1. Jehova ye mun lo kɛ i ye?

I KƐRA Jehova Seere dɔ ye cogo di? A fɔlɔ, i ye “kibaru diman” mɛn. N’a sɔrɔ i y’o mɛn i bangebagaw, i baarakɛɲɔgɔn, i ka lakɔli filankuru dɔ wala soo ni soo waajuli baara sababu fɛ (Mariki 13:10). O kɔ, mɔgɔ dɔ ye jijalibaw kɛ ani ka wagati caaman ta walisa ka bibulukalan kɛ n’i ye. O bibulukalan sen fɛ, i ye Jehova kanu ani i y’a faamu ko a b’i kanu. Jehova ye i dɛmɛ i ye tiɲɛn lɔn. Komi sisan i ye Yezu Krista ka kalanden dɔ ye, i be ni ɲɛnamaya banbali jigiya ye (Zan 6:44). Jehova tɛmɛna mɔgɔ dɔ fɛ k’i kalan tiɲɛn koo la ani a sɔnna i ka kɛ ale sagokɛla dɔ ye. Siga t’a la, i b’a waleɲuman lɔn kosɔbɛ o kosɔn!

2. An bena mun lo lajɛ barokun nin na?

² Komi an be tiɲɛn lɔn sisan, nɛɛma dira an ma ka tɔɔw dɛmɛ u ka na fara an kan ɲɛnamaya sira kan. N’a sɔrɔ a ka nɔgɔ an ma ka waajuli kɛ soo ni soo. Nka, a be se ka gwɛlɛya an ma ka bibulukalan kɛ ni mɔgɔw ye. Yala o ka gwɛlɛ e ma wa? N’o lo, n’a sɔrɔ barokun nin ka ladili dɔw bena i dɛmɛ. An bena a ye fɛɛn min b’an lasun ka mɔgɔw dɛmɛ u ka kɛ Krista ka kalandenw ye. Gwɛlɛya dɔw b’a to an be sigasiga ka bibulukalan kɛ ni mɔgɔw ye. An bena a ye fana an be se ka see sɔrɔ o gwɛlɛyaw kan cogo min na. An k’a filɛ fɔlɔ fɛɛn min kama an ka ɲi ka waajuli kɛ ani ka mɔgɔw kalan fana.

3. Mun na an be waajuli kɛ?

³ Tuma min na Yezu tun be dugukolo kan, a ye baara dɔ kalifa a ka kalandenw ma. Koo fila lo ka ɲi ka kɛ o baara la.  A fɔlɔ, Yezu y’a fɔ ko u ka Ala ka Masaya kibaro diiman fɔ ani a y’a yira u ka ɲi k’o kɛ cogo min na (Mat. 10:7; Luka 8:1). Misali la, a y’a fɔ u ka ɲi ka min kɛ ni dɔw sɔnna ka Masaya kibaro lamɛn ani u ka ɲi ka min kɛ ni dɔ banna ka lamɛnni kɛ (Luka 9:2-5). A y’a fɔ fana ko “kibaru diman bena fɔ diɲɛ yɔrɔ bɛɛ la.” O kɔrɔ ko a ka kalandenw tun bena mɔgɔ caaman waaju ani u tun bena o kɛ yɔrɔ caaman na (Mat. 24:14; Kɛw. 1:8). Mɔgɔw sɔnna k’u lamɛn wo, u ma sɔn wo, Yezu ko a ka kalandenw ka ɲi ka Ala ka Masaya kofɔ mɔgɔw ye ani k’a yira o Masaya bena min kɛ.

4. Ka kɛɲɛ ni Matiyo 28:18-20 ka fɔta ye, an ka ɲi ka mun lo kɛ ka fara Masaya kibaro waajuli kan?

⁴ Yezu ko a ka kalandenw ka koo filanan juman lo kɛ? A ko u ka mɔgɔw kalan u k’ale ka cikanw bɛɛ labato. Nka, i ko dɔw b’a miiri cogo min na, yala kalandenw tun ka ɲi ka waajuli kɛ ani ka mɔgɔw kalan saan kɛmɛkulu fɔlɔ dɔrɔn lo la wa? Ayi. Yezu y’a yira k’o baara kɔrɔtaninba tun bena kɛ fɔɔ ka na se an ka wagati ma ani “fɔɔ ka taga diɲɛ wili.” (Matiyo 28:18-20 kalan). A be komi Yezu y’o cii di tuma min na a y’a yɛrɛ yira a ka kalandenw mɔgɔ 500 ni kɔ la (1 Kor. 15:6). Yezu lo ye Zan ɲɛminɛ a ye Yirali ka kitabu sɛbɛ. A y’a yira ka gwɛ o kitabu kɔnɔ ko ale b’a fɛ a ka kalandenw bɛɛ ka tɔɔw dɛmɛ u ka Jehova lɔn.—Yir. 22:17.

