Siga t’a la, Jehova b’a fɛ furuɲɔgɔnw ka ninsɔndiya sɔrɔ ani u ka jɛnɲɔgɔnya sabatinin ka to fɔɔ abada (Mat. 19:4-6). N’i b’a fɛ ka furu, i be se ka furuɲɔgɔn ɲuman sɔrɔ cogo di? Komi Jehova ye an Danbaga ye, a b’a lɔn an ka ɲi ka min kɛ walisa ka hɛɛrɛ sɔrɔ an ka furu kɔnɔ. O la, a ye sariyakolo minw di an ma, n’an b’u sira tagama, an bena hɛɛrɛ sɔbɛ sɔrɔ. An k’o sariyakolo dɔw lajɛ.

A fɔlɔ, an ka ɲi ka nin faamu an yɛrɛ koo la: “Mɔgɔ dusukun bɛ filibanciya kɛ ka tɛmɛn fɛn bɛɛ kan, a tolilen bɛ kosɛbɛ.” (Zer. 17:9, Bible senuma). Ni mɔgɔ fila be teriya kɛra furu kama, u ka teli ka jarabi ɲɔgɔn na joona joona. Ni o do kɛra, a ka gwɛlɛ u ma ka desizɔn ɲumanw ta. Ni mɔgɔ basigira a dusukunnakow dɔrɔn kan ka desizɔnw ta furu koo la, a jigi ka teli ka tigɛ (Talenw 28:26). O kama, hakilitigiyako tɛ mɔgɔ fila ka to ka jarabi kumaw fɔ ɲɔgɔn ye u ka teriya daminɛ na. N’u ye layidu ta ɲɔgɔn ye fana k’a sɔrɔ u tɛ ɲɔgɔn lɔn ka ɲɛ fɔlɔ, o fana tɛ hakilitigiyako ye.

Talenw 22:3 b’a fɔ ko: “Hakilitigi mana kojugu natɔ ye, a be dogo. Nga kolɔnbali be taga tɛmɛ a kɔrɔ, a daa be to a la.” Farati jumanw lo b’a la ka tɛmɛ site web fɛ ka furuɲɔgɔn ɲini? A fɔ man di, nka dɔw y’a daminɛ ka teriya kɛ furu kama ni mɔgɔ dɔw ye ɛntɛrɛnɛti kan u tɛ minw lɔn ani kɔfɛ, o mɔgɔw y’u jigi tigɛ. Nanbaramɔgɔ dɔw fana b’u yɛrɛ kɛ mɔgɔ ɲumanw ye ɛntɛrɛnɛti kan walisa ka mɔgɔ kolɔnbaliw ka wari soɲɛ. Tuma dɔw la, o nanbaramɔgɔw b’a fɔ ko olu ye Jehova Seerew ye.

An ka kuma farati wɛrɛ koo la. Site web dɔw be tɛmɛ ɔridinatɛri porogramuw fɛ walisa k’a latigɛ mɔgɔ minw be taga ɲɔgɔn fɛ. Nka, foyi t’a yira ko fiɲɛ tɛ o porogramuw na. Furu ye koo kɔrɔtaninba ye. O kama, hakilitigiyako tɛ k’i jigi la ɔridinatɛri porogramu dɔ kan walisa ka furuɲɔgɔn ɲuman sugandi. Ɔridinatɛri porogramuw tɛ se k’an dɛmɛ abada ka se Bibulu ka sariyakolow ma.—Talenw 1:7; 3:5-7.

Sariyakolo wɛrɛ be sɔrɔ Talenw 14:15 kɔnɔ. A fɔra yen ko: “Kolɔnbali be la fɔta bɛɛ la. Nga yɛrɛkɔlɔsibaga be jatiminɛ kɛ.” Sanni i k’a latigɛ ko mɔgɔ dɔ bena kɛ furuɲɔgɔn  ɲuman ye i fɛ, a ka ɲi i k’a tigi lɔn koɲuman fɔlɔ. Nka, a be se ka gwɛlɛya i ma k’o kɛ site web sababu fɛ. N’a sɔrɔ aw be ɲɔgɔn ka kunnafoniw ye ani aw be wagati caaman ta ka kumaɲɔgɔnya kɛ ɛntɛrɛnɛti kan. O bɛɛ n’a ta, yala i be se k’a fɔ tiɲɛn na ko i b’o tigi lɔn wa? Dɔw tun b’a miiri ko u ye u furuɲɔgɔn sɔrɔ. Nka tuma min na u labanna k’o tigi ye yɛrɛ yɛrɛ la, u kabakoyara k’a ye mɔgɔ sifa min lo.

