1. Nɛɛma min dira an ma ka Jehova deli, an ka ɲi k’o jati cogo di?

 SANKOLO ni dugukolo Danbaga ye nɛɛmaba dɔ kɛ an ye! O ye ko an be se k’an magwɛrɛ a la delili la. Miiri k’a filɛ, an be se k’an dusukunnakow bɛɛ fɔ Jehova ye. An be se k’a deli tuma o tuma ani an be se k’o kɛ kaan min k’an diya. A labilanin lo tuma bɛɛ k’an lamɛn. An be se k’a deli k’an lanin to dɔgɔtɔrɔso wala k’an to kasobon na, ani an lanin b’a la ko an Faa kanutigi bena an lamɛn. An b’a waleɲuman lɔn kosɔbɛ o nɛɛmaba kosɔn!

2. Masacɛ Dawuda y’a yira cogo di ko a be delili jati nɛɛmaba ye?

² Masacɛ Dawuda tun be delili jati nɛɛmaba ye. A y’a fɔ dɔnkili la Jehova ye ko: “A to ne ka daalili ka se i ma, i ko wusulan.” (Zab. 141:1, 2). Dawuda ka wagati la, sarakalasebagaw tun be wusulan senuman min jɛni tiɲɛn batoli kama, u tun b’o dilan koɲuman (Ɛkiz. 30:34, 35). Dawuda kɛtɔ ka kuma wusulan koo la, a tun b’a fɔra le ko a tun be min fɔ a sankolola Faa ye delili la, a tun b’a jija ka miiri o la koɲuman fɔlɔ. An fana b’a fɛ sɔbɛ la k’o lo kɛ. An b’a fɛ an ka deliliw ka diya Jehova ye.

3. An ka ɲi k’an magwɛrɛ Jehova la delili la cogo di ani mun na?

³ N’an be Jehova delila, an man ɲi k’o kɛ i n’a fɔ an be kumana n’an filankuru dɔ lo ye. Nka, an ka ɲi k’o kɛ ni bonyaba ye. Ezayi, Ezekiyɛli, Daniyɛli ani Zan ye yelifɛn kabakoman minw ye, miiri o la. Tiɲɛn lo k’o yelifɛnw tɛ kelen ye, nka u bɔnin be ɲɔgɔn ma koo dɔ la. U bɛɛ y’a yira ko Jehova ye Masaba nɔɔrɔman ye. Ezayi ye Jehova “siginin ye masasigilan dɔ kan min tun ka jan  kosɔbɛ.” (Ezayi 6:1-3). Ezekiyɛli ye Jehova siginin ye fana a ka wotoro kɔnɔ sankolo la ani “yeelen tun be yen k’a lamini. O yeelen nin tun be i n’a fɔ sanmuru.” (Ezek. 1:26-28). Daniyɛli ye “Cɛkɔrɔba” dɔ ye, a kannafaninw tun gwɛnin lo parapara ani tasuma tun be bɔra a ka masasigilan yɔrɔ la (Dan. 7:9, 10). Zan ye Jehova siginin ye masasigilan kan. Sanmuru tun ye o masasigilan lamini ani a bɔnin tun be dakamana kabakuru binkɛnɛman dɔ fɛ (Yir. 4:2-4). Jehova ye Ala nɔɔrɔman yɛrɛ lo ye! N’an miirila o la, o b’an hakili jigi ko nɛɛmaba lo an fɛ k’an magwɛrɛ a la delili la ani ko a kɔrɔtanin lo an k’o kɛ ni bonyaba ye. Nka, an ka ɲi ka delili kɛ mun lo koo la?

4. Yezu ka delili modɛli min be sɔrɔ Matiyo 6:9, 10 kɔnɔ, a y’o daminɛ cogo min na, an be kalan juman lo sɔrɔ o la?

⁴ Matiyo 6:9, 10 kalan. Yezu ye kalan min kɛ kulu kan, o kalan na, a y’a yira a ka kalandenw na u ka ɲi ka delili kɛ cogo min na walisa Ala ka sɔn u ka deliliw la. A y’a fɔ u ye ko: “Aw ka kan ka Ala daali cogo min na, o filɛ.” O kɔ, a y’o delili daminɛ ni koo kɔrɔtaninba dɔw ye, minw ɲɛsinna Jehova sagonata ma. A ko Jehova tɔgɔ ka saniya ani ko a ka Masaya ka na. O Masaya lo bena Ala juguw bɛɛ halaki. Ala bena duga minw lase Adamadenw ma dugukolo kan, Yezu y’o fana kofɔ. N’an be delili kɛ o fɛɛnw koo la, an b’a yira ko Ala sagonata kɔrɔtanin lo an fɛ.

