1. Tuma min na Adama ni Awa ye jurumu kɛ, Jehova sinna ka mun lo kɛ? (Zɛnɛzi 3:15).

 TUMA min na Adama ni Awa ye jurumu kɛ, Jehova sinna ka jigiya di u bɔnsɔnw ma kiraya kuma kabakoman dɔ sababu fɛ. A ye min fɔ, o be sɔrɔ Zɛnɛzi 3:15 kɔnɔ.—A kalan.

2. Mun lo b’an kabakoya o kiraya kuma koo la?

² O kiraya kuma be sɔrɔ Bibulu ka kitabu fɔlɔ lo kɔnɔ. Nka, Bibulu ka kitabu tɔɔw bɛɛ ɲɛsinna o kiraya kuma ma cogo dɔ la. Gafe kɔgolo be gafe kuru bɛɛ jɛn ka kɛ kelen ye. O cogo kelen na, min fɔra Zɛnɛzi 3:15 kɔnɔ, o be Bibulu ka kitabu tɔɔw kɔnɔnakumaw jɛn ka kɛ kelen ye. O ye ko Ala bena Kisibaga dɔ ci min bena Sutana n’a kɔmɔgɔw bɛɛ halaki. * O bena kɛ hɛɛrɛko ye Jehova kanubagaw fɛ yɛrɛ le!

3. An bena mun lo lajɛ barokun nin na?

³ Barokun nin na, an bena ɲiningali nunu lajɛ Zɛnɛzi 3:15 ka kiraya kuma koo la: Jɔnw lo kofɔra o kiraya kuma kɔnɔ? O kiraya kuma dafara cogo di? Ani an be nafa jumanw lo sɔrɔla a la?

4. “Saa” min kofɔra, o ye jɔn lo ye ani an b’o lɔn cogo di?

⁴ Minw kofɔra Zɛnɛzi 3:14, 15 kɔnɔ, o ye “saa,” saa “deenw,” “muso” ani muso ‘deenw’ ye. Bibulu b’an dɛmɛ k’a faamu u kelen kelen bɛɛ ye jɔnw lo ye. * An k’a filɛ fɔlɔ jɔn lo ye “saa” ye. Jehova ye min fɔ Edɛn nankɔtu kɔnɔ, saa yɛrɛ yɛrɛ tun tɛ se k’o faamu. O la, Jehova tun be kumana danfɛn hakilitigi dɔ lo fɛ. O ye jɔn lo ye? Yirali 12:9 b’a yira ka gwɛ o saa ye min ye. A b’a yira ko “sakɔrɔ” nin ye Sutana Naafigi lo ye. Nka jɔnw lo ye saa deenw ye?

5. Jɔnw lo ye saa deenw ye?

⁵ Tuma dɔw la ni Bibulu ko “deen,” o ɲɛsinna mɔgɔ dɔ ma min be dɔ ladegi koɲuman ani o tigi be jati a faa ye. O la, saa deenw ye mɛlɛkɛw ni adamadenw ye minw murutira Jehova Ala ma i ko Sutana ani u be Ala sagokɛlaw kɛlɛ. Mɛlɛkɛ dɔw ye u ka baara to yen sankolo la ka na dugukolo kan Nuhun ka wagati la. Olu ani mɔgɔ jugu minw be koow kɛ i ko Sutana, olu lo ye Sutana deenw ye.—Zɛnɛzi 6:1, 2; Zan 8:44; 1 Zan 5:19; Zude 6.

6. “Muso” min kofɔra, mun na o tun tɛ se ka kɛ Awa ye?

⁶ Sisan, an k’a filɛ “muso” ye tigi min ye. A tun tɛ se ka kɛ Awa ye. Mun na do? An ka dalilu kelen dɔrɔn lajɛ. Zɛnɛzi 3:15 ka kiraya kuma b’a fɔ ko muso deen bena saa “kungolo ɲɔɲɔ.” I ko an y’a ye ka tɛmɛ cogo min na, saa ye mɛlɛkɛ dɔ lo ye, o min ye Sutana ye. O kama,  Awa deen dafabali si tun tɛ se ka Sutana kungolo ɲɔɲɔ. O la, Sutana bena halaki cogo di?