5. Ka waajuli kɛ ani ka mɔgɔw kalan, jɛɛn min b’o ni ɲɔgɔn cɛ, Pol y’o yira ɲɛyirali juman lo fɛ 1 Korɛntikaw 3:6-9 kɔnɔ?

⁵ Ciden Pol ko ka mɔgɔw dɛmɛ u ka kɛ Krista ka kalandenw ye, o ni sɛnɛ bɛɛ ye kelen ye. A ko an man ɲi ka dan tutuli dɔrɔn ma. A y’a fɔ Korɛntikaw ye ko: “Ne ye tutuli kɛ, Apolɔsi y’o sɔn jii la, . . . aw ye Ala ka foro” ye (1 Korɛntikaw 3:6-9 kalan). An ye baarakɛlaw ye “Ala ka foro” kɔnɔ. O kama, an be tutuli kɛ n’an be waajuli kɛ ani an b’a sɔn jii la n’an be mɔgɔw kalan (Zan 4:35). Nka, an b’a lɔn ko Ala lo b’a kɛ sumanw be falen ka bonya. O kɔrɔ, ale lo be mɔgɔw dɛmɛ u k’ale lɔn.

6. N’an be mɔgɔw kalanna an ka ɲi k’u dɛmɛ u ka mun lo kɛ?

⁶ Minw “labɛnnin lo ka sɔn ɲɛnamaya banbali ma,” an b’olu lo yɔrɔ ɲini (Kɛw. 13:48, NW ). Walisa u ka kɛ Krista ka kalandenw ye, u be koo minw kalanna Bibulu kɔnɔ, an ka ɲi k’u dɛmɛ 1) k’o faamu, 2) ka sɔn o ma ani 3) k’o sira tagama (Zan 17:3; Kɔlɔs. 2:6, 7; 1 Tes. 2:13). Kafo kɔnɔ, bɛɛ be se ka Bibulu kalandenw dɛmɛ u kɛtɔ k’a yira u la ko u be u kanu ani k’u bisimila koɲuman lajɛnw na (Zan 13:35). Bibulu kalanfa fana ka ɲi k’a jija ani ka wagati caaman ta walisa ka kalanden dɛmɛ a ka ngalon lannakow ni delinanko juguw dabila (2 Kor. 10:4, 5). Walisa ka kalanden dɛmɛ a k’o yɛlɛmaniw kɛ ani ka batɛmu saratiw dafa, o be se ka kalo caaman ta. Nka, nafaba b’a la k’o kɛ.

7. Mun na an be waajuli kɛ ani an be mɔgɔw kalan?

⁷ Mun na an be waajuli kɛ ani an be mɔgɔw kalan? A fɔlɔ, an b’o kɛ sabu an be Jehova kanu. Cii dira an ma ko an ka waajuli kɛ ani ka mɔgɔw dɛmɛ u ka kɛ Krista ka kalandenw ye. N’i be i seko bɛɛ kɛ k’o cikan labato, o b’a yira ko i be Ala kanu (1 Zan 5:3). Miiri nin na: Jehova kanuya y’i lasun i be waajuli kɛ soo ni soow la. N’a sɔrɔ a tun man nɔgɔ i ma k’o cikan labato. I siɲɛ fɔlɔ ka bɔ waajuli la, yala i tun sirannin lo wa? Siga t’a la, i tun sirannin  lo! Nka, i tun b’a lɔn ko Yezu b’a fɛ i k’o baara kɛ ani i y’a ka cikan labato. Wagati damanin o kɔ, n’a sɔrɔ a nɔgɔyara i ma ka waajuli kɛ. Nka sisan, ka bibulukalan kɛ ni mɔgɔ dɔ ye, i be mun lo miiri o koo la? Yala o miiriya dama be siranya bila i la wa? N’a sɔrɔ o be siranya bila i la. Nka, Jehova deli a k’i dɛmɛ i ka see sɔrɔ o siranya kan ani a k’i jaa gwɛlɛya i ka se ka bibulukalan kofɔ mɔgɔ dɔ ye. N’i y’o kɛ, Jehova bena bibulukalan nege don i la ani i bena a ɲini ka mɔgɔw kɛ Yezu ka kalandenw ye.