5. Yala a bɛnnin lo an ka delili kɛ an yɛrɛ koo la wa? A ɲɛfɔ.

⁵ Yezu ka delili yɔrɔ filanan na, a y’a yira ko a bɛnnin lo an ka delili kɛ an yɛrɛ koo la. An be se ka Jehova deli a k’an ka loon o loon balo di an ma, a k’an ka jurumuw yafa, a k’an tanga kɔrɔbɔli ma ani a k’an kisi Sutana ma (Mat. 6:11-13). N’an b’o fɛɛnw deli Jehova fɛ, an b’a yira ko an jigi bɛɛ lanin b’ale lo kan ani ko an b’a fɛ k’an koo diya a ye.

6. Fɛɛn minw kofɔra delili modɛli la, an ka ɲi ka dan olu dɔrɔn lo ma wa? A ɲɛfɔ.

⁶ Min fɔra delili modɛli la, Yezu tun  t’a fɛ a ka kalandenw k’o lo fɔ tigitigi. Delili wɛrɛw la, Yezu kumana fɛɛn wɛrɛw koo la minw tun kɔrɔtanin lo a fɛ o wagati la (Mat. 26:39, 42; Zan 17:1-26). O cogo kelen na, koo o koo be hami bila an na, an be se ka delili kɛ o koo la. N’an ka ɲi ka desizɔn dɔ ta, an be se ka hakilitigiya deli Jehova fɛ ani k’a ɲini a fɛ a k’an dɛmɛ ka koow faamu (Zab. 119:33, 34). N’an ka ɲi ka baara gwɛlɛ dɔ kɛ, an be se ka Jehova deli a k’an dɛmɛ k’a lɔn an ka ɲi k’o kɛ cogo min na (Talenw 2:6). Bangebagaw be se ka delili kɛ u deenw ye, deenw be se ka delili kɛ u bangebagaw ye ani an bɛɛ ka ɲi ka delili kɛ an ka Bibulu kalandenw ni kiinmɔgɔw ye. Nka, an man ɲi ka to ka fɛɛnw dama lo deli Jehova fɛ.

7. Mun na an ka ɲi ka Jehova tando an ka deliliw la?

⁷ An man ɲi ka ɲinɛ ka Jehova tando an ka deliliw la. Mɔgɔ si man kan ni tandoli ye ka se an ka Ala ma sabu a “ka ɲi,” ani a “be yafa.” ‘A be makari, a be hinɛ. A te dimi joona, a ka ɲumanya ka bon, a ye kantigi ye fana.’ (Zab. 86:5, 15). Siga t’a la, kuun bɛrɛ b’an fɛ ka Jehova tando a ka jogow n’a ka kɛtaw kosɔn.

8. An be se ka Jehova fo fɛɛn minw kosɔn, u dɔw ye jumanw ye? (Zaburuw 104:12-15, 24).

⁸ Ka fara tandoli kan, an be se ka Jehova fo an ka deliliw la sabu a be fɛɛn ɲuman caaman di an ma. Misali la, filɛruw be ni kulɛri cɛɲumaninw ye, dumuni diiman sifa caaman be yen ani a ka di an ye ka kɛ ni teri sɔbɛw ye. An be se ka Jehova fo o bɛɛ kosɔn. An Faa kanutigi b’o fɛɛnw ani fɛɛn caaman wɛrɛw di an ma walisa an ninsɔn ka diya (Zaburuw 104:12-15, 24 kalan). Min yɛrɛ kɔrɔtanin lo kosɔbɛ, o ye ko an be Jehova fo sabu a be dumuni caaman di an ma Alako ta fan fɛ ani a be jigiya ɲuman di an ma siniɲasigi koo la.

9. Mun lo be se k’an dɛmɛ an kana ɲinɛ ka Jehova fo? (1 Tesalonikaw 5:17, 18).

⁹ Jehova ye koo minw bɛɛ kɛ an ye, an ka teli ka ɲinɛ k’a fo o kosɔn. Mun lo be se k’i dɛmɛ i kana ɲinɛ k’o kɛ?  I ye fɛɛn tigitigi minw deli Jehova fɛ, u sɛbɛ ka bila ani a lajɛ tuma o tuma k’a filɛ Jehova y’i jaabi cogo min na u koo la. O kɔ, a fo delili la a ka dɛmɛ kosɔn (1 Tesalonikaw 5:17, 18 kalan). N’i tɔɔw b’a yira ko u b’an waleɲuman lɔn, o b’an ninsɔndiya ani an b’a ye ko u b’an kanu, tiɲɛn tɛ? O cogo kelen na, n’an hakili tora a la ka Jehova fo sabu a y’an ka deliliw jaabi, o b’a dusu diya yɛrɛ le! (Kɔlɔs. 3:15). An be se k’an ka Ala fo koo wɛrɛ juman lo kosɔn min kɔrɔtanin lo kosɔbɛ?