Zaburu sɛbɛbaga Dawuda y’a sɛbɛ ko: “Ne te sigi ni namaramɔgɔw ye, n fana te to ni filankafɔw ye.” (Zab. 26:4). Mɔgɔ caaman b’a miiri ko koo jugu tɛ ka ngalon tigɛ u yɛrɛ koo la ɛntɛrɛnɛti kan walisa k’u koo diya mɔgɔw ye. U b’u sɔɔn yɛrɛ yɛrɛ dogo ɛntɛrɛnɛti kan wala n’u be u yɛrɛ kofɔra tɔɔw ye, u t’a to u ka jogo juguw ka ye. Hali ni dɔw b’a fɔ ko olu ye Jehova Seerew ye, yala u batizera tiɲɛn na wa? Yala kerecɛn kolɔnbagaw lo ani u be jɛnɲɔgɔnya ɲuman kɛra ni Jehova ye wa? Yala u ka kafodenw be bonya la u kan wa? Yala u be hakilintanyakow kɛ wala ‘tagamaɲɔgɔnjuguw’ lo wa? (1 Kor. 15:33; 2 Tim. 2:20, 21). Ka kɛɲɛ ni Bibulu ka sariyakolow ye, yala u labilanin lo furu kama wa? I ka ɲi k’o ɲiningaliw jaabiliw lɔn. Nka walisa k’u jaabiliw lɔn, fɔɔ i ka kuma ni Jehova Seere dɔw ye minw b’o tigi lɔn ka ɲɛ (Talenw 15:22). Tiɲɛn na, Jehova sagokɛla kantigi tɛna miiri yɛrɛ ka furu mɔgɔ dɔ ma min “ma la Krista la.”—2 Kor. 6:14; 1 Kor. 7:39.

Faratiw b’a la ka tɛmɛ site web fɛ ka furuɲɔgɔn ɲini. O kama, a ka fisa i ka tɛmɛ fɛɛrɛ wɛrɛw fɛ k’a ɲini ka mɔgɔ dɔ lɔn min be se ka kɛ i furuɲɔgɔn ye. I be se ka furuɲɔgɔn sɔrɔ yɔrɔ juman? Tuma min na lajɛnw be se ka kɛ, an be se ka tɛmɛ kafo ka lajɛnw, lajɛnbaw ani a ɲɔgɔnnaw fɛ ka tɔɔw lɔn.

Nka, n’an tɛ se ka ɲɔgɔn lajɛn i n’a fɔ COVID-19 tuma na, an be tɛmɛ telefɔni, tablɛti n’a ɲɔgɔnnaw fɛ ka kafo ka lajɛnw kɛ. I be se ka tɛmɛ o fɛɛrɛw fɛ ka Jehova Seere wɛrɛw lɔn minw furunin tɛ. I be se k’u lamɛn n’u be kalan dɔ kɛra kafo ka lajɛnw na wala n’u be lakalitaw kɛra (1 Tim. 6:11, 12). Lajɛnw bannin kɔ, i be se ka baro kɛ n’o balimaw ye fana vidéoconférence sababu fɛ. I be ɲɛbɔra mɔgɔ min fɛ, i be se k’a kɔrɔsi a tigi be tɔɔw minɛ cogo min na. I be se k’o kɔrɔsi n’aw be ɲɛnagwɛkow kɛra telefɔni n’a ɲɔgɔnnaw sababu fɛ. O be se k’i dɛmɛ k’a tigi sɔɔn lɔn (1 Piyɛri 3:4). N’i nana a tigi lɔn koɲuman, i bena a faamu n’aw ka laɲinitaw ye kelen ye ani n’a bena kɛ furuɲɔgɔn ɲuman ye i fɛ.

Kerecɛn minw ma furu, n’u be basigi Bibulu ka sariyakolow kan ka furuɲɔgɔn ɲini, u ka teli ka hɛɛrɛ sɔrɔ u ka furu kɔnɔ. O lo yirala Talenw 18:22 kɔnɔ ko: “Mɔgɔ min mana muso [ɲuman, NW] sɔrɔ [wala cɛɛ ɲuman sɔrɔ,] o tigi ye hɛrɛ sɔrɔ. O ye Masaba ka dɛmɛ ye a fɛ.”