BAROKUN KALANTA KAFO KƆNƆ 30
To ka dɔ fara i ka kanuya kan
“Ne be Ala daali aw ye ko a ka dɔ fara aw ka kanuya kan.”—FILIP. 1:9.
DƆNKILI 2 I tɔgɔ ko Jehova
BAROKUN KƆNƆNAKOW a
1. I ye tiɲɛnkalan jumanw lo lɔn, tuma min na i y’a daminɛ ka bibulukalan kɛ?
I HAKILI b’a la tuma min na i y’a daminɛ ka bibulukalan kɛ wa? N’a sɔrɔ i kabakoyara k’a lɔn ko tɔgɔ be Ala la. Tuma min na i y’a lɔn fana ko Ala tɛ mɔgɔw tɔɔrɔ jahanama tasuma kɔnɔ, n’a sɔrɔ i dusu lafiyara. I ka mɔgɔ kanulen minw sara, n’a sɔrɔ i ninsɔn diyara kosɔbɛ fana k’a lɔn ko i bena se k’u ye tugun ani ka ɲɛnamaya kɛ n’u ye alijɛnɛ kɔnɔ dugukolo kan.
2. I ye ɲɛtaga wɛrɛ juman lo kɛ ka fara Bibulu ka tiɲɛnkalanw faamuyali kan? (Efɛzikaw 5:1, 2).
2 I tora ka Bibulu sɛgɛsɛgɛ minkɛ, dɔ tora ka fara i ka kanuya kan Jehova koo la. I ye min kalan, o kanuya ye i lasun k’o sira tagama. I tora ka basigi Bibulu ka sariyakolow kan ka desizɔn ɲumanw ta. I ye i ka kokɛcogo ani i tagamacogo fisaya sabu i b’a fɛ k’i koo diya Ala ye. I ko deen b’a bangebaga kanulen ladegi cogo min na, i fana be i sankolola Faa ladegira ten.—Efɛzikaw 5:1, 2 kalan.
3. An ka ɲi k’an yɛrɛ ɲininga mun ni mun lo la?
3 An ka ɲi k’an yɛrɛ ɲininga ko: “Yala n’ be Jehova kanu sisan ka tɛmɛ tuma min na n’ kɛra kerecɛn ye wa? Kabi n’ batizera, yala n’ miiricogo ani n’ ka kokɛcogo bɔnin be Jehova taw ma kosɔbɛ sisan wa? Yala o be n’ lasun k’a yira ko n’ be n’ balimaw kanu wa?” Hali n’an y’a ye ko an tɛ Jehova ni tɔɔw kanu kosɔbɛ tugun i ko fɔlɔ la, an kana an fari faga. O koo ɲɔgɔn tun ye kerecɛn fɔlɔw sɔrɔ. Nka Yezu ma ban u la ani a tɛna ban an fana na (Yir. 2:4, 7). A b’a lɔn ko an be se k’an jija ka Jehova ni tɔɔw kanu kosɔbɛ tugun i ko fɔlɔ la.
4. An bena mun lo lajɛ barokun nin na?
4 Barokun nin na, an bena a ye cogo min na an be se ka to ka dɔ fara an ka kanuya barika kan Jehova ni tɔɔw koo la. N’an y’o kɛ, o be dugaw lase anw yɛrɛ ani mɔgɔ tɔɔw ma. An bena o duga dɔ lajɛ fana barokun nin na.
I KA KANUYA BARIKA BONYA JEHOVA KOO LA
5-6. Ciden Pol ye gwɛlɛya jumanw lo sɔrɔ a ka cidenya baara la? Nka mun lo ye Pol dɛmɛ a tora ka Jehova sago kɛ?