7. Ka kɛɲɛ ni Yirali 12:1, 2, 5, ani 10 ye, muso min kofɔra Zɛnɛzi 3:15 kɔnɔ, o ye jɔn lo ye?

⁷ Muso min kofɔra Zɛnɛzi 3:15 kɔnɔ, Bibulu ka kitabu laban b’a yira o ye tigi min ye (Yirali 12:1, 2, 5, 10 kalan). O tɛ muso gwansan ye! Mun na an b’o fɔ? Sabu a fɔra k’o muso seen lanin be kalo kan ani lolo 12 kɛnin be k’a kuun lamini. A ye deen kabakoman dɔ wolo, o min ye Ala ka Masaya ye. Ala ka Masaya be sankolo la. O la, o muso ka ɲi ka kɛ sankolo la fana. Jehova ka ɔriganisasiyɔn faan min be sankolo la, mɛlɛkɛ kantigiw lo b’a kɔnɔ. O muso ye o ɔriganisasiyɔn lo tagamasiɲɛ ye.—Gal. 4:26.

8. Muso deenw la fɔlɔ ye jɔn lo ye ani a kɛra o ye tuma juman? (Zɛnɛzi 22:15-18).

⁸ Ala ka Kuma b’an dɛmɛ k’a faamu muso deenw la fɔlɔ ye tigi min ye. O deen tun ka ɲi ka kɛ Ibrayima kɔmɔgɔ halala ye (Zɛnɛzi 22:15-18 kalan). Ka kɛɲɛ n’o kiraya kuma ye, Yezu ye o cɛɛ kantigi kɔmɔgɔ yɛrɛ yɛrɛ lo ye (Luka 3:23, 34). A barika ka ɲi ka bonya ka tɛmɛ adamaden ta kan sabu a ka ɲi ka Sutana Naafigi halaki pewu. O kama, tuma min na Yezu tun be ni saan 30 ɲɔgɔn ye, Ala y’a mɔ ni hakili senu ye. O wagati la, Yezu kɛra muso deenw la fɔlɔ ye (Gal. 3:16). Yezu saya n’a suu kununi kɔ, Ala ye “nɔɔrɔ ni boɲa la a kan” ani a ye “sebagaya bɛɛ di [a] ma sankolo la ani dugukolo kan.” Misali la, a ye sebagaya di Yezu ma walisa a ka “Sutana ka kɛwaliw cɛn.”—Eburuw 2:7; Mat. 28:18; 1 Zan 3:8.

9-10. a) Jɔnw lo fana ye muso deenw ye ani u kɛra o ye tuma juman? b) An bena mun lo lajɛ sisan?

⁹ Muso min kofɔra, a be ni deen wɛrɛw ye. Ciden Pol y’a yira mɔgɔ minw lo tuma min na a tun be kumana Yahutuw ni siya wɛrɛ mɔgɔw fɛ minw tun ye kerecɛn mɔlenw ye. A ko: “N’aw kɛra Krista ta ye, aw ye Ibrayima kɔmɔgɔw ye, aw fana bena niyɔrɔ sɔrɔ Ala ka dadili la.” (Gal. 3:28, 29). Ni Jehova ye kerecɛn dɔ mɔ ni hakili senu ye, o tigi be kɛ muso nin deen dɔ ye. O la, muso deenw ye Yezu Krista ni a marakɛɲɔgɔn mɔgɔ 144000 nunu ye (Yir. 14:1). U bɛɛ b’u jija ka miiri ani ka koow kɛ i ko u Faa Jehova Ala.

¹⁰ Minw kofɔra Zɛnɛzi 3:15 kɔnɔ, an y’a lɔn mɔgɔ minw lo. Sisan, an k’a lajɛ Jehova b’a kɛra o kiraya kuma be dafara dɔɔni dɔɔni cogo min na ani an be nafa min sɔrɔla o la.

11. Kɔrɔ juman na saa tun bena muso deen cin “a seen na”?

¹¹ A fɔra Zɛnɛzi 3:15 ka kiraya kuma kɔnɔ ko saa tun bena muso deen cin “a seen na.” O dafara tuma min na Sutana ye Yahutuw ni Ɔrɔmukaw lasun u ye Ala Dencɛ faga (Luka 23:13, 20-24). Mɔgɔ seen mana mandimi, o be se k’a tigi bali ka tagama wagati dɔ la. O cogo kelen na, Yezu ma se ka foyi kɛ wagati dɔ la sabu a tun sara ani u y’a suu don.—Mat. 16:21.