10. Ka kɛɲɛ ni 1 Piyɛri 2:21 ye, Jehova y’a Dencɛ ci dugukolo kan minkɛ, mun na an ka ɲi k’a fo o kosɔn?

¹⁰ Vɛrise nin kalan: 1 Piyɛri 2:21. An ka ɲi ka Jehova fo sabu a y’a Dencɛ kanulen ci a nana an kalan. N’an be Yezu ka maana lajɛ, an bena fɛɛn caaman lɔn Jehova koo la ani an bena a faamu an be se k’a dusu diya cogo min na. N’an limaniyanin lo Krista ka kunmabɔsara koo la, an be se ka teriya kɛ ni Jehova Ala ye ani ka to hɛɛrɛ la n’a ye.—Ɔrɔm. 5:1.

11. Mun na an be delili kɛ Yezu tɔgɔ la?

¹¹ An be Jehova fo sabu an be se k’a deli a Dencɛ tɔgɔ la. Jehova be tɛmɛ Yezu lo fɛ k’an ka deliliw jaabi. N’an be delili kɛ Yezu tɔgɔ la, Jehova b’an lamɛn ani a b’an jaabi. Yezu y’o ɲɛfɔ ko: “Aw mana fɛɛn o fɛɛn daali ne tɔgɔ la, ne bena o kɛ, janko ka boɲa la Faa kan, a Dencɛ barika la.”—Zan 14:13, 14.

12. Kuun wɛrɛ juman lo kama an be Jehova fo a Dencɛ kosɔn?

¹² Jehova be tɛmɛ Yezu ka kunmabɔ saraka lo fɛ k’an ka jurumuw yafa. Bibulu b’a fɔ Yezu koo la ko a ye an ka “sarakalasebagaw kuntigiba” lo ye ani ko a “tagara sigi Setigi Ala kinibolo la sankolo la.” (Eburuw 8:1). “Soronanikɛla [wala dɛmɛbaga] b’an fɛ Faa Ala kɔrɔ n’o ye Yezu Krista ye.” (1 Zan 2:1). Yezu ye sarakalasebagaw Kuntigiba ye min b’an ka barikatanyaw faamu ani a be “Ala daali an ye.” An be Jehova waleɲuman lɔn kosɔbɛ sabu a ye o sarakalasebaga ɲɔgɔn di an ma! (Ɔrɔm. 8:34; Eburuw 4:15). An ye mɔgɔ dafabaliw ye. O la, ni Yezu ka kunmabɔ saraka kama tun tɛ, an tun tɛna se k’an magwɛrɛ Jehova la delili la. Siga t’a la, an tɛ se ka Jehova fo ka ban sabu a ye nilifɛn nafamanba di an ma, o min ye a Dencɛ kanulen ye!

13. Yezu ka suu laban na dugukolo kan, a y’a yira cogo di ko a b’a ka kalandenw kanu?

¹³ Yezu ka suu laban na, a ye delili kɛ a ka kalandenw ye ka mɛɛn. A y’a Faa deli ko a k’u “tanga juguman ma.” (Zan 17:15). O b’a yira ko Yezu tun b’a ka kalandenw kanu yɛrɛ le! A tun b’a lɔn ko yanni dɔɔni, a tun bena tɔɔrɔ kosɔbɛ. O bɛɛ n’a ta, a tun be hamina a ka cidenw koo la.

14. An be se k’a yira cogo di ko an b’an balimaw kanu?

¹⁴ I ko Yezu, an kana to ka miiri an yɛrɛ dɔrɔn koo la. Nka, an ka to ka delili kɛ an balimaw ye tuma o tuma. N’an b’o kɛ, an b’a yira ko an be ɲɔgɔn kanu i ko Yezu y’a ɲini an fɛ cogo min na. An b’a yira Jehova la fana ko an b’an balimaw kanu kosɔbɛ (Zan 13:34). N’an be delili kɛ u ye, an t’an ka wagati tiɲɛna le. Bibulu b’a fɔ ko: “Barika be mɔgɔtilennin ka daalili la kosɔbɛ.”—Zaki 5:16.

15. Mun na an balimaw mako b’a la an ka delili kɛ u ye?

 ¹⁵ An balimaw mako b’a la an ka delili kɛ u ye sabu gwɛlɛya caaman b’u kan. An be se ka Jehova deli a k’u dɛmɛ walisa u ka koo nunu muɲu: bana, balawow, marifakɛlɛ, kɔrɔbɔliw wala gwɛlɛya wɛrɛw. An balima minw b’u yɛrɛ di k’u kerecɛnɲɔgɔnw dɛmɛ gwɛlɛya wagati la, an be se ka Jehova deli fana olu ye. N’a sɔrɔ i be balima dɔw lɔn o gwɛlɛyaw ɲɔgɔn be minw kan. N’o lo, i be se ka delili kɛ u ye i kɛtɔ k’u kelen kelen bɛɛ tɔgɔ fɔ i ka delili la. N’an be Jehova deli a k’u dɛmɛ u k’u ka gwɛlɛyaw muɲu, an b’a yira ko an b’u kanu sɔbɛ la.