5 Ciden Pol ye ninsɔndiya sɔrɔ Jehova ka baara la. Nka a ye gwɛlɛya caaman sɔrɔ fana. Pol tun ka teli ka voyaziw kɛ ka taga dugujanw na ani o wagati la voyaziw tun man nɔgɔ. O voyazi dɔw la, “baji tun be ɲini” ka taga ni Pol ye ani “benkannikɛlaw fana” ye gwɛlɛya lase a ma. Tuma dɔw la fana, a kɛlɛbagaw y’a bugɔ (2 Kor. 11:23-27). Ani Pol tun ye koo minw kɛ walisa k’a kerecɛnɲɔgɔnw dɛmɛ, u tun t’a waleɲuman lɔn o kosɔn tuma bɛɛ.—2 Kor. 10:10; Filip. 4:15.
6 Mun lo ye Pol dɛmɛ a tora ka Jehova sago kɛ? Koo minw ye Pol sɔrɔ, o ni Ala ka Kuma y’a dɛmɛ ka koo caaman faamu Jehova koo la. O y’a to a lara a la kosɔbɛ ko Jehova Ala be ale kanu (Ɔrɔm. 8:38, 39; Efɛz. 2:4, 5). O y’a to ale yɛrɛ ye Jehova kanu kosɔbɛ fana. A y’o kanuya yira a kɛtɔ ka baara kɛ ka “Ala ka mɔgɔw dɛmɛ.”—Eburuw 6:10.
7. An be se k’an ka kanuya barika bonya Jehova koo la cogo minw na, u dɔ ye juman ye?
7 An be se k’an ka kanuya barika bonya Ala koo la, an kɛtɔ k’a ka Kuma sɛgɛsɛgɛ koɲuman. N’i be Bibulu kalanna, a ɲini k’a lɔn vɛrise kelen kelen bɛɛ be min yira Jehova koo la. I yɛrɛ ɲininga ko: “Maana nin b’a yira cogo di ko Jehova be ne kanu? Dalilu jumanw lo b’a kɔnɔ minw be n’ lasun ka Jehova kanu?”
8. Delili be se ka an dɛmɛ cogo di an ka dɔ fara an ka kanuya barika kan Ala koo la?
8 Cogo wɛrɛ min na an be se ka dɔ fara an ka kanuya barika kan Jehova koo la, o ye ka to k’an dusukunnakow bɛɛ fɔ a ye delili la (Zab. 25:4, 5). Jehova fana bena an ka deliliw jaabi (1 Zan 3:21, 22). Balimamuso Kayla be Azi mara la ani a ko: “N’ tun be ni kanuya min ye Jehova koo la a daminɛ na, o tun basiginin lo lɔnniya dama lo kan. Nka, n’ kɛtɔ k’a ye ko a be n’ ka deliliw jaabi, o ye dɔ fara n’ ka kanuya barika kan. O y’a to a ka di n’ ye ka Jehova diyanyekow kɛ.” b
I KA KANUYA BARIKA BONYA TƆƆW KOO LA
9. Timote y’a yira cogo di ko a tun be dɔ farala a ka kanuya barika kan tɔɔw koo la?
9 Saan damanin Pol tuubinin kɔ, a ye kanbele ɲuman Timote kunbɛn. Timote tun be Jehova ni tɔɔw kanu. Pol y’a fɔ Filipikaw ye ko: “Ale kelen le be hami aw ka koo la.” (Filip. 2:20). Timote tun be ni setigiya min ye ka koow labɛn wala ka forobakalanw kɛ, Pol tun t’a tandora o lo kosɔn. Nka, min tun ye Pol kabakoya Timote koo la, o ye ko a tun be a balimaw kanu. Siga t’a la, Timote tun be taga bɔ kafo minw ye, u tun kɔrɔtɔnin lo a ka na bɔ u ye.—1 Kor. 4:17.