12. Saa kuun bena ɲɔɲɔ cogo di ani tuma juman?

¹² Walisa Zɛnɛzi 3:15 ka kiraya kuma ka dafa, fɔɔ Yezu suu tun ka kunu ka bɔ kaburu kɔnɔ. Mun na do? Sabu ka kɛɲɛ ni o kiraya kuma ye, muso deen bena saa  kungolo ɲɔɲɔ. O kɔrɔ ko Yezu tun ka kan ka kunu ka bɔ saya la. O lo kɛra jaatika! Tile sabanan loon Yezu sanin kɔ, a suu kununa. O kɔ, a tagara sankolo la ani a ye sabaliya sɔrɔ. Ala ka wagati latigɛnin na, Yezu bena Sutana kungolo ɲɔɲɔ k’a halaki pewu pewu! (Eburuw 2:14). Krista n’a marakɛɲɔgɔnw bena Ala juguw, o kɔrɔ saa deenw bɛɛ halaki ka bɔ dugukolo kan.—Yir. 17:14; 20: 4, 10. *

13. An be nafa jumanw lo sɔrɔla o kiraya kuma dafali koo la?

¹³ N’i ye Ala sagokɛla dɔ ye, o kɔrɔ ko i be nafa sɔrɔla o kiraya kuma dafali koo la. Yezu nana dugukolo kan adamaden cogo la ani a y’a Faa ka jogow yira cogo dafanin na (Zan 14:9). Ale sababu la, an sera ka Jehova Ala lɔn ani k’a kanu. An be nafa sɔrɔla Yezu ka kalanw n’a ka cikanw na fana sabu ale lo be kerecɛn kafo ɲɛminɛna. A y’a yira an na an be se ka ɲɛnamaya kɛ cogo min na walisa k’an koo diya Jehova ye. Ka fara o kan, saa ye Yezu cin a seen na, o kɔrɔ Yezu sara minkɛ, o be an bɛɛ nafa. Cogo di do? Jehova ye Yezu lakunu. O kɔ, a sɔnna a Dencɛ Yezu ka saraka dafanin na, o min “b’an ka hakɛw bɛɛ bɔ an na.”—1 Zan 1:7.

14. An b’a lɔn cogo di ko Jehova ye kiraya kuma min fɔ Edɛn nankɔ kɔnɔ, o ma sin ka dafa?

¹⁴ Jehova ye kiraya kuma min fɔ Edɛn nankɔ kɔnɔ, o b’a yira ko wagati dɔ tun ka ɲi ka tɛmɛ, o kiraya kuma kuru bɛɛ be sɔrɔ ka dafa. Walisa muso ka deenw sɔrɔ, Sutana k’a nɔfɛmɔgɔw lajɛn ani juguya wala kɔniya ka kɛ o jɛnkulu fila cɛ, o tun bena wagati ta. N’an b’o kiraya kuma faamu, o b’an nafa. A b’an lasɔmi ko duniɲamɔgɔw bena Jehova sagokɛlaw kɔniya sabu Sutana lo be duniɲa nin marala. Kɔfɛ, Yezu ye o lasɔmini kuma ɲɔgɔn lase a ka kalandenw ma (Mariki 13:13; Zan 17:14). Siga t’a la, o kiraya kuma y’an lasɔmi min na an y’a ye k’o be dafara, sanko saan 100 tɛmɛninw na. Cogo di do?

15. Mun na duniɲamɔgɔw b’an kɔniya bi ka tɛmɛ sanga ni wagati bɛɛ kan? Nka mun na kuun t’a la an ka siran Sutana ɲɛ?

¹⁵ Dɔɔni Yezu siginin kɔ masaya la saan 1914, a ye Sutana gwɛn ka jigi dugukolo kan. Sisan, Sutana be dugukolo fanfɛla la ani a bena halaki yanni dɔɔni (Yir. 12:9, 12). Nka yanni o cɛ, a m’a bolo kuru ka sigi. A dimininba lo minkɛ, a wulila Ala sagokɛlaw kama (Yir. 12:13, 17). O lo kama, duniɲamɔgɔw b’an kɔniya bi ka tɛmɛ sanga ni wagati bɛɛ kan. Nka, kuun t’a la an ka siran Sutana n’a kɔmɔgɔw ɲɛ. I ko ciden Pol, an lanin b’a la ko: “Ni Ala b’an fɛ, jɔn be wili an kama tugu?” (Ɔrɔm. 8:31). An be se k’an jigi bɛɛ la Jehova kan. Mun na do? Sabu i ko an y’a ye cogo min na, Zɛnɛzi 3:15 ka kiraya kuma fanba dafara ka ban.