8. Ka kɛɲɛ ni Mariki 6:34 ye, mun lo b’an lasun fana ka mɔgɔw kalan?

⁸ A filanan, an b’an mɔgɔɲɔgɔnw kanu minkɛ, o b’an lasun k’u kalan tiɲɛn koo la. Loon dɔ, Yezu n’a ka kalandenw tun sɛgɛnninba lo sabu u tun ye wagati caaman kɛ waajuli la. U tagara yɔrɔ dɔ ɲini walisa ka lafiɲɛ. Nka, jamaba dɔ kɔnna u ɲɛ yen. O jamaba hinɛ ye Yezu minɛ ani a y’a daminɛ k’u kalan “fɛɛn caaman na.” (Mariki 6:34 kalan). Yezu y’a jija kosɔbɛ baara la hali k’a sɔrɔ a tun sɛgɛnnin lo. Mun na do? Sabu a y’a yɛrɛ bila o mɔgɔw nɔɔ na. A y’a ye ko tɔɔrɔ be u kan kosɔbɛ ani ko u mako be jigiya la yɛrɛ le! O kama, a tun b’a fɛ k’u dɛmɛ. Bi fana, a be komi mɔgɔw ninsɔn ka di ani u wasanin lo. Nka, gwɛlɛyaw b’u kan ani u mako be jigiya la. U be komi saga tununinw ani dɛndɛbaga tɛ u la. Ciden Pol ko jigi layɔrɔ tɛ o ɲɔgɔnna mɔgɔw la ani u tɛ Ala lɔn (Efɛz. 2:12). U be sira min kan, o be taga n’u ye “halakiyɔrɔ la”! (Mat. 7:13). An ka kiinmɔgɔw mako b’a la kosɔbɛ ka Ala lɔn. N’an miirila o la, kanuya ni hinɛ b’an lasun k’u dɛmɛ. An be se k’u dɛmɛ cogo fisaman min na, o ye k’a ɲini ka bibulukalan kɛ n’u ye.

9. Ka kɛɲɛ ni Filipikaw 2:13 ye, Jehova be se k’i dɛmɛ cogo di?

⁹ An mako be wagati caaman na walisa ka bibulukalan labɛn ani k’a kɛ. N’a sɔrɔ o lo kama i be sigasigara ka bibulukalan kɛ ni mɔgɔ ye. N’o lo, i dusukunnakow fɔ Jehova ye. A ɲini a fɛ a k’i dɛmɛ walisa a nege ka kɛ i la ka bibulukalan kɛ ni mɔgɔ dɔ ye (Filipikaw 2:13 kalan). Ciden Zan y’a fɔ ko delili minw bɛnnin lo Ala sago ma, a b’olu jaabi (1 Zan 5:14, 15). O la, la a la ko Jehova bena i dɛmɛ walisa a nege ka kɛ i la ka bibulukalan kɛ ni mɔgɔ dɔ ye.

10-11. Mun lo be se k’a to an be sigasiga ka bibulukalan kɛ ni mɔgɔ ye?

¹⁰ An b’a lɔn ko a kɔrɔtanin lo kosɔbɛ an ka mɔgɔw kalan. Nka, a be se ka gwɛlɛya an ma ka caaman kɛ o baara la i ko an b’a fɛ cogo min na. An k’o gwɛlɛya dɔw lajɛ ani k’a filɛ cogo min na an be se ka see sɔrɔ u kan.

¹¹ An ka koow cogoya be se k’a to an tɛ se ka caaman kɛ. Misali la, balima dɔw kɔrɔla wala u man kɛnɛ. Yala o koo ɲɔgɔn lo b’i kan wa? N’o lo, COVID-19 fɔɲɔbana y’an dɛmɛ ka koo minw faamu, an k’u dɔ lajɛ. An y’a faamu ko an be se ka bibulukalanw kɛ telefɔni, tablɛti n’a ɲɔgɔnnaw sababu fɛ! O cogo la, i be se ka bibulukalan daminɛ ni mɔgɔ dɔ ye ani k’a kɛ k’i to i ka soo. O ka nɔgɔ i ma sabu i be i ka soo. Nafa wɛrɛ be yen. A tun bena diya dɔw ye ka bibulukalan kɛ. Nka, u tɛ sɔrɔ u ka soo tuma min na balimaw ka teli ka waajuli kɛ. O mɔgɔw labilanin lo sɔgɔma joona wala sufɛ. Yala i be se ka bibulukalan kɛ ni mɔgɔ dɔ ye o wagatiw la wa? Yezu ye Nikodɛmu kalan sufɛ, sabu o wagati lo tun bɛnnin lo Nikodɛmu ma.—Zan 3:1, 2.