10. Anna n’a cɛɛ y’a yira cogo di ko u be u balimaw kanu?
10 An fana be sababuw ɲini k’an balimaw dɛmɛ (Eburuw 13:16). Anna min kofɔra barokun tɛmɛnin na, an k’ale ka koo lajɛ. Fɔɲɔba dɔ kɔ, ale n’a cɛɛ tagara bɔ balima dɔw ye ani u y’a ye k’o fɔɲɔba y’o balimaw ka boon sanfɛyɔrɔ halaki. O kama, u ka faniw bɛɛ tun nɔgɔra. Anna ko: “An ye u ka faniw cɛ ka taga u ko, k’u pase ani ka u kuru kuru ka na o di u ma. Anw fɛ o tun tɛ kooba ye, nka o kɛra sababu ye an kɛra teri sɔbɛw ye fɔɔ bi.” Anna n’a cɛɛ tun be u balimaw kanu minkɛ, o lo ye u lasun ka koo tigitigi dɔw kɛ walisa k’u dɛmɛ.—1 Zan 3:17, 18.
11. a) An be jijali minw kɛ k’a yira tɔɔw la ko an b’u kanu, o be nɔɔ juman lo to u kan? b) Ka kɛɲɛ ni Talenw 19:17 ye, n’an b’a yira ko an be tɔɔw kanu, Jehova b’o jati cogo di?
11 N’an be tɔɔw minɛ ni kanuya ani ɲumanya ye, u ka teli k’a ye ko an b’an jijara ka Jehova miiricogo n’a ka kokɛcogow ladegi. Ani an b’a miiri ko an ka ɲumanya wale bena tɔɔw ninsɔn diya cogo min na, n’a sɔrɔ a bena u ninsɔn diya fɔɔ ka tɛmɛ o kan yɛrɛ. An kumana Kayla min koo la, n’a be miirila balima dɔw koo la minw y’a dɛmɛ, a ninsɔn be diya kosɔbɛ. A ko: “Balimamuso minw tun be n’ ta ka taga ni n’ ye waajuli la, n’ be u bɛɛ waleɲuman lɔn kosɔbɛ. U tun bena n’ ta, an be taga fɛɛn dɔ dumu ani u tun be segi ka na n’ jigi soo hɛɛrɛ la. Sisan, n’ b’a faamu ko u tun be jijaliba lo kɛ ani u tun b’o kɛ ni kanuya ye.” Nka tiɲɛn na, bɛɛ lo tɛna an waleɲuman lɔn an ka kɛtaw kosɔn. Minw ye Kayla dɛmɛ, a y’a fɔ olu koo la ko: “U ye ɲumanya wale caaman minw kɛ n’ ye, a tun bena diya n’ ye k’u fo o kosɔn, nka n’ yɛrɛ t’a lɔn u be yɔrɔ min na sisan. Jehova kɔni b’a lɔn. N’ b’a deli a k’u sara u ka ɲumanya kosɔn.” Joo be Kayla fɛ. An be ɲumanya wale minw kɛ tɔɔw ye hali ni bɛrɛ tɛ, Jehova b’o kɔrɔsi. A b’a jati k’o ye fɛɛn nafamanba ye ani k’o ye jurudon ye ale la, a bena min juru sara.—Talenw 19:17 kalan.
Ni mɔgɔ be ɲɛtaga kɛra Alako ta fan fɛ, a be sababuw ɲini ka tɔɔw dɛmɛ (dakun 12nan lajɛ).
12. Balimacɛw be se k’a yira cogo di ko u be kafodenw kanu? (Jaaw lajɛ fana.)
12 N’i ye balimacɛ ye, i be se k’a yira cogo di ko i be tɔɔw kanu ani i be se ka mun lo kɛ walisa k’u dɛmɛ? Jordan ye balima kanbele ye ani a ye diinan mɔgɔkɔrɔ dɔ ɲininga ale be se ka koo wɛrɛ minw kɛ ka kafodenw dɛmɛ. Jordan tun ye ɲɛtaga minw kɛ ka ban, o diinan mɔgɔkɔrɔ y’a tando o kosɔn. O kɔ, a y’a fɔ a ye a be se ka koo wɛrɛ minw kɛ. Misali la, a ko a be se ka kɔn ka na Masaya Boon na ani ka tɔɔw fo, k’a niin don lajɛnw na, ka waajuli kɛ tuma o tuma n’a ka waajuli jɛnkulu ye ani ka fɛɛrɛ tigitigi dɔw ɲini ka tɔɔw dɛmɛ. Jordan kɛtɔ k’o ladiliw sira tagama, a ye kokɛcogo dɔw degi. Nka o dɔrɔn tɛ, a ka kanuya barika bonyana a balimaw koo la fana. A y’a faamu ko ni balimacɛ dɔ kɛra kɔrɔsigi ciden ye, o wagati la tɛ a b’a daminɛ ka tɔɔw dɛmɛ. Nka, a be taga ɲɛ le n’o baara ye.—1 Tim. 3:8-10, 13.