16-18. Curtis, Ursula ani Jessica ye nafa jumanw lo sɔrɔ sabu u ye Zɛnɛzi 3:15 faamu?

¹⁶ Jehova ka layidu min be sɔrɔ Zɛnɛzi 3:15 kɔnɔ, o be se k’an dɛmɛ ka gwɛlɛya sifa bɛɛ muɲu. Curtis ye misɔnden ye Guwamu guun kan ani a ko: “Gwɛlɛya dɔw ye n’ sɔrɔ minw ye n’ ka kantigiya  kɔrɔbɔ Jehova koo la. Nka, kiraya kuma min be sɔrɔ Zɛnɛzi 3:15 kɔnɔ, n’ kɛtɔ ka miiri o kan, o ye n’ dɛmɛ n’ tora ka n’ jigi la n’ sankolola Faa kan.” Loon min na Jehova bena daan sigi an ka gwɛlɛyaw bɛɛ la, Curtis kɔrɔtɔnin lo o loon ka se.

¹⁷ Balimamuso Ursula be Baviyɛri mara la. A ko ale kɛtɔ ka Zɛnɛzi 3:15 faamu, o y’a to ale lara a la ko Bibulu bɔra Ala lo yɔrɔ. A y’a faamu jɛɛn min be o kiraya kuma ni Bibulu ka kiraya kuma tɔɔw cɛ ani o y’a dusu sɔrɔ kosɔbɛ. A y’a fɔ fana ko: “Tuma min na n’ y’a lɔn ko Jehova sinna ka dɔ kɛ dɔ ye walisa ka jigiya di an ma, o y’a to n’ y’a kanu kosɔbɛ.”

¹⁸ Jessica be bɔ Mikronezi mara la ani a ko: “Tuma min na n’ y’a faamu ko n’ ye tiɲɛn diinan sɔrɔ, n’ bele hakili b’a la o ye min kɛ n’ na! Zɛnɛzi 3:15 ka kiraya kuma be dafara minkɛ, o ye n’ dɛmɛ n’ y’a to n’ hakili la ko gwɛlɛya minw b’an kan bi, o tɛ Jehova sago ye. O kiraya kuma ye n’ dɛmɛ fana ka la a la kosɔbɛ ko n’an be Jehova sago kɛ, o b’a to an be ɲɛnamaya kɛ cogo fisaman na kabi sisan. Ani sini ma, an bena ɲɛnamaya sɔrɔ min ɲɔgɔn tɛ yen.”

19. Mun na an be se ka la a la ko Zɛnɛzi 3:15 ka kiraya kuma yɔrɔ laban bena dafa?

¹⁹ I ko an y’a ye barokun nin na cogo min na, Zɛnɛzi 3:15 ka kiraya kuma be dafara. An y’a faamu ka ɲɛ muso deenw ni saa deenw ye minw ye. Yezu lo ye muso deenw la fɔlɔ ye. Saa tun y’a cin yɔrɔ min na, o sumana ani sisan Masacɛ nɔɔrɔman lo min tɛ se ka sa. Jehova ye muso deen tɔɔw fanba sugandi ka ban. Komi Zɛnɛzi 3:15 ka kiraya kuma yɔrɔ fɔlɔ dafara ka ban, an lanin b’a la ko a yɔrɔ laban fana bena dafa. O ye ko muso deen bena saa kungolo ɲɔɲɔ. Yezu bena Sutana halaki tuma min na, o bena kɛ ninsɔndiyako ye Ala sagokɛlaw fɛ yɛrɛ le! Yanni o cɛ, kana i fari faga. An ka Ala tɛ ngalon tigɛ. A bena tɛmɛ muso deenw fɛ ka duga caamanba lase “siyaw bɛɛ” ma dugukolo kan.—Zɛnɛzi. 22:18.