogo min na wagati diimanw ni wagati gwɛlɛw na, o b’an jija.

Mɔgɔ caaman y’u mako don an na cogo min na, an mana miiri o la, an b’u waleɲuman lɔn kosɔbɛ. An fana banbara k’a yira tɔɔw la ko u ‘koo b’an dusu la’ ani k’u jija u k’u seko bɛɛ kɛ Jehova ka baara la (2 Kor. 7:6, 7). Misali la, denbaya dɔ kɔnɔ, bamusoman, denmuso ani dencɛ tun ye kudayi cidenya baarakɛlaw ye. N’ ye cɛman ɲininga n’a delila ka miiri k’a filɛ n’a be se ka kɛ piyɔniye ye. A ye n’ jaabi ko ale be piyɔniye saba dɛmɛna. O la, n’ y’a ɲininga ko: “Ele be se k’u dɛmɛ cogo fisaman na ka tɛmɛ Jehova kan wa?” N’ y’a jija ko a k’a ɲini k’u ka ninsɔndiya ɲɔgɔn sɔrɔ. Kalo wɔɔrɔ o kɔ, a ye piyɔniye baara daminɛ.

Ne ni Randi bena to ka Jehova ka “koɲumanw fɔ . . . waati nata mɔgɔw ye.” An jigi b’a la ko u bena ninsɔndiya sɔrɔ Jehova ka baara la i ko anw.—Zab. 71:17, 18.