13. Kanuya ye Christian dɛmɛ cogo di a y’a ɲini ka saratiw dafa ka kɛ diinan mɔgɔkɔrɔ ye tugun?
13 Nka n’a y’a sɔrɔ ko i tɛ kɔrɔsigi ciden wala diinan mɔgɔkɔrɔ ye tugun do? I ye baara min kɛ ka tɛmɛ ani kanuya min ye i lasun k’o kɛ, Jehova tɛ ɲinɛ o kɔ (1 Kor. 15:58). I be koo minw kɛra k’a yira ko i be i balimaw kanu, a b’o kɔrɔsi fana. Balimacɛ Christian tun ye diinan mɔgɔkɔrɔ ye ani tuma min na a bɔnɛna o nɛɛma baara la, o y’a dusu tiɲɛ. Nka a ko: “N’ y’a latigɛ ko n’ be ni nɛɛma baara ye wo, n’ tɛ n’a ye wo, n’ bena to ka n’ seko bɛɛ kɛ Jehova ka baara la kanuya kosɔn.” Kɔfɛ, a y’o nɛɛma baara sɔrɔ tugun. A ko: “N’ tun sirannin lo dɔɔni ka kɛ diinan mɔgɔkɔrɔ ye tugun. Nka, n’ y’a latigɛ ko ni Jehova sɔnna n’ ka kɛ diinan mɔgɔkɔrɔ ye kokura a ka makari kosɔn, n’ bena kɛ a ye sabu n’ be ale ni n’ balimaw kanu.”
14. I be kalan juman lo sɔrɔ balimamuso Elena ka kumaw na?
14 Jehova sagokɛlaw b’a yira fana ko u be u mɔgɔɲɔgɔnw kanu (Mat. 22:37-39). Misali la, balimamuso Elena be bɔ Zɔrizi jamana na ani a ko: “A daminɛ na, Jehova kanuya dɔrɔn lo tun be n’ lasun ka waajuli kɛ. Nka, n’ ka kanuya barika tora ka bonya n’ sankolola Faa koo la minkɛ, dɔ farala n’ ka kanuya kan mɔgɔw koo la. N’ miirila k’a filɛ gwɛlɛya minw be u kan ani barokun minw be se k’u dusukun sɔrɔ. N’ tora ka miiri o cogo la minkɛ, o y’a to n’ tun b’a fɛ sɔbɛ la k’u dɛmɛ.”—Ɔrɔm. 10:13-15.
JEHOVA BENA AN DUGA N’AN B’A YIRA KO AN BE TƆƆW KANU
Kanuya wale kelen be se ka mɔgɔ caaman wɛrɛw nafa (dakun 15-16nan lajɛ).
15-16. I ko a yirala jaaw kan cogo min na, an be duga jumanw lo sɔrɔ n’an b’a yira ko an be tɔɔw kanu?