12. Koo jumanw lo b’a to an lanin b’a la ko an be se ka kɛ kalanfa ɲuman ye?

 ¹² N’a sɔrɔ an b’a miiri ko an tɛ se ka bibulukalan kɛ ni mɔgɔ ye. N’a sɔrɔ an b’a jati ko an ka ɲi ka koo caaman lɔn wala ka kɛ kalanfa ɲuman ye ka sɔrɔ ka bibulukalan kɛ ni mɔgɔ ye. Ele fana b’o lo miiri wa? N’o lo, an ka koo saba lajɛ minw bena a to i be la a la ko i be se ka bibulukalan kɛ ni mɔgɔ ye. A fɔlɔ, Jehova b’a jati ko i be se ka mɔgɔw kalan (2 Kor. 3:5). A filanan, Yezu lo ko i ka mɔgɔw kalan. An do b’a lɔn ko “sebagaya bɛɛ” dira ale lo ma “sankolo la ani dugukolo kan.” (Mat. 28:18). A sabanan, i be se k’a ɲini balima tɔɔw fɛ, u k’i dɛmɛ. Yezu Faa y’a kalan koo minw na, a y’a ka kumaw basigi o lo kan. Ele fana be se k’o ɲɔgɔn kɛ (Zan 8:28; 12:49). Ka fara o kan, i be se k’a ɲini i ka waajuli jɛnkulu kɔrɔsibaga, piyɔniye setigi dɔ wala weleweledala kolɔnbaga dɔ fɛ a k’i dɛmɛ ka bibulukalan dɔ daminɛ ani k’a kɛ. Koo minw be se k’i dɛmɛ bɛrɛbɛrɛ ka kɛ kalanfa ɲuman ye, u dɔ ye k’o balimaw dɔ bila sira ka taga bibulukalan kɛ.

13. Mun na an ka ɲi ka sɔn ka mɔgɔw kalan cogo wɛrɛw la?

¹³ N’a sɔrɔ a ka gwɛlɛ an ma ka tɛmɛ kalan kɛcogow ani baarakɛminan kuraw fɛ ka mɔgɔw kalan. An ka bibulukalanw kɛcogo yɛlɛmana sisan. An ka kalankɛ gafe jɔnjɔn ye Ɲɛnamaya kɛ hɛɛrɛ la fɔɔ abada! lo ye. Walisa ka dɔ ka bibulukalan kɛ n’o gafe ye, an ka ɲi k’an yɛrɛ labɛn koɲuman ani k’o kalan kɛ cogo wɛrɛ la. An be dakun damanin lo kalan ani kalan fanba ye baro lo ye ni kalanden ye. Kalan tuma na, an be baara kɛ ni videwo caaman ani fɛɛrɛ wɛrɛw ye i n’a fɔ JW Library^®. N’i tɛ se baara kɛcogo la n’o fɛɛrɛw ye, a ɲini mɔgɔ dɔ fɛ a k’i degi u la. Delinanko bila man di. O lo kama a ka gwɛlɛ an ma k’an yɛrɛ degi kokɛcogo kuraw la. Nka, Jehova ni balima tɔɔw ka dɛmɛ sababu la, a bena nɔgɔya i ma k’i yɛrɛ degi kalan kɛcogo kura la. A yɛrɛ bena diya i ye ka kalan kɛ ni mɔgɔw ye. Piyɔniye dɔ ka fɔta la, o kalan kɛcogo kura be “kalanden ni kalanfa ninsɔn diya.”

14. N’an be waajuli kɛra yɔrɔ min na mɔgɔw tɛ sɔn ka lamɛnni kɛ, an ka ɲi ka mun lo to an hakili la? An be jijali kuma juman lo sɔrɔ 1 Korɛntikaw 3:6, 7 kɔnɔ?

