Yezu ka kalanw na, a tun be mɔgɔw jija u ka to hɛɛrɛ la ni ɲɔgɔn ye. Nka loon dɔ, a y’a fɔ a ka cidenw ye ko: “Aw kana miiri ko ne nana ni hɛrɛ ye diɲɛ na dɛ. Ne ma na ni hɛrɛ ye, nga ne nana ni murujan le ye. Ne nana ka dencɛ n’a facɛ bila ɲɔgɔn na, ka denmuso n’a bamuso bila ɲɔgɔn na, ka furumuso n’a biranmuso bila ɲɔgɔn na.” (Mat. 10:34, 35). Yezu tun b’a fɛ ka mun lo fɔ do?

Yezu ka laɲinita tɛ ka denbayaw faran faran. Nka, a tun b’a lɔn ko a ka kalanw bena na ni farali ye denbaya dɔw kɔnɔ. O kama, mɔgɔ minw b’a fɛ ka kɛ Krista ka kalandenw ye ani ka batize, olu ka ɲi k’a faamu ko tuma dɔw la u somɔgɔw dusu tɛna diya u ka desizɔn kosɔn. Tuma dɔw la, u furuɲɔgɔn dannabali wala u somɔgɔ wɛrɛw be se ka wuli u kama ani o b’a to a be gwɛlɛya u ma ka Krista ka kalanw sira tagama kantigiya la.

Bibulu be kerecɛnw jija ko u ka to “hɛrɛ la ni mɔgɔ bɛɛ ye.” (Ɔrɔm. 12:18). Nka, Yezu ka kalanw be se ka kɛ i ko “murujan” denbaya dɔw kɔnɔ. O be kɛ ni denbayamɔgɔ dɔ sɔnna Yezu ka kalanw ma k’a sɔrɔ tɔɔw sɔnnin tɛ u ma. O koo ɲɔgɔn na, min sɔnna Yezu ka kalanw ma ale be kɛ denbayamɔgɔ tɔɔw ‘jugu’ ye.—Mat. 10:36.

Krista ka kalanden dɔw be n’u somɔgɔw ye minw be diinan wɛrɛ la. Tuma dɔw la, u ka ɲi k’a latigɛ n’u bena Jehova ni Yezu lo dusu diya wala n’u bena u somɔgɔw lo dusu diya. Misali la, u somɔgɔ minw tɛ Jehova Seerew ye, olu be se k’u lasun u ka diinan fɛti dɔ kɛ. O koo ɲɔgɔn na, u ka ɲi k’a latigɛ u b’a fɛ k’u koo diya mɔgɔ min ye. Yezu ko: “Ni mɔgɔ min b’a facɛ, walima a bamuso kanu ka tɛmɛ ne kan, o tigi te se ka kɛ ne ka kalanden ye.” (Mat. 10:37). Yezu tun t’a fɛ k’a fɔ le ko walisa ka kɛ ale ka kalandenw ye, Bibulu kalandenw man ɲi k’u somɔgɔw kanu kosɔbɛ tugun. Nka, a tun b’a yirala a ka kalandenw na le min ka ɲi ka kɛ u ɲɛnako fɔlɔ ye. Hali n’an somɔgɔw b’an kɛlɛ sabu an be Jehova batora, an bele be to k’u kanu. Nka, an b’a faamu ko an be ni kanuya min ye Ala koo la, o lo kɔrɔtanin lo ka tɛmɛ fɛɛn bɛɛ kan.

Siga t’a la n’an somɔgɔw b’an kɛlɛla, o be se k’an dusu tiɲɛ kosɔbɛ. Nka, Yezu ka kalandenw ka ɲi k’a ka kuma nunu to u hakili la: “Ni mɔgɔ min m’a yɛrɛ gwengwenlɔgɔ ɲun ka tugu ne kɔ, o tigi man kan ni ne ye.” (Mat. 10:38). O kɔrɔ ko ni kerecɛnw somɔgɔ dannabaliw b’u kɛlɛla, u b’a jati k’o ye tɔɔrɔko dɔ ye Krista ka kalandenw ka ɲi ka sɔn min ma. Nka, u jigi b’a la ko u ka kɛwale ɲumanw be se ka kɛ sababu ye u somɔgɔw be u ka miiriya yɛlɛma u koo la ani u b’a ɲini ka dɔ lɔn Bibulu ka kalanw koo la.—1 Piyɛri 3:1, 2