15 N’an b’a yira ko an b’an balimaw kanu, olu dɔrɔn lo tɛ nafa sɔrɔ o la. Tuma min na COVID-19 fɔɲɔbana daminɛna, balimacɛ Paolo n’a muso ye balima musokɔrɔba caaman dɛmɛ walisa u ka se waajuli kɛcogo la n’u ka telefɔni, tablɛti n’a ɲɔgɔnnaw ye. A daminɛ na, o gwɛlɛyara balimamuso dɔ ma. Nka a laban, a sera k’o kɛ. A yɛrɛ sera ka tɛmɛ a ka telefɔni fɛ k’a somɔgɔw weele Hakilijigi lajɛn na. U la mɔgɔ 60 ye Hakilijigi lajɛn kɛ vidéoconférence sababu fɛ! Paolo n’a muso ka jijaliw ye o balimamuso n’a somɔgɔw bɛɛ nafa. Kɔfɛ a ye Paolo sɛbɛ ko: “I ye an mɔgɔkɔrɔbaw kalan minkɛ, i ni ce o kosɔn. Jehova b’a janto an na kosɔbɛ cogo min na ani i ye jijali minw kɛ, n’ tɛna ɲinɛ o kɔ abada!”
16 O walew ɲɔgɔn ye Paolo dɛmɛ ka koo kɔrɔtaninba dɔ faamu. A y’a faamu ko kanuya kɔrɔtanin lo kosɔbɛ ka tɛmɛ lɔnniya ni setigiya kan. A ko: “N’ tun ye kafokulu kɔrɔsibaga ye. Bi, n’ b’a faamu ko hali ni weleweledalaw ɲinɛna n’ ka kalanw kɔ, u bele hakili b’a la n’ ye u dɛmɛ cogo nafaman minw na.”
17. N’an b’a yira ko an be tɔɔw kanu, o bena jɔn lo nafa fana?
17 N’an b’a yira tɔɔw la ko an b’u kanu, o be an yɛrɛ nafa cogo min na, o be se ka bari an na. Jonathan be Nuvɛli Zelandi ani a sɔnna a ma k’o ye tiɲɛn ye. Samedilon dɔ tile gwangwan fɛ, a ye piyɔniye dɔ ye a be waajuli kɛra sirada la. Jonathan y’a latigɛ ka waajuli kɛ n’a ye tilefɛ samedi nataw la. O tuma na, a tun m’a lɔn k’o ɲumanya wale tun bena ale yɛrɛ nafa kosɔbɛ. A ko: “O wagati la, waajuli tun man di n’ ye. Nka, n’ tora k’o piyɔniye ka mɔgɔw kalancogo lamɛn ani k’a ye a be sanga sɔrɔla waajuli la minkɛ, o y’a to waajuli diyara n’ ye kosɔbɛ. O piyɔniye kɛra n’ teri sɔbɛ ye fana. A ye n’ dɛmɛ ka ɲɛtaga kɛ Alako ta fan fɛ, waajuli baara diyara n’ ye ani n’ ye n’ magwɛrɛ Jehova la koɲuman.”
18. Jehova b’a fɛ an ka mun lo kɛ?
18 Jehova b’a fɛ an ka dɔ fara an ka kanuya barika kan ale ani mɔgɔ tɔɔw koo la. I ko an y’a ye cogo min na, an be se k’an ka kanuya barika bonya Jehova koo la n’an be a ka Kuma kalan, ka miiri a kan ani ka delili kɛ tuma o tuma. An be se k’an ka kanuya barika bonya an balimaw koo la, an kɛtɔ k’u dɛmɛ cogo tigitigi dɔw la. Ni dɔ tora ka fara an ka kanuya barika kan, an bena an magwɛrɛ kosɔbɛ Jehova n’an balimaw na. Ani an bena teriya diyabɔ n’u ye fɔɔ abada!
DƆNKILI 109 Aw ka ɲɔgɔn kanu kosɔbɛ n’aw dusu bɛɛ ye
a An be Jehova sago kɛra a mɛɛnna wo a ma mɛɛn wo, an bɛɛ be se ka to ka ɲɛtaga kɛ. Barokun nin na, an bena a ye an be se k’o kɛ cogo jɔnjɔn min na an kɛtɔ ka to ka dɔ fara an ka kanuya kan Jehova ni tɔɔw koo la. I miiritɔ barokun nin kɔnɔnakow la, a filɛ i ye ɲɛtaga minw kɛ ka ban ani i bele be se ka min kɛ.
b Tɔgɔ dɔw yɛlɛmana.