16. An balima minw b’an ɲɛminɛ, mun na an ka ɲi ka delili kɛ u ye?

¹⁶ N’an be delili kɛ an ɲɛminɛbagaw ye, o ka di u ye kosɔbɛ, ani o deliliw be u nafa. Ciden Pol tun b’a lɔn ko a mako b’a la tɔɔw ka delili kɛ a ye. O kama, a y’a sɛbɛ ko: “Aw ka Ala daali ne fana ye, waasa ni ne b’a fɛ ka kibaru diman fɔ tuma min na, ne ka se ka jagwɛlɛya sɔrɔ k’a fɔ ka gwɛ.” (Efɛz. 6:19). Bi fana, an ɲɛminɛbaga caaman be baara gwɛlɛw kɛra. N’an be Jehova deli a k’u duga u ka baara la, an b’a yira ko an b’u kanu.

17-18. Koo jumanw lo sen fɛ u be se k’a ɲini an fɛ an ka delili kɛ dɔw tɔgɔ la ani an ka ɲi ka mun lo to an hakili la?

¹⁷ Tuma dɔw la, u b’a ɲini an fɛ an ka delili kɛ mɔgɔ dɔw tɔgɔ la. Misali la, ni balimamuso dɔ y’a ɲini balimamuso wɛrɛ fɛ a k’a bila sira bibulukalan dɔ la, a be se k’a ɲini o balimamuso fɛ a ka delili kɛ. A be se ka kɛ ko o balimamuso tɛ kalanden lɔn ka ɲɛ. O kama, n’a sɔrɔ a bena diya a ye ka delili laban lo kɛ. O cogo la, a bena a lɔn a ka ɲi ka min fɔ kalanden koo la.

¹⁸ U be se k’a ɲini balimacɛ dɔ fɛ a ka delili kɛ waajuli baara lajɛn wala kafo ka lajɛn dɔ la. N’o lo, a ka ɲi k’a to a hakili la o lajɛn be kɛra kuun min kama. Mɔgɔ man ɲi ka tɛmɛ delili fɛ ka kafodenw ladi wala ka kunnafoniw di u ma. Kafo ka lajɛnw fanba la, miniti duuru lo latigɛra dɔnkili ani delili kama. O la, a ɲinina  balimacɛ min fɛ ko a ka delili kɛ, ale man ɲi ka “kuma caaman,” sanko ni lajɛn daminɛ lo.—Mat. 6:7.

19. Mun lo bena an dɛmɛ an labɛnnin ka to Jehova ka kitilon kama?

¹⁹ Jehova ka kitilon surunyana minkɛ, a kɔrɔtanin lo kosɔbɛ an ka delili kɛ an ɲɛnako fɔlɔ ye. O lo kama Yezu y’a fɔ ko: “Aw ye jija ka Ala daali tuma bɛɛ, ka kɛ mɔgɔ timinadiyaninw ye, waasa aw ka se ka kisi o koo nataw bɛɛ ma.” (Luka 21:36). Tiɲɛn na, n’an be to ka delili kɛ tuma o tuma, o bena an dɛmɛ an ka to ɲɛɛ na Alako ta fan fɛ. O la, Ala ka kitilon tɛna bari an na.

20. An ka ɲi ka mun lo kɛ walisa an ka deliliw ka kɛ i n’a fɔ wusulan kasa diiman?

²⁰ An ye mun lo ye barokun nin na? An b’a jati ko nɛɛmaba lo an fɛ ka delili kɛ. An ka ɲi ka sinsin koo kɔrɔtaninba minw kan an ka deliliw la, u ka ɲi ka ɲɛsin Jehova sagonata koo lo ma. An b’an ka waleɲumanlɔn yira Ala la a Dencɛ n’a ka Masaya kosɔn. An be delili kɛ fana an balima kerecɛnw ye. Ka fara o kan, an be se ka Jehova deli a k’an ka loon o loon makoɲɛfɛnw di an ma ani a k’an dɛmɛ walisa an ka limaniya sabatinin ka to. An bena min fɔ an ka delili la, n’an be miiri o la koɲuman, an b’a yira ko an be delili jati fɛɛn nafamanba ye. O la, an ka deliliw bena kɛ i ko wusulan kasa diiman Jehova fɛ, o kɔrɔ, u bena ‘diya a ye.’—Talenw 15:8, Bible senuma.