¹⁴ N’a sɔrɔ an be waajuli kɛra yɔrɔ min na a ka gwɛlɛ ka bibulukalanw daminɛ. Mɔgɔ dɔw tɛ sɔn k’an lamɛn wala u yɛrɛ b’an kɛlɛ. N’an ka kiinmɔgɔw b’o cogo la, mun lo be se k’an dɛmɛ an ka to ka koow filɛ ni ɲɛɛ ɲuman ye? An k’a to an hakili la ko duniɲa ɲagaminin nin kɔnɔ, mɔgɔw ka koow be se ka bari ka yɛlɛma. Mɔgɔ minw tun tɛ sɔn k’an lamɛn, kɔfɛ olu be se k’a faamu k’u mako be Ala la (Mat. 5:3). Wagati dɔ la mɔgɔ dɔw tun tɛ sɔn an ka sɛbɛw la. Nka kɔfɛ, u sɔnna bibulukalan na. An b’a lɔn fana ko Jehova lo ye Forotigi ye (Mat. 9:38). A b’a fɛ an ka to ka tutuli kɛ ani ka jii kɛ u la. Nka, ale yɛrɛ lo bena a kɛ u be bonya (1 Kor. 3:6, 7). An be sɛbɛ hakɛ min di mɔgɔw ma wala an be bibulukalan kɛ ni mɔgɔ hakɛ min ye, Jehova t’an duga o lo kosɔn. Nka, an be jijali minw kɛra a ka baara la, a b’an duga o lo kosɔn. N’an b’o to an hakili la, o b’an jija yɛrɛ le! *

15. Ni mɔgɔ dɔ sɔnna bibulukalan na ani a be min kalanna, a b’o sira tagama, o be mun lo kɛ Jehova la?

¹⁵ Ni mɔgɔ dɔ sɔnna Bibulu ka tiɲɛn kalanw na ani a be min kalanna a b’o kofɔ tɔɔw ye, o be Jehova dusu diya (Talenw 23:15, 16). An be baara min kɛra bi, Jehova mana o ye, miiri k’a filɛ o b’a dusu diya cogo min na! Misali la, saan 2020 kɔnɔ, an ye bibulukalan kɛ ni mɔgɔ 7 705 765 ye fɔɲɔbana bɛɛ n’a ta. O y’a to an sera ka mɔgɔ 241 994 dɛmɛ u ye u yɛrɛkun di Jehova ma ani ka batize. O balima kuraw fana bena bibulukalanw kɛ ani ka mɔgɔ caaman wɛrɛw dɛmɛ u ka kɛ Krista ka kalandenw ye (Luka 6:40). Siga t’a la, n’an be mɔgɔw kalan walisa u ka kɛ Krista ka kalandenw ye, an be Jehova dusu diya yɛrɛ le!

16. A ka ɲi an ka laɲinita juman lo latigɛ?

¹⁶ Ka mɔgɔw kalan u ka kɛ Krista ka kalandenw ye, o man nɔgɔ. Nka, Jehova ka dɛmɛ barika la, an be se ka dɔ kɛ dɔ ye walisa ka mɔgɔ kuraw kalan u k’an sankolola Faa kanu. Yala an be se k’a latigɛ ka bibulukalan kɛ ni mɔgɔ kelen ɲɔgɔn ye wa? An be mɔgɔ minw kunbɛn, an ka tɛmɛ sababu ɲumanw bɛɛ fɛ ka bibulukalan kofɔ u ye. N’an b’o kɛ, min bena sɔrɔ o la, o be se ka bari an na. An ka la a la ko Jehova bena an duga an ka jijaliw kosɔn.

17. N’an sera ka bibulukalan kɛ ni mɔgɔ dɔ ye, o bena mun lo kɛ an na?

¹⁷ Nɛɛmaba lo an fɛ ka waajuli kɛ ani ka mɔgɔw kalan tiɲɛn koo la! O baara b’an ninsɔn diya yɛrɛ le! Ciden Pol ye Tesalonika caaman dɛmɛ u kɛra Krista ka kalandenw ye. O koo ye min kɛ a la, a y’o lakali ko: “N’an Matigi Yezu segira ka na tuma min na, an jigi be jɔn le kan, an bena nisɔndiya jɔn le kosɔn, jɔn le bena kɛ an ka sesɔrɔjala ye an bena an yɛrɛ boɲa min kosɔn, aw tɛ wa? Tiɲɛ na, an b’an yɛrɛ boɲa ani ka nisɔndiya aw le kosɔn.” (1 Tes. 2:19, 20; Kɛw. 17:1-4). Bi mɔgɔ caaman be n’o miiriya ɲɔgɔn ye. Balimamuso Stéphanie n’a cɛɛ ye mɔgɔ caaman dɛmɛ u ye ɲɛtaga kɛ ka batize. A ko: “Ka mɔgɔ dɔ dɛmɛ a k’a yɛrɛkun di Jehova ma, foyi tɛ mɔgɔ ninsɔn diya ka se o